చంద్రబాబు గా 'రానా'..

16:31 - May 17, 2018

జీవిత చరిత్రలను సినిమాలుగా తీసి ప్రేక్షకులను అలరించటం, విమర్శకులను మెప్పించటం అంటే మాటలు కాదు..అందులోను కొందరు సినిమా చరిత్రలో సునామీ సృష్టించి..ఆచంద్రతారార్కం నిలిచిపోయిన కొందరి జీవిత చరిత్రలను తెరకెక్కించటమంటే కత్తిమీద సాము లాంటిదే. వారి గురించి ఎన్నో తెలుసుకోవాలి.వారి అలవాట్లను, హావభావాలను పలికించటం, నటించటం అంటే మాటలు కాదు. అటువంటి గొప్ప నటుడు ఎన్టీఆర్ బయోపిక్ అంటే మాటలు కాదు..ఏ పాత్రకు ఎవరిని తీసుకోవాలి?ఆ పాత్రకు వారు సరిపోతారా? న్యాయం చేయగలరా? అనే కోటి ప్రశ్నలు దర్శకుడి సమర్థతను ప్రతిబింభాస్తాయి. అలా ఎన్టీఆర్ పాత్రకు నటుడు బాలకృష్ణ ఫిక్స్ అయ్యాడు. ఇక ఆయన వియ్యంకుడు, సీఎం, ఎన్టీఆర్ అల్లుడు అయిన నారా చంద్రబాబునాయుడు పాత్రలో ఎవరు నటించనున్నారనే ప్రశ్న రానే వచ్చింది. మరి ఆ పాత్రకు దగ్గుపాటి రానా ఎంపికయినట్లుగా సినీ పరిశ్రమ సమాచారం.

చంద్రబాబు పాత్రలో రానా?..
నందమూరి బాలకృష్ణ తలపెట్టిన మహానేత దివంగత ఎన్టీ రామారావు బయోపిక్ లో రానా కీలక పాత్రను దక్కించుకున్నట్టు తెలుస్తోంది. ఎన్టీఆర్ అల్లుడు, బాలయ్యకు వియ్యంకుడు, సీఎం అయిన చంద్రబాబునాయుడి పాత్రలో దగ్గుపాటి రానా కనిపిస్తాడని టాలీవుడ్ లో టాక్ వినిపిస్తోంది. చిత్ర బృందం రానాను సంప్రదించగా, ఆయన అంగీకరించాడని ఫిల్మ్ నగర్ వర్గాలు అంటున్నాయి.

ఎన్టీఆర్ జన్మదినం రోజున ప్రకటన?..
ఈ నెల 28న ఎన్టీఆర్ పుట్టినరోజు వేడుకల సందర్భంగా రానా నటించే పాత్రపై అధికారిక ప్రకటన వస్తుందని కూడా సమాచారం. కాగా, 'లీడర్' చిత్రంలో సీఎంగా కనిపించిన రానా, ఈ సినిమాలోనూ సీఎంగా కనిపించనున్నారని తెలుస్తోంది. ఈ విషయమై పూర్తి క్లారిటీ రావాలంటే ఎన్టీఆర్ జయంతి వేడుకల వరకూ వేచిచూడాల్సిందే.

Don't Miss