నల్గొండ కాంగ్రెస్ మీటింగ్ లో రచ్చ...

15:16 - November 3, 2018

నల్గొండ : తెలంగాణ రాష్ట్రంలో త్వరలో జరిగే ఎన్నికల్లో అధికారంలోకి రావాలని తహతహలాడుతున్న కాంగ్రెస్ పార్టీకి సొంత నేతల నుండే సమస్యలు వస్తున్నాయి. అంతర్గత విబేధాలు...పార్టీ నేతల మధ్య విబేధాలు పొడచూపుతున్నాయి. దీనితో పార్టీ పరువు కాస్తా బజారున పడుతోంది. తాజాగా మిర్యాలగూడలో కాంగ్రెస్ నిర్వహించిన సమావేశం రచ్చ రచ్చ అయ్యింది. టికెట్ తమకంటే తమకే కేటాయించాలంటూ ఆశావాహులు ఆందోళన చేశారు. స్వయంగా కాంగ్రెస్ సీనియర్ నేత జానారెడ్డి ఎదుటే ఈ రచ్చ జరగడం విశేషం. 
సమావేశానికి సీనియర్ నేత జానారెడ్డి హాజరయ్యారు. సమావేశంలో జానారెడ్డి ఎదుటే అమరేందర్ రెడ్డి, శంకర్ నాయక్ వర్గాలు ఆందోళన చేపట్టాయి. ఇటీవలే టీఆర్ఎస్ పార్టీకి గుడ్ బై చెప్పి కాంగ్రెస్ తీర్థం తీసుకున్న అమరేందర్ రెడ్డికి టికెట్ కేటాయిస్తారంటూ ప్రచారం జరిగింది. దీనితో మొదటి నుండి పార్టీ కోసం పనిచేస్తున్న వారు ఆందోళన చేపట్టారు. పార్టీ మారిన వారికి కాకుండా పార్టీ కోసం పనిచేస్తున్న స్థానికులకే టికెట్ ఇవ్వాలని నిరసన వ్యక్తం చేశారు. టికెట్ కోసం స్కైలాబ్ నాయక్, శంకర్ నాయక్, అమరేందర్ రెడ్డిలు ప్రయత్నాలు చేస్తున్నట్లు తెలుస్తోంది. 

Don't Miss