Activities calendar

06 November 2018

21:50 - November 6, 2018

హైదరాబాద్: కొత్తపేటలోని విక్టోరియా మెమోరియల్ మెట్రో రైల్వే స్టేషన్ పై నుంచి దూకి స్వప్న అనే వివాహిత ఆత్మహత్యాయత్నం చేసింది. మంగళవారం సాయంత్రం జరిగిన ఈఘటన కలకలం రేపింది. ఎన్టీఆర్ నగర్ లో ఉండే స్వప్న కుటుంబ కలహాలతో ఆత్మహత్యాయత్నం చేసిందని తెలిసింది. కాగా....స్టేషన్ పై నుంచి దూకటంతో ఆమెకు గాయాలయ్యాయి. ఆమె దూకినప్పుడు ఒక్క సారిగా పెద్ద శబ్దం రావటం గమనించిన స్ధానికులు, ఆమెను ఉస్మానియా ఆసుపత్రికి తరలించి చికిత్స అందిస్తున్నారు. స్వప్న భర్త రాఘవేంద్ర సాఫ్టేవేర్ ఉద్యోగిగా పనిచేస్తున్నాడని వీరికి 2 సంవత్సరాల  బాబు ఉన్నాడని తెలిసింది.  కేసు నమోదు చేసుకున్న పోలీసులు విచారణ చేపట్టారు. 

21:13 - November 6, 2018

విశాఖపట్నం: విశాఖలో జరిగిన భూరికార్డుల ట్యాంపరింగ్ పై సిట్ అధికారులు విచారణ జరిపి కేబినెట్ కు నివేదిక ఇచ్చారు. నివేదికలో మాజీ మంత్రి ధర్మాన పేరు కూడా ఉంది.  విశాఖ జిల్లాలో గత 15 ఏళ్లుగా జరిగిన భూలావాదేవీలపై విచారణ జరిపి ఇచ్చిన సిట్ నివేదికలో ధర్మానతో సహా ముగ్గురు కలెక్టర్లు, నలుగురు జాయింట్ కలెక్టర్లు పేర్లు ఉన్నాయి. వీరు కాక కిందిస్ధాయి సిబ్బందిలో 14మంది ఆర్డీవోలు,10 మంది డీఆర్వోలు కూడా ఉన్నారు. మొత్తంగా 100 మంది అధికారులపై శాఖాపరమైన క్రిమినల్  చర్యలు తీసుకోవాలని సిట్ తన నివేదికలో తెలిపింది. మాజీ సైనికుల పేరుతో జరిగిన భూముల కుంభకోణంపై ప్రభుత్వం సిట్ ఏర్పాటు చేసింది.  సిట్ నివేదిక అనంతరం ,అప్పటి ఎన్వోసీలు రద్దు చేసేందుకు ప్రభుత్వం రంగం సిధ్దం చేస్తోంది. కొన్ని భూముల రిజిష్ట్రేషన్లు రద్దు చేయాలని కూడా సిట్ సూచించింది. భూ కుంభకోణంలో మంత్రి గంటాకుసంబంధంలేదని  సిట్ తేల్చింది. సిట్ నివేదికపై తదుపరి చర్యలకోసం ప్రభుత్వం ఒక కమిటీని ఏర్పాటు చేసింది.

20:02 - November 6, 2018

లక్నో: ఉత్తర ప్రదేశ్ ముఖ్యమంత్రి యోగి ఆదిత్యనాధ్ తన పదవి కాలంలో రికార్డులు సృష్టించేటట్టు ఉన్నారు. నిన్నటికి నిన్న లక్నోలోని ఏకన ఇంటర్నేషనల్ క్రికెట్ స్టేడియం పేరును భారతరత్న అటల్ బిహారీ వాజ్ పేయి ఏకన ఇంటర్నేషనల్ క్రికెట్ స్టేడియంగా మార్చిన యోగి, మంగళవారం ఫైజాబాద్ జిల్లా పేరును అయోధ్య జిల్లాగా పేరు మారుస్తూ నిర్ణయం తీసుకున్నారు. అయోధ్యలో  దీపావళి పండుగ సందర్భంగా ఏర్పాటు చేసిన కార్యక్రమంలో యోగి ఈప్రకటన చేశారు. అయోధ్య మనకు గర్వకారణమని, అయోధ్య అంటేనే రాముడని యోగి అన్నారు. ఈరోజు నుంచి ఫైజాబాద్‌ జిల్లా అయోధ్యగా పేరు మారుస్తున్నట్లు ఆయన సభాముఖంగా ప్రకటించారు. ఫైజాబాద్ జిల్లా పేరు మార్పుతో పాటు అయోధ్యలో నిర్మించే విమానాశ్రయానికి రాముడి పేరు, వైద్య కళాశాలకు రాముడి తండ్రి దశరధుని పేరు పెడతామని యోగి ఆదిత్యనాథ్  తెలిపారు. గతంలో యూపీ ప్రభుత్వం మొఘల్‌సరై రైల్వే జంక్షన్‌ పేరును దీన్‌ దయాళ్‌ ఉపాధ్యాయ్‌ జంక్షన్‌గాను, అలహాబాద్ ను ప్రయాగరాజ్ గాను మార్చిన విషయం తెలిసిందే. మరోవైపు బరేలి, ఆగ్రా విమనాశ్రాయాల పేర్లను కూడా మార్చే యోచనలో యోగి  సర్కార్‌  ఉన్నట్లు తెలుస్తోంది.

19:12 - November 6, 2018


సూపర్ స్టార్ రజనీకాంత్, శంకర్‌ల కాంబినేషన్‌లో, రూపొందుతున్న ప్రెస్టీజియస్ మూవీ, 2.ఓ.. అక్షయ్ కుమార్ విలన్‌గా, అమీ జాక్సన్ హీరోయిన్‌గా నటించారు. లైకా ప్రొడక్షన్స్‌ సుభాస్కరన్, రూ. 550 కోట్ల భారీ బడ్జెట్‌తో నిర్మించాడు. రీసెంట్‌గా రిలీజ్ చేసిన ఈ‌సినిమా ట్రైలర్ సోషల్ మీడియాని షేక్ చేసేస్తోంది. కేవలం, 24 గంటల్లోనే 25 మిలియన్ వ్యూస్ వచ్చాయి. ఇప్పటికే పలువురు సెలబ్రిటీలు 2.ఓ ట్రైలర్ గురించి స్పందించగా, ఇప్పుడు సూపర్ స్టార్ మహేష్ బాబు తన అభిప్రాయాన్ని ఆడియన్స్‌తో షేర్ చేసుకున్నాడు. 2.ఓ ట్రైలర్ చూసాను. అద్భుతంగా ఉంది. మైండ్ బ్లోయింగ్ విజువల్స్, ఊహలకందని కాన్సెప్ట్, ఇక చిట్టీని వెండితెరపై ఎప్పుడెప్పుడు చూద్దామా అనిపిస్తుంది. శంకర్, రజనీ సర్, అక్షయ్ కుమార్, ఏఆర్ రెహమాన్‌లతో పాటు, 2.ఓ  టీమ్ అందరికీ శుభాకాంక్షలు.. అని, మహేష్ ట్వీట్ చేసాడు.
మహేష్ ట్వీట్‌కి శంకర్, అక్షయ్ కుమార్.. థ్యాంక్స్‌అని రిప్లై ఇచ్చారు. నవంబర్ 29న  2.ఓ  ప్రపంచవ్యాప్తంగా గ్రాండ్‌గా రిలీజ్ కానుంది.  

 

19:09 - November 6, 2018

అమరావతి: ఆంధ్రప్రదేశ్ మంత్రి వర్గ సమావేశం ముఖ్యమంత్రి చంద్రబాబు నాయుడు అధ్యక్షతన మంగళవారం అమరావతిలో సమావేశం అయ్యింది. ఈసమావేశంలో పలు కీలక నిర్ణయాలు తీసుకున్నారు. కడప జిల్లాలో 18 వేల కోట్ల రూపాయల వ్యయంతో 3 మిలియన్ టన్నుల సామర్ధ్యం కల ఉక్కు ఫ్యాక్టరీ నిర్మాణానికి ఏపీ కేబినెట్ ఆమోదం తెలిపింది. నెలరోజుల్లో మంచి రోజు చూసుకుని ముఖ్యమంత్రి ఉక్కు ఫ్యాక్టరీకి శంకుస్ధాపన చేయనున్నారు. ఉక్కు ఫ్యాక్టరీ నిర్మాణానికయ్యే వ్యయాన్ని బ్యాంకుల నుంచి రుణంగా తీసుకోవాలని కేబినెట్ నిర్ణయించింది. కడప స్టీల్ప్లాంట్ నిర్మాణంపై ప్రధానికి ఒక లేఖ రాయాలని, అలాగే రాష్ట్ర విభజన హామీలు నెరవేర్చటం లేదని మరో లేఖ రాయాలని మంత్రివర్గంలో నిర్ణయించారు. దొనకొండలో మెగా ఇండస్ట్రియల్ హబ్ ఏర్పాటు చేయటానికి మంత్రివర్గం ఆమోదం తెలిపింది.  తిత్లీ తుపాను సాయంగా రాష్ట్ర ప్రభుత్వం రూ.1200 కోట్లు కేంద్ర సాయం కోరగా, కేంద్రం కేవలం రూ.229 కోట్లు ఇవ్వటం పట్ల అసంతృప్తి వ్యక్తం చేసిన కేబినెట్ ఈమేరకు హోం మంత్రికి నిరసన తెలుపుతూ లేఖ రాయాలని నిర్ణయించారు. రామాయపట్నం పోర్టు, అన్న క్యాంటిన్లు ఏర్పాటు, రాయలసీమ స్టీల్ కార్పోరేషన్ ఏర్పాటు, గ్రామీణ నీటి సరఫరా కోసం నిధుల సమీకరణ, విశాఖ మెట్రో రైలు ప్రాజెక్టు అంశాలపైన మంత్రివర్గంలో చర్చించారు. 

18:02 - November 6, 2018

చియాన్ విక్రమ్.. వయసుతో సంబంధం లేకుండా, క్యారెక్టర్ కోసం ఒళ్ళు హూనం చేసుకుంటాడు. ప్రతీ సినిమాలోనూ తన పాత్ర  వైవిధ్య భరితంగా ఉండేలా జాగ్రత్తలు తీసుకుంటాడు. ఇక కమల్ హాసన్ గురించి ఎంత చెప్పినా తక్కువే. ఎప్పటికప్పుడు కొత్తదనం కోసం ట్రైచేసే ఈ ఇద్దరి కాంబినేషన్‌లో ఒక సినిమా రూపొందితే ఎలా ఉంటుంది. బొమ్మ అదుర్స్ కదూ.. ఇంతకీ కమల్, విక్రమ్ కలిసి చేస్తున్న సినిమా సంగతులేంటంటే, రాజేష్ ఎమ్ సెల్వ డైరెక్షన్‌లో, రాజ్ కమల్ ఇంటర్నేషనల్ బ్యానర్‌పై, కమల్ హాసన్ సమర్పణలో, ట్రిడెంట్ ఆర్ట్స్ భాగస్వామ్యంలో, కాదరం కొండన్ అనే మూవీ రూపొందుతుంది. విక్రమ్‌కిది 56వ సినిమా. దీపావళి సందర్భంగా ఫస్ట్‌లుక్ రిలీజ్ చేసారు. ఎప్పటిలానే చియాన్ చింపేసాడు. పోస్టర్‌లో, విక్రమ్ రెండు చేతులకు బేడీలు వేసున్నాయి, స్టైల్‌గా గాగుల్స్ పెట్టుకుని, అంతే స్టైల్‌గా నోట్లోనుండి పొగ వదులుతున్నాడు. చేతిపైన, జబ్బలపైనా పెద్ద పెద్ద టాటూలతో పిచ్చెక్కించాడు. ఈ లుక్, విక్రమ్ అభిమానులను విశేషంగా ఆకట్టుకుంటుంది. ఈ సినిమాకి గిబ్రాన్ సంగీతమందిస్తున్నాడు. 

17:27 - November 6, 2018

లక్నో: సంచలన నిర్ణయాలు తీసుకునే  ఉత్తరప్రదేశ్ ముఖ్యమంత్రి యోగి ఆదిత్యనాధ్ ఇంకో సంచలన నిర్ణయం తీసుకున్నారు. ఇటీవలే అలహాబాద్ పేరును ప్రయాగ్ రాజ్ గా మారుస్తూ  తీసుకున్న నిర్ణయం మరువకముందే  లక్నోలోని ఏకన ఇంటర్నేషనల్ స్టేడియాన్ని  "భారతరత్న అటల్ బిహారీ వాజ్‌పేయి ఏకన క్రికెట్ స్టేడియం"గా పేరు మార్చి మంగళవారం ప్రారంభించారు. స్వర్గీయ వాజ్ పేయ్ గౌరవార్ధం పేరు మార్చినట్లు ఆయన చెప్పారు. తన సొంత వూరు గోరఖ్ పూర్ లో  ఉర్దూబజార్‌ను హిందీబజార్ గానూ, హుమాయూన్‌పూర్‌ను హనుమాన్‌నగర్, ఇస్లాంపూర్‌ను ఈశ్వరపూర్‌గా, మియాబజార్‌ను మాయాబజార్, అలీనగర్‌ను ఆర్యనగర్‌గా కూడా మార్చేశారు. ఇవాళ లక్నో లోని ఇంటర్నేషనల్ స్టేడియం కూడా పేరు మార్చి ప్రారంభోత్సవం చేశారు. 
50వేల మంది కూర్చునే కెపాసిటీ ఉన్నలక్నో ఇంటర్నేషనల్ క్రికెట్ స్డేడియంలో ఈరోజు భారత్, వెస్ట్ ఇండీస్ మధ్య రెండో టీ20 మ్యాచ్ జరగనుంది. అయితే మ్యాచ్‌కు ఒక్క రోజు ముందు స్టేడియం పేరు మార్చడాన్ని సమాజ్‌వాదీ పార్టీ తీవ్రంగా వ్యతిరేకించింది. అయితే స్టేడియం పేరు మార్పును ముఖ్యమంత్రి ఆదిత్యనాధ్ సమర్ధించుకుంటున్నారు. 1991 నుంచి 2009 మధ్య కాలంలో 5 సార్లు వరుసగా లక్నో ఎంపీగా సేవలు అందించినందుకే వాజ్‌పేయి సంస్మరణార్ధం ఈ స్టేడియానికి పేరు పెట్టడం జరిగిందని  తెలిపారు. వాజ్‌పేయి  ప్రభుత్వ హయాంలో క్రీడలను ఎంతగానో ప్రోత్సాహం అందించారని, ఆయన స్ఫూర్తితో దేశంలో ఉన్న అన్ని గ్రామాల్లో భారీ ఎత్తున విశాలమైన క్రీడా మైదానాలను నిర్మిస్తామని యోగి చెప్పారు. ఘజియాబాద్‌లో నిర్మింతమవుతున్న భారీ స్టేడియాన్ని త్వరలోనే ప్రారంభిస్తామని యోగి తెలిపారు. 

 

17:17 - November 6, 2018

ప్రస్తుతం మెగాస్టార్ చిరంజీవి కుటుంబం, సంతోషంలో మునిగి తేలుతుంది. చిరు నటిస్తున్న సైరా సమ్మర్‌లో రిలీజవుతుంది. రామ్ చరణ్, వినయ విధేయ రామ.. ఏమో సంక్రాంతికొస్తుంది. మరి చిరు ఫ్యామిలీ సంతోషానికి కారణం ఏంటబ్బా అనుకుంటున్నారా?
చిరు రెండవ కూతురు శ్రీజ, త్వరలో పండంటి బిడ్డకు జన్మనివ్వబోతోంది. ఈ విషయాన్ని చిరు చిన్నల్లుడు, విజేత సినిమాతో హీరోగా అరంగేట్రం చేసిన కళ్యాణ్ దేవ్ సోషల్ మీడియా ద్వారా తెలియచేసాడు. శ్రీజ, కళ్యాణ్‌ల మ్యారేజ్, బెంగుళూరులో‌గల చిరు ఫామ్‌హౌస్‌లో జరిగింది. శ్రీజకి ఇప్పటికే నివ్రితి అనే పాప ఉంది. . శ్రీజ, కళ్యాణ్ బేబి2‌#లోడింగ్ అంటూ, ఒక ఫోటో షేర్ చేసాడు కళ్యాణ్. ఇక మెగా ఫ్యామిలీ నుండి మెగా పవర్ స్టార్, ఇలాంటి గుడ్‌న్యూస్ ఎప్పుడు చెప్తాడా అని మెగా ఫ్యాన్స్‌ ఆసక్తిగా ఎదురుచూస్తున్నారు.  

17:12 - November 6, 2018

కాకినాడ: రాష్ట్రం విడిపోవ‌డానికి కార‌ణం ఎస్ఈజెడ్‌లే అని జనసేన చీఫ్ పవన్ కళ్యాణ్ ఆరోపించారు. రాత్రికి రాత్రి భూములు లాక్కోవ‌డం, ఊర్ల‌కి ఊర్లు ఖాళీ చేయించ‌డం దారుణం అన్నారు. తెలంగాణలో యువ‌త చాలా ఆవేద‌న‌తో, కోపంతో ఉండేదన్నారు. చంద్ర‌బాబు హ‌యాంలోనే ఇది మొద‌ల‌య్యిందన్నారు. కొండ‌లు, పీఠ‌భూములు ఇష్టారాజ్యంగా త‌వ్వేస్తే, అవి మ‌ళ్లీ తిరిగి రావన్నారు. ప్ర‌కృతిని ర‌క్షించాల‌న్న బాధ్య‌తే తనను రాజ‌కీయాల వైపు న‌డిపించిందని పవన్ చెప్పారు. ప్ర‌కృతి-రైతుని ప‌రిర‌క్షించే స‌మాజం లేన‌ప్పుడు, అంద‌రికీ అన్నం పెట్టే రైతులు ప‌స్తులుండి చ‌నిపోతున్న‌ప్పుడు ఎందుకీ వ్య‌వ‌స్థ‌ అని ప్రశ్నించారు. రాజ‌కీయ పార్టీలే సెజ్‌ల‌ని తీసుకువ‌చ్చాయని, ఎస్ఈజెడ్‌ల‌ని తీసుకురావ‌డానికి కార‌ణం విప‌రీత‌మైన భూదాహం అని పవన్ ఆరోపించారు. ఇలాంటి భూదాహం ప్ర‌పంచంలో మ‌రే దేశంలో లేదన్నారు. 

* అధికారంలోకి వ‌స్తే సెజ్ రైతుల‌పై కేసులు ఎత్తేస్తాం
* రైతు క‌న్నీరు దేశానికి క్షామం
* సామ‌ర‌స్య పూర్వక ప‌రిష్కారానికి క‌ట్టుబ‌డి ఉంటాం
* కాకినాడ ఎస్ఈజెడ్‌పై జ‌న‌సేన త‌రపున ప్రత్యేక క‌మిటీ

జ‌న‌సేన పార్టీ ప్ర‌భుత్వం వ‌స్తే కాకినాడ ఎస్ఈజెడ్ రైతుల‌పై పెట్టిన కేసులు ఎత్తివేస్తామ‌ని పవన్ కళ్యాణ్ హామీ ఇచ్చారు. అందుకు సంబంధించి చ‌ట్ట‌ప‌ర‌మైన ఇబ్బందులు ఉన్నా అధిగ‌మిస్తామ‌న్నారు. మంగ‌ళ‌వారం కాకినాడ జీ.కన్వెన్ష‌న్ హాల్లో సెజ్ బాధితుల‌తో పవన్ స‌మావేశ‌మ‌య్యారు.

Image may contain: 15 people, crowdగ‌త 13 ఏళ్లుగా తాము ప‌డుతున్న ఇబ్బందుల‌ని సెజ్ బాధితులు ప‌వ‌న్‌ ముందు ఇంచారు. రాత్రికి రాత్రి ఊళ్ళు ఖాళీ చేయించార‌నీ, సెజ్ కార‌ణంగా తమ భూములు బీడు వారిపోతున్నాయని,  తమ పిల్ల‌ల భ‌విష్య‌త్తు బీడు వారిపోతోంద‌ని వారు వాపోయారు. వారి బాధలు విన్న తర్వాత మాట్లాడిన పవన్.. కాకినాడ సెజ్ బాధితుల‌కి జ‌న‌సేన పార్టీ అండ‌గా ఉంటుందని హామీ ఇచ్చారు.

Image may contain: 2 people, people smilingఎస్ఈజెడ్‌ల ఏర్పాటుకి సంబంధించి తనకు స్ప‌ష్ట‌మైన అవ‌గాహ‌న ఉందన్నారు. ప‌రిశ్ర‌మ‌లు స్థాపించేందుకు భూములు తీసుకుంటే, ఓ నిర్ణీత గ‌డువులో వాటిని వినియోగించాలన్నారు. అలా చేయ‌లేన‌ప్పుడు ఎవ‌రి భూములు వారు తిరిగి తీసేసుకునే హ‌క్కు ఉందన్నారు. అయితే ఇక్క‌డ ప‌రిస్థితులు మాత్రం అందుకు పూర్తి విరుద్దంగా ఉన్నాయన్నారు. ఎమ్మెల్యే, ఎంపి, మంత్రులు అంతా పారిశ్రామికవేత్త‌ల‌ని దోచుకుంటున్నారని పవన్ ఆరోపించారు. కాకినాడ ఎస్ఈజెడ్ స‌మ‌స్య‌కి జ‌న‌సేన పార్టీ ఓ సామ‌ర‌స్య‌పూర్వ‌క ప‌రిష్కారం చూపుతుందన్నారు. రైతు క‌న్నీరు దేశానికి క్షేమం కాదు.. క్షామం అన్నారు. సెజ్‌ల వ‌ల్ల భూములు బంధాల్ని తెంపేస్తున్నాయని పవన్ వాపోయారు. 

16:23 - November 6, 2018

దళపతి విజయ్, స్టార్ డైరెక్టర్ ఏ.ఆర్.మురుగదాస్‌ల కాంబినేషన్‌లో, తుపాకి, కత్తి లాంటి సూపర్ హిట్స్ తర్వాత తెరకెక్కిన సినిమా, సర్కార్.. సమకాలీన రాజకీయాల నేపథ్యంలో రూపొందిన సర్కార్, భారీ అంచనాల మధ్య, దీపావళి కానుకగా తమిళ్‌, తెలుగులో ప్రపంచవ్యాప్తంగా  ఈరోజు రిలీజ్ అయిన సర్కార్ ఎలా ఉందో చూద్దాం.
కథ : 
ప్రపంచంలోనే అతిపెద్ద సాఫ్ట్‌వేర్ కంపెనీ సీఈఓ, సుందర్ రామస్వామి (విజయ్), తన సొంత ఊర్లో ఎలక్షన్స్ జరుగుతున్నాయని తెలిసి, ఓటు హక్కు వినియోగించుకోవడానికి అమెరికా నుండి ఇండియాకి వస్తాడు. తీరా ఓటు వెయ్యబోయే సరికి, తన ఓటు వేరెవరో వేసేసారని తెలిసి షాక్ అవుతాడు.తగ్గే ప్రసక్తే లేదని న్యాయపోరాటానికి దిగుతాడు. సుందర్ మళ్ళీ ఓటువేసే వరకూ ఎన్నికలు రద్దు చేస్తున్నట్టు కోర్టు తీర్పిస్తుంది. 
ఈలోగా అతనికి తోడు మరికొంత మంది బాధితులు యాడ్ అవుతారు. దీంతో ఎన్నికలే రద్దవుతాయి. ఆకోపంలో అధికార పార్టీ కవ్వింపు చర్యలకు పాల్పడడంతో, సుందర్ ఏకంగా ముఖ్యమంత్రి మీదే పోటీకి దిగుతాడు. చివరకు సుందర్ ఏం చేసాడు, అతనికి న్యాయం జరిగిందా, లేదా అనేది సర్కార్ స్టోరీ అన్నమాట.

నటీనటులు & సాంకేతిక నిపుణులు : 

సీన్స్‌కి తగ్గట్టు విజయ్ నటన అభిమానులను ఆకట్టుకుంటుంది. డాన్స్, ఫైట్స్ పరంగానూ బాగానే చెయ్యడంతోపాటు, అక్కడక్కడా కాస్త అతి చేసిన ఫీలింగ్ కూడా కలిగించాడు. కీర్తి సురేష్ ఏదో ఉంది అంటే ఉంది అన్నట్టుంది తప్ప, ఆమె క్యారెక్టర్ చెప్పుకునేంత గొప్పగా ఏమీ లేదు. ఇక వరలక్ష్మి, విజయ్ ముందు తేలిపోయింది. రాధారవి, ప్రేమ్ కుమార్, పాల కరుపయ్య, యోగిబాబు తదితరులు ఉన్నంతలో పర్వాలేదనిపిస్తారు. సినిమాలో విజయ్‌ని ఢీకొట్టే స్థాయి విలన్ లేకపోవడం మైనస్.
ఏ.ఆర్. రెహమాన్ పాటలు గుర్తుంచుకునేలా లేవుకానీ, బ్యాగ్రౌండ్ మ్యూజిక్ బాగుంది. గిరీష్ గంగాధరన్ కెమెరా, రామ్, లక్ష్మణ్ ఫైట్స్ బాగానే ఉన్నాయి. లాస్ట్‌బట్ నాట్ లీస్ట్.. కొన్నాళ్ళ క్రితం వరకూ సినిమా ప్రారంభంలో,‌ ఈ నగరానికేమైంది అనే యాడ్ వచ్చినట్టు, ఈ మురుగదాస్‌కి ఏమైంది, ఓ వైపు స్పైడర్, మరోవైపు సర్కార్, ఆయన బ్రెయిన్‌కేమైంది  అనే డౌట్ వస్తుంది ప్రేక్షకులకు. సంవత్సరానికి రూ. 1800 కోట్ల శాలరీ తీసుకునే సాఫ్ట్‌వేర్ కంపెనీ సీఈఓ, తను ఏదేశంలో అడుగుపెడితే అక్కడున్న కార్పొరేట్ కంపెనీలన్నిటినీ కొనెయ్యడం, తర్వాత వాటిని మూయించెయ్యడం ఎందుకో అర్ధం కాదు. డైరెక్ట్‌సీఎమ్‌ని ఢీ కొని, ఈజీగా ప్రభుత్వాన్ని పడగొట్టడం చూస్తే, నవ్వాలో, ఏడవాలో కూడా తెలీదు. చాలా చోట్ల మురుగ, లాజిక్ మిస్సయ్యాడు. తమిళ రాజకీయాలు, అక్కడి నేటివిటీ మనోళ్ళకేమాత్రం ఎక్కదు. విజయ్ అభిమానులను దృష్టిలో పెట్టుకుని చేసిన సినిమా కాబట్టి, వాళ్ళకు మాత్రమే సర్కార్ భీభత్సంగా నచ్చుతుంది.. తెలుగులో సూపర్ అనిపించడం కష్టం అనే చెప్పాలి. సన్ పిక్చర్స్ ప్రొడక్షన్ వాల్యూస్ రిచ్‌గా ఉన్నాయి.


తమిళ తంబీలకు నచ్చే సర్కార్...

తారాగణం :   విజయ్, కీర్తి సురేష్, వరలక్ష్మి శరత్ కుమార్, రాధారవి, ప్రేమ్ కుమార్, పాల కరుపయ్య, యోగిబాబు

 కెమెరా    :    గిరీష్ గంగాధరన్ 

 సంగీతం   :      ఏ.ఆర్. రెహమాన్

నిర్మాత   :     అశోక్ వల్లభనేని

కథ, స్క్రీన్‌ప్లే, దర్శకత్వం : ఏ.ఆర్.మురుగదాస్‌

రేటింగ్  : 2/5

 

మూవీ రివ్యూ - 5 స్టార్ రేటింగ్‌ విధానం...
3.5 స్టార్ - ఉత్తమ చిత్రం
3 స్టార్స్  - చాలా బావుంది! తప్పక చూడాల్సిన సినిమా
2.75 స్టార్స్  - ఉన్నంతలో బావుంది
2.5 స్టార్స్ - సినిమా చూడొచ్చు 
2.25 స్టార్స్ - ఇంకొంచెం శ్రద్ధపెట్టాల్సి ఉంది 
2 స్టార్స్ - చాలా మెరుగుపర్చుకోవాలి

 

 

 

16:20 - November 6, 2018

పాట్నా: కలవని మనసులతో కాపురం చేయలేమనుకున్న బీహార్ మాజీ సీఎం లాలూప్రసాద్ యాదవ్ పెద్ద కుమారుడు తేజ్ ప్రతాప్ యాదవ్ గత శుక్రవారం విడాకులకు అప్లయ్ చేసిన సంగతి తెలిసిందే. దాంతో రెండు కుటుంబాల నుంచి నష్ట నివారణ చర్యలు మొదలయ్యాయి. భార్యకు విడాకులు ఇచ్చే విషయంలో ఆలోచన విరమించుకోవాలని కుటుంబ సభ్యుల నుంచి ఒత్తిడి తీవ్రమవటంతో తేజ్ ప్రతాప్ అజ్ఞాతంలోకి వెళ్లి పోయారు.
ఐశ్వర్య తాను ఉత్తర,దక్షిణ ధృవాలమని, ఇద్దరి ఇష్టాయిష్టాలు, వ్యవహారాలు పూర్తిగా విరుధ్దమని, పెళ్లి తర్వాత జీవితం చాలా కష్టంగా గడుస్తోందని విడాకుల దరఖాస్తులో తేజ్ ప్రతాప్ చెప్పుకొచ్చారు. ఢిల్లీలోని లేడీ శ్రీరాం కాలేజి నుంచి ఐశ్వర్య పీజీ చేయగా తేజ్ ప్రతాప్ స్కూల్ లెవల్లోనే  చదువు ఆపేశారు. బీహార్ మాజీ సీఎం దరోగా రాయ్ మనవరాలైన ఐశ్వర్యతో తేజ్ ప్రతాప్ కు మే 12 న వివాహాం జరిగింది. కేవలం రాజకీయ లబ్ది చేకూరుతుందనే ఈపెళ్లి చేశారని, తనుకు ఈపెళ్లి ఇష్టం లేదని చెప్పినా ఎవరూ వినలేదని విడాకులకు అప్లయ్ చేసిన తర్వాత తేజ్ ప్రతాప్ వాపోయారు. 
కుటుంబ సభ్యుల నుంచి ఒత్తిడి ఎక్కువవటంతో గత రెండురోజులుగా బోధ్ గయలోని హోటల్లో బస చేసిన తేజ్ ప్రతాప్ వ్యక్తిగత సెక్యూరిటీ కళ్లు గప్పి సోమవారం మధ్యాహ్నం హోటల్ రూంలోని వెనుక డోర్ నుంచి  ఎవరికీ చెప్పకుండా వెళ్లిపోయారు. శ్రీకృష్ణుడి భక్తుడైన తేజ్ ప్రతాప్ బృందావనం వెళ్ళి ఉంటారని భావిస్తున్నారు. విడాకుల పిటీషన్ వేయటానికి ముందు కొన్ని రోజుల క్రితం తేజ్ ప్రతాప్ మధుర,బృందావనం సందర్సించి వచ్చారు. కాగా తేజ్ ప్రతాప్ విషయంపై లాలూ కుటుంబ సభ్యులు ఇంతవరకు స్పందించలేదు. 

16:09 - November 6, 2018

వరంగల్ : తెలంగాణలో ఎన్నికల సమయం రోజు రోజుకూ ఊపందుకుంటోంది. టీఆర్ఎస్ ఇప్పటికే దూసుకుపోతోంది. టీఆర్ఎస్ ప్రచారంలో కీలకంగా వ్యవహరిస్తున్న హరీశ్ రావు తనదైన ముద్ర వేసుకుంటున్నారు. ఈ నేపత్యంలో టీఆర్ఎస్ గెలిస్తే హరీశ్ రావు సీఎం అవుతాడంటు టీఆర్ఎస్ ఓటమే లక్ష్యంగా ఏర్పడిన మహాకూటమిలో భాగస్వామిగా వున్న టీడీపీ నేత వ్యాఖ్యలు ఇప్పుడ సంచలనంగా మారాయి. ‘‘తెలంగాణ ఉద్యమంలో కీలక పాత్ర పోషించిన.. రాష్ట్రం రావడానికి,అధికారం చేజిక్కించుకోవడానికి విశేషంగా కృషి చేసిన హరీశ్‌ రావు పరిస్థితులు అనుకూలిస్తే ఆయన సీఎం అయినా ఆశ్చర్యపోనక్కరలేదు’’ అని టీడీపీ నేత రేవూరి ప్రకాశ్ సంచలన వ్యాఖ్యలు చేశారు. హరీశ్‌ను అడుగడుగునా అవమానిస్తున్నారనీ.. దీంతో టీఆర్‌ఎస్‌లో అంతఃకలహాలు తీవ్రస్థాయికి చేరుకున్నాయనీ..వచ్చే ఎన్నికల్లో టీఆర్‌ఎ్‌సకు మెజారిటీ సీట్లు రాకపోతే హరీశ్‌ తన వర్గంతో బయటకు వచ్చే అవకాశాలు పూర్తిగా వున్నాయని టీడీపీ పొలిట్‌బ్యూరో సభ్యుడు రేవూరి ప్రకాశ్‌ రెడ్డి వ్యాఖ్యానించారు. ఎన్నికల తర్వాత కర్ణాటకలో చోటు చేసుకున్న రాజకీయ పరిణామాలు ఇక్కడ పునరావృతమయ్యే అవకాశాలు లేకపోలేదన్నారు. కేటీఆర్‌, కవిత వచ్చిన తర్వాత హరీశ్‌ను క్రమంగా పక్కన పెడుతున్నారని, ఆయన పరిస్థితి చూస్తుంటే జాలేస్తోందని అన్నారు. కేసీఆర్‌ హరీశ్‌ను పక్కకు తోసేసి కేటీఆర్‌కు పెద్దపీట వేస్తున్నారని తెలిపారు. తన నిజాయితీని నిరూపించుకునే ప్రయత్నంలో టీడీపీపైనా, చంద్రబాబుపైనా హరీశ్‌ అవాకులు చెవాకులు పేలడం సరికాదన్నారు. హరీశ్‌ పోరాటానికి తమ మద్దతు ఉంటుందన్నారు. 

15:50 - November 6, 2018

హైదరాబాద్: కోదండరామ్ ఆధ్వర్యంలో ఆవిర్భవించిన తెలంగాణ జనసమితి కీలక ప్రకటన చేసింది. మహాకూటమిలో భాగస్వామ్యం అయిన తమ పార్టీకి కాంగ్రెస్ 11 సీట్లు కేటాయించిందని టీజేఎస్ ప్రకటించింది. కాంగ్రెస్ కేటాయించిన ఆ స్థానాలను సైతం టీజేఎస్ ప్రకటించింది. కాగా రామగుండం నుంచి కోదండరామ్ పోటీ చేసే అవకాశం ఉందని తెలుస్తోంది.

టీజేఎస్‌కు కేటాయించిన స్థానాలు
1 మెదక్ జనార్దన్‌రెడ్డి
2 దుబ్బాక రాజ్‌కుమార్
3 మల్కాజ్‌గిరి దిలీప్‌కుమార్
4 వరంగల్ ఈస్ట్ గాదె ఇన్నయ్య
5 సిద్ధిపేట భవానీ రెడ్డి
6 చాంద్రాయణగుట్ట జబరుద్దీన్
7 మిర్యాలగూడ  
8 రామగుండం  
9 ఆసిఫాబాద్  
10 చెన్నూరు  
11 వర్ధన్నపేట  

 

టీఆర్ఎస్‌ను ఓడించడమే లక్ష్యంగా కాంగ్రెస్, టీడీపీ, టీజేఎస్, సీపీఐ కలిసి మహాకూటమిగా ఏర్పడిన సంగతి తెలిసిందే. కాంగ్రెస్ 95 స్థానాల్లో పోటీ చేయనుండగా, టీడీపీ 14 స్థానాల్లో పోటీ చేయనుందని సమాచారం. ఇక సీపీఐకి కేవలం మూడు స్థానాలు మాత్రమే కేటాయించే అవకాశం ఉందని తెలుస్తోంది. మరో రెండు ఎమ్మెల్సీ పదవులు ఇస్తామని కాంగ్రెస్ వారికి హామీ ఇచ్చిందని సమాచారం. ఈ నెల 8న లేదా 9న మహాకూటమి అభ్యర్థుల జాబితాను ప్రకటిస్తారని వార్తలు వస్తున్నాయి.

 

15:31 - November 6, 2018

శ్రీకాకుళం: ఏపీ మంత్రి నారా లోకేష్ తన పెద్ద మనసు చాటుకున్నారు. తిత్లీ తుఫానుతో తీవ్రంగా నష్టపోయిన జిల్లాలోని మందస మండలాన్ని ఆయన దత్తత తీసుకున్నారు. మందస మండలంలోని 86 గ్రామాల తిత్లీ తుపాను బాధితులకు లోకేష్ 174 కోట్ల రూపాయల చెక్కులు అందజేశారు. మొన్నటి దసరాను బాధితుల మధ్యే జరుపుకున్నానన్న లోకేశ్‌... దీపావళిని ఇక్కడే జరుపుకోనున్నట్లు తెలిపారు. తిత్లీ తుపాను బాధితులను తమ ప్రభుత్వం ఆదుకోవాలని చూస్తుంటే.. ప్రధాని మోడీకి దొంగపుత్రుడు, దత్తపుత్రులైన జగన్‌, పవన్‌లు డ్రామాలాడుతున్నారని లోకేష్ విమర్శించారు. 
 

15:25 - November 6, 2018

హైదరాబాద్ : తెలంగాణలో ఎన్నికల సమయం దగ్గర పడుతుండంలో తగిన ఏర్పట్లను ఈసీ సిద్ధ చేస్తోంది. ముఖ్యంగా సమస్యాత్మక కేంద్రాలపై ఈసీ కన్ను వేసింది. ఈ నేపథ్యంలో తాజాగా రాష్ట్ర ప్రభుత్వ ఉన్నతాధికారులతో చర్చించి అన్ని పోలింగ్ కేంద్రాల్లోను సీసీ కెమెరాలను అమర్చాలనే ఆలోచనలో వున్నట్లుగా సమాచారం. అదే కనుక జరిగితే  పోలింగ్ కేంద్రాల్లో సీసీ కెమెరాలు అమర్చటం ఇదే తొలిసారి అవుతుంది. 
సున్నితమైన, సమస్యాత్మక కేంద్రాల్లో సీసీ కెమెరాలు వినియోగించే విధానాన్ని ఎన్నికల సంఘం ఇప్పటికే అమలు చేస్తోంది. ప్రస్తుతం తెలంగాణ, మధ్యప్రదేశ్‌, మిజోరం, ఛత్తీస్‌గఢ్‌, రాజస్థాన్‌ రాష్ట్రాల్లో శాసనసభలకు ఎన్నికలు జరుగనున్న నేపథ్యంలో కేంద్ర ఎన్నికల సంఘం కూడా ఈ ఎన్నికలను పకడ్బందీగా నిర్వహించనున్న క్రమంలో అన్ని పోలింగ్‌ కేంద్రాల్లో నిఘా కెమెరాలు వినియోగించే విషయమై ఇటీవల చర్చించింది. శాంతి భద్రతల పరిరక్షణ, ఎన్నికల నిబంధనల అమలు, రిగ్గింగ్‌ సహా ఇతర అక్రమాలకు అడ్డుకట్ట వేయాలంటే ఈ విధానం అనుసరించాలన్న నిర్ణయానికి  వచ్చింది. మిగిలిన రాష్ట్రాల సంగతెలా ఉన్నా తెలంగాణలో మాత్రం దేశంలోనే తొలిసారిగా ప్రయోగాత్మకంగా మొత్తం అన్ని కేంద్రాల్లో వీటిని ఏర్పాటు చేయాలనే ప్రతిపాదనకు ఈసీ ఆమోద ముద్ర వేసినట్టు సమాచారం. ఈ చర్చ అనంతరం తెలంగాణ ప్రభుత్వ వర్గాలు సీసీ కెమెరాల ఏర్పాటుపై ప్రతిపాదనలు సిద్ధం చేస్తున్నట్లు తెలిసింది.

రాష్ట్రంలో మొత్తం 32,574 పోలింగ్‌ కేంద్రాలున్నాయి. అన్నింట్లో సీసీ కెమెరాల ఏర్పాటుకు దాదాపు రూ.48.86 కోట్ల మేరకు ఖర్చవుతుందని అధికారులు అంచనా వేస్తున్నారు. ‘‘ఈ వ్యయాన్ని కేంద్ర, రాష్ట్ర ప్రభుత్వాలు భరించాల్సి ఉంటుంది. రాష్ట్రంలోని అన్ని పోలింగ్‌ కేంద్రాల్లో విద్యుత్తు సౌకర్యం ఉన్నందున కెమెరాల అమరిక కష్టసాధ్యమేమీ కాదు. జిల్లా, రాష్ట్ర స్థాయిలో ఏర్పాటయ్యే కమాండ్‌ కంట్రోల్‌ రూంలతో  వాటిని అనుసంధానించి పర్యవేక్షించే యంత్రాంగం కూడా రాష్ట్రంలో ఉంది’’ అని అధికారులు పేర్కొంటున్నారు.

 

15:12 - November 6, 2018

హైదరాబాద్: తిత్లీ తుఫాను విషయంలో సీఎం చంద్రబాబు నాయుడు తనపై చేసిన విమర్శలపై జనసేన అధినేత పవన్ కళ్యాణ్ ఘాటుగా స్పందించారు. తిత్లీ తుఫాను విధ్వంసం గురించి తెలియజేస్తూ కేంద్రానికి కనీసం లేఖ కూడా రాయలేదన్న చంద్రబాబు ఆరోపణలను పవన్ కొట్టిపారేశారు. తిత్లీ తుఫాను కారణంగా జరిగిన నష్టం గురించి తాను కేంద్రానికి లేఖ రాశానని పవన్ చెప్పారు. అందుకు ఇదే సాక్ష్యం అంటూ తాను రాసిన లేఖను పవన్ తన సోషల్ మీడియా ఖాతాలో పోస్ట్ చేశారు. ఆ లెటర్ మీద అక్టోబర్ 26 అనే తేదీని చూడొచ్చు. తిత్లీ తుఫాను కారణంగా శ్రీకాకుళం జిల్లా ప్రజలు తీవ్రంగా నష్టపోయారని వారిని ఆదుకోవాలని పవన్ ఆ లేఖలో ప్రధానిని కోరారు. కాగా, ప్రజల్లో తనకు లభిస్తున్న ఆదరాభిమానాలు చూసి ఓర్వలేకనే చంద్రబాబు ఇలాంటి ఆరోపణలు చేశారని పవన్ మండిపడ్డారు.

15:04 - November 6, 2018

కర్ణాటక : ఉప ఎన్నికల్లో బీజేపీకి కేవలం ట్రైలర్ మాత్రమే చూపించామని పూర్తి సినిమా వచ్చే స్వార్వత్రిక ఎన్నికల్లో చూపిస్తామని కుమారస్వామి సంచలన వ్యాఖ్యలు చేశారు. రాష్ట్రంలో జరిగిన  ఉపఎన్నికల్లో కాంగ్రెస్-జేడీఎస్ కూటమి ఘన విజయం సాధించడంపై ముఖ్యమంత్రి కుమారస్వామి ఆనందం వ్యక్తం చేశారు. ఇది కేవలం తొలి అడుగు మాత్రమేనని... 2019 సార్వత్రిక ఎన్నికల్లో బీజేపీకి చుక్కలు చూపిస్తామని చెప్పారు. రాష్ట్రంలో 28 లోక్ సభ స్థానాలు ఉన్నాయని... కాంగ్రెస్ పార్టీతో కలసి అన్ని స్థానాల్లో జయకేతనం ఎగురవేస్తామని ధీమా వ్యక్తం చేశారు. ఈరోజు గెలిచాం కాబట్టి తాను ఈ మాటలు అనడం లేదని... ఈ విషయం తమపై ప్రజలకు ఉన్న నమ్మకానికి ఇది నిదర్శనమన్నారు. 
ఇంతటి ఘన విజయానికి కారణమైన జేడీఎస్ నేతలను, కార్యకర్తలను కూడా అభినందిస్తున్నానని కుమారస్వామి సంతోషంతో తెలిపారు. జీడీఎస్-కాంగ్రెస్ లది అపవిత్ర కలయిక అని వ్యాఖ్యానించిన బీజేపీకి... ఈ ఫలితాలు చెంపపెట్టువంటివని చెప్పారు. తమ కూటమి ఎంతో కాలం బతకదని ఎద్దేవా చేసిన బీజేపీ నేతలు... ఈ ఫలితాల తర్వాత ఏం మాట్లాడతారని అన్నారు. రాష్ట్రాన్ని క్లీన్ స్వీప్ చేయడమే తమ కూటమి తదుపరి లక్ష్యమని కుమారస్వామి తెలిపారు. 
 

14:50 - November 6, 2018

హైదరాబాద్: ఆమె ఎక్కడా.. ఎప్పుడూ ‘‘పాడుతా తీయగా’’ లాంటి టీవీ ప్రోగ్రామ్‌లలో పాడలేదు. పనీపాట చేసుకుంటూ కాలక్షేపం చేస్తున్న పసల బేబీ అనే మహిళ పాడిన పాటకు నెటిజెన్లు ఫిదా అవుతున్నారు. ఎంతో శ్రావ్యంగా.. ఎక్కడా తొణికసలాట లేకుండా సంగీత దర్శకుడు ఏఆర్ రెహమాన్ ‘ప్రేమికుడు’ సినిమా కోసం అందించిన సంగీతఝరికి పదాలు అద్దిన మహిళకు సోషల్ మీడియాలో కళాప్రియులు నీరాజనాలు పలుకుతున్నారు. ఈ మట్టిలో మాణిక్యం గురించిన వివరాలు తెలుసుకోవాలని అనిపించడంలో అతిశయోక్తి లేదని ఈ కధనాన్ని అందిస్తున్నాం. 
పసల బేబీ సొంతూరు.. వడిశలేరు గ్రామం..తూర్పుగోదావరి జిల్లా రంగంపేట మండలంలోని ఓ కుగ్రామం. ఈమె దినసరి కూలీగా పనిచేస్తూ పొట్టపోసుకుంటోంది. ఎవరో అమ్మాయి తప్పుగా పాడితే తట్టుకోలేక బేబీ తన గళాన్ని విప్పిందని ‘ఈనాడు’ తెలుగు దినపత్రికలో ప్రచురించారు. కూనిరాగాలు మాత్రమే తీసే బేబీ ఇప్పుడు లక్షలాది మంది అభిమానులను ఆకట్టుకొంది. 
‘‘ఓ చెలియా నా ప్రియసఖియా’’ అంటూ పాడిన బేబీ గొంతుకు ఎక్కడలేని క్రేజీ వచ్చింది. ఈ వీడియోకి ఫేస్‌బుక్‌లో 11 వేల లైకులు, 14,389 షేర్లు దక్కగా కామెంట్ల పరంపర కొనసాగుతూనే ఉంది.  అపారమైన గ్రాహకశక్తితో బేబీ తన పాటల ప్రపంచాన్ని సృష్టించుకుంది. అయితే..ఎప్పుడూ పెద్దగా నలుగురిలో పాడిన సందర్భాలు లేవు. అనుకోకుండా ఒక యువతి చేసిన చిరు ప్రయత్నంలో భాగంగా ఫేస్‌బుక్‌లో వీడియో అప్‌లోడ్ కావడంతో బేబీలోని టాలెంట్ తెలుగు సంగీత అభిమానులకు చేరింది. శంకర్ దర్శకత్వంలో ‘‘ప్రేమికుడు’’ సినిమాలో ఉన్ని కృష్ణన్ 1994లో పాడిన పాటకు బేబీ తన గొంతు కలపడం ఒక విచిత్రం. ఈ వీడియోలో బేబీ పాడిన పాటను మీరూ వినండి!    

14:02 - November 6, 2018

ఛత్తీస్‌గడ్: మావోయిస్టు పార్టీకి గట్టి ఎదురుదెబ్బ తగిలింది. నారాయణపూర్‌‌ జిల్లాలో పెద్ద సంఖ్యలో మావోయిస్టులు లొంగిపోయారు. ఏకంగా 51 మంది మావోయిస్టులు స్వచ్ఛందంగా పోలీసుల ఎదుట లొంగిపోయారు. వారంతా తమ ఆయుధాలను పోలీసులకు సరెండర్‌ చేశారు. పోలీసుల నిర్బంధం పెరుగుతుండటంతోనే మావోలు లొంగిపోయినట్టుగా తెలుస్తోంది. చత్తీస్‌గడ్, నారాయణపూర్, బీజాపూర్‌లలో అడుగడుగునా బ్లాస్టింగ్‌లు, ఎన్2కౌంటర్లు జరుగుతున్నాయి. ఈ నేపథ్యంలో అటు గిరిజన ప్రజలు, ఇటు మావోయిస్టులు ఆందోళన చెందుతున్నారు. కేంద్ర, రాష్ట్ర, ప్రత్యేక బలగాలు అడవిని జల్లెడ పడుతున్నాయి. ఇక నిన్నటి ఎన్‌కౌంటర్‌లో ఐదుగురు మావోలు మృతి చెందారు. మరోవైపు మావోయిస్టులు జన జీవన స్రవంతి కలిసిపోవాలని ఎస్పీ కోరారు. హింస ద్వారా ఏమీ సాధించలేరని ఆయన చెబుతూ వచ్చారు. దాదాపుగా 10 రోజుల నుంచి ఆయన చేస్తున్న ప్రయత్నాలు ఫలించాయి. మావోయిస్టులు లొంగిపోయేందుకు ముందుకు వచ్చారు. ప్రభుత్వ పథకాలు మీకు అందేలా సహకారం అందిస్తానని ఎస్పీ వారికి హామీ ఇచ్చారు. కాగా మరో 50మంది దాకా మావోయిస్టులు, మిలీషియా సభ్యులు సైతం లొంగిపోయేందుక సిద్ధంగా ఉన్నట్టు తెలుస్తోంది.

13:46 - November 6, 2018

మెగా ఫ్యాన్స్‌ఎంతగానో ఎదురుచూస్తున్న ఘడియ రానే వచ్చింది. మెగా పవర్ స్టార్ రామ్ చరణ్, ఊరమాస్ డైరెక్టర్ బోయపాటి శ్రీను కాంబినేషన్‌లో, డివివి దానయ్య నిర్మిస్తున్న కొత్త సినిమాకి, వినయ విధేయ రామ అనే టైటిల్‌ను ఫిక్స్ చేసి, దీపావళి సందర్భంగా, ఫస్ట్‌లుక్ రిలీజ్ చేసారు. పోస్టర్‌లో ఎప్పటిలానే బోయపాటి తన మాస్ మార్క్ చూపించగా, చెర్రీ ఎమోషనల్‌గా పరిగెడుతూ, ఒక చేత్తో కత్తి పట్టుకుని, మరో చేత్తో రెండో వెపన్‌ని ఎగరేస్తూ, ఉన్న స్టిల్ అభిమానులను అలరిస్తోంది. ఫ్యామిలీ, లవ్ అండ్ యాక్షన్ ఎంటర్‌టైనర్‌గా రూపొందుతున్న  వినయ విధేయ రామలో చరణ్ పక్కన భరత్ అనే నేను భామ కియారా అడ్వాణి హీరోయిన్ కాగా, బాలీవుడ్ నటుడు వివేక్ ఒబెరాయ్ విలన్‌గా చేస్తున్నాడు. స్నేహ, ఆర్యన్ రాజేష్, ప్రశాంత్(జీన్స్‌ఫేమ్), నవీన్ చంద్ర కీలక పాత్రలు చేస్తుండగా, రాక్ స్టార్ దేవి శ్రీ ప్రసాద్ సంగీతమందిస్తున్నాడు. నవంబర్ 9వ తేదీ ఉదయం 10.25 నిమిషాలకు టీజర్ విడుదల చెయ్యనున్నారు. సంక్రాంతికి వినయ విధేయ రామ ప్రేక్షకుల ముందుకు రాబోతుంది.

13:29 - November 6, 2018

కర్ణాటక : రాష్ట్రంలో మూడు లోక్ సభ, రెండు శాసనసభ స్థానాలకు జరిగిన ఉపఎన్నిలలో బీజేపీకి బేజారు పుట్టిస్తుంటే కాంగ్రెస్-జేడీఎస్ కూటమి సత్తా చాటుతోంది. ఇప్పటికే  రెండు శాసనసభ స్థానాలను కూటమి తన ఖాతాలో వేసుకుంది మహాకూటమి.  ఈ నేపథ్యంలో  ముఖ్యమంత్రి కుమారస్వామి భార్య, జేడీఎస్ అభ్యర్థి అనితా కుమారస్వామి రామనగరం నియోకవర్గం నుంచి ఏకంగా 1,09,137 ఓట్ల ఆధిక్యంతో ఘన విజయం సాధించారు. జామ్ ఖండీ అసెంబ్లీ స్థానం నుంచి కాంగ్రెస్ అభ్యర్థి న్యామగౌడ 39,480 ఓట్ల మెజార్టీతో జయకేతనం ఎగురవేశారు. బళ్లారి, శివమొగ్గ, మండ్య లోక్ సభ స్థానాలకు సంబంధించి ఓట్లు లెక్కింపు కొనసాగుతోంది. బళ్లారిలో కాంగ్రెస్ అభ్యర్థి ఉగ్రప్ప, మండ్యలో జేడీఎస్ అభ్యర్థి శివరామేగౌడలు పూర్తి ఆధిక్యతలో ఉన్నారు. శివమొగ్గలో బీజేపీ అభ్యర్థి రాఘవేంద్ర స్వల్ప మెజార్టీలో ఉన్నారు.
 

13:16 - November 6, 2018

ఢిల్లీ : ఆర్బీఐ మాజీ గవర్నర్ సంచలన వ్యాఖ్యలు చేశారు. ఆర్బీఐ నిర్వహణలో ప్రభుత్వ జోక్యం ఉండరాదని మాజీ గవర్నర్ రఘురాం రాజన్ వ్యాఖ్యానించారు. ఇతర ప్రయోజనాల కోసం ఆర్బీఐని వాడుకోవడం మంచిది కాదని పరోక్షంగా కేంద్రప్రభుత్వానికి చురకలంటించారు. కాగా ప్రస్తుత ఆర్బీఐ గవర్నర్ గా విధులు నిర్వహిస్తున్న ఉర్జిత్ పటేల్ కు షోకాజ్ నోటీసులు జారీ చేసిన నేపథ్యంలో మాజీ గవర్నర్ ఈ వ్యాఖ్యలు చేయటం ప్రాధాన్యతను సంతరించుకుంది. భారత ఆర్థిక వ్యవస్థను కాపాడటమే ఆర్బీఐ లక్ష్యమని ఆ సంస్థ రఘురాం రాజన్ అన్నారు. సంస్థను పటిష్టంగా నిర్వహించడమే లక్ష్యంగా పని చేయాలని రఘురామ్ రాజన్ సూచించారు. 
దేశ ఆర్థిక వ్యవస్థకు ఆర్బీఐ సీట్ బెల్ట్ లాంటిదని చెప్పారు. ఆర్బీఐ ఎప్పుడూ రాహుల్ ద్రావిడ్ లా ఆచితూచి అడుగులు వేస్తూ ముందుకు వెళ్లాలని... సిద్ధూలా దూకుడుగా ఆడే ప్రయత్నం చేయకూడదని అన్నారు. తన వద్ద ఉన్న నిధులను సమర్థవంతంగా వినియోగించడమే కాకుండా... ప్రభుత్వ ధనం దుర్వినియోగం కాకుండా కాపాడాల్సిన బాధ్యత కూడా ఆర్బీఐపై ఉందని రాజన్ విలువైన సూచనలు చేశారు. ఆర్బీఐ బోర్డులో వివిధ రంగాల నుంచి వచ్చిన మేధావులు ఉంటారని... ప్రతి విషయాన్ని కూలంకషంగా చర్చించిన తర్వాతే నిర్ణయాలు తీసుకుంటారని రఘురామ్ రాజన్ తెలిపారు. 
 

13:14 - November 6, 2018

హైదరాబాద్: విదేశీ ఉద్యోగాల పేరుతో నిరుద్యోగులను మోసగిస్తున్న ఓ ట్రావెల్ ఏజంటును హైదరాబాద్ టాస్క్‌ఫోర్స్ పోలీసులు మంగళవారం అరెస్టు చేసి అతని వద్దనుంచి రూ 8.60 లక్షల నగదు, 3,100 అమెరికన్ డాలర్లు, పాస్‌పోర్టులు, ఆధార్ కార్డులు స్వాధీనం చేసుకున్నారు.  
వివరాల ప్రకారం ఓసా గంగాధర్ అనే వ్యక్తి నిరుద్యోగులకు వలవేస్తూ వారిని విదేశాలకు పంపుతానని చెప్పి మోసగించాడు. ఈ విధంగా దాదాపు 40-50 మంది నిరుద్యోగులను నిలువునా ముంచినట్టు టాస్క్‌ఫోర్స్ పోలీసులు తెలిపారు. గంగాధర్ గతంలో దుబాయ్, సౌదీ అరేబియా, సింగపూర్, ట్రినిడాడ్, టొబాగో, ఖతార్, బ్యాంకాక్, జోర్డాన్, ఇండోనేషియా తదితర దేశాల్లో పనిచేసి హైదరాబాద్‌లో సెటిల్ అయ్యాడు. ఒక్కొక్క నిరుద్యోగి నుండి 4 నుంచి 5 లక్షల వారివారి ఆర్థిక పరిస్థితి మేరకు వసూలు చేశాడు. వారి వద్దనుండి నగదు, వారి పాస్‌పోర్టులు స్వాధీనం చేసుకున్న తర్వాత ఢిల్లీలో నివాసం ఉండే.. పునీత్ అనే వ్యక్తి ద్వారా వారి డాక్యుమెంట్లు సిద్ధం చేసేవాడు. పునీత్ ఇండో-ఇజ్రాయల్ ట్రావెల్స్ కంపెనీలో ఉద్యోగం చేస్తున్నందు వల్ల ఈ పనికి అతనిని ఉపయోగించుకొనేవాడు. ఒకసారి డబ్బులు చేతికి అందిన తర్వాత నిరుద్యోగులకు అందుబాటులో లేకుండా తప్పించుకొనేవాడు. దీంతో గంగాధర్‌కు ఫోన్ చేసినా దొరికేవాడు కాదు. గంగాధర్ 15 సిమ్ కార్డులు మార్చినట్టు పోలీసులు గుర్తించారు. అతని వద్దనుంచి అభ్యర్థుల ఇంటర్ మార్కుల సర్టిఫికెట్లు, వివిధ పేర్లతో ఉన్న 3 పాస్‌పోర్టులు, 3 ఆధార్ కార్డులు, 2 పాన్ కార్డులు సీజ్ చేశారు. అతని వద్దనుంచి 3 మొబైల్ ఫోన్లు, లాప్‌టాప్, ఒక టూవీలర్, 9 ఇండియన్ పాస్‌పోర్టులను కూడా స్వాధీనం చేసుకున్నారు. ఇటువంటి మధ్యవర్తులను నమ్మిమోసపోవద్దని పోలీసులు నిరుద్యోగ యువతకు విజ్ఞప్తి చేశారు.  

 

 

13:12 - November 6, 2018

విజయవాడ: ఏపీ కేబినెట్‌ సమావేశం జరగనుంది. ఈ సమావేశంలో పలు కీలక అంశాలపై చర్చించే అవకాశం కనిపిస్తోంది. విశాఖలో జగన్‌పై దాడి వ్యవహారంపై ప్రధానంగా చర్చించే అవకాశం ఉంది. అలాగే కాంగ్రెస్‌ అధినేత రాహుల్‌తో భేటీ.. రాజకీయ పరిణామాలపై చర్చించనున్నారు. మంత్రివర్గ అజెండాలో లేని అంశాలపై కూడా ఈ సందర్బంగా చర్చించే అవకాశం కనిపిస్తోంది.
ముఖ్యమంత్రి చంద్రబాబు అధ్యక్షతన ఆంధ్రప్రదేశ్‌ మంత్రివర్గ సమావేశం జరగనుంది. రాష్ట్రంలో జరిగిన అనేక పరిణామాలపై ఈ సమావేశంలో చర్చించనున్నారు. ప్రధానంగా ఏలూరు, ఒంగోలు, కడప కార్పొరేషన్లను అర్బన్‌ డెవలప్‌మెంట్‌ అథారిటీలుగా అభివృద్ధి చేసేందుకు ప్రభుత్వం ప్రణాళిలకలు సిద్దం చేసింది. ఇప్పటికే మున్సిపల్‌ పట్టణాభివృద్ధి శాఖ ప్రతిపాదనలు పంపించింది. ఇక మంత్రివర్గ సమావేశంలో ఏపీ అసైన్‌మెంట్‌ యాక్ట్‌-1977కు చట్ట సవరణ అంశంపై చర్చించనున్నారు. ఇప్పటివరకు అసైన్డ్‌ భూములు కొనుగోలు, అమ్మకాలపై నిషేధం ఉంది. కానీ చట్టసవరణ వలన అసైన్‌మెంట్‌ భూముల్లో ఇళ్లు నిర్మించుకున్న వారికి కొనుగోలు, అమ్మకాలపై నిషేధం తొలిగిపోనుంది. దీంతో అనేకమందికి లబ్ధి చేకూరనుంది. 

Image result for rahul gandhi chandrababuఇక ఇనామ్‌ యాక్ట్‌ చట్ట సవరణ అంశంపై కూడా మంత్రివర్గంలో చర్చించనున్నారు. అలాగే మచిలీపట్నం అర్బన్‌ డెవలప్‌మెంట్‌ అథారిటీ, భోగాపురం ఎయిర్‌పోర్ట్‌, ప్రధానమంత్రి గృహ నిర్మాణాలకు కొనుగోలు చేసే భూములకు స్టాంప్‌డ్యూటీ, రిజిస్ట్రేషన్‌ ఛార్జీల మినహాయింపు ఇవ్వనుంది.
ఇక ప్రకాశం జిల్లాలో దొనకొండలో ఏఐసీసీకి దొనకొండ ఇండస్ట్రియల్‌ మెగా హబ్‌ నిర్మాణం కోసం దాదాపు 2400 ఎకరాల భూములకు మంత్రివర్గం ఆమోదం తెలపనుంది. ఇప్పటికే అన్న క్యాంటీన్ల వలన ప్రభుత్వానికి మంచి పేరు రావడంతో.. వాటిని గ్రామీణ ప్రాంతాల్లో కూడా ఏర్పాటు చేయనున్నారు. అయితే వాటి నిర్మాణం మున్సిపల్‌, పట్టణాభివృద్ధి సంస్థకు ఇచ్చే విధంగా ప్రతిపాదనలు సిద్దం చేశారు. ఇక విశాఖ జిల్లా కాపులపాడులో వెస్ట్‌ టూ ఎనర్జీ ప్లాంట్‌ ఏర్పాటుకు 110 ఎకరాల భూమి కేటాయింపునకు మంత్రివర్గం ఆమోదం తెలపనుంది. 

ప్రతి మంత్రివర్గ సమావేశానికి ముందుగా పార్టీ సమన్వయ కమిటీ సమావేశం నిర్వహించేవారు చంద్రబాబు. కానీ.. సమన్వయకమిటీ సమావేశం లేకపోవడంతో మంత్రివర్గ సమావేశం అనంతరం జరగనున్న పొలిటికల్‌ భేటీలో అనేక అంశాలపై చర్చించనున్నారు. బీజేపీయేతర శక్తులన్నింటినీ ఏకం చేసే విధంగా చంద్రబాబు ఢిల్లీలో పర్యటించడం... ప్రధానంగా కాంగ్రెస్‌ అధ్యక్షుడు రాహుల్‌గాంధీతో భేటీ కావడం లాంటి అంశాలకు గల రాజకీయ ప్రాధాన్యతను సహచర మంత్రులకు సీఎం వివరించనున్నారు.

Image result for attack on jaganఅలాగే రాష్ట్రంలో సంచలనంగా మారిన జగన్‌పై దాడి వ్యవహారం కూడా చర్చకు వచ్చే అవకాశం కనిపిస్తోంది. కేసు దర్యాప్తు జరుగుతున్న తీరు.. ఇప్పటివరకు జరిగిన దర్యాప్తులో వెలుగుచూసిన అంశాలను సీఎం మంత్రులకు వివరించే అవకాశం ఉంది.

 
12:57 - November 6, 2018

లక్నో: టెస్టు, వన్డే సిరీస్‌ను తమ ఖాతాలో వేసుకున్న భారత జట్టు ఇప్పుడు పొట్టి ఫార్మాట్‌పై కన్నేసింది. మూడు టీ20ల సిరీస్‌లో ఇప్పటికే రోహిత్‌ సేన 1-0తో ఆధిక్యంలో ఉంది. ఈ నేపథ్యంలో మంగళవారం లక్నోలోని ఏక్నా అంతర్జాతీయ క్రికెట్‌ స్టేడియంలో ఇరుజట్ల మధ్య రెండో మ్యాచ్‌ జరగనుంది. ఈ మ్యాచ్‌లో భారత్‌ గెలిస్తే విండీస్‌పై తొలిసారిగా టీ20 సిరీస్‌ గెలిచినట్టవుతుంది. 24 ఏళ్ల తర్వాత లక్నోలో జరుగుతున్న అంతర్జాతీయ మ్యాచ్‌లో అభిమానులకు వినోదాన్ని పంచుతూనే సిరీస్‌ కైవసం చేసుకోవాలనే ఆలోచనలో ఉంది టీమిండియా.  మరోవైపు టెస్టు, వన్డే సిరీస్‌ల మాదిరిగా పొట్టి ఫార్మాట్‌లో పరాభవం ఎదురుకాకూడదనే పట్టుదలతో పర్యాటక విండీస్‌ ఉంది. తొలి మ్యాచ్‌ ఆఖర్లో పట్టు కోల్పోయిన విండీస్‌ రెండో టీ20లో మాత్రం నెగ్గి సిరీస్‌ను చివరి మ్యాచ్‌ వరకు తీసుకెళ్లాలనుకుంటోంది. సిరీస్‌లో నిలవాలంటే విండీస్‌కు ఈ మ్యాచ్‌లో నెగ్గడం తప్పనిసరి. అందుకే టీ20 చాంపియన్‌ హోదాలో తమ అసలైన సత్తాను చాటి ప్రత్యర్థికి షాక్‌ ఇవ్వాలనుకుంటోంది.

12:54 - November 6, 2018

గతకొద్ది రోజులుగా సినీ రంగలో సంచలనం రేపుతోంది, మీటూ ఉద్యమం. ఈ వివాదంలో ప్రముఖనటుడు అర్జున్ కూడా చిక్కుకున్నాడు. విస్మయ అనే కన్నడ చిత్రం షూటింగ్ సమయంలో అర్జున్ తనపట్ల అసభ్యంగా ప్రవర్తించాడని, నటి శృతి హరిహరన్ ఆరోపించడం, అర్జున్ ఖండిచండం, వారిద్దరి మధ్య రాజీ కుదర్చడానికి సీనియర్ నటుడు అంబరీష్ ప్రయత్రించినా ఫలితం లేకపోవడంతో, ఎట్టకేలకు అర్జున్ పోలీస్ స్టేషన్ గడప తొక్కక తప్పలేదు. శృతి, అర్జున్‌పై బెంగుళూరులోని కబ్బన్‌పార్క్‌ స్టేషన్‌లో కంప్లైంట్ చెయ్యగా, విచారణకు హాజరుకావాలని పోలీసులు అర్జున్‌కి నోటీసులు పంపడంతో, నిన్న ఆయన పీఎస్‌కు వెళ్ళారు. దాదాపు రెండున్నర గంటలపాటు విచారణ జరగగా, శృతి తనపై చేసినవన్నీ తప్పుడు మరియు నిరాధారమైనవని, ఆచిత్ర దర్శకుడు, కెమెరామెన్, ఇతర నటీనటుల ముందే తను నటించాననీ, షూటింగ్ అనంతరం ఆమెను కార్‌లో ఫాలో చేసానన్నది అబద్ధమని అర్జున్, పోలీసులకు చెప్పాడు. దాదాపు 50 ప్రశ్నలకు ఆయన సమాధానమిచ్చారని, విచారణకు పూర్తిగా సహకరించారని, అవసరమైతే ఇంకోసారి విచారణకు పిలుస్తామంటే, సహకరిస్తాననీ చెప్పారని పోలీసులు తెలిపారు. ఈ కేసులో, ఇప్పటికరకు శృతితో పాటు, ఆమె ఫ్రెండ్స్‌‌తో పాటు, విస్మయ మూవీ కెమెరామెన్‌ని పోలీసులు విచారించారు.

12:51 - November 6, 2018

హైదరాబాద్ : అసెంబ్లీ ఎన్నికల్లో టీఆర్ఎస్ ఓటమే లక్ష్యంగా ఏర్పడిన మహాకూటమి ఏర్పడింది. ఎన్నో ఇబ్బందులు..సమస్యలను ఎదుర్కొంటు..అందరినీ సమన్వయ పరుచుకుంటు కొనసాగుతున్న మహాకూటమికి మరో పార్టీ వచ్చి చేరింది. కూటమిపై పలు విమర్శలు టీఆర్ఎస్ సంధిస్తోంది. ఎద్దేవా చేస్తోంది. అది మహా కూటమి కాదు కుంపట్ల కూటమి అంటు విమర్శలు చేస్తున్న నేపథ్యలో ఈ మహాకూటమిలోకి ఓ ముస్లింపార్టీ వచ్చి చేరింది. ప్రస్తుతం ఈ కూటమిలో కాంగ్రెస్, టీడీపీ, టీజేఎస్, సీపీఐలు ఉన్నాయి. తాజాగా, ఆల్ ఇండియా ముస్లిం నేషనల్ లీగ్ పార్టీ కూడా చేరింది. ఈ సందర్భంగా ఆ పార్టీ ప్రధాన కార్యదర్శి అబ్దుల్ ఘనీ మాట్లాడుతూ, మహాకూటమికి బేషరతుగా మద్దతు ఇస్తున్నామని చెప్పారు.
రిజర్వేషన్ల విషయంలో ముస్లింలను ముఖ్యమంత్రి కేసీఆర్ మోసం చేశారని మండిపడ్డారు. ముస్లింలకు ఇచ్చిన హామీలను అటకెక్కించారని... తగిన నిధులను కూడా కేటాయించలేదని దుయ్యబట్టారు. బీజేపీ, ఎంఐఎం, టీఆర్ఎస్ ల మధ్య రహస్య ఒప్పందం ఉందని ఆరోపించారు. ముస్లింలను మోసం చేసిన టీఆర్ఎస్ ను ఓడించడమే తమ లక్ష్యమని... అందుకే, మహాకూటమికి మద్దతు ఇవ్వాలని నిర్ణయించామని చెప్పారు. 
 

12:41 - November 6, 2018

నల్లగొండ: మిర్యాలగూడ ప్రణయ్‌ హత్య కేసు తెలుగు రాష్ట్రాల్లో సంచలనం సృష్టించిన సంగతి తెలిసిందే.  మిర్యాలగూడ పట్టణంలో సెప్టెంబర్ 14న ప్రణయ్ దారుణహత్యకు గురయ్యాడు. ప్రణయ్‌ హత్యకేసులో ప్రధాన నిందితులైన తిరునగరు మారుతీరావు(అమృత తండ్రి), ఎంఏ కరీం, శ్రవణ్‌కుమార్‌లపై పీడీయాక్ట్‌ నమోదైంది. ప్రస్తుతం వారంతా వరంగల్ సెంట్రల్ జైల్లో ఉన్నారు.
తాజాగా తనకు ప్రాణహాని ఉందని ప్రణయ్ తండ్రి చెబుతున్నారు. ప్రణయ్ హత్య తర్వాత తమపై కొందరు వ్యక్తులు నిఘా పెట్టినట్లుగా అనుమానం కలుగుతోందని ప్రణయ్‌ భార్య అమృతవర్షిణి, ప్రణయ్ తండ్రి బాలస్వామి  మీడియాకు తెలిపారు. ఈనెల 3న తెల్లవారుజామున గుర్తుతెలియని వ్యక్తి తమ ఇంట్లోకి ప్రవేశించి కలియతిరిగి వెళ్లాడని వారంటున్నారు. ఈ విషయాన్ని ఇంట్లోని సీసీటీవీ ఫుటేజీలను పరిశీలించాక పోలీసులకు ఫిర్యాదు చేశామన్నారు. ఇంట్లోకి ప్రవేశించిన వ్యక్తి గది తలుపు తెరచి, కర్టన్‌ తొలగించి ఇంట్లోకి తొంగి చూసినట్లుగా సీసీటీవీ పుటేజీలో రికార్డయ్యిందన్నారు. ఇంట్లోకి ప్రవేశించిన అగంతకుడు బలంగా ఉండి, ముఖానికి మాస్క్‌, నడుముకు నల్లని తాడు ధరించి ఉన్నట్లు చెప్పా రు. ఇంటి ఆవరణలో వ్యక్తి కదలిక సవ్వడిని గుర్తించిన పోలీసులు కిందకు వచ్చేలోపు అతడు ప్రహరీ దూకి పారిపోయినట్లు తెలిపారు. ఈ సంఘటనతో తామంతా భీతిల్లుతున్నామన్నారు. 
తన కుమారుడిలాగే తనను కూడా చంపేస్తే అమృత మా నుంచి వెళ్లిపోతుందనే ఆలోచనతోనే ఇలా చేసి ఉంటారని ప్రణయ్‌ తండ్రి బాలస్వామి అనుమానం వ్యక్తం చేశారు. సీసీటీవీ రికార్డులను పోలీసులకు అందించామని, వాటిని పరిశీలించి తమ ఇంట్లోకి ప్రవేశించిన వ్యక్తిని గుర్తించి కఠినంగా శిక్షించాలని ప్రణయ్‌ కుటుంబసభ్యులు పోలీసులను కోరారు. కాగా, రక్షణ కల్పించాలని కోరడంతో ఇద్దరు కానిస్టేబుళ్లను ప్రణయ్ కుటుంబసభ్యులకు రక్షణగా కేటాయించారు. ప్రణయ్ ఇంటిపైగదిలో ఉంటూ పోలీసులు గస్తీ నిర్వహిస్తున్నారు.

12:33 - November 6, 2018

హైదరాబాద్ : టీఆర్ఎస్ పార్టీ ఓటమే లక్ష్యంగా కూడిన మహాకూటమిలో భాగస్వామిగా వుండే టీడీపీ అధ్యక్షుడు సంచలన నిర్ణయం తీసుకున్నారు. తెలంగాణలో మహాకూటమి ఏర్పాటులో కీలక పాత్ర పోషించిన ఎల్.రమణ ఎన్నికల పోటీ నుంచి తప్పుకుంటున్నట్టు ప్రకటించారు. కూటమి అభ్యర్థుల గెలుపు కోసం శక్తి వంచన లేకుండా కృషి చేస్తానని ఈ సందర్భంగా ఆయన తెలిపారు. జగిత్యాల కాంగ్రెస్ అభ్యర్థి జీవన్ రెడ్డికి అండగా ఉంటానని చెప్పారు. టీఆర్ఎస్ నిరంకుశ పాలనకు ముగింపు పలకడమే తన లక్ష్యమని అన్నారు. 1994లో తొలిసారి జగిత్యాల నుంచి టీడీపీ తరపున పోటీ చేసి రమణ గెలుపొందారు. అనంతరం అక్కడ నుంచి ఐదు సార్లు పోటీ చేశారు. మంత్రిగా బాధ్యతలను నిర్వహించారు.
 

 

12:27 - November 6, 2018

హైదరాబాద్: వైఎస్సార్ సీపీ అధ్యక్షులు జగన్‌మోహన్ రెడ్డి చేపట్టిన ప్రజా సంకల్ప యాత్ర మంగళవారంతో ఏడాది పూర్తిచేసుకుంది. కడప జిల్లాలోని ఇడుపులపాయలో గత ఏడాది నవంబర్ 6 న ప్రారంభమైన సంకల్ప యాత్ర శ్రీకాకుళం జిల్లా ఇచ్ఛాపురంలో  ముగియాల్సిఉంది.  ఇడుపులపాయలో మాజీ ముఖ్యమంత్రి వైఎస్ రాజశేఖర్ రెడ్డి మెమోరియల్ వద్ద ప్రారంభం కాగా ఇచ్చాపురంలో రాజశేఖర్ రెడ్డి 2003 సంవత్సరంలో 1,475 కిలోమీటర్ల పాదయాత్రను పూర్తిచేసిన ప్రాంతంలో యాత్ర ముగుస్తుంది. 
ప్రజలకు వైసీపీ ఎజెండా తెలుపుతూ... ప్రజా సమస్యలను తెలుసుకోవడంతోపాటు వారి కష్టాలను ప్రభుత్వం దృష్టికి తీసుకురావడమే ప్రతిపక్షనాయకుడి హోదాలో జగన్ చేపట్టిన ప్రజాసంకల్ప యాత్ర లక్ష్యం. 
గత 294 రోజులుగా, జగన్‌మోహన్ రెడ్డి 3,211 కిలోమీటర్ల పాదయాత్ర చేసి 175 అసెంబ్లీ నియోజకవర్గాల్లో 122 పూర్తి చేయడం విశేషం. పదకొండు జిల్లాల్లో..1,739 గ్రామాలను సందర్శించి.. 205 మండలాల్లో ప్రజలను కలుసుకున్నారు. ఈ సందర్భంగా 113 బహిరంగ సభలలో ప్రజలను ఉద్దేశించి ప్రసంగిచడం ఒక మైలురాయిగా చెప్పుకోవాలి. 
ప్రధానంగా, గుంటూరు, కృష్ణా, ఉభయ గోదావరి జిల్లాలతో పాటు విశాఖపట్నం, విజయనగరం జిల్లాల్లో అధిక సంఖ్యలో ప్రజలు, అధికారులు, రాజకీయనేతలు పార్టీలో చేరడం విశేషం.

12:11 - November 6, 2018

బెంగళూరు: కర్ణాటక ఉపఎన్నికల్లో కాంగ్రెస్‌-జేడీయూ కూటమి సత్తా చాటింది. ఇప్పటివరకూ వెలువడిన ఫలితాల్లో కాంగ్రెస్‌-జేడీఎస్‌ కూటమి మూడు చోట్ల విజయం సాధించింది. మరో స్థానంలో ఆధిక్యంలో ఉంది. కాగా.. ప్రతిపక్ష బీజేపీ కేవలం ఒకే ఒక్క చోట ముందంజలో ఉంది. కర్ణాటకలోని మూడు లోక్‌సభ స్థానాలకు(బళ్లారి, శివమొగ్గ, మాండ్య), రెండు అసెంబ్లీ నియోజకవర్గాలకు(రామనగర, జమఖండి) గత శనివారం ఉపఎన్నికలు నిర్వహించారు. ఇవాళ కౌంటింగ్ చేపట్టారు. 

మాండ్య లోక్‌సభ నియోజకవర్గంలో జేడీఎస్‌ అభ్యర్థి శివరామగౌడ సమీప బీజేపీ అభ్యర్థి సిద్ధరామయ్యపై భారీ ఆధిక్యంతో విజయం సాధించారు. ఇక రామనగర అసెంబ్లీ నియోజకవర్గం నుంచి జేడీఎస్‌ అభ్యర్థి, ముఖ్యమంత్రి కుమారస్వామి సతీమణి అనిత కుమారస్వామి గెలుపొందారు. మరో అసెంబ్లీ నియోజకవర్గం జమఖండిలో కాంగ్రెస్‌ అభ్యర్థి, మాజీ ఎమ్మెల్యే సిద్ధు న్యామగౌడ కుమారుడు ఆనంద్‌ విజయం సాధించారు.

ఇక బళ్లారి లోక్‌సభ నియోజకవర్గంలో బీజేపీ అభ్యర్థి, మాజీ ఎంపీ శ్రీరాములు సోదరి శాంతపై కాంగ్రెస్‌ అభ్యర్థి ఉగ్రప్ప భారీ ఆధిక్యంలో ఉండగా.. మరో లోక్‌సభ నియోజకవర్గం శివమొగ్గలో కాంగ్రెస్‌-బీజేపీ మధ్య హోరాహోరీ పోటీ నెలకొంది. శివమొగ్గలో బీజేపీ అభ్యర్థి, మాజీ ముఖ్యమంత్రి యడ్యూరప్ప తనయుడు రాఘవేంద్ర తన సమీప జేడీఎస్‌ అభ్యర్థి మధు బంగారప్పపై స్వల్ప లీడ్‌లో ఉన్నారు.

11:13 - November 6, 2018

నందమూరి బాలకృష్ణ,దర్శకుడు క్రిష్ కాంబినేషన్‌లో, ఎన్టీఆర్ బయోపిక్‌ని, ఎన్టీఆర్ కథానాయకుడు, ఎన్టీఆర్ మహానాయకుడు పేర్లతో రెండు భాగాలుగా రూపొందిస్తున్న సంగతి తెలిసిందే. ప్రస్తుతం రెండు భాగాలకు సంబంధించిన షూటింగ్  శరవేగంగా జరుపుకుంటుంది. మరోవైపు ప్రమోషన్స్‌లోనూ మూవీ యూనిట్ చాలా యాక్టివ్‌గా ఉంది.. ఇప్పటి వరకు విడుదల చేసిన బాలయ్య వివిధ లుక్స్‌కి, సుమంత్, రానా, కళ్యాణ్ రామ్,  రకుల్ ప్రీత్ సింగ్, భరత్ రెడ్డి లుక్స్‌కి కూడా అద్భుతమైన రెస్పాన్స్ వస్తుంది. ఇదిలా ఉంటే, ఎన్టీఆర్‌తో పలు విజయవంతమైన చిత్రాల్లో, ఆయనకు పోటాపోటీగా నటించిన మహానటి సావిత్రి లుక్‌ని దీపావళి సందర్భంగా విడుదల చేసారు. మొదట ఈ పాత్రకు మహానటిలో సావిత్రిగా అలరించిన కీర్తి సురేష్‌ని తీసుకోవాలనుకున్నారు, ఆవిడ ఒప్పుకోకపోవడంతో, నిత్యాని తీసుకున్నారు. మహానటిలోనూ తొలుత సావిత్రి పాత్రకోసం, నిత్యా మేనన్ పేరు వినబడింది. ఇప్పుడు ఈ బయోపిక్‌లో, ఆమె సావిత్రిలా నటించడం యాధృచికం. గుండమ్మ కథ చిత్రంలో, లేచింది నిద్ర లేచింది మహిళా లోకం పాటలోలా, ఎన్టీఆర్‌లా బాలయ్య పిండి రుబ్బుతుంటే, అచ్చ తెలుగు కట్టూ, బొట్టులో సావిత్రిగా మారిన నిత్యా మేనన్ చూడచక్కగా ఉన్న ఈ పోస్టర్, సోషల్ మీడియాలో ట్రెండ్ అవుతోంది. సావిత్రిగా నిత్యా మేనన్ పర్‌ఫెక్ట్‌గా సెట్ అయింది అంటున్నారు నందమూరి అభిమానులు. తొలిభాగం, ఎన్టీఆర్ కథానాయకుడు, జనవరి 9న, రెండోభాగం, ఎన్టీఆర్ మహానాయకుడు జనవరి 24న విడుదల కాబోతున్నాయి.  

 

11:06 - November 6, 2018

ఢి్ల్లీ : దేశవ్యాప్తంగా దీపావళి సందడి మొదలైపోయింది. ఇళ్లన్నీ దీపాల వెలుగుల్లో కళకళలాడుతున్నాయి. దీపావళి అందరి ఇళ్లలోను వెలుగులను పంచుతోందా? సంపన్నులకేనా దీపావళి. సామాన్యులకు కాదా? అవునే అనిపిస్తోంది నేటి ఆధునిక సమాజం. ఆధునికత మెరుపులకే కాగీ..మేలుకొలుపులకు కాదంటోంది. వెలుగు జిలుగులు దీపాల కొనుగోలులో మట్టి దీపాలు వెల వెలబోతున్నాయి. అవి తయారుచేసేవారి పాలిట శాపంగా మారుతున్నాయి. ఈ నేపథ్యంలో దీపావళి సందర్భంగా హెచ్‌పీ ఇండియా సంస్థ ఓ వీడియోను రూపొందించింది. దీపాలు వెలిగించే ప్రమిదలను ఖరీదైన షాపింగ్‌ మాల్స్‌, దుకాణాల్లో కాకుండా వీధుల్లో అమ్మే వారి వద్ద నుంచి కొనుగోలు చేయాలని ప్రజలకు చెప్పడం కోసం హెచ్‌పీ ఈ ప్రకటనను రూపొందించింది. ఈ వీడియోను ‘ఉమ్మీద్‌ కా దియా’ పేరిట హెచ్‌పీ ఇండియా తన అధికారిక ట్విటర్‌లో పోస్ట్‌ చేసింది.

‘మనం వేసే ఒక్క అడుగు ఎందరో జీవితాల్లో మార్పును తెస్తుంది. పండుగకు కావాల్సిన వస్తువులను వీధుల్లో అమ్మేవారి నుంచి కొనుగోలు చేయండి. వాటితో మన ఇంట్లో వెలిగించే దీపాలు వారి నివాసాల్లోనూ వెలుగునిస్తాయి.’ అని హెచ్‌పీ ఇండియా ట్వీట్‌లో పేర్కొంది. వీడియోలో ఓ బాలుడు తన తల్లితో కలిసి దీపావళి షాపింగ్‌ చేయడానికి ఓ మాల్‌కు వెళతాడు. అక్కడ ఖరీదైన వస్తువులు కొనుగోలు చేస్తారు. మాల్‌ నుంచి బయటికి వస్తుండగా ఆ బాలుడికి రోడ్డు పక్కన ప్రమిదలను అమ్ముతున్న ఓ మహిళ కనబడుతుంది. ఆమె ఫొటో తీస్తాడు. ‘అమ్మా ఇవి కొనుక్కుందాం..’ అని తన తల్లిని అడుగుతాడు. కానీ అందుకు ఆమె ఒప్పుకోదు. పైగా ఆ మహిళను చులకనగా చూస్తుంది. అప్పుడు ఆ మహిళకు బాలుడు ఏ విధంగా సాయం చేశాడు? అన్న విషయమే ఇప్పుడు ఎందరినో మేలుకొలిపింది. సంప్రదాయమే కాదు సహాయానికి ముందడుగు వేయించింది. 
రెండు రోజుల్లో ఈ వీడియోను 20 లక్షల మందికిపైగా వీక్షించారు. ‘ఈ వీడియో నిజంగానే కన్నీరుపెట్టించింది’ అంటూ నెటిజన్లు కామెంట్లు పెడుతున్నారు. నెటిజన్ల హృదయాల్ని ద్రవింపజేసిన ఆ వీడియోను మీరూ చూడండి..!
 

11:05 - November 6, 2018

బెంగళూరు: కర్నాటక ఉపఎన్నికల్లో కాంగ్రెస్ - జేడీఎస్ కూటమి అభ్యర్థుల హవా నెలకొంది. కర్నాటకలోని మూడు లోక్‌సభ, రెండు అసెంబ్లీ స్థానాలకు జరిగిన ఉపఎన్నికలకు కౌంటింగ్‌ జరుగుతోంది. ఉదయం 8 గంటల నుంచి ఓట్ల లెక్కింపు చేపట్టారు. మొత్తం ఐదు స్థానాల్లో నాలుగింట కాంగ్రెస్‌ - జేడీఎస్‌ కూటమి ముందంజలో ఉండగా.. ఒక చోట బీజేపీ లీడ్‌లో ఉంది. బళ్లారి, శివమొగ్గ, మాండ్య లోక్‌సభ స్థానాలకు.. రామనగర, జమఖండి అసెంబ్లీ స్థానాలకు గత శనివారం ఉప ఎన్నికలు నిర్వహించారు.

* కర్నాటక ఉపఎన్నికల కౌంటింగ్ (3లోక్‌సభ, 2 అసెంబ్లీ)
* మాండ్య లోక్‌సభ స్థానంలో జేడీఎస్ అభ్యర్థి శివరామెగౌడ విజయం
* రామనగర అసెంబ్లీ స్థానంలో జేడీఎస్ అభ్యర్థి అనితా కుమారస్వామి విజయం
* జమఖండి అసెంబ్లీ స్థానంలో కాంగ్రెస్ అభ్యర్థి ఆనంద్ సిద్ధు న్యామగౌడ విజయం
* శివమొగ్గ లోక్‌సభ స్థానంలో కాంగ్రెస్, బీజేపీ మధ్య హోరాహోరి


మాండ్య, బళ్లారి లోక్‌సభ స్థానాలు.. రామనగర, జమఖండి అసెంబ్లీ నియోజకవర్గాల్లో కాంగ్రెస్‌-జేడీఎస్‌ కూటమి అభ్యర్థుల హవా కనిపించింది. మాండ్య లోక్‌సభ స్థానంలో జేడీఎస్ అభ్యర్థి శివరామెగౌడ, రామనగర అసెంబ్లీ స్థానంలో సీఎం కుమారస్వామి సతీమణి, జేడీఎస్ అభ్యర్థి అనితా కుమారస్వామి, జమఖండి అసెంబ్లీ స్థానంలో కాంగ్రెస్ అభ్యర్థి ఆనంద్ సిద్ధు న్యామగౌడ విజయం సాధించారు. ఇక బళ్లారి లోక్‌సభ స్థానంలో బీజేపీ అభ్యర్థి, మాజీ ఎంపీ శ్రీరాములు సోదరి శాంతపై కాంగ్రెస్‌ అభ్యర్థి ఉగ్రప్ప ఆధిక్యంలో కొనసాగుతున్నారు.
ఇటు శివమొగ్గ లోక్‌సభ నియోజకవర్గంలో బీజేపీ అభ్యర్థి, మాజీ ముఖ్యమంత్రి యడ్యూరప్ప కుమారుడు రాఘవేంద్ర ముందంజలో ఉన్నారు. జేడీఎస్‌ అభ్యర్థి, మాజీ ముఖ్యమంత్రి ఎస్‌. బంగారప్ప తనయుడు మధు బంగారప్ప కూడా రాఘవేంద్రకు గట్టి పోటీనిస్తున్నారు. దీంతో ఈ నియోజకవర్గం ఫలితాలపై ఉత్కంఠ నెలకొంది. శివమొగ్గ ఎంపీగా ఉన్న మాజీ సీఎం యడ్యూరప్ప తన పదవికి రాజీనామా చేసి అసెంబ్లీ ఎన్నికల్లో పోటీ చేశారు. దీంతో ఈ స్థానంలో ఉపఎన్నిక నిర్వహించారు.

10:39 - November 6, 2018

వికారాబాద్ : పరిగి మండలంలో దారుణం చోటుచేసుకుంది.  ఎన్నికల వేళ సుల్తాన్ పూర్ లో టీఆర్ఎస్ నాయుడు హత్య కలకలం సృష్టిస్తోంది. టీఆర్ఎస్ నాయుకుడు నారాయణ రెడ్డిపై  దుండగులు రాళ్ళతో దాడికి పాల్పడ్డారు. ఉదయం పాలు పోయటానికి వెళ్లిన నారాయణరెడ్డిపై గుర్తు తెలియని దుండగులు దాడికి పాల్పడ్డారు. ఆ దాడి నుండి తప్పించుకునేందుకు నారాయణ రెడ్డి కొద్ది దూరం పరుగెత్తుకెళ్లగా వెంబడించి మరీ దుండగులు నారాయణ రెడ్డిని హతమార్చినట్లుగా తెలుస్తోంది. సమాచారం అందుకున్న నారాయణరెడ్డి అనుచరులు సంఘటనాస్థలికి చేరుకున్నారు. ఆ పరిస్థితిని చూసినవారు కోపోద్రిక్తులైన కాంగ్రెస్ నాయకులపై దాడికి పాల్పడ్డారు. ఈ దాడిలో ఇద్దరు కాంగ్రెస్ నాయకులకు తీవ్రంగా గాయాలయ్యాయి. దీంతో వారిని చికిత్స నిమిత్త ఆసుపత్రికి తరలించారు. టీఆర్ఎస్ నాయకుడు హత్య..కాంగ్రెస్ నాయకులపై దాడి నేపథ్యంలో  ఆ ప్రాంతంలో ఉద్రిక్త వాతావరణం చోటుచేసుకుంది. కాగా గత కొంతకాలంలో నారాయణ రెడ్డికి, గ్రామస్థులకు మధ్య గొడవలు జరుగున్న నేపథ్యంలో ఈ దాడికి కారణం గ్రామస్తులేననే అనుమానాలు వ్యక్తం అవుతున్నాయి. కాగా 
 

10:31 - November 6, 2018

కార్తి, రకుల్ ప్రీత్ సింగ్ జంటగా, లైట్ హౌస్ మూవీ మేకర్స్ సమర్పణలో, రజత్ రవిశంకర్ డైరెక్షన్‌లో రూపొందుతున్న సినిమా, దేవ్.. రీసెంట్‌గా రిలీజ్ చేసిన దేవ్ ఫస్ట్‌లుక్‌కి ఆడియన్స్‌ నుండి మంచి స్పందన వస్తోంది. ఈ నేపథ్యంలో దేవ్ టీజర్ విడుదల చేసింది చిత్ర బృందం. ఒక నిమిషం నిడివిగల టీజర్‌లో, సినిమా కాన్సెప్ట్ ఏంటో క్లుప్తంగా చెప్పే ప్రయత్నం చేసారు. అందరిలా మెషీన్‌లా పని చెయ్యడం నచ్చని హీరో, బైక్ రేస్‌లో మాత్రం దూసుకుపోతుంటాడు. సదరు హీరో, తన మనసుకి నచ్చిన అమ్మాయిని లవ్ చెయ్యడం, తనని కాపాడుకోవడానికి ఫైట్ చెయ్యడం, ఫ్యామిలీతో సరదాగా టైమ్ స్పెండ్ చెయ్యడం, చిలిపిగా రొమాన్స్ చెయ్యడం, ఇలా, ఆసక్తికరంగా, ఆహ్లాదకరంగా అనిపిస్తుంది దేవ్ టీజర్. లుక్ వైజ్ కార్తి బాగున్నాడు. ఖాకీ తర్వాత కార్తి, రకుల్ ప్రీత్ కలిసి నటిస్తున్నారు, ఆన్ స్క్రీన్ ఇద్దరి  కెమిస్ట్రీ బాగుంది. హేరిస్ జయరాజ్ బ్యాగ్రౌండ్ స్కోర్, వేల్ రాజ్ కెమెరా వర్క్ బాగున్నాయి. ప్రకాష్ రాజ్, రమ్యకృష్ణ, నిక్కీ గల్రానీ ఇంపార్టెంట్ రోల్స్ చేస్తున్నారు. ఖాకీ , చినబాబు వంటి హిట్ సినిమాలతో జోరుమీదున్న కార్తి, దేవ్‌ సినిమాతో హ్యాట్రిక్ కొట్టాలని చూస్తున్నాడు. ప్రస్తుతం రెగ్యులర్ షూటింగ్ జరుపుకుంటున్న దేవ్, తెలుగు, తమిళ్ భాషల్లో ఒకేసారి విడుదల కాబోతోంది..   

వాచ్ టీజర్..

 

09:47 - November 6, 2018

తిరుమల: హిందువుల పవిత్ర పుణ్యక్షేత్రం తిరుమలలో కలకలం చెలరేగింది. తిరుమలలో శ్రీవారి లడ్డూల కుంభకోణం బయటపడింది. లడ్డూ కౌంటర్‌లలో పని చేసే కాంట్రాక్ట్ సిబ్బంది చేతివాటం చూపించారు. రెండు రోజుల వ్యవధిలో 26వేల లడ్డూలను కాంట్రాక్ట్ సిబ్బంది పక్కదారి పట్టించినట్టు విజిలెన్స్ అధికారులు గుర్తించారు. పక్కదారి పట్టించిన లడ్డూల విలువ రూ.13లక్షలు ఉంటుందని అధికారులు అంచనా వేశారు. మొత్తం 30మంది అక్రమాలకు పాల్పడినట్లు విజిలెన్స్ అధికారులు గుర్తించారు. లడ్డూల స్కాంలో టీటీడీ ఉద్యోగుల పాత్రపైనా అనుమానాలు వ్యక్తమవుతున్నాయి.

* తిరుమలలో లడ్డూల కుంభకోణం
* 2 రోజుల్లో 26వేల లడ్డూలు పక్కదారి
* 13లక్షలు విలువైన లడ్డూలు మాయం
* రూ.50 విలువైన లడ్డూలు రూ.80, 100కు విక్రయం

గత నవరాత్రి బ్రహ్మోత్సవాల సమయంలో గరుడ సేవ రోజున రద్దీ అధికంగా ఉంటుందని, భక్తులకు ఆలస్యం కాకుండా లడ్డూ టోకెన్లను స్కాన్ చేయకుండానే భక్తులకు త్వరితగతిన అందజేయాలని అధికారులు ఆదేశాలు ఇచ్చారు. ఈ ఆదేశాలను లడ్డూ కౌంటర్‌లలో పనిచేసే కాంట్రాక్ట్ సిబ్బంది తమకు అనుకూలంగా చేసుకున్నారు. లడ్డూలను పక్కదారి పట్టించి వాటిని బ్లాక్‌లో విక్రయించుకున్నారు. 50రూపాయలు విలువైన లడ్డూని బ్లాక్‌లో 80, 100 రూపాయలకు అమ్ముకుని సొమ్ము చేసుకున్నారు. కాస్త ఆలస్యంగా ఈ స్కాం వెలుగుచూసింది. ఈ వ్యవహారంలో అక్రమానికి పాల్పడ్డ వారిపై క్రిమినల్ చర్యలు తీసుకోవడానికి అధికారులు సమాయత్తం అవుతున్నారు.

Image result for tirumala laddu scamగతంలో కూడా ఇలాగే అనేక స్కామ్‌లు జరిగినా సరైన చర్యలు తీసుకోవడంలో టీటీడీ విఫలమవుతోందనే విమర్శలు వినిపిస్తున్నాయి. సేవా టికెట్లు, లడ్డూలు అడ్డదారిలో పొందడం బ్లాక్ మార్కెట్‌లో విక్రయించడం సాధారణంగా మారిందనే విమర్శలు ఉన్నాయి.

 
09:09 - November 6, 2018

రంగారెడ్డి: మైలార్‌దేవ్‌పల్లి పోలీస్ స్టేషన్ పరిధిలో దోపిడీ దొంగలు రెచ్చిపోయారు. సుభాన్ కాలనీలో భారీ చోరీ జరిగింది. అర్థరాత్రి ఓ ఇంట్లో చోరీకి పాల్పడ్డారు. 60 తులాల బంగారు ఆభరణాలను ఎత్తుకెళ్లారు. చోరీ అనంతరం దొంగలు పారిపోతుండగా ఓ బంగారం బ్యాగ్ కింద పడిపోయింది. దీంతో 30 తులాల బంగారాన్ని పోలీసులు రికవరీ చేశారు. మరో 30 తులాల బంగారు ఆభరణాలను అపహరించుకుని పోయారు. కేసు నమోదు చేసిన పోలీసులు దర్యాప్తు చేస్తున్నారు.

Don't Miss