Activities calendar

12 September 2018

22:57 - September 12, 2018

హైదరాబాద్ : ఉత్తరాంధ్రలో పర్యటనతో సెగ పుట్టించిన జనసేన పార్టీ అధ్యక్షుడు పవన్‌ కళ్యాణ్‌ .. చల్లబడ్డారు. పశ్చిమలో భారీ బహిరంగ సభ నిర్వహించి కాక రేపిన జనసేనాని.. మళ్లీ కనుమరుగైపోయారు. సీరియస్‌గా పాలిటిక్స్ మొదలుపెట్టారని అనుకున్నంతలోనే.. తన తీరు మారలేదని నిరూపించుకుంటున్నారు. ఓ వైపు తెలుగు రాష్ట్రాల్లో రాజకీయం వేడెక్కుతున్న సమయంలో పవన్‌ తెరమరుగు అవడం సంచలనం కలిగిస్తోంది. 

మే 20న ఇచ్ఛాపురం నుంచి పోరాట యాత్ర మొదలుపెట్టిన పవన్ కళ్యాణ్‌.. రెండు విడతల్లో దాదాపు 40 రోజుల పాటు జనం మధ్యే గడిపారు. మధ్యలో రంజాన్‌ పేరుతో కొన్ని రోజులు, కంటి సమస్య పేరుతో మరికొన్ని రోజులు విరామం తీసుకున్నారు. పశ్చిమ గోదావరి జిల్లాలోనూ పర్యటించిన పవన్.. ఆ తర్వాత మాత్రం అనూహ్యంగా మౌనం దాల్చారు. పవన్ కళ్యాణ్‌పై చాలా ఆశలు పెట్టుకున్న ఆయన అభిమానులు, జనసేన కార్యకర్తలు  తీవ్ర నిరాశకు గురవుతున్నారు. 

22:40 - September 12, 2018

హైదరాబాద్ : తెలంగాణలో ఎన్నికల సన్నద్థతపై క్షేత్రస్థాయి పర్యటనకు వచ్చిన కేంద్ర ఎన్నికల బృందం పూర్తి సంతృప్తిని వ్యక్తం చేసింది. డిప్యూటీ చీఫ్‌ ఎలక్షన్ కమిషనర్‌ ఉమేష్ కుమార్  సిన్హా నేతృత్వంలో వచ్చిన కమిటీ.. ముందుగా గుర్తింపు పొందిన రాజకీయ పార్టీల ప్రతినిధుల అభిప్రాయాలను సేకరించింది. పార్టీల వారిగా అభ్యంతరాలను, ఫిర్యాదులు, సలహాలు సూచనలు ఈసీ బృందం తీసుకుంది. ఖమ్మం జిల్లాలోని ఏడు మండలాల పరిస్థితి, ఓట్ల గల్లంతు, వినాయక చవితి, మోహర్రం పండుగల సందర్భంగా ఓటరు నమోదు కార్యక్రమ వ్యవధిని పెంచాలని పార్టీలు సూచించాయి. దీనిపై కేంద్ర ఎన్నికల సంఘానికి నివేదిస్తామని ఉమేష్‌ కుమార్ సిన్హా అన్నారు. 

రాష్ట్రంలో రాజకీయ పరిస్థితులు, అధికారుల సన్నద్ధతపైనా 31 జిల్లాల కలెక్టర్లు, ఎస్పీలతో దాదాపు 6 గంటల పాటు ఈసీ బృందం సమావేశమయ్యింది. జిల్లాల వారిగా క్షేత్ర స్థాయి పరిస్థితులను వివరంగా అడిగి తెలుసుకున్నారు. ఓటర్ల జాబితా, సమస్యాత్మక ప్రాంతాలు, శాంతిభద్రతలపైనా చర్చించారు. ఈవీఎంలు, వీవీప్యాట్స్‌పై సిబ్బంది శిక్షణ ఇవ్వాలని ఆదేశించారు. ఈవీఎంల భద్రత, స్టోరేజీ, రవాణాకు అవసరమైన ఏర్పాట్లపైనా ఆదేశాలు జారీ చేశారు. ఓటర్లను ఎవరూ ప్రలోభపెట్టకుండా చర్యలు తీసుకోవాలని ఆదేశించారు.ఇక  ఓట‌ర్ల జాబితా స‌వ‌ర‌ణ కోసం  రూపొందించిన కొత్త ఈఆర్ఒ నెట్ పై జిల్లా కలెక్టర్లకు  అవ‌గాహ‌న  కల్పించారు.

అనంతరం ప్రభుత్వ ప్రధాన కార్యదర్శి, డిజిపి, హోం శాఖ ముఖ్య కార్యదర్శి తో పాటు ఇతర ముఖ్య కార్యదర్శులతో సచివాలయంలో 20 నిముషాల పాటు ఉమేశ్‌ బృందం సమావేశం అయ్యింది. రాష్ట్రంలోని శాంతి భద్రతలు, సమస్యత్మాక ప్రాంతాల గుర్తింపు, ఎన్నికల సిబ్బంది , ఎన్నికల నిర్వహణకు అవసరమయ్యే నిధుల కేటాయింపు, రవాణ తదిరత అంశాల పై చర్చించారు. భౌగోళికంగా తెలంగాణకు చూట్టు ఉన్న సరిహాద్దు రాష్ట్రాల ప్రభావం ఎలా ఉంటుందో కూడా అడిగితెలుసుకున్నారు.

22:04 - September 12, 2018

హైదరాబాద్ : టీపీసీసీ అధ్యక్షుడు ఉత్తమ్‌కుమార్‌రెడ్డి, ఏపీ ముఖ్యమంత్రి చంద్రబాబుపై తెలంగాణ తాజా మాజీ మంత్రి కేటీఆర్‌ మండిపడ్డారు. తెలంగాణకు అడ్డుపడ్డ రెండు గడ్డాలు ఒక్కటయ్యాయని వ్యాఖ్యానించారు. టీడీపీని కాంగ్రెస్‌కు తోక పార్టీగా మార్చిన ఘనత చంద్రబాబుదేని విమర్శించారు. ఎన్నికల్లో ఈ రెండు పార్టీలకు గుణపాఠం చెప్పే అవకాశం ప్రజలకు దక్కిందన్నారు. ఉమ్మడి ఏపీ శాసనసభ మాజీ స్పీకర్‌ సురేశ్‌రెడ్డి, జీహెచ్‌ఎంసీ కాంగ్రెస్‌ కార్పొరేటర్‌ శాంతి.. మంత్రి కేటీఆర్‌ సమక్షంలో  టీఆర్‌ఎస్‌ చేరారు. ఈ సందర్భంగా టీడీపీ-కాంగ్రెస్‌ పొత్తు అపవిత్రమని కేటీఆర్‌ దుయ్యబట్టారు. 

 

21:01 - September 12, 2018

జగిత్యాల : కొండగట్టు బస్సు ప్రమాద ఘటనతో మూడు గ్రామాల్లో విషాదచాయలు అలుముకున్నాయి. కొండగట్టు వద్ద ఆర్టీసీ బస్సు లోయలో పడి 57 మంది మృతి చెందిన సంగతి తెలిసిందే. బస్సు ప్రమాదంలో  డబ్బుతిమ్మాయిపల్లిలోని ఒకే కుటుంబానికి చెందిన 10 మంది మృతి చెందారు. వీరి మృతితో గ్రామం శోకసంద్రంలో మునిగిపోయింది. అధికారుల నిర్లక్ష్యంతోనే ప్రమాదం జరిగిందని గ్రామస్తలు అంటున్నారు. మృతుల కుటుంబాలకు రూ.25 లక్షల నష్టపరిహారం ఇవ్వాలని డిమాండ్ చేశారు. మృతుల కుటుంబాల్లో ఒక్కొరికి ఉద్యోగం ఇవ్వాలన్నారు. మృతుల కుటుంబాలను ఆదుకోవాలని కోరారు. లేని ఎడల మూడు గ్రామాల ప్రజలందరం ధర్నా చేపడతామని హెచ్చరించారు. డొక్కు బస్సులు వేసి ప్రజల ప్రాణాలు తీస్తున్నారని మండిపడ్డారు.

జగిత్యాల జిల్లాలో కొండగట్టు వద్ద జరిగిన ఘోర రోడ్డు ప్రమాదంలో 57 మంది మృతి చెందారు. పలువురికి గాయాలు అయ్యాయి. మృతుల్లో 25 మంది మహిళలు, ఏడుగురు చిన్నారులు ఉన్నారు. క్షతగాత్రులు ఆస్పత్రిలో చికిత్స పొందుతున్నారు. ఘాట్‌రోడ్డులో బ్రేక్ లు ఫెయిల్ కావడంతో బస్సు అదుపుతప్పి లోయలో బోల్తా పడింది. 

19:48 - September 12, 2018

న్యూఢిల్లీ: దాదాపు రూ 9 వేల కోట్ల పై చిలుకు బ్యాంకులకు టోకరావేసి విదేశాలలో తలదాచుకుంటున్న వ్యాపారవేత్త విజయ్ మాల్యా ఈ సారి కేంద్ర ఆర్థిక మంత్రి అరుణ్ జైట్లీను ఇరుకున పెట్టేవిధంగా వ్యాఖ్యలు చేశాడు. లండన్ కోర్టులో కేసు విచారణకు హాజరైన సందర్భంగా మాల్యా చేసిన వ్యాఖ్యలు రాజకీయ దుమారాన్ని రేపాయి.

తాను జెనీవాకు తరలి వెళ్లేముందు ఆర్థిక మంత్రి అరుణ్ జైట్లీని కలిసి బ్యాంకులతో ఆర్థిక వివాదాన్ని పరిష్కరించాల్సిందిగా కోరినట్టు మాల్యా వెల్లడించారు. దీంతో కాంగ్రెస్ నాయకులు ఈ కుంభకోణంలో బీజేపీ నేతల హస్తం ఉందని రుజువైందని విమర్సలకు దిగారు. దీనిపై స్పందించిన అరుణ్ జైట్లీ తన ఫేస్ బుక్ పోస్టింగ్ లో మాల్యా ఆరోపణలను ఖండించారు. ఇది పూర్తిగా అవాస్తవం.. సత్యదూరమని పేర్కొన్నారు.

19:34 - September 12, 2018

విశాఖ : రైల్వే డీఆర్ ఎం మీటింగ్ ను ఉత్తరాంధ్ర ఎంపీలు బాయ్ కాట్ చేశారు. విశాఖ రైల్వే జోన్ ఏర్పాటుపై కేంద్ర అనుసరిస్తున్నవైఖరికి నిరసనగా సమావేశాన్నిఉత్తరాంధ్ర ఎంపీలు బహిష్కరించారు. విశాఖ రైల్వే జోన్ ఏర్పాటు చేయాలని ఎంపీలు డిమాండ్ చేశారు. దీంతో చత్తీస్ గఢ్, ఒడిషా ఎంపీలతో డీఆర్ ఎం సమావేశం అయ్యారు. 

 

19:16 - September 12, 2018

కోచ్చి: మహిళా సంఘాల ఉద్యమాల వత్తిడితో కదిలిన కేరళ పోలీసులు బలత్కార కేసులో నిందితుడైన బిషప్ ఫ్రాంకో ములక్కల్ ను విచారణకు రావాల్సిందిగా ఆదేశించారు. 

నలభై ఏళ్ల క్రిష్టయన్ సన్యాసినిని బిషప్ ఫ్రాంకో రెండేళ్లలో (2014-16 సంవత్సరాల మధ్య) తనను 13 సార్లు మానభంగం చేశారని వ్యాటికన్ సిటీలోని మత పెద్దలకు ఫిర్యాదు చేశారు. దీంతో మహిళా సంఘాలు ఉద్యమాలు చేపట్టి బిషప్ ను కఠినంగా శిక్షించాలని కోరుతూ ఆందోళనలు చేస్తున్నారు.

ఈ నేపథ్యంలో పోలీసులు ఈ నెల 19న బిషప్ ను ప్రశ్నించేందుకు రావాలని ఆదేశించారు. ప్రజా సంఘాల వత్తిడి తెచ్చినప్పటికీ పోలీసులు కేసును నీరుగార్చే విధంగా వ్యవహరిస్తున్నారని.. తక్షణం బిషప్ అరెస్టుకు చర్యలు తీసుకోవాలని వారు డిమాండ్ చేస్తున్నారు.  

19:12 - September 12, 2018

మంచిర్యాల : తనపై నల్లాల ఓదేలు వర్గం హత్యాయత్నానికి పాల్పడిందని ఎంపీ బాల్క సుమన్ ఆరోపించారు. జిల్లాలోని చెన్నూరు నియోజకవర్గంలో ప్రచారానికి వచ్చిన తనపై హత్యాయత్నం చేశారని పేర్కొన్నారు. చెన్నూరు నియోజకవర్గ టిక్కెట్ ను కేసీఆర్ తనకు కేటాయించారని ఎవరూ అడ్డుపడినా ఇక్కడి నుంచే పోటీ చేస్తానని తెలిపారు. ఓదేలు వర్గం ఎన్నికుట్రలు పన్నినా తన నిర్ణయాన్ని మార్చుకునేది లేదని స్పష్టం చేశారు. చెన్నూరు నియోజకవర్గ అభ్యర్థిగా బాల్క సుమన్ టీఆర్ ఎస్ ఇటీవలే ప్రకటించిన విషయం విధితమే. దీన్నితాజా మాజీ ఎమ్మెల్యే నల్లాల ఓదేలు తీవ్రంగా ఖండించారు. తనకు చెన్నూరు టిక్కెట్ ఇవ్వాలని డిమాండ్ చేస్తూ నిన్న ఓదేలు స్వీయ గృహ నిర్బంధం విధించుకున్నారు. దీంతో ఓదేలు వర్గ బాల్క సుమన్ పై ఆగ్రహంతో ఉన్నారు.

ఇవాళ నియోజకవర్గంలోని ఇందారం గ్రామంలో పర్యటించేందుకు వెళ్లిన బాల్క సుమన్‌ను ఓదేలు వర్గీయులు అడ్డుకున్నారు. దీంతో ఇరువర్గాల మధ్య తోపులాట జరిగింది. ఈ క్రమంలో ఓదేలు అనుచరుడు రేగుంట గట్టయ్య కిరోసిన్‌ పోసుకుని ఆత్మాహత్యాయత్నానికి పాల్పడ్డారు. ఈ ఘటనను బాల్క సుమన్‌ తీవ్రంగా ఖండించారు. 

 

17:56 - September 12, 2018

హైదరాబాద్ : తెలంగాణలో బీజేపీ అభ్యర్థుల మొదటి లిస్టు ఈనెల 20వ తేదీలోపు ప్రకటించనున్నట్లు ఆ పార్టీ నేతలు తెలిపారు. 30 నుంచి 35 మంది అభ్యర్థుల పేర్లను ప్రకటించనున్నట్లు పేర్కొన్నారు. వీటిలో జీహెచ్ ఎంసీలో 10 మంది అభ్యర్థుల పేర్లను ప్రకటించనున్నారు. ఈనెల 15న హైదరాబాద్ కు ఆ పార్టీ జాతీయ అధ్యక్షుడు అమిత్ షా రానున్నారు. అదే రోజున మహబూబ్ నగర్ లో ఏర్పాటు చేసే భారీ బహిరంగ సభలో ఆయన పాల్గొననున్నారు. అయితే అమిత్ షా వచ్చాక అయినా లేదా రాకముందైన 20 వ తేదీ లోపు అభ్యర్థుల లిస్టును ప్రకటించనున్నారు. అభ్యర్థుపై ఖరారుపై కమిటీ వేశారు. ఆ రిపోర్టును బీజేపీ పార్లమెంటరీ బోర్డుకు పంపనున్నారు. అనంతరం ఎన్నికల ఫైనల్ లిస్టును ప్రకటించనున్నారు. అయితే సిట్టింగ్ ఎమ్మెల్యేలు, మాజీ ఎమ్మెల్యేలకు సీటు ఖరారు చేశారు. ముషీరాబాద్ నుంచి బి.లక్ష్మణ్, అంబర్ పేట్ నుంచి జి.కిషన్ రెడ్డి, ఉప్పల్ నుంచి ఎన్ వీఎస్ ఎస్ ప్రభాకర్, గోషామహల్ నుంచి రాజాసింగ్, ఖైరతాబాద్ నుంచి చింతల రాంచంద్రారెడ్డిల పేర్లు ఖరారు అయ్యాయి. వీరు ఇప్పటికే ఎమ్మెల్యేలుగా ఉన్నారు.  వీరితోపాటు మల్కాజ్ గిరి నుంచి రామచంద్రారావు(బీజేపీ జీహెచ్ ఎంసీ అధ్యక్షుడు), సికింద్రాబాద్ నుంచి సతీష్ గౌడ్, కూకట్ పల్లి నుంచి మాతవరం కాంతారావు, మహబూబ్ నగర్ నుంచి పద్మజారెడ్డి, మునుగోడు నుంచి జి.మనోహర్ రెడ్డి, సూర్యపేట నుంచి సంకినేని వెంకటేశ్వరరావు, మహేశ్వరం నుంచి సందీప్ శర్మ, పరిగి నుంచి ప్రహ్లాద్ పేర్లు ఫైనల్ అయ్యాయి. అభ్యర్థులు లేని చోట ఆశావహులు ఎవరైనా పోటీ చేసేందుకు ముందుకు వస్తే వారికి అవకాశం ఇస్తామని చెప్పారు. 

17:36 - September 12, 2018

హైదరాబాద్: ఎన్టీఆర్ బయోపిక్ సినిమా యూనిట్ చిత్రానికి సంబంధించి మరో పోస్టర్ ను విడుదల చేసింది. ఇందులో నారా చంద్రబాబునాయిడు పాత్రలో రానా దగ్గుబాటి ఉన్న పోస్టర్ ను రానా తన ట్విట్టర్ లో పోస్టు చేశారు. చంద్రబాబు వయసులో ఉండగా ఎలా ఉండేవారో దానికి దగ్గరిగా రానాను తీర్చిదిద్దారు. ఈ చిత్రానికి క్రిష్ జాగర్లమూడి వహిస్తుండగా.. బాలకృష్ణ ఎన్టీఆర్ పాత్రను పోషిస్తున్నారు. ఎస్వీ రంగారావు పాత్రలో నాగబాబు నటిస్తున్నట్టు సమాచారం. అలాగే విద్యాబాలన్ బసవతారం పాత్రలో, సుమంత్ ఏఎన్నార్ పాత్రలో, ప్రకాష్ రాజ్ నాగిరెడ్డి పాత్రలో కనిపించబోతున్నారు.

17:10 - September 12, 2018

హైదరాబాద్: ఎంపీలు కేశవరావు, కవిత, మంత్రులు కేటీఆర్, ఈటల రాజేందర్, పోచారం శ్రీనివాస్ రెడ్డి సమక్షంలో మాజీ స్పీకర్ సురేశ్ రెడ్డి టీఆర్‌ఎస్ పార్టీలో చేరారు. ఆయనతో పాటు చేరిన ముఖ్యనేతలకు గులాబీ కండువా కప్పి టీఆర్‌ఎస్ ముఖ్యనేతలు పార్టీలోకి ఆహ్వానించారు.

కరీంనగర్ కాంగ్రెస్ నేత, మాజీ ఎమ్మెల్యే కోడూరి సత్యనారాయణ గౌడ్, వ్యవసాయ మార్కెట్ కమిటీ ఛైర్మన్ ఆకారపు భాస్కర్‌రెడ్డి, ఉప్పల్ కాంగ్రెస్ ఇంఛార్జ్ బండారి లక్ష్మారెడ్డి, నియోజకవర్గానికి చెందిన కాంగ్రెస్ పార్టీ డివిజన్ నాయకులు తెరాసాలో చేరారు. పలువును నాయకులు, ప్రజాప్రతినిధులు, కార్యకర్తలు ఈ కార్యక్రమంలో పెద్ద ఎత్తున పాల్గొన్నారు.

16:53 - September 12, 2018

హైదరాబాద్ : కొండగట్టు బస్సు ప్రమాదంపై మానవ హక్కుల కమిషన్(హెచ్ ఆర్ సీ)లో ఫిర్యాదు నమోదు అయింది. బస్సు ప్రమాదంపై హైకోర్టు న్యాయవాది అరుణ్ కుమార్ హెచ్ ఆర్ సీలో పిటిషన్ వేశారు. ప్రమాదంలో 57 మంది చనిపోవడానికి కారకులైన అధికారులపై చర్యలు తీసుకోవాలని డిమాండ్ చేశారు. జగిత్యాల బస్ డిపో మేనేజర్, సూపర్ వైజర్, ఆర్టీవోపై కేసులు నమోదు చేయాలని పేర్కొన్నారు. అధికారులపై చర్యలు తీసుకునేందుకు తెలంగాణ డీజీపికి ఆదేశాలు ఇవ్వాలని కోరారు. మృతుల కుటుంబాలకు ఒక్కొక్కరికి రూ.25 లక్షల నష్టపరిహారం ఇచ్చే విధంగా ఆదేశాలు జారీ చేయాలని మానవ హక్కుల కమిషన్ ను అరుణ్ కుమార్ కోరారు.

జగిత్యాల జిల్లాలో కొండగట్టు వద్ద ఘాట్‌రోడ్డులో బ్రేక్ లు ఫెయిల్ కావడంతో బస్సు అదుపుతప్పి లోయలో బోల్తా పడింది. ప్రమాదంలో 57 మంది మృతి చెందారు. పలువురికి గాయాలు అయ్యాయి. మృతుల్లో 25 మంది మహిళలు, ఏడుగురు చిన్నారులు ఉన్నారు. క్షతగాత్రులు ఆస్పత్రిలో చికిత్స పొందుతున్నారు. 

 

 

16:26 - September 12, 2018

ఫూణే: పాకిస్థాన్ భూభాగంలోని 15 కి.మీ అవతల భారత ఆర్మీ విజయవంతంగా పూర్తి చేసిన సర్జికల్ స్ట్రైక్ లో సైనికులు చిరుత పులుల మల, మూత్రాలను ఉపయోగించి అక్కడ ఉన్న కుక్కల దాడులనుంచి తప్పించుకున్నట్టు మాజీ సైనికాధికారి ఒకరు బుధవారం తెలిపారు. 

నగ్రొటా  కార్ప్స్ కమాండర్ గా లెఫ్టినెంట్ జనరల్ రాజేంద్ర నిమ్ బోర్కర్ సర్జికల్ స్ట్రైక్ లో పాల్గొన్నారు. సర్జికల్ స్ట్రైక్ లో ఆయన చేసిన సేవలకు గాను పూణేలోని థొర్లే బాజీరావు పేష్వే ప్రతిష్టాన్ అనే సంస్థ రాజేంద్ర నింబోర్కర్ ను సన్మానించింది. ఆ సమావేశంలో ముఖ్య అతిధిగా మాజీ ముఖ్యమంత్రి మనోహర్ జోషీ పాల్గొన్నారు.

నౌషేరా సెక్టార్ ప్రాంతంలో జీవ వైవిధ్యాన్ని కూలంకుషంగా పరిశీలించిన బ్రిగేడర్ కమాండర్ రాజేంద్ర కుక్కలను తరచూ చిరుతలు వేటాడం గమనించారు. చిరుతల దాడి నుంచి తప్పించుకోవడానికి రాత్రివేళల్లో మాత్రమే శునకాలు ఆ ప్రాంతంలో సంచరించేవి. 

సర్జికల్ స్ట్రైక్ చేసేందుకు సైనికులు గ్రామాలు దాటి వెళ్లేందుకు కుక్కలు అరిచి గోలచేసే ప్రమాదం ఉందని గమనించి భారత సైనికులు చిరుత పులుల మల, మూత్రాలను తమతోపాటుగా తీసుకువెళ్లి.. వాటిని గ్రామ పొలిమారల్లో చల్లి కుక్కలు తమవైపు రాకుండా జాగ్రత్తపడ్డారని రాజేంద్ర చెప్పారు. ఈ ప్రయోగం చక్కటి ఫలితాలను ఇచ్చిందని కమాండర్ రాజేంద్ర వెల్లడించారు.

ఈ దాడి అత్యంత గోప్యంగా ఉంచారని.. తమకు ఒక వారం క్రితమే ఈ సమాచారం అప్పటి రక్షణ శాఖ మంత్రి మనోహర్ పారిక్కర్ తెలియచేశారని రాజేంద్ర వెల్లడించారు. ఈ విషయాన్ని తమ ట్రూప్ సభ్యులకు ఒక వారం ముందుగా తెలియచేసినా.. ఏ ప్రాంతమో ఒక రోజు ముందు చెప్పినట్టు రాజేంద్ర గుర్తుచేసుకున్నారు.

14:36 - September 12, 2018

న్యూఢిల్లీ: వరవరరావు సహా ఇతర నలుగురు మానవ హక్కుల నేతలకు గృహనిర్బంధాన్ని వచ్చే సోమవారం (సెప్టెంబరు 17) వరకు కొనసాగించేందుకు అనుమతిస్తూ సుప్రీంకోర్టు ఆదేశాలు జారీచేసింది.  ఐదుగురు మానవ హక్కుల నేతల విడుదల కోసం దాఖలైన పిటీషన్ ను విచారించిన కోర్టు వారి గృహనిర్బంధాన్ని పొడిగించాలని ఆదేశాలు జారీచేసింది.

చరిత్రకారుడు రోమిల థాపర్ హక్కుల నేతలు ఐదుగురిని విడుదల చేయాలని కోరుతూ సుప్రీంకోర్టులో పిటీషన్ దాఖలు చేశారు. తెలుగ రచయిత వరవరరావు, హక్కుల నేతలు వెర్నాన్, అరుణ్ ఫెర్రీరా, లాయర్ సుధా భరధ్వాజ్, పౌరహక్కుల కార్యకర్త గౌతం నవలఖాలను మహారాష్ట్ర పోలీసులు గత నెలలో అరెస్టు చేసిన సంగతి తెలిసిందే.   

13:51 - September 12, 2018

తెలుగు సినిమా రంగంలో మల్టీస్టారర్ సినిమాలు ట్రెండ్ కొనసాగుతోంది. తన వయస్సు..చూడకుండా జోరుగా సినిమాలు చేస్తున్న హీరోల్లో ఒకరు ’నాగార్జున’. టాలీవుడ్ లో మన్మథుడిగా పేరొందిన ఈ నటుడు చిన్న..పెద్ద హీరోలతో నటిస్తున్నాడు. తెలుగు సినిమాలో నాచురల్ స్టార్ గా పేరు గడించిన ‘నాని’తో ‘నాగ్’ నటిస్తున్న సంగతి తెలిసిందే. వైజయంతీ మూవీస్‌ బ్యానర్‌పై నిర్మిస్తున్న ఈ సినిమాను యువ దర్శకుడు శ్రీరామ్‌ ఆదిత్య డైరెక్ట్ చేస్తున్నాడు. ఈ సినిమాకు ‘దేవదాస్’ పేరు ఖరారు చేశారు. ఈ చిత్ర టీజర్..లిరికల్ వీడియోలు సందడి చేస్తున్నాయి. 

'వినాయకచవితి' కావడంతో చిత్ర యూనిట్ లిరికల్ సాంగ్ ను రిలీజ్ చేసింది. ఈ సాంగ్ దుమ్ముదుమ్ము రేపుతోంది. వినాయక నిమజ్జన ఉత్సవానికి సంబంధించిన పాటను వదిలారు."లక లక లకుమీకరా లంబోదరా .. జగ జగ జగదోద్ధారా విఘ్నేశ్వరా . . లక లక లకుమీకరా లంబోదరా .. రకరకముల రూపాలు నీవే దొరా .. వెళ్లి రారా .. మళ్లీ రారా .. ఏడాదికోసారి మాకై దిగిరారా .." అంటూ ఈ పాట కొనసాగుతోంది. మణిశర్మ ఈ సినిమాకు సంగీతం అందిస్తున్నారు. రష్మిక మందన్న, ఆకాంక్ష సింగ్‌లు హీరోయిన్‌లుగా నటిస్తున్నారు. అన్ని కార్యక్రమాలు పూర్తి చేసి సెప్టెంబర్ 27న రిలీజ్ చేసేందుకు ప్లాన్‌ చేస్తున్నారు. 

13:31 - September 12, 2018

ముంబై : రూపాయి మరింత క్షీణించింది. గత కొన్ని రోజులుగా రూపాయి కనిష్టస్థాయికి పడిపోతున్న సంగతి తెలిసిందే. అమెరికా డాలర్ తో పొలిస్తే రూపాయి విలువ 72.91గా నమోదైంది. బుధవారం మరో 22 పైసలు క్షీణించింది. అంతర్జాతీయ మార్కెట్లో నెలకొన్న ప్రతికూల పరిస్థితులు, అమెరికా డాలర్‌కు గిరాకీ పెరగడం వంటి కారణాలతో రూపాయి విలువ మరింత బక్కచిక్కిపోతోంది. డాలర్ కు డిమాండ్ పెరిగిపోతుండడంతో పాటు ముడి, చమురు ధరలు పెరగడం..కరెంటు ఖాతా లోటు ఎక్కువగా ఉండడం రూపాయి విలువపై తీవ్ర ప్రభావం చూపిస్తున్నాయని బిజినెస్ విశ్లేషకులు పేర్కొటున్నారు. 

 

13:16 - September 12, 2018

హైదరాబాద్ : టి.టిడిపి నేత రేవంత్ రెడ్డిని అరెస్టు చేస్తారా ? అనే చర్చ జరుగుతోంది.  తెలంగాణ రాష్ట్రంలో ముందస్తు ఎన్నికల ఫీవర్ నెలకొన్న సంగతి తెలిసిందే. ఈ నేపథ్యంలో కాంగ్రెస్, టీఆర్ఎస్ మధ్య మాటల తూటాలు పేలుతున్నాయి. తాజాగా కాంగ్రెస్ నేత జగ్గారెడ్డిని పోలీసులు అరెస్టు చేయడం కలకలం రేపింది. రాజకీయ కుట్రలో భాగంగా అరెస్టులు చేశారని టీ.పీసీసీ ఆరోపించింది. మరో నేత గండ్ర వెంకటయ్య వీరయ్యకు పోలీసులు ఓ కేసు నిమిత్తం నోటీసులు జారీ చేశారు. తాజాగా టి.టిడిపి నుండి కాంగ్రెస్ లో జంప్ అయిన రేవంత్ కు పోలీసులు నోటీసులు జారీ చేశారు. 

బుధవారం జూబ్లీహి ల్స్ హౌజింగ్ సొసైటీ కేసులో రేవంత్ కు నోటీసులు జారీ చేశారు. 15 రోజుల్లోగా విచారణకు హాజరు కావాలంటూ నోటీసుల్లో పేర్కొన్నారు. తప్పుడు డ్యాక్యుమెంట్లతో సొసైటీ సొసైటీలో అక్రమంగా లబ్ది పొందారనే ఆరోపణలతో నోటీసులు జారీ చేశారు. ఆయనతో పాటు 13 మంది సభ్యులకు కూడా నోటీసులు జారీ చేశారు. తాను ఎన్నికల ప్రచారంలో తాను బిజీగా ఉన్నట్లు ప్రస్తుతం రాలేనని రేవంత్ స్పష్టం చేశారు. 

12:56 - September 12, 2018

తమ నేతకు ఎందుకు టికెట్ కేటాయించలేదంటూ తెలంగాణ రాష్ట్రంలో పలువురు అనుచరులు ఆందోళనలు..నిరసనలు చేపడుతున్నారు. ఇది కాస్తా తారాస్థాయికి చేరుకుంది. తెలంగాణ రాష్ట్ర ముందస్తు ఎన్నికలకు కేసీఆర్ నిర్ణయం తీసుకోవడం...105 మంది అభ్యర్థులను ప్రకటించిన సంగతి తెలిసిందే. దీనితో టికెట్ ఆశించిన పలువురు ఆశావాహులు తీవ్ర అసంతృప్తికి లోనయ్యారు. పలువురు ఇతర పార్టీల్లోకి వెళ్లడానికి మార్గాలు వెతుకుతుండగా మరికొందరు టికెట్ ఇవ్వాలంటూ టీఆర్ఎస్ అధిష్టానంపై వత్తిడి తెచ్చేందుకు ప్రయత్నిస్తున్నారు. 

మంచిర్యాల జిల్లాలోని చెన్నూరు టికెట్ ను ఎంపీ బాల్క సుమన్ కు కేసీఆర్ ఖరారు చేశారు. దీనితో తాజా, మాజీ ఎమ్మెల్యే నల్లాల ఓదేలు ఆగ్రహానికి గురయ్యారు. తనకు టికెట్ కేటాయించాలంటూ అభ్యర్థించారు. ఆయన అనుచరులు కూడా ఆందోళనలు..నిరసనలు కొనసాగించారు. బాల్క సుమన్ కు మద్దతిచ్చేది లేదని..తనకు టికెట్ కేటాయించే వరకు ఇంట్లోనే ఉంటానంటూ గృహనిర్భందం చేసుకున్నారు. 

బుధవారం ఎంపీ బాల్క సుమన్ ఇందారంలో ప్రచారం నిర్వహిస్తున్నారు. ఈ విషయం నల్లాల ఓదేలు అనుచరుడు గట్టయ్యకు తెలిసింది. అక్కడకు వెళ్లిన అతను ఒంటిపై పెట్రోల్ పోసుకుని నిప్పంటిచుకున్నాడు. ఒక్కసారిగా అక్కడ కలకలం రేగింది. మంటలు ఇతరులకు కూడా అంటుకున్నాయి. వెంటనే అతడిని ఆసుపత్రికి తరలించారు. పూర్తి వివరాలు తెలియాల్సి ఉంది. 

12:35 - September 12, 2018

‘సమంత’...టాలీవుడ్..ఇతర వుడ్ సినిమాల్లో ఎన్నో హిట్ సినిమాల్లో నటించి కుర్రకారు గుండెలను కొల్లగొట్టింది. కెరియర్ తొలినాళ్లలో మోడలింగ్ చేసిన ఈ ముద్దుగుమ్మ అనితకాలంలో వెండితెరపై కనిపించింది. 2007లో మాస్కోవిన్ కావేరి సినిమాను ఒప్పుకుంది. ఏ మాయ చేశావే సినిమాతో తెలుగు సినిమా రంగంలో గ్రాండ్ ఎంట్రీ ఇచ్చింది. అనంతరం ఎన్నో సినిమాల్లో నటించి మెప్పించింది. బృందావనం, దూకుడు, ఈగ, ఎటో వెళ్ళిపోయింది మనసు, సీతమ్మ వాకిట్లో సిరిమల్లె చెట్టు, అత్తారింటికి దారేది చిత్రాలతో అతితక్కువ సమయంలోనే తెలుగునాట ప్రముఖ కథానాయికగా ఎదిగింది. ఇతర భాషా చిత్రాల్ల కూడా నటించి అక్కడ అభిమానులను సొంతం చేసుకుంది. 

అక్కినేని నాగార్జున తనయుడు అక్కినేని నాగ చైతన్య..సమంతలు ప్రేమించుకుని ఇటీవలే వివాహం చేసుకున్న సంగతి తెలిసిందే. అనంతరం కొద్ది రోజుల పాటు సినిమాలకు దూరంగా ఉన్న వీరు ప్రస్తుతం సినిమాలను అంగీకరిస్తూ బిజీ బిజీగా మారిపోయారు. వీరు నటించిన సినిమాలు త్వరలో విడుదల కానున్నాయి. కానీ సమంతకు సంబంధించిన ఓ వార్త చక్కర్లు కొడుతోంది. 

సమంత త్వరలోనే తల్లి కాబోతోందని టాక్. నాగార్జున త్వరలో తాతయ్య కూబోతున్నాడనే వార్త సోషల్ మాధ్యమాల్లో చక్కర్లు కొడుతోంది. చిన్న పిల్లలంటే తనకు ఎంతో ఇష్టమని ఓ ఇంటర్వూలో సమంత పేర్కొన్నట్లు కథనం. పిల్లల కోసం ప్లాన్ వేసుకుంటున్నట్లు వెల్లడించినట్లు టాక్. ప్రస్తుతం సమంత నటించిన యు టర్న్ సెప్టెంబర్ 13న విడుదల కానుంది. 

11:13 - September 12, 2018

గౌహటి: అస్సాంలోని కొక్రాఝర్ ప్రాంతంలో ఈ ఉదయం భారీగా భూమి కంపించింది. దీని ప్రభావం రెక్టార్ స్కేల్ పై 5.5 గా నమోదయ్యింది. భూకంప ప్రభావం బెంగాల్, బీహార్ రాష్ట్రాల్లోను కనిపించింది. అయితే భూకంపం సృష్టించిన నష్టంపై ఇంకా స్పష్టత రాలేదని అధికారులు పేర్కొన్నారు.

11:09 - September 12, 2018

వంటల్లో కరివేపాకు కీలకం. ప్రతి కూరగాయి..ఇతర ఆహార పదార్థాల్లో దీనిని వాడుతుంటారు. కానీ చాలా మంది కరివేపాకును తీసి పారేస్తుంటారు. దీనివల్ల ఎన్నో ఉపయోగాలున్నాయి. మరి ఒకసారి ఉపయోగాలు...తెలుసుకోండి...

  • కరివేపాకు శరీరంలో ఉన్న కొవ్వును కరిగించడానికి ఉపయోగపడుతుంది. బరువు తగ్గాలనుకొనే వారు విరివిగా దీనిని ఆహారపదార్థంలో తీసుకుని చూడండి. అంతేగాకుండా ఆకులను నమిలి మింగినా ఫలితం ఉంటుందంట. 
  • ఇందులో విటమిన్ ఎ సమృద్ధిగా లభిస్తుంది. కళ్లకు సంబంధించిన సమస్యలను పొగొడుతుంది. కంటిచూపును కూడా మెరుగుపరచడంతో పాటు రేచీకటి సమస్యను దూరం చేస్తుంది. 
  • ఇక వెంట్రుకలు రాలడం...పలచబడడం..తదితర సమస్యలను చాలా మంది ఎదుర్కొంటుంటారు. వీరికి కరివేపాకు మంచి ఔషధం అని చెప్పవచ్చు. వెంట్రుకలు ఒత్తుగా పెరిగేందుకు కరివెపాకు సహాయ పడుతుంది. 
  • ఇందులో ఉండే కొన్ని ప్రత్యేక లక్షణాలు రక్తంలోని చక్కెర స్థాయిలను తగ్గించేందుకు కృషి చేస్తుంది. చక్కెర నియంత్రణలో ఉంటుంది. మూత్రసంబంధిత సమస్యలను దూరం చేస్తుంది. మూత్రపిండాల్లో ఏర్పడే రాళ్లను కరిగిస్తుంది.
10:56 - September 12, 2018

మెగాస్టార్ చిరంజీవి తాజా చిత్రంపై ఓ వార్త సోషల్ మీడియాలో దుమారం రేపుతోంది. ‘సైరా’ సినిమాను నిషేధిస్తారనే వార్త కలకలం రేపుతోంది. తెలుగు సినీ ప్రేక్షకులు ఈ సినిమా కోసం ఎంతో ఆశగా ఎదురు చూస్తున్నారు. దాదాపు రూ. 250 కోట్ల బడ్జెట్ తో ఈ సినిమా రూపొందుతోంది. తెలుగు, తమిళ, మలయాళ, కన్నడ, హిందీ భాషల్లో చిత్రాన్ని విడుదల చేయనున్నారు. 

స్వాతంత్ర సమరయోధుడు ఉయ్యాలవాడ నరసింహారెడ్డి జీవిత కథ ఆధారంగా ఈ సినిమా రూపొందుతోంది. చిరంజీవి టైటిల్ రోల్‌లో నటిస్తున్న ఈ సినిమాలో ఇతర భాష నటీనటులు కూడా నటిస్తున్నారు. శాండల్‌వుడ్ కు సంబంధించిన స్టార్ హీరో సుదీప్ కూడా ఈ సినిమాలో నటిస్తున్నారు. ఇటీవలే ఈ సినిమాకు సంబంధించిన ఓ టీజర్ ను విడుదల చేసిన సంగతి తెలిసిందే. తాజాగా ‘సైరా నరసింహారెడ్డి' సినిమాపై నిషేధం విధించనున్నట్లు టాక్ వినిపిస్తోంది.  భారీ బడ్జెట్‌తో తెరకెక్కే తమిళ, తెలుగు, మలయాళ చిత్రాల డబ్బింగ్ వెర్షన్ ని కన్నడలో విడుదల చేయాలని నిషేధించాలని అక్కడ సినీ పరిశ్రమపై తీవ్ర ఒత్తిడి పెరుగుతోందంట. మరి ఇది నిజమా ? కాదా ? అనేది తెలియాలంటే చిత్ర యూనిట్ స్పందించే వరకు తెలియదు. 

10:45 - September 12, 2018

ఢిల్లీ : నోటా...ఎందుకు తీసేశారు..అయ్యో వచ్చే ఎన్నికల్లో ఆప్షన్ లేకపోతే ఎలా ? అంటూ కంగారు పడకండి. పూర్తిగా చదవండి. ఎన్నికల్లో నిలబడిన అభ్యర్థులు నచ్చకపోతే తిరస్కరణ ఓటు వేసే అధికారాన్ని కల్పిస్తూ కేంద్ర ఎన్నికల కమిషన్ ఓటర్లకు అవకాశం కల్పించింది. ఎలక్ట్రానిక్ ఓటింగ్ యంత్రాల్లో అభ్యర్థుల గుర్తుతోపాటు నోటా (నన్ ఆఫ్ ది ఎబవ్) ను ఏర్పాటు చేశారు.

కానీ ఈ నోటా ఆప్షన్ ఆ ఎన్నికల్లో ఉండదు. సుప్రీంకోర్టు ఆదేశాల మేరకు రాజ్యసభ ఎన్నికలకు సంబంధించిన బ్యాలెట్‌ పేపర్లలో నోటా గుర్తును తొలగిస్తున్నట్లు కేంద్ర ఎన్నికల సంఘం(ఈసీ) మంగళవారం ప్రకటించింది. ఈసీ ఇచ్చిన నోటిఫికేషన్‌కు సవరణలు సూచిస్తూ సీజేఐ జస్టిస్‌ దీపక్‌ మిశ్రా, జస్టిస్‌ ఏఎం ఖన్విల్కర్, జస్టిస్‌ డీవై చంద్రచూడ్‌ల బెంచ్‌ తీర్పు చెప్పింది. కేవలం రాజ్యసభ ఎన్నికలకు మాత్రమే ఇది వర్తిస్తుందని తెలిపింది. లోక్ సభ, శాసనభ వంటి ప్రత్యక్ష ఎన్నికల్లో మాత్రమే నోటా ఉంటందని వెల్లడించింది. 

 

09:30 - September 12, 2018

వీణా మాలిక్...పాక్ సంతతికి చెందిన వారు. ఈమె నటించిన ఓ సినిమా రికార్డులను నెలకొల్పుతోంది. రొమాంటిక్ యాక్షన్ ఎంటర్‌టైనర్ ‘రెడ్ మిర్చి’ కన్నడలో ఇటీవలే విడుదలైంది. ఈ సినిమా అక్కడ రికార్డులను నెలకొల్పంది. ఈ చిత్రం రూ. 25 కోట్లు వసూలు చేసింది. 150 రోజులు విజయవంతంగా ప్రదర్శితమయ్యింది. 
దీనితో ఈ సినిమాను తెలుగులో విడదల చేయాలని పి.వి.ఎన్. సమర్పణలో నైన్ మూవీస్ సంస్థ ఆలోచించింది. అందులో భాగంగా సెప్టెంబర్ 28వ తేదీన చిత్రాన్ని విడుదల చేయనున్నారు. ప్రమోషన్ లో భాగంగా వీణా మాలిక్ చిత్రాలు సెగలు పుట్టిస్తున్నాయి. వీణామాలిక్, అక్షయ్ జంటగా నటించిన ఈ చిత్రంలో సన, షఫీ, సాదుకోకిల, అవినాష్ మొదలగువారు నటించారు. మరి ఈ ‘రెడ్ మిర్చి’ని తెలుగు వారు ఆదరిస్తారా ? లేదా ? అనేది చూడాలి. 

09:08 - September 12, 2018

హైదరాబాద్ : జూనియర్ పంచాయతీ కార్యదర్శి పోస్టులకు దరఖాస్తు గడువు అయిపోయిందని చింతిస్తున్నారా ? అదేం లేదు దరఖాస్తు గడువును ప్రభుత్వం పొడిగించింది. ఫీజు చెల్లింపునకు మంగళవారం చివరి తేదీ అని దరఖాస్తుకు బుధవారం అని ఇదివరకే ప్రభుత్వం ప్రకటించిన సంగతి తెలిసిందే. కానీ దరఖాస్తు నమోదులో తీవ్ర ఇబ్బందులు పడుతున్నారనే ఫిర్యాదులు రావడంతో గడువు తేదీని పెంచాలని ప్రభుత్వం నిర్ణయం తీసుకుంది. అభ్యర్థులకు అసౌకర్యాన్ని దృష్టిలో పెట్టుకున్న అధికారులు… గడువు పెంచాలని ప్రభుత్వాన్ని కోరారు. రాష్ట్ర రెవెన్యూ శాఖ ఆపద్ధర్మ మంత్రి జూప‌ల్లి కృష్ణారావు సూచ‌న‌ల‌తో.. రెండురోజుల గ‌డువు పొడిగిస్తూ నియామక కమిటీ నిర్ణయం తీసుకుంది. ఈ మేరకు ఫీజు చెల్లించడానికి గడువును సెప్టెంబరు 14 వరకు, దరఖాస్తు చేసుకోవడానికి గడువును సెప్టెంబరు 15 వరకు పొడిగిస్తూ ఉత్తర్వులు జారీ చేసింది.

08:54 - September 12, 2018

కరీంనగర్ : ఎన్నో ఏళ్ల అనుభవం...ప్రమాదమన్న సంగతే ఎరుగని డ్రైవర్.. దీనితో ఆర్టీసీ సంస్థ నుండి ఎన్నో రివార్డులు..అవార్డులు అందుకున్నాడు. ఇటీవలే ఆగస్టు 15వ తేదీన ఉత్తమ అవార్డు అందుకున్నాడు. కానీ కొండగట్టులో జరిగిన బస్సు ప్రమాదంలో డ్రైవర్ ఇతనే. 

కొండగట్టు ప్రమాదంలో 57 మంది మృతి చెందిన సంగతి తెలిసిందే. ప్రమాదం తరువాత డ్రైవర్ అతి వేగంగా నడపడం..అజాగ్రత్తగా నడిపారనే ఆరోపణలు వినిపించాయి. కానీ ఆ బస్సు నడిపింది ఉత్తమ డ్రైవర్ శ్రీనివాస్. ఉత్తమ డ్రైవర్ గా ఇటీవలే అవార్డు కూడా అందుకున్నట్లు అతని కుటుంబసభ్యులు పేర్కొన్నారు. ఈ ఘటనలో అతను కూడా మృతి చెందడం ఆ కుటుంబంలో తీవ్ర విషాదాన్ని నింపింది. ధన పొదుపులో ఎన్నాళ్లుగానో ఉత్తమ డ్రైవర్ గా శ్రీనివాస్ ప్రతిభ చూపించాడని స్వయంగా ఆర్టీసీ అధికారులు పేర్కొంటున్నారు. కానీ పని ఒత్తిడి, అధిక గంటలు పనిచేయడం వల్లే బస్సుపై నియంత్రణ కోల్పోయాడని ఆరోపణలు వినిపిస్తున్నాయి. అంతేగాకుండా పాత బస్సు కావడం...అధిక లోడ్ కావడం..దీనితో అదుపులోకి రాకపోవడంతో నియంత్రణ కోల్పోయాడని తెలుస్తోంది. ఏది ఏమైనా కొండగట్టు ప్రమాదం అందరినీ కలిచివేసింది. 

08:31 - September 12, 2018

పశ్చిమ గోదావరి : ఏపీలో చారిత్రాత్మక ఘట్టం ఆవిష్కృతం కాబోతుంది. బహుళార్థ సాధక పోలవరం ప్రాజెక్టులో మంత్రులు, అధికారులు, వారి కుటుంబసభ్యులతో కలిసి సీఎం చంద్రబాబు బుధవారం నడవనున్నారు. నాగార్జునసాగర్ డ్యాం నిర్మించినప్పుడు... అప్పటి  దేశ ప్రధాని  జవహర్ లాల్ నెహ్రూ.. సాగర్ స్పిల్‌వే వాక్ నిర్వహించి చరిత్రలో నిలిచిపోయారు. ఇప్పుడలాగే.. భారీ స్థాయిలో చేపట్టిన పోలవరంలో నిర్వహించనున్న స్పిల్‌వే వాక్‌తో సీఎం చరిత్రను తిరగరాయనున్నారు. వచ్చే ఏడాది మే నాటికి ప్రాజెక్టును పూర్తి చేయాలన్న లక్ష్యంతో వేగంగా పనులు చేస్తున్నారు. కేంద్రం సహకరించకున్నా.. డయాఫ్రం వాల్‌, స్పిల్‌వే నిర్మాణం పూర్తి దశకు తెచ్చారు. వైద్యబృందంతో కలిసి నడవనున్న సీఎం.. 48వ బ్లాక్ వద్ద పైలాన్ ఆవిష్కరించనున్నారు. తర్వాత మంత్రులు, ఎమ్మెల్యేలు, ఎమ్మెల్సీలు నడవనున్నారు. అనంతరం బహిరంగ సభ నిర్వహించనున్నారు.. 

1148 మీటర్ల పొడవు, రెండున్నర మీటర్ల ఎత్తు, రెండు మీటర్ల వెడల్పుతో దీని నిర్మాణం చేపట్టారు. 52 బ్లాకులకు గాను 48 బ్లాకుల్లో గ్యాలరీ నిర్మాణం పూర్తయ్యింది. ప్రాజెక్టు మొత్తం పనుల్లో 58 శాతానికిపైగా పనులు పూర్తయ్యాయి. మట్టి తవ్వకం, కాంక్రీట్ పనులను మరింత వేగవంతం చేయాలని సీఎం ఆదేశించారు. అత్యంత అధునాతన జపాన్, జర్మన్ టెక్నాలజీతో నిర్మిస్తున్న పోలవరం ప్రాజెక్టులో పండుగ వాతావరణం సంతరించుకోనుంది. 

08:18 - September 12, 2018

వరంగల్ : కాంగ్రెస్‌ నేత గండ్ర వెంకటరమణారెడ్డిపై వరంగల్‌ రూరల్‌ జిల్లా శాయంపేట పోలీస్‌స్టేషన్‌లో కేసు నమోదైంది. స్టోన్‌ క్రషర్‌ యాజమాని రవీందర్‌రావును తుపాకీతో బెదిరించాడనే ఆరోపణల నేపథ్యంలో పోలీసులు కేసు నమోదు చేశారు. గండ్ర వెంకటరమణారెడ్డి, ఆయన సోదరుడు భూపాల్‌రెడ్డిపై 27, 323, 506 సెక్షన్ల కింద కేసులు పెట్టారు. 

08:08 - September 12, 2018

విజయవాడ : దసరా నవరాత్రి ఉత్సవాల కోసం విజయవాడలో దుర్గగుడి పాలకమండలి సమావేశం పలు కీలక నిర్ణయాలను తీసుకుంది. దసరా ఉత్సవాల్లో జరిగే పూజలు, హోమాల టికెట్‌ ధరలను పాత ధరలకే విక్రయించాలని నిర్ణయించింది. మూల నక్షత్రం రోజున జరిగే కుంకుమార్చన టికెట్‌ ధర 5 వేలు, మిగిలిన రోజుల్లో 3 వేలు, శత చండిహోమానికి 4 వేలుగా నిర్ణయిస్తూ తీర్మానం చేసింది. ఢిల్లీలోని ఏపి భవన్‌లో శ్రీ దుర్గామాత మందిరంలో ప్రతి శుక్రవారం అభిషేకాలు, కుంకుమ పూజల సేవలకు పాలకమండలి ఆమోదం తెలిపింది. సెల్‌ఫోన్‌ భద్రపరిచే కౌంటర్‌ వివాదం కావడంతో రామిశెట్టి ప్రసాద్‌ కాంట్రాక్ట్‌ లైసెన్స్‌ను రద్దు చేసింది. దసరా ఉత్సవాల్లో భక్తులకు ఎలాంటి అసౌకర్యాలు తలెత్తకుండా ప్రత్యేక ఏర్పాట్లు చేస్తున్నట్లు ఈవో కోటేశ్వరమ్మ తెలిపారు. ఘాట్‌ రోడ్డులోని క్యూలైన్ల మార్గంలోనే అమ్మవారి దర్శనానికి భక్తులకు అనుమతిస్తామన్నారు.

దసరా నవరాత్రి ఉత్సవాల కోసం

దసరా నవరాత్రి ఉత్సవాల కోసం విజయవాడలో దుర్గగుడి పాలకమండలి సమావేశం పలు కీలక నిర్ణయాలను తీసుకుంది. దసరా ఉత్సవాల్లో జరిగే పూజలు, హోమాల టికెట్‌ ధరలను పాత ధరలకే విక్రయించాలని నిర్ణయించింది. 

07:44 - September 12, 2018

హైదరాబాద్ : సంగారెడ్డి మాజీ ఎమ్మెల్యే జగ్గారెడ్డికి... కోర్టులో ఎదురుదెబ్బ తగిలింది.  మానవ అక్రమ రవాణా కేసులో అరెస్టైన మాజీ ఎమ్మెల్యే జగ్గారెడ్డికి ఉచ్చు బిగుస్తోంది. పాస్‌పోర్టు దుర్వినియోగం, ప్రభుత్వ అధికారులను మోసం చేసిన కేసుల్లో పలు సెక్షన్ల కింద కేసులు నమోదు చేసిన పోలీసులు సికింద్రాబాద్‌లోని సిటీ సివిల్‌కోర్టులో హాజరు పర్చారు. వాద ప్రతివాదనలు విన్న న్యాయస్థానం జగ్గారెడ్డికి 14 రోజుల రిమాండ్‌ విధించడంతో జగ్గారెడ్డిని పోలీసులు చంచల్‌గూడ జైలుకు తరలించారు.

పాస్‌పోర్టు సందర్భంగా జగ్గారెడ్డి చూపించిన పత్రాలు, ప్రస్తుతం వారి కుటుంబ సభ్యుల వివరాలు సేకరించిన పోలీసులు.. రెండింటికి ఎక్కడా పొంతన లేదని తెలిపారు. ఆధారాల కోసం జగ్గారెడ్డి కుటుంబ సభ్యుల ఆధార్‌ కార్డులు, ఫొటోలు సేకరించారు. తన పాస్‌పోర్టు పోయిందంటూ 2016 జనవరిలో... మరో కొత్త పాస్‌పోర్టును జగ్గారెడ్డి పొందినట్లు పోలీసుల దర్యాప్తులో తేలింది. అయితే తనను ప్రభుత్వం అక్రమంగా అరెస్టు చేయించిందంటూ జగ్గారెడ్డి ఆరోపించారు.

మానవ అక్రమ రవాణాకు సంబంధించిన కేసు ఉన్నందున హైకోర్టుకు వెళ్లాలని న్యాయమూర్తి సూచించారు. కేసులో పురోగతి కోసం జగ్గారెడ్డిని పది రోజుల కస్టడీకి ఇవ్వాలని పోలీసులు న్యాయస్థానంలో పిటిషన్‌ దాఖలు చేశారు. పోలీసులు దాఖలు చేసిన కస్టడీ పిటిషన్‌ను న్యాయస్థానం సోమవారానికి వాయిదా వేసింది.

07:27 - September 12, 2018

హైదరాబాద్ : దేశమంతా వినాయక చవితి సందడి మొదలైంది. ఇప్పటికే ప్రతి వీధిలో వినాయక మండపాలు వెలిశాయి. కొంతమంది ఇప్పటికే బొజ్జ గణపయ్యలను కొనుగోలు చేసి మండపాలకు తరలిస్తుండగా.. మార్కెట్‌లో అనేక రూపాల్లో వినాయక విగ్రహాలు దర్శనమిస్తున్నాయి. కొంతమంది ప్రత్యేకంగా ఆర్డర్‌ ఇచ్చి వినాయక విగ్రహాలను తయారు చేయించుకోగా... పలువురు మార్కెట్‌లో లభ్యమవుతున్న విగ్రహాలను కొనుగోలు చేస్తున్నారు.  ఎన్నో ఏళ్లుగా ప్రకృతికి హాని కలిగించే ప్లాస్టర్‌ ఆఫ్‌ పారిస్‌ విగ్రహాలనే చాలామంది కొనుగోలు చేస్తుండగా.. ఈసారి చాలామంది మట్టి గణేషుల వైపు మొగ్గు చూపుతున్నారు. దీంతో ప్లాస్టర్‌ ఆఫ్‌ పారిస్‌ విగ్రహాల మాదిరిగానే మట్టి గణపతులకు భారీ డిమాండ్‌ ఏర్పడింది. ఇప్పటికే చాలామంది విగ్రహాలను వేలాది రూపాయలకు కొనుగోలు చేసి మంటపాలకు తరలిస్తున్నారు. అయితే.. గతేడాదితో పోలిస్తే రేట్లు పెరిగాయని భక్తులంటున్నారు. మరోవైపు గత రెండు రోజులుగా హైదరాబాద్‌ నగరంలో వర్షం కురుస్తుండడంతో కొనుగోలు ఎలా ఉంటాయోనన్న టెన్షన్‌లో వ్యాపారస్తులు ఉన్నారు. 

07:17 - September 12, 2018

ఇస్లామాబాద్ : పాకిస్తాన్ మాజీ ప్రధాని నవాజ్‌ షరీఫ్‌ భార్య బేగం కుల్సుమ్‌ మరణించారు. చాలా కాలంగా క్యాన్సర్‌తో బాధపడుతున్న ఆమె మంగళవారం లండన్‌లో మృతి చెందారు. ఆమె మృతదేహానికి పాకిస్తాన్‌లో అంత్యక్రియలు నిర్వహించనున్నారు. జైల్లో ఉన్న నవాజ్‌షరీఫ్ ఆయన కుమార్తె, అల్లుడు పెరోల్‌పై వచ్చి అంత్యక్రియలకు హాజరు కానున్నారు. కుల్సుమ్‌ బేగం మృతిపట్ల  తీవ్ర సంతాపం ప్రకటించిన పాక్‌ ప్రధాని ఇమ్రాన్‌ ఖాన్‌...ఆమె అంత్యక్రియలకు ఏర్పాట్లు చేస్తామన్నారు.

 

07:06 - September 12, 2018

ఓవల్‌ టెస్ట్‌లో భారత్‌ ఓటమి పాలయ్యింది. భారత్‌తో జరిగిన ఐదో టెస్టులో ఇంగ్లండ్‌ ఘన విజయం సాధించింది. ఇంగ్లండ్‌ తొలి ఇన్నింగ్స్‌లో 332 పరుగులు చేసి ఆలౌట్‌ అయ్యింది. ఆ తర్వాత భారత్‌ తొలి ఇన్నింగ్స్‌లో భారత్‌ 292 పరుగులు చేసి ఆలౌట్‌ అయ్యింది. దీంతో 40 పరుగుల ఆధిక్యంతో రెండో ఇన్నింగ్స్‌ ప్రారంభించిన ఇంగ్లండ్‌ విజృంభించింది. రెండో ఇన్నింగ్స్‌లో ఇంగ్లండ్‌ 423 పరుగులు చేసి.. భారత్‌కు 464 పరుగల లక్ష్యాన్ని ముందుంచింది. అయితే లక్ష్యఛేదనలో భారత్‌ మరోసారి తడబడింది. తొలి ఇన్నింగ్స్‌లో అద్భుతంగా రాణించిన విహారి... ఈ ఇన్నింగ్స్‌లో పరుగులు చేయకుండా పెవిలియన్‌ చేరాడు. ఆ తర్వాత బ్యాటింగ్‌కు వచ్చిన రిషబ్‌ పంత్‌.. రాహుల్‌కు మంచి సహకారాన్ని అందిస్తూ బ్యాటింగ్‌ చేశాడు. వీరిద్దరు కలిసి ఆరో వికెట్‌కు 204 పరుగులు జోడించారు. ఈ క్రమంలో రాహుల్‌, పంత్‌లు సెంచరీలు చేశారు. అయితే.. 82వ ఓవర్‌లో ఈ భాగస్వామ్యానికి తెరపడింది. రాహుల్‌ క్లీన్‌ బౌల్డ్‌ అయ్యాడు. ఆ తర్వాత రిషబ్‌ పంత్‌కు క్యాచ్‌ ఇచ్చి పెవిలియన్‌ దారిపట్టాడు. ఆ తర్వాత బ్యాటింగ్‌కు వచ్చిన వారెవరూ రాణించలేదు. దీంతో భారత్‌ 94.3 ఓవర్లలో 345 పరుగులు చేసి ఆలౌంట్‌ అయ్యింది. ఫలితంగా ఇంగ్లండ్‌ ఈ మ్యాచ్‌లో 118 పరుగుల తేడాతో విజయం సాధించి.. 4-1 తేడాతో సిరీస్‌ కైవసం చేసుకుంది. ఇరు ఇన్నింగ్స్‌లో అద్బుతంగా రాణించిన అలెస్టర్‌ కుక్‌కి ప్లేయర్‌ ఆఫ్‌ ది మ్యాచ్‌ అవార్డు లభించింది. ఈ సిరీస్‌లో 250కి పైగా పరుగులు చేసి.. 11 వికెట్లు తీసిన యువ క్రికెటర్‌ శామ్‌ కర్రన్‌కి ప్లేయర్‌ ఆఫ్‌ ది సిరీస్‌ అవార్డు దక్కింది. 

 

06:52 - September 12, 2018

హైదరాబాద్ : సచివాలయంలో సాయంత్రం 5.30గంటలకు సీఈసీ బృందం ప్రెస్ మీట్ నిర్వహించనుంది. 
హైదరాబాద్ : నేడు పైలెట్ రోహిత్ రెడ్డి కాంగ్రెస్ లో చేరనున్నారు. 
విశాఖపట్టణం : జగన్ చేపట్టిన పాదయాత్ర కొనసాగుతోంది. 261వ రోజు ఎంవీపీ కాలనీ, వెంకోజీపాలెంలో జగన్ పాదయాత్ర జరుగనుంది. సాయంత్రం మైనార్టీ ఆత్మీయ సమావేశంలో పాల్గొననున్నారు. 
హైదరాబాద్ : నేడు కొండగట్టు బస్సు ప్రమాద ఘటనలో మృతి చెందిన వారి కుటుంబాలను టిడిపి నేతలు పరామర్శించనున్నారు. 
హైదరాబాద్ : నేడు జనసేన అధినేత పవన్ కళ్యాణ్ తో సీపీఎం నేత తమ్మినేని భేటీ కానున్నారు. పొత్తుల అంశంపై పవన్ తో చర్చించనున్నారు. 
హైదరాబాద్ : జలమండలిలో ఉదయం 10.గంటలకు 31 జిల్లాల అధికారులతో సీఈసీ బృందం భేటీ కానుంది. ఎస్పీలు, ఐజీ, డీఈఓలు పాల్గొననున్నారు. 

Don't Miss