National News

బెంగళూరు: ప్రకృతి అందాలకు కేరాఫ్ హిమాలయాలు. మంచుతో కనువిందు చేసే హిమాలయాలను చూస్తే మనసు పులకిస్తుంది. అలాంటి మంచుకొండలకు సంబంధించి శాస్త్రవేత్తలు ఓ షాకింగ్ న్యూస్ వినిపించారు. మధ్య హిమాలయాల ప్రాంతంలో ఏ క్షణంలోనైనా పెను విధ్వంసం సృష్టించే భారీ భూకంపం వస్తుందని హెచ్చరించారు. భూకంప తీవ్రత రిక్టర్ స్కేల్‌ ఏకంగా 8.5 కంటే ఎక్కువ నమోదవుతుందని తెలిపారు. బెంగళూరులోని జవహర్‌లాల్‌ నెహ్రూ సెంటర్‌ ఫర్‌ అడ్వాన్స్‌డ్‌ సైంటిఫిక్‌ రీసెర్చ్‌లో భూకంప శాస్త్రవేత్తగా ఉన్న రాజేంద్రన్‌ బృందం ఈ నివేదికను విడుదల చేసింది.
విపరీతమైన ఒత్తిడి:
భూపొరల్లో కదలికలు, ఘర్షణల ఫలితంగా హిమాలయాల ప్రాంతంలో విపరీతమైన ఒత్తిడి పెరిగిందని శాస్త్రవేత్తలు వెల్లడించారు. 9వేల మందిని బలిగొన్న 2015 నాటి నేపాల్ భూకంప తీవ్రత 8.1 కాగా, 13వేల మందిని పొట్టనబెట్టుకున్న 2001 నాటి గుజరాత్ విలయ తీవ్రత 7.7. వాటికి మించిన భూకంపం ఏ క్షణంలోనైనా హిమాలయాల్లో రావొచ్చని శాస్త్రవేత్తల అధ్యయనంలో తేలడం కలకలం రేపుతోంది.
భారీగా ప్రాణ నష్టం?
క్రీస్తు శకం 1315–1440 మధ్యకాలంలో మధ్య హిమాలయాల ప్రాంతంలో 8.5 తీవ్రతతో భీకరమైన భూకంపం సంభవించినట్టు తమ పరిశోధనలో తేలిందని సైంటిస్టు రాజేంద్రన్‌ తెలిపారు. దీని కారణంగా ఈ ప్రాంతంలో 600 కి.మీ పొడవైన పగులు ఏర్పడిందన్నారు. ప్రకంపనల వల్ల పర్వతాలు 15 మీటర్లు పక్కకు జరిగాయన్నారు. హిమాలయాల్లో 2015, ఏప్రిల్‌లో 7.8తీవ్రతతో వచ్చిన భూకంపం కారణంగా దాదాపు 9వేల మంది ప్రాణాలు కోల్పోయారని అన్నారు. ఈ ప్రాంతంలో 8.5 అంతకంటే ఎక్కువ తీవ్రతతో భూకంపం సంభవించి 600 నుంచి 700 ఏళ్లు గడిచిపోయాయని పేర్కొన్నారు. జనాభా క్రమంగా పెరుగుతున్నందున ఇలాంటి ప్రకృతి విపత్తు సంభవిస్తే నష్టం ఊహకు అందని రీతిలో ఉంటుందని శాస్త్రవేత్తలు చెప్పారు. నేపాల్‌తో పాటు ఉత్తరాది రాష్ట్రాల్లో భారీ ఆస్తి, ప్రాణనష్టం సంభవిస్తుందని హెచ్చరించారు. 2004లో సునామీ రాకను కచ్చితంగా అంచనా వేసిన పుణెకు చెందిన భూకంప శాస్త్రవేత్త అరుణ్‌ బాపట్‌ కూడా దీనిపై స్పందించారు. ఈ ఏడాది చివర్లో లేదా 2019 ఆరంభంలో భారీ భూకంపం సంభవించే అవకాశం ఉందని చెప్పారు.

తాను అధికారంలో ఉన్న రాష్ట్రంలో ఊళ్లపేర్లను ఇష్టం వచ్చినట్లు మార్చేస్తున్న ఉత్తర ప్రదేశ్ ముఖ్యమంత్రి యోగీ ఆదిత్యనాధ్ రాజస్ధాన్ ఎన్నికల ప్రచారంలో వివాదాస్పదస్పద వ్యాఖ్యలు చేశారు. హనుమంతుడు దళిత గిరిజనుడు అని యోగి అన్నారు. రాముడ్ని పూజించే వాళ్లంతా బీజేపీ కి ఓటు వేయాలని ఆయన కోరారు. రావణాసురుడ్ని కొలిచే వారే కాంగ్రెస్ కు ఓటు వేస్తారని ఆయన అన్నారు. రాజస్ధాన్ లోని మల్ పురా నియోజక వర్గంలో జరిగిన ఎన్నికల ప్రచార సభలో ఆదిత్యనాధ్ మాట్లాడుతూ... హనుమంతుడు గిరిజనుడు  ఆయన అడవిలో నివసించేవాడు, రాముడి కోరిక మేరకు హనుమంతుడు  దేశంలోని అన్ని ప్రాంతాల ప్రజలను ఏకం చేయడానికి ప్రయత్నించాడు. మేము కూడా రాముడి కోరికను నెరవేర్చేదాకా నిద్రపోమని ఆయన తెలిపారు. కాగా ....  కోట్లమంది భక్తులు ఆరాధించే ఆంజనేయుడికి  కులం అంటకట్టటం ఏంటని హనుమంతుడి భక్తులు యోగి వ్యాఖ్యలపై ఆగ్రహం వ్యక్తం చేస్తున్నారు.  

ఢిల్లీ: వంట గ్యాస్ వినియోగదారులకు శుభవార్త. గత కొన్నిరోజులుగా పెరుగుతూ వస్తున్న ఎల్పీజీ వంటగ్యాస్ సిలిండర్ ధరపై రూ.6.52 పైసలు తగ్గిస్తూ ఇండియన్ ఆయిల్ కార్పోరేషన్ నిర్ణయం తీసుకుంది. తగ్గించిన ధరలు ఈ శుక్రవారం అర్ధరాత్రి నుంచి అమల్లోకి వస్తాయి. గడిచిన ఆరు నెలల కాలంలోవంటగ్యాస్ ధర రూ.14.13 పెరిగింది. ప్రస్తుతం 14.2కేజీల సబ్సిడీ ఎల్‌పీజీ సిలెండరు ధర ఢిల్లీలో రూ.507.42గా ఉండగా, ధర తగ్గడంతో ఈఅర్ధరాత్రి నుంచి సిలెండరు ధర రూ.500.90కి రానుంది. ఇక సబ్సిడీయేతర సిలిండర్ ధరను కూడా రూ.133 తగ్గిస్తున్నట్లు ఐఓసీ వెల్లడించింది. ఢిల్లీలో సబ్సిడీయేతర ఎల్పీజీ సిలిండర్ ధర రూ.942.50కాగా ధర తగ్గిన తర్వాత రూ.809.50 కి లభిస్తుంది. అంతర్జాతీయంగా చమురు ధరలు పడిపోవటంతో ఎల్పీజీ సిలిండర్ ధరలు తగ్గిస్తున్నట్లు ఐఓసీ తెలిపింది. 

పనాజి: గత కొంతకాలంగా అనారోగ్యంతో ఉండి చికిత్స పొందిన గోవా ముఖ్యమంత్రి మనోహర్ పారికర్ ను మార్చే ప్రసక్తిలేదని ఆరాష్ట్ర వ్యవసాయశాఖ మంత్రి, అధికార బీజేపీ మిత్రపక్షమైన గోవా ఫార్వర్డ్ పార్టీ చీఫ్ విజయ్ సర్దేశాయ్ స్పృష్టం చేశారు." నేను ఇటీవలే ఆయన్ను చూసి వచ్చానని, ఆయన ఆరోగ్యంగానే ఉన్నారని ఇంక ఆయన్ను మార్చాల్సిన అవసరం ఏముందని" సర్దేశాయ్ ప్రశ్నించారు. పారికర్ ఆరోగ్య పరిస్ధితి సరిగా లేకపోవటం చేత పాలన కుంటుపడుతోందని,ఆయన్ని పదవినుంచి తొలగించి వేరే వారిని నియమించాలని నిపక్షాలు ఇటీవల ఆయన ఇంటి ముందు ధర్నాకూడా చేశాయి.  
కొంతకాలం క్రితం ప్యాంక్రియాటిక్ వ్యాధితో బాధపడుతున్న మనోహర్ పారికర్ అమెరికా లో వైద్యం చేయించుకు వచ్చిన తరువాత, ఢిల్లీలోని ఎయిమ్స్ లో కూడా చికిత్స చేయించుకుని వైద్యుల సూచన మేరకు ఇంటి వద్దనుంచే పాలన కొనసాగిస్తున్నారు. 

 

ఢిల్లీ : టీడీపీ ఎంపీ సుజనా చౌదరికి హైకోర్టులో చుక్కెదురయ్యింది. ఈడీ సమన్లను రద్దు చేయాలని సుజనా వేసిన పిటీషన్ ను ఢిల్లీ హైకోర్టు కొట్టివేసింది. సోమవారం అంటే డిసెంబర్ 2న కోర్టుకు హాజరుకావాలని సుజనాను ఆదేశించింది. ఈ నెల 24,27 తేదీల్లో సుజానా చౌదరికి ఈడీ సమన్లు జారీ చేసింది. మనీ లాండరింగ్ ఆరోపణలపై ఇటీవల సుజనా నివాసాల్లో సోదాలు చేసిన అనంతరం ఈడీ సమన్లు జారీ చేసింది. ఈ సమన్లు రద్దు చేయాలని సుజనా ఢిల్లీ హైకోర్టులో పిటీషన్ వేయగా ఆ పిటీషన్ కు కోర్టు కొట్టివేసింది. 
 

ఢిల్లీ : బొగ్గు కుంభకోణం కేసులో బొగ్గు శాఖ మాజీ సెక్రటరీ హెచ్‌సీ గుప్త, మరో అయిదుగురిని దోషులుగా తేలుస్తూ దిల్లీ కోర్టు తీర్పు వెలువరించింది. అదే రోజున దోషులకు శిక్ష విధించనున్నట్లు తెలిపింది. 1971 బ్యాచ్‌ ఐఏఎస్‌ అధికారి అయిన గుప్త బొగ్గు కుంభకోణానికి సంబంధించి పలు అవినీతి కేసుల్లో చిక్కుకున్నారు. గుప్త, ఝార్ఖండ్‌ మాజీ ముఖ్యమంత్రి మధు కొడా అవినీతికి పాల్పడ్డారని 2017 డిసెంబర్‌లో ప్రత్యేక కోర్టు తేల్చిచెప్పింది. దోషులుగా తేల్చిన వారిని జ్యుడీషియల్‌ కస్టడీలోకి తీసుకోవాలని కోర్టు పోలీసులను ఆదేశించింది. తదుపరి విచారణను డిసెంబరు 3కు వాయిదా వేసింది. 
యూపీఏ హయాంలో బొగ్గు గ‌నుల కేటాయింపుల‌కు సంబంధించిన కుంభ‌కోణం కేసులో కోల్‌కతాకు చెందిన కంపెనీకి బొగ్గు గనుల కేటాయింపులో అక్రమాలు జరిగాయన్న ఆరోపణలపై విచారణ జరిపిన కోర్టు గుప్తతో పాటు మరో అయిదుగురు అవినీతి, నేరపూరిత కుట్రకు పాల్పడ్డారని స్పష్టంచేసింది. కాంగ్రెస్‌ నేతృత్వంలోని యూపీఏ హయాంలో గుప్త రెండేళ్ల పాటు బొగ్గు శాఖ సెక్రటరీగా పనిచేశారు. కాగా హెచ్‌సీ గుప్త 2008లో  పదవీ విరమణ పొందారు.
 

 

ఉత్తరప్రదేశ్ : ఆగ్రా : రైళ్ల కింద పడి ఆవులు మృత్యువాత పడుతున్న ఘటనలు కొనసాగుతునే వున్నాయి. ఈ నేపథ్యంలో రైళ్ల కింద పడి 245 ఆవులు మృత్యువాత పడిన ఘటనలు ఉత్తరప్రదేశ్ రాష్ట్రంలోని ఆగ్రా జిల్లాలో వెలుగుచూసింది. భండాయి- ఉది మోర్హ్ రైలుమార్గంలో గాజౌరా గ్రామం సమీపంలో వేగంగా వస్తున్న రైలును ఢీకొని పది ఆవులు మరణించాయి. మాణిక్ పురా హాల్ట్ రైల్వేస్టేషను సమీపంలో జరిగిన ప్రమాదంలో మరణించిన పది ఆవుల కళేబరాలను అధికారులు పూడ్చిపెట్టించారు. పాల్వాల్ నుంచి ధోల్పూర్ మధ్య ఉన్న 190 కిలోమీటర్ల దూరం రైలు మార్గంలో ఏప్రిల్ నుంచి సెప్టెంబరు వరు 245 ఆవులు మరణించాయి. తరచూ రైళ్ల కింద పడి ఆవులు మరణిస్తున్న ఘటనలతో 410 రైళ్లు 5.212 నిమిషాల పాటు రైళ్ల రాకపోకల్లో జాప్యం జరిగిందని రైల్వే అధికారులు వెల్లడించారు. తరసు రైలు ప్రమాదాల్లో ఆవులు పెద్ద సంఖ్యలో మరణిస్తున్న నేపథ్యంలో భవిష్యత్ లో ప్రమాదాల నివారణకు చర్యలు తీసుకోవాలని రైల్వే అధికారులు నిర్ణయించారు.బీజేపీ పార్టీ అధికారంలోవున్న ఉత్తరప్రదేశ్ లో తరచుఇటువంటి ఘటనలు చోటుచేసుకుంటున్నాయి. గోమాసంపై తీవ్ర నిషేధాన్ని విధించిన బీజేపీ ప్రభుత్వం పాలనలో ఇటువంటి ఘటనలు పునరావృతం అవుతుండటం గమనించాల్సిన విషయం.
గోవులపై అంత ప్రేమ వున్న బీజేపీ ప్రభుత్వం కేవలం మాటలవ వరకే పరిమితం కావటం తరచు రైళ్ల కింద పడి ఆవులు మృత్యువాత పడుతుండంపై విమర్శలు వెల్లువెత్తుతున్నాయి. 
 

ఢిల్లీ : దేశ రాజధాని ఢిల్లీలో రైతాంగం కదం తొక్కింది.  సమస్యల పరిష్కారం కోసం పోరు బాట పట్టారు. నిన్నరైతులు ఆందోళన చేపట్టారు. ఢిల్లీలో రెండో రోజు రైతుల ఆందోళన కొనసాగుతోంది. అఖిల భారత రైతు పోరాట సమన్వయ సమితి ఆధ్వర్యంలో కిసాన్ మార్చ్ నిర్వహించనున్నారు. పార్లమెంట్ వీధిలో రైతుల భారీ ర్యాలీ చేపట్టారు. రాంలీలా మైదానంలో రైతులు రాత్రంతా జాగారం చేశారు. ఇవాళ మధ్యాహ్నం రాంలీలా మైదానం నుంచి పార్లమెంట్ వరకు రైతులు ర్యాలీ నిర్వహించనున్నారు. పార్లమెంట్ వీధిలో జరుగనున్న రైతుల భారీ ర్యాలీకి పలువురు రాజకీయ నేతలు, విద్యార్థి సంఘాలు, వామపక్ష యూనియన్స్ మద్దతు ప్రకటించాయి. కిసాన్ మార్చ్ కు 208 రైతు సంఘాలు, విద్యార్థి సంఘాలు మద్దతు తెలిపాయి. ర్యాలీలో రైతులు, రైతు సంఘాలు, జెఎన్ యూ విద్యార్థులు పెద్ద ఎత్తున పాల్గొంటున్నారు. 
ప్రధాన డిమాండ్లు...
రైతుల సమస్యల పరిష్కారానికి ప్రత్యేకంగా 21 రోజులపాటు పార్లమెంటు సమావేశాలు ఏర్పాటు చేయాలి. పంటల కనీస మద్దతు ధర అధికారం రైతుల చేతుల్లోనే ఉంచాలి. 2018 రబీ వరకు పంట రుణాల్ని సంపూర్ణంగా మాఫీ చేయాలి. స్వామినాథన్‌ సిఫార్సులు అమలు చేయాలి. ఆత్మహత్యలు చేసుకున్న రైతు కుటుంబాలకు రూ.10 లక్షల చొప్పున పరిహారం ఇవ్వాలి. బీమా రాయితీ కల్పించాలి. 2013 భూసేకరణ చట్టాన్ని అమలు చేయాలి.

 

ఢిల్లీ : సెంట్రల్ ఢిల్లీలో లక్షలాది మంది రైతుల నినాదాలాతో హోరెత్తుతోంది. అన్నదాతలను ఆదుకోవాలి..తమ సమస్యలు పరిష్కరించండి..రైతన్నలను పట్టించుకోవాలంటూ గళమెత్తుతున్నారు. ఢిల్లీలో మొదటి రోజు రాంలీలా మైదాన్‌లో జాగారం చేసిన అన్నదాతలు నవంబర్ 30వ తేదీన పార్లమెంట్ వీధిలో కదం తొక్కారు. ఎంతో దూరం నుండి నడుచుకుంటూ వచ్చిన రైతుల ఘోష వినాలని కోరుతున్నారు. పార్లమెంట్ ముట్టడికి యత్నించే అవకాశం ఉందని భావించిన పోలీసు యంత్రాంగం భారీగా పోలీసులను మోహరించింది. ప్రత్యేక పార్లమెంట్ సమావేశాలు నిర్వహించి రైతులు సమస్యలపై చర్చించి తమను ఆదుకోవాలని కోరుతున్నారు. ఎంతో మంది రైతులు ఆత్మహత్యలు చేసుకుంటున్న కేంద్రంలో కదలిక రావడం లేదని తీవ్ర ఆవేదన వ్యక్తం చేస్తున్నారు. 
ఇదిలా ఉంటే తెలంగాణ నుండి అనేక మంది రైతులు..ఆత్మహత్య చేసుకున్న రైతుల కుటుంబాలు హస్తినకు వెళ్లారు. కేంద్ర ప్రభుత్వం ఒక చట్టం తీసుకరావాలని..ఫలితంగా మద్దతు ధర...ఇతరత్రా సమస్యలు తీరుతాయని టెన్ టివితో రైతులు తెలిపారు. రైతు స్వరాజ్య వేదిక ఆధ్వర్యంలో వీరంతా తరలివచ్చారు. 

  • ఎదుర్కొంటున్న సమస్యలకు పరిష్కారం కోరుతూ వామపక్షాల మద్దతుతో 207 రైతు, రైతుకూలీ సంఘాలతో కూడిన అఖిల భారత రైతు సంఘర్షణ సమన్వయ సమితి (ఏఐకేఎస్‌సీసీ) నేతృత్వంలో పెద్ద సంఖ్యలో రైతులు ఢిల్లీకి వచ్చారు. 
  • రైతుల సమస్యల పరిష్కారానికి ప్రత్యేకంగా 21 రోజులపాటు పార్లమెంటు సమావేశాలు ఏర్పాటు చేయాలి.
  • పంటల కనీస మద్దతు ధర అధికారం రైతుల చేతుల్లోనే ఉంచాలి.
  • 2018 రబీ వరకు పంట రుణాల్ని సంపూర్ణంగా మాఫీ చేయాలి.
  • స్వామినాథన్‌ సిఫార్సులు అమలు చేయాలి.
  • ఆత్మహత్యలు చేసుకున్న రైతు కుటుంబాలకు రూ.10 లక్షల చొప్పున పరిహారం ఇవ్వాలి.
  • బీమా రాయితీ కల్పించాలి.
  • 2013 భూసేకరణ చట్టాన్ని అమలు చేయాలి.

ఢిల్లీ : పాకిస్తాన్ అదుపులో 28 మంది ఆంధ్రా జాలర్లు ఉన్నారు. చేపల వేటకు వెళ్లిన ఆంధ్రప్రదేశ్‌కు చెందిన 28 మంది జాలర్లను పాకిస్తాన్ కోస్ట్‌ గార్డు దళం అదుపులోకి తీసుకుంది. పట్టుబడినవారిలో 20 మంది శ్రీకాకుళం జిల్లా వాసులు కాగా, నలుగురు విజయనగరం, మరో నలుగురు తూర్పుగోదావరి జిల్లాకు చెందినవారిగా గుర్తించారు. వారిని విడిపించేందుకు సీఎం చంద్రబాబు రంగంలోకి దిగారు. ఢిల్లీలోని ఏపీ భవన్‌ అధికారుల ద్వారా కేంద్రానికి వర్తమానం పంపారు. వీరంతా గుజరాత్‌కు వలస వెళ్లి, చేపల వేటను జీవనోపాధిగా ఎంచుకొని జీవిస్తున్నారు. ఇందులో భాగంగా నిన్న చేపల వేటకు వెళ్లినప్పుడు పాక్‌ జలాల్లోకి ప్రవేశించడంతో అక్కడ కోస్ట్‌ గార్డు దళాలు వీరిని అదుపులోకి తీసుకున్నాయి. 
తక్షణమే స్పందించిన ఏపీ ప్రభుత్వం..  
పాకిస్తాన్ అదుపులో ఉన్న జాలర్లలో శ్రీకాకుళం జిల్లా ఎచ్చర్ల మండలానికి చెందిన జాలర్లే 20 మంది ఉన్నట్టు సమాచారం. దీనిపై రాష్ట్ర ప్రభుత్వం తక్షణమే స్పందించింది. ఈ విషయం మంత్రి కళా వెంకట్రావు దృష్టికి రావడంతో ఆయన చంద్రబాబుకు సమాచారం ఇచ్చారు. వెంటనే స్పందించిన చంద్రబాబు ఏపీ భవన్‌ రెసిడెంట్‌ కమిషనర్‌ శ్రీకాంత్‌తో మాట్లాడారు. బాధిత కుటుంబ సభ్యులకు సమాచారం ఇచ్చి, వారికి ప్రభుత్వపరంగా సాయం చేసేందుకు అన్ని చర్యలు తీసుకోవాలని ఆదేశించారు.

 

ఢిల్లీ : సీబీఐలో బైట పడ్డ అవినీతి బాగోతంతో కేంద్ర ప్రభుత్వం రాత్రి రాత్రే వివాదాస్పద నిర్ణయాలు తీసుకుంది. ఈ నిర్ణయంపై పలు విమర్శలు, ఆరోపణలు వెల్లువెత్తాయి. సీబీఐ డైరెక్టర్ ఆలోక్‌ వర్మకు, ప్రత్యేక అధికారి రాకేశ్‌ అస్థానాకు మధ్య తీవ్ర విభేదాలు నెలకొన్న నేపథ్యంలో ఇద్దరు అధికారులను కేంద్ర ప్రభుత్వం బలవంతపు సెలవుపై పంపిన సంగతి తెలిసిందే. ఈ అంశాన్ని సవాల్‌ చేస్తూ వర్మ సుప్రీం కోర్టును ఆశ్రయించారు. దీనిపై గురువారం ప్రధాన న్యాయమూర్తి జస్టిస్‌ రంజన్‌ గొగొయి, న్యాయమూర్తులు జస్టిస్‌ ఎస్‌.కె.కౌల్‌, జస్టిస్‌ కె.ఎం.జోసెఫ్‌లతో కూడిన ధర్మాసనం ఎదుట వాదనలు కొనసాగాయి.
కపిల్‌ సిబల్‌ ను ప్రశ్నించిన కాంగ్రెస్‌ నేత మల్లికార్జున ఖర్గే తరఫు న్యాయవాది
అలోక్ వర్మను అంత అర్ధాంతరంగా సెలవుపై పంపాలని కేంద్ర విజిలెన్స్‌ కమిషన్‌ సిఫార్సు చేయడానికి ఎలాంటి ప్రాతిపదిక లేదన్నారు. ప్రధాన మంత్రి, విపక్ష నేత, భారత ప్రధాన న్యాయమూర్తితో కూడిన ఎంపిక కమిటీని సంప్రదించకుండానే సీవీసీ, కేంద్రం ఉత్తర్వులు జారీ చేశాయని చెప్పారు. ఆఖరికి జస్టిస్‌ జోసెఫ్‌ జోక్యం చేసుకోవాల్సిన పరిస్థితి వచ్చింది. దీంతో  సీబీఐ డైరెక్టర్‌ ఏదైనా నేరం చేస్తూ రెడ్‌ హ్యాండెడ్‌గా పట్టుబడితే ఏం చేయాలని కాంగ్రెస్‌ నేత మల్లికార్జున ఖర్గే తరఫు న్యాయవాది కపిల్‌ సిబల్‌ను ప్రశ్నించారు. అలాంటి పరిస్థితుల్లోనూ ఎంపిక కమిటీని ఆశ్రయించడం మినహా ప్రభుత్వానికి మరో మార్గం లేదని సిబల్‌ బదులిచ్చారు.
సీబీఐ డైరెక్టర్‌ అధికారాలను తొలగించాలన్న ఉత్తర్వు కేంద్రానిదా? లేదా  సీవీసీదా? అని ప్రధాన న్యాయమూర్తి ప్రశ్నించారు. దీనికి అటార్నీ జనరల్‌ వేణుగోపాల్‌ బదులిస్తూ.. అక్టోబర్‌ 23న కేంద్ర సిబ్బంది, శిక్షణ వ్యవహారాల శాఖ ఇచ్చిన ఉత్తర్వు స్వతంత్రమైందన్నారు. కేంద్ర క్యాబినెట్‌ కార్యదర్శికి అందిన ఫిర్యాదు ఆధారంగా సీవీసీ తన అధికారాన్ని ఉపయోగించిందని చెప్పారు. వర్మ ఇప్పటికీ సీబీఐ డైరెక్టర్‌ హోదాలో కొనసాగుతున్నారని..ఢిల్లీలోని సీబీఐ  నివాసంలో ఉంటున్నారని, ఆ పదవికి సంబంధించి అన్ని భత్యాలనూ పొందుతున్నారని పేర్కొన్నారు. దీంతో ఆయనను బదిలీ చేశారని భావించరాదని వాదించారు.
కమిటీని సంప్రదించకుండానే ఆదేశాలిచ్చింది : వర్మ న్యాయవాది నారిమన్
దీనికి  ఆరోపణలు ఎదుర్కొంటున్న డైరెక్టర్ అలోక్ వర్మ తరఫు న్యాయవాది నారిమన్‌ సమాధానం చెబుతు..సీవీసీ అక్టోబర్‌ 23న ఉత్తర్వు జారీ చేసిందని, ఆ తర్వాత కేంద్ర సిబ్బంది శాఖ.. ఎంపిక కమిటీని సంప్రదించకుండానే ఆదేశాలిచ్చిందని చెప్పారు. ఎంపిక కమిటీ అనుమతి లేకుండా సీబీఐ డైరెక్టర్‌ను బదిలీ చేయకూడదని నారిమన్ స్పష్టంచేశారు. సీబీఐ డైరెక్టర్‌కు సంబంధించి కేంద్ర ప్రభుత్వమే నియామక వ్యవస్థ. ఎంపిక కమిటీ కేవలం అధికారి పేరును మాత్రమే సిఫార్సు చేస్తుంది. అనంతరం కమిటీ కనీసం  ఉనికిలో కూడా వుండదు. సీబీఐ డైరెక్టర్‌ అధికారాల తొలగింపుపై కేంద్ర ప్రభుత్వ అధికారాల విషయంలో వాదనలను సుప్రీంకోర్టు  డిసెంబర్‌ 5న కొనసాగుతాయని ధర్మాసనం తెలిపింది. 

 

ఢిల్లీ: ఎయిరిండియాకు ఉన్న రూ.55,000 కోట్ల రుణంలో రూ.29,000 కోట్లు మాఫీ చేయాలని కేంద్రప్రభుత్వం నిర్ణయించింది. ఈ మొత్తాన్ని ప్రత్యేక అవసర సంస్థకు బదిలీ చేయడం ద్వారా, ఎయిరిండియా ఏటా చెల్లించే వడ్డీలను భారీగా తగ్గించవచ్చన్నది ప్రభుత్వ ప్రణాళికగా పౌర విమానయాన సీనియర్‌ అధికారి ఒకరు వెల్లడించారు. ఎయిరిండియా ప్రతీ ఏడాది చెల్లించే వడ్డీలను భారీగా తగ్గించవచ్చన్నది ప్రభుత్వ  ‘రూ.29,000 కోట్ల రుణ మొత్తాన్ని ఒక ఎస్‌పీవీకి బదిలీ చేస్తుంది. ఎయిరిండియా నుంచి రుణాన్ని నేరుగా ఎస్‌పీవీకి బదిలీ చేయాలా లేక, ఎస్‌పీవీ తాజాగా రుణాలు సేకరించి, ఆ మొత్తంతో ఎయిరిండియా రుణాలను తీర్చాలా’ అనేది ఇంకా తేలలేదని పౌర విమానయాన కార్యదర్శి ఆర్‌.ఎన్‌.చౌబే విలేకరులకు చెప్పారు.
ఎయిర్ ఇండియా సంస్థాపకుడు జె.ఆర్.డి టాటా..
ఎయిర్ ఇండియా ఆరంభంలో టాటా ఎయిర్‌లైన్స్‌ పేరుతో 1932 అక్టోబర్ 15న జె.ఆర్.డి.టాటాచే టాటాసన్స్ లిమిటెడ్ అంటే ప్రస్తుత టాటా గ్రూప్ సంస్థలో ఒక భాగంగా ప్రారంభం అయింది. ఎయిర్ ఇండియా సంస్థాపకుడు జె.ఆర్.డి టాటా స్వయంగా మొదటి సారిగా వి.టి.గా నమోదుచేయబడిన సింగిల్ ఇంజన్ విమానం 'డి హావ్‌లాండ్'లో ప్రయాణం చేయడం ఎయిర్ ఇండియా తొలి ప్రయాణానికి నాంది. ఈ ప్రయాణం కరాచీలోని డ్రిగ్‌రోడ్ ఏరోడ్రోమ్ నుండి అలహాబాదు మీదుగా బాంబే జుహూ ఎయిర్‌ స్ట్రిప్ వరకు సాగింది. రాయల్ ఎయిర్ ఫోర్స్‌కు చెందిన పైలెట్ నెవిల్ విన్సెంట్ సారథ్యంలో ఈ ప్రయాణం సాగింది. తరువాత ఈ ప్రయాణం బళ్ళారి మార్గంలో మద్రాసు వరకు సాగింది. ఈ ప్రయాణంలో ఇంపీరియల్ సంస్థ వారి ఎయిర్ మెయిల్ కూడా మొదటిసారిగా పంప బడిన విషయం తెలిసిందే. కాగా గతంలో ప్రభుత్వరంగ  ఏకైక స్వదేశీ విమానయాన సంస్థ అయిన  ఎయిర్ ఇండియాను విక్రయించేందుకు కూడా కేంద్ర ప్రభుత్వం యత్నించటం సాధ్యం కాకపోవటంతో నేడు ఎయిర్ ఇండియాను కొనసాగించేందుకు కేంద్ర ప్రభుత్వం రూ.29,000 కోట్లు మాఫీ చేయాలని నిర్ణయించింది. 
 

 

ఢిల్లీ : పర్మినెంట్ అకౌంట్ నెంబర్ (పాన్ కార్డు) కొత్త నిబంధనలు వవ్చాయి. సెంట్రల్ బోర్డు డైరెక్ట్ ట్యాక్సెస్ (సీబీడీటీ) నోటిఫికేషన్ విడుదల చేసింది. ఈ డిసెంబర్ 5 నుంచి ఐదు రూల్స్ అమల్లోకి రానున్నాయి. సంవత్సరానికి రూ2.5 లక్షలు ఆపైన వ్యాపారం చేసే వారందరూ కొత్త నిబంధనలతో కూడిన పాన్ కార్డును తప్పని సరిగా తీసుకోవాలి.
రూల్స్ ఏంటో తెలుసుకుందాం :
1. సంవత్సరానికి రూ.2లక్షలు.. ఆపైన లావాదేవీలు చేసే వారందరూ పాన్ కార్డు తీసుకోవాలి.
2. వ్యాపార వార్షిక ఆదాయం రూ.5 లక్షల వరకు ఉన్న వారందరూ విధిగా పాన్ కార్డు కలిగి ఉండాలి.
3. మేనేజింగ్ డైరెక్టర్, డైరెక్టర్, పార్టనర్, ఆథర్, వ్యవస్థాపకుడు, కర్త, చీఫ్ ఎగ్జిక్యూటివ్ ఆఫీసర్, ప్రిన్సిపల్ అఫీసర్ లేదా ఆఫీస్ బేరర్ తప్పకుండా పాన్ కార్డుకి కలిగి ఉండాలి. లేనిపక్షంలో 31 మే, 2019లోపు పాన్ కార్డు తీసుకోవాలి.
4. వ్యక్తిగతంగా పన్ను చెల్లింపుదారులు ఇన్ కంట్యాక్స్ కొత్త నోటిఫికేషన్ ఆందోళన చెందాల్సిన అవసరం లేదు. 
5. కొత్త పాన్ కార్డు దరఖాస్తు ఫారమ్ లో సంబంధిత వ్యక్తి తండ్రి పేరును పేర్కొనడం తప్పనిసరికాదు.  

 

ఢిల్లీ : ప్రభుత్వ రంగ దిగ్గజం బీఎస్ఎన్ఎల్ ఉద్యోగులు సమ్మె బాట పట్టనున్నారు. డిసెంబర్ 3వ తేదీ నుండి సమ్మెకు దిగనున్నారు. సమ్మెతో టెలికారంగంలో ప్రభుత్వం..ప్రైవేటు కంపెనీల మధ్య వార్ ప్రారంభమైనట్లు చెప్పవచ్చు. టెలికాం కంపెనీల సంక్షోభానికి రిలయన్స్ జియోనే కారణమని బీఎస్ఎన్ఎల్ పేర్కొంటోంది. జియోతో పోటీ పడకుండా ఉండేందుకు బీఎస్ఎన్ఎల్ కేంద్రం 4జీ స్పెక్ట్రం కేటాయించడం లేదని ఉద్యోగులు ఆరోపిస్తున్నారు. ముఖేష్ అంబానీకి మోడీ సర్కార్ వత్తాసు పలుకుతోందని..ప్రభుత్వ విధానాలకు వ్యతిరేకంగా సమ్మె బాట పట్టనున్నట్లు బీఎస్ఎన్ఎల్ ఉద్యోగులు హెచ్చరిస్తున్నారు. ముఖేష్ అంబానీ కంపెనీకి లాభాలు చేకూర్చే విధంగా ప్రభుత్వం నిబంధనలు కూడా ఉల్లంఘిస్తోందంటూ ఆరోపణలు గుప్పిస్తున్నారు. ప్రత్యర్థి కంపెనీలు మూతపడిన తరువాత రిలయెన్స్ జియో, టారిఫ్‌లను భారీగా పెంచే అవకాశం ఉందని ప్రచారం జరుగుతోంది. ఒకసారి మార్కెట్‌లో పోటీ పూర్తిగా తుడిచిపెట్టుకుపోయిన అనంతరం జియో కస్టమర్లను భారీగా దోపీడీ చేయనుందని బీఎస్ఎన్ఎల్ పేర్కొంటోంది. డిసెంబర్ 3వ తేదీ నుండి నిరవధిక సమ్మెలోకి వెళుతున్నట్లు బీఎస్ఎన్ఎల్‌కు చెందిన పలు సంఘాలు నిర్ణయించాయి. 

 

ఢిల్లీ : దేశ రాజధాని ఢిల్లీలో అన్నదాతలు కదం తొక్కారు. అనేక రాష్ట్రాల నుంచి వేలాదిగా రైతులు ఢిల్లీకి చేరుకున్నారు. పాలకులకు తమగళం బలంగా వినిపించేందుకు కదలివచ్చారు. దేశవ్యాప్తంగా రైతులు ఎదుర్కొంటున్న సమస్యలకు పరిష్కారం కోరుతూ వామపక్షాల మద్దతుతో 207 రైతు, రైతుకూలీ సంఘాలతో కూడిన అఖిల భారత రైతు సంఘర్షణ సమన్వయ సమితి (ఏఐకేఎస్‌సీసీ) నేతృత్వంలో పెద్ద సంఖ్యలో రైతులు ఢిల్లీకి చేరుకున్నారు. రుణ విముక్తి, పంటలకు గిట్టుబాటు ధర కల్పించాలనే డిమాండ్‌లతో వామపక్ష పార్టీల మద్దతుతో వీరు చేపట్టిన రెండు రోజుల ఆందోళన ప్రారంభమైంది. ముఖ్యంగా ఆంధ్రప్రదేశ్, గుజరాత్, మధ్యప్రదేశ్, మహారాష్ట్ర, తమిళనాడు తదితర రాష్ట్రాలకు చెందిన రైతులు నిన్న చేరుకున్నారు. వీరంతా నేడు పార్లమెంట్‌ వైపుగా ర్యాలీగా సాగనున్నారు. 
రాంలీలా మైదాన్‌ నుంచి పార్లమెంటు వరకు ప్రదర్శన
ఇవాళా రాంలీలా మైదాన్‌ నుంచి పార్లమెంటు వరకు ప్రదర్శన చేపట్టి, అనంతరం సభ నిర్వహించనున్నారు. పార్లమెంటు వరకు అనుమతించకపోతే నగ్నప్రదర్శన నిర్వహిస్తామని తమిళనాడుకు చెందిన ఉద్యమకారులు హెచ్చరించారు. గురువారం నాటి ప్రదర్శనలో వివిధ సంఘాల నేతలు అశోక్‌ దావలే, హన్నన్‌మొల్లా, విజూకృష్ణన్‌, మేధాపాట్కర్‌ తదితరులు పాల్గొన్నారు. కేంద్ర సమాచార మాజీ కమిషనర్‌ మాడభూషి శ్రీధరాచార్యులు, పాత్రికేయులు సాయినాథ్‌, యోగేంద్రయాదవ్‌, ప్రశాంత్‌ భూషణ్‌ తదితర ప్రముఖులు సంఘీభావం తెలిపారు.
రైతుల పుర్రెలతో ర్యాలీకి...
వామపక్ష పార్టీలు, సంఘాలతో ఏర్పాటైన ఆల్‌ ఇండియా కిసాన్‌ సంఘర్షణ కోఆర్డినేషన్‌ కమిటీ(ఏఐకేసీసీ) బ్యానర్‌ కింద వివిధ రాష్ట్రాలకు చెందిన రైతులు ఢిల్లీకి వచ్చారు. వీరిలో నేషనల్‌ సౌత్‌ ఇండియన్‌ రివర్‌ ఇంటర్‌ లింకింగ్‌ అగ్రికల్చరిస్ట్‌స్‌ అసోసియేషన్‌కు చెందిన 1,200 మంది రైతుల బృందముంది. వీరు ఆత్మహత్యలు చేసుకున్న రైతుల కపాలాలను తెచ్చారు. రామ్‌లీలా మైదాన్‌లో జరిగిన సమావేశంలో ప్రముఖ జర్నలిస్టు పాలగుమ్మి సాయినాధ్‌ మాట్లాడుతూ.. ‘దేశవ్యాప్తంగా 600 జిల్లాల్లో వ్యవసాయ రంగం సంక్షోభంలో ఉంది. ఫసల్‌ బీమా యోజన పెద్ద కంపెనీలకు వరంగా మారింది’అని అన్నారు.
రైతుల ప్రధాన డిమాండ్లు...
రైతుల సమస్యల పరిష్కారానికి ప్రత్యేకంగా 21 రోజులపాటు పార్లమెంటు సమావేశాలు ఏర్పాటు చేయాలి. పంటల కనీస మద్దతు ధర అధికారం రైతుల చేతుల్లోనే ఉంచాలి. 2018 రబీ వరకు పంట రుణాల్ని సంపూర్ణంగా మాఫీ చేయాలి. స్వామినాథన్‌ సిఫార్సులు అమలు చేయాలి. ఆత్మహత్యలు చేసుకున్న రైతు కుటుంబాలకు రూ.10 లక్షల చొప్పున పరిహారం ఇవ్వాలి. బీమా రాయితీ కల్పించాలి. 2013 భూసేకరణ చట్టాన్ని అమలు చేయాలి.

 

రాజస్థాన్ : రాష్ట్రంలోని రాంగర్‌లో డిసెంబర్ 7వ తేదీన జరగాల్సిన పోలింగ్ వాయిదా పడింది. ఈ నియోజకవర్గంలో బీఎస్పీ తరపున పోటీ చేస్తున్న లక్ష్మణ్ సింగ్ మృతి చెందడంతో ఈ పరిణామం చోటు చేసుకుంది. ఎన్నికల చట్టంలోని సెక్షన్ 52 ప్రకారం గుర్తింపు పొందిన పార్టీ అభ్యర్థి మ‌ృతి చెందితే పోలింగ్ వాయిదా వేయవచ్చని రాంగర్ డిస్ట్రిక్ మెజిస్ట్రేట్ తెలిపారు. తిరిగి ఎప్పుడు పోలింగ్ నిర్వహించేది ఎన్నికల కమిషన్ నిర్ణయిస్తుందని ఆయన పేర్కొన్నారు. కొత్త అభ్యర్థిని నిర్ణయించుకోవడానికి సదరు పార్టీకి 7 రోజుల వ్యవధి మాత్రమే ఇస్తారని..ఇప్పుడు రాంగర్ నియోజకవర్గంలోనూ అదే జరుగుతుందన్నారు. ఈ నిర్ణయంతో రాజస్థాన్‌లో 200 నియోజకవర్గాల్లో జరగాల్సిన ఎన్నికలు 199 నియోజకవర్గాల్లో మాత్రమే డిసెంబర్ 7న పోలింగ్ జరుగనుంది.

 

బెంగళూరు : సెల్ ఫోన్ డాటా యూజర్లకు శుభవార్త. సెంటర్‌ ఫర్‌ డెవలప్‌మెంట్‌ టెలిమ్యాటిక్స్‌ సంస్థ (సీడాట్‌) బంపర్ ఆఫర్ ప్రకటించింది. సెల్ ఫోన్ లో అత్యవసరంగా డాటా అవసరమైతే రెండు రూపాయలకే పొందే వీలు కల్పిస్తోంది. సంస్థ అభివృద్ధి చేసిన పబ్లిక్‌ డేటా ఆఫీస్‌ (పీడీఓ) వ్యవస్థ ద్వారా 2 రూపాయల నుంచి రూ.20 వరకు డాటా అవసరమనుకున్న వారికి క్షణాల్లో అందుతుంది. బెంగళూరులో నిన్న ప్రారంభించిన బెంగళూరు టెక్‌ సమ్మేళనంలో పీడీఓ వివరాలను సీడాట్‌ సంస్థ ప్రకటించింది. 
డాటా పొందే విధానం..
గ్రామీణ ప్రాంతాల్లో ఏర్పాటు చేయదలచిన పబ్లిక్‌ ఎలక్ట్రానిక్‌ ఆఫీస్‌ (పీఈఓ)ల ద్వారా రూ.రెండు బిళ్ల వేయదగిన కాయిన్‌బూత్‌ వంటి పరికరం ఉంటుంది. ఈ బిళ్ల వేసిన వెంటనే వారి సెల్ ఫోన్ నంబరుకు ఓటీపీ ద్వారా డాటా సేవలు అందుబాటులోకి వస్తాయి. గ్రామీణ ప్రాంతాల్లో నెట్‌వర్క్‌ సమస్యలతోపాటు తక్కువ ధరలకే డేటా అందిస్తున్నట్లు సంస్థ పేర్కొంది. 

 

ఒడిషా : పురుషుల హాకీ ప్రపంచకప్‌ 2018 టోర్నమెంట్ లో భాగంగా నేడు పూల్-బిలోని నాలుగు జట్లు తలపడనున్నాయి. సాయంత్రం 5 గంటలకు మ్యాచ్ 5లో ఆస్ట్రేలియా, ఐర్లాండ్ తలపడనున్నాయి. మ్యాచ్ 6లో సాయంత్రం 7 గంటలకు ఇంగ్లాండ్ తో చైనా తలపడనుంది. ఈ టోర్నమెంట్ భువనేశ్వర్ లోని కలింగ స్టేడియం వేదికగా జరుగుతున్నాయి.   

పురుషుల హాకీ ప్రపంచ కప్ 2018 ప్రారంభ మ్యాచ్‌లో భారత్ గెలుపొందిన సంగతి తెలిసిందే. దక్షిణాఫ్రికాపై విజయం సాధించింది. 5-0 గోల్స్ తేడాతో భారత్ గెలుపొందింది 

 

 

రాజస్థాన్: అసెంబ్లీ ఎన్నికల్లో గెలిస్తే, ముఖ్యమంత్రిగా కాంగ్రెస్ ఎవరిని నిర్ణయిస్తుంది ? రాహుల్ గాంధీ హయాంలో యువనేతలకే పెద్ద పీట వేస్తారని అంచనాలున్న నేపధ్యంలో ..ఆ అవకాశాలు సచిన్ పైలెట్‌కే ఉన్నాయని అంటున్నారు.. కానీ నిజంగా సచిన్ పైలెట్ మనసులో ఏముంది..ముఖ్యమంత్రి పదవికి తాను అర్హత సాధించినట్లే అని భావిస్తున్నారా?
కాబోయే సీఎం పైలెట్..?
రాజస్తాన్‌లో కాంగ్రెస్ పార్టీ విజయం కోసం కృషి చేస్తున్నవారిలో ముందు వరసలో కన్పించే పేరు సచిన్ పైలెట్. రాహుల్ గాంధీ టీమ్‌లో ఒకరిగా ఉండటమే కాకుండా...పోలింగ్‌కి రెండురోజుల ముందు వరకూ ప్రచారంలో పాల్గొనేలా ప్లాన్ చేసుకున్నది సచిన్ పైలెట్ మాత్రమే. కేంద్రమంత్రిగా పని చేసినా అసెంబ్లీ ఎన్నికలలో పోటీ చేయడం మాత్రం సచిన్ పైలెట్‌కి ఇదే ఫస్ట్ టైమ్. 41 ఏళ్ల సచిన్ పైలెట్ మాజీ కేంద్రమంత్రి రాజేష్ పైలెట్ కుమారుడు. ఆయన తండ్రి రాజేష్ పైలెట్..మాజీ ప్రధాని రాజీవ్‌గాంధీకి సన్నిహితునిగా పేరు. అలా కుటుంబపరంగా కూడా స్ట్రాంగ్ బ్యాక్ గ్రౌండ్ ఉన్న సచిన్ పైలెట్..తన మొదటి లక్ష్యం వసుంధరరాజెని గద్దె దించడమే అని చెప్తారు.
పార్టీ నాకు చాలా ఇచ్చింది:
ఇప్పటికే పార్టీ తనకి చాలా ఇచ్చిందని సచిన్ పైలెట్ చెప్తుంటారు.. భవిష్యత్తులో ఏం జరుగుతుందో చెప్పలేను కానీ..రాజస్తాన్‌ కాంగ్రెస్ పునఃనిర్మాణంలో శాయశక్తులా కృషి చేసినందుకు తృప్తిగా ఉందంటారు. అన్ని చోట్లలానే ఇక్కడ కూడా ముందు సిఎం కాండిడేట్ ఎవరో చెప్పడం లేదని అంటారు. కానీ రాజస్తాన్‌లో కాంగ్రెస్ గెలిస్తే ముఖ్యమంత్రి అయ్యేది సచిన్ పైలెట్టేనంటారు. సీనియర్ నేత అశోక్ గెహ్లాట్ రేసులో ఉన్నా రాహుల్ మాత్రం పైలెట్‌కే ఓటేస్తారని ప్రచారం జరుగుతోంది. అందుకే ఆయన్ని ప్రసన్నం చేసుకునేందుకు చోటా నేతలు తాపత్రయపడటం కూడా ప్రచారపర్వంలో కన్పిస్తుంది. 
ఇక పైలెట్ శకం?
కాంగ్రెస్ పార్టీ తరుపున 26ఏళ్లకే ఎంపీ అయిన సచిన్ పైలెట్ కేంద్రమంత్రిగా కూడా పని చేశారు. ఇక ఇంతకు మించిన పదవులు లేవని సచిన్ పైలెట్ చెప్తుంటారు..అయితే పార్టీ సీఎం పదవి ఆఫర్ చేస్తే మాత్రం కాదనరు అనేది ఇన్‌సైడ్ టాక్..కొద్దికాలం క్రితం విడుదలైన సర్వేలని చూస్తే బిజెపి ఓటమి ఖాయం అఁటారు. దీంతో రాజస్తాన్ కాంగ్రెస్‌లో ఇప్పుడు సచిన్ పైలెట్ శకం ప్రారంభమవనుందనే టాక్ నడుస్తోంది.

ఢిల్లీ : ఆంధ్రప్రదేశ్ జీవనాడి అయిన పోలవరం ప్రాజెక్ట్ పై వివాదాలు కొనసాగుతునే వున్నాయి. ఈ నేపథ్యంలో పోలవరం ప్రాజెక్ట్ పై దేశ అత్యున్నత న్యాయస్థానం కీలక వ్యాఖ్యలు చేసింది. ఈ అంశంపై విచారణ చేపట్టిన సుప్రీంకోర్టు ప్రజాభిప్రాయ సేకరణ లేకుండా నిర్మాణం వుండకూడదనీ..ప్రాజెక్టు ఆపితే ప్రభుత్వంపై ఎంత భారం పడుతుంది? నిర్మాణం ఆపితే కలిగే నష్టం కంటే..నిర్మాణం వల్ల జరిగే నష్టమే ఎక్కవని ఒడిషా ప్రభు్త్వం పేర్కొన్న నేపథ్యంలో సుప్రీంకోర్టు ఈ వ్యాఖ్యలు చేసింది. ప్రజాస్వామ్యంలో ప్రజాభిప్రాయానికి ప్రాధాన్యత వుండాలని సుప్రీంకోర్టు అభిప్రాయపడింది. అనంతరం తదుపరి విచారణను డిసెంబర్ 2వ తేదీ సోమవారం నాటికి వాయిదా వేసింది. 
 

ముంబై : స్టాక్ మార్కెట్స్ లాభాల బాటపట్టాయి. నవంబర్ నెలాఖరులో దేశీయ స్టాక్ మార్కెట్లు భారీ లాభాలను చవిచూశాయి. ట్రేడింగ్ ఆరంభం నుంచి మంచి లాభాల్లో దూసుకుపోయిన సూచీలు చివరి వరకు అదే జోరును కొనసాగించాయి. రూపాయి విలువ బలపడటం, ముడిచమురు ధరలు తగ్గడం, వడ్డీరేట్ల పెంపుపై ట్రంప్‌ ప్రభుత్వంతో 'ఫెడ్‌' రాజీ వైఖరి అవంభించవచ్చనే వార్తలు మార్కెట్లపై సానుకూల ప్రభావం చూపింది. 
ట్రేడింగ్ ముగిసే సమయానికి సెన్సెక్స్ 453.46 పాయింట్ల లాభంతో 36170.41 వద్ద, నిఫ్టీ 129.85 పాయింట్ల లాభంతో 10858.70 వద్ద ముగిసింది. డాలరుతో రూపాయి మారకం విలువ 70 దిగువకు పడిపోయి 69.82 వద్ద ట్రేడ్ అవుతోంది. 
ప్రముఖ కంపెనీ షేర్స్ ఇలా : 
ఎన్‌ఎస్ఈలో.. బజాజ్ ఆటో (+4.61), కొటక్ మహింద్రా (+4.54), హిండాల్కో (+3.91), బజాజ్ ఫినాన్స్ (+3.89), మహింద్రా & మహింద్రా (+3.31) తదితర షేర్లు అధికలాభాలను ఆర్జించగా.. హెచ్‌సీఎల్ టెక్ (-2.84), పవర్ గ్రిడ్ కార్ప్ (-2.06), ఓఎన్‌జీసీ (-1.54), టెక్ మహింద్రా (-1.43), టీసీఎస్ (-1.18) తదితర సంస్థ షేర్లు నష్టాలను చవిచూశాయి. 
 

మహారాష్ట్ర : మరాఠాలకు ప్రభుత్వం శుభవార్తనందించింది. వర్గానికి రిజర్వేషన్లు కల్పించాలని మరాఠాలు కొద్ది నెలల క్రితం భారీ స్థాయిలో ఆందోళనలు చేపట్టిన విషయం తెలిసిందే. ఈ నేపథ్యంలో 2019లో ఎన్నికలు రానున్న తరుణంలో మరాఠాలకు రిజ్వషన్స్ కల్పిస్తు సీఎం దేవేంద్ర ఫడ్నవీస్ ప్రభుత్వం నవంబర్ 18న శీతాకాల సమావేశాల సందర్భంగా బిల్లును అసెంబ్లీలో ప్రవేశపెట్టి ఆమోదం పలికింది. మరాఠాలకు విద్య, ఉదోగ్యాల్లో 16 శాతం రిజర్వేషన్లు కల్పిస్తూ రూపొందించిన బిల్లుకు మహారాష్ట్ర శాసనసభ గురువారం ఆమోద ముద్ర వేసింది. బీజేపీ ప్రభుత్వం ప్రవేశపెట్టిన ఈ బిల్లుకు శివసేన, కాంగ్రెస్, ఎన్సీపీలు మద్దతు తెలిపాయి. తర్వాత ఈ బిల్లును శాసనమండలికి పంపనున్నారు. ఈ బిల్లు ద్వారా కేవలం విద్య, ఉద్యోగాల్లో మాత్రమే మరాఠాలకు రిజర్వేషన్లు లభించనున్నాయి. ఇప్పటికే ఎస్సీ, ఎస్టీలకు స్థానిక సంస్థల ఎన్నికల్లో రిజర్వేషన్లు వర్తిస్తుండగా.. మరాఠాలకు మాత్రం రాజకీయంగా ఈ రిజర్వేషన్లు వర్తించటంలేదు. ఈ నేపథ్యంలో మరాఠాలకు రిజర్వేషన్లు కల్పించడం కోసం.. మహారాష్ట్ర రాష్ట్ర బీసీ కమిషన్ సూచనల మేరకు ఫడ్నవీస్ సర్కారు ఎస్‌ఈబీసీ  అంటే సామాజికంగా, ఆర్థికంగా వెనుకబడిన తరగతిని ఏర్పాటు చేసింది. దీని వల్ల ఓబీసీల రిజర్వేషన్లకు విఘాతం కలగదని ప్రభుత్వం స్పష్టం చేసింది. 
కాగా వచ్చే ఏడాది అంటే 2019లో మహారాష్ట్ర ఎన్నికలు జరగనున్న తరుణంలో.. మరాఠాల డిమాండ్‌ పట్ల సానుకూలంగా నిర్ణయం తీసుకోవడం తమకు కలిసి వస్తుందని బీజేపీ భావిస్తోంది. దీంతో మరాఠాల ఓట్ల కోసం ఫడ్నవీస్ ప్రభుత్వం ఈ నిర్ణయం తీసుకున్నట్లుగా రాజకీయవర్గాల సమాచారం. 
 

చెన్నై: పోలీసులకు నైట్ పెట్రోలింగ్ ఒక సవాలే. ఖాళీ వీధుల్లో సంచరిస్తూ లా అండ్ ఆర్డర్‌ను పర్యవేక్షిస్తూ రాత్రిళ్లు డ్యూటీ చేయడం కత్తి మీద సాము లాంటిదే.. అయితే ఈ సమయంలో కనగేశన్ చెప్పే కవిత్వం చెన్నైలోని పోలీసులకు కాలక్షేపమే కాదు.. వారిని చైతన్యపరుస్తుంటుంది. ఎస్ కనగేశన్ ఖాఖీ యూనిఫాం వేసుకొన్న ఓ కవి. తన 13వ ఏట నుంచి కవిత్వం రాయడం అలవాటు చేసుకున్నాడు. ఇప్పటికే కనగేశన్ రచించిన మూడు పుస్తకాలు పబ్లిష్ అయ్యాయి. నాలుగో పుస్తకం సాహితీ ప్రియులను అలరించేందుకు సిద్ధం అవుతోంది. ఇటీవలే 49 ఏళ్ల కనగేశన్ పోలీస్ ఇన్స్‌పెక్టర్‌గా ఊటీ నుంచి ట్రాన్స్‌ఫర్ మీద చెన్నై వచ్చాడు. 
ఇక కనగేశన్ ప్రత్యేకత గురించి చెప్పాలంటే.. రాత్రిళ్లు పెట్రోలింగ్ చేసే పోలీసుల కోసం వైర్‌లెస్ సెట్‌లో తన ఆశుకవిత్వాన్ని వినిపించి ఆనందింపచేయడమే. పోలీసులను చైతన్యవంతులను చేయడంతోపాటు ప్రతీ పోలీసును జీవితం అంటే ఏమిటో తెలుసుకొనేలా కనగేశన్ కవిత్వం ఉంటుంది. ఇటీవల ప్రతీ పోలీసు గర్వంగా భావించే పోలీసు యూనిఫాం మీద వినిపించిన పద్యం చెన్నైలోని చాలామంది పోలీసు సిబ్బందిని కదిలించడంతో కనగేశన్ పేరు మారుమ్రోగిపోయింది. అప్పటికప్పుడు కనగేశన్ మూడు పద్యాలు ఆశువుగా వినిపించి అందరినీ మంత్రముగ్ధులను చేశాడు.  1997లో తాను ఎస్సైగా ధర్మపురి జిల్లా హరూర్‌లో భాధ్యతలు స్వీకరించిన నాటినుంచి ఈ విధంగా కవిత్వం చెప్పటం  అలవాటైందని కనగేశన్ చెబుతున్నాడు. స్కూల్లో చదివే రోజులనుంచే తాను కవిత్వం రాయడం అలవాటు చేసుకున్నట్టు ఈ కవి పోలీసు చెబుతున్నాడు. నిద్రలేమి, ప్రేరణ లేకపోవడం పోలీసులకు ప్రధాన సమస్యలని వీటిని అధిగమించి వారి వత్తిళ్లను తగ్గించడమే తన ఏకైక లక్యమని కనగేశన్ చెబుతున్నాడు.
 

 

మెడిసిన్ చదవటానికి అర్హత కోసం రాసే నీట్ మెడికల్ ఎంట్రన్స్ టెస్ట్ ను ఇక నుంచి 25 ఏళ్ల వయస్సు దాటిన వారూ రాసుకోవచ్చు. వయస్సు అనేది అర్హతకు ప్రామాణికంగా తీసుకోవాల్సిన అవసరం లేదంటూ కీలక తీర్పు ఇచ్చింది సుప్రీంకోర్టు. 25 ఏళ్లు దాటిన అండర్ గ్రాడ్యుయేట్స్ నీట్ మెడికల్ ఎంట్రన్స్ టెస్ట్ కు అర్హులే అని స్పష్టం చేసిన కోర్టు.. అడ్మిషన్స్ విషయంలో మాత్రం CBSE నిబంధనలకు లోబడి మాత్రమే ఉంటాయని స్పష్టం చేసింది. వచ్చే ఏడాది నుంచి ఈ రూల్ అమల్లోకి రాబోన్నది. అదే విధంగా నవంబర్ 30వ తేదీ ముగియనున్న ఎంట్రన్స్ టెస్ట్ దరఖాస్తు తేదీని మరో వారం పొడిగించాలని నేషనల్ టెస్టింగ్ ఏజెన్సీని కూడా ఆదేశించింది కోర్టు.
ఫ్రెషర్స్ అభ్యంతరం :
ఇంటర్ పూర్తి చేసిన ఫ్రెషర్స్ మాత్రం దీనిపై అభ్యంతరం వ్యక్తం చేస్తున్నారు. 25ఏళ్లు నిండిన అండర్ గ్రాడ్యుయేట్స్ ఎంట్రన్స్ రాయటం వల్ల కాంపిటీషన్ పెరుగుతుందని.. వారి సీనియారిటీ వల్ల నష్టం వస్తుందంటూ ఆందోళన వ్యక్తం చేస్తున్నారు. మెడిసిన్ సీట్లకు కాంపిటీషన్ ఎక్కువగా ఉంటుందని.. ఏజ్ లిమిట్ ఉండాల్సిందే అని డిమాండ్ చేస్తున్నారు ఫ్రెషర్స్. అడ్మిషన్ ప్రక్రియలో మాత్రం CBSE నిబంధనలు అనుగుణంగా ఉన్నప్పుడు.. ఎంట్రన్స్ టెస్ట్ రాసి క్వాలిఫై అయితే ఏం ప్రయోజనం అని కూడా ఫ్రెషర్స్ ప్రశ్నిస్తున్నారు.

హైదరాబాద్ : కేంద్రప్రభుత్వం పాత రూ.500, 1,000 నోట్లను రద్దు చేసి కొత్త నోట్లను అమలులోకి తెచ్చిన విషయం తెలసిందే. అయితే అమల్లోకి తెచ్చిన కొత్త నోట్లు.. రెండేళ్లలోపే పనికిరాకుండా పోతున్నాయనే ఆందోళన సర్వత్రా వ్యక్తమవుతోంది. పాత నోట్లతో పోలిస్తే అధిక భద్రతా ప్రమాణాలు పొందుపరచామని, నకిలీలు చేయడం కష్టమని కొత్త నోట్ల విడుదల సందర్భంగా ప్రభుత్వం తెలిపింది. అయితే నకిలీ నోట్లు కూడా విజృంభిస్తుండగా అసలు నోట్లు మాత్రం రెండేళ్లలోపే వినియోగం నుంచి వెనక్కి మరల్చాల్సి రావడం అంటే.. నాసిరకంగా తయారు చేయడమే అనే విమర్శలు వస్తున్నాయి.
దెబ్బతింటోన్న కొత్త నోట్ల నాణ్యత..  
పాత రూ.100, 500, 1000 నోట్లు చూసేందుకే కాదు.. వినియోగానికి కూడా మెరుగ్గా ఉండేవి. తడిచినా, విపరీతంగా నలిగినప్పుడు మినహా, ఇవి దీర్ఘకాలం వినియోగానికి బాగుండేవి. కొత్తగా విడుదల చేసిన రూ.2000, 500 నోట్ల నాణ్యత అప్పుడే దెబ్బతింటోందని, వీటిల్లో ఏటీఎం సెన్సార్లు గుర్తించలేకపోతున్న నోట్లను బ్యాంకులు పక్కన బెడుతున్నాయని హిందీ దినపత్రిక అమర్‌ ఉజాలా వెల్లడించింది. కాగితం నాణ్యత బాగుంటేనే, నోట్లను ఏటీఎం సెన్సార్లు గుర్తిస్తాయని, అందుకు భిన్నంగా ఉన్న వాటిని గుర్తించవని తెలిపింది. ఈ ఏడాది కొత్తగా విడుదల చేసిన రూ.10 నోటు నాణ్యత కూడా సరిగా లేదని పేర్కొంది.
బ్యాంకులకు తిరిగి చేరుతున్న కొత్త నోట్లు.. 
వినియోగానికి అనువుగా లేకుండా పోయిన నోట్లను బ్యాంకులు పక్కన బెడుతున్నాయని కూడా హిందీ పత్రిక తెలిపింది. వీటిని ‘జారీ చేయడానికి అనువుగా లేనివి’గా గుర్తిస్తున్నాయని పేర్కొంది. ఏటీఎం సెన్సార్లు గుర్తించని నోట్లనే బ్యాంకులు ఈ విధంగా పక్కన బెడుతున్నాయని సమాచారం. ప్రజలు కూడా ముతకగా మారిన నోట్లను బ్యాంకులకు తెచ్చి, కొత్త నోట్లు తీసుకువెళ్తున్నారని పేర్కొంది. మురికిగా మారినవి, మట్టి లేదా ఇంకు వంటి వాటితో ఖరాబయిన వాటిని రిజర్వ్‌ బ్యాంక్‌ ఆఫ్‌ ఇండియాకు బ్యాంకులు పంపుతాయి. వాటిని వినియోగంలో నుంచి తొలగిస్తారు.
కొత్త నోట్ల నాణ్యతపై ఆరోపణలు.. ప్రభుత్వ ఖండన.. 
నోట్ల కాగితం నాణ్యతపై రాజీ పడుతున్నామన్న ఆరోపణను ప్రభుత్వం ఖండించింది. నకిలీలు ముద్రించేందుకు అడ్డుకట్ట వేసే భద్రతా ప్రమాణాలు వీటిల్లో ఉన్నాయని తెలిపింది. ‘నోట్లు వినియోగానికి పనికిరాకుండా పోడానికి కారణాలున్నాయి. నోట్లను విపరీతంగా మడిచి జాగ్రత్త చేసుకోవడం, చీరకొంగులో, పంచెల్లో వీటిని ముడివేయడం వల్ల ఎక్కువగా నలగడంతో వినియోగానికి ఇబ్బందులు రావచ్చు’ అని ఆర్థిక శాఖ పరిధిలోని బ్యాంకింగ్‌ డివిజన్‌ ఉన్నతాధికారి ఒకరు పేర్కొన్నట్లు అమర్‌ ఉజాలా పత్రిక తెలిపింది.

 

ఢిల్లీ : దేశ రాజధానిలో ఢిల్లీలో విషాదం నెలకొంది. ఏసీపీ ఆత్మహత్యకు పాల్పడ్డాడు. పోలీస్ హెడ్ క్వార్టర్స్ భవనంపై నుంచి దూకి ఏసీపీ ప్రేమ్ బల్లా (53) ఆత్మహత్య చేసుకున్నాడు. ఇవాళ ఉదయం ఆత్మహత్య చేసుకున్నాడు. భవనం మెయిన్ గేట్ వద్ద మృతదేహాన్ని కనుగొన్నారు. ప్రేమ్ బల్లా ఆత్మహత్యకు గల కారణాలు తెలియారాలేదు. 

 

హైదరాబాద్ : లైఫ్‌టైమ్‌ వ్యాలిడిటీ ఉందని ప్రీపెయిడ్‌ యూజర్లు నిశ్చితంగా ఉన్నారా? అయితే మీ సెల్ ఫోన్ మూగబోక తప్పదు. ఇకనుంచి లైఫ్‌టైమ్‌ వ్యాలిడిటీ ఉండదు. ప్రతి నెలా కచ్చితంగా రీచార్జ్‌ చేసుకోవాల్సిందే. రీచార్జ్‌ చేసుకోలేకపోతే సర్వీసులు డిస్‌కనెక్ట్‌ కానున్నాయి. నిర్దిష్ట మొత్తంలో రీచార్జ్‌ చేసుకోకపోతే బ్యాలెన్స్‌ ఉన్నా సర్వీసులు నిలిపివేయపడతాయి. అవుట్‌గోయింగ్, ఇన్‌కమింగ్‌ కాల్స్‌ కూడా కట్‌ కానున్నాయి. 
రిలయన్స్‌ జియో రాకతో.. 
రిలయన్స్‌ జియో రాకతో కకావికలమైన టెలికాం కంపెనీలు తమ ఆదాయాలను మెరుగుపర్చుకునే పనిలో పడ్డాయి. ఆదాయం సమాకూర్చే ప్రయత్నాలపై దృష్టి సారించాయి. ఫలితంగా ప్రీపెయిడ్‌ యూజర్ల నెత్తిన తప్పనిసరి కనీస రీచార్జ్‌ పిడుగు పడేశాయి. ఇప్పటిదాకా ఇస్తున్న లైఫ్‌టైమ్‌ వ్యాలిడిటీని పక్కన పెట్టి ప్రతి నెలా కచ్చితంగా నిర్దిష్ట మొత్తంలో రీచార్జ్‌ చేసుకోవాల్సిందేనని.. లేకపోతే సర్వీసులు డిస్‌కనెక్ట్‌ చేస్తామని ఆయా టెలికాం సంస్థలు ఎస్‌ఎంఎస్‌లు పంపిస్తున్నాయి. 
రీచార్జ్‌ చేసుకుంటేనే మొబైల్‌ సర్వీసులు .. 
రీచార్జ్‌ల కోసం టెలికాం దిగ్గజాలైన ఐడియా, ఎయిర్‌టెల్, వొడాఫోన్ సంస్థలు 28 రోజుల వ్యాలిడిటీతో రూ. 100 లోపు కనీస ప్రీపెయిడ్‌ ప్యాక్ లను ప్రవేశపెట్టాయి. వీటిలో రూ. 35, రూ. 65, రూ. 95 మొదలైన ప్యాక్స్‌ ఉన్నాయి. ఈ కనీస ప్లాన్స్‌తో రీచార్జ్‌ చేసుకోకపోతే 30 రోజుల్లోగా అవుట్‌గోయింగ్‌ కాల్స్, 45 రోజుల్లోగా ఇన్‌కమింగ్‌ కాల్స్‌ నిల్చిపోతాయి. అంటే ఈ కనీస ప్లాన్స్‌తో రీచార్జ్‌ చేసుకుంటేనే మొబైల్‌ సర్వీసులను .. ముఖ్యంగా ఇన్‌కమింగ్‌ కాల్స్‌ను అందుకోవచ్చు. ఈ కొత్త నిబంధన కారణంగా అకౌంట్లో బ్యాలెన్స్‌ ఉన్నా రీచార్జ్‌ గడువు ముగియడంతో ఇప్పటికే పలువురు ప్రీపెయిడ్‌ యూజర్లకు అవుట్‌గోయింగ్‌ కాల్స్‌ను నిలిపివేస్తున్నాయి. 
అకస్మాత్తుగా ఆగిపోయిన కాల్స్‌.. 
టెలికాం నుంచి  మెసేజీలు వస్తుండటం సాధారణమేనని వాటిని పెద్దగా పట్టించుకోని యూజర్లు.. కనీస రీచార్జ్‌పరమైన కొత్త మార్పుల వల్ల అకస్మాత్తుగా కాల్స్‌ ఆగిపోతుండటంతో గందరగోళ పరిస్థితులు ఎదుర్కొంటున్నారు. ముఖ్యంగా ఇన్‌కమింగ్‌ కాల్స్‌ కోసం మాత్రమే ఎక్కువగా మొబైల్‌ ఫోన్స్‌ను ఉపయోగించే గ్రామీణ ప్రాంతాల్లో వారిపై ఈ విధానం ప్రభావం చూపే అవకాశం ఉందని పరిశ్రమ వర్గాలు పేర్కొన్నాయి.
పెరగనున్న టెలికాం ఆదాయాలు.. 
దీర్ఘకాలంగా రీచార్జ్‌ చేసుకోని కస్టమర్లు ఎయిర్‌టెల్‌లో 10 కోట్ల మంది, వొడాఫోన్‌ ఐడియాలో 15 కోట్ల మంది ఉన్నట్లు అంచనా. కనీస రీచార్జ్‌ తప్పనిసరి కారణంగా వీరిలో ఎయిర్‌టెల్‌ నుంచి కనీసం సగం మంది బైటికి వెళ్లిపోయినా .. మిగిలిన వారి నుంచి ప్రతి నెలా ఆదాయం రానుంది. ఉజ్జాయింపుగా ఈ సంస్థలకు ఇప్పటిదాకా పాతిక కోట్ల మంది యూజర్లపై అడపాదడపా రూ. 250 కోట్లు వస్తుండగా (రూ. 10 రీచార్జితో) .. ఇకపై యూజర్ల సంఖ్య సగం తగ్గినా కనీస రీచార్జీ రూ. 35 లెక్కన చూస్తే ప్రతి నెలా రూ. 437 కోట్లయినా రావచ్చని అంచనా వేస్తున్నారు.

 

Pages

Don't Miss