శిల్పా శెట్టి దంపతుల ఫొటోలు తీస్తే చావబాదారు..

12:53 - September 8, 2017

బాలీవుడ్ నటి శిల్పా శెట్టి, రాజ్ కుంద్రా దంపతుల ఫొటోలు తీస్తే నేరమా ? వారి ఫొటోలు తీయవద్దా ? తీస్తే చావబాదుతారా ? అనే ప్రశ్నలు సోషల్ మీడియాలో వినిపిస్తున్నాయి. వారి ఫొటోలు తీసిన ఫిల్మ్ జర్నలిస్టులపై బౌన్సర్లు విరుచకపడుతున్న వీడియోలు ప్రస్తుతం వైరల్ అవుతున్నాయి.

గురువారం రాత్రి శిల్పా భర్త రాజ్ కుంద్రాతో కలిసి ముంబైలోని బాస్టియన్ రెస్టారెంట్ కు వెళ్లింది. ఈ విషయం తెలిసిన స్థానిక ఫొటోగ్రాఫర్లు రెస్టారెంట్ వద్దకు చేరుకున్నారు. బయటకు వెళ్లే సమయంలో జర్నలిస్టులు, అక్కడున్న ఇతరులు తమ వద్ద ఉన్న కెమెరాలు, సెల్ ఫోన్లలో వారిని బంధించేందుకు ప్రయత్నించారు. ఈ సందర్భంగా శిల్పా, రాజ్ లు సైతం ఫొజోలిచ్చి వెళ్లిపోయారు. వాళ్లు అలా వెళ్లిపోయారో లేదో హోటల్ బౌన్సర్లు దాడికి దిగారు. దొరికిన వారిని దొరికినట్టు చితకబాదారు. సోను, హిమాన్షు అనే ఫొటోగ్రాఫర్లపై పిడుగుద్దుల వర్షం కురిపించారు. వారు కూడా ప్రతిఘటించారు. తీవ్రంగా గాయపడిన సోను, హిమన్షులను ఆసుపత్రికి తరలించారు. ఈ దాడి ఘటనను కొంతమంది సెల్ ఫోన్ లో వీడియో తీశారు. బౌన్సర్ల దాడిపై జర్నలిస్టులు పోలీసులకు ఫిర్యాదు చేయడంతో బౌన్సర్లను అదుపులోకి తీసుకున్నారు. 

Don't Miss