Yadadri

17:45 - October 3, 2017

యాదాద్రి భువనగిరి : లిగొండ మండలంలో రెండురోజులుగా భారీవర్షాలు కురుస్తున్నాయి. దీంతో మండలంలోని వెలువర్తి చెరువు నిండిపోయి అలుగుపోస్తోంది. దీంతో రైతులు సంతోషం వ్యక్తం చేస్తున్నారు. 

11:04 - October 3, 2017

నల్గొండ : యాదాద్రి జిల్లాలో మూసీ నదికి వరద నీరు పోటెత్తుతోంది. హైదరాబాద్ నుండి పెద్ద ఎత్తున్న వస్తున్న వరదనీటితో పలు కాలనీలు నీట మునిగిపోయాయి. వరదనీరు భారీగా రావడంతో మూసీలో నీటి మట్టం 644.8 అడుగులకు చేరుకుంది. పూర్తిస్థాయి నీటి మట్టం 645గా అడుగులుగా ఉంది. గరిష్టస్థాయికి నీరు చేరడంతో మూడు ఫీట్ల మేర ఐదు గేట్లను ఎత్తివేశారు. దీనితో పోచంపల్లి, భీమనపల్లి తదితర గ్రామాల్లో రాకపోకలు స్తంభించాయి.

 

13:25 - September 26, 2017

యాదాద్రి : జిల్లా యాదగిరి గుట్టలో విషాదం జరిగింది. వెంకటేష్, మహేశ్వరి అనే దంపతులు ఆత్మహత్య చేసుకున్నారు. మూడు రోజుల క్రితమే చనిపోయినట్టు పోలీసులు అనుమానం వ్యక్తం చేస్తున్నారు. కుటుంబ కలహాలే ఆత్మహత్య కారణమని అనుమానిస్తున్నారు. వెంకటేష్ ఉరి వేసుకొని ఆత్మహత్య చేసుకోగా మహేశ్వరి పురుగుల మందు తాగి ఆత్మహత్య చేసుకుంది. వీరి ఇద్దరు పిల్లలున్నారు. వీరి మరణంతో పిల్లలు ఆనాథలుగా మారారు. పూర్తి వివరాలకు వీడియో చూడండి.

21:33 - September 25, 2017

యాదాద్రి :జిల్లా భువనగిరిలోని గ్యాంగ్‌స్టర్‌ నయిం ఇంటికి IT అధికారులు నోటీసులు అంటించారు. బినామీ ఆస్తుల లావాదేవీలపై ఐదుగురు కుటుంబ సభ్యుల పేర్లతో నోటీసులు ఇచ్చారు. అక్టోబర్‌ 3లోగా సమధానం ఇవ్వాలని ఆదేశించారు.. తల్లి తహెర బేగం, సోదరి సలీమా బేగం, హుస్సేన బేగం.. సహైలబేగం... హీనాకౌసర్‌ పేర్లతో నోటీసులు పంపారు.

13:24 - September 25, 2017

యాదాద్రి : జిల్లాలోని టంగటూరు గ్రామ శివారులోని గౌతమి ఎక్స్ ప్లోజివ్ కంపెనీలో పేలుడు సంభవించడంతో ఒకరు మృతి చెందారు. ఈ ఘటనలో మృతి చెందిన రాకెల సిద్ధులు బంధువులు కంపెనీ ఎదుట నిరసన వ్యక్తం చేశారు. తమ కుటుంబాన్ని ఆదుకోవాలంటే వారు వేడుకున్నారు. వారు చేపడుతున్న ఆందోళనకు కార్మిక సంఘాలు మద్దతు ప్రకటించాయి. మృతుడికి ఇద్దరు కుమార్తెలున్నారు. 

07:17 - September 25, 2017

హైదరాబాద్ : తెలంగాణలో దళితులకు మూడుఎకరాల భూమి కలేనా..? అధికార పార్టీ అండదండలు ఉన్నవారికే భూములు దక్కనున్నాయా..? దశాబ్దాలుగా కబ్జాలకు గురైనా భూముల లెక్కలు తేలేదన్నడు.. ? సమగ్ర భూసర్వే పేరుతో గులాబీనేతలు జేబులు నింపుకోడానికి ప్లాన్స్‌ వేశారా..? తెలంగాణ ప్రభుత్వం హడావిడి చేస్తున్న భూ సర్వేపై టెన్‌టీవీ ప్రత్యేక కథనం. తెలంగాణ ప్రభుత్వం చేపట్టిన భూ సర్వే పై వివాదాలు రాజుకుంటున్నాయి. కాలదోషంపట్టిన చట్టాలను సవరించకుండా సర్వే చేపట్టడంపై రైతుల్లోఆందోళన వ్యక్తం అవుతోంది. టీఆర్‌ఎస్‌ కార్యకర్తల జేబులు నింపడానికే భూ సర్వే తలపెట్టారని విపక్షాలు ఆరోపిస్తున్నాయి. ఈ కుట్రలో భాగంగానే తాజాగా ఏర్పాటు చేస్తున్న రైతుసమితుల్లో గులాబీ పార్టీ అనుయాయులను నింపేస్తున్నారనే విమర్శలు వస్తున్నాయి.

పేదల భూముల రక్షణకోసం 1977లోనే తీసుకొచ్చిన చట్టాన్ని అమలును గతపాలకులు, ప్రస్తుత పాలకులు అటకెక్కించారు. సీలింగ్‌ భూములు ఆక్రమణకు గురవుతున్నా ప్రభుత్వాలు నిమ్మకునీరెత్తినట్టు వ్యవహిరిస్తూ వస్తున్నాయి. కోనేరు రంగారావు కమిటీ తెలంగాణలో 25లక్షల ఎకరాల భూదాన, అసైండ్‌ల్యాండ్స్‌ ఉన్నట్టు లెక్కలు తేల్చింది. తాజాగా భూ సర్వే అంటూ..గతంలో దళితులు, పేదలకు పంచిన భూములను లాక్కునేందుకే ప్రభుత్వం ప్రయత్నిస్తోందని వామపక్షాలు విమర్శిస్తున్నాయి. హైదరాబాద్‌ శివారు ప్రాంతాల్లో వేలాది ఎకరాలను రాజకీయనాయకులు, అవినీతి అధికారులు కబ్జాచేస్తుంటే... పేదప్రజలు నిలువ నీడలేక రోడ్లవెంబడి, ఇరుకు బస్తీల్లోనూ కాలం వెళ్లదీస్తున్న దీనావస్థల టీఆర్‌ఎస్‌ ప్రభుత్వానికి కనిపించడంలేదా అని లెఫ్ట్‌ పార్టీలు ప్రశ్నిస్తున్నాయి.

మరోవైపు తెలంగాణరాష్ట్ర వ్యాప్తంగా 9 లక్షల 38 వేల 055 దళిత , 5లక్షల 54వేల 384 గిరిజన కుటుంబాలు ఉన్నాయి. వీరిలో మొత్తం 3లక్షల 95వేల 363 కుటుంబాలకు కుంటభూమి కూడా లేదని ప్రభుత్వ నివేదికలే స్పష్టం చేస్తున్నాయి. ఇక ఒక ఎకరం లోపు ఉన్న కుటుంబాలు మరో 2లక్షల 94వేల వరకు ఉన్నాయి. ఈలెక్కన తెలంగాణలో ఉన్న పేద దళితులకు 3ఎకరాల చొప్పున వ్యవసాయ భూమి ఇస్తే.. మొత్తం దాదాపు 18లక్షల ఎకరాలకు పైగా పంచాల్సి వస్తుంది.

సమగ్ర భూ సర్వే పేరుతో రైతుల భూముల లెక్కలు తీస్తామంటున్న కేసీఆర్‌ సర్కార్‌.. ముందుగా రాష్ట్రంలో పెద్ద ఎత్తున అన్యాక్రాంతం భూముల సంగతి తేల్చాలని వామపక్షాలు, రైతుసంఘాలు డిమాండ్‌ చేస్తున్నాయి. హైదరాబాద్‌ చుట్టుముట్టు ప్రాంతాల్లోనే వేల ఎకరాలను బడాబాబాలు కబ్జా పెట్టిన సంగతి ముఖ్యమంత్రికి తెలియాదా అని లెఫ్ట్‌పార్టీల నేతలు ప్రశ్నిస్తున్నారు. వికారాబాద్‌జిల్లా కోదండల్‌దొరల సీలింగ్‌ భూమి 1156ఎకరాలు, నల్లగొండ జిల్లాలో డేరాబాబా ఆశ్రమం భూములు, రాంకి, నార్నెఎస్టేట్‌లాంటి బడా సంస్థలు ఆక్రమించిన భూముల సంగతి తేల్చాలని డిమాండ్‌ చేస్తున్నారు. కోనేరు రంగారావు కమిటీ సిఫార్స్‌లు, సీలింగ్‌, అసైండ్‌ చట్టాలను గాలికి వదిలి.. రైతుల వద్ద ఉన్న భూలను కొలిచేస్తాం అంటూ కేసీఆర్‌ ప్రభుత్వం చేస్తున్న హడావిడితో ఏం ఒరుగుతుందనే విమర్శలు వస్తున్నాయి.

ఇదిలావుంటే.. గతంలో సాదా బైనామాలతో భూ సమస్యలు పరిష్కరిస్తామని ప్రభుత్వం తెగ హడావిడి చేసింది. రైతుల నుంచి దాదాపు 11లక్షల 20వేల దరఖాస్తులు స్వీకరించింది. కాని వాటిలో ఒక్కటంటే ఒక్క దరఖాస్తు కూడా పరిష్కారానికి నోచుకోలేదు. కాగా తాజాగా నిర్వహిస్తున్న భూ సర్వే వల్ల ప్రభుత్వం ఏం సాధిస్తుందని విపక్షాలు ప్రశ్నిస్తున్నాయి. ఇప్పటికైనా సీఎం ఇచ్చిన హామీ ప్రకారం దళితులు మూడు ఎకరాల భూమిని పంచాల్సిన అవసరం ఉంది. దీని కోసం రాష్ట్ర వ్యాప్తంగా రాజకీయ నేతలు, రియల్‌ఎస్టేట్ సంస్థలు, అవినీతి అధికారుల కబ్జాకోరల్లో ఉన్న భూమిపై లెక్కలు తేల్చి పేదలకు పంచాలని వామపక్షాలు, రైతుసంఘాలు డిమాండ్‌ చేస్తున్నాయి. 

12:33 - September 24, 2017

యాదాద్రి : జిల్లాలోని చౌటుప్పల్‌లో నవవధువు ఆత్మహత్యకు పాల్పడింది. స్థానికంగా ఉంటున్న రమాదేవి అనే మహిళ ఉరివేసుకొని ఆత్మహత్య చేసుకుంది. రమాదేవికి.... నాలుగు నెలల క్రితమే గుంటూరు జిల్లాకు చెందిన ప్రదీప్‌తో వివాహం జరిగింది. తన మరణానికి ప్రదీప్ కారణమని ఘటనా స్థలంలో సూసైడ్ నోట్ లభించింది. మరిన్ని వివరాలను వీడియోలో చూద్దాం...

 

07:15 - September 24, 2017

యాదాద్రి : పోరాటం ద్వారా ఏ సమస్యకైనా పరిష్కారం లభిస్తుందన్నారు అరుణోదయ సమాఖ్య చైర్మన్‌ విమలక్క. యాద్రాద్రి భువనగిరి జిల్లా తుర్కపల్లి మండలం గందమల గ్రామంలో బహుజన బతుకమ్మ సంబరాల్లో ఆమె పాల్గొని బతుకమ్మ ఆడారు. ఊర్లలో ప్రజల మధ్య చక్కని అనుబంధం ఉంటుందన్నారు. అలాంటి గ్రామాలను ప్రాజెక్టులు కట్టి ముంచొద్దన్నారు విమలక్క. వేలాదిమందిని నిర్వాసితులు చేసే ప్రాజెక్టులు అవసరమా ? అని ఆమె ప్రశ్నించారు. గంధమలలో ప్రాజెక్టులు అవసరం లేదని... దీని కోసం ప్రజలంతా పోరాటం చేయాల్సిన అవసరముందని విమలక్క అన్నారు. 

20:13 - September 23, 2017

యాదాద్రి : తెలంగాణ ప్రభుత్వం ప్రతిష్టాత్మకంగా చేపట్టిన యాదాద్రి థర్మల్ పవర్ ప్లాంట్ వద్ద మరోసారి రైతులు ఆందోళనకు దిగారు. అర్హులకు నష్టపరిహారం చెల్లించకుండా కొంతమంది అధికార పార్టీ నేతల పేర్లను జాబితాలో చేర్చారని విమర్శిస్తూ.. రైతులు దామరచర్ల మండలం వీర్లపాలెంలోని పవర్ ప్లాంట్ పైలాన్ వద్ద ధర్నా చేపట్టారు. నష్టపరిహారం చెల్లించేందుకు మొదట విడుదల చేసిన జాబితాలో తమ పేర్లు ఉన్నాయని.. కానీ రెండో జాబితాలో తమ పేర్లకు బదులు... వేరే వారి పేర్లు వచ్చాయని అర్హులైన రైతులు ఆరోపించారు. విషయం తెలుసుకున్న మాజీ ఎమ్మెల్యే జూలకంటి రంగారెడ్డి అక్కడికి చేరుకొని రైతుల ధర్నాకు సంఘీభావం తెలిపారు. అర్హులైన రైతులందరికి పరిహారం అందేలా అధికారులు చర్యలు తీసుకోవాలని.. లేదంటే ప్రత్యక్ష కార్యచరణకు దిగుతామని హెచ్చరించారు.

19:39 - September 18, 2017

హైదరాబాద్ : బతుకమ్మ చీరల పంపిణీ ప్రహసనంగా మారింది. నాసిరకం చీరలిచ్చారంటూ నారీ లోకం భగ్గుమంది. మాకొద్దీ చీరలంటూ కొందరు స్త్రీలు బతుకమ్మ చీరలను తగులబెట్టేశారు. మరికొందరైతే.. సీఎం భార్యాకుమార్తెలు ఇవే చీరలు కడతారా అని ప్రశ్నిస్తూ.. అప్పటికప్పుడు పాటలు కట్టి బతుకమ్మలు ఆడారు. మొత్తానికి బతుకమ్మ చీరల పంపిణీ వ్యవహారం.. ప్రభుత్వానికి అప్రతిష్టను తెచ్చిపెట్టింది.

తెలంగాణలో.. బతుకమ్మ చీరల పంపిణీ కార్యక్రమం వివాదాస్పదమైంది. పండక్కి.. చేనేత చీరలు అందిస్తామంటూ ప్రకటనలతో ఊదరగొట్టిన ప్రభుత్వం.. సూరత్‌, షోలాపూర్‌ తదితర ప్రాంతాల నుంచి తెప్పించిన పాలియెస్టర్‌ చీరలను మహిళలకు పంపిణీ చేసింది. దీంతో ఎక్కడికక్కడ మహిళాలోకం భగ్గుమంది. ఉదయం నుంచీ క్యూలైన్లలో నిలుచుని చీరలు తీసుకున్న మహిళలు.. వాటి నాణ్యతను చూడగానే ప్రభుత్వంపై శాపనార్థాలు మొదలు పెట్టారు.

పద్దెనిమిది సంవత్సరాల పైబడ్డ ప్రతి మహిళకూ బతుకమ్మ చీరలను పంపిణీ చేస్తామన్న ప్రభుత్వం.. కోటీ నాలుగు లక్షల చీరలను సిద్ధం చేసింది. సుమారు 222 కోట్ల రూపాయలను దీనికోసం ఖర్చు చేసింది. సిరిసిల్ల నేతన్నల నుంచి 52 లక్షల చీరలు.. మిగిలిన చీరలు టెండరింగ్ ప్రక్రియ ద్వారా సేకరించామని ప్రభుత్వం వెల్లడించింది. తీరా పంపిణీ సమయంలో.. చేనేత చీరలు కాకుండా పాలియెస్టర్‌ చీరలు అందించడంతో.. కొందరు మహిళలు వాటిని అక్కడికక్కడే తగులబెట్టేశారు.

హైదరాబాద్ ఎల్బీనగర్‌లోని శ్రీశంకర్ కాలనీలో బతుకమ్మ చీరలపై మహిళలు ఆగ్రహం వ్యక్తం చేశారు. ఒకో ప్రాంతంలో ఒకో రకం చీరలు పంపిణీ చేస్తున్నారని మండిపడ్డారు. ఎల్బీనగర్ ప్రభుత్వ పాఠశాలలో ఉదయం నుంచి పడిగాపులు కాసినా అధికారులు చీరల పంపిణీ చేయకపోవడంపై మహిళలు భగ్గుమన్నారు.

బతుకమ్మ చీరలపై నల్లగొండ జిల్లా మహిళలు ఆగ్రహం వ్యక్తం చేశారు. నాణ్యతలేని చీరలను పంచుతున్నారంటూ.. కేసీఆర్‌ ప్రభుత్వంపై మండిపడ్డారు. రోడ్డుపై చీరలను కుప్పగా పారేసి నిరసన తెలిపారు.

బతుకమ్మ చీరలపై ఖమ్మం జిల్లా మహిళలు మండిపడ్డారు. సిరిసిల్ల చేనేత చీరలిస్తామన్న ప్రభుత్వం చివరికి నాసిరకం పాలిస్టర్ చీరలు ఇవ్వడం ఏంటని ప్రశ్నిస్తున్నారు. ప్రభుత్వ చర్యను విపక్షాలూ తప్పుబట్టాయి. కేసీఆర్ ప్రభుత్వం మహిళల ఆత్మ గౌరవాన్ని దెబ్బతీస్తోందని ఆక్షేపించాయి.

ఖమ్మం జిల్లా సత్తుపల్లిలో బతుకమ్మ చీరల బాగోతం బయటపడింది. నాసిరకం చీరలు అంటగడుతున్నారంటూ మహిళలు ఆగ్రహం వ్యక్తం చేస్తున్నారు. జగిత్యాల జిల్లా చల్‌గల్‌లో బతుకమ్మ చీరలపై మహిళలు ధ్వజమెత్తారు. తమకి ఇచ్చిన చీరలను విసిరికొట్టారు.

వనపర్తిలో ఇదే సీన్ కనిపించింది. చేనేత చీరలు ఇస్తామని చెప్పి.. పాలిస్టర్ చీరలు ఇస్తారా అంటూ మహిళలు మండిపడ్డారు. పనులు మానుకుని వచ్చిన తమ కూలీ డబ్బులు అధికారులు ఇస్తారా అని నిలదీశారు.

మహబూబాబాద్ జిల్లా గూడురు మండలం బొద్దుగుంటలో తమకిచ్చిన చీరలు వెనక్కు తీసుకోవాలని మహిళలు డిమాండ్ చేశారు. బొంతలు కుట్టుకునేందుకు కూడా ఈ చీరలు పనికి రావని మహిళలు విమర్శించారు.

మరోవైపు చీరల పంపిణీలో ఎటువంటి గోల్ మాల్ జరగలేదన్నారు టెక్స్ టైల్ కమిషనర్ శైలజా రామయ్యర్. సూరత్‌లో తయారు చేసిన చీరలు ఇతర చీరల కన్నా కాస్త భిన్నంగా ఉంటాయని చెప్పారు. ఈ చీరల క్వాలిటీపై పూర్తి పర్యవేక్షణ జరిగిందని స్పష్టం చేశారు.

ఎంతో అట్టహాసంగా తెలంగాణ ప్రభుత్వం చేపట్టిన బతుకమ్మ చీరల పంపిణీ కార్యక్రమం అభాసుపాలయ్యే పరిస్థితి తలెత్తింది. దీంతో ప్రభుత్వం నష్టనివారణ చర్యలపై దృష్టి సారించింది. చీరలు కాల్చిన వారిపై నాన్‌బెయిలబుల్‌ కేసుల నమోదుకు ఆదేశాలు వెళ్లాయి. దీంతో భువనగిరి, జగిత్యాల జిల్లాలో అరెస్టులు జరిగాయి. చీరలు తగలపెట్టారని... భువనగిరిలో పోలీసులు 18 మంది మహిళలను అదుపులోకి తీసుకున్నారు. మరోవైపు జగిత్యాల జిల్లా జల్గల్ సర్పంచ్ కవిత భర్త రాజేందర్‌ను కూడా ఇదే నెపంతో.. పోలీసులు అరెస్ట్ చేశారు. ఈ ఘటనపై ఆగ్రహం వ్యక్తం చేసిన గ్రామస్తులు.. పీఎస్‌ ముందు ధర్నాకు దిగారు.

Pages

Don't Miss

Subscribe to RSS - Yadadri