National News

ఆధార్.. ప్రతి భారత పౌరునికి ముఖ్యమైనది. మన దేశంలో చాలా వాటికి ఆధార్‌ను లింక్ చేశారు. మొబైల్ సిమ్ కావాలన్నా, బ్యాంకు ఖాతా తెరవాలన్నా, గ్యాస్ కనెక్షన్ తీసుకోవాలన్నా, ఆస్తులు అమ్మాలన్నా, కొనుక్కోవాలన్నా ఆధార్ తప్పని సరి. అంతేకాదు సంక్షేమ పథకాలు పొందాలన్నా ఆధార్ మస్ట్. అయితే ఆధార్ మీద ప్రజల్లో అనేక సందేహాలు, అపోహలు ఉన్నాయి. ఆధార్ భద్రతపై భయాలు ఉన్నాయి. గోప్యంగా ఉంచాల్సిన వివరాలు ఈజీగా బయటపడుతున్నాయి. దీంతో దుర్వినియోగం జరుగుతోంది. 500 రూపాయలకే ఆధార్ వివరాలు అమ్మేస్తున్నారని ఇటీవల వార్తలు కూడా వచ్చాయి. ఈ క్రమంలో ఆధార్ భద్రత ప్రశ్నార్థకంగా మారింది. దీంతో ఆధార్ వివరాలు ప్రైవేటు వ్యక్తుల చేతుల్లో పెట్టొద్దని, అన్నింటికి(మరీ ముఖ్యంగా బ్యాంకు అకౌంట్లకు) ఆధార్ అవసరం లేదని సుప్రీంకోర్టు వ్యాఖ్యానించింది.
ఓవైపు సుప్రీంకోర్టు ఆదేశాలు, మరోవైపు ఆధార్‌పై అనుమానాలు వ్యక్తమవుతున్న తరుణంలో కేంద్ర ప్రభుత్వం పెద్దలు, ఆర్బీఐ అధికారులు చర్చలు జరుపుతున్నారు. ఆధార్ స్థానంలో ఆఫ్ లైన్ ఆధార్(క్యూఆర్ కోడ్) తీసుకురావాలని, ప్రూఫ్‌గా వాటిని అనుమతించాలని యోచిస్తున్నారు. దీని ద్వారా వ్యక్తిగత వివరాలు గోప్యంగా ఉంటాయని చెబుతున్నారు. బ్యాంకు అకౌంట్లు, పేమెంట్ వ్యాలెట్లు, బీమా పథకాలకు.. ఆధార్ ఈ-కేవైసీ బదులు ఆఫ్‌లైన్ ఆధార్ వినియోగించాలని చూస్తున్నారు. క్యూఆర్ కోడ్ అంటే డిజిటల్ సంతకం అన్నమాట. ఆధార్ జారీ చేసే యూఐడీఏఐ సంస్థ పేరు మీదు ఈ సంతకం ఉంటుంది. ఈ క్యూఆర్ కోడ్‌లను సెర్వర్లకు లింక్ చేసి ఉంచరు. దీంతో వ్యక్తిగత వివరాలు లీక్ అయ్యే ప్రమాదం ఉండదని రిజర్వ్ బ్యాంక్ అధికారులు చెబుతున్నారు. ఆఫ్‌లైన్ ఆధార్ తీసుకొచ్చే విషయమై యూఐడీఏఐ అధికారులతో రిజర్వ్ బ్యాంకు అధికారులు చర్చలు జరుపుతున్నారు.

ముంబై : సంకల్ప బలం వుంటే దేనైనా సాధించవచ్చు అనేది పెద్దల మాట. కష్టాలు వచ్చినియని కృంగిపోకుండా వాటిపై పోరాడి విజయం సాధిస్తే ఆ ఆనందమే వేరుగా వుంటుంది. ఏ కష్టమైనా రానీ నా ధైర్యం మాత్రం దిగజారిపోదు అనే మనోధైర్యంతో తనకు వచ్చిన దీర్ఘకాలిక వ్యాధితో పోరాడేందుకు సిద్ధమైంది బాలివుడ్ నటి సోనాలిబింద్రే. కొన్ని తెలుగు సినిమాలతో తెలుగు ప్రేక్షకులను కూడా అలరించి సోనాలి భయంకరమైన క్యాన్సర్ బారిన పడిన విషయం తెలిసిందే. అయినా తనకొచ్చిన వ్యాధితో పోరాడతానని దానికి సంబంధించిన వైద్యం చేయించుకునేందుకు విదేశం వెళ్లిన సోనాలి తిరిగి వచ్చింది అంతే ఆత్మవిశ్వాసంతో. దీనికి సంబంధించిన ఆమె ఫోటోలు ఇన్ స్ట్రా గ్రామ్ లో అభిమానులు పోస్ట్ చేయటంతో ఆమెపై ప్రశ్నంసల జల్లు కురుస్తోంది. 

ముంబైలో సోనాలి బింద్రే ఉన్న ఫోటోలను ఇన్‌స్టాగ్రామ్‌లో పోస్ట్ చేసారు ఆమె అభిమానులు. పైగా క్యాన్సర్ మహమ్మారితో ఆమె పోరాడిన విధానంపై కూడా ప్రశంసల జల్లు కురుస్తుంది. ప్రాణాల మీదకు వస్తున్నా కూడా ఏ రోజు కూడా భయపడలేదని.. తాను ధైర్యంగా పోరాడుతూ ఇప్పుడు ప్రాణాలు కాపాడుకుందని చెబుతున్నారు. ముఖ్యంగా ఆమె మనోధైర్యమే కాపాడిందని చెబుతున్నారు వైద్యులు. ఇంట్లో రెస్ట్ తీసుకోవాలని సోనాలికి సూచించారు డాక్టర్లు. అవసరం అనుకున్నపుడు మళ్లీ న్యూయార్క్ వెళ్లి ట్రీట్మెంట్ తీసుకోనుంది సోనాలి బింద్రే. కాగా ట్రీట్ మెంట్ నేపథ్యంతో తన వెంట్రుకలను కత్తిరించుకునే సమయంలో తీవ్ర భావోద్వేగానికి గురైన సోనాలి ఇనుమడించిన ఆత్మవిశ్వాసంతో న్యూయార్క్ లో ట్రీట్ మెంట్ తీసుకుని ముంబై రావటంతో ఆమె అభిమానులు ఆనందం వ్యక్తంచేస్తు ఇన్ స్ట్రా గ్రామ్ లో ఫోటోలను పోస్ట్ చేస్తున్నారు. ఆమె మరింత ఆరోగ్యంగా వుండాలని..ఆనందంగా వుండాలని పోస్ట్ లు పెడుతున్నారు. 

ఢిల్లీ : గత కొంతకాలంగా తగ్గుతున్న పెట్రోల్, డీజిల్ ధరలు వాహనదారులకు ఊరటినిస్తున్నాయి.  అంతర్జాతీయంగా ముడిచమురు ధరల ప్రభావంతో దేశీయంగా పెట్రోలు, డీజిల్ ధరలు డిసెంబరు 3న మరోసారి తగ్గాయి. దీంతో తెలుగు రాష్ట్రాలల్లో  కూడా ఈ ప్రభావం కనిపించింది. హైదరాబాద్ లో పెట్రల్ : 76.20లు వుండగా విజయవాడలో రూ.75.70లు గా వుంది. 

దేశ రాజధాని ఢిల్లీలో 30 పైసలు తగ్గిన లీటర్ పెట్రోలు ధరరూ.71.93 కి చేరింది. డీజిల్ ధర 36 పైసలు తగ్గి రూ.66.66 కి చేరింది. ఇక వాణిజ్య రాజధాని ముంబయిలో 30 పైసలు తగ్గిన పెట్రోలు ధర రూ.77.50 కి చేరగా.. డీజిల్ ధర 38 పైసలు తగ్గి రూ.69.77 కి చేరింది. అంతర్జాతీయ మార్కెట్‌లో బ్రెంట్ క్రూడ్ ఆయిల్ ధర బ్యారెల్‌‌ 62.45 డాలర్ల వద్ద ఉండగా.. డబ్ల్యూటీఐ క్రూడాయిల్ ధర 53.77 డాలర్ల వద్ద కొనసాగుతోంది.  ఇక తెలుగు రాష్ట్రాల విషయానికొస్తే.. హైద‌రాబాద్‌లో లీట‌ర్ పెట్రోల్ ధర 31 పైసలు తగ్గి రూ.76.26 ఉండగా.. డీజిల్ ధర 39 పైసలు తగ్గి రూ.72.42 గా ఉంది. విజయవాడలో పెట్రోల్‌ ధర 31 పైసలు తగ్గి రూ.75.70ఉండగా.. డీజిల్‌ ధర 38 పైసలు తగ్గి రూ.71.46 వద్ద కొనసాగుతోంది. 
 

ఢిల్లీ : అసలే కష్టాలు..దీనికి తోడు మరో కష్టం వచ్చి పడింది జెట్‌ ఎయిర్‌ వేస్‌ కు. పైలెట్స్ అందరికి ఒకేసారి ఆరోగ్య సమస్యలు వచ్చాయట. అందుకే వారంతా మూకుమ్మడిగా సెలవులు పెట్టేసారు. మరి ఇంకేముంది? జెట్ ఎయిర్ వేస్ విమానాల సర్వీసులన్నీ నిలిచిపోయాయి. ఇప్పటికే పీకల్లోతు కష్టాల్లో మునిగి, నష్టాల నుంచి తేరుకునే మార్గం కోసం వెతుక్కుంటున్న జెట్ ఎయిర్ వేస్..సెప్టెంబర్ నెలలో సగం వేతనం చెల్లించింది ఈ సంస్థ. మిగిలిన వేతనాన్ని అక్టోబర్, నవంబర్ నెలల వేతనాన్ని పెండింగ్ లో పెట్టేసింది. దీంతో పైలెట్స్ లో చాలామంది మూకుమ్మడిగా సెలవులు పెట్టేసరికి జెట్ ఎయిర్ వేస్ సంస్థకు దిమ్మ తిరిగిపోయింది. పలువురు పైలట్లు తమకు అనారోగ్యంగా ఉందని చెబుతూ మూకుమ్మడిగా సిక్ లీవు పెట్టడంతో 14 విమానాలను రద్దు చేయాల్సి వచ్చింది. దీంతో ఆ విమానాల సర్వీసుల్లో ప్రయాణించాల్సిన వారు తీవ్ర ఇబ్బందులు పడ్డారు.
దీంతో జెట్ ఎయిర్ వేస్ అధికారులతో ప్రయాణీకులు  వాగ్వాదానికి దిగారు. పైలట్లు సహకరించని కారణంగానే విమానాలను రద్దు చేశామని, దీని కారణంగా దాదాపు 100కు పైగా సర్వీసులు నిలిచిపోయాయని సంస్థ ఓ ప్రకటనలో తెలిపింది. కాగా సర్వీసులు రద్దు చేసిన విషయాన్ని ప్రయాణికులకు ఎస్ఎంఎస్ ల రూపంలో వెల్లడించామని, సాధ్యమైనంత మంది ప్రయాణికులను ఇతర విమానాల్లో గమ్య స్థానాలకు చేర్చామని, మిగిలిన వారికి పరిహారం అందించనున్నామని పేర్కొంది. మరి జెట్ ఎయిర్ వేస్ సంస్థ సమస్యలు ఏనాటికి తీరేనో..
 

ఢిల్లీ : భారతీయులకు సిట్జర్లాండ్ ప్రభుత్వం శుభవార్తను అందించింది. భారతీయుల కల ఈనాటికి నెరవేరే అవకాశాలన్ని స్విస్ ప్రభుత్వం ఇవ్వనుంది. భారతదేశంలో అక్రమంగా సంపాదించిన డబ్బులను అదే అక్రమ రీతిలో విదేశాలను తరలించిన బ్లాక్ మనీ ఖాతాదారుల గుట్టు బైపడునుంది. ఈ మేరకు స్విట్జర్లాండ్ ప్రభుత్వం బ్లాక్ మనీ ఖాతాదారుల లిస్ట్ ను వెల్లడించేందుకు నిర్ణయం తీసుకుంది. 
నల్లధనాన్ని వెనక్కి తీసుకొస్తామనే ఎజెండాతో ప్రధాని నరేంద్రమోదీ ప్రభుత్వం అధికారంలోకి వచ్చింది. కానీ దాదాపు మోదీ ప్రధాని అయిన దాదాపు 5 సంవత్సరాలు కావస్తున్న బ్లాక్ మనీ తీసుకొచ్చే జాడే కనిపించటంలేదు. దీనిపై విపక్షాలు ఎన్నిమార్లు విమర్శించినా మోదీ నోటి నుండి ఒక్క వివరణగానీ..ఒక్క మాటగానీ రాలేదు. 
 వివరాలు వెల్లడించటం కుదరదని ఇప్పటి వరకూ తెలిపిన స్విస్ బ్యాంక్ ఇప్పుడు హఠాత్తుగా బ్లాక్ మనీ ఖాతాదారుల వివరాలను తెలియజేస్తామనీ..వారి లిస్ట్ ఇస్తామనీ కేంద్ర ప్రభుత్వానికి సమచారం ఇచ్చినట్లుగా తెలుస్తోంది. ఈ నేపథ్యంలో ప్రధాని నరేంద్ర మోదీ ప్రభుత్వానికి స్విట్జర్లాండ్ ప్రభుత్వం గుడ్‌న్యూస్ చెప్పినట్లే. భారతదేశంలో భారీ  అక్రమాలకు పాల్పడి.. ఆ సొమ్మును విదేశాలలో నిల్వ చేసుకున్న నల్లవీరుల బండారం బట్టబయలు కానుంది స్విస్ బ్యాంక్ అధికారుల ప్రకటనతో. స్విస్ బ్యాంకు ఖాతాదారుల వివరాలను అందించేందుకు స్విస్ ప్రభుత్వం ముందుకొచ్చింది. రెండు కంపెనీలు, ముగ్గురు వ్యక్తుల వివరాలు అందించనున్నట్టు స్విస్ ప్రభుత్వం  తెలిపింది. 
తమిళనాడులోని జియోడెసిక్ లిమిటెడ్, ఆది ఎంటర్‌ప్రైజెస్ లిమిటెడ్, జియో డెసిక్ కంపెనీ చైర్మన్ పంకజ్ కుమార్ ఓంకార్ శ్రీవాస్తవ, ఎగ్జిక్యూటివ్ డైరెక్టర్ ప్రశాంత్ శరద్ ములేకర్, ఎండీ కిరణ్ కులకర్ణిలు ఆర్థిక అక్రమాలకు పాల్పడ్డారని, వారి వివరాలు కావాలని భారత ప్రభుత్వం స్విస్ ప్రభుత్వాన్ని కోరింది. భారత విజ్ఞప్తిని అంగీకరించిన స్విట్జర్లాండ్ ప్రభుత్వం ఆ వివరాలను అందిస్తామని,  వేర్వేరు గెజిట్ నోటిఫికేషన్ల ద్వారా పాలనా పరమైన సాయాన్ని భారత్‌కు అందజేస్తామని స్పష్టం చేసింది. 1982లో ఏర్పాటైన జియోడెసిక్, 2014లో ఏర్పాటైన ఆది ఎంటర్‌ప్రైజెస్‌లు ఆర్థిక అక్రమాలకు పాల్పడినట్టు ఆరోపణలున్నాయి. దీంతో ఆదాయపు పన్ను శాఖ అధికారులు ఆయా కంపెనీల ప్రమోటర్ల ఆస్తులపై దాడులు చేశారు.
ఈ నేపథ్యంలో మరింతమంది నల్లవీరుల జాబితా బైటపడే అవకాశాలు కనిపిస్తున్నాయి. కాగా ఈ నల్లడబ్బు భారతదేశానికి తిరిగి వస్తే..భారతదేశపు ఆర్థిక స్థితిగతులు అమోఘంగా మారిపోయే అవకాశం వుంది. ఏది ఏమైనా ఈనాటికైనా స్విస్ ప్రభుత్వం ఈ నిర్ణయానికి రావటం ఆహ్వానించదగిన విషయం.

ఢిల్లీ : వస్తు..సేవల పన్ను..(గూడ్స్ అండ్ సర్వీసెస్ టాక్స్) నవంబర్ మాసానికి రూ. 97, 637 కోట్ల రూపాయల రెవెన్యూ వచ్చింది. సెంట్రల్ గూడ్స్ అండ్ సర్వీసెస్ (సీజీఎస్టీ) కింద రూ. 16, 812 కోట్లు వచ్చాయి. స్టేట్ గూడ్స్ అండ్ సర్వీసెస్ ట్యాక్స్ (ఎస్జీఎస్టీ) కింద రూ. 23, 070..ఇంటిగ్రేటెడ్ గూడ్స్ అండ్ సర్వీసెస్ (ఐజీఎస్టీ) కింద రూ. 49, 726...జీఎస్టీఆర్ 3బీ రిటర్న్ (అక్టోబర్ - మొత్తం 30వ నవంబర్) 69.6 లక్షలు అని కేంద్ర ఆర్థిక మంత్రిత్వ శాఖ పేర్కొంది. సీజీఎస్టీ కింద రూ.18,262 కోట్లు...ఎస్‌జీఎస్టీ కింద రూ.15,704 కోట్ల చెల్లింపులు చేసినట్లు కేంద్రం పేర్కొంది. 
అక్టోబర్ మాసంలో కేంద్ర, రాష్ట్ర ప్రభుత్వాలకు సీజీఎస్టీ కింద రూ.35,073 కోట్లు...ఎస్‌జీఎస్టీ కింద రూ.38,774 కోట్ల ఆదాయం వచ్చిందని తెలిపింది. ఆగస్టు-సెప్టెంబర్ నెలకుగాను రాష్ర్టాలకు పరిహారం కింద రూ.11,922 కోట్ల నిధులు విడుదల చేసింది 
> ఏప్రిల్‌లో రూ.1.03 లక్షల కోట్లు...
మేలో రూ.94,016 కోట్లు...
జూన్‌లో రూ.95,610 కోట్లు...
జూలైలో రూ.96,483 కోట్లు...
ఆగస్టులో రూ.93,960 కోట్లు...
సెప్టెంబర్‌లో రూ.94,442 కోట్లు...
అక్టోబర్‌లో రూ.1,00,710 కోట్లు...

2016 సెప్టెంబ‌రు 8నుంచి 101 వ రాజ్యాంగ స‌వ‌ర‌ణ ద్వారా జీఎస్టీ చ‌ట్ట‌రూపం దాల్చిన సంగతి తెలిసిందే. 

ఢిల్లీ : ఎవరైనా తప్పు చేస్తే ఏం చేస్తారు...పోలీసులకు పట్టించి చట్ట ప్రకారం వారికి ఏ శిక్ష విధించాలో కోర్టు నిర్ణయిస్తుంది. అదే చట్టాన్ని చేతుల్లోకి తీసుకుంటే ? దొంగతనం..వేధించాడని...ఇతరత్రా కారణాలతో కొంతమందిని విచక్షణారహితంగా కొట్టడం చూస్తూనే ఉంటాం. కొన్ని సందర్భాల్లో వారు మరణిస్తుంటారు కూడా. తాజాగా ఓ ప్రజాప్రతినిధి చట్టాన్ని చేతుల్లోకి తీసుకుని యువకుడిని చితకబాదాడు. ఈ ఘటనకు సంబంధించిన ఓ వీడియో సామాజిక మాధ్యమాల్లో వైరల్ అవుతోంది. 
వికాస్ అనే యువకుడు యువతులను వేధిస్తున్నాడనే ఆరోపణలతో ఆప్ ఎమ్యెల్యే సౌరవ్ ఝా..అతడిని చితకబాదాడు. దొడ్డు కర్ర చేత పట్టుకుని వికాస్‌ని చావబాదాడు. ఢిల్లీలోని కిరారీ ప్రాంతంలో ఈ ఘటన చోటు చేసుకుంది. పోలీసులుండగానే ఆ ప్రజాప్రతినిధి రెచ్చిపోవడం విశేషం. ఎమ్యేల్యేనే రెచ్చిపోతే తామెందుకు ఎందుకు కొట్టవద్దని అనుకున్నారో ఏమో అక్కడున్నవారు..వారు కూడా కర్రలు చేత పట్టుకుని వికాస్‌ని చితకొట్టారు. బాధలు భరించలేని వికాస్ అరుపులు పెట్టాడు. అయినా వారు కనికరించలేదు. చివరకు పోలీసులు జోక్యం చేసుకుని వికాస్‌ని అదుపులోకి తీసుకున్నారు. నవంబర్ 14వ తేదీన ఈ ఘటన చోటు చేసుకుందని సమాచారం. 
ఇదిలా ఉంటే కిరారీ ప్రాంతంలో వికాస్..అతని స్నేహితులు యువతులను వేధించే వారని ఝా ఏఎన్ఐ సంస్థకు తెలిపారు. వికాస్‌పైనే కాకుండా..అతని సోదరుడిపై కూడా కేసులున్నాయని..రెండు సంవత్సరాల కిందట ఓ మహిళపై వీరిద్దరూ గ్యాంగ్‌రేప్‌కి పాల్పడ్డారని ఆరోపించారు. ఈ ఆరోపణలను వికాస్ కుటుంబం ఖండించింది. తప్పుడు ఆరోపణలు చేసిన తమకు రూ. 25 లక్షలు పరిహారం చెల్లించాలని డిమాండ్ చేస్తోంది. ఏదైనా క్రైం చేస్తే పోలీసులకు అప్పగించాల్సింది పోయి ఇలా చితకబాదడం ఏంటీ అని వారు ప్రశ్నించారు. నిజనిజాలు త్వరలోనే బయటపడునున్నాయి. 

రాజస్థాన్‌ : బాల్య వివాహాలు చట్టరీత్యా నేరం అనే విషయం తెలిసిందే. బాల్యవివాహాలు చేసినా..ఆ వివాహాలకు హాజరయినా చట్టరీత్యా నేరం. రాజ్యంగం ప్రకారం చట్టసభల్లో చేసిన చట్టం ఈ బాల్యవివాహా చట్టం. కానీ అసెంబ్లీ అభ్యర్థిగా ఎన్నికల్లో పోటీ చేస్తు చట్టవిరుద్ధమైన  వివాదాస్ప హామీలిస్తున్న బీజేపీ మహిళా అభ్యర్థి ఇస్తున్న హామీలు వివాదాస్పదంగాను..సంచలనంగాను మారాయి. చట్టసభకు ప్రాతినిథ్యం వహించేందుకు ఎన్నికల్లో ప్రచారంలో బీజేపీ అభ్యర్థి తనను గెలిప్తే బాల్య వివాహాలను దగ్గరుండి గెలిపిస్తానని, పోలీసుల అడ్డంకి లేకుండా చూస్తానని హామీ ఇవ్వడంతో ప్రజలు అవాక్కయ్యారు. బాల్య వివాహాలు చట్టరీత్యా నేరమని తెలిసినా ఆమె ఈ హామీ ఇవ్వడంతో వివాదాస్పదమైంది.  ఆమె వ్యాఖ్యల వీడియో సోషల్ మీడియాలో వైరల్ అవుతోంది. ప్రత్యర్థులే కాదు, నెటిజన్లు కూడా ఆమెపై దుమ్తెత్తి పోస్తున్నారు. ఎమ్మెల్యేగా బరిలో ఉన్న వ్యక్తి ఇటువంటి దురాచారాలను ప్రోత్సహించడం ఏంటంటూ దుమ్మెత్తి పోస్తున్నారు.

రాజస్థాన్‌లోని సోజత్ నియోజకవర్గం నుంచి శోభ చౌహాన్ బీజేపీ అభ్యర్థిగా పోటీ చేస్తున్నారు. ఆదివారం పీపాలియా ప్రాంతంలో జరిగిన ఎన్నికల ప్రచారంలో పాల్గొన్న ఆమె.. తనను గెలిపిస్తే బాల్య వివాహాలకు ఎటువంటి ఆటంకం కలగకుండా చూస్తానని, పోలీసుల ఇబ్బందులు లేకుండా చర్యలు తీసుకుంటానని హామీలివ్వటం వివాదాస్పదంగా మారింది. అసలే బీజేపీ నేతలు వివాదాస్పద వ్యాఖ్యలు చేస్తుంటారు. ఈ నేపథ్యంలో శోభా చౌహాన్ హామీలు ఇప్పుడు రాజస్థాన్ లో సంచలనంగా మారాయి. మరి ఈ చట్ట వ్యతిరేక హామీలపై ఈసీ ఎటువంటి నిర్ణయం తీసుకుంటుందో వేచి చూడాలి.
 

మధ్యప్రదేశ్‌  : ఎన్నికలు ప్రశాతంగా జరిపింటం ప్రభుత్వ అధికారులకు కత్తిమీద సామువంటిదే. అనంతరం ఎన్నికలు ముగిసిన తరువాత ఈవీఎంల భద్రత అంతకంటే ముఖ్యం. ఎన్నికల ప్రచారం ముగిసిన అనంతరం ఈవిఎంలకు భధ్రత విషయంలో ఓ కలెక్టర్ సంచలన ఆదేశాలకు జారీ చేసారు. ఈవీఎంల భద్రతపై విపక్షాలు ఆందోళన వ్యక్తం చేస్తున్న వేళ, మధ్యప్రదేశ్  రీవా జిల్లా కలెక్టర్ ప్రీతి మైథిలి సంచలన ఆదేశాలు జారీచేశారు. అసెంబ్లీ ఎన్నికలు ముగిసిన అనంతరం ఈవీఎంల భద్రతపై ఆయా పార్టీల నేతలు పలు అనుమానాలను వ్యక్తంచేయటం..ఈవీఎంలు  భద్రపరిచే ప్రాంతంలో సీసీ కెమెరాలు  పనిచేయటకపోవటం వంటి పలు అంశాలపై  పలు అనుమానాలకు తావివ్వగా, ఈవీఎంలు ఉంచిన స్ట్రాంగ్ రూముల్లో రక్షణ సిబ్బందిని పెంచుతున్నామని, ఈవీఎంల దగ్గరకు ఎవరైనా వస్తే వారిని కాల్చిపారేయాలని ప్రీతి మైథిలి ఆదేశించారు. 
రాష్ట్ర రాజధాని అయిన భోపాల్ లోని ఓ స్ట్రాంగ్ రూమ్ లో అమర్చిన సీసీటీవీ కెమెరాలు పని చేయక పోవడంకాంగ్రెస్ నేత అభయ్ మిశ్రాతో పాటు స్ట్రాంగ్ రూమ్‌ లను పరిశీలించిన కలెక్టర్ ప్రీతీ మైథిలి ఈవీఎంలు భద్రంగానే ఉన్నాయని స్పష్టం చేశారు. ఈ ప్రాంతంలోకి ఎవరు వచ్చినా కఠిన చర్యలు ఉంటాయని, 11వ తేదీ వరకూ అనుక్షణం ఈవీఎంలను కాపాడతామని తెలిపారు. అంతగా నిబంధలను ఖాతరు చేయకుండా ఈ ప్రాంతంలోకి వచ్చిన వారిని నిర్ధాక్షిణ్యంగా కాల్చిపారేయమని భద్రతాదారులకు కలెక్టర్ ప్రీతి మైథిలి సంచలన ఆదేశాలను జారీ చేశారు.
 

పీటల మీద  పెళ్లి జరుగుతూ ఉంటుంది..... 
పురోహితుడు పెళ్లి మంత్రాలు  చదువుతూ ఉంటాడు... 
అందరూ అక్షింతలు చేత్తోపుచ్చుకుని నవదంపతుల మీద వెయ్యటానికిసిధ్దంగా ఉంటారు. 
ఇంతలో రఁయ్ మని పోలీసు జీప్ వస్తుంది. 
అందులోంచి ఎస్ఐ దిగి పెళ్లి కొడుకు దగ్గరకు వచ్చి యూఆర్ అండర్ అరెస్ట్ అంటాడు......
పెళ్లి కూతురు కన్నీళ్ళు పెట్టుకుంటుంది.
అందరూ నిర్ఘాంతపోతారు...
భారీ డైలాగులతో ప్రతి అక్షరాన్ని వత్తిపలుకుతూ  పెళ్లి కొడుకు డైలాగులు చెపుతాడు....
ఇదంతా 1980లనాటి తెలుగు సినిమాల్లో  క్లైమాక్స్ సీన్ ....దాదాపు ప్రతి సినిమా ఇలానే ఉండేది. 
ముంబైలో  గత  గత మంగళవారం దాదాపు ఇలానే జరిగింది.  పెళ్లికొడుకును 10వేల రూపాయల సెల్ ఫోన్ చోరీ కేసులో పోలీసులు అరెస్టు చేసి తీసుకువెళ్లారు. ముంబైలో పెళ్లి చేసుకుని ఊరేగింపుగా ఇంటికి వెళుతున్న  పెళ్లికొడుకు అజయ్ సునీల్  ధోతె అనే వ్యక్తిని ఊరేగింపులో ఉండగా అరెస్టు  చేసి తీసుకువెళ్ళారు. పెళ్లి కొడుకుతోపాటు అతని స్నేహితుడు అల్తాఫ్ మీర్జాను కూడా పోలీసులు అరెస్టు చేశారు.
వివరాల్లోకివెళితే  అజయ్, అల్తాఫ్ ఇద్దరుస్నేహితులు .  వీరిద్దరూ ఒక స్నేహితుడి బైక్ తీసుకుని దాని నంబర్ ప్లేట్ పై స్టిక్కర్ అంటించి  చెంబూరు  సమీపంలో వాకింగ్ చేస్తున్న మహిళ  వద్దనుంచి 10వేల రూపాయల విలువైన సెల్ ఫోన్ చోరీ చేసి బైక్ పై  పారిపోయారు. వెంటనే ఆమహిళ తిలక్ నగర్ పోలీసు స్టేషన్ లో ఫిర్యాదు చేసింది. కెసు బుక్ చేసుకున్న పోలీసులు సీసీటీవీ ఫుటేజి పరిశీలించి నిందితులను గుర్తించి  శివాజీ నగర్ లో పెళ్లి ఊరేగింపులో ఉండగా అరెస్టు చేసి వారిపై 392/34  కింద కేసుబుక్ చేసి జైలుకు పంపారు. 

ఒడిషా : పురుషుల హాకీ ప్రపంచకప్‌ 2018 టోర్నమెంట్.. భువనేశ్వర్ లోని కలింగ స్టేడియంలో జరుగుతున్నాయి. టోర్నమెంట్ లో భాగంగా నేడు పూల్ సీలోని నాలుగు జట్లు తలపడనున్నాయి. సాయంత్రం 5 గంటలకు మ్యాచ్ 9లో పూల్ సీలోని కెనడా, దక్షిణాఫ్రికా తలపడనున్నాయి. సాయంత్రం 7 గంటలకు మ్యాచ్ 10లో పూల్ సీలోని ఇండియాను బెల్జియం ఢికొట్టనుంది. 
ప్రారంభ మ్యాచ్ లో భారత్ విజయం..  
అయితే ప్రారంభ మ్యాచ్ లో భారత్ విజయం సాధించిన విషయం తెలిసిందే. భారత హాకీ జట్టు శుభారంభం చేసింది. అద్భుతమైన ప్రదర్శనతో అదరగొట్టింది. ప్రారంభ మ్యాచ్‌లో దక్షిణాఫ్రికాపై విజయం సాధించింది. దక్షిణాఫ్రికాపై 5-0 గోల్స్ తేడాతో భారత్ గెలుపొందింది. భువనేశ్వర్ లోని కలింగ స్టేడియంలో దక్షిణాఫ్రికా, భారత్ మధ్య హాకీ తొలి మ్యాచ్ జరిగింది. టీమిండియాకు సఫారీలు ఏ దశలోనూ పోటీ ఇవ్వలేకపోయారు. బంతి దాదాపుగా భారత్‌ నియంత్రణలోనే ఉంది. సిమ్రన్‌ జీత్‌ 3 నిమిషాల వ్యవధిలో (43 నిమిషాలు, 46 నిమిషాలు) రెండు గోల్స్‌ కొట్టి అదరగొట్టాడు. ఆట ప్రారంభమైన పదో నిమిషంలోనే మన్‌దీప్‌ సింగ్‌ గోల్‌ చేశాడు. మరో రెండు నిమిషాల్లోనే ఆకాశ్‌దీప్‌ గోల్‌ కొట్టి స్కోర్ ను 2-0కు తీసుకెళ్లాడు. సిమ్రన్‌ జీత్‌, లలిత్‌ వెంటవెంటనే 3 గోల్స్‌ చేయడంతో భారత్‌ 5-0తో నిలిచింది. ఆ తర్వాత దక్షిణాఫ్రికాకు అవకాశాలు రాలేదు. ఈ నేపథ్యంలో భారత్ రెండో మ్యాచ్ పై సర్వత్రా ఉత్కంఠ నెలకొంది. 

 

భారత మహిళలు దూసుకుపోతున్నారు. ఆ రంగం ఈ రంగం అని లేకుండా అన్నింటా సత్తా చాటుతున్నారు. మేధస్సులోనే కాదు సాహసాలు చేయడంలోనూ వెనుకాడటం లేదు. కష్టతరమైన విధుల్లోనూ సులభంగా రాణిస్తున్నారు. అందివచ్చిన అవకాశాలను అందిపుచ్చుకుంటూ సాహసంతో సావాసాలు చేస్తూ ఆకాశంలో దూసుకుపోతున్నారు. పురుషులతో పోటీపడుతూ పైలెట్లుగా రాణిస్తున్నారు. సాధారణంగా పైలెట్ జాబ్ అంటే రిస్క్‌తో కూడుకున్నది. అందుకే ఎక్కువగా పురుషులే ఈ జాబ్‌కు వస్తారు. కానీ అతివలు సైతం సై అంటున్నారు. ఎంతో ఇష్టంతో ఈ రంగాన్ని కెరీర్‌గా మలుచుకుంటుననారు ఈ క్రమంలో ప్రపంచంలోనే ఎక్కువమంది మహిళా పైలట్లు ఉన్న దేశంగా భారత్‌ రికార్డు క్రియేట్ చేసింది. దేశంలో మొత్తం 8,797 మంది పైలట్లు ఉంటే.. వారిలో మహిళల సంఖ్య 1,092గా ఉంది. అంటే 12.4శాతం. వీరిలో 355మంది కెప్టెన్లు ఉన్నారు. కాగా ప్రపంచవ్యాప్తంగా చూసుకుంటే ఉమెన్ పైలెట్ల సగటు 5.4శాతంగానే ఉంది. అదే మనదేశంలో ఆ శాతం రెండింతలు ఎక్కువ కావడం విశేషం. ఇంటర్నేషనల్‌ సొసైటీ ఆఫ్‌ విమెన్‌ ఎయిర్‌లైన్‌ పైలట్స్‌ (ఇస్వాప్‌) ఈ లెక్కలు వెల్లడించింది.

ఇస్వాప్ నివేదిక ప్రకారం:
విమానయాన సంస్థ మొత్తం పైలెట్లు మహిళా పైలెట్లు శాతం
ఇండిగో 2,689 351 13.9
జెట్‌ఎయిర్‌వేస్ 1,867 231 12.4
స్పైస్‌‌జెట్ 853 113 13.2
ఎయిరిండియా 1710 217 12.7

ప్రపంచంలో మహిళా పైలట్ల సగటు 5.4%

భారత దేశంలో 12.4%

ఢిల్లీకి చెందిన ‘జూమ్‌ ఎయిర్‌’ అత్యధికంగా మహిళా పైలట్లకు ఉద్యోగాలిచ్చింది. మొత్తం 30మంది పైలట్లలో 9మంది మహిళలే. కాగా, అమెరికాలో మహిళా పైలట్ల సంఖ్య ప్రపంచ సగటు కంటే తక్కువే (4.4%). అమెరికాలోని యునైటెడ్‌ ఎయిర్‌లైన్స్‌లో అత్యధికంగా 7.5% మంది, డెల్టాలో 4.7% మంది మహిళా పైలట్లు పని చేస్తున్నారు. యూకేలో 4.77% మహిళా పైలట్లు ఉన్నారు.

20ఏళ్లలో 7లక్షల 90వేల మంది: భవిష్యత్తులో భారత దేశంలో విమాన ప్రయాణాలూ బాగా పెరుగుతాయని.. రానున్న 20 ఏళ్లలో ప్రపంచవ్యాప్తంగా 7,90,000 మంది పైలట్లు అవసరమని ఓ కంపెనీ అంచనా వేసింది. ఈ నేపథ్యంలో పైలట్ల కొరత ఏర్పడే పరిస్థితి ఉన్నందున భారతీయ కంపెనీలు మహిళల్ని ఎక్కువగా ప్రోత్సహిస్తున్నాయని తెలిపింది. స్త్రీ పురుషుల మధ్య వేతన వ్యత్యాసాలు లేని రంగాలు చాలా తక్కువ. అలాంటి వాటిలో విమానయాన రంగమొకటి.

గౌహతి: అసోంలో శనివారం రాత్రి ఒక రైలు బోగీలోజరిగిన పేలుడువల్ల సుమారు 14 మంది గాయపడ్డారు. కామాఖ్య-డెకర్ గావ్ లమధ్య నడిచే ఇంటర్ సిటీ ఎక్స్ ప్రెస్ రైలులో రాత్రి 7 గంటలసమయంలో పేలుడు సంభవించింది. ఈ ఘటన అసోంలోని ఉదల్ గిరి జిల్లా హరిసింగా రైల్వే స్టేషన్ పరిధిలో జరిగింది. గౌహతి 95కిలోమీటర్ల దూరంలో సంఘటన స్ధలం ఉంది.  రైల్వే పోలీసులు, జీఆర్పీఎఫ్ పోలీసులు ఘటనా స్దలానికి చేరుకున్నారు. గాయపడిన వారిని ఆసుపత్రికి తరలించారు. పేలుడుకు గల కారణాలను పోలీసులు పరిశీలిస్తున్నారు. ఈఘటనకు సంబంధించి పూర్తి సమాచారం అందాల్సిఉంది. 

మన దేశ సైన్యం ప్రపంచ దేశాల సరసననిలబడనుందా.... ఆదునిక ఆయుధ సంపత్తిని సమకూర్చుకుని అత్యంత శక్తివంతమైనదేశంగా భారత్ ఆవిర్భవిస్తోంది. భారత సైన్యంలోకి కొత్త తుపాకులు, బాంబులు, రాకెట్లు వచ్చి చేరనున్నాయి. భారత సైన్యానికి సుమారు రూ.3వేల కోట్ల రూపాయలతో ఆధునిక ఆయుధాల కోనుగోలు చేసేందుకు రక్షణశాఖ శనివారం ఆమోదం తెలిపింది. కేంద్ర రక్షణమంత్రి నిర్మలాసీతారామన్ అధ్యక్షతన సమావేశమైన డిఫెన్స్ అక్విజిష‌న్ కౌన్సిల్‌ స‌మావేశంలో ఈనిర్ణ‌యం తీసుకున్నారు. ఈ నిధులతో  బ్రహ్మోస్  మిసైళ్లతో పాటు యుధ్ద ట్యాంక్ అర్జున్ కోసం డీఆర్డీవో  డిజైన్ చేసి అభివృధ్ది చేసిన ఆర్మౌర్డ్ రిక‌వ‌రీ వెహికిల్స్‌ ఉన్నాయి. వీటిని భారత్ ఎర్త్ మూవర్స్ లిమిటెడ్ ఉత్పత్తి చేస్తోంది. వీటితో పాటు రష్యానుంచి కోనుగోలు చేసే రెండు యుధ్దనౌకల పై బ్రహ్మోస్ క్షిపణులను వాడనున్నారు. ఇవి యుధ్ద నౌకలపై ప్రధాన ఆయుధాలుగా ఉంటాయి. 

ప్రయాగ్ రాజ్: వచ్చే ఏడాది జనవరి నుంచి మార్చిలోపు మీ అబ్బాయిదికానీ అమ్మాయిది కానీ పెళ్లి పెట్టుకున్నారా ? అయితే క్యాన్సిల్ చేసుకోండి......  వెడ్డింగ్ హాలు కూడా బుక్ చేసుకున్నారా ? అయినా సరే  మార్చి తర్వాతకు ముహూర్తాలు మార్చుకోండి. ఏంటిది....అని ఆశ్చర్య పోతున్నారా.....అవును ఇవి ప్రభుత్వ ఆదేశాలు. ఉత్తరప్రదేశ్ లో యోగి ఆదిత్యనాధ్ ప్రభుత్వంలోని ప్రయాగ్ రాజ్ జిల్లా యంత్రాంగం స్ధానిక కళ్యాణమండపాలకు, హోటల్స్ కు పంపిన ఆదేశాల ప్రకారం జనవరి నుంచి మార్చిలోపు బుక్ చేసిన అన్నికార్యక్రమాలు రద్దు చేయమని చెప్పింది. 
కుంభమేళా:
వచ్చేఏడాది ప్రారంభంలో జననరి 15వ తేదీ  నుంచి మార్చి 4వ తేదీ  వరకు ప్రయాగ్ రాజ్ త్రివేణి సంగమంలో (అలహాబాద్) కుంభమేళా జరగనుంది. ఇదికాక ఈ3నెలల కాలంలో వచ్చే6 పవిత్రదినాలైన ..జనవరిలో వచ్చే మకరసంక్రాంతి, పౌష్ పూర్ణిమ, ఫిబ్రవరిలో వచ్చే మౌనిఅమావాస్య, బసంత్ పంచమి.మాఘ పౌర్ణమి, మార్చిలో వచ్చే మహాశివరాత్రి పుణ్యదినాలలో జరిగే స్నానాలకు భారీగా భక్తులు వస్తారు కనుక ఈ 3 నెలల్లో ఎటువంటి వివాహా వేడుకలు పెట్టకోవద్దని ప్రభుత్వం ఆదేశించింది. దీనితో హాళ్లు బుక్ చేసుకున్నవారు వేరే చోట్ల పెళ్లి ఏర్పాట్లు చేసుకుంటున్నారు. కొందరు వివాహాలు వాయిదా వేసుకుంటున్నారు. ఇక ప్రభుత్వ నిర్ణయం వల్ల మొదటి మూడునెలలు వెడ్డింగ్ బిజినెస్ దెబ్బతింటుందని వ్యాపారులు బాధపడుతున్నారు.

ఉత్తరప్రదేశ్ : 'ఛలో అయోధ్య' అనే నినాదంతో..రామ మందిర నిర్మాణమే లక్ష్యంగా విశ్వవేదాంత సంస్థాన్ తన కార్యాచరణను ముమ్మరం చేసింది. ఇందులో భాగంగా అయోధ్యలో అశ్వమేధయాగాన్ని నిర్వహిస్తోంది. ఈరోజు ప్రారంభమైన యాగం నాలుగు రోజుల పాటు కొనసాగి 4వ తేదీన ముగియనుంది. రామ మందిర నిర్మాణం కోసం తమ ఆందోళనను ఉద్ధృతం చేశామని..ఈ ఆందోళన ప్రజా ఆందోళనగా మారడాన్ని ఎవరూ అడ్డుకోలేరని విశ్వవేదాంత సంస్థాన్ అధికార ప్రతినిధి ఆనంద్ జీ మహారాజ్ పేర్కొన్నారు. అయోధ్యలో ఆలయ నిర్మాణంలో జాప్యం సరికాదని అన్నారు. ఆలయ నిర్మాణం తేదీని ప్రధాని మోదీ ప్రకటించాలని ఆనంద్ జీ మహారాజ్ డిమాండ్ చేశారు. ఆలయ నిర్మాణానికి ఈ యాగమే తొలి అడుగని ఆనంద్ జీ మహారాజ్ తెలిపారు.
 

ఢిల్లీ: ఏఐసీసీ అధ్యక్షులు రాహుల్ గాందీ బావ ప్రియాంకా గాంధీ భర్త రాబర్ట్ వాద్రాకు ఈబీ సమన్లు జారీ చేసింది. రాజస్థాన్ సరిహద్దు నగరమైన బికనిర్ మనీలాండరింగ్ భూ కుంభకోణం కేసులో రాబర్ట్ వాద్రాకు ఎన్‌ఫోర్స్‌మెంట్ డిపార్ట్‌మెంట్ సమన్లు జారీ చేసింది. బికనిర్ మనీలాండరింగ్ కేసులో విచారణ అధికారి ఎదుట హాజరుకావాల్సిందిగా వాద్రాకు సమన్లు జారీ అయ్యాయి. కాగా ఈ కేసులో వాద్రాకు సమన్లు జారీ కావడం ఇది రెండోసారి. దాంతో ఈడీ అధికారులు మరోసారి వాద్రాకు సమన్లు జారీ చేశారు. 
ఫోర్జరీ సంతకాలు, తప్పుడు పత్రాలతో బిక్‌నిర్ ప్రభుత్వ స్థలాన్ని కేటాయిస్తూ అక్రమ భూ బదలాయింపులకు పాల్పడ్డారని ఆరోపిస్తూ  బిక్‌నిర్ స్థానిక రెవిన్యూ అధికారి రాజస్థాన్ పోలీసులకు ఫిర్యాదు చేశారు. దీంతో ఈ కేసుతో వాద్రాకు సంబంధముందనే ఆరోపణల నేపథ్యంలో 2015లో కేంద్ర దర్యాప్తు సంస్థ ఆయనపై క్రిమినల్ కేసు నమోదు చేసింది. బిక్‌నిర్‌లోని కోలయాట్ ప్రాంతంలో ఆర్మీ మహాజన్ ఫైరింగ్ రేంజ్ విస్తరణ కోసం కేటాయించిన ప్రభుత్వ స్థలాన్ని తప్పుడు సంతకాలతో అక్రమంగా ప్రైవేటు వ్యక్తులకు కట్టబెట్టినట్టు ఆరోపణలు వెల్లువెత్తాయి.
ఈ కుంభకోణం కేసులో భారీ మొత్తంలో డబ్బులు చేతులు మారాయని, ఫోర్జరీ సంతకాలతో అతి చౌకైన ధరకే ప్రైవేటు వ్యక్తులు స్థలాన్ని కాజేశారని ఈడీ అనుమానిస్తోంది. ఇప్పటికే 18 కేసులు నమోదు చేసిన రాజస్థాన్ పోలీసులు ఛార్జ్‌షీట్‌లను కోలయాట్ కోర్టులో దాఖలు చేశారు. దీంతో రాబర్ట్ వాద్రాకు రెండోసారి ఈడీ సమన్లను జారిచేసింది. మరి ఇప్పుడన్నా వాద్రా ఈడీ ఎదుట హాజరవుతారో లేదో చూడాలి.
 

 

ఢిల్లీ:భారత్ లో నేరం చేసిన నేరగాళ్లు శిక్ష అనుభవించాలంటే దశాబ్దాల కాలం పడుతుందా? అందుకే భారత్ లో నేరాల సంఖ్య పెరుగుతోందా? నేరస్థులకు సకాలంలో సరైన శిక్షలు పడకపోవటం వల్లనే నేరస్థులకు నేరాలను ఉసిగొలుపుతోందా? అంటే నిజమననిపిస్తోంది. దశాబ్దకాలానికి అదికూడా కోర్టు నిందితుడ్ని నేరస్థులుగా తేల్చిన కేసులో. నేరస్థుడ్ని పట్టుకోవటానికి దాదాపు 11 ఏళ్లు పట్టిన ఘటన దేశ రాజధాని ఢిల్లీ జరిగింది. 
2007లో జరిగిన ఓ అత్యాచార ఘటనలో దోషిగా తేలిన వ్యక్తిని ఢిల్లీ నేర విభాగం పోలీసులు ఇప్పుడు  అరెస్టు చేశారు. అఖ్తర్‌ అనే వ్యక్తి పదకొండేళ్ల క్రితం 14 ఏళ్ల ఓ బాలికను కిడ్నాప్‌ చేసి అత్యాచారానికి పాల్పడి తప్పించుకొని తిరుగుతున్నాడని పోలీసులు తెలిపారు. 2008లోనే కోర్టు ఇతన్ని దోషిగా తేల్చింది. అప్పటి నుంచి అఖ్తర్‌ను పట్టుకొనేందుకు తీవ్రంగా శ్రమించిన పోలీసులు 2014లో అతనిపై రూ.25 వేల రివార్డు సైతం ప్రకటించారు. అయినా పోలీసులకు చిక్కకుండా తిరుగుతున్న  అఖ్తర్ ను పోలీసులు ఎట్టకేలకు అరెస్ట్ చేశారు. మరి ఇప్పటికైనా శిక్షను అమలు చేస్తారో లేదో వేచి చూడాలి. 
 

సూతాహట్‌ (పశ్చిమ బెంగాల్‌) :  గ్రామ పెద్దల అరాచకానికి వారి మూర్ఖత్వానికి ఓ చిన్నారి భూమి మీదకు రాకుండానే తల్లి కడుపులోనే అంతమైపోయింది. అటవిక తీర్పులతో మహిళలను అణచివేసే ఘటనలు దేశవ్యాప్తంగా కొనసాగుతునే వున్నాయి. పరువు కోసం ఒకచోట..పంతం కోసం మరోచోట...ఆధిపత్యం కోసం..అణిచివేత ధోరణితో ఓ గర్భిణి పట్ల గ్రామ పెద్దలు ఇచ్చిన తీర్పుతో ఓ గర్భిణి గర్భవిచ్ఛిత్తికి కారణమైంది. అంతేకాదు ఆమె ప్రాణాలమీదకు వచ్చింది సదరు గ్రామ పెద్దలు ఇచ్చిన తీర్పు. ఆలస్యంగా వెలుగుచూసిన ఈ అమానుష ఘటనరాష్ట్రానికి చెందిన తూర్పు మిడ్నాపూర్‌ జిల్లా హల్దియా పరిధిలోని సూతాహట్‌లో చోటు చేసుకుంది.  
 మనుషులమనే మాట మరిచి ఆటవిక తీర్పుతో గర్భంతో వున్న మహిళతో గుంజీలు తీయించి ఆమె గర్భస్రావానికి కారణమయ్యారు పంచాయతీ పెద్దలు. గ్రామానికి చెందిన ఓ మహిళ తమతో దురుసుగా ప్రవర్తించిందని కొందరు యువకులు గ్రామపెద్దలకు ఫిర్యాదు చేశారు. దీంతో హుటా హుటిన రాత్రికి రాత్రే గ్రామపెద్దలు సభ ఏర్పాటు చేసి ఆ మహిళను పిలిపించి తప్పు చేసినట్లు నిర్థారించేశారు. అంతేకాదు శిక్షకూడా వేసారు. 
గర్భంతో వున్న ఆ మహిళతో వంద గుంజీలు తీయాలని ఆదేశించారు. గర్భవతినని ఆమె చెప్పినా వారు పట్టించుకోలేదు. గుంజిళ్లు తీయాల్సిందేనని ఖరాఖండీగా తేల్చి చెప్పారు. దీంతో తప్పనిసరి పరిస్థితిలో ఆమె వంద గుంజీలు తీసింది. దీంతో ఆమె ఆరోగ్యం దెబ్బతినడంతో హల్దియా ఆసుపత్రిలో చేర్పించగా..అదేరోజు గర్భస్రావమైంది. ఈ విషయాన్ని బాధితురాలి తల్లి కన్నీరుమున్నీరవుతు హల్దియా పోలీస్‌స్టేషన్‌లో  ఫిర్యాదు చేసారు. కాగా ఈ ఘటనపై పోలీసులు మాత్రం ఇంత వరకూ  ఎవరినీ అరెస్టు చేయకపోవటం గమనించాల్సిన విషయం.
 

పెట్రో ధరలు వాహనదారుల వెన్నులో వణుకుపుట్టించిన సంగతి తెలిసిందే. రోజురోజుకి పెరుగుతూ పోయిన పెట్రోల్, డీజిల్ ధరలు.. ఒకానొక సమయంలో సెంచరీ కొడతాయా? అనే భయం కలిగించాయి. ఆ తర్వాత అనూహ్యంగా పెట్రో ధరలు తగ్గుముఖం పట్టాయి. గత ఆరు వారాలుగా ఇదే ట్రెండ్ నడుస్తోంది. దీంతో వాహనదారులు ఊపిరిపీల్చుకున్నారు. అంతర్జాతీయంగా ముడిచమురు ధరలు తగ్గడంతో.. దేశీయంగా కూడా పెట్రోలు, డీజిల్ ధరలు తగ్గాయి. కాగా ఐదు రాష్ట్రాల ఎన్నికల నేపథ్యంలో వ్యతిరేకత రాకూండా ఉండేందుకు ధరలు తగ్గించారనే వాదన కూడా వినిపిస్తోంది.
45 రోజుల్లో రూ.10 తగ్గింపు:
చెన్నై, కోల్‌కతా లాంటి మెట్రో నగరాల్లో 45 రోజుల్లో 10రూపాయల వరకు పెట్రో ధరలు తగ్గడం విశేషం. దేశ రాజధాని ఢిల్లీలో 33పైసలు తగ్గిన లీటర్ పెట్రోలు ధర రూ.72.53 కి చేరగా, వాణిజ్య రాజధాని ముంబైలో 34పైసలు తగ్గిన పెట్రోలు ధర రూ.78.05కి చేరింది. కోల్‌కతాలో లీటర్ పెట్రోల్ ధర రూ.72.55గా ఉంది. ఇదే కోల్‌కతాలో అక్టోబర్ 17న లీటర్ పెట్రోల్ ధర రూ.84.65గా నమోదైంది. చెన్నైలోనూ 45రోజుల వ్యవధిలో రూ.10.10పైసల వరకు పెట్రోల్ ధర తగ్గింది. ప్రస్తుతం రూ.75.26గా ఉంది. మొత్తంగా తగ్గుముఖం పెట్టిన చమురు ధరలతో వాహనదారులు రిలాక్స్ అయ్యారు.

నగరం గత 45 రోజుల్లో తగ్గిన ధర(లీటర్‌పై)
ఢిల్లీ రూ.10.30
కోల్‌కతా రూ.10.10
చెన్నై రూ.10.84
ముంబై రూ. 9.99

మహారాష్ట్ర : కలకాలం తోడునీడుగా ఉండాల్సిన భర్త భార్యపై దారుణానికి ఒడిగట్టాడు. కంటికి రెప్పలా కాపాడుకుంటానని పెళ్లి పీటల సాక్షిగా చేసిన వాగ్ధానాన్ని మరిచాడు. ఆమె ప్రాణాలకే ముప్పు తెచ్చాడు. ఎవరైనా తమ భార్య అనారోగ్యానికి గురైతే..ఆస్పత్రికి వెళ్లి చికిత్స చేయిస్తారు. కానీ ఓ మూర్ఖపు భర్త తన భార్యకు హెచ్‌ఐవీ వైరస్‌ ఎక్కిచ్చాడు. ఆమెను అనారోగ్యానికి గురి చేశాడు. తన భర్త తనకు హెచ్‌ఐవీ వైరస్‌ను ఎక్కిచ్చాడని పేర్కొంటూ ఓ మహిళ పోలీసులకు ఫిర్యాదు చేసింది. తన డాక్టర్ భర్తే స్లైన్ ద్వారా ఈ వైరస్‌ను శరీరంలో చొప్పించినట్లు ఆమె ఫిర్యాదులో పేర్కొంది. ఈ ఘటన పూణెలో చోటుచేసుకుంది. 

పోలీసుల వివరాల ప్రకారం...మహారాష్ట్రలో మహిళకు హోమియోపతి వైద్యుడైన వ్యక్తితో 2015లో వివాహమైంది. భర్త, అతని తల్లిదండ్రులు  కట్నం కోసం ఆమెను వేధించేవారు. అక్టోబర్ 2017లో ఆమె అనారోగ్యానికి గురైనప్పుడు ఇంట్లోనే భర్త ఆమెకు స్లైన్ పెట్టాడు. ఈ ఏడాది ఫిబ్రవరిలో ఆమె మరోసారి అనారోగ్యానికి గురైంది. దీంతో ఆమె పరీక్షలు చేయించుకుంటే హెచ్‌ఐవీ పాజిటివ్ గా రిపోర్టు వచ్చింది. అయితే తన భర్తే తనకు ఈ వైరస్ ఎక్కించాడని బాధిత మహిళ ఆరోపించింది. అతడు ఇప్పుడు ఆమె నుంచి విడాకులు కోరుతున్నాడు. ఫిర్యాదు స్వీకరణ అనంతరం భార్యభర్తలను హెచ్‌ఐవీ పరీక్షలకు ప్రైవేట్ ల్యాబ్‌కు  పంపారు. పరీక్షలో ఇద్దరికీ హెచ్‌ఐవీ ఉందని తేలింది. కాగా ప్రభత్వం ఆధ్వర్యంలో నడిచే కేంద్రానికి పంపగా భార్యకు మాత్రమే వైరస్ ఉన్నట్లు వచ్చిందన్నారు. నిందితుడిపై సెక్షన్ 328 (పాయిజన్ ద్వారా గాయపర్చడం), సెక్షన్ 498(వరకట్న వేధింపులు)ల కింద పోలీసులు కేసులు నమోదు చేశారు.

రాయ్‌పూర్ (ఛత్తీస్‌గఢ్) : భద్రతా దళాలను లక్ష్యంగా చేసుకున్న మావోయిస్టులు కొత్త కొత్త వ్యూహాలను అనుసరిస్తు..వారిని ముప్పు తిప్పలు పెడుతున్నారు. భద్రతాదళాల దృష్టి మళ్లించేందుకు..వారిపై దాడి చేసేందుకు మావోయిస్టులు వ్యూహాలను పన్నుతున్నారు. ఈ నేపథ్యంలో  సెర్చ్ ఆపరేషన్‌ సమయంలో భద్రతా దళాలను తప్పుదోవ పట్టించేందుకు అచ్చం మావోయిస్టుల్లా ఉండే దిష్టిబొమ్మలను పెట్టి..చెట్టుచాటు నుండి తుపాకీలను ఎక్కు పెట్టినట్లుగా మావోలు  బురిడి కొట్టిస్తున్నారు. అడవుల్లో సెర్చ్  ఆపరేషన్ సమయంలో భద్రతా దళాలు దిష్టిబొమ్మలను చూసి నిజమైన మావోయిస్టులుగా భ్రమపడ్డారు. సెర్చ్ ఆపరేషన్‌లో భాగంగా 15వ బెటాలియన్, సీఆర్పీఎఫ్ బలగాలు సుక్మా జిల్లాలోని చింతగుఫా ప్రాంతంలో నకిలీ నక్సలైట్ల దిష్టిబొమ్మలను, డమ్మీ తుపాకీలను స్వాధీనం చేసుకున్నారు. కాగా మావోల వ్యూహాన్ని మొదట గందరగోళంలో పడినా భద్రతాదళాలు వాటిని గుర్తించాయి. 
మావోయిస్టులు పెట్టిన మూడు నకిలీ దిష్టిబొమ్మలకు సమీపంలో ఒకదాని పక్కన ఎల్‌ఈడీ మందుపాతర ఉన్నట్టు పోలీసులు గుర్తించి నిర్వీర్యం చేశారు. నక్సల్స్ దిష్టిబొమ్మలను, బొమ్మ తుపాకీలను చెట్టుకు తగిలించినట్టుగా గుర్తించామని సీఆర్పీఎఫ్ కమాండర్ డి సింగ్ వెల్లడించారు. ఇటీవల సుక్మా జిల్లాలోని సక్లర్ గ్రామంలో సోమవారం జరిగిన ఎన్‌కౌంటర్ ఆపరేషన్‌లో ఎనిమిది మంది నక్సల్స్‌ను భద్రతా దళాలు మట్టుబెట్టాయి. 
 

అంతా బూడిదలో పోసిన పన్నీరు అయింది.. అని తరుచుగా అంటుంటాం. మనం చేసిన కష్టం వృథా అయినప్పుడు ఇలా అనడం తెలిసిందే. అంటే బూడిద ఎందుకూ పనికిరాదని లెక్కకట్టడం అన్నమాట. ఇక ముందు అలా అనేముందు కొంచెం ఆలోచించాల్సిందే. ఎందుకంటే బూడిద కారణంగా 5లక్షల రూపాయలు మీ సొంతం కానున్నాయి. బూడిద ఏంటి? 5లక్షలు ఏంటి? అని డౌట్ వచ్చిందా?
ఫస్ట్ ప్రైజ్ 5లక్షలు:
వివరాల్లోకి వెళితే.. ఎన్టీపీసీ అధికారులు ఓ ప్రకటన విడుదల చేశారు. బూడిద వినియోగం గురించి వారు ఓ కాంపిటిషన్ పెట్టారు. బూడిద వినియోగంపై ఐడియాలు చెప్పాలని ఆహ్వానించారు. ప్రకృతి సిద్ధంగా బూడిదను వినియోగించే పద్ధతులను తెలపాలన్నారు. అయితే ఫ్రీగా ఐడియాలు చెప్సాల్సిన అసవరం లేదు. దానికి ప్రైజ్ మనీ కూడా ప్రకటించారు. ఫస్ట్ ప్రైజ్ కింద రూ.5లక్షలు, సెకండ్ ప్రైజ్ కింద రూ.2లక్షలు, కాన్సొలేషన్ ప్రైజ్ మనీ కింద ఇద్దరికి చెరో లక్ష రూపాయలు ఇస్తామన్నారు.
ఇలా ఐడియాలు చెప్పొచ్చు:
వ్యక్తులు, బృందాలు, ఎన్జీవోలు, ప్రొఫెషనల్స్, రీసెర్చ్ చేసేవాళ్లు, సైంటిస్టులు, సంస్థలు, ఆర్గనైజషన్లు, బిజినెస్ స్కూల్స్, స్టార్టప్స్ ఇలా ఎవరైనా ఇందులో పాల్గొనవచ్చు. డిసెంబర్ 1వ తేదీ నుంచి 24వ తేదీ వరకు ఐడియాలు స్వీకరిస్తారు. 2019 జనవరి 15 తర్వాత అధికారులు విజేతల పేర్లను ప్రకటిస్తారు.
బొగ్గుతో నడిచే విద్యుత్ కేంద్రాల్లో 60మిలియన్ టన్నులు బూడిద ఉత్పత్తి అవుతోంది. గుట్టగుట్టలుగా పేరుకుపోతున్న బూడిద కారణంగా అనేక సమస్యలు ఎదురవుతున్నాయి. బూడిద వ్యవహారం అధికారులకు పెద్ద తలనొప్పిగా మారింది. దీంతో ఈ సమస్యను పరిష్కరించేందుకు అధికారులు చర్యలు చేపట్టారు. జనవరి 15 తర్వాత ఎన్టీపీసీ అధికారులు విజేతల వివరాలు వెల్లడిస్తారు. దీనికి సంబంధించిన పూర్తి వివరాలను ఎన్టీపీసీ అధికారిక వెబ్‌సైట్‌ https://mapp.ntpc.co.in/ashcontest/ లో ఉంచారు. సో ఇంకెందుకు ఆలస్యం.. మీ దగ్గర మంచి ఐడియా ఉంటే.. వెంటనే షేర్ చేయండి మరి.

ఢిల్లీ : ఆసుపత్రుల మధ్య డ్రోన్స్ రాకపోకలకు సంబంధించి కేంద్ర ప్రభుత్వం కొత్త డ్రోన్ విధానాన్ని తీసుకురానుంది. దీంతో ఒక ఆస్పత్రిలో దాత నుంచి సేకరించిన అవయవాలను నిమిషాల వ్యవధిలో మరో ఆస్పత్రిలోని రోగికి అమర్చే అవకాశం ఉంది. ఒకచోటి నుంచి మరోచోటుకు అత్యవసర పరిస్థితుల్లో మందులను అప్పటికప్పుడు చేరవేయవచ్చు. కేంద్ర ప్రభుత్వం త్వరలో తీసుకురానున్న కొత్త డ్రోన్ ద్వారా ఈ రెండు ఘటనలు వాస్తవరూపం దాల్చనున్నాయి. ఈ విషయమై పౌరవిమానయన సహాయ మంత్రి జయంత్ సిన్హా మాట్లాడారు. ఆసుపత్రుల మధ్య డ్రోన్ల రాకపోకల కొత్త డ్రోన్ విధానానికి సంబంధించి నేటి నుంచి రిజిస్ట్రేషన్ ప్రక్రియ ప్రారంభం కానుందని తెలిపారు. దరఖాస్తులు స్వీకరించిన నెల రోజుల తర్వాత డ్రోన్ల వినియోగానికి లైసెన్స్ లు జారీ చేస్తామని పేర్కొన్నారు.

ఈ కొత్త విధానానికి సంబంధించిన నిబంధనలను 2019, జనవరి 15న భారత్ లోని ముంబైలో జరిగే ప్రపంచ విమానయాన సదస్సులో విడుదల చేస్తామని తెలిపారు. దేశ వ్యాప్తంగా కొన్ని ప్రాంతాల్లో డ్రోన్ల ప్రయాణ దూరాన్ని విస్తరించే అంశాన్ని పరిశీలిస్తున్నామని చెప్పారు. అంతేకాకుండా కొత్త డ్రోన్ విధానంలో భాగంగా సరుకుల రవాణాకు ఒకే ఆపరేటర్ బహుళ డ్రోన్లను వినియోగించే విషయాన్ని కూడా ప్రభుత్వం పరిశీలిస్తుందని తెలిపారు. ఈ ఏడాది ఆగస్టులో భారత్ తొలి డ్రోన్ విధానాన్ని, నియమనిబంధనల్ని ప్రకటించిన సంగతి తెలిసిందే. 

మరోవైపు విమానయాన శాఖ మంత్రి సురేష్ ప్రభు స్పందిస్తూ సహాయక చర్యలు, ఏరియల్ సర్వే, పంటల అంచనా, సరుకుల చేరవేత తదితర రంగాల్లో డ్రోన్ల సేవలను గణనీయంగా వాడుకోవచ్చన్నారు. వీటి వినియోగానికి డిజిటల్ ’కీ’ని జారీ చేస్తామని.. ఓటీసీ ద్వారా రిజస్టర్ అయ్యాక మాత్రమే డ్రోన్లు టేకాఫ్ కాగలవు అన్నారు. 

హైదరాబాద్: యునైటెడ్ అరబ్ ఎమి రేట్స్ (యూఏఈ) నుంచి భారత్ వరకు అండర్‌వాటర్ హైస్పీడ్ రైలును తీసుకొచ్చేందుకు సన్నాహాలు చేస్తున్నారు. ఈ రైలు కార్యరూపం దాలిస్తే భారతీయులు త్వరలోనే అండర్‌వాటర్ రైలు ప్రయాణాన్ని కూడా చేయబోతున్నారు. అరబ్ ఎమిరేట్స్ కు వెళ్లాలంటే విమానంమీదనే వెళ్లే పరిస్థితి వుండేది. ఈ నేపథ్యంలో అండర్ వాటర్ ట్రైన్ ఇటు భారతీయులకు, అటు అరబ్ ఎమిరేట్స్ ప్రజలకు మంచి మజా ఇవ్వనుంది. 
యూఏఈలోని ఫుజురాయ్ నగరం నుంచి ముంబయి వరకు అండర్ వాటర్ ట్రైన్ రహదారిని నిర్మించే యోచన చేస్తున్నటు యూఏఈకి చెందిన నేషనల్ అడ్వైజర్ బ్యూరో కంపెనీ తెలిపింది. ఈ విషయాన్ని సదరు కంపెనీ ఎండీ అబ్దుల్లా అల్షేహి వెల్లడించారు. ఈ మేరకు దుబాయ్‌కు చెందిన ఖలీజ్ టైమ్స్ ఓ కథనాన్ని ప్రచురించింది. ‘భారత్‌లోని ముంబయి నుంచి ఫుజురాయ్ నగరాన్ని కలుపుతూ నీటి అడుగున హైస్పీడ్ రైలును తీసుకొచ్చేందుకు ప్రణాళికలు సిద్ధం చేస్తున్నాం. ఇరు దేశాల మధ్య ద్వైపాక్షిక సంబంధాలు మరింత మెరుగుపడేందుకు ఈ ప్రాజెక్టు దోహదం చేయనుంది. భారత్ నుంచి ఎగుమతులు, దిగుమతులు చేసుకునేందుకు ఇది చక్కగా ఉపయోగపడ నుంది’ అని అబ్దుల్లా చెప్పినట్లు ఖలీజ్ టైమ్స్ తన కథనంలో పేర్కొంది. నీటి అడుగున సొరంగ మార్గం నిర్మించి దాని ద్వారా రైలు నడిచే విధంగా ఏర్పాటు చేయనున్నారు. 
దాదాపు 2000 కిలోమీటర్ల మేర ఈ రైలు నెట్‌వర్క్ ఉండనుంది. ప్రయాణికులతో పాటు ఇరు దేశాల మధ్య ఎగుమతులు, దిగుమతులు సులభతరం అయ్యే విధంగా ఈ రైలు ప్రాజెక్టును రూపొందించేందుకు ప్రయత్నాలు చేస్తున్నారు. ఇప్పటికే ఇటు వంటి రైళ్లను ప్రజలకు అందుబాటులోకి తీసుకొచ్చేందుకు చైనా, జపాన్‌లో సన్నాహాలు జరుగుతున్నాయి. కాగా త్వరలోనే ఆస్ట్రేలియా, అమెరికా, ఇజ్రాయెల్, బ్రిటన్ వంటి దేశాలు కూడా ఇటువంటి రైల్వే వ్యవస్థను తీసుకురావాలనే యోచన చేస్తున్నాయి.
   

 

ఢిల్లీ : తెలంగాణ రాష్ట్రంతో పాటు మరో నాలుగు రాష్ట్రాల (ఛత్తీస్ గడ్, మిజోరాం, మధ్యప్రదేశ్, రాజస్థాన్)కు ఎన్నికలు జరుగనున్నాయి. ఎన్నికల ప్రభావం ట్విట్టర్‌పై పడింది. ఓటర్లతో మాట్లాడేందుకు..ప్రత్యర్థులు చేస్తున్న విమర్శలపై స్ట్రాంగ్ కౌంటర్ ఇచ్చేందుకు వివిధ పార్టీలు..క్యాండెట్స్ ట్విట్టర్‌‌ని విస్తృతంగా ఉపయోగించుకుంటున్నారు. గత రెండు నెలల్లోనే రికార్డు స్థాయిలో 48 లక్షలకు పైగా ట్వీట్లు నమోదైనట్లు ట్విట్టర్ పేర్కొంది. పెద్ద పెద్ద పార్టీల నేతలు...ప్రాంతీయ పార్టీలు..రాజకీయ నిపుణులు..యువత...మీడియా కూడా ట్విట్టర్‌ను వేదికగా చేసుకుంటున్నారని ట్విట్టర్ పేర్కొంది. ఈ మేరకు మహిమ కౌల్ వెల్లడదించారు. రాజకీయవేత్తలకు ఓటర్లకు ట్విట్టర్‌ అనుసంధాన కర్తగా వ్యవహరిస్తున్నదన్నారు. దాదాపు నాలుగు మిలియన్ల ట్వీట్లు అసెంబ్లీ ఎన్నికల నేపథ్యంలో ఉన్నాయని..పేర్కొన్నారు. అసెంబ్లీ ఎన్నికల నేపథ్యంలో ట్విట్టర్ ఒక ఏమోజీని #AssemblyElections2018 కూడా లాంఛ్ చేసింది. ఇది డిసెంబర్ 23వరకు అమల్లో ఉండనుంది. 

అగ్రరాజ్యం అమెరికాలో భారత మహిళలు సత్తా చాటారు. టెక్నాలజీ రంగంలో అద్భుతమైన టాలెంట్‌తో దూసుకుపోతున్నారు. అమెరికాలో టెక్నాలజీ రంగంలో టాప్ 50మంది మహిళల్లో నలుగురు భారత సంతతి చెందిన మహిళలకు స్థానం లభించింది. ఫోర్బ్స్‌ సంస్థ అమెరికాలోని టాప్‌ 50 ఫిమేల్‌ టెక్నాలజీ మొఘల్స్‌ 2018 పేరుతో జాబితాను విడుదల చేసింది. సిస్కో మాజీ చీఫ్‌ టెక్నాలజీ ఆఫీసర్‌ పద్మశ్రీ వారియర్‌, ఉబర్‌ సీనియర్‌ డైరెక్టర్‌ కోమల్‌ మంగ్తాని, కన్‌ఫ్లుయెంట్‌ సహవ్యవస్థాపకురాలు, చీఫ్‌ టెక్నాలజీ ఆఫీసర్‌ నేహా నర్ఖడే, ఐడెంటిటీ మేనేజ్‌మెంట్‌ కంపెనీ 'డ్రాబ్రిడ్జ్‌' వ్యవస్థాపకురాలు, సీఈఓ కామాక్షి శివరామకృష్ణన్‌ వారిలో ఉన్నారు. ఐబీఎం సీఈవో గిన్ని రోమెట్టి, నెట్‌ఫ్లిక్స్‌ ఎగ్జిక్యూటివ్‌ అన్నే ఆరన్‌ వంటి టెక్నాలజీ దిగ్గజాలూ ఈ జాబితాలో ఉన్నారు. టెక్నాలజీ రంగంలోని 50 మంది అగ్రగామి మహిళలను గుర్తించే జాబితాను ఫోర్బ్స్‌ రూపొందించడం ఇదే ప్రథమం. మూడు తరాలకు చెందిన టెక్‌ దిగ్గజాలను ఇందులో పరిగణనలోకి తీసుకున్నారు.

Pages

Don't Miss