కేంద్ర కేబినెట్.. పలు కీలక నిర్ణయాలు

21:54 - September 12, 2017

ఢిల్లీ : ప్రధాని నరేంద్రమోది నేతృత్వంలో ఢిల్లీలో జరిగిన కేంద్ర కేబినెట్ సమావేశం పలు కీలక నిర్ణయాలు తీసుకుంది.  కేంద్ర ప్రభుత్వ ఉద్యోగులకు 1శాతం అదనపు డీఏకు గ్రీన్ సిగ్నల్ లభించింది. ప్రస్తుతం అమలులో ఉన్న 4 శాతం డిఏకు ఇది అదనం. జులై 1, 2017 నుండి అదనపు డీఏ వర్తిస్తుంది. అలాగే గ్రాట్యుటీ చెల్లింపు గరిష్ట పరిమితిని పెంచే చట్ట సవరణకు కూడా కేబినెట్ గ్రీన్ సిగ్నల్ ఇచ్చింది. 7వ వేతన సంఘం సిఫారసు మేరకు గ్రాట్యుటీ గరిష్ట పరిమితి... 10 లక్షల నుండి 20 లక్షల పెంపునకు కేబినెట్ ఆమోదం తెలిపింది. డియర్‌నెస్‌ అలవెన్స్‌ను, డియర్‌నెస్‌ రిలీఫ్‌ను 1 శాతం పెంచి 5 శాతానికి పెంచింది. దీంతో కేంద్ర ఖజానాపై 3 వేల 68 కోట్ల భారం పడనుంది. కేంద్ర కేబినెట్‌ తీసుకున్న నిర్ణయంతో 49.26 లక్షల మంది ప్రభుత్వ ఉద్యోగులు, 61.17 లక్షల మంది పెన్షనర్లు లబ్ది పొందనున్నారు. వీటితో పాటు... ఆంధ్రప్రదేశ్‌లో 16వ నెంబర్ జాతీయ రహదారి విస్తరణకు ఆమోదం లభించింది. ఈ నిర్ణయంతో నరసన్నపేట నుండి రణస్థలం వరకు 54 కిలోమీటర్ల వరకు 6లేన్లతో రహదారిని విస్తరించనున్నారు. ఇందుకోసం 14వందల 63కోట్లు ఖర్చు చేయనున్నారు. కలకత్తా - చెన్నై కారిడార్‌ విస్తరణలో భాగంగా ఈ పనులు చేపట్టనున్నారు. 

 

Don't Miss