ప్రచారానికి విరామం ఇవ్వొద్దని అభ్యర్థులకు కేసీఆర్ ఆదేశం

11:16 - November 3, 2018

హైదరాబాద్: ఎన్నికలకు సమయం దగ్గరపడుతున్న కొద్దీ టీఆర్‌ఎస్‌ ప్రచారాన్ని హోరెత్తిస్తోంది. టీఆర్‌ఎస్‌ అధినేత కేసీఆర్‌ గెలుపు వ్యూహాలు రచిస్తూ... అభ్యర్థులకు ఎప్పటికప్పుడు సూచనలు చేస్తూనే ఉన్నారు. ప్రచార తీరు తెన్నులపై అభ్యర్థులను అలర్ట్‌ చేస్తున్న గులాబీ దళపతి... పండుగలు, పబ్బాలను ప్రచారానికి వినియోగించుకోవాలని ఆదేశించారు. త్వరలో రానున్న దీపావళి, నోముల సందర్భంగా ప్రచారానికి విరామం ఇవ్వవద్దని స్పష్టం చేశారు. ప్రజలను కలుసుకునేందుకు ఇదో మంచి అవకాశంగా మలచుకోవాలని తెలిపారు. ప్రచారం ఇప్పుడు కొనసాగిస్తున్న పంథాలోనే కొనసాగుతూ.. మరింత ముమ్మరం చేయాలని పార్టీ ముఖ్యనేతలతో జరిగిన సమావేశంలో ఆయన ఆదేశించారు. పండుగల సందర్భంగా జరిగే ఉత్సవాల్లో మమేకమవ్వాలని చెప్పారు. అభ్యర్థులు నోములకు హాజరై ప్రజలకు శుభాకాంక్షలు తెలిపాలన్నారు. మరోవైపు వరంగల్‌, ఖమ్మం తదితర ఉమ్మడి జిల్లాల ఎన్నికల ప్రచార సభలను దీపావళి తర్వాత నిర్వహించాలని నిర్ణయించారు.

Don't Miss