మరో రెండు రోజులూ వర్షాలు..

21:23 - June 19, 2017

హైదరాబాద్ : నైరుతి రుతుపవనాలతో తెలంగాణ రాష్ట్ర వ్యాప్తంగా వర్షాలు విస్తారంగా కురుస్తున్నాయి. పలు జిల్లాల్లో మోస్తరు నుంచి భారీ వర్షాలు పడ్డాయి. వానల కారణంగా రహదారులన్నీ జలమయమయ్యాయి. వాగులు, కాలువలు పొంగి ప్రవహిస్తున్నాయి. తెలంగాణలో విస్తృతంగా వర్షాలు పడుతున్నాయి. ఈ మేరకు ఆదిలాబాద్‌ జిల్లాలోని... ఉట్నూరు ఏరియాలో భారీ వర్షపాతం నమోదైంది. కొన్నిచోట్ల రోడ్లు కొట్టుకుపోయే పరిస్థితి కనిపిస్తోంది. అదేవిధంగా సంగారెడ్డి జిల్లాలో ఎడతెరిపి లేకుండా వర్షం కురుస్తోంది. దీంతో జహీరాబాద్‌, న్యాల్‌కల్‌, ఝరాసంగం, కోహీర్‌ మండలాల్లో భారీ వర్షపాతం నమోదైంది. జహీరాబాద్‌ ప్రాంతంలోని పలు వాగులు వరద నీటితో ఉధృతంగా ప్రవహిస్తున్నాయి. రహదారులపై భారీగా వర్షపు నీరు చేరింది. మహబూబ్‌నగర్‌ జిల్లా... బాదేపల్లి పట్టణంలో 10 సెంటి మీటర్ల వాన కురిసింది. దీంతో రోడ్లు, ప్రధాన వీధులు చెరువులను తలపిస్తున్నాయి. జిల్లా పరిషత్‌ బాలికల ఉన్నత పాఠశాలలో భారీగా వర్షపు నీరు చేరి...తరగతి గదులన్నీ బురదమయంగా మారాయి.

వాగు దాటడానికి ప్రయత్నించి..
ఏకదాటిగా కురుస్తోన్న వానలకు మెదక్‌ జిల్లా సత్యగామ వాగు పొంగిపొర్లుతోంది. వాగును దాటడానికి ప్రయత్నించిన ఇద్దరు యువకులు బైక్‌తో సహా కొట్టుకుపోయారు. స్థానికులు తాడు సాయంతో యువకులను రక్షించారు. వికారాబాద్‌ జిల్లా.. పరిగిలో ఉదయం నుంచి భారీగా వర్షం పడుతుంది. పరిసర ప్రాంతాలలోని చిన్న వాగులు పొంగిపొర్లుతున్నాయి. నస్కల్‌ సమీపంలోని వాగు ఉధృతంగా ప్రవహిస్తుండడంతో పరిగి-వికారాబాద్‌ మధ్య రాకపోకలు నిలిచిపోయాయి. అలాగే పిడుగు పడి పెద్దపల్లి జిల్లా... ఓదెల మండలం పొత్కపల్లి వద్ద రైల్వే సిగ్నల్‌ వ్యవస్థ పూర్తిగా నిలిచిపోయింది. దీంతో పలు రైళ్ల రాకపోకలకు అంతరాయం ఏర్పడింది. ప్రయాణికులు నానా అవస్థలు పడ్డారు. రోడ్లపై భారీగా నీరు చేరడంతో.. ద్విచక్ర వాహనదారులు, ఉద్యోగులు, విద్యార్థులు చాలా ఇబ్బందులు పడుతున్నారు. వర్షం కారణంగా మేడ్చల్‌ జిల్లా.. కీసర మండలం నాగరం గ్రామంలో గురుకుల పాఠశాల గదుల్లో నీరు చేరింది. విద్యార్థులు ఇబ్బందులు పడ్డారు. కాగా మరో రెండు రోజులు పాటు రాష్ట్రంలో ఓ మోస్తరు వర్షాలు కురుస్తాయని హైదరాబాద్ వాతావరణ కేంద్రం తెలిపింది. సీజన్‌ ప్రారంభంలోనే వర్షాలు పడటంతో.. రైతుల్లో ఆనందం వ్యక్తమవుతోంది.

Don't Miss