అవీనతిలో ఉమ్మడి కరీంనగర్‌ జిల్లా ఖాకీలదే అగ్రస్థానం

16:44 - June 8, 2018

కరీంనగర్ : తెలంగాణ పోలీసు శాఖను ఒక్క సారిగా కుదిపిసేందా లేఖ... రాష్ట్ర పోలీసు బాస్ పేరిట విడుదలైన ఓ పీడీఎఫ్ ఫైల్ ఖాకీలను అంతర్మథనంలో పడేసింది. సోషల్ మీడియాలో వైరల్ కావడంతో ప్రజల్లో చర్చనీయాంశం అయింది. అవీనతిలో ఉమ్మడి కరీంనగర్‌ జిల్లా ఖాకీలు అగ్ర స్థానంలో నిలిచారన్నది ఆ లేఖ సారాంశం. ఇంతకీ అవినీతి పరుల లిస్టు బయటపెట్టి ఖాకీల పరువు బజారున పడేసిన ఆ ఠాగుర్ ఎవరు..? ఇపుడు ఇదే పనిలో కరీంనగర్‌ కాప్‌లో బీజీ అయ్యారు. నిశ్శబ్దం ఒక్కసారిగా బద్దలైంది... రాష్ట్ర ఆవిర్భావ దినోత్సవం జరుపుకుని ముచ్చటగా మూడు రోజులు కాకముందే తెలంగాణ వ్యాప్తంగా ఖాకీల అవినీతిపై చరచలు జోరందుకున్నాయి. సోషల్ మీడియాలో చక్కర్లు కొడుతున్న ఓ పీడీఎఫ్‌ ఫైల్‌  కాప్‌లను ఉరుకులు పరుగులు పెట్టిస్తోంది. 

రాష్ట్ర వ్యాప్తంగా 391 మంది పోలీసు అధికారులు జాబితా ఈ ఫైల్ లో ఉంది. కానిస్టేబుల్ నుంచి సీఐ వరకు పేర్లు పెట్టి మరీ జాబితాలో ప్రకటించడం కలకలంగా మారింది. మరోవిశేషం ఏంటంటే అవినీతికి పాల్పడుతున్న పోలీసుల విషయంలో అప్రమత్తంగా ఉండాలని  ఏకంగా డీజీపీనే డిపార్ట్‌మెంటును ఆదేశించినట్టు ఆ ఫైల్లో ఉండటం ప్రకంపనలు సృష్టిస్తోంది. పోలీస్‌శాఖలో అవినీతిని సహించలేని  ఓ హానెస్ట్‌ అధికారే అవినీతిపరులు జాబితా విడుదల చేశారన్న కామెంట్లు కూడా వినిపిస్తున్నాయి. అయితే ఈ పీడీఎఫ్ ఫైల్ తమ అధికారులు విడుదల చేసింది కాదని కరీంనగర్ సీపీ కమలాసన్ రెడ్డి వివరణ ఇవ్వడం విశేషం. 

అయితే  31 జిల్లాలను ఆధారం చేసుకుని విడుదల అయిన ఈ జాబితాపై అనుమానాలు కూడా వ్యక్తం అవుతున్నాయి. ఇసుక రవాణాకు వేదికగా ఉన్న జయశంకర్ జిల్లా, భూ దందాలకు కేరాఫ్ అయిన జనగామ జిల్లాలో మాత్రం అవినీతి పోలీసులే లేరని క్లీన్ చిట్ ఇవ్వడం వెనక మతలబు ఎంటో అర్థం కాని పరిస్థితి తయారైంది. ఉమ్మడి కరీంనగర్ జిల్లాలో ఏకంగా 39 మంది పోలీసులు పేర్లు ఈ జాబితాలో స్థానాన్ని సుస్థిరం చేసుకున్నారు. అయితే పోస్టింగ్ ల కోసం వెంపార్లాడే పరిస్థితి లేక... మామూళ్లు ఇచ్చుకోలేక... మంచి పోస్టింగ్ రాని వారు విసిగివేసారి పోయి ఈ తంతు నడిపి ఉంటారేమోనని సామాన్యులు చెప్పుకుంటున్నారు. ఏది ఏమైనా పోలీసుల్లో అవినీతి పరుల జాబితా రాష్ట్ర వ్యాప్తంగా సోషల్ మీడియాలో వైరల్ కావడం కలకలం రేపింది.  ఠాగూరు సినిమాను మరిపించే విధంగా ఆమ్యామ్యా అధికారుల  జాబితా ప్రకటించడంపై ప్రజల్లో జోరుగా చర్చలు నడుస్తున్నాయి.

Don't Miss