పోలవరం ప్రాజెక్టు సమీప గ్రామంలో కలకలం..

12:12 - November 3, 2018

పోలవరం: పశ్చిమగోదావరి జిల్లా పోలవరం ప్రాజెక్టు సమీపంలోని గ్రామంలో కలకలం చెలరేగింది. ప్రాజెక్టు వద్ద భూమిలో పగుళ్లు ఏర్పడ్డాయి. 15 అడుగుల మేర రోడ్డు పైకి లేచింది. దీంతో కరెంటు స్తంభాలు కూలిపోతున్నాయి. ప్రొక్లైన్లు మట్టిలో కూరుకుపోతున్నాయి. పగుళ్లు ఏర్పడటం, భూమి పైకి లేవడంతో స్థానికులు భయాందోళనకు గురయ్యారు. అసలేం జరుగుతుందో అర్థం కాక టెన్షన్ పడ్డారు. కాగా, పోలవరం ప్రాజెక్టులోని మట్టిని తీసుకొచ్చి ఇక్కడ డంపింగ్ చేయడంతోనే పగుళ్లు వస్తున్నాయని గ్రామస్తులు అంటున్నారు.

పోలవరం ప్రాజెక్టు నుంచి ఏజెన్సీకి వెళ్లే ప్రధానమైన రోడ్డు అకస్మాత్తుగా పగుళ్లకు లోనైంది. మొదట చిన్న పగుళ్లు వచ్చాయి. రెండు అడుగుల మేర భూమి పైకి లేచింది. గంట వ్యవధిలోనే 15 అడుగుల మేర భూమి పైకి లేచింది. అలా 300మీటర్ల వరకు పగుళ్లు ఏర్పడ్డాయి. 19 గ్రామాల ప్రజలు ఈ రోడ్డు మీదుగా ప్రయాణం సాగిస్తారు. పగుళ్లు ఏర్పడటంతో రాకపోకలు నిలిచిపోయాయి. పోలవరం ప్రాజెక్టు ఇంజినీర్లు వెంటనే వచ్చి ఘటనా స్థలిని పరిశీలించారు. పోలవరం ప్రాజెక్టు స్పిల్ చానల్‌కు సంబంధించి లక్షల క్యూబిక్ మీటర్ల మట్టిని ఈ గ్రామంలో డంప్ చేస్తున్నారు. 6 నెలలుగా ఇలా డంప్ చేస్తున్నారు. ఈ కారణంగా బరువు ఎక్కువై భూమి పైకి లేచి ఉండొచ్చని ప్రాజెక్టు ఇంజినీర్లు చెబుతున్నారు. అదే సమయంలో భూకంపం ఏమైనా వచ్చిందా? అనే దిశలోనూ పరిశీలన జరుపుతున్నారు.

Don't Miss