National News

న్యూఢిల్లీ: ఇది పోలీసు స్టేషన్. కానీ అక్కడ పిల్లలు ఓనమాలు దిద్దుతుంటారు. అదేంటి పిల్లలు స్కూల్లో కదా వుండాలి..పోలిస్ స్టేషన్ లో చదువులేంటి అనుకుంటున్నారా? మీరు చదివింది నిజమే. పోలీస్ స్టేషనే బడిగా మారిపోయిన వైనం. ఇది ఓ యువకుడు సాధించిన విజయం. ఈ విజయానికి ఫలితం అసలు బడి మొహం కూడా చూడని మురికివాడల పిల్లలు ఇప్పుడీ పోలీస్ స్టేషన్ లో చదువులు నేర్చుకుంటున్నారు. పోలీస్ బడిలో ఓనమాలు దిద్దేస్తున్నారు. ఇదంతా సందీప్ బోహత్ అనే యువకుడి కృషికి నిదర్శనం. 
20 ఏళ్ల సందీప్ బోహత్ మురికివాడలలో నివసించే 40 మంది  పిల్లలకు పాఠాలు చెప్పి వారి జీవితాలను మార్చివేశాడు. వారికి ఒక పార్కులో ఉచితంగా వారికి బోధన ప్రారంభించారు. అక్టోబర్ 29 న ఈ ప్రయత్నంలో అనేక మంది సహాయంతో ముందుకు వచ్చారు. ఇన్స్పెక్టర్ సింగ్ ఉన్నారు, వీరు వారికి పోలీస్ స్టేషన్లో ఒక గదిని ఇచ్చారు. ఇలా కాలక్రమేణా చాలామంది ప్రజలు సహాయం చేయటానికి ముందుకొచ్చారు. అంతేకాదు ఇక్కడ ఖాళి సమయంలో మహిళా పోలీసులు కూడా ఈ పిల్లలకు చదువులు చెబుతుంటారు.
మురికివాడల యొక్క దుర్భర పరిస్థితిని గురించి అతను ఏదో చేయాలని అనుకున్నాడు.అతను వారికి శిక్షణనివ్వడం మొదలుపెట్టాడు..మురికివాడ గృహంలో జీవితాలు ఎలా వుంటాయో బోహాత్ మురికివాడల్లో పర్యటించి అర్థం చేసుకున్నాడు. ఒక స్వీపర్ కుమారుడుగా వుండే తాను చదువుకునేందుకు వచ్చినప్పుడు అటువంటి ఆర్థిక అడ్డంకులు ఎదుర్కొన్నాడు. అతను ఇప్పుడు స్కూల్ ఆఫ్ ఓపెన్ లెర్నింగ్ నుండి తన గ్రాడ్యుయేషన్ పూర్తి చేసాడు. 

బోహత్ రోజువారీగా చిన్న  చిన్న మొత్తాలను కూడబెట్టి మురికివాడల్లో మరుగుదొడ్లు నిర్మించగలిగాడు. తన పుట్టినరోజుకు వినియోగించే డబ్బుతో ముగ్గురు మహిళలు మరియు వికలాంగుడైన ఒక కుటుంబానికి ఒక టాయిలెట్ నిర్మించడానికి ఒక కాలనీ నివాసి కూడా ముందుకొచ్చారు. 
ఇది గమనించిన ప్రేమ్‌నగర్‌ స్టేషన్‌ హౌస్‌ ఆఫీసర్‌ ముఖేశ్‌ త్యాగి పాఠశాలను పోలీస్‌స్టేషన్‌ ఆవరణలో ఉన్న ఖాళీ స్థలంలో  నిర్వహించుకునేందుకు అవకాశం కల్పించారు. నగరంలోని రోహిణి సౌత్ పోలీసు స్టేషన్లో మంగళవారం ఉదయం, పిల్లలు వారి తరగతిలోకి వచ్చేసరికి ప్రతి విద్యార్ధికి, ఒక వార్డ్ రోబ్, ఫర్నిచర్ కోసం వేచి ఉన్న పుస్తకాలు ఉన్నాయి. ఇదంతా బోహత్ కృషి ఫలితమే.  ఈ సందర్భంగా బోహత్ ఓ సమావేశాన్ని ఏర్పాటు చేశాడు. ఈ సమావేశానికి ఇన్స్పెక్టర్ జగ్మిందర్ సింగ్ , స్టేషన్ హౌస్ ఆఫీసర్ హాజరయ్యారు. 
 

కోల్ కతా: పశ్చిమ బెంగాల్ కు చెందిన ప్రముఖ బ్యాడ్మింటన్ క్రీడాకారుడు  త్రినాంకుర్ నాగ్ (26) విధి నిర్వహణలో ఉండగా కరెంట్ షాక్ తో మృతి చెందారు.  కోల్ కతా లోని కంకుర్గాచి రైల్వే కార్ షెడ్ లో శనివారం నాడు  పని చేస్తుండగా, హైటెన్షన్ లైను తగలటంతో  తీవ్రగాయాలకు లోనయ్యాడు.  వెంటనే అతడ్ని బీఆర్ సింగ్ ఆసుపత్రిలో చేర్పించారు 2 రోజుల పాటు ఆసుపత్రిలో చికిత్స పొందుతూ సోమవారం మరణించినట్లు రైల్వే వర్గాలు తెలిపాయి. 
స్పోర్ట్స్ కోటాలో  రైల్వేలో ఉద్యోగం పొంది, ఈస్ట్రన్ రైల్వేలో పనిచేస్తున్న త్రినాంకుర్ నాగ్, ప్రస్తుతం వెస్ట్ బెంగాల్ డబుల్స్‌ నంబర్‌ వన్‌ ర్యాంకింగ్‌ ఆటగాడిగా ఉన్నారు. చిన్నప్పటినుంచి బ్యాడ్మింటన్ పట్ల ఆసక్తి ఉన్న నాగ్ తల్లి తండ్రుల ప్రోత్సాహంతో పలు టోర్నీల్లో అనేక బహుమతులు పొందాడు. 
"త్రినాంకుర్ నాగ్ మరణం బెంగాల్  బ్యాండ్మింటన్ కు తీరని లోటని, రాష్ట్రానికి ఏన్నో పతకాలు సాధించి  పెట్టిన నాగ్ మరణం చాలా బాధించిందని,  రాష్ట్రం గొప్ప క్రీడాకారుడిని కోల్పోయిందని, అతను లేనిలోటు పూడ్చలేనిదని" పశ్చిమ బెంగాల్  బ్యాడ్మింటన్ అసోసియేషన్ అధికారి బిశ్వాస్ సంతాపం తెలిపారు. 

ఢిల్లీ : కేంద్ర ఎన్నికల సంఘం కమిషనర్‌గా పనిచేస్తున్న సునీల్‌ అరోరాను కొత్త ప్రధాన ఎన్నికల అధికారిగా నియమిస్తూ రాష్ట్రపతి రామ్ నాధ్ కోవింద్‌ సోమవారం ఉత్తర్వులు జారీ చేశారు. డిసెంబర్ 2న అరోరా పదవీ బాధ్యతలు స్వీకరిస్తారు.  ప్రస్తుతం సీఈసీగా ఉన్న ఓపీ రావత్‌ పదవీకాలం డిసెంబరు 2న ముగుస్తుంది. 1980 బ్యాచ్, రాజస్ధాన్ కేడర్ కు చెందిన ఐఏఎస్‌ అధికారి అరోరా గతే ఏడాది సెప్టెంబర్‌లో ఎన్నికల సంఘం అధికారిగా నియమితులయ్యారు. గతంలో ఆయన సమాచార, ప్రసార మంత్రిత్వశాఖలో స్కిల్  డెవలప్ మెంట్  సెక్రటరీ గా బాధ్యతలు నిర్వర్తించారు. ఆర్థికమంత్రిత్వశాఖ, టెక్స్‌టైల్‌,  టెక్స్టైల్స్ అండ్ ప్లానింగ్ కమిషన్‌ శాఖల్లోనూ అరోరా పనిచేశారు. ఇండియన్‌ ఎయిర్‌లైన్స్‌ సీఎండీగానూ 5 ఏళ్లపాటు సేవలందించారు. రాజస్ధాన్ లో వసుంధర రాజే ముఖ్యమంత్రిగా ఉన్నసమయంలో (2005-2008) ప్రిన్సిపల్ సెక్రటరీ గా కూడా సునీల్ అరోరా పనిచేశారు. 

నర్సరీ నుంచే బరువుల మోత.. నాలుగో తరగతికి వచ్చే సరికి మోయలేని భారం.. వీపులపై మోయలేని భారం మోస్తున్నారు పిల్లలు. స్కూల్ బ్యాగ్ బరువు మోయలేక.. స్కూల్‌లోని మెట్లు ఎక్కుతూ కుప్పకూలి ఓ స్టూడెంట్ చనిపోయిన ఘటన తెలిసిందే. ఎప్పటి నుంచో స్కూల్ బ్యాగ్ బరువులపై వివాదం నడుస్తోంది. దీనిపై సుదీర్ఘంగా మేధావులతో చర్చించిన కేంద్ర మానవ వనరుల శాఖ.. కొత్తగా విధివిధానాలు రూపొందించింది. ఏయే తరగతికి.. స్కూల్ బ్యాగ్ బరువు ఎంత ఉండాలి అనేది నిర్ణయిస్తూ ఆదేశాలు జారీ చేసింది. 
తరగతులు బ్యాగ్ బరువు
1-2 వరకు 1.5 కేజీలోపు
3-5 వరకు 2-3 కేజీలలోపు
6-7 వరకు 4 కేజీలకు మించకూడదు
8-9 వరకు 4.5 కేజీల వరకు ఉండొచ్చు
10వ తరగతి 5 కేజీల వరకు ఉండొచ్చు
 
ఇది స్కూల్ బ్యాగ్ బరువు మాత్రమే. లంచ్ బాక్స్, వాటర్ బాటిల్ అదనం. పుస్తకాల బరువు మాత్రం ఆయా తరగతులకు.. అంతకంటే మించకూడదు..

జంబోని (వెస్ట్ బెంగాల్) : ఒకపక్క వీహెచ్పీ, ఆర్ఎస్సెస్‌లు రామమందిర నిర్మాణానికి వత్తిళ్లు పెంచుతుంటే.. వెస్ట్ బెంగాల్ ముఖ్యమంత్రి మమతా బెనర్జీ బీజేపీ నేతలపై విమర్శల వర్షం కురిపించారు. బీజేపీ నేతలు పూజించేంది రాముడిని కాదు.. రాక్షసరాజైన రావణాసురుడిని అంటూ ఫైర్ అయ్యారు. దేవుడి పేరుచెప్పి ఓట్లు కొల్లగొట్టేందుకు తన పార్టీ ఎప్పుడూ ప్రయత్నించదని మమతా ఎద్దేవా చేశారు. వాళ్లు పూజ చేసేది రావణుడికి.. రాముడికి కాదు. దేవుడిపేరు చెప్పి వాళ్లు (బీజేపీ నేతలు) ప్రజలను విడదీస్తున్నారని సోమవారం బహిరంగసభలో ప్రసంగిస్తూ విమర్శించారు. 
 

 

బిల్వారా (రాజస్థాన్): రాజస్థాన్‌లో జరిగిన ఎన్నికల ర్యాలీలో ప్రధాన మంత్రి నరేంద్ర మోడీ సోమవారం మాట్లాడుతూ రాహుల్ గాంధీపై, కాంగ్రెస్ నేతలపై పెద్దఎత్తున ఎదురుదాడికి దిగారు. 166 మంది ప్రాణాలు తీసిన 26/11 ముంబై టెర్రర్ దాడులకు పదేళ్లు నిండిన సందర్భాన్ని ప్రస్తావిస్తూ... 2008లో కాంగ్రెస్ పార్టీ సంకీర్ణ సర్కారును నడుపుతూ మాకు దేశభక్తి గురించి పాఠాలు చెబుతోంది.. అదే తమ ప్రభుత్వం సర్జికల్ దాడులకు దిగితే తిరిగి మమ్మల్నే ప్రశ్నిస్తోందని మోడీ విమర్శించారు. విదేశీ భూభాగంలోకి ధైర్యంగా మన సైనికులు ప్రవేశించి సర్జికల్ దాడులను చేసినందుకు దేశం యావత్తూ సగౌవరంగా స్వీకరించగా.. కాంగ్రెస్ పార్టీ నేతలు మాత్రం వీడియో ఆధారాలకోసం ప్రశ్నల వర్షం కురిపించారని.. పోరాటానికి వెళ్లే సైనికులు తమతోపాటు ఆధారాల కోసం కెమేరాలను తీసికెళతారా.. అంటూ మోడీ ప్రశ్నించారు.  రాహుల్ గాంధీపై విమర్శలు గుప్పిస్తూ ర్యాలీలో ప్రజలను ఉద్దేశించి.. మీరెప్పుడన్నా ప్రధాని శలవులో ఉండగా చూశారా.. కనీసం మీరెప్పుడన్నా విన్నారా.. నేను శలవుతీసుకొని సరదాగా టూర్ వెళ్లిన సందర్భాలు ఉన్నాయా అంటూ ప్రశ్నించారు.  
 

 

హైదరాబాద్ : టీవీలు, ఫ్రిజ్‌లు కొనాలనుకుంటున్నారా..? అయితే ఏమాత్రం ఆలశ్యం చేయకుండా వెంటనే కొనేయండి. ఓ నాలుగు రోజులు ఆగుదాము అనుకున్నారో.. మీరు భారీ మూల్యమే చెల్లించాల్సి వస్తుంది. అవును. డిసెంబర్ ఒకటో తేదీ నుంచి, ఎలెక్ట్రానిక్ గూడ్స్ ధరలను పెంచేయాలని అన్ని ప్రధాన కంపెనీలు ఓ నిర్ణయానికి వచ్చేశాయి. 
ధరలు పెరిగేవి ఇవే..
టీవీలు, ఫ్రిజ్‌లు, వాషింగ్ మిషన్‌లు, ఏసీల ధరలపై తక్షణ ప్రభావం పడబోతోంది. ఎలెక్ట్రానిక్ గాడ్జెట్స్ ధరలు కూడా పెరిగే చాన్స్ లేకపోలేదు. స్మార్ట్ ఫోన్ బ్రాండ్స్‌లో జియామీ ఇప్పటికే 15శాతం మేర ధర పెంచుతున్నట్లు ప్రకటించింది. ఇతర స్మార్ట‌ఫోన్‌ తయారీ సంస్థలూ ఇదే బాట పట్టే అవకాశం ఉంది. ఇక హోం అప్లయెన్సెస్‌కి సంబంధించి, పానసానిక్ సంస్థ ఏడు శాతం మేర ధరలు పెంచాలని నిర్ణయానికి వచ్చింది. ఈరంగంలో దిగ్గజంలాంటి గోడ్రెజ్ సంస్థ కూడా ఇదే రేంజ్‌లో రేట్లు పెంచాలనుకుంటోంది. హెయిర్ సంస్థదీ ఇదే బాట. అయితే ఒక్క సోనీ మాత్రమే ఇంకా డెసిషన్ తీసుకోలేదు. నిజానికి సెప్టెంబర్ నెల్లోనే ధరలు పెంచాలనుకున్నారు. కానీ, పండుగల సీజన్ కావడం.. అమ్మకాలపై భారీగా ప్రభావం పడుతుందన్న ఆందోళనతో కంపెనీలు వెనక్కి తగ్గాయి. 
ఉన్నట్టుండి ఎందుకీ పెంపు..?
డాలర్‌తో పోలిస్తే రూపాయి విలువ దారుణంగా పడిపోయింది. దీని ప్రభావంతో కంపెనీల మీద దిగుమతుల భారం బాగా పెరిగిపోయింది. అదే రేషియోలో ప్రొడక్షన్ కాస్ట్ కూడా అంచనాలను మించిపోయింది. దీనికితోడు, ఈసారి పండుగల సీజన్‌ కూడా హోం అప్లయెన్సెస్ రంగానికి ఏమాత్రం ఆశాజనంగా లేదు. కేరళ, తమిళనాడు తదితర రాష్ట్రాల్లో తుపానులు, వరదల కారణంగా, పండుగల సీజన్ బోసిపోయింది. అందుకే ధరలు పెంచాలని దాదాపుగా అన్ని బ్రాండెడ్ కంపెనీలూ నిర్ణయానికి వచ్చాయి. 

 

న్యూఢిల్లీ: ఇప్పటికే స్కూలు బ్యాగుల బరువుపై పరిమితి విధించిన మోడీ సర్కార్ తాజాగా స్కూలు పిల్లలకు మరో వరం ప్రకటించింది. ఒకటి, రెండు తరగతుల పిల్లలకు ‘నో హోంవర్క్’ అంటూ మానవ వనరుల అభివృద్ధి మంత్రిత్వ శాఖ రాష్ట్ర ప్రభుత్వాలకు, కేంద్రపాలిత ప్రాంతాలకు ఆదేశాలు జారీచేసింది. 
పాఠ్యాంశాలను వినూత్నంగా బోధించేందకు, పిల్లలకు స్కూలు బ్యాగుల బరువు ఎక్కువ కాకుండా ఉండేవిధంగా కొత్తగా మార్గదర్శకాలను రూపొందించుకోవాలని హెచ్ఆర్డీ మంత్రిత్వ శాఖ రాష్ట్ర ప్రభుత్వాలను, కేంద్ర పాలిత ప్రాంతాలను ఆదేశించింది. ఇందులో భాగంగా ఒకటి, రెండు తరగతులు చదివే పిల్లలకు హోంవర్క్ ఇవ్వరాదని సూచించింది.
 

 

న్యూఢిల్లీ: కేంద్ర మాజీ మంత్రి పి చిదంబరంకు కోర్టు నుంచి రక్షణ కవచం వీడిపోబోతోంది. వచ్చేనెల 18వరకు చిదంబరం, ఆయన కుమారుడు కార్తి చిదంబరం అరెస్టు కాకుండా తాత్కాలిక రక్షణ కల్పిస్తూ కోర్టు ఆదేశాలు ఉన్నప్పటికీ..సీబీఐ దానికి విరుగుడుగా.. కోర్టులో కొన్నివివరాలను ప్రకటించింది. తమకు చిదంబరంను ప్రాసిక్యూట్ చేసేందుకు ప్రభుత్వం వద్దనుంచి అనుమతి ఉందని సోమవారం (నవంబర్ 16) పాటియాల హౌజ్ కోర్టుకు సీబీఐ తెలిపింది.  ఎయిర్ సెల్ - మ్యాక్సిస్ కేసుకు సంబంధించి చిదంబరం, ఆయన కుమారుడు కార్తి చిదంబరంను విచారించేందుకు తమకు కేంద్ర ప్రభుత్వం అనుమతి ఇచ్చిందని సీబీఐ కోర్టులో తెలిపింది. చిదంబరం సహా 18 మందిపై చార్జిషీటు జులై 19, 2018న ధాఖలు చేసినట్టు ప్రత్యేక జడ్జి ఓపీ సైనీకి సీబీఐ న్యాయవాది తెలిపారు. 
చిదంబరంను ప్రాసిక్యూట్ చేసేందుకు అవినీతి నిరోధక చట్టం, 1988 సెక్షన్ 197 కింద కేంద్ర ప్రభుత్వం నుండి అనుమతి లభించిందని కోర్టులో వేసిన పిటీషన్‌లో సీబీఐ తెలిపింది. కేసులో ఇతర నిందితులను సైతం విచారించేందుకు అనుమతుల కోసం చూస్తున్నట్టు సీబీఐ కోర్టుకు తెలిపింది.
 

 

బెంగళూరు : కన్నడ రెబల్ స్టార్ అంబరీష్‌కి కన్నీటి వీడ్కోలు పలికారు. ప్రభుత్వ లాంఛనాలతో అంతిమ సంస్కారాలు నిర్వహించారు. అంతిమ సంస్కారాల కోసం రాష్ట్ర ముఖ్యమంత్రితో పటు పలువురు నేతలు హాజరయ్యారు. సినీ, రాజకీయ, అభిమానుల జనసందోహం మధ్య అంబరీష్‌‌కి తుది వీడ్కోలు పలికారు. కడసారి చూసేందుకు సినీ, రాజకీయ నేతలు, అభిమానులు తరలివచ్చారు. బెంగళూరులోని కంఠీరవ స్టూడియోలో ఆయన అంత్యక్రియలు జరిగాయి. టాలీవుడ్ స్టార్స్ చిరంజీవి..మోహన్ బాబులు కన్నీంటిపర్యంతమయ్యారు. Image result for Ambareesh RIPపలువురు అంబరీష్ పార్థీవ దేహానికి ఘనంగా నివాళులర్పించారు. కన్నడ సినిమాలలో తనదైన ముద్ర వేసిన రెబల్ స్టార్ రాజకీయాల్లో సైతం రాణించారు. ప్రముఖ సినీనటి సుమలత భర్తగా తెలుగు ప్రేక్షకులకు సుపరిచితుడు. 
నవంబర్ 24 శనివారం రాత్రి భోజనం చేసిన అంబరీష్ అకస్మాత్తుగా గుండెనొప్పి రావడంతో వెంటనే ఆయన్ని బెంగళూరులోని విక్రమ్ ఆసుపత్రికి తరలించారు. కానీ అప్పటికే ఆయన తుదిశ్వాస విడిచారని వైద్యులు పేర్కొన్నారు. నవంబర్ 26వ తేదీ కంఠీరవ స్టూడియోలోని రాజ్‌కుమార్ స్మారకం పక్కనే ప్రభుత్వ లాంఛనాలకు ఏర్పాట్లు చేశారు. అంతకుముందు జేపీనగనర్‌లోని ఆయన నివాసంలో ఉంచిన అంబరీష్ పార్థీవదేహానికి పలువురు ఘనంగా నివాళులర్పించారు.

పట్నా (బిహార్) :  ఇప్పుడు దేశమంతటా భారీ విగ్రహాల ఆవిష్కరణల సీజన్ నడుస్తోంది. మొన్నటికి మొన్న ప్రధాని నరేంద్ర మోదీ దేశంలోనే అతి పెద్దదైన సర్దార్ వల్లభ్‌భాయ్ పటేల్ విగ్రహాన్ని ఆవిష్కరిస్తే,  బీహార్ ముఖ్యమంత్రి నితీశ్‌కుమార్,  దేశంలోనే రెండో అతిపెద్ద బుద్ధ విగ్రహాన్ని ప్రారంభించారు.  నలంద జిల్లాలోని రాజ్‌గీర్ వద్దగల చారిత్రక  ఘోర కఠోర సరస్సు మధ్యలో,  70 అడుగుల పొడవైన బుద్ధ విగ్రహాన్ని నితీశ్‌కుమార్ ఆవిష్కరించారు.  హైదరాబాద్ పర్యటకులను ఆకర్షించేందుకు అందమైన పార్క్‌ని కూడా ఇక్కడ అభివృద్ధి చేయనున్నారు. ఇక్కడికి డీజిల్, పెట్రోల్ వాహనాలను ఏమాత్రం అనుమతించేది లేదని, కేవలం ఎలెక్ట్రికల్ వాహనాలకు మాత్రమే పర్మిషన్ ఇస్తామని ముఖ్యమంత్రి నితీశ్ కుమార్ చెప్పారు. ఎకో టూరిజం ముఖ్య కేంద్రంగా బుద్ధవిగ్రహం ప్రసిద్ధ చెందుతుందన్న ఆకాంక్షను ఆయన వ్యక్తం చేశారు. 

జమ్ము కశ్మీర్ : దేశాన్ని కాపాడటంలో ఇండియన్ ఆర్మీ చేసిన త్యాగాలు అసామాన్యమైనవి. కంటికి రెప్పలా దేశాన్ని కాపలా కాయటంలో వారి ప్రాణాలకు సైతం అడ్డువేసి..ప్రజలను రక్షించటంలోవారి వారే సాటి. అంతేకాదు ఉగ్రవాదులు కూడా తమలా ఓ తల్లికి పుట్టిన బిడ్డలేనని..అయినా తమ దేశాన్ని నాశనం చేసేందుకు వస్తే ప్రాణాలు తీసేందుకు కూడా వెనుకాడబోమని ఇప్పటికే పలుమార్లు మన ఇండియన్ ఆర్మీ నిరూపించింది. ఈ నేపథ్యంలో ఇండియన్ ఆర్మీ ఘనత..మానవత ఇనుమడించే సంఘటన ఒక చోటుచేసుకుంది పచ్చటి, చల్లటి కశ్మీర్ లో.
నీ బిడ్డను చంపబోము అంటు ఓ ఉగ్రవాది తల్లికి ఆర్మీ మాట..
సున్నితమైన కశ్మీర్లో పాక్ ఉగ్రవాదులను మట్టుబెడుతున్న సైన్యం.. ఓ తల్లికి ఇచ్చిన మాటను నిలబెట్టుకుంది. ఆదివారం కశ్మీర్లోని బిజ్నారి ప్రాంతంలో జైషే మహ్మద్ ఉగ్రవాద సంస్థకు చెందిన ఇద్దరు టెర్రరిస్టులు భద్రతా దళాలకు తారసపడ్డారు. వారు సైన్యంపై కాల్పులు జరపగా.. భద్రతా దళాలు కూడా ఎదురు కాల్పులు జరిపాయి. ఈ కాల్పుల్లో పాకిస్థాన్‌కు చెందిన ఓ ఉగ్రవాది హతం అయ్యాడు.
కానీ స్థానికంగా పట్టుబడిన ఓ టెర్రరిస్టును మాత్రం ఇండియన్ ఆర్మీ మట్టుపెట్టకుండా ప్రాణాలతో పట్టుకుంది. దీనికి ఓ చెప్పుకోదగిన సంఘటన దాగి వుంది. సోహైల్ అనే టెర్రరిస్టును ప్రాణాలతో పట్టుకున్నారు. నీ బిడ్డను చంపబోమని గతంలో అతడి తల్లికి ఇచ్చిన మాట కోసం భారత సైన్యం అతణ్ని ప్రాణాలతో పట్టుకుంది. అతడు కాల్పులు జరుపుతున్నా..గానీ అతనిపై ఎదురు కాల్పులకు దిగకుండా తమను తాము రక్షించుకుంటునే సొహైల్ ను ప్రాణాలతో పట్టుకుంది మన భారత సైన్యం. అనంతరం సోహైల్‌ను కశ్మీర్ పోలీసులకు అప్పజెప్పిన ఆర్మీ.. అతడి తల్లికి ఇచ్చిన మాటను నిలబెట్టుకుంది. ఇచ్చిన మాటనే కాదు మానవత్వాన్ని చాటి చెప్పింది మన ఇండియన్ ఆర్మీ. దటీజ్ ఇండియన్ ఆర్మీ.

 

కోల్‌కతా:  సెల్ఫీ తీసుకొని స్నాప్‌షాట్‌లో అనుమానాస్పదంగా అభ్యంతరకర మెసేజీలు పంపిస్తున్న ఓ ప్రయాణీకుడ్ని జెట్ ఎయిర్‌వేస్ సిబ్బంది కిందకు దింపేసి.. పోలీసులకు అప్పజెప్పిన ఘటన కోల్‌కతా ఎయిర్‌పోర్టులో సోమవారం (నవంబర్ 26) జరిగింది. వేదన్ పొద్దార్ అనే కోల్‌కతాకు చెందిన ప్రయాణీకుడు కోల్‌కతా నుంచి ముంబై వెళ్లే జెట్ ఏయిర్‌వేస్ విమానంలో ప్రయాణిస్తున్నాడు. పొద్దార్ సెల్ఫీ తీసుకొని ఆ ఫోటోను స్నాప్‌షాట్‌లో ఎవరికో షేర్  చేస్తూ అనుమానాస్పదంగా టెక్స్ట్ మెసేజ్ చేయడం పక్కనున్న ఇతర ప్రయాణీకుడు గమనించాడు. తన ఫోన్ లో ఈ విమానాన్ని హైజాక్ చేసి పేల్చివేస్తానని మాట్లడాటంతో ప్రక్కనున్న ప్రయాణీకులు జెట్ ఎయిర్‌వేస్ సిబ్బందికి సమాచారం ఇచ్చారు. అనుమానంతో పొద్దార్ ను విమానం నుండి దింపేసి విచారణ కోసం పోలీసులు అతనిని అదుపులోకి తీసుకున్నారు. కోల్‌కతాలోని గార్డెన్ లేన్‌లో నివాసం ఉండే పొద్దార్ తాను జాబు ఇంటర్వ్యూకు ముంబై వెళుతున్నట్టు పోలీసు విచారణలో పేర్కొన్నాడు. ఉదయం 8.15 గంటలకు కోల్‌కతా నేతాజీ సుభాష్ చంద్రబోస్ విమానాశ్రయం నుంచి బయల్దేరాలిసిన విమానం... ఈ సంఘటన కారణంగా దాదాపు గంటన్నరసేపు ఆలస్యమైంది.
 

 

ఢిల్లీ : కేంద్రం ప్రభుత్వం పెట్రోల్ బంక్ ల కోసం భారీగా ఆహ్వానం పలికింది. ఏకంగా 65 వేల బంక్ ల కోసం దరఖాస్తులు కోరుతు నోటిఫికేషన్ జారీ చేసింది. మూడు ప్రభుత్వం రంగ ఆయిల్ కంపెనీలు ఇప్పటికే అనుమతులను ప్రతిపాదించగా కేవలం లాంఛన ప్రాయమైన అనుమతులే మిగిలివున్నట్లుగా తెలుస్తోంది. మునుపెన్నడూ లేనంత భారీగా మూడు ప్రభుత్వం రంగ పెట్రోల్ నిర్వహించుకునేందుకు అనుమతులను కోరాయి. దేశంలో జరగనున్న ఐదు రాష్ట్రాలను మినహాయించి పెట్రోల్ బంక్ ల నిర్వహణకు అనుమతులను ఆహానించింది కేంద్ర ప్రభుత్వం. దీంతో రాజకీయ పరిణామాలు ఈ అంశంతో ముడిపడి వున్నాయని  దరఖాస్తుల ఆహ్వానంపై విమర్శలు వెల్లువెత్తుతున్నాయి. అయినవారికే వీటిని కట్టబెట్టేందుకు ఈ భారీ ఆహ్వానాలు అనే విమర్శలు వస్తున్నాయి. ఎందుకంటే ఇప్పటకే 62,585 ఫ్యూయల్ స్టేషన్స్ వున్నాయి. 6వేల పెట్రోల్ పంప్ కొనసాగుతున్నాయి. ఈ దశలో కొత్తస్థాయిలో పెట్రోల్ బంక్స్ రావటం..పాత బంక్ ల లాభాలను దెబ్బతీస్తాయంటున్నారు. కానీ కొత్త బంకుల రాకతో ఉపాధి అవకాశాలు మెరుగుపడినా..రానున్న ఆరు నెలల్లో పార్లమెంట్ కు ఎన్నికలు రానున్న క్రమంలో ఇప్పుడు ఇంత భారీ సంఖ్యలో పెట్రోల్ బంక్ ల అనుమతులకు ఆహ్వానాలు రావటంపై విమర్శలు వెల్లువెత్తుతున్నాయి. మరోపక్క పాత పెట్రోల్ బంక్ యజమానులు తమ లాభాలపై తీవ్రంగా ప్రభావం పడుతుందని వాపోతున్నారు. 
 

ఛత్తీస్‌గఢ్‌ : రాష్ట్రంలో మరోసారి తుపాకులు ఘర్జించాయి. సుక్మా జిల్లాలో మావోయిస్టులు, భద్రతా బలగాల మధ్య జరిగిన ఎదురుకాల్పుల్లో తొమ్మిది మంది మావోయిస్టులు హతమయ్యారు. భారీ ఎన్ కౌంటర్ లో భాగంగా తొమ్మిదిమంది మావోయిస్టులతో సహా ఇద్దరు డీఆర్జీ జవాన్లు మృతి చెందారు. 
మావోల మృతులు పెరిగే అవకాశం : అవస్థీ
సుక్మా జిల్లాలో డీఆర్జీ, ఎస్టీఎఫ్‌, సీఆర్‌పీఎఫ్‌ సంయుక్తంగా కూంబింగ్‌ నిర్వహిస్తుండగా ఎదురుపడిన మావోయిస్టులు వారిపై కాల్పులు జరిపారు. దీంతో అప్రమత్తమైన భద్రతా బలగాలు ఎదురుకాల్పులు జరపడంతో తొమ్మిది మంది మావోయిస్టులు మృతి చెందినట్లు అధికారులు వెల్లడించారు. ఈ ఘటనలో ఇద్దరు డీఆర్జీ జవాన్లు సైతం ప్రాణాలు కోల్పోయారు. కాగా ఎన్‌కౌంటర్ ఇంకా కొనసాగుతోందని అధికారులు తెలిపారు. ఈ సందర్భంగా  ప్రత్యేక డీజీపీ డీఎం అవస్థీ మాట్లాడుతు..తొమ్మిది మంది మావోయిస్టుల మృతదేహాలను స్వాధీనం చేసుకున్నామని, వీరి సంఖ్య ఇంకా పెరిగే అవకాశం ఉందని తెలియజేశారు. డిస్ట్రిక్ట్ రిజర్వ్ గార్డ్స్, సీఆర్పీఎఫ్, స్పెషల్ టాస్క్ ఫోర్స్ పోలీసులు మావోయిస్టుల కోసం కూబింగ్ నిర్వహిస్తుండగా ఎన్‌కౌంటర్ చోటుచేసుకున్నట్టు ఆయన వెల్లడించారు. ఈ క్రమంలో ఇద్దరు డీఆర్జీ జవాన్లు సైతం ప్రాణాలు కోల్పోయారని, ఆపరేషన్ ఇంకా కొనసాగుతోందని ఆయన వివరించారు. కొద్ది సేపటి తర్వాత పూర్తి వివరాలను వెల్లడిస్తామని అన్నారు. 
ఛత్తీస్ గఢ్ ఎన్నికల్లో మావోల హింసాత్మక చర్యలు..
కాగా  నవంబరు 12, 20 తేదీల్లో రెండు దశల్లో శాసనసభ ఎన్నికలు నిర్వహించిన విషయం తెలిసిందే. ఈ సమయంలో మావోయిస్టులు కొన్ని ప్రాంతాలలో హింసాత్మక చర్యలకు పాల్పడ్డారు. నవంబరు 12న మావోయిస్టు ప్రభావిత ప్రాంతంలోని 18 నియోజకవర్గాల్లో పోలింగ్ జరగ్గా, బీజాపూర్ జిల్లాలో ఎన్నికల విధులకు వచ్చి తిరిగి వెళ్తోన్న బీఎస్ఎఫ్ జవాన్లే లక్ష్యంగా దాడి చేశారు. ఈ ఘటనలో ఒక బీఎస్ఎఫ్‌ జవాను మృతిచెందగా, మరో ఆరుగురు తీవ్రంగా గాయపడిన విషయం తెలిసిందే. 

లక్నో: ఉత్తరప్రదేశ్ లో ఆదివారం రామమందిర నిర్మాణం చేయాలనే  డిమాండ్ తో  విశ్వహిందూ పరిషత్ ఆధ్వర్యంలో భారీ ధర్మసభ నిర్వహించగా....మరో వైపు ఉత్తర ప్రదేశ్ ముఖ్యమంత్రి యోగీ ఆదిత్యనాధ్ అయోధ్యలో అతి ఎత్తైన రాముడి విగ్రహ నిర్మాణానికి సంబంధించిన పనుల్లో బిజీగా ఉన్నారు. గుజరాత్ లో నర్మదానది ఒడ్డున నిర్మించిన సర్దార్ వల్లభాయ్ పటేల్ విగ్రహం(182 మీటర్ల స్టాచ్యూ ఆఫ్ యూనిటీ) కంటే ఎత్తుగా 221 మీటర్ల ఎత్తులో యోగి ప్రభుత్వం దీన్ని నిర్మిస్తోంది."స్టాచ్యూ ఆఫ్ ది మర్యాద పురుషోత్తమ్" పేరుతో  రాముడి విగ్రహాం నిర్మిస్తున్నారు. దీని నిర్మాణానికి సంబంధించిన డిజైన్లను ముఖ్యమంత్రి శనివారం ఖరారు చేశారు.   
విగ్రహం పునాది 50 మీటర్లు, విగ్రహం ఎత్తు 151 మీటర్లు, దానిపై ఉండే గొడుగు 20 మీటర్లు ఉండేలా విగ్రహాన్నిడిజైన్ చేశామని, ఇది ప్రపంచంలో అత్యంత ఎత్తైన కట్టడం అవుతుందని ఉత్తరప్రదేశ్  రాష్ట్ర సమాచార శాఖ ముఖ్యకార్యదర్శి అవనీశ్ అవస్ధి చెప్పారు. విగ్రహం కింద ఇక్ష్వాకు వంశ చరిత్రకు సంబంధించిన విశేషాలతో అధునాతన మ్యూజియం ఏర్పాటు  చేస్తామని  అవస్ధి చెప్పారు. సరయూ నది ఒడ్డున నిర్మించే రాముడి కాంస్యవిగ్రహం చుట్టుపక్కల పర్యాటక రంగం అభివృధ్ది చెందేలా ప్రణాళికలు రూపొందిస్తున్నట్లు అవనీశ్ అవస్ధి తెలిపారు.

శబరిమల : అయ్యప్ప సన్నిధానం పరిసరాల్లో ఉద్రిక్త  పరిస్థితి కొనసాగుతునే ఉంది. ఆలయంలోకి మహిళ ప్రవేశాన్ని నిరసిస్తూ హిందూశక్తులు ఆందోళనలను కొనసాగిస్తునే ఉన్నాయి. గడచిన రెండు రోజుల్లో వావర్‌నాడ వద్ద అయ్యప్ప నామజపం పేరిట హిందూశక్తులు ఆందోళన చేపట్టాయి. అయితే, ఈ ప్రదేశంలో నిషేధాజ్ఞలు విధించిన పోలీసులు, రెండు రోజుల్లో నామజపం చేపట్టిన సుమారు 135 మంది ఆందోళనకారులను అరెస్టు చేశారు. గడచిన పదకొండు రోజులుగా సన్నిధానం, పంబ, నీలక్కల్, ఇలావుంకల్ పరిసరాల్లో పోలీసుల నిషేధాజ్ఞలు అమల్లో ఉన్నాయి. గుంపులను నిరోధించేందుకు పోలీసులు విధించిన 144వ సెక్షన్ సోమవారం (26-11-2018)తో ముగుస్తోంది. దీంతో ఈ నిషేధాజ్ఞను పునరుద్ధరించాలని స్థానిక పోలీసులు కోరుతున్నారు. ఆ రాష్ట్ర డీజీపీ ఆమోదిస్తే, జనవరి 14వరకూ శబరిమల దాని పరిసరాల్లో 144వ సెక్షన్‌తో పాటు ఇతర నిషేధాజ్ఞలు కొనసాగే అవకాశం ఉంది. 

 

ఉత్తర ప్రదేశ్ : అయోధ్యలో రామమందిరం ఒత్తిళ్లను తప్పించుకునేందుకు యోగీ ఆదిత్యానాథ్ సర్కార్ కౌంటర్  ప్లాన్ వేశారు. యూపీలోని సరయు నదీ తీరంలో ఏకంగా 221 మీటర్ల రాముడి విగ్రహానికి సన్నాహాలు చేస్తోంది. దీనికి సంబంధించి ఇప్పటికే శిల్పుల వేటను ముమ్మరం చేసిన యూపీ ఆదిత్యా సర్కార్ ఇప్పడు శివసేనకు రాముడి విగ్రహం ద్వారా కౌంటర్ ప్లాన్ వేసింది.  ఇటీవల శివనేన నేతలు కేంద్రంలో బీజేపీ సర్కార్ వున్నా అయోధ్య నిర్మాణానికి ఎందుకు జాప్యం చేస్తోందంటు ప్రశ్నలు సంధిస్తున్న నేపథ్యంలో ధర్మసభకు మందే రాముడి విగ్రహం ప్రకటన వెలువరించటంపై  రామమందిర నిర్మాణంపై తన పట్లు కోల్పోలేదని తెలిపేందుకు ఈ ప్రటకన అనే విమర్శలు వినిపిస్తున్నాయి. 
గతంలో ఎన్డీయేకు మిత్రపక్షంగా వున్న శివసేన..
ఒకప్పుడు ఎన్డీయేకు మిత్రపక్షంగా వున్న శివసేన రామ మందిర నిర్మాణం విషయంలో ఎన్డీయే ప్రభుత్వంపై ఆగ్రహంతో వుంది. ఈ నేపథ్యంలో రాముడు విగ్రహ ఆవిష్కరణతో అటు శివసేన, ఇటు రామ భక్తులకు కౌంటర్ ప్లాన్ వేసేందుకు యోగీ సర్కార్ ప్లాన్స్ వేస్తోంది. పలు విశేషాలతో వుండే రాముడి విగ్రహ ఆవిష్కరణకు యోగీ సర్కార్ అన్ని జాగ్రత్తలు తీసుకుంటోంది. కాగా రామమందిర నిర్మాణంపై విశ్వహిందు పరిషత్ కూడా అంతిమ పోరాటానికి సిద్ధమంటు సంకేతాలు పంపుతున్న నేపథ్యంలో రాముడి విగ్రహ ఆవిష్కరణ ఉత్తర్వులకు సంబంధించి ఇప్పటికే ఓ నమూనాను తయారుచేసిన ప్రభుత్వం పూర్తిస్థాయిలో విగ్రహానికి సంబంధించి వివరాలను వెల్లడించపోవటంతో ఇది కేవలం అయోధ్య రామ మందిర నిర్మాణంపై దృష్టి మళ్లించేందుకేననే విమర్శలు వినిపిస్తున్నాయి. మరి యోగీ సర్కార్ కౌంటర్ ప్లాన్ కు శివసేన ఇచ్చే ప్రతి కౌంటర్ ఎలా వుంటుందో వేచి చూడాలి. 

 

తిరువనంతపురం: పిచ్చి వెర్రితలలు వేయడమంటే ఇదే. ఇది ఎలా.. ఎప్పుడు..ఎక్కడ పుట్టిందో తెలియదు. కానీ యువత ప్రాణాలమీది తెచ్చుకొనేలా చేస్తున్నాయ్ కొన్ని ఛాలెంజ్ వీడియోలు. ఇలాంటిదే టిక్-టాక్ దీన్నే నిల్-నిలు ఛాలెంజ్ పేరుతో కేరళ యువత వీడియోల కోసం ప్రాణాలకు తెగిస్తున్నారు.  పాటలు పాడుతూ..డ్యాన్సులు చేస్తూ స్పీడుగా వచ్చే వాహనాలకు ఎదురెళ్లి నిల్-నిలు అంటూ చేసే ఛాలెంజ్‌లతో కేరళ పోలీసులు తలలు పట్టుకుంటుంన్నారు. ఇటువంటి ప్రమాదకర ఛాలెంజ్‌లతో ప్రాణాలను సైతం లెక్కచేయకుండా రోడ్లమీద చిందులేస్తున్నారు యువకులు. ఇటువంటి ఛాలెంజ్‌లు చేసేవారికి కఠిన చర్యలు తప్పవని పోలీసులు హెచ్చరిస్తున్నారు. 
ఇటువంటి వీడియోలు నెట్టింట్లో హల్ చల్ చేస్తుండటంతో పోలీసులు సైతం దీనికి విరుగుడుగా ఓ వీడియో చేసి ఈ ఛాలెంజ్‌కు వ్యతిరేకంగా ప్రచారం చేస్తున్నారు. అందులో ముగ్గురు యువకులు వంటినిండా బ్యాండేజీలతొ కట్లుకట్టుకొని డ్యాన్స్ చేయడం కనిపిస్తుంది. నిల్-నిలు అంటూ ఛాలెంజ్ చేస్తూ లారీలు, భారీ వాహనాలకు ఎదురువెళితే డ్యాన్సులు అసుపత్రిలోనే అంటూ ఈ వీడియో ద్వారా హెచ్చరికలు జారీచేస్తున్నారు. 
లారీలకు ఎదురువెళ్తే.. డ్రైవర్ సమయానికి గమనించకపోయినా.. బ్రేక్ వేయడంలో ఏమాత్రం ఆలస్యమైనా ప్రాణాలకే ముప్పని పోలీసులు యువతను హెచ్చరిస్తున్నారు. ఇటువంటి అర్థంలేని ఛాలెంజ్‌లతో ప్రాణాలతో చెలగాటం ఆడవద్దని వారిస్తున్నారు. కేరళ యువత చేసే ఈ పిచ్చి ఘనకార్యాలను మీరూ వీక్షించండి!
 

బెంగుళూరు: ముంబైలో లష్కరే తోయిబా ఉగ్రవాదులు దాడులు జరిపి నేటికి పదేళ్లు పూర్తయి, ఆరోజు అసువులు బాసిన అమాయక ప్రజలకు శ్రధ్దాంజలి ఘటించే సమయంలో కేంద్ర ఇంటిలెజెన్స్ వర్గాలు మరో పిడుగులాంటి వార్త పేల్చాయి. పాకిస్తాన్ కు చెందిన జైషే మహమ్మద్ ఉగ్రవాదులు 6గురు ఉగ్రవాదులు దేశంలోకి ప్రవేశించారని తెలిపారు. కేంద్ర హోంశాఖ ఆదేశాల మేరకు ఢిల్లీ పోలీసులు, ఆంధ్రప్రదేశ్ ఉగ్రవాద నిరోధక పోలీసులు ముందు జాగ్రత్త చర్యలో భాగంగా బెంగుళూరు వెళ్లి స్ధానిక పోలీసుల నుంచి కొన్ని వివరాలు సేకరించారు. పరప్పణ అగ్రహార జైలులో ఉన్న ఉగ్రవాదులను కూడా విచారించి కొంత సమాచారం సేకరించినట్లు తెలుస్తోంది. ఉగ్రవాదులు ప్రస్తుతం దేశంలో ఏప్రాంతంలో దాక్కోని ఉన్నారో తెలుసుకునే ప్రయత్నంలో నిఘా వర్గాలు ఉన్నాయి.  

.ఢిల్లీ :  ‘డెబిట్‌, క్రెడిట్’ కార్డులు పర్స్ లో వుంటే చాలు నగదును వెంట తీసుకెళ్లాల్సిన పనిలేకుండా నగదు అవసరాలు తీరిపోయేవి. ఇది వినియోగదారులకు సౌకర్యంగా మారిపోయింది. ఈ నేపథ్యంలో ఇకపై ఈ  ‘డెబిట్‌, క్రెడిట్’ కార్డులు చెల్లవంటు ఆర్బీఐ స్పష్టం చేస్తోంది. డిసెంబర్‌ 31 తర్వాత పాత డెబిట్‌, క్రెడిట్ కార్డులు చెల్లవని ఆర్‌బీఐ ఆదేశాలకు అనుగుణంగా బ్యాంకులు స్పష్టం చేస్తున్నాయి. దీంతో ఖాతాదారులు వెంటనే తమ వద్ద ఉన్న డెబిట్, కార్డులను మార్చుకోవాల్సిందిగా బ్యాంకులు ఖాతాదారులను కోరుతున్నాయి. లేని పక్షంలో 2019 జనవరి 1 నుంచి ఆ పాత కార్డులు పనిచేయవని తెలిజేస్తున్నాయి. 
మోసాలను అడ్డుకునే సరికొత్త కార్డులు..
రిజర్వ్ బ్యాంక్ ఆఫ్ ఇండియా   ఖాతాదారులు పాత 'మాగ్నెటిక్ స్ట్రిప్' ఉన్న కార్డుల స్థానంలో కొత్తగా ఈఎంవీ చిప్, పిన్ ఆధారిత కార్డులను తీసుకోవాల్సి ఉంటుంది. డిసెంబర్ 31లోపు ఈ ప్రక్రియ పూర్తి కావాలి. ఈ కొత్త ఈఎంవీ కార్డులు ఖాతాదారులకు భద్రతనివ్వటంతో పాటు మోసాల బారిన పడకుండా అడ్డుకుంటాయని బ్యాంకులు తెలిజేస్తున్నాయి. దీంతో 2015, ఆగస్ట్ 27న రిజర్వ్ బ్యాంక్ ఆఫ్ ఇండియా అన్ని బ్యాంకులకు పాత కార్డులను రీప్లేస్ చేయాల్సిందిగా ఆదేశించింది.  సెప్టెంబర్ 1, 2015 నుంచే కొత్త కార్డుల జారీ ప్రక్రియ మొదలువుతుందని కూడా ఆర్బీఐ ప్రకటించింది. 
రెండు విధాలుగా మార్చుకునే అవకాశం..
మీ పాత కార్డులను ఇంకా మార్చుకోకపోతే రెండు రకాలుగా మార్చుకునే వీలుంటుంది. మీకు  సంబంధించిన బ్యాంక్ నెట్ బ్యాంకింగ్‌లోకి వెళ్లి ఈ-సర్వీసెస్‌లో ఏటీఎం కార్డ్ సర్వీసెస్‌లోని రిక్వెస్ట్ ఏటీఎం, డెబిట్ కార్డ్ ఆప్షన్‌ను ఎంపిక చేసుకోవాల్సి ఉంటుంది. లేదా డైరెక్ట్ గా మీ బ్యాంక్ ఖాతా ఉన్న బ్రాంచ్‌కు వెళ్లి మార్చుకోవాల్సి ఉంటుంది. 
 

 

బెంగళూరు : కన్నడ రెబల్ స్టార్, కేంద్ర మాజీ మంత్రి అంబరీష్ (66) అంత్యక్రియలకు ఏర్పాట్లు జరుగుతున్నాయి. నవంబర్ 24 శనివారం రాత్రి భోజనం చేసిన అంబరీష్ అకస్మాత్తుగా గుండెనొప్పి రావడంతో వెంటనే ఆయన్ని బెంగళూరులోని విక్రమ్ ఆసుపత్రికి తరలించారు. కానీ అప్పటికే ఆయన తుదిశ్వాస విడిచారని వైద్యులు పేర్కొన్నారు. నవంబర్ 26వ తేదీ కంఠీరవ స్టూడియోలోని రాజ్‌కుమార్ స్మారకం పక్కనే ప్రభుత్వ లాంఛనాలతో అంత్యక్రియలు జరుగనున్నాయి. జేపీనగనర్‌లోని ఆయన నివాసంలో ఉంచిన అంబరీష్ పార్థీవదేహానికి పలువురు ఘనంగా నివాళులర్పిస్తున్నారు. నివాళులర్పించిన వారిలో సినీ, రాజకీయ, ఇతర ప్రముఖులు, అభిమానులున్నారు. 
జీవిత విశేషాలు..

  • కర్ణాటకలోని మాండ్య జిల్లాలో అంబరీష్ జన్మించారు. 
  • 1994లో కాంగ్రెస్ పార్టీలో చేరిన ఈయన మాండ్యా నియోజకవర్గ ఎమ్యెల్యేగా పనిచేశారు.
  • 1996లో కాంగ్రెస్ పార్టీ టికెట్ ఇవ్వకపోవడంతో జనతాదళ్ పార్టీలో చేరారు.
  • 1998లో జరిగిన ఎన్నికల్లో మాండ్యా నుండి ఎంపీగా పోటీ చేసి 4,31,439 కోట్లతో ఐఎన్‌సీ అభ్యర్థిపై అంబరీష్ గెలుపొందారు.
  • తిరిగి సొంత గూటికి (కాంగ్రెస్) చేరారు. మాండ్యా నియోజకవర్గం నుండి గెలుపొంది మూడుసార్లు లోక్ సభ మెట్లు ఎక్కారు. 
  • 12వ లోక్ సభ 1998 - 1999, 13వ లోక్ సభ 1999 - 2004, 14వ లోక్ సభ 2004 - 2009 వరకు ఎంపీగా పని చేశారు. 
  • మన్మోహన్‌ సింగ్‌ ప్రధానమంత్రిగా ఉన్నప్పుడు (2006 నుంచి 2008) సమాచార, ప్రసార శాఖ సహాయ మంత్రిగా పని చేశారు. 
  • 2008 సంవత్సరంలో కావేరీ నీటి వివాద విషయంలో కర్ణాటక మంత్రిగా పని చేసిన అంబరీష్ మంత్రి పదవికి రాజీనామా చేశారు.
  • 2012లో ఆయన కర్ణాటక ప్రదేశ్ కాంగ్రెస్ కమిటీలో డిప్యూటీ ప్రెసిడెంట్‌గా ఉన్నారు. 
  • సిద్ధరామయ్య ప్రభుత్వంలో 2013 నుంచి 2016 వరకు ఆయన హౌసింగ్ మంత్రిగా ఉన్నారు. 
  • కావేరీ నీటి వివాద విషయంలో ఎంపీ పదవికి కూడా రాజీనామా చేశారు.
  • 2009 లోకసభ ఎన్నికల్లో ఆయన మరోసారి పోటీ చేసి ఓడిపోయారు. 

 

డెబిట్, క్రెడిట్ కార్డుల వినియోగదారులకు ముఖ్య గమనిక. ఇప్పుడున్న ఈ కార్డులు జనవరి 1వ తేదీ నుంచి పని చేయవు. పాత డెబిట్‌, క్రెడిట్ కార్డులు చెల్లవని ఖాతాదారులు వెంటనే తమ వద్ద ఉన్న డెబిట్, కార్డులను మార్చుకోవాల్సిందిగా బ్యాంకులు కోరుతున్నాయి. ఆర్‌బీఐ ఆదేశాలకు అనుగుణంగా బ్యాంకులు ఈ మేరకు స్పష్టం చేస్తున్నాయి. ఆన్‌లైన్, సైబర్ మోసాలకు అవకాశం లేని కొత్త చిప్, పిన్ బేస్డ్ కార్డులను బ్యాంకులు అందిస్తున్నాయి. ఇప్పటికే కొన్ని బ్యాంకులు ఇలాంటి కార్డులను తమ వినియోగదారులకు అందించాయి. మిగిలిన బ్యాంకులు ప్రస్తుతం తమ వినియోగదారులకు కొత్త కార్డులను అందజేస్తున్నాయి.
2015, ఆగస్టు 27న రిజర్వ్ బ్యాంక్ ఆఫ్ ఇండియా అన్ని బ్యాంకులకు పాత కార్డులను రీప్లేస్ చేయాల్సిందిగా ఆదేశించింది. దీనికోసం మూడేళ్ల సమయం ఇచ్చింది. సెప్టెంబర్ 1, 2015 నుంచే కొత్త కార్డుల జారీ ప్రక్రియ మొదలైంది.
పాత కార్డులను రెండు రకాలుగా మార్చుకునే వీలుంది.
1) సంబంధిత బ్యాంక్ నెట్ బ్యాంకింగ్‌లోకి వెళ్లి ఈ-సర్వీసెస్‌లో ఏటీఎం కార్డ్ సర్వీసెస్‌లోని రిక్వెస్ట్ ఏటీఎం/డెబిట్ కార్డ్ ఆప్షన్‌ను ఎంపిక చేసుకోవాల్సి ఉంటుంది.
2) నేరుగా బ్యాంక్ ఖాతా ఉన్న బ్రాంచ్‌కు వెళ్లి మార్చుకోవాల్సి ఉంటుంది.
నెట్ బ్యాంకింగ్ ద్వారా వ్యాలిడిటీని పెంచుకునే అవకాశం కూడా ఉంది. ఈ కొత్త కార్డులు మరింత భద్రతతో మోసాలు జరగకుండా అడ్డుకుంటాయని అధికారులు చెబుతున్నారు.

కోల్‌కతా : మీరు రోడ్డుపై చెత్తవేస్తున్నారా? ఉమ్మేస్తున్నారా? అయితే జాగ్రత్త. రోడ్డుపై ఎక్కడపడితే అక్కడ ఉమ్మివేస్తే, ఇష్టానుసారంగా చెత్త పడేస్తే ఎవరూ ఏమీ అనరనుకుంటే పొరపాటే. చిన్నపాటి జరిమానాలు, మందలింపులతో సరిపెడతారనుకుంటే పొరపాటు చేసినట్లే. భారీ మూల్యం చెల్లించక తప్పదు. రోడ్డుపై చెత్తవేస్తే, ఉమ్మేస్తే లక్ష రూపాయలు జరిమానా చెల్లించాల్సిందే. అయితే ఇది ఎక్కడ అనుకుంటున్నారా..కోల్‌కతాలో. 

పట్టణాలు, నగరాల్లో తరచూ ఎక్కడపడితే అక్కడ చెత్త వేస్తూ, ఉమ్మే వేస్తుంటారు. నగరాలను పరిశుభ్రంగా ఉంచేందుకు ప్రభుత్వాలు కూడా పలు చర్యలు చేపడుతున్నాయి. ఇందులో భాగంగా రోడ్లపై చెత్త వేయడం, ఉమ్మేయడం చేస్తే జరిమానాలు విధిస్తున్నాయి. అయితే అవి నామమాత్రంగా ఉండటంతో పెద్దగా పట్టించుకోవడం లేదు. దీంతో పశ్చిమబెంగాల్ ప్రభుత్వం భారీగా జరిమానాలు పెంచుతూ కొత్తగా ఆదేశాలు తీసుకొచ్చింది. బహిరంగ ప్రదేశాల్లో ఉమ్మేయడం, చెత్తవేయడం చేస్తే జరిమానాలను పెంచుతూ అసెంబ్లీలో బిల్లును కూడా ప్రవేశపెట్టారు. ఈ కొత్త నిబంధనలు అమలు చేసేందుకు బెంగాల్ ప్రభుత్వం 11 మంది సభ్యులతో కమిటీని నియమించింది. ఈ కమిటీ నగరాన్ని పరిశుభ్రంగా ఉంచేందుకు అన్ని చర్యలూ తీసుకుంటుంది.

ఇటీవల సీఎం మమతాబెనర్జీ కొత్తగా ప్రారంభించిన దక్షిణేశ్వర్‌ ఆకాశ వంతెనను పరిశీలించారు. దానిపై ఎక్కడపడితే అక్కడ చెత్త పేరుకుపోవడం, పాన్‌ మరకలు ఉండడం గమనించారు. దీనిపై తీవ్ర అసంతృప్తి వ్యక్తం చేసిన సీఎం జరిమానాలను పెంచుతూ నిర్ణయం తీసుకున్నారు. రోడ్లపై చెత్త వేయడం, ఉమ్మేయడం లాంటివి చేస్తే రూ.500, రూ. లక్ష పెంచుతూ ఆమె నిర్ణయం తీసుకున్నారు. ఇంతకముందు బహిరంగ ప్రదేశాల్లో చెత్త వేస్తే, ఉమ్మేస్తే జరిమానా కనిష్ఠంగా రూ.50, గరిష్ఠంగా రూ.5వేలుగా ఉండేది. 

బెంగళూరు : కాంగ్రెస్ సీనియర్ నేత, రైల్వే మాజీ మంత్రి సీకే జాఫర్ షరీఫ్ (87) కన్నుమూశారు. ఆయన గతకొంతకాలంగా అనారోగ్యంతో బాధ పడుతున్న సంగతి తెలిసిందే. నవంబర్ 25వ తేదీ ఆదివారం మధ్యాహ్నం బెంగళూరులోని ఫోర్టిస్ ఆసుపత్రిలో తుదిశ్వాస విడిచారు. షరీఫ్‌కు ఒక కుమారుడు, ఇద్దరు కుమార్తెలు ఉన్నారు. జాఫర్ షరీఫ్ మృతి పట్ల వివిధ పార్టీలకు చెందిన రాజకీయ ప్రముఖులు సంతాపం ప్రకటించారు. ఆయన ఆత్మకు శాంతి చేకూరాలని ఆకాంక్షించారు.

  • కర్ణాటక కాంగ్రెస్‌లో చీలిక అనంతరం ఇందిరా గాంధీవైపు వెళ్లారు. కాంగ్రెస్ తరపున ఏడుసార్లు లోక్ సభ సభ్యుడి ఎంపిక.
  • పీవీ నరసింహారావు హాయంలో షరీఫ్ రైల్వే మంత్రి. 
  • బెంగళూరుకు రైల్వే వీల్ అండ్ యాక్సిల్ ప్లాంట్‌ను తీసుకురావడంలో షరీఫ్ కీలక పాత్ర. 

షరీఫ్ మృతి చెందారన్న తెలుసుకున్న రాహుల్ తీవ్ర దిగ్ర్భాంతి వ్యక్తం చేశారు. ఈ మేరకు ఆయన ట్విట్టర్‌లో ట్వీట్ చేశారు. ‘కాంగ్రెస్ పార్టీకి దుర్దినం. మరో సీనియర్ నేత, ప్రియతమ నాయకుడు..కర్ణాటకలోని మా కుటుంబంలో గౌరవ సభ్యుడు శ్రీ జాఫర్ షరీఫ్ గారు ఈరోజు కన్నుమూశారు. ఆయన కుటుంబసభ్యులు, స్నేహితులు, మద్దతుదారులకు నా సానుభూతిని తెలియజేస్తున్నాను’ అని రాహుల్ ట్వీట్‌లో తెలిపారు. 

రాజస్థాన్ : వచ్చే ఎన్నికల్లో లబ్ది కోసం.. కాంగ్రెస్ పార్టీ అయోధ్య కేసులో జాప్యాన్ని కోరుకుంటోందని ప్రధాని నరేంద్ర మోదీ ఆరోపించారు. ఈ దిశగా న్యాయవ్యవస్థను భయాందోళనకు గురి చేస్తోందనీ ధ్వజమెత్తారు. రాజస్థాన్‌లోని ఆల్వార్‌ ఎన్నికల సభలో మోదీ మాట్లాడారు. కాంగ్రెస్ పార్టీ న్యాయవ్యవస్థను కూడా రాజకీయాల్లోకి లాగుతోందని మోదీ విమర్శనాస్త్రాలు సంధించారు. 2019 ఎన్నికల్లోపే అయోధ్యలో రామమందిరాన్ని నిర్మించాలంటూ.. విశ్వహిందూ పరిషత్, శివసేనలు ఈరోజు అయోధ్యలో ధర్మదీక్ష చేపట్టాయి. ఈ తరుణంలోనే మోదీ కాంగ్రెస్ పార్టీని అటాక్ చేయడం విశేషం. 2019 ఎన్నికల వరకూ కేసు తెగకుండా జాప్యం చేయాలంటూ కాంగ్రెస్ పార్టీ, సుప్రీంకోర్టును ప్రభావితం చేస్తోందని మోదీ విమర్శించారు. అక్టోబర్‌లోనే కేసు విచారణ జరపాలంటూ వచ్చిన పిటిషన్‌ను వాయిదా వేసిన సుప్రీంకోర్టు చీఫ్ జస్టిస్ రంజన్ గొగోయ్, ఈ కేసు విచారణ ఎప్పుడు చేపట్టాలనేదానిపై సరైన బెంచ్ నిర్ణయిస్తుందని అన్నారు. దీన్ని బట్టి, కేసును విచారించే బెంచ్‌లో తాను ఉండబోనని పరోక్షంగా సంకేతాలు ఇచ్చారు. 

లక్నో : అయోధ్య అంశం మళ్లీ వేడెక్కింది. రామమందిరం నిర్మాణం కోసం కేంద్రంపై వత్తడి తీసుకొచ్చేలా లక్ష్యంతో శివసేన, వీహెచ్‌పీ సంస్థలు ప్రయత్నిస్తున్నాయి. అందులో భాగంగా నవంబర్ 25వ తేదీ ఆదివారం భారీ ర్యాలీ, బహిరంగసభను నిర్వహిస్తున్నారు. ఇందుకు ఇప్పటికే ఏర్పాట్లు కూడా చేస్తున్నారు. ర్యాలీ, బహిరంగసభలో పాల్గొనేందుకు భారీగా కరసేవకులు ప్రత్యేక రైళ్లలో తరలివస్తున్నారు. సున్నితమైన అంశం కావడంతో అయోధ్యలో భారీగా బలగాలు మోహరించాయి. వివాదాస్పద ప్రదేశం పరిసరాల్లో సుప్రీంకోర్టు మార్గదర్శకాలను పాటిస్తామని యూపీ అదనపు డీఐజీ ఆనంద్ కుమార్ వెల్లడించారు. అయోధ్యలో 144 సెక్షన్ కొనసాగుతుందని తెలిపారు. 700 మంది పోలీసులు, 42 కంపెనీల పీఏసీ బలగాలు, 5 కంపెనీల ఆర్ఏఎఫ్, ఏటీఎస్ కమాండోలు మోహరించగా డ్రోన్లతో భద్రతను పర్యవేక్షిస్తున్నారు. 
ఇక్కడ ముస్లింలు 1992లో జరిగిన సంఘటనలు పునరావృతం అవుతాయన్న భయాందోళనలో ఉన్నారు. Image result for Ayodhya Tensionబాబ్రీ మసీదు విధ్వంసం జరిగి డిసెంబర్ 6 నాటికి 26 ఏళ్లు నిండుతున్న దృష్ట్యా రామమందిర నిర్మాణానికి కేంద్రం చర్యలు తీసుకోవాలన్న డిమాండ్ వీహెచ్పీ, శివసేన, ఆర్ఎస్సెస్ నేతలనుంచి ఊపందుకుంటోంది. ర్యాలీ, సభలో పాల్గొనేందుకు శివసేన అధ్యక్షుడు ఉద్దవ్ ఠాక్రే నవంబర్ 24వ తేదీ శనివారం అయోధ్యకు చేరుకున్నారు. మందిరం నిర్మాణం కోసం చట్టం తేవాలని..లేదా ఆర్డినెన్స్ తేవాలని ఉద్దవ్ డిమాండ్ చేస్తున్నారు. 
దీనిపై విపక్షాలు భగ్గుమంటున్నాయి. ఈ వ్యవహారంలో సుప్రీంకోర్టు జోక్యం చేసుకోవాలని ఆలీఘడ్ యూనివర్సిటీ విద్యార్థి సంఘం డిమాండ్ చేస్తోంది. అయోధ్యలో ముస్లీంలు భయపడిపోతున్నారని ముస్లీం పర్సనల్ లా బోర్డు ఆందోళన వ్యక్తం చేయగా ఎన్నికలు వస్తున్న వేళ ప్రజల ద‌ృష్టిని మరల్చేందుకు ఈ అంశాన్ని తెరపైకి తీసుకొచ్చారని బీఎస్పీ అధినేత మాయావతి తీవ్రంగా విమర్శిస్తున్నారు. ఆర్మీతో అయోధ్యలో భద్రత కల్పించాలని సుప్రీంలో ఎస్పీ పిటిషన్ దాఖలు చేసింది.  

Pages

Don't Miss