అరుణ వర్ణంగా భాగ్యనగరం..

08:03 - April 17, 2018

హైదరాబాద్: ఎర్రజెండా పండుగకు ఏర్పాట్లు చివరిదశకు చేరుకున్నాయి. భారత కమ్యూనిస్టుపార్టీ మార్క్సిస్ట్‌ 22వ జాతీయ మహాసభలకు హైదరాబాద్‌ నగరం ముస్తాబవుతోంది. మహాసభల ప్రధాన వేదిక అయిన ఆర్టీసీ కల్యాణమండపం పరిసరాలు అరుణవర్ణాన్ని సంతరించుకున్నాయి. రేపటి నుంచి ప్రారంభమవుతున్న మహాసభల ఏర్పాట్లను సీపీఎం ఆగ్రనేతలు దగ్గరుండి మరీ పర్యవేక్షిస్తున్నారు. ఈనెల 22న జరుగనున్న బహిరంగసభ ఏర్పాట్లు కూడా చకచకా పూర్తవుతున్నాయి. బహిరంగసభకు తెలుగు రాష్ట్రాల నుంచి లక్షలాది మంది కార్యకర్తలు, అభిమానులు తరలి వస్తారని సీపీఎం నేతలు చెబుతున్నారు.

సిపిఎం 22వ అఖిల భారత మహాసభలు
సిపిఎం 22వ అఖిల భారత మహాసభలకు అన్ని ఏర్పాట్లు పూర్తయ్యాయి. దేశ నలుమూలల నుండి వచ్చే ప్రతినిధులు నాలుగు రోజులపాటు సాగే మహాసభల్లో వివిధ తీర్మాణాలపై చర్చించనున్నారు. మహాసభల ముగింపు రోజు ఈ నెల 22న సరూర్ నగర్ ఇండోర్ స్టేడియంలో లక్షలాది మందితో భారీ బహిరంగ సభ నిర్వహిస్తున్నట్టు అందుకు తగ్గ ఏర్పాట్లు తుది దశకు చేరుకున్నాయని ఆ పార్టీ నేతలంటున్నారు.

పార్టీ ఆలిండియా మహాసభలకు భారీగా ఏర్పాట్లు
హైదరాబాద్ నగరంలో జరిగే పార్టీ ఆలిండియా మహాసభలకు భారీగా ఏర్పాట్లు చేస్తోంది సిపిఎం తెలంగాణ రాష్ట్ర శాఖ. అత్యంత వేగంగా సాగుతున్న పనులను పార్టీ అగ్రనాయకులు స్వయంగా పర్యవేక్షిస్తున్నారు. 8 వందలకు పైగా వాలంటీర్లు ఈ ఏర్పాట్లలో తలమునకలయ్యారు. ఇప్పటికే రాష్ట్రంలోని అన్ని జిల్లాల్లో వీధివీధినా ఎర్రజెండాల రెపరెపలాడుతున్నాయి. ఇటు హైదరాబాద్‌ నగర వ్యాప్తంగా ఎర్రజెండాలు, తోరణాలు, వాల్ రైటింగ్‌లతో అరుణవర్ణం సంతరించుకుంది. ప్రధాన కూడల్లలో స్వాగత తోరణాలను ఏర్పాటు చేసిన సీపీఎం కార్యకర్తలు మహాసభల విశిష్టతను విస్తృతంగా ప్రచారం చేస్తున్నారు.

ఆర్టీసీ కళ్యాణ మంటపం పరిసర ప్రాంతాలు అరుణవర్ణం
మహాసభల వేదికయిన ఆర్టీసీ కళ్యాణ మంటపం పరిసర ప్రాంతాలు అరుణ వర్ణాన్ని సంతరించుకున్నాయి. మహాసభ ప్రాంగణం వద్ద ఏర్పాటు చేసిన ప్రధాన ద్వారం అకట్టుకునేలా ఉంది. శ్రామిక వర్గ స్పూర్తిని, అలనాటి తెలంగాణ రైతాంగ సాయుధ పోరాట ఘట్టాన్ని తెలియజెపుతూ ఏర్పాటు చేసిన చిత్రాలు ఆకట్టుకుంటున్నాయి. అమర వీరుల స్మారకం, మార్క్స్, ఎంగెల్స్, లెనిన్, స్టాలిన్ల చిత్రాలతో పాటు తెలంగాణ సాయుధ పోరాట కాలంలో పార్టీ నేత సుందరయ్య పాల్గొన్న ఘట్టాలతో కూడిన పెయింటింగ్‌లు ఏర్పాటు చేశారు. తెలంగాణ చరిత్రకు చిహ్నంగా భాసించే కాకతీయుల కళాతోరణం ప్రత్యేక ఆకర్షణగా ఉంది. పార్టీ పొలిట్ బ్యూరో సభ్యుడు బివి. రాఘవులు, తెలంగాణ రాష్ట్ర కార్యదర్శి తమ్మినేని వీరభద్రం సహా ముఖ్యనేతలు ఏర్పాట్లలో పాలు పంచుకుంటున్నారు. మహాసభల విజవంతానికి ఏర్పాటు చేయడానికి పార్టీ రాష్ట్ర నాయకులతో 25 కమిటీలను ఏర్పాటు చేశామన్నారు రాష్ట్ర కార్యదర్శి తమ్మినేని. అన్ని కమిటీలు చక్కని సమన్వయంతో పని చేస్తున్నాయన్నారు. మహాసభలు విజయవంతంగా నిర్వహించి.. తెలంగాణ రాష్ట్రంలో రాజకీయం పెద్ద ప్రభావాన్ని చూపాలని మార్క్సిస్ట్‌పార్టీ నేతలు బావిస్తున్నారు. 

Don't Miss