National News

బెంగళూరు : కన్నడ సినీ పరిశ్రమలో తీవ్ర విషాదం నెలకొంది. ప్రముఖ నటుడు, కన్నడ సినీపరిశ్రమ పెద్ద దిక్కు అంబరీష్ (66) కన్నుమూశారు. అంబరీష్ హఠాన్మరణంతో సినీ పరిశ్రమ తీవ్ర దిగ్ర్భాంతి వ్యక్తం చేసింది. నవంబర్ 24 శనివారం రాత్రి భోజనం చేసిన అంబరీష్ అకస్మాత్తుగా గుండెనొప్పి రావడంతో వెంటనే ఆయన్ని బెంగళూరులోని విక్రమ్ ఆసుపత్రికి తరలించారు. కానీ అప్పటికే ఆయన తుదిశ్వాస విడిచారని వైద్యులు పేర్కొన్నారు. 
ఆయన నటుడిగానే కాకుండా రాజకీయ నాయకుడిగా కూడా ఎదిగారు.
1994లో కాంగ్రెస్ పార్టీలో చేరిన ఈయన మాండ్యా నియోజకవర్గ ఎమ్యెల్యేగా పనిచేశారు. 1996లో కాంగ్రెస్ పార్టీ టికెట్ ఇవ్వకపోవడంతో జనతాదళ్ పార్టీలో చేరారు. 1998లో జరిగిన ఎన్నికల్లో మాండ్యా నుండి ఎంపీగా పోటీ చేసి 4,31,439 కోట్లతో ఐఎన్‌సీ అభ్యర్థిపై అంబరీష్ గెలుపొందారు. తిరిగి సొంత గూటికి (కాంగ్రెస్) చేరారు. మాండ్యా నియోజకవర్గం నుండి గెలుపొంది మూడుసార్లు లోక్ సభ మెట్లు ఎక్కారు. 
12వ లోక్ సభ 1998 - 1999, 13వ లోక్ సభ 1999 - 2004, 14వ లోక్ సభ 2004 - 2009 వరకు ఎంపీగా పని చేశారు. 
Related imageమన్మోహన్‌ సింగ్‌ ప్రధానమంత్రిగా ఉన్నప్పుడు (2006 నుంచి 2008) సమాచార, ప్రసార శాఖ సహాయ మంత్రిగా పని చేశారు. 
2008 సంవత్సరంలో కావేరీ నీటి వివాద విషయంలో కర్ణాటక మంత్రిగా పని చేసిన అంబరీష్ మంత్రి పదవికి రాజీనామా చేశారు. 2012లో ఆయన కర్ణాటక ప్రదేశ్ కాంగ్రెస్ కమిటీలో డిప్యూటీ ప్రెసిడెంట్‌గా ఉన్నారు. సిద్ధరామయ్య ప్రభుత్వంలో 2013 నుంచి 2016 వరకు ఆయన హౌసింగ్ మంత్రిగా ఉన్నారు. కావేరీ నీటి వివాద విషయంలో ఎంపీ పదవికి కూడా రాజీనామా చేశారు.2009 లోకసభ ఎన్నికల్లో ఆయన మరోసారి పోటీ చేసి ఓడిపోయారు. 

బెంగుళూరు: ప్రముఖ నటుడు, కన్నడ రెబల్ స్టార్, కాంగ్రెస్ పార్టీ నాయకుడు, కేంద్ర, మాజీ మంత్రి,అంబరీష్ (66) శనివారం రాత్రి  అనారోగ్యంతో మరణించారు. గత కొంత కాలంగా మూత్రపిండాలు, శ్వాసకోస వ్యాధితో బాధపడుతున్నఆయన ఆరోగ్య పరిస్ధితి శనివారం సాయంత్రం విషమించడంతో కుటుంబ సభ్యులు బెంగుళూరులోని ఓప్రయివేటు అసుపత్రిలో చేర్పించారు. ఐసీయూలో ఉంచి చికిత్స ప్రారంభించిన కొద్దిసేపటికే ఆయన కన్నుమూసినట్లు ఆసుపత్రి వర్గాలు తెలిపాయి.అంబరీష్కు భార్య, బహుభాషా నటి సుమలత, కుమారుడు అభిషేక్ ఉన్నారు. సుమారు 200 సినిమాల్లో ఆయన నటించారు. 
కర్ణాటకలోని పూర్వ మైసూరు రాష్ట్రంలోని మాండ్యజిల్లా మద్దూరు తాలూకాలోని దొడ్డఅరసికెరె గ్రామంలో 1952 మే 29న పుట్టిన మాలవళ్లి హుచ్ఛెగౌడ అమర్‌నాథ్ సినీ రంగ ప్రవేశంతో అంబరీష్ గా పేరు మార్చుకున్నారు. 1972లో సినిమాల్లోకి వచ్చిన ఆయన 1991లో  బహుభాషా నటి సుమలతను వివాహాం చేసుకున్నారు. పలు భాషల్లో వీరిరువురు కలిసి నటించారు. 200 చిత్రాల్లో నటించి రెబల్ స్టార్ గా పేరు పొందిన అంబరీష్ పలు రాష్ట్ర ప్రభుత్వ, ఫిలింఫేర్ అవార్డులు అందుకున్నారు. 2005లో ఆయన ఎన్టీఆర్ జాతీయ అవార్డు అందుకున్నారు. 
ప్రముఖుల సంతాపం
అంబరీష్ మరణవార్త తెలిసిన వెంటనే ముఖ్యమంత్రి కుమార స్వామి అసుపత్రికి వచ్చి అంబరీష్ కుటుంబ సభ్యులను పరామర్శించారు. జలవనరుల శాఖమంత్రి డీకే శివకుమార్, కన్నడ నటులు పునీత్ రాజ్ కుమార్ తదితరులు ఆసుపత్రికి వెళ్లి ఆయన కుటుంబ సభ్యులకు సానుభూతి తెలిపారు. "ఒకమానవతావాది, నా  ప్రియమిత్రుడ్ని ఈ రోజు కోల్పోయాను "అని తమిళ్ సూపర్ స్టార్ రజనీ కాంత్ ట్వీట్ చేశారు. అంబరీష్ మృతితో ఆయన అభిమానులు దిగ్బ్రాంతికి లోనుకాగా, అంబరీష్ మృతి తమను తీవ్ర దిగ్భ్రాంతికి ,విచారానికి గురి  చేసిందని కాంగ్రెస్ పార్టీ తన ట్విట్టర్లో పోస్ట్ చేసింది. 
మూడు సార్లు పార్లమెంట్ సభ్యునిగా ఎన్నికైన ఆయన మన్మోహన్ సింగ్ మంత్రివర్గంలో సమాచార ప్రసార శాఖ సహాయ మంత్రిగా పని చేశారు. కర్ణాటకలో సిధ్దరామయ్య మంత్రి వర్గంలో పనిచేసిన ఆయన, అనారోగ్యకారణాలతో ఈఏడాది మే నెలలో జరిగిన ఎన్నికల్లో పోటీ చేయలేదు.

పెళ్లి అంటే.. మాంగల్యధారణ, అప్పగింతలు, కన్నీళ్లు..! ఇంతకాలం ఇదే భావన కొనసాగింది. కానీ ఇప్పుడు ట్రెండ్ మారింది. అమ్మాయిలు కూడా బ్యాచిలర్ లైఫ్‌కు అద్భుతంగా వీడ్కోలు పలుకుతున్నారు. సినిమా తారలే కాదు.. తామూ పెళ్లి వేడుకను అద్వితీయంగా ఆస్వాదిస్తామని చాటి చెబుతున్నారు. బ్యాచిలర్‌గా చివరి క్షణాలను ఆడుతూ పాడుతూ ఆనందంగా గడిపేసిన ఓ అమ్మాయి వీడియో ఇప్పుడు సోషల్ మీడియాలో వైరల్ అవుతోంది. ఈ వీడియో మరికొంత మందిలో ఇన్‌స్పిరేషన్ నింపుతోంది. నీతి పంచోలి అనే అమ్మాయి వేసిన స్టెప్పులకు నెటిజన్లు ఫిదా అవుతున్నారు. కంగనా రనౌత్ నటించిన సిమ్రన్ సినిమాలోని 'సింగిల్ రహనె దే' పాటకు నీతి పంచోలి డ్యాన్స్ చేసింది. తన గ్యాంగ్‌తో కలిసి ఆమె వేసిన స్టెప్పులు కుర్రకారును హుషారెత్తించాయి. ఇప్పటికే ఇన్‌స్టాగ్రామ్‌లో ఈ వీడియోని లక్షమంది వరకు చూశారు.

ఢిల్లీ: వాహనంతో రోడ్డెక్కాలంటే డ్రైవింగ్ లైసెన్స్, ఆర్సీ డాక్యుమెంట్లు వెంట తీసుకెళ్లడం తప్పనిసరి. లేదంటే ట్రాఫిక్ పోలీసులకు చిక్కడం ఫైన్లు కట్టడం ఖాయం. కానీ ఇకపై ఇలాంటి భయాలు ఉండవు. డ్రైవింగ్ లైసెన్స్, ఆర్సీ డాక్యుమెంట్లను మన వెంట తీసుకెళ్లక్కర్లేదు. చేతిలో స్మార్ట్‌ఫోన్ ఉంటే చాలు. వాహన, లైసెన్స్ చరిత్రలన్నీ అందులోనే లభిస్తాయి. స్మార్ట్‌ఫోన్‌లో వాటి డిజిటల్ కాపీలు చూపిస్తే చాలు. ఇందుకోసం డిజీలాకర్ అనే యాప్‌ను ఇన్‌స్టాల్ చేసుకుంటే సరిపోతుంది.
అంతా డిజిటల్ మయం:
'డిజీలాకర్' యాప్‌లో డాక్యుమెంట్స్ సేవ్ చేసుకుంటే సరిపోతుంది. ముఖ్యమైన డాక్యుమెంట్లన్నీ 'డిజీలాకర్' యాప్‌లో సేవ్ చేసుకోవచ్చు. డిజిటల్ రూపంలో ఉన్న పత్రాలు చెల్లుబాటు అవుతాయని చెబుతూ జాతీయ రహదారుల మంత్రిత్వ శాఖ సరికొత్త నిబంధన తీసుకొచ్చింది. పేపర్‌లెస్ గవర్నెన్స్‌లో భాగంగా కేంద్ర ప్రభుత్వం వాహనదారులకు సేవలను మరింత సులభతరం చేసింది. ఇందులో భాగంగా కేంద్ర మోటార్ వాహన చట్టం, 1989లో రహదారుల మంత్రిత్వ శాఖ సవరణ చేసింది. దీని ప్రకారం రిజిస్ట్రేషన్, ఇన్సూరెన్స్, ఫిట్‌నెస్, పర్మిట్, డ్రైవింగ్ లైసెన్స్, పొల్యూషన్ సర్టిఫికెట్ లాంటి పత్రాలన్నింటినీ ఎలక్ట్రానిక్ రూపంలో చూపించొచ్చు. అయితే స్కాన్ చేసిన కాపీలను మాత్రం అనుమతించరు. ఈ యాప్‌ను గూగుల్ ప్లే స్టోర్ లేదా యాప్ స్టోర్‌లో డౌన్‌లోడ్ చేసుకోవచ్చు. సో..వాహనదారులకు ఇది నిజంగా గుడ్ న్యూసే కదా. ట్రాఫిక్ పోలీసులు ఆపగానే పర్సులోంచి, వాహనంలోంచి పత్రాల కోసం వెతకాల్సిన అవసరం లేదిక.. ఏవైనా పత్రాలు మర్చిపోయామా? అనే బెంగ లేకుండా హాయిగా రోడ్డెక్కొచ్చన్న మాట.

అయోధ్య: ‘‘కేంద్రంలో అధికారంలో ఉండికూడా రాముడిని అయోధ్యలో బందీగా ఉంచారు. నేను అయోధ్య వచ్చింది కుంభకర్ణుడి లాంటి వారిని నిద్రలేపేందుకే’’ అంటూ శివసేన అధినేత ఉద్ధవ్ థాక్రే బీజేపీ పేరు చెప్పకుండా వ్యాఖ్యానించారు
రెండురోజుల పర్యటనలో భాగంగా ఉద్ధవ్ థాకరే శనివారం (నవంబర్ 24) అయోధ్య రామమందిరాన్ని సందర్శించి ప్రత్యేక పూజలు నిర్వహించారు. కొడుకు ఆదిత్య థాకరేతో కలిసి లక్ష్మణ్ కిలాలో పూజలు నిర్వహించారు. రామ మందిర నిర్మాణానికి అనుమతి ఇస్తూ ఆర్డినెన్స్ జారీచేయాలని ఉద్ధవ్ థాకరే డిమాండ్ చేశారు. రామ మందిర నిర్మాణాన్ని తక్షణమే చేపట్టాలని డిమాండ్ చేస్తూ ఆర్ఎస్సెస్, వీహెచ్పీ ఆధ్వర్యంలో ఆదివారం ధర్మసభకు పిలుపు ఇచ్చాయి. దీనికోసం భారీగా సంత్‌లు, సన్యాసులు తరలివస్తున్నారు. ఉత్తరప్రదేశ్ రాష్ట్ర వ్యాప్తంగా బైక్ ర్యాలీలు, ప్రదర్శనలు నిర్వహించాలని వీహెచ్పీ పిలుపునిచ్చింది. దాదాపు రెండు లక్షల మంది అయోధ్య రానున్న దృష్ట్యా ప్రభుత్వం భద్రతను కట్టుదిట్టం చేసింది.
 

 

మహారాష్ట్ర : కట్నం కోసం భార్యపై భర్త దారుణానికి ఒడిగట్టారు. కట్నం కోసం భర్త బరి తెగించాడు. కట్టుకున్న భార్యనే అబాసుపాలు చేశాడు. సోషల్ మీడియా వేదికగా వేధింపులకు గురి చేశాడు. భార్య అశ్లీల చిత్రాలు సోషల్ మీడియాలో పోస్టు చేసి వేధింపులకు పాల్పడ్డాడు. ఈ ఘటన ముంబైలో చోటుచేసుకుంది.

పోలీసుల కథనం ప్రకారం.. ముంబైలోని కుర్లా ప్రాంతంలో కూలీగా పనిచేస్తున్న మైనర్ బాలిక(13)పై అదే ప్రాంతానికి చెందిన ఓ యువకుడు అత్యాచారానికి పాల్పడ్డాడు. దీంతో యువతి కుటుంబ సభ్యులు పోలీసులను ఆశ్రయించారు. ఈ నేపథ్యంలో కేసు నుంచి తప్పించుకునేందుకు బాధితురాలిని పెళ్లి చేసుకోవడానికి నిందితుడు ఒప్పుకున్నాడు. అయితే వివాహం అయ్యాక అత్తింటి నుంచి రూ.9 లక్షలు కట్నం తీసుకురావాలని భార్యను వేధించడం మొదలుపెట్టాడు. అయితే అంతమొత్తం తన తల్లిదండ్రులు ఇచ్చుకోలేరని యువతి మొత్తుకుంది. అయినా వినకపోవడంతో తాను ఇంటికి వెళ్లబోనని కరాఖండిగా చెప్పేసింది.

ఈ నేపథ్యంలో ఆమెను అడ్డు తొలగించుకోవాలని భావించిన అతను.. తొలుత ఆమె ఫొటోలను అశ్లీలంగా మార్ఫింగ్ చేసి ఇంటర్నెట్‌లో పెట్టాడు. సోషల్ మీడియాలో పోస్ట్ చేసి, వేధింపులకు గురి చేశాడు. అయినా భార్య నిర్ణయం మారకపోవడంతో ఆమెపై కిరోసిన్ పోసి నిప్పంటించేందుకు యత్నించాడు. అతని బారి నుంచి తప్పించుకున్న యువతి తల్లిదండ్రులతో కలిసి పోలీసులను ఆశ్రయించింది. బాధితురాలి ఫిర్యాదుతో ఈ ఘటనపై పోలీసులు కేసు నమోదు చేసి, నిందితుడిని అరెస్ట్ చేశారు. అనంతరం కోర్టు ముందు హాజరుపర్చి అతన్ని రిమాండ్‌కు తరలించారు.

 

న్యూఢిల్లీ: తనను చంపేందుకు కొన్ని దళిత వ్యతిరేక శక్తులు కుట్రపన్నాయని బహుజన్ సమాజ్ పార్టీ (బీఎస్పీ) అధినేత్రి మాయవతి శనివారం (నవంబర్ 24) సంచలన వ్యాఖ్యలు చేశారు. గతేడాది ఉత్తర్‌ప్రదేశ్‌లో జరిగిన షబ్బీర్‌పూర్ హింస సందర్భంగా కొన్ని అరాచక శక్తులు తనను హత్యచేసేందుకు కుట్ర చేశాయని మాయావతి చెప్పారు.
కొన్ని మోసపూరిత పార్టీలైన భీమ్ ఆర్మీ, బహుజన్ యూత్ ఫర్ మిషన్-2019లు తమ స్వంత ప్రయోజనాలకోసం దళిత మద్ధతుదారుల నుంచి అక్రమంగా నిధులు వసూలు చేస్తున్నట్టు తమ దృష్టికి వచ్చిందని చెప్పారు. 
ఈ ప్రజావ్యతిరేక శక్తులు దళితుల మనస్సులను కలుషితం చేసేందుకు ప్రయత్నిస్తున్నారని మాయావతి విమర్శించారు. వీరి చేష్టలకు అడ్డుకట్టవేసేందుకు కృషి చేయాలని పార్టీ కార్యకర్తలకు మాయావతి పిలుపునిచ్చారు.
 

 

కర్నాటక : మహిళల రక్షణ కోసం నిర్భయలాంటి ఎన్ని చట్టాలొచ్చినా ఆడ పిల్లలపై అఘాయిత్యాలు ఆగడం లేదు. అనునిత్యం దేశంలో ఏదో ఒక చోట మహిళలపై లైంగిక వేధింపులు, అత్యాచారాలు జరుగుతూనే ఉన్నాయి. ఎన్ని కేసులు నమోదవుతున్నా కామాంధుల ధోరణిలో మార్పు రావడం లేదు. తాజాగా కర్నాటకలో మరో ఘోర ఘటన చోటుచేసుకుంది. బెంగళూరులో దారుణం జరిగింది. నగలు కొనేందుకు వెళితే యజమాని అల్లరి చేశాడు. యువతిని కామాంధుడు కాటేయాలనుకున్నాడు. జీవితాన్ని నాశనం చేయాలనుకున్నాడు.  నగలు కొనేందుకు వచ్చిన ఓ యువతిపై షాపు యజమాని అత్యాచారయత్నానికి పాల్పడ్డాడు. 

పోలీసుల వివరాల ప్రకారం..బెంగళూరులోని కురుబరహళ్లిలో సుభాష్ అనే వ్యక్తి రిషబ్ జువెలర్స్ పేరుతో నగల దుకాణాన్ని నిర్వహిస్తున్నాడు. 21 ఏళ్ల యువతి అతని షాప్‌లో తరచుగా నగలు కొనుగోలు చేస్తోంది. ఈ క్రమంలో అక్టోబర్ 26న యువతి.. సుభాష్‌ నిర్వహిస్తున్న రిషబ్ జువెలర్స్ దుకాణానికి వెళ్లింది. దుకాణంలో అన్ని మోడల్స్ లేవని, అదే భవనంలో పైఅంతస్తులో ఉన్న తన ఇంట్లో ఉన్నాయని చెప్పి, ఆమెను తీసుకెళ్లాడు. ఇంట్లోకి వెళ్లగానే, తలుపులు వేసి యువతిపై అత్యాచారయత్నం చేశాడు. అయితే అతని నుంచి ఆమె తప్పించుకుని బయటపడింది. 
అయితే తన వద్ద అత్యాచారయత్నం చేసిన వీడియోలు ఉన్నాయని... జరిగిన ఘటన గురించి ఎవరికైనా చెబితే వాటిని బయటపెడతానని సుభాష్ ఆమెను బెదిరించాడు. చివరకు తన స్నేహితురాళ్ల వద్ద యువతి ఈ విషయాన్ని బయటపెట్టింది. వారి సూచన మేరకు పోలీసులకు ఫిర్యాదు చేసింది. పోలీసులు కేసు నమోదు చేసుకుని సుభాష్‌ను విచారించగా అత్యాచారయత్నం చేసినట్టు తేలింది. 

 

ముంబై : తన స్నేహితుడిపై పెట్టిన రేప్ కేసును విత్‌డ్రా చేసుకునేందుకు వెళ్లిన ఓ యువతిపై, సబ్ ఇన్‌స్పెక్టరే అత్యాచారానికి పాల్పడ్డాడు. ఈ ఘటన మహారాష్ట్రలోని థానె పోలీసు స్టేషన్ పరిధిలో జరిగింది. తన ఫ్రెండ్ తనను రేప్ చేశాడంటూ గతంలో ముంబైలోని మన్‌కుర్ద్ పోలీసు స్టేషన్‌లో ఈ యువతి కేసు పెట్టింది. అనంతర కాలంలో, ఈ కేసు భివాండిలోని శాంతి నగర్ పోలీసు స్టేషన్‌కు బదిలీ అయింది. అయితే, క్లోజ్‌ఫ్రెండ్‌పై పెట్టిన కేసును ఉపసంహరించుకుంటానని, పోలీసుల అదుపులో ఉన్న ఫ్రెండ్‌ని వదిలేయాలంటూ, ఆమె శాంతినగర్ ఎస్ఐ గొంజారిని కోరింది. రాజ్‌నోలి బైపాస్‌కు వస్తే ఆమె ఫ్రెండ్‌ను విడుదల చేస్తానని ఆ ఎస్ఐ నమ్మబలికాడు. అక్కడికి వెళ్లిన యువతిని, ఎస్ఐ గొంజారి, కల్యాణ్ పట్టణంలోని గెస్ట్‌హౌస్‌కు తీసుకు వెళ్లి రేప్ చేశాడు. జరిగిన దారుణంపై ఆమె కొంగన్ పోలీసులను ఆశ్రయించింది. బాధితురాలి ఫిర్యాదు మేరకు పోలీసులు, ఎస్ఐ గొంజారిపై  ఐపీసీ సెక్షన్ 376 (అత్యాచారం), 506 (భయోత్పాతానికి గురిచేయడం) కింద కేసు నమోదు చేశారు. 

బెంగళూరు: కర్ణాటక రాష్ట్రంలో ఘోర రోడ్డు ప్రమాదం చోటు చేసుకుంది. మాండ్య జిల్లాలో ప్రయాణికులతో వెళ్తున్న బస్సు అదుపుతప్పి పక్కనే ఉన్న కాలువలోకి దూసుకెళ్లింది. ఈ ప్రమాదంలో 25 మంది మృతి చెందారు. మృతుల్లో ఎక్కువమంది స్కూల్ పిల్లలే కావడం విషాదకరం.
అదుపుతప్పి:
మాండ్య నుంచి పాండవపుర వెళ్తున్న ప్రైవేట్ బస్సు(KA 19A 5676) కనగణమరడి గ్రామంలో అదుపుతప్పి కావేరీ నది కాలువలోకి దూసుకెళ్లింది. ఈ ఘటనలో పాఠశాల విద్యార్థులు సహా 25మంది మృతిచెందారు. సమాచారం తెలుసుకున్నపోలీసులు ఘటనాస్థలానికి చేరుకుని సహాయకచర్యలు చేపట్టారు. కొందరిని కాపాడి ఆసుపత్రికి తరలించారు. కాలువలోకి దూసుకెళ్లగానే బస్సు పూర్తిగా మునిగిపోయింది. దీంతో చాలామంది ప్రాణాలు కోల్పోయారు. మృతుల సంఖ్య మరింత పెరిగే అవకాశం ఉందని అధికారులు తెలిపారు. శనివారం (నవంబర్ 24) స్కూల్ హాఫ్ డే కావడంతో స్కూల్ విద్యార్థులంతా ఆ బస్సు ఎక్కారు. కాలువలో నీటి ప్రవాహం ఎక్కువగా ఉండడంతో ప్రమాద తీవ్రత ఎక్కువగా ఉంది. కాలువలోకి దూసుకెళ్లగానే బస్సు మొత్తం 12 అడుగుల లోతున నీటిలో మునిగిపోయింది. దాంతో బయటికి రాలేక కొందరు, ఈత రాక మరికొందరు చిన్నారులు చనిపోయారు. స్థానికులు కొందరు పిల్లలను కాపాడి ఆసుపత్రికి తరలించారు.
డ్రైవర్ నిర్లక్ష్యమే...?
డ్రైవర్ నిర్లక్ష్యమే బస్సు అదుపుతప్పడానికి కారణం అని ప్రత్యక్ష సాక్ష్యులు చెబుతున్నారు. అతి వేగంగా బస్సును నడిపిన డ్రైవర్, మూల మలుపు దగ్గర కూడా వేగం తగ్గించకపోవడం... అదే సమయంలో ఎదురుగా వేరే వాహనం రావడంతో అదుపు తప్పి కాలువలోకి దూసుకెళ్లినట్టు తెలుస్తోంది. బస్సు ఎమర్జెన్సీ డోర్లు లాక్ వేసి ఉండడంతో బయటికి వచ్చేందుకు వారికి అవకాశం లేకపోయింది. కృష్ణరాజా సాగర డ్యామ్ అధికారులు శుక్రవారమే(నవంబర్ 23) ఈ కాలువకు నీటిని విడుదల చేశారు. నీటి విడుదల చేయకపోయి ఉంటే కాలువలో నీటి నిల్వ తక్కువగా ఉండేదని, ప్రమాద తీవ్రత తగ్గేదని స్థానికులు చెబుతున్నారు. ప్రమాద సమయంలో బస్సులో మొత్తం 30 మంది ప్రయాణికులు ఉన్నారు. వీరిలో ఎక్కువమంది స్కూల్ విద్యార్థులే. సంఘటనా స్థలంలో సహాయక చర్యలు కొనసాగుతున్నాయి.

న్యూఢిల్లీ : దేశ రాజధాని ఢిల్లీలో అత్యంత ప్రతిష్ఠాత్మకంగా నిర్మించిన సిగ్నేచర్ బ్రిడ్జి మృత్యు రాదారిగా మారింది. నిన్నటికి నిన్న(23-11-2018) ఇద్దరు మెడికోలు ఈ వంతెనపై నుంచి బైక్‌తో పాటు కిందకు పడి ప్రాణాలు కోల్పోయారు. ఆ విషాదం మరచిపోకముందే, ఈరోజు మరో వ్యక్తి అదేతరహాలో ప్రాణాలు కోల్పోయాడు. శంకర్ (24), దీపక్ (17)లు సిగ్నేచర్ వంతెనపై వెళుతుండగా, ఉన్నట్టుండి వారి బైక్ స్కిడ్ అయింది. దీంతో, కిందపడ్డ శంకర్ అక్కడికక్కడే ప్రాణాలు కోల్పోయాడు. తీవ్రగాయాలపాలైన దీపక్ ఆసుపత్రిలో చికిత్స పొందుతున్నాడు. 
హెల్మెట్ పెట్టుకున్నా కూడా..
మృతుడు శంకర్ ఘజియాబాద్‌కు చెందిన సేల్స్‌మన్ అని గుర్తించారు. ప్రమాద సమయంలో అతను తలకు హెల్మెట్ కూడా ధరించాడు. అయితే, అతను బైక్ నుంచి స్కిడ్ అయ్యే టైంలో, హెల్మెట్ దూరంగా పడిపోయిందని, దాంతో అతడి తల డివైడర్‌ను బలంగా తాకడంతో, ప్రాణాలు కోల్పోయాడని ప్రత్యక్ష సాక్షులు తెలిపారు. 
వరుస ప్రమాదాలు.. అయినా..
ఢిల్లీలోని సిగ్నేచర్ బ్రిడ్జిపై నిన్న (శుక్రవారం) ఇద్దరు మెడికోలు ప్రాణాలు కోల్పోవడంతో కాస్త హడావుడి చేసిన అధికారులు, ఆ మరుసటి రోజునే ఉదాసీనంగా మారిపోయారు. ఈ వంతెనపై ప్రమాదభరిత సెల్ఫీలు తీసుకోవడం, వంతెన నడిమధ్యన వాహనాలు ఆపి సెల్ఫీలు తీసుకుంటుండడం ప్రమాదాలకు కారణమవుతోందని నిపుణులు హెచ్చరిస్తున్నారు. ఈదిశగా ప్రజల్లో అవగాహనను పెంపొందించే చర్యలు గానీ, డేంజరస్ సెల్ఫీలు తీసుకోకుండా నియంత్రించడం కానీ అధికారులు చేయడం లేదు. 
 

నైనిటాల్ (ఉత్తరాఖండ్) : పువ్వుల్లా చూసుకోవాల్సిన చిన్నారులపై లైంగిక దాడికి పాల్పడిన మానవ రూపంలో వుండే మృగానికి ఉత్తరాఖండ్ కోర్ట్ కఠిన శిక్షను విధించింది. ఆడపుట్టుకనే ప్రశ్నార్థకంగా మార్చివేస్తున్న నేటి సమాజపు లైంగిక దాడి పోకడలతో ఆడబిడ్డను కనాలంటేనే భీతిగొలిపే సంఘటనలకు పాల్పడుతున్న నరరూప రాక్షసులకు ఎటువంటి శిక్ష విధించినా తక్కువే. కానీ శిక్ష అనేది న్యాయపరంగా జరిగితేనే అటు రాజ్యాంగ పట్ల ఇటు న్యాయస్థానం పట్ల ప్రజలకు గౌరవ తగ్గకుండా వుంటుంది. ఒకసారి రెండు సార్లు కాదు..14 సంవత్సరాల లేలేత చిన్నారిపై స్వంత బంధువే పశువులా లైంగిక దాడికి పాల్పడిన ఘటనపై న్యాయస్థానం తీవ్ర ఆగ్రహం వ్యక్తం చేసింది. అంతేకాదు సభ్య సమాజంలో ఇటువంటి కామాంధుడు వుండటానికి అర్హుడు కాదంటు నేరస్థుడు తుది శ్వాస విడిచేంతవరకూ కారాగార శిక్షను అనుభవించాల్సినంటు తీర్పునిచ్చింది. 50 ఏళ్ల వయసుగల ఆ దుర్మార్గుడికి  చివరి శ్వాస వదిలే దాకా జైలులోనే ఉండేలా శిక్ష విధిస్తూ కోర్టు జడ్జి జినేంద్ర కుమార్ శర్మ తీర్పు ఇచ్చారు. దీంతో పాటు అల్మోరా జిల్లా మెజిస్ట్రేట్ బాధిత బాలికకు రూ.7లక్షల నష్టపరిహారం 30 రోజుల్లోగా ఇవ్వాలని కోర్టు ఆదేశించింది.
తల్లిదండ్రులు మరణించడంతో చిన్నారి మామయ్య ఇంట్లోనే కాలం గడుపుతున్న ముక్కుపచ్చలారని 14ఏళ్ల చిన్నారిపై స్వంత మేనమామే మామయ్యే కామాంధుడిగా మారి బాలికపై పలు సార్లు అత్యాచారం చేశాడు. దీంతో బాలిక గర్భం దాల్చి మృతశిశువుకు జన్మనిచ్చింది. ఈ తీర్పుతో న్యాయస్థానంపై సమాజంలో గౌరవాభిమానుల ఎప్పటికీ నిలిచివుంటాయనటంలో ఎటువంటి సందేహం లేదు.
 

ముంబై: కామాంధుల చేతిలో సామూహిక అత్యాచారానికి గురైన కుక్క చనిపోయింది. తీవ్రగాయాలతో నరకయాతన అనుభవించిన ఆ మూగజీవి.. మూడు రోజుల పాటు మృత్యువుతో పోరాడి చివరకు ప్రాణాలు విడిచింది. వైద్యులు చికిత్స అందించినా ఫలితం లేకపోయింది. మలాడ్ పశ్చిమలోని మల్వానీ ప్రాంతంలో ఈ అమానవీయ ఘటన జరిగింది. మద్యం మత్తులో కామంతో కళ్లు మూసుకుపోయిన నలుగురు దుండగులు కుక్కపై అత్యంత హేయమైన రీతిలో సామూహిక అత్యాచారానికి పాల్పడ్డారు. లైంగికంగా తీవ్రంగా వేధించి వికృతానందం పొందారు.
మద్యం మత్తులో దారుణం:
మల్వానీ ప్రాంతానికి చెందిన స్థానికురాలు సుధా ఫెర్నాండేజ్‌ రోజూ ఆ కుక్కకు ఆహారం పెట్టేవారు. రోజూలానే మంగళవారం(నవంబర్ 20వ తేదీ) కూడా ఆమె ఆహారాన్ని తీసుకెళ్లి శునకం కోసం వెతుకుతుండగా.. ఓ చర్చి సమీపంలో శునకం మూలుగు వినిపించింది. వెంటనే అక్కడికి చేరుకోగా.. రక్తపు మడుగులో ఉన్న మూగజీవాన్ని చూసి ఆమె షాక్ తింది. శునకాన్ని వెటర్నరీ ఆస్పత్రిలో చేర్చగా మర్మాయవాల వద్ద తీవ్ర రక్తస్రావం అవుతుండటాన్ని చూసి వైద్యులు నిర్ఘాంతపోయారు. దర్యాప్తులో అమానవీయ విషయం బయటపడింది. శునకంపై మద్యం మత్తులో ఉన్న నలుగురు దుండగులు అత్యాచారం చేశారని తేలింది. శునకం నోరు కట్టేసి.. లైంగికంగా చిత్రహింసలకు గురిచేశారని వెల్లడైంది. ఈ దారుణ ఘటనపై సర్వత్రా ఆగ్రహావేశాలు వ్యక్తం అవుతున్నాయి. కామంతో కళ్లు మూసుకుపోయిన ఆ నలుగురిని కఠినంగా శిక్షించాలని డిమాండ్ చేస్తన్నారు.

అయోధ్య: అయోధ్య మళ్లీ ఉద్రిక్తంగా మారనుందా? అయోధ్యలో రెండు హిందూ సంస్ధలు చేపట్టిన కార్యక్రమాలతో ఉద్రిక్త పరిస్ధితి తలెత్తకుండా ప్రభుత్వం 144 సెక్షన్ విధించింది. రామమందిర నిర్మాణం డిమాండ్ తో ఆదివారం విశ్వహిందూ పరిషత్  ధర్మసభ నిర్వహిస్తోంది. అయోధ్యలో రామాలయం నిర్మాణం చేపట్టాలని ఇందుకోసం అవసరం ఐతే పార్లమెంటులో  బిల్లు పెట్టాలి,లేదా ప్రత్యేక ఆర్డినెన్స్ తీసుకువచ్చి ఐనా రామాలయం నిర్మాణం చేయాలనే డిమాండ్ తో విశ్వహిందూ పరిషత్ ఆదివారం ధర్మసభ నిర్వహిస్తోంది.  ఈసభలో కేవలం సాధు సంత్ లు మాత్రమే పాల్గొని రామాలయ నిర్మాణం పై మాట్లాడతారని వీహెచ్పీ ప్రకటించింది. ఈ సభకు సుమారు 5లక్షల మంది  వస్తారని వీహెచ్పీ అంచనా వేస్తోంది. ఇప్పటికే వేలాదిమంది హిందువులు రామభక్తులు అయోధ్య చేరుకున్నారు.
 కాగా ...రెండు రోజుల అయోధ్య పర్యటనకు శివసేన చీఫ్ ఉద్దవ్ ధాకరే ఈమధ్యాహ్నం అయోధ్య చేరుకున్నారు.శివసేన చీఫ్ ఉద్దవ్ ధాకరే కూడా రేపు జరిగే  విశ్వహిందూ పరిషత్ సభలోపాల్గొంటారు. ఈరోజు సాయంత్రం సరయూ నది తీరంలో జరిగే హారతి కార్యక్రమంలో ఆయన పాల్గొని శివసైనికులను ఉద్దేశించి ప్రసంగిస్తారు. ఆదివారం ఆయన రామజన్మభూమిని సందర్శిస్తారు. ఉధ్దవ్ వెంట దాదాపు  30వేల మంది శివసైనికులు  అయోధ్యకు చేరుకుంటున్నారు.  
భద్రత కోసం 10 కంపెనీల పారామిలటరీ బలగాలు, 68 కంపెనీల ప్రత్యేక భద్రతా బలగాలను  మోహరించినట్లు అడిషనల్ పోలీసు సూపరింటెండెంట్ సంజయ్ కుమార్ చెప్పారు.  జిల్లా  యంత్రాంగం సీసీ కెమెరాలతోనూ, డ్రోన్ కెమెరాలతోనూ పరిస్ధితిని సమీక్షిస్తోంది. 
పార్లమెంట్తో సంబంధం లేకుండా సుప్రీంకోర్టు తీర్పు అనంతరం   రామాలయం నిర్మాణం  చేపడతామని ఇప్పటికే బీజేపీ అధ్యక్షుడు అమిత్ షా ప్రకటించారు. కాగా వచ్చేఏడాది జనవరిలో సుప్రీం కోర్టు అయోధ్యవివాదం ను విచారించనున్నది. 

ఇండోర్ (మధ్యప్రదేశ్) : డాలర్-రూపాయి మారకం విలువ పతనంపై కాంగ్రెస్ నాయకుడు, బాలీవుడ్ నటుడు రాజ్‌బబ్బర్ చేసిన వ్యాఖ్యలు రాజకీయ దుమారాన్ని లేపుతున్నాయి. రాజ్‌బబ్బర్ ప్రధాన మంత్రి నరేంద్ర మోడీ తల్లి వయస్సును ఈ అంశంలోకి లాగడంతో బీజేపీ నాయకులు ఆగ్రహం వ్యక్తం చేస్తున్నారు. రాజ్‌బబ్బర్ క్షమాపణ చెప్పాలని వారు డిమాండ్ చేస్తున్నారు. ఈ వ్యాఖ్యలపై మోడీ సైతం తీవ్రంగానే స్పందించారు. ‘‘గెలుపు కోసం కాంగ్రెస్ నేతలు మా అమ్మను సైతం తిట్టడం మొదలుపెట్టారు’’ అంటూ మోడీ మిజోరం ఎన్నికల ర్యాలీలో ఎద్దేవా చేశారు. 
గతంలో నరేంద్ర మోడీ రూపాయి విలువను నాటి ప్రధాని మన్మోహన్ సింగ్ వయస్సుతో పోల్చారని పేర్కొంటూ.. ఈనాడు రూపాయి పతనం మోడీ తల్లి వయసుతో సమానం అవుతోందని (90 ఏళ్లు దాటిన మోడీ తల్లి హీరాబా వయస్సు) మధ్యప్రదేశ్‌లొని ఇండోర్‌లో జరిగిన ఎన్నికల ప్రచార ర్యాలీలో యూపీ రాష్ట్ర కాంగ్రెస్ అధ్యక్ష్యుడు రాజ్‌బబ్బర్ వ్యాఖ్యానించారు. ఈ వ్యాఖ్యలపై ఖండిస్తూ గుజరాత్ ముఖ్యమంత్రి విజయ్ రూపాని ఇవి దారుణమైన వ్యాఖ్యలుగా అభివర్ణించారు.  దీనిపై కాంగ్రెస్ పార్టీ అధ్యక్షులు రాహుల్ గాంధీ క్షమాపణ చెప్పాలని బీజేపీ నేతలు డిమాండ్ చేస్తున్నారు.
 

 

మండ్య : కర్నాటకలోని మండ్య జిల్లా కనగనమరడి దగ్గర.. కేఎస్ఆర్టీసీ బస్సు కాలువలో పడ్డ ఘటనలో 25 మంది ప్రయాణికులు  మరణించారు. పాండవపురం నుంచి మండ్య వైపు వెళుతున్న బస్సు.. అదుపు తప్పి పంట.కాలువలో పడిపోయింది. ఈ దుర్ఘటనలో 25మంది జలసమాధి అయ్యారు. మరో  20 మంది గాయపడ్డారు. వీరిలో పలువురి పరిస్థితి ఆందోళనకరంగా ఉంది. కాలువలో పడ్డ బస్సునుంచి మృతదేహాలను వెలికి తీశారు. మృతుల్లో చిన్నారులే ఎక్కువగా ఉన్నారు. డ్రైవర్ అతి వేగంగా బస్సును నడపడం వల్లే.. దుర్ఘటన జరిగినట్లు ప్రత్యక్ష సాక్షులు చెబుతున్నారు. బస్సు అదుపు తప్పగానే, డ్రైవర్ కిందికి దూకి పారిపోయాడు. బస్సు ప్రమాదంపై రాష్ట్ర ముఖ్యమంత్రి కుమారస్వామి దిగ్భ్రాంతిని వ్యక్తం చేశారు. సహాయ చర్యలు చేపట్టాలని జిల్లా అధికార యంత్రాంగాన్ని ఆదేశించారు. 

న్యూఢిల్లీ: రాఫెల్ యుద్ధవిమానాల కొనుగోలులో మరో అడ్డంకి ఎదురవ్వబోతోంది. ఆర్థిక నేరాలపై పోరాడే షెర్పా అనే ఫ్రెంచి స్వఛ్ఛంద సంస్థ ఏ ప్రాతిపదికన 36 రాఫెల్ యుద్ధవిమానాలను డాసౌ కంపెనీ భారత్‌కు సరఫరా చేస్తోందని కోరుతూ ఆ దేశ ఆర్థిక ప్రాసెక్యూషన్ కార్యాలయంలో పిటీషన్ దాఖలు చేసింది. ఈ పిటీషన్ లో ఏ అంశాలు ఈ డీల్‌లో ప్రస్తావించారని.. ఏ అంశాలతో అనిల్ అంబానీకి చెందిన రిలయన్స్ డిఫెన్స్ డాసౌ ఎవియేషన్‌లో ఆఫ్‌సెట్ భాగస్వామిగా తీసుకున్నారో తెలపాలని కోరుతూ ఈ పిటీషన్ దాఖలైంది.

Image result for french ngo sherpaరాఫెల్ డీల్‌లో ప్రధాన మంత్రి నరేంద్ర మోడీ తన అధికారాన్ని అడ్డం పెట్టుకొని తనకు కావాల్సిన వారికి లాభించేలా వ్యవహరించారని వచ్చిన అవినీతి ఆరోపణలును పరిగణలోకి తీసుకున్న షెర్పా స్వచ్ఛంద సంస్థ ఈ పిటీషన్‌ను దాఖలు చేసినట్టు తెలిపింది. దీంతోపాటు మీడియా కథనాలు, తాము చేసిన దర్యాప్తులను కూడా ఈ పిటీషన్‌లో వెల్లడించింది. 
దీనిపై దర్యాప్తుచేసి నిజానిజాలను వెల్లడించాలని ఎన్పీపీ కార్యలయ అధికారులను కోరింది. 

 

ముంబయి: దాదాపు 15 ఏళ్ల ప్రయత్నాల అనంతరం ఏసియాలోనే అతిపెద్ద స్లమ్ ఏరియాగా పేరుగాంచిన ముంబైలోని ధారవి ఎట్టకేలకు రియల్టర్ల చేతిలోకి వెళ్లనుంది. దాదాపు 593 ఎకరాల్లో విస్తరించి ఉన్న ఈ మురికివాడను అభివృద్ది చేసేందుకు మహారాష్ట్ర ప్రభుత్వం గ్లోబల్ టెండర్లను పిలిచింది. దీనికోసం కనీస బిడ్ రూ 3,150 కోట్లుగా నిర్ణయించింది. 
టెండర్‌ను దక్కించుకున్న ప్రధాన భాగస్వామ్య కంపెనీ ఎస్పీవీ (స్పెషల్ పర్పస్ వెహికల్)ను కనీసం 80శాతం తమసొంత నిధులతో దాదాపు రూ. 400 కోట్లతో ఏర్పాటు చేసుకోవాల్సి ఉంటుంది.  ఇందులో మహారాష్ట్ర ప్రభుత్వం రూ 100 కోట్ల మేర అంటే 20 శాతం ఈక్విటీతో ఎస్పీవీలో భాగస్వామిగా ఉంటుంది.

Image result for DHARAVI SLUM
ఈ మురికివాడలో నివసించే అర్హలైన పేదలందరికీ ఉచితంగా ఇళ్ల నిర్మాణం చేసే బాధ్యత ఈ ఎస్పీవీ పైనే ఉంటుంది. ధారవి పునర్:నిర్మాణ ప్రాజెక్టు పర్యవేక్షణ కోసం ఓ అధికారిని రాష్ట్ర ప్రభుత్వం నియమిస్తుంది. 
రాబోయే ఎన్నికలలోపు ఈ ప్రాజెక్టుకు ప్రధాన భాగస్వామ్య కంపెనీని ఎంపికచేయాలని ప్రభుత్వం భావిస్తోంది. మొత్తం ధారవి ప్రాంతాన్ని ఐదు భాగాలుగా చేసి అభివృద్ధి చేయాలని మహారాష్ట్ర సర్కారు యోచిస్తోంది.

 

అయోధ్య (ఉత్తరప్రదేశ్) : 1992లో బాబ్రీ మసీదు కూల్చివేత ఘటనను గుర్తుకు తెస్తూ ఇటు వీహెచ్పీ, అటు శివసేన సేనలు అయోధ్యలో మోహరిస్తున్నాయి. ఈ ఆదివారం (నవంబర్ 25) అయోధ్య పరిసర ప్రాంతాలు ఉద్రిక్తతతో వేడెక్కుతున్నాయి. ఇందుకు ప్రధాన కారణం శివసేన అయితే మరో ప్రధాన కారణం విశ్వ హిందూ పరిషత్. రామమందిర నిర్మాణానికి ప్రత్యేక చట్టం చేయాలని ఎన్డీఏ సర్కార్‌పై వత్తిడి పెంచుతున్నాయి. శివసేన నేత సంజయ్ రౌత్ శుక్రవారం చేసిన వ్యాఖ్యలు సంచలనం కలిగించాయి. 
అయోధ్యలో రామ మందిర నిర్మాణానికి కేంద్ర ప్రభుత్వం చట్టాన్ని చేయాలని కోరుతూ... ‘‘మేము కేవలం 17 నిమిషాల్లో బాబ్రీ మసీదును కూల్చేశాం.. ఎన్డీఏ సర్కార్ ఎన్ని ఏళ్ళు తీసుకుంటుంది చట్టం తీసుకురావడానికి’’ అంటూ సంజయ్ వ్యాఖ్యానించడం విమర్శలకు దారితీసింది. రాష్ట్రపతి భవన్ నుంచి ఉత్తరప్రదేశ్ వరకు అన్ని రాష్ట్రాల్లో బీజేపీ ప్రభుత్వం ఉంది. అలాగే రాజ్యసభలో మద్ధతు ఇచ్చేందుకు చాలా మంది సభ్యులున్నారు.. అయినా ఆలస్యం ఎందుకు అంటూ ఆయన ట్విట్టర్ వేదికగా సంజయ్ రౌత్ ప్రశ్నించారు. 

Image result for rama janmabhoomi
రెండురోజుల పర్యటనలో భాగంగా శివసేన అధినేత ఉద్ధవ్ థాకరే శనివారం అయోధ్య రామమందిరాన్ని సందర్శించనున్ననేపథ్యంలో ఈ ప్రాంతంలో ఉద్రిక్త పరిస్థితులు నెలకొన్నాయి. శివసేన అధిపతి రామ జన్మభూమి ప్రాంతంలో ప్రత్యేక ప్రార్థనలు చేయనున్నారు. అనంతరం వేలాది మంది సన్యాసులు, సంత్‌లను ఉద్దేశించి ప్రసంగించనున్నారు. ఒక కుండలో పూణేలోని శివనేరి కోటలో సేకరించిన మట్టిని ఆయన తనతో తీసుకువస్తున్నారు. ఈ కలశాన్ని రామజన్మభూమి మహంత్‌కు సమర్పిస్తారు. 

Image result for rama janmabhoomi
మరోవైపు వీహెచ్పీ ఆధ్వర్యంలో ఆదివారం ధర్మ సంసద్ నిర్వహించేందుకు భారీ ఏర్పాట్లు చేస్తున్నారు. ఈ సంసద్‌లో భారీగా సన్యాసులు, రామమందిర్ నిర్మాణ మద్ధతుదారులు  పాల్గొంటారు. దాదాపు 2 లక్షల మంది అయోధ్యలో జరిగే ఈ సభకు కార్యకర్తలు తరలి వస్తారని వీహెచ్పీ, ఆర్ఎస్సెస్‌లు ఇప్పటికే ప్రకటించాయి. 1992 తర్వాత నిర్వహించే అతిపెద్ద సభగా వీరు పేర్కొంటున్నారు. ఈ సందర్భంగా రాష్ట్ర వ్యాప్తంగా భారీ బైక్ ర్యాలీలు, ప్రదర్శనలు నిర్వహించనున్నారు. అయితే ఇక్కడ ముస్లింలు 1992లో జరిగిన సంఘటనలు పునరావృతం అవుతాయన్న భయాందోళనలో ఉన్నారు. బాబ్రీ మసీదు విధ్వంసం జరిగి డిసెంబర్ 6 నాటికి 26 ఏళ్లు నిండుతున్న దృష్ట్యా రామమందిర నిర్మాణానికి కేంద్రం చర్యలు తీసుకోవాలన్న డిమాండ్ వీహెచ్పీ, శివసేన, ఆర్ఎస్సెస్ నేతలనుంచి ఊపందుకుంటోంది. 

 

తమిళనాడు : రాష్ట్రంలో అమలవుతున్న ఉచిత బియ్యం సరఫరా వల్ల ప్రజలు సోమరులుగా తయారవుతున్నారని హైకోర్టు సంచలన వ్యాఖ్యలు చేసింది.  కేవలం దారిద్ర్యరేఖకు దిగువున వున్నవారికి మాత్రం అనే ఉద్ధేశ్యంతో ప్రవేశ పెట్టిన ఈ పథకం తప్పుదోవడ పడుతోందని హైకోర్టు పేర్కొంది. చిన్నాచితక పనులకు కూడా కూలీలను ఉత్తరాది నుంచి తెచ్చుకోవాల్సిన దుస్థితి వచ్చింది’’ అని మద్రాసు హైకోర్టు వ్యాఖ్యానించింది. బియ్యం అక్రమ రవాణా కేసులో ఒక నిందితుడు దాఖలు చేసిన హెబియస్‌ కార్ప్‌సపై విచారణ చేపట్టిన ధర్మాసనం గురువారం అంటే నవంబర్ 23న ఈ వ్యాఖ్యలు చేసింది. బలహీనవర్గాలకు ఉచితబియ్యం పంపిణీని కోర్టు వ్యతిరేకించడం లేదనీ..ఇటువంటి పథకాలను ఆర్థిక ప్రాతిపదిక లేకుండా అన్నివర్గాలకూ ఇవ్వడం సరికాదని ధర్మాసనం అభిప్రాయపడింది. ‘‘2017-18లో ప్రభుత్వం ఉచిత బియ్యం పథకంపై రూ.2,110 కోట్లు ఖర్చుపెట్టింది. ఇది చాలా ఎక్కువ సొమ్ము. దీన్ని మౌలిక సౌకర్యాల అభివృద్ధికీ, ఇతరత్రా జాగ్రత్తగా ఖర్చు చేయాల్సి ఉండింది. ఒక రకంగా ఇది పెట్టుబడి నష్టమే.’’ అని వ్యాఖ్యానించింది. దారిద్య్రరేఖ దిగువవర్గాలకే మాత్రమే ఉచిత బియ్యం ఇవ్వాలని సూచించింది.
 

ఢిల్లీ : మధ్యతరగతివారికి అందకుండా..చుక్కల్లో విహరించే పెట్రోల్, డీజిల్ ధరలు ప్రస్తుతం రోజు రోజుకు తగ్గుముఖం పడుతున్నాయి. దీంతో  కొనుగోలు వస్తువులపై కొంతవరకూ భారం తక్కువగానే వుంటుందని చెప్పవచ్చు. దీంతో సామాన్యమానవుడు కొంతవరకూ ఊపిరి పీల్చుకునే పరిస్థితులు వున్నాయి. దీనికి కారణం అంతర్జాతీయంగా ముడిచమురు ధరలు తగ్గడం వల్లనే. డాలర్ తో రూపాయి మారకం విలువ బలపడటంతో పెట్రోలు, డీజిల్‌ ధరలు క్రమంగా దిగొస్తున్నాయి. గత నెల వ్యవధిలో లీటరు పెట్రోలు ధర రూ.8 తగ్గగా, డీజిల్‌ ధర రూ.5 తగ్గింది. శుక్రవారం అంటే నవంబర్ 24న కూడా  లీటరు పెట్రోలు ధర 40 పైసలు తగ్గి, రూ.75.57కు చేరింది. లీటరు డీజిల్‌ ధర 41 పైసలు తగ్గి రూ.70.56కు చేరింది.
 

ఢిల్లీ : మళ్లీ అయోధ్య అంశం తెరపైకి వస్తోంది. ఎన్నికలు తరుముకొస్తున్న వేళ పలువురు నేతలు ఈ వివాదాస్పద అంశంపై పలు వ్యాఖ్యలు చేస్తున్నారు. తాజాగా అయోధ్యలో భారీ ధర్మసభను నిర్వహించేందుకు విశ్వహిందూ పరిషత్ ఏర్పాట్లు చేస్తోంది. ఆదివారం జరుగుతున్న ఈ ధర్మసభపై అందరి ద‌ృష్టి నెలకొంది. ఈ సభకు దాదాపు లక్ష మంది హాజరౌతారని వీహెచ్‌పీ పేర్కొంటోంది. ఈ సభలో హాజరయ్యేందుకు శివసేన అధ్యక్షుడు ఉద్దవ్ థాకరే తమ కార్యకర్తలతో అయోధ్యకు రానున్నారు. 
ఈ వేదికపై రాజకీయ నేతలకు మాత్రం చోటు లేదని పేర్కొన్న వీహెచ్‌పీ కేవలం సాధువులు మాత్రమే కూర్చొంటారని వెల్లడించింది. మందిర నిర్మాణం చేపట్టేందుకు కేంద్రానికి గట్టి సంకేతాలు పంపడం జరుగుతుందని..ఆర్డినెన్స్ లేక పార్లమెంట్‌లో బిల్లు తేవాలని ఒత్తిడి పెంచుతామని వెల్లడించింది. 

> 1989లో విశ్వహిందూ పరిషత్ నేతలు.. రామాలయ నిర్మాణం కోసం నడుం బిగించారు.
1992 డిసెంబర్‌ 6న వివాదాస్పద బాబ్రీ మసీదు కూల్చివేత.
అద్వానీ రథయాత్ర, ఆ తర్వాత మసీదు కూల్చివేత ఘటనలు చోటు చేసుకున్నాయి. 
1992లో ప్రభుత్వం మసీదు కూల్చివేత ఘటనపై లిబర్హాన్ కమిటీని వేసింది. 
2002లో వాజపేయి ప్రభుత్వం హిందు - ముస్లీంల మధ్య చర్చల కోసం అయోధ్య సెల్ ప్రారంభించింది.
2002లో అయోధ్య వెళ్లి వస్తున్న కరసేవకుల రైలుపై దాడి. దానిని తగుల బెట్టారు. ఈ ఘటనలో 58 మంది హిందువులు చనిపోయారు.
ప్రతిగా గోద్రా అల్లర్లు జరిగాయి. అందులోను వందలాది మంది ముస్లీంలు చనిపోయారు.
అయోధ్య - బాబ్రీ స్థలం ఎవరిదో తేల్చేందుకు ముగ్గురు జడ్జిల నేతృత్వంలో హైకోర్టు 2002 నుంచి వాదనలు వినడం ప్రారంభించింది.

ఢిల్లీ : రానున్న పార్లమెంట్ శీతాకాల సమావేశాల్లో అయోధ్యలో రామమందిర నిర్మాణానికి బిల్లు పెట్టనున్నట్లు  బీజేపీ ఎంపీ రవీంద్ర కుశ్వా చెప్పారు. ఒకవేళ బిల్లు రాజ్యసభలో  బిల్లు ఆమోదం పొందకపోతే  కేంద్రం ఆర్డినెన్స్ తీసుకువస్తుందని  ఆయన తెలిపారు. విశ్వహిందూ పరిషత్  ఆధ్వర్యంలో అయోధ్యలో ధర్మసభ జరగటానికి 2 రోజుల ముందు బీజేపీ ఎంపీ ఈవ్యాఖ్యలు చేయటం ప్రాధాన్యత సంతరించుకుంది. కాగా....అయోధ్యలో రామమందిరం నిర్మించాలని పలు హిందూ సంస్ధలు తమ డిమాండ్ ను గట్టిగా వినిపిస్తున్నాయి. రామమందిర నిర్మాణ ప్రారంభంపై చర్చించేందుకు విశ్వహిందూ పరిషత్, అయోధ్యలో 25వతేదీ ఆదివారం నాడు సాధువులతో ధర్మసభను నిర్వహిస్తోంది. లక్షలాది మంది కరసేవకులు రేపు ధర్మసభకు వచ్చేఅవకాశం ఉన్నట్లు తెలుస్తోంది. శివసేన అధ్యక్షుడు ఉద్దవ్ ధాకరే శనివారమే తన అనుచరులతో అయోధ్యకు చేరుకుంటారు. రేపు జరిగే సభలో రామమందిర నిర్మాణ తేదీని ఖరారు చేయనున్నట్లు వీహెచ్ పీ తెలిపింది. వేదికపై సాధువులు మాత్రమే కూర్చుంటారని, రాజకీయ నేతలెవరికీ వేదికపై ప్రవేశం లేదని తెలిపింది. 

న్యూఢిల్లీ: దేశానికి స్వాతంత్ర్యం వచ్చినప్పటినుంచి కేంద్ర బడ్జెట్ సాధారణంగా  ఫిబ్రవరి చివరిన, లేదా మార్చి నెల మొదట్లో పెట్టేవారు.  కేంద్రంలో ఎన్టీఏ ప్రభుత్వం అధికారం లోకి వచ్చాక ఈ తేదీని మార్పు చేస్తూ ఈఏడాది ఫిబ్రవరి 1న కేంద్ర ఆర్ధికమంత్రి అరుణ్ జైట్లీ బడ్జెట్ ప్రవేశపెట్టారు. ఇప్పుడు వచ్చే సంవత్సరం కూడా ఫిబ్రవరి 1 నబడ్జెట్ ప్రవేశపెట్టేందుకు కేంద్ర ప్రభుత్వం ఏర్పాట్లు చేస్తోంది. ఇప్పటికే పార్లమెంట్‌ నార్త్‌ బ్లాక్‌లోని కేంద్ర ఆర్థిక శాఖ కార్యాలయంలోకి ప్రవేశాలను నిలిపివేశారు. బడ్జెట్‌ ప్రతిపాదనలను పంపించాలని కోరుతూ వివిధ మంత్రిత్వ శాఖలకు ఆర్థిక శాఖ    లేఖలు రాసింది. ఫిబ్రవరి 1న బడ్జెట్‌ ప్రవేశపెట్టి, అదే నెల 28న బడ్జెట్‌ సమావేశాలు ముగుస్తాయని ఆర్థిక శాఖ అధికారులు తెలిపారు.  స్వాతంత్ర్యం వచ్చాక ఇప్పటి వరకు 25 మంది మంత్రులు  88సార్లు బడ్జెట్ ప్రవేశ పెట్టారు.  ఫిబ్రవరిలో  బడ్జెట్ సమావేశాలు ముగిసిన వెంటనే సార్వత్రిక ఎన్నికల షెడ్యూలు ప్రకటించి, ఏప్రిల్‌లోగా ఎన్నికల ప్రక్రియను ముగించాలని కేంద్రం యోచిస్తున్నట్లు తెలుస్తోంది. 

ఢిల్లీ : మొబైల్‌ ఫోన్‌ వినియోగదారులకు ఎయిర్‌టెల్‌, వొడాఫోన్‌- ఐడియా సంస్థలు షాకింగ్ న్యూస్ ఇచ్చాయి. లైఫ్‌టైం ఫ్రీ ఇన్‌కమింగ్‌ కాల్స్‌ ప్లాన్‌లను రద్దుచేయాలని ఎయిర్‌టెల్‌, వొడాఫోన్‌- ఐడియా సంస్థలు నిర్ణయించాయి. టెలికం సంస్థలు తీసుకున్న ఈ నిర్ణయంతో భవిష్యత్తులో ఇన్‌కమింగ్‌ కాల్స్‌కు సైతం డబ్బులు చెల్లించాల్సిందే. ఈ సేవలను కొనసాగించేందుకు సంబంధిత కంపెనీల చందాదారుల కనీస రీఛార్జిలు చేయించుకోవాల్సి ఉంటుంది. టెలికం మార్కెట్లోకి రిలయన్స్‌ జియో ప్రవేశంతో తమ ఆదాయానికి గండి పడటంతో.. ఈ సంస్థలు జియో పోటీని తట్టుకొనేందుకు ప్రస్తుత టారిఫ్‌లలో మార్పులు చేస్తున్నాయి. ఇందులో భాగంగా లైఫ్‌టైం ఫ్రీ ఇన్‌కమింగ్‌ కాల్స్‌ పథకాలకు ఎయిర్‌టెల్‌, వొడాఫోన్‌- ఐడియా సంస్థలు స్వస్తి పలకనున్నాయి. కనీస రీఛార్జి పథకాలను అందుబాటులోకి తెస్తున్నాయి.
కనీస రీఛార్జిలను చేసుకున్న వారికి నిర్ణీత కాలానికి ఫ్రీ ఇన్‌కమింగ్‌ కాల్స్.. ‌ 
అయితే, ఇన్‌కమింగ్‌ కాల్స్‌కు సంబంధించి నిమిషాల చొప్పున ఛార్జీలు వడ్డించకుండా కనీస రీఛార్జిలను చేసుకున్న వారికి నిర్ణీత కాలానికి ఫ్రీ ఇన్‌కమింగ్‌ కాల్స్ ‌సదుపాయాన్ని అందించనున్నాయి. అందులో భాగంగా రూ.35, రూ.65, రూ.95తో రీఛార్జి ప్లాన్‌లను ఎయిర్‌టెల్‌ అందుబాటులోకి తీసుకొచ్చింది. సంబంధిత రీఛార్జి పథకాల ద్వారా 28 రోజల పాటు డేటా, టాక్‌టైం లభించడంతో పాటు ఫ్రీ ఇన్‌కమింగ్‌ కాల్స్‌ సౌకర్యం కూడా లభిస్తుంది. ఇదే తరహాలో రూ.30లతో కనీస రీఛార్జి పథకాన్ని తీసుకురావాలని వొడాఫోన్‌ -ఐడియా సంస్థ కూడా నిర్ణయించింది.

 

తిరువనంతపురం : శబరిమల అయ్యప్ప స్వామిని దర్శించుకోవాలని భావించే మహిళల కోసం ప్రత్యేకంగా ఓ రెండు రోజులను కేటాయిస్తామని కేరళ ప్రభుత్వం ప్రకటించింది. శుక్రవారం కేరళ హైకోర్టులో ఈ విషయాన్ని వెల్లడించింది. అయ్యప్ప దర్శనం కోసం వెళ్లే తమకు రక్షణ కల్పించాల్సిందిగా కేరళ ప్రభుత్వాన్ని ఆదేశించాలంటూ నలుగురు మహిళలు వేసిన పిటిషన్‌పై విచారణ సందర్భంగా, ప్రభుత్వం ఈ ప్రకటన చేసింది. అయితే ఈ వెసులుబాటు ఎప్పటి నుంచి అన్నది తెలియజేయలేదు. నవంబర్ 26న శబరీశుని ఆలయాన్ని తెరిచారు. డిసెంబర్ 26న మూసేస్తారు. మూడు రోజుల విరామం తర్వాత మకరవిళక్కు కోసం మళ్లీ గుడి తలుపులు తెరుస్తారు. జనవరి 20వ తేదీ వరకూ ఆలయం తెరిచే ఉంటుంది. ఈ మధ్యకాలంలో మహిళలకు ఎప్పుడు దర్శనభాగ్యం కలిగిస్తారో.. మహిళలను అడ్డుకునేందుకు విశ్వప్రయత్నాలూ చేస్తోన్న హిందూ ఆందోళన కారులను ఎలా నిలువరిస్తారో.. వేచి చూడాలి. మహిళలూ పురుష భక్తులతో సమానంగా అయ్యప్పను దర్శించుకోవచ్చన్న సుప్రీంకోర్టు తీర్పు నేపథ్యంలో, మహిళా జర్నలిస్టులు, మహిళా హక్కుల సంఘాల నేతలు చాలామంది శబరీశుని దర్శించుకునేందుకు చేసిన ప్రయత్నాలను హిందూ శక్తులు అడ్డుకున్నాయి. గడచిన రెండు నెలలుగా శబరిమలలో ఉద్రిక్తవాతావరణ నెలకొంది. ఈ పరిస్థితుల్లో మహిళలకు విడిగా దర్శనభాగ్యం కల్పించాలన్న కేరళ ప్రభుత్వ నిర్ణయం మరెలాంటి పరిణామాలకు దారితీస్తుందోనన్న ఉత్కంఠ నెలకొంది. 

ముంబయి: ఉద్ధవ్ థాకరే అయోధ్యను సందర్శించనున్నసమయంలో శివసేన ఎంపీ సంజయ్ రౌత్ శుక్రవారం (నవంబరు 23) చేసిన వ్యాఖ్యలు వివాదాస్పదమయ్యాయి.  అయోధ్యలో రామ మందిర నిర్మాణానికి కేంద్ర ప్రభుత్వం చట్టాన్ని చేయాలని కోరుతూ... ‘‘మేము కేవలం 17 నిమిషాల్లో బాబ్రీ మసీదును కూల్చేశాం.. ఎన్డీఏ సర్కార్ ఎన్ని ఏళ్ళు తీసుకుంటుంది చట్టం తీసుకురావడానికి’’ అంటూ ఎంపీ వ్యాఖ్యానించడం విమర్శకు దారితీసింది. రాష్ట్రపతి భవన్ నుంచి ఉత్తరప్రదేశ్ వరకు అన్ని రాష్ట్రాల్లో బీజేపీ ప్రభుత్వం ఉంది. అలాగే రాజ్యసభలో మద్ధతు ఇచ్చేందుకు చాలా మంది సభ్యులున్నారు.. అయినా ఆలస్యం ఎందుకు అంటూ ఆయన ట్విట్టర్ వేదికగా సంజయ్ రౌత్ ప్రశ్నించారు. 
 

Pages

Don't Miss