ఏడాదిలోపు పేదోడికి ఇళ్లు ఇస్తారంట..

15:15 - November 14, 2017

విజయవాడ : రాష్ట్రంలోని పేదోడికి ఇళ్లు కట్టించాలనేది ఏపీ ప్రభుత్వ లక్ష్యమని సీఎం చంద్రబాబు నాయుడు పేర్కొన్నారు. ఏపీ శాసనభలో మంగళవారం ఇళ్ల నిర్మాణంపై చంద్రబాబు చర్చించారు. పేదలకు సొంత ఇళ్లు నిర్మించడంలో తనకు ఆనందం ఉందని..ఇళ్ల నిర్మాణానికి సిమెంట్..ఇసుక కొరత లేదన్నారు. పేదల ఇళ్ల నిర్మాణాన్ని స్థానిక ఎమ్మెల్యేలు పర్యవేక్షించాలని సూచించారు. ఒక్క పైసా అవినీతి చేస్తే తిరిగి డబ్బులు ఇప్పించే వరకు 'పరిష్కార వేదిక' కృషి చేస్తుందని, ఇంతకు ముందు జరిగిన తప్పులు పునరావృతం కావద్దని పేర్కొన్నారు. నెలకు ఒకసారి ఎమ్మెల్యేలు ఆ ఇంటికి వెళ్లాలని..ఇళ్లు కట్టే సమయంలో లబ్దిదారులను ప్రభుత్వం సొంత ఖర్చుతో తీసుకెళుతామని..అక్కడ వారికి టీ..టిఫిన్ కూడా అందచేస్తామన్నారు.

విశాఖలో 50 వేల మంది ఇళ్ల స్థలాలకు పట్టాలిచ్చామని, రాష్ట్రంలో 15 లక్షల నుండి 20 లక్షల మందికి ఇంటి స్థలం ఇచ్చి క్రమబద్దీకరించాల్సి ఉందన్నారు. కాంగ్రెస్ పాలనలో 14.40 లక్షల ఇళ్లు కాగితాలకే పరిమితమయ్యాయని విమర్శించారు. ఇళ్ల నిర్మాణంలో అక్రమాలపై దర్యాప్తు చేయించి చర్యలు తీసుకుంటామని, తిరుపతిలో 2,388 ఇళ్లు నాలుగు బ్లాక్ ల కింద పూర్తి చేసినట్లు, మరో 4,500 ఇళ్లు జనవరిలో పూర్తి చేస్తామని చెప్పుకొచ్చారు. తిరుపతిలో అదనంగా రూ. 100 కోట్లు ఖర్చు పెట్టి ఇళ్ల నిర్మాణం పూర్తి చేశామన్నారు. 

Don't Miss