ఆమె ఆకాశంలో 'అవని'...

14:52 - April 25, 2018

ఆడవారిని ఆకాశంలో సగం, అవనిలో సగం అంటారు. పురుషులతో సమానంగా మహిళలు అన్ని రంగాల్లో తమదైన స్థానాన్ని సృష్టించుకుంటున్నారు,నిలుపుకుంటున్నారు. కృషి, పట్టుదల.. కఠోరదీక్షలే మహిళలను శిఖరసమానులను చేస్తున్నాయి. ఈనేపథ్యంలో మహిళలు వచ్చిన అవకాశాలను చేజిక్కించుకుంటున్నారు. సమర్థతను చాటిచెబుతున్నారు. ఎన్ని అవాంతరాలు ఎదుర్కొచ్చినా అదరక, బెదరక తమ స్థానాన్ని సుస్థిరం చేసుకోవటంతో పాటు తమ ముద్రను చాటిచెబుతున్నారు. ఈ నేపథ్యంలో భారత వాయు సేన చరిత్రలో అద్భుత ఘట్టంలో తన ప్రతిభను చాటి చెప్పింది పేరులోనే అవనిని ప్రతిబింభించిన అవనీ చతుర్వేది. దేశంలో ‘మిగ్‌ 21 బైసన్‌ ’యుద్ధవిమానాన్ని నడిపిన తొలి భారతీయ మహిళగా చరిత్ర సృష్టించింది.

మిగ్‌ 21 బైసన్‌ ’యుద్ధవిమానాన్ని నడిపిన తొలి భారతీయ మహిళ..
దేశంలో ‘మిగ్‌ 21 బైసన్‌ ’యుద్ధవిమానాన్ని నడిపిన తొలి భారతీయ మహిళ అవనీ చతుర్వేది. అవని మధ్యప్రదేశ్ కు చెందిన షాడోల్ జిల్లాలోని డియోల్యాండ్ అనే చిన్న పట్టణంలో చదువుకుంది. ఇండియన్‌ ఎయిర్‌ ఫోర్స్‌ ఫైటర్‌ స్క్వాడ్రన్‌లో తొలి మహిళా పైలట్‌ బ్యాచ్‌లో ఎంపికయ్యింది. హైదరాబాద్‌ ఎయిర్‌ఫోర్స్‌ అకాడమీలో శిక్షణ పొందింది.

బహుముఖ ప్రజ్నాశాలి అవని..
ఎవరికైనా ఒకదానిపై ఆసక్తి వుంటే దానిపైనే దృష్టి పెడతారు. మరి దేనిపైనా ఆసక్తిని పెంచుకోరు. కానీ అవిని అలా కాదు. ఆమె బహుముఖ ప్రజ్నాశాలి. టేబుల్‌ టెన్నిస్‌, చెస్‌ లాంటివాటిపై ఆసక్తే కాదు, చిత్రలేఖనంలో కూడా తన ప్రతిభను కనబరిచింది. సోదరుడు ఆర్మీ ఆఫీసర్‌ కావడంతో దానిని స్ఫూర్తిగా తీసుకున్న అవని చిన్నవయసు నుంచీ ఆర్మీలో ఉద్యోగం చేయాలని ఆశలు పెంచుకుంది. విమానం నడపాలనే ఆసక్తి పెరగటంతో కాలేజీ రోజుల్లో ఫ్లైయింగ్‌ క్లబ్‌లో చేరింది. ఆ అనుభవంతోనే యుద్ధవిమానాలను నడిపితే ఎలా ఉంటుందని అనుకుంది. అలాంటి అవకాశాన్ని అందుకోవాలనుకుంది. అలా శిక్షణ వైపు వెళ్లింది. మహిళలకు ఇటువంటి ఉద్యోగం ఒకవిధంగా సాహసమే అయినా ఓ సవాలుగా తీసుకున్నానని తెలిపింది అవని. కానీ ఎప్పటికప్పుడు కొత్త విషయాలు తెలుసుకుంటూ..తనను తాను మెరుగుపరచుకోవాలనే ఆసక్తి అవని సొంతం. దేశరక్షణలో తాను కూడా ఒక భాగం కావడం తను గర్వకారణంగా భావిస్తుంది అవని. ఇంతటి సాహసోపేతమైన రంగంలోకి రావాలనుకునే ఎందరో మహిళలకు అవని ఓ స్ఫూర్తిదాయకంగా నిలుస్తోంది.


 

Don't Miss