బీజేపీ నేతలపై బాబ్రీ కేసు పునరుద్ధరణ..

09:24 - April 20, 2017

ఢిల్లీ : బాబ్రీ మసీదు కూల్చివేత కేసులో సుప్రీంకోర్టు కీలక తీర్పు చెప్పింది. అద్వాని, మురళీమనోహర్‌ జోషి, ఉమాభారతితో సహా 12 మంది బిజెపి నేతలపై కేసు పునరుద్ధరణకు సిబిఐకి కోర్టు అనుమతించింది. ఈ కేసు విచారణను రెండేళ్లలో పూర్తి చేయాలని సుప్రీంకోర్టు ఆదేశించింది. ఈ కేసుకు సంబంధించి రెండు కేసుల విచారణ వేర్వేరు కోర్టుల్లో కొనసాగుతోంది. కరసేవలకుపై నమోదైన కేసు లక్నో కోర్టులో.. బిజెపి నేతలకు ప్రమేయమున్న కేసు రాయ్‌బరేలి కోర్టులో విచారణలో ఉన్నాయి. ఈ కేసును ఒకే కోర్టులో ఎందుకు విచారణ జరపకూడదని అంతకు ముందు జరిపిన విచారణలో సుప్రీంకోర్టు ప్రశ్నించింది. విచారణను నాలుగు వారాల్లో రాయ్‌బరేలీ నుంచి లక్నో కోర్టుకు తరలించాలని సుప్రీంకోర్టు ఆదేశించింది. లక్నో కోర్టులో విచారణ సందర్భంగా వాయిదాలకు అనుమతి ఇవ్వొద్దని, ఈ కేసు విచారణ జరిపే న్యాయమూర్తిని బదిలీ చేయకూడదని సుప్రీంకోర్టు స్పష్టం చేసింది. ఈ కేసు విచారణను రెండేళ్లలో పూర్తి చేయాలని సుప్రీంకోర్టు ఆదేశించింది.

కల్యాణ్‌సింగ్‌కు మినహయింపు...
రాజస్థాన్‌ గవర్నర్‌గా ఉన్న యూపీ మాజీ సిఎం కల్యాణ్‌సింగ్‌కు మాత్రం ఈ కేసు నుంచి విముక్తి కల్పించింది. రాజ్యాంగ పదవిలో ఉన్నందున తర్వాత విచారణ చేపట్టాలని సూచించింది. వినయ్‌ కటియార్, సాధ్వి రితంబర తదితరులు ఈ కేసును ఎదుర్కోవాల్సి ఉంది. 1992 డిసెంబర్‌ 6న బాబ్రీ మసీదును కరసేవకులు కూల్చివేశారు. అద్వానీ, ఉమా భారతి, మురళీ మనోహర్ జోషి, కళ్యాణ్‌సింగ్‌ వంటి నేతలు రెచ్చగొట్టే ప్రసంగాలు చేయడం వల్లే లక్షలాది మంది కరసేవకులు మసీదును కూల్చేశారన్న ఆరోపణలు ఉన్నాయి. 2010లో ఈ కేసులో బీజేపీ నేతలను నిర్దోషులుగా రాయబరేలి కోర్టు ప్రకటించింది. అలహాబాద్‌ హైకోర్టు కూడా ఈ తీర్పును సమర్థించింది. దీంతో సీబీఐ ఈ తీర్పును సవాల్‌ చేస్తూ సుప్రీం కోర్టును ఆశ్రయించింది. అద్వానీ సహా ఇతర నేతలు రెచ్చగొట్టే ప్రసంగాలు చేసినట్లు తమ దగ్గర సాక్ష్యాధారాలు ఉన్నట్లు సీబీఐ కోర్టుకు తెలిపింది. దీనిపై విచారణ జరిపిన సుప్రీంకోర్టు సిబిఐ వాదనతో ఏకీభవించింది.

Don't Miss