అమెరికా

18:52 - June 18, 2018
09:32 - June 16, 2018

ఢిల్లీ : అమెరికా అధ్యక్షుడు డొనాల్డ్‌ ట్రంప్‌ చైనాకు మళ్లీ షాకిచ్చాడు. 50 బిలియన్‌ డాలర్ల చైనా దిగుమతులపై 25 శాతం సుంకం విధించనున్నట్లు ట్రంప్‌ ప్రకటించారు. తమ మేధో సంపత్తి ఆస్తులను, టెక్నాలజీని చైనా అపహరిస్తోందని ఆరోపిస్తూ టారిఫ్‌లను విధించారు. చైనా అన్యాయపరమైన వాణిజ్య విధానాలను అవలంబిస్తోందని ట్రంప్‌ ఆరోపించారు. అమెరికా ఉత్పత్తులు, సర్వీస్‌ ఎగుమతులపై చైనా ప్రతీకారం తీర్చుకుంటే అదనపు సుంకాలు తప్పవని హెచ్చరించారు. ట్రంప్‌ ప్రకటనపై బీజింగ్‌ కూడా స్పందించింది. తాము కూడా ఇదే స్థాయిలో పన్ను చర్యలను వెంటనే ప్రవేశ పెడతామని ప్రకటించింది. ట్రంప్‌ కవ్వింపు చర్యలతో ఇరుదేశాల మధ్య వాణిజ్య యుద్ధానికి దారి తీస్తోంది.

20:03 - June 12, 2018

సింగపూర్ : అమెరికా, ఉత్తర కొరియా దేశాలు తమ మధ్య నెలకొన్న విభేదాలకు చరమగీతం పాడాయి. అమెరికా అధ్యక్షుడు డొనాల్డ్‌ ట్రంప్, ఉత్తర కొరియా అధ్యక్షుడు కిమ్‌ జోంగ్‌ ఉన్ సింగపూర్‌లో జరిపిన చర్చలు సఫలమయ్యాయి. ఇరు దేశాలు స్నేహ హస్తాన్ని అందుకున్నాయి. ఉద్రిక్తతలను తగ్గించి శాంతి దిశగా అడుగు ముందుకు వేశాయి.

సింగపూర్‌ వేదికగా అమెరికా ట్రంప్‌, కిమ్‌ సమావేశం..
సింగపూర్‌ వేదికగా అమెరికా అధ్యక్షుడు డొనాల్డ్‌ ట్రంప్‌, ఉత్తర కొరియా అధ్యక్షుడు కిమ్‌ జోంగ్‌ ఉన్‌ల మధ్య జరిగిన చారిత్రక సమావేశం విజయవంతంగా ముగిసింది. తాజాగా జరిగిన సమావేశం ట్రంప్‌, కిమ్‌ల మధ్య ఉద్రిక్తతలను చల్లబరచడమే కాదు...ఇరుదేశాల మధ్య సంబంధాలను బలోపేతం చేసే దిశగా సాగాయి. ఇరు దేశాలు ఉమ్మడి తీర్మానంపై సంతకాలు చేశాయి.

ఇరు దేశాధినేతల కీలక ఒప్పందాలు..
శాంతి సౌభాగ్యాల సాధనలో ప్రజల ఆకాంక్ష మేరకు అమెరికా, ఉత్తరకొరియాలు కొత్త సంబంధాలు నెలకొల్పుకోవడం... కొరియా ద్వీపకల్పంలో సుస్థిర శాంతి స్థాపనకు ఇరు దేశాలు కలిసి పనిచేయాలని నిర్ణయించాయి. 2018, ఏప్రిల్‌ 27 నాటి పాన్‌ముంగ్‌ జోమ్‌ తీర్మానానికి అనుగుణంగా సంపూర్ణ నిరాయుధీకరణకు ఉత్తర కొరియా కట్టుబడి ఉంటుంది. యుద్ధ ఖైదీలను వెంటనే స్వదేశానికి తిప్పిపంపాలని ఇరు దేశాలు నిర్ణయించాయి.

మార్పు సాధ్యమని నిరూపించాం : ట్రంప్
కిమ్‌తో సమావేశం కావడంపై ట్రంప్‌ హర్షం వ్యక్తం చేశారు. యుద్ధం ఎవరైనా చేయవచ్చు కానీ.. సాహసం ఉన్నవారే శాంతి ప్రక్రియ చేపడతారని, మార్పు సాధ్యమేనని తాము నిరూపించామని ఆయన చెప్పారు. అణు నిరాయుధీకరణ ప్రక్రియ త్వరలోనే ప్రారంభమవుతుందన్న ఆశాభావాన్ని ట్రంప్ వ్యక్తం చేశారు. అణు నిరాయుధీకరణ మొదలు పెట్టిన తరువాత నార్త్ కొరియాపై ఉన్న ఆంక్షలు తొలగిస్తామని ఆయన స్పష్టం చేశారు. కొరియా ద్వీపంలో తమ సైనిక విన్యాసాలను నిలిపివేస్తామని అమెరికా ప్రకటించింది.

ఇది చారిత్రాతమ్మక సమావేశం : కిమ్
ఇది చారిత్రక సమావేశమని, గతాన్ని వదిలి పెట్టాలని ఇరుదేశాల నేతలు నిర్ణయించినట్లు కిమ్‌ తెలిపారు. ప్రపంచం గొప్ప మార్పును చూడబోతోందని ఆయన అన్నారు. ఈ సమావేశాన్ని ఏర్పాటు చేసినందుకు కిమ్‌ ట్రంప్‌కు కృతజ్ఞతలు తెలిపారు.

ప్రపంచం దృష్టిని ఆకర్షించిన ట్రంప్, కిమ్ ల భేటీ...
1950-53 కొరియా యుద్ధం అనంతరం అమెరికా, ఉత్తరకొరియాలు శత్రు దేశాలుగా మారాయి. ఈ రెండు దేశాధ్యక్షుల మధ్య చర్చలు ఇంతవరకూ జరగలేదు. కనీసం ఫోన్‌లో కూడా నేతలు మాట్లాడుకోలేదు. తొలిసారిగా ఇప్పుడు ఇరు దేశాధినేతలు భేటీ కావడం ప్రపంచం దృష్టిని ఆకర్షించింది. 

16:34 - June 12, 2018

సింగపూర్ : అమెరికా అధ్యక్షుడు డొనాల్డ్‌ ట్రంప్‌, ఉత్తర కొరియా అధ్యక్షుడు కిమ్‌జోన్‌ ఉంగ్‌ల మధ్య సింగపూర్‌లో జరిగిన చారిత్రక సమావేశం ముగిసింది. సమావేశం అనంతరం పలు కీలక పత్రాలపై ఇరు దేశాల నేతలు సంతకాలు చేశారు. ఎఎఫ్‌పి న్యూస్‌ ఏజెన్సీ ప్రకారం అణునిరాయుధీకరణకు కిమ్‌ కట్టుబడి ఉన్నారని...ప్యోగ్యాంగ్‌ భద్రతకు అమెరికా పూర్తి హామీ ఇచ్చిందని పేర్కొంది.దీంతో అమెరికా-ఉత్తరకొరియాల మధ్య సంబంధాల్లో కొత్త అధ్యయనం ప్రారంభం కానుంది. కిమ్‌తో సమావేశం కావడంపై ట్రంప్‌ హర్షం వ్యక్తం చేశారు. ఉత్తర కొరియాతో సంబంధాలు గతంలో కంటే భిన్నంగా ఉండబోతున్నాయని ట్రంప్‌ అన్నారు. అణు నిరాయుధీకరణ ప్రక్రియ త్వరలోనే ప్రారంభమవుతుందని ఆయన పేర్కొన్నారు. కిమ్‌ చాలా స్మార్ట్‌....విలువైన వ్యక్తి అని ట్రంప్‌ కొనియాడారు. ఇది చారిత్రక సమావేశమని, గతాన్ని వదిలి పెట్టాలని ఇరుదేశాల నేతలు నిర్ణయించినట్లు కిమ్‌ తెలిపారు. ప్రపంచం గొప్ప మార్పును చూడబోతోందని ఆయన అన్నారు. 

15:00 - June 12, 2018

సింగపూర్ : మార్పు సాధ్యమేనని మేం ఇద్దరం నిరూపించాం అమెరికా అధ్యక్షుడు ట్రంప్ పేర్కొన్నారు. ఇదొక చారిత్రాత్మక సమావేశమని..దీనికి కిమ్ , నేను ఓ చారిత్రాత్మక ఒప్పందానికి తెరలేపామన్నారు. సాహసం ఉన్నవారే శాంతి ప్రక్రియ చేపడతారన్నారు. త్వరలోనే అణునిరాయుధీకరణ జరుగుతుందని ట్రంప్ తెలిపారు. క్షిపణి ప్రయోగ కేంద్రాలనీన ధ్వంసం చేస్తామని కిమ్ హామీ ఇచ్చారన్నారు. ఉత్తర కొరియా ప్రజలు ప్రశాంతంగా జీవించాలని ఈ సందర్భంగా ట్రంప్ అకాంక్షించారు. యుద్ధం ఎవరైనా చేయవచ్చు..కానీ సాహసం ఉన్నవారే శాంతి ప్రక్రియ దిశగా ఆలోచిస్తారని ట్రంప్ పేర్కొన్నారు.

ట్రంప్, కిమ్ ఒప్పందాలు..
అమెరికా అధ్యక్షుడు డోనాల్డ్ ట్రంప్, ఉత్తరకొరియా అధినేత కిమ్ జాంగ్ ఉన్ ఈ రోజు సింగపూర్ లో సమావేశం అనంతరం చేసుకున్న సమగ్ర ఒప్పందాలు చేసుకున్నారు. మొదటిది రెండు దేశాల ప్రజల ఆకాంక్షలకు అనుగుణంగా, శాంతి, సౌభాగ్యం కోసం నూతన అమెరికా-ఉత్తరకొరియా సంబంధాల ఏర్పాటుకు ఇరు దేశాలు కృషి చేయడం, కొరియా ద్వీపకల్పంలో సుస్ధిర శాతం కోసం రెండు దేశాలు తమ ప్రయత్నాలను ప్రారంభించడం, 2018 ఏప్రిల్ 27నాటి పన్ ముంజోన్ డిక్లరేషన్ ప్రకారం ఉత్తరకొరియా సంపూర్ణ అణు నిరాయుధీకరణ కోసం కట్టుబడి ఉండడం, వియత్నాం యుద్ద ఖైదీలను గుర్తించి స్వదేశాలకు పంపేందుకు చర్యలు తీసుకోవడం వంటి పలు కీలక ఒప్పందాలకు ఇద్దరు సమ్మతించినట్లుగా సమాచారం.

09:24 - June 12, 2018

సింగపూర్ : అమెరికా అధ్యక్షుడు డొనాల్డ్ ట్రంప్, ఉత్తర కొరియా అధ్యక్షుడు కిమ్ జంగ్ ఉన్ భేటీ అయ్యారు. ఉదయం 6.30 గంటలకు సింగపూర్ లోని కెపెల్లా హోటల్ లో సమావేశం అయ్యారు. ట్రంప్, కిమ్ ఏకాంతంగా చర్చలు జరుపుతున్నారు. ఏకాంత భేటీ అనంతరం ఇరు దేశాల అధికారుల సమక్షంలో చర్చలు జరుపనున్నారు. మధ్యాహ్నం ట్రంప్, కిమ్ వర్కింగ్ లంచ్ భేటీ అవ్వనున్నారు. అణు నిరాయుధీకరణకు అమెరికా పట్టుబడుతోంది. మనుగడకు హామీ ఇచ్చి ఆంక్షలు ఎత్తివేయాలని ఉత్తర కొరియా డిమాండ్ చేస్తోంది. సింగపూర్ లోని సెంటోసా దీవి భద్రతా వలయంలో ఉంది. ఇంతకాలం వాగ్యుద్ధంతో.. ఉద్రిక్త వాతావరణాన్ని సృష్టించిన ఈ ఇద్దరు నేతలు.. సామరస్యపూర్వక భేటీకి హాజరు కానుండడంతో.. సర్వత్రా ఆసక్తి నెలకొంది. 

 

08:26 - June 12, 2018

సింగపూర్ : అంతర్జాతీయ సమాజం దృష్టి సింగపూర్‌వైపు మళ్లింది. అమెరికా, ఉత్తరకొరియా దేశాధినేతల భేటీపై సర్వత్రా ఆసక్తి నెలకొంది. ఉదయం ఆరున్నరకు సెంటోసాదీవిలో కెపెల్లా హోటల్లో డొనాల్డ్‌ ట్రంప్‌, కిమ్‌ జోంగ్‌ఉన్‌ సమావేశం అయ్యారు. మొదట ఇద్దరు నేతలే ఏకాంతంగా మట్లాడుకున్నారు. మరికొద్ద సేపట్లో రెండు దేశాలకు చెందిన అధికారుల సమక్షంలో చర్చలు జరుపుతారు. తర్వాత మధ్యాహ్నం ఇద్దరు నేతలు వర్కింగ్‌లంచ్‌లో పాల్గొంటారు. కాగా న్యూక్లియర్‌ వెపన్స్‌తో భయపెడుతున్న ఉత్తర కొరియాను దారిలోకి తెచ్చుకునేందుకు అమెరికా అధ్యక్షుడు అన్ని మార్గాల్లో ప్రయత్నాలు చేస్తున్నారు. అయితే తమ దేశ మనుగడకు హామీ ఇవ్వడంతోపాటు ... వాణిజ్య ఆంక్షలను కూడా పూర్తిగా ఎత్తివేయాలని ఉత్తరకొరియా దేశాధినేత పట్టుబడుతున్నారు. కొరియాలో శాంతిస్థాపనే లక్ష్యంగా సాగుతున్న ఈ చర్చలు ఫలించాలని ప్రపంచదేశాలు గట్టిగా కోరకుంటున్నాయి. కాగా ట్రంప్‌, కిమ్‌ భేటీ అయిన కెపెల్లా హోటల్‌తోపాటు సెంటొసా దీవిలో కనీవినీ ఎరుగని స్థాయిలో భత్రను కల్పించారు. 

 

07:06 - June 12, 2018

సింగపూర్ : అమెరికా అధ్యక్షుడు ట్రంప్‌, ఉత్తరకొరియా అధినేత కిమ్‌ జాంగ్‌ ఉన్‌ల భేటీకి సింగపూర్‌ సిద్ధమయింది. భేటీ సందర్భంగా భారీ భద్రతను ఏర్పాటు చేసింది సింగపూర్‌ ప్రభుత్వం. ఇంతకాలం వాగ్యుద్ధంతో.. ఉద్రిక్త వాతావరణాన్ని సృష్టించిన ఈ ఇద్దరు నేతలు.. సామరస్యపూర్వక భేటీకి హాజరు కానుండడంతో.. సర్వత్రా ఆసక్తి నెలకొంది. 
భారీ భద్రత నడుమ సింగపూర్‌ చేరుకున్న ట్రంప్‌, కిమ్‌
సింగపూర్‌ వేదికగా ట్రంప్, కిమ్‌ జాంగ్‌ ఉన్‌ల భేటీ జరగబోతోంది. దీనికోసం ఇరు దేశాధ్యక్షులు ఇప్పటికే భారీ భద్రత నడుమ సింగపూర్‌ చేరుకున్నారు. ఆదివారం సింగపూర్‌ చేరుకున్న కిమ్‌ ఆ దేశ ప్రధానితో భేటీ అయ్యారు. రెండు దేశాల భేటీని ఏర్పాటు చేసిందుకు సింగపూర్‌కు కృతజ్ఞతలు తెలిపారు. 
లూంగ్‌తో భేటీ అయిన ట్రంప్‌
సింగపూర్‌ చేరుకున్న ట్రంప్‌ ఆ దేశ ప్రధాని లూంగ్‌తో భేటీ అయ్యారు. మంగళవారం జరగబోయే సదస్సు ఏర్పాట్లు, ద్వైపాక్షిక అంశాల గురించి చర్చించుకున్నారు. సమావేశాల మధ్యలోనే లూంగ్‌...ట్రంప్‌ పుట్టిన రోజు వేడుకలు జరిపారు. అనంతరం ప్రత్యేక విందు కార్యక్రమాన్ని ఏర్పాటు చేశారు. 
రహస్యంగా కిమ్‌ సింగపూర్‌ ప్రయాణం
కిమ్‌ సింగపూర్‌ ప్రయాణం అంతా రహస్యంగా సాగింది. గమ్యానికి చేరేవరకు ఆవిమానం ఎక్కడికి వెళ్తుందో ఫ్లైట్‌ రాడార్లకు కూడా అర్ధం కానివ్వలేదు. గాల్లోకి ఎగిరే ప్రతి అంతర్జాతీయ విమానాన్ని ట్రాక్‌ చేసే ఫ్లైట్‌ రాడార్‌ 24 కూడా ఈ విషయంలో గందరగోళానికి గురైంది. దీన్నిబట్టి కిమ్‌ తన భద్రత విషయంలో ఎంత గోప్యంగా ఉన్నారో అర్థమవుతోంది. కిమ్‌పై పలుమార్లు హత్యాయత్నం జరిగినట్లు వార్తలు వచ్చాయి. ఈ నేపథ్యంలో కిమ్‌కు భద్రతను కట్టుదిట్టం చేశారు. అమెరికా అధ్యక్షుడి రక్షణకు సీక్రెట్‌ సర్వీస్‌ ఏజెన్సీ ఎన్ని జాగ్రత్తలు తీసుకుంటుందో కిమ్ రక్షణకు కూడా ఉత్తర కొరియా అదే పద్దతి పాటించింది. 
ఎవ్వరికీ తెలియని కిమ్‌ ప్రయాణ సమయాలు
కిమ్‌ ప్రయాణ సమయాలు ఎవరికీ ముందుగా తెలియదు. సింగపూర్‌లోని కొన్ని ప్రభుత్వ వర్గాలకు మాత్రమే ఈ సమాచారం అత్యంత రహస్యంగా అందుబాటులో ఉంచారు. కిమ్‌ పర్యటన కోసం ప్యాంగ్‌ యాంగ్‌ నుండి సింగపూర్‌కు మూడు విమానాలు వచ్చాయి. ఇందులో రెండు విమానాల్లో కిమ్‌ రక్షణ, సహాయ సిబ్బంది ఉన్నారు. కిమ్‌ సింగపూర్‌లో తినే ఆహారాన్ని భద్రతా సిబ్బంది ముందే పరీక్షిస్తుంది. ఈ సందర్భంగా కిమ్‌ వాడే ఫోన్లను రహస్యంగా ఉంచే ఓ టెక్నికల్‌ బృందం కూడా సింగపూర్‌ చేరుకుంది. ట్రంప్‌ కాన్వాయ్‌కు తీసిపోని విధంగా కిమ్‌ కూడా 20 కాన్వాయ్‌లను తీసుకువచ్చారు. 
నేపాలీ గూర్ఖాలతో భద్రతా ఏర్పాట్లు 
భేటీ సందర్భంగా గిరిజన తెగ నేపాలీ గూర్ఖాలతో భద్రతా ఏర్పాట్లు చేసింది సింగపూర్‌ ప్రభుత్వం. మొత్తానికి ఉప్పు నిప్పులా ఉండే ఇరు దేశాధ్యక్షుల భేటీకి సింగపూర్‌ సిద్ధమైంది. ఈ భేటీ ఫలితం ఎలా ఉండబోతోందోనన్న ఆసక్తి ప్రపంచ దేశాల్లో వ్యక్తమవుతోంది. 

21:05 - June 11, 2018

వారిద్దరిదీ విచిత్రమైన మనస్థత్వమే. తెంపరితనం, మొండి వైఖరి ఇద్దరికీ ఎక్కువే. ఇప్పటి వరకు ఒకరిపై ఒకరు మాటల యుద్ధం కొనసాగించిన దేశాధ్యక్షులు. ఒకరు ప్రపంచాన్నే శాసించగల అమెరికా అధ్యక్షుడు ట్రంప్‌ అయితే మరొకరు అణు పరీక్షలతో ప్రపంచాన్నే బెంబేలెత్తిస్తున్న ఉత్తరకొరియా అధ్యక్షుడు కిమ్‌ జాంగ్‌ ఉన్‌. అలాంటి వీరు సింగపూర్‌లో భేటీ కానున్నారు. ఈ నేపథ్యంలో వీరిద్దరి సమావేశంపై ప్రపంచ వ్యాప్తంగా ఉత్కంఠ నెలకొంది. ప్రపంచాన్నే శాసించగల అమెరికా అధ్యక్షుడు ట్రంప్‌.... అణు పరీక్షలతో ప్రపంచాన్నే బెంబేలెత్తిస్తున్న ఉత్తర కొరియా అధ్యక్షుడు కిమ్‌ జాంగ్‌ ఉన్‌లు భేటీ కానున్నారు. ఇంతకు ముందు వరకు ఒకరిపై ఒకరు ఘాటు విమర్శలు చేసుకున్న వీరు ఇప్పుడు అణు చర్చలకు సిద్ధమయ్యారు. సింగపూర్‌ వేదికగా జరగబోతున్న ఈ భేటీపై ప్రపంచమంతా ఆసక్తిగా ఎదురు చూస్తోంది. ఈ అంశంపై ప్రముఖ విశ్లేషకులు కోటేశ్వరరావు విశ్లేషణ..

08:32 - June 6, 2018

అమెరికా : మధ్య అమెరికా దేశం గ్వాటెమాలాలో ప్యూగో అగ్నిపర్వతం బద్ధలైన ఘటనలో మృతుల సంఖ్య 69కి చేరింది. 3 వందల మందికి పైగా గాయపడ్డట్లు అధికారులు చెబుతున్నారు. సహాయక చర్యలు కొనసాగుతున్నాయి. అగ్నిపర్వతం బద్దలైన సమయంలో దాని చుట్ట పక్క ప్రాంతాల్లో కొందరు పొలం పనులు చేసుకుంటున్నారు. వారంతా లావాలో చిక్కుకుని ప్రాణాలు కోల్పోయినట్లు అధికారులు వెల్లడించారు. ప్యూగో నుంచి వెలువడిన లావా దాదాపు 8 కిలోమీటర్ల వరకు నది మాదిరిగా వేగంగా ప్రవహించింది. లావా ఇళ్లలోకి, రోడ్లపైకి ప్రవహించి చుట్టుపక్కల ప్రాంతాలను దహించివేసింది. ఈ క్రమంలో ఇళ్లకు మంటలు అంటుకుని కొందరు సజీవదహనమయ్యారు. అగ్నిపర్వతం నుంచి వెలువడుతున్న బూడిద సముద్ర మట్టానికి 12 వేల 346 అడుగుల ఎత్తువరకు ఎగిసి పడింది. 3 వేల మంది ప్రజలను అధికారులు సురక్షిత ప్రాంతాలకు తరలించారు. 

Pages

Don't Miss

Subscribe to RSS - అమెరికా