ఈసీ

07:41 - September 8, 2018

హైదరాబాద్ : తెలంగాణ అసెంబ్లీ రద్దు కావడంతో వీలైనంత త్వరగా ఎన్నికలు నిర్వహించే దిశగా కేంద్ర ఎన్నికల సంఘం సన్నాహాలు ప్రారంభించింది. సుప్రీం కోర్టు 2002లో ఇచ్చిన ఆదేశాల ప్రకారం రద్దైన అసెంబ్లీకి త్వరగా ఎన్నికలు నిర్వహించడాన్ని అత్యంత ప్రాధాన్యత అంశంగా తీసుకుంటామని కేంద్ర ఎన్నికల ప్రధానాధికారి ఓపీ రావత్ స్పష్టం చేశారు. మరోవైపు తెలంగాణలో ఎన్నికల ప్రక్రియ పూర్తైన వెంటనే ఎలక్షన్ నిర్వహిస్తామని రాష్ట్ర ఎన్నికల ప్రధానాధికారి చెప్పారు. అటు కేంద్రం నుంచి ఎన్నికల సంఘం అధికారులు ఈనెల 11న హైదరాబాద్ కు రానున్నారు.
అసెంబ్లీ రద్దయితే వీలైనంత త్వరలో ఎన్నికలు 
మధ్యప్రదేశ్‌, రాజస్థాన్, ఛత్తీస్‌గఢ్, మిజోరాం ఈనాలుగు రాష్ట్రాల ఎన్నికలతో పాటు తెలంగాణ ఎన్నికలు జరిపే విషయాన్ని పరిశీలిస్తున్నట్లు ఎన్నికల ప్రధాన అధికారి ఓపి రావత్‌ ఢిల్లీలో తెలిపారు. అసెంబ్లీ రద్దు తర్వాత ఆ రాష్ట్రంలో ఎన్నికలు ఎపుడు నిర్వహించాలన్న దానిపై చట్టంలో ప్రత్యేక నిబంధన అంటూ ఏదీ లేదన్నారు. ఎప్పుడైనా అసెంబ్లీ రద్దయితే వీలైనంత త్వరలో ఆ రాష్ట్రంలో ఎన్నికలు నిర్వహించే బాధ్యత ఎన్నికల కమిషన్‌దేనని సుప్రీంకోర్టు 2002లో రూలింగ్‌ ఇచ్చిందని ఆయన పేర్కొన్నారు. ఆపద్ధర్మ ప్రభుత్వానికి అనవసరంగా లాభం చేకూర్చవద్దని... 6 నెలల సమయముందని అన్ని రోజులు పాలన చేయడం సరికాదని సుప్రీంకోర్టు స్పష్టమైన రూలింగ్‌ ఇచ్చిందని రావత్‌ స్పష్టం చేశారు. వీటిని దృష్టిలో పెట్టుకుని ఎన్నికల కమిషన్‌ నిర్ణయం తీసుకుంటుందని ఆయన వెల్లడించారు.
ఎన్నికల ప్రక్రియ పూర్తైన తర్వాతనే ఎన్నికల నోటిఫికేషన్‌
మరోవైపు రాష్ట్ర ఎన్నికల సంఘం మాత్రం తెలంగాణలో ఎన్నికల ప్రక్రియ పూర్తి అయిన తర్వాతనే ఎన్నికల నోటిఫికేషన్‌ వస్తుందని చెబుతోంది. ఎన్నికల నిర్వహణకు సంబంధించి బేగంపేటలోని అన్ని జిల్లాల కలెక్టర్లతో ఎన్నికల కమిషనర్ రజత్‌ కుమార్‌ సమావేశమయ్యారు. ఈ సమావేశంలో ఓటర్ల జాబిత సవరణ, కొత్త ఓటర్ల నమోదు, ఎన్నికల ఏర్పాట్లు, బూత్‌ లెవర్‌ ఆఫీసర్ల నియామకంపై చర్చించారు. త్వరలోనే ఎన్నికల ప్రక్రియ ప్రారంభమవుతుందని.. ఈవీఎంలు రాష్ట్రానికి చేరుకుంటాయని రజత్‌కుమార్ తెలిపారు. 
ఈనెల 11న హైదరాబాద్ కు ఈసీ అధికారులు
రాష్ట్రంలో ఎన్నికల నిర్వహణ సంసిద్ధతను పరిశీలించేందుకు కేంద్ర ఎన్నికల సంఘం అధికారులు ఈనెల 11న హైదరాబాద్ రానున్నారు. డిప్యూటీ ఎలక్షన్ కమిషనర్ ఉమేశ్ సిన్హా నేతృత్వంలోని బృందం హైదరాబాద్ వచ్చి ఇక్కడి పరిస్థితులను పరిశీలించి నివేదిక సిద్ధం చేయనున్నారు. ఈ నివేదిక ఆధారంగా తెలంగాణలో ఎన్నికల ప్రక్రియ ఊపందుకునే అవకాశాలున్నాయి.

 

18:32 - September 6, 2018

హైదరాబాద్ : తెలంగాణ శాసనసభ రద్దు సమాచారాన్ని రాష్ట్ర ఎన్నికల కమిషన్ కు అందింది. సచివాలయంలో రాష్ట్ర ఎన్నికల ప్రధాన అధికారి రజిత్ కుమార్ ను శాసనసభ కార్యదర్శి కలిశారు. గెజిట్ నోటిఫికేష్ ను అందించారు. మంత్రివర్గ సిఫార్సులకు అనుగుణంగా అసెంబ్లీని రద్దు చేస్తూ గవర్నర్ నరసింహన్ నిర్ణయం తీసుకోవడంతో అందుకు అనుగుణంగా శాసనసభ సచివాలయం గెజిట్ నోటిఫికేషన్ జారీ చేసింది. ఆ ప్రతిని రాష్ట్ర ఎన్నికల ప్రధాన అధికారికి అందించారు. శాసనసభ రద్దు కావడంతో అన్ని స్థానాలు ఖాళీ అయ్యాయని సీఈసీకి అందిస్తారు. అనంతరం కేంద్ర ఎన్నికల సంఘం చర్యలు చేపడుతుంది. 

10:29 - August 28, 2018

ఢిల్లీ : వచ్చే లోక్‌సభ ఎన్నికల్లో బ్యాలెట్‌ పేపర్‌ పద్ధతిలోనే ఎన్నికలు నిర్వహించాలని విపక్షాలు డిమాండ్‌ చేశాయి. ఈసీ నిర్వహించిన అఖిలపక్ష సమావేశంలో ఈవీఎంలు పనితీరుపై ప్రతిపక్ష పార్టీలు పలు అనుమానాలు వ్యక్తం చేశాయి. ఈవీఎంలు టాంపరింగ్‌కు గురవుతున్నాయని...ప్రతీసారి ఓట్లన్నీ ఒకే పార్టీకి వెళ్లడాన్ని ఈసీ దృష్టికి తెచ్చాయి. ముందస్తు ఎన్నికలపై తమను ఎవరూ సంప్రదించలేదని ఎన్నికల కమిషన్ స్పష్టం చేసింది.
ఈసీ.. అఖిలపక్ష సమావేశం 
2019 సార్వత్రిక ఎన్నికల నేపథ్యంలో ఢిల్లీలోని ప్రవాస భారతీయ భవన్‌లో జాతీయ ఎన్నికల కమిషన్‌ నిర్వహించిన అఖిలపక్ష సమావేశం ముగిసింది. ఈ సమావేశంలో 7 జాతీయ, 51 ప్రాంతీయ పార్టీల అభిప్రాయాలను ఈసీ సేకరించింది. 
ఈవీఎంల వినియోగంపై తీవ్ర అభ్యంతరం 
ఈవీఎంల వినియోగంపై కాంగ్రెస్‌తో పాటు పలు విపక్ష పార్టీలు తీవ్ర అభ్యంతరం వ్యక్తం చేశాయి. బ్యాలెట్‌ పేపర్‌ పద్ధతిలో ఎన్నికలు నిర్వహించాలని ఈసీకి ప్రతిపాదించాయి. చాలా సందర్భాల్లో ఈవీఎంలు ట్యాంపరింగ్‌కు గురవుతున్న విషయాన్ని ఈసీ దృష్టికి తెచ్చాయి. ఏ పార్టీకి ఓటేసినా ఒకే పార్టీకి ఓట్లు వెళ్లిన పలు సందర్భాలను విపక్షాలు పేర్కొన్నాయి. ఈవీఎంలను ఎక్కడ రిపేర్‌ చేయిస్తున్నారో తెలపాలని ఈసీని నిలదీశాయి. 30 శాతం వివిప్యాట్‌లను క్రాస్‌ చెక్‌ చేయాలని కాంగ్రెస్‌ సూచించింది.
ఈసీకు వివిధ పార్టీలు పలు సూచనలు 
ఎన్నికల్లో అనుసరిస్తున్న విధి విధానాలు, చెయ్యాల్సిన మార్పులపై ఈసీ పార్టీలతో చర్చించింది. ఎన్నికల ఖర్చు తగ్గించడం, పోలింగ్‌కు 48 గంటల ముందు ప్రచారం నిలిపివేత, సెక్షన్‌ 126 పకడ్బందీగా అమలు, ఎన్నికల ప్రక్రియలో విశ్వసనీయతను పెంచడం తదితర అంశాలపై వివిధ పార్టీలు ఈసీకు పలు సూచనలు చేశాయి. ఈవీఎంలపై పలు పార్టీలు అభ్యంతరం వ్యక్తం చేసినట్లు ఈసీ తెలిపింది. బ్యాలెట్‌ పేపర్‌ వినియోగం వల్ల బూత్‌ క్యాప్చరింగ్‌ జరిగే అవకాశముందని ఈసీ ఆందోళన వ్యక్తం చేసింది. ముందస్తు ఎన్నికలపై తమను ఎవరూ సంప్రదించలేదని ప్రధాన ఎన్నికల కమిషనర్‌ ఓపీ రావత్‌ స్పష్టం చేశారు. జాతీయ ఎన్నికల సంఘం నిర్వహించిన సమావేశంలో బిజెపి తరపున జేపీ నడ్డా, భూపీందర్‌ యాదవ్‌, కాంగ్రెస్‌ నుంచి ముఖుల్‌ వాస్నిక్‌, మహ్మద్‌ ఏ ఖాన్‌, టిడిపి నుంచి రవీంద్రకుమార్, రావుల చంద్రశేఖర్‌రెడ్డి, టిఆర్‌ఎస్‌ నుంచి వినోద్‌ కుమార్‌, సీపీఐ నుంచి నారాయణ, తదితర పార్టీల నేతలు సమావేశానికి హాజరయ్యారు.

13:13 - August 27, 2018

ఢిల్లీ : రాజకీయ పార్టీలతో కేంద్ర ఎన్నికల సంఘం సమావేశం ప్రారంభం అయింది. పార్టీల ఎన్నికల ఖర్చుపై పరిమితి, ఓటర్ల నమోదు యంత్రాంగం ఏర్పాటు, పార్టీ పదవుల్లో మహిళలకు రిజర్వేషన్లు అంశాలపై అభిప్రాయాన్ని ఈసీ సేకరిస్తుంది. టీడీపీ తరపున కనమేడల రవీంద్ర కుమార్, రావులు చంద్రశేఖర్ రెడ్డి, టీఆర్ ఎస్ నుంచి ఎంపి వినోద్, సీపీఐ తరపున నారాయణ, బీజేపీ నుంచి జేపీ నడ్డా, భూపేంద్రయాదవ్ లు హాజరయ్యారు. 

 

21:10 - August 26, 2018

ఢిల్లీ : కేంద్ర ఎన్నికల కమిషన్‌ సోమవారం అన్ని రాజకీయ పార్టీలో సమావేశం ఏర్పాటు చేసింది. ఏడు జాతీయ 51 ప్రాంతీయ పార్టీలతో ఈసీ భేటీ కానుంది. రాజకీయ పార్టీల కమిటీల్లో మహిళలకు రిజర్వేషన్లు, ఎమ్మెల్సీ ఎన్నికలకు వ్యయపరిమితి నిర్ణయించడం, ఓటర్ల జాబితాల సవరణకు శాశ్వత యంత్రాంగం ఏర్పాటు వంటి అంశాలపై చర్చించనుంది. ఈ సమావేశానికి టిడిపి నుండి కనమేడల రవీంద్ర కుమార్ హాజరు కానున్నారు. ఈవీఎంలకు వీవీ పాట్ లను తప్పనసరి చేయాలని టిడిపి కోరనుంది. 

20:45 - August 14, 2018

ఢిల్లీ : జమిలి ఎన్నికలు నిర్వహించాలన్న బిజెపి ప్రతిపాదనకు ఈసీలో చుక్కెదురైంది. పార్లమెంట్‌, రాష్ట్రాల అసెంబ్లీ ఎన్నికలను ఒకేసారి నిర్వహించడం సాధ్యం కాదని ఎన్నికల కమిషన్ స్పష్టం చేసింది. జమిలి ఎన్నికల నిర్వహణకు కావలసిన వివిప్యాట్‌లు తమవద్ద లేవని ప్రధాన ఎన్నికల కమిషనర్‌ ఓపి రావత్‌ తెలిపారు. లోక్‌సభతో పాటు11 రాష్ట్రాల్లో ఒకేసారి ఎన్నికలు నిర్వహించే అవకాశం ఉందన్నారు. లోక్‌సభతో పాటు అన్ని రాష్ట్రాల ఎన్నికలు ఒకేసారి నిర్వహించాలంటూ 'వన్‌ నేషన్‌...వన్‌ ఎలక్షన్‌' నినాదాన్ని బిజెపి తెరపైకి తెచ్చింది. దీన్ని ప్రతిపక్షాలు తీవ్రంగా వ్యతిరేకిస్తున్నాయి. కనీసం వచ్చే లోక్‌సభ ఎన్నికలతోపాటు 11 రాష్ర్టాల్లో అయినా ఎన్నికలు నిర్వహించాలని మోదీ సర్కార్ ప్లాన్‌ చేస్తోంది. వచ్చే ఏడాది తెలంగాణా, ఒడిశా, ఆంధ్రప్రదేశ్‌లకు లోక్‌సభతోపాటు ఎన్నికలు జరగాల్సి ఉంది. వీటికితోడు రాజస్థాన్, మధ్యప్రదేశ్, చత్తీస్‌గఢ్, హర్యానా, మహారాష్ట్ర, మిజోరం, జార్ఖండ్, బీహార్‌లలోనూ ఎన్నికలు నిర్వహించాలన్నది బీజేపీ ప్లాన్. నిజానికి వీటిలో రాజస్థాన్, మధ్యప్రదేశ్, చత్తీస్‌గఢ్, మిజోరంలకు ఈ ఏడాది డిసెంబర్‌లోనే ఎన్నికలు జరగాల్సి ఉంది.

 

19:11 - March 21, 2018

ఢిల్లీ : తెలంగాణ ప్రభుత్వం చట్ట వ్యతిరేకంగా ఎలాంటి కారణం లేకుండా తమ అసెంబ్లీ సభ్యత్వాన్ని రద్దు చేసిందని కోమటిరెడ్డి వెంకట్ రెడ్డి, సంపత్.. ఈసీకి ఫిర్యాదు చేశారు. ఢిల్లీలో వీరిరువురు కేంద్ర ఎన్నికల సంఘం ఉన్నతాధికారులను కలిశారు. ఈ నిర్ణయంపై హైకోర్టు తాత్కాలిక స్టే ఇచ్చిందని ఈసీ దృష్టికి తీసుకొచ్చారు. రాజ్యసభ ఎన్నికల ఓటర్ల జాబితాలో తమ పేర్లను తొలగించారని... వాటిని చేర్చాలని ఈసీని కోరినట్లు కాంగ్రెస్‌ నేతలు తెలిపారు. 

07:19 - January 20, 2018

చట్టప్రకారం చూస్తే ఆఫీస్ ఆఫ్ ప్రపార్టీ అనేది తప్పు కిందనే వస్తుందని, అయితే తమ వాదానలు వినాలని ఎమ్మెల్యేలు కోరుతున్నారని, ఆప్ ఎమ్మెల్యేలు ఇంతర వరకు ఎటువంటి బెనిఫిట్ రాలేదని వారు చెబుతున్నారని ప్రముఖ విశ్లేషకులు వినయ్ కుమార్ అన్నారు. ఈసీ పై రాజకీయా ఒత్తిడిలు ఉన్నాయని ఆయన తెలిపారు. బీజేపీ ముందు అనేక అశంలు ఉన్నాయని, చాలా రాష్ట్రాల్లో ఇటువంటి కేసులున్నాయని, అయితే కేజ్రీవాల్ అధికారంలో ఎలా వచ్చారని, వారి పాలన ఏ విధంగా జరుగుతుందో కనబడుతుందని బీజేపీ నేత కుమార్ అన్నారు. పూర్తి వివరాలకు వీడియో క్లిక్ చేయండి.

 

08:08 - December 21, 2017

తమిళనాడు : ఆర్కేనగర్ ఉప ఎన్నిక పోలింగ్ ప్రారంభమైంది. జయలలిత మరణం అనంతరం ఉప ఎన్నిక జరుగుతున్న సంగతి తెలిసిందే. కానీ ఎమ్మెల్యే, ఎంపీ మృతి చెందితే ఆరు నెలల్లోపు ఎన్నికలు జరగాల్సి ఉంటుంది. కానీ అనూహ్య పరిణామాలు చోటు చేసుకోవడంతో ఏడాది కాలంగా ఉప ఎన్నిక జరగలేదు. హైకోర్టు జోక్యంతో ఎన్నికల సంఘం ఎన్నికలు తప్పనిసరిగా నిర్వహించాల్సి వచ్చింది. గురువారం పోలింగ్ జరుగుతోంది. ఉదయం 8గంటల నుండి సాయంత్రం 5గంటల వరకు పోలింగ్ జరుగనుంది. ఏఐఏడీఎంకే నుండి ఇ. మధుసూధన్, స్వతంత్ర అభ్యర్థిగా టిటివి దినకరన్, డీఎంకే నుండి ఎన్. మరుదు గణేష్ లు బరిలో ఉన్నారు.

  • ఆర్‌కె నగర్‌ ఉప ఎన్నికల బరిలో 59 మంది అభ్యర్థులు నిలిచారు.
  • మొత్తం ఓటర్ల సంఖ్య 2,28,234. వీరిలో పురుషులు 1,10,903, స్త్రీలు 1,17,232. లింగమార్పిడి వ్యక్తులు 99 మంది ఓటుహక్కు వినియోగించుకోనున్నారు.
  • 21 మంది పరిశీలకులు ఎన్నికలను పర్యవేక్షించనున్నారు.
  • పోలింగ్‌ స్టేషన్ల వద్ద 2,500 మంది భద్రతా సిబ్బందిని మోహరించింది.
  • 200కు పైగా నిఘా కెమెరాలు, 21 ఫ్లైయింగ్ స్క్వాడ్‌లు, 21 స్టాటిక్ సర్విలెన్స్ టీమ్‌లు, వీడియో రికార్డింగ్ పరికరాలతో కూడిన 20 మానిటరింగ్ టీమ్‌లు, 45 చెక్‌పోస్ట్‌లు ఏర్పాటు చేశారు.
  • ఆర్‌కె నగర్‌ ఉప ఎన్నిక ఓట్ల లెక్కింపు డిసెంబర్‌ 24న జరుగుతుంది. అదేరోజు ఎన్నికల ఫలితాన్ని ప్రకటించనున్నారు. అన్నాడిఎంకేలో అంతర్గతపోరు , ప్రభుత్వ వైఫల్యంతో ఓటర్లు ఎవరికి పట్టం కడతారనే ఉత్కంఠ నెలకొంది.
22:13 - December 20, 2017

తమిళనాడు : చెన్నైలోని ఆర్కేనగర్‌ ఉప ఎన్నిక పోలింగ్‌ రేపు జరగనుంది. పోలింగ్‌కు కావలసిన అన్ని ఏర్పాట్లను ఎన్నికల కమిషన్‌ పూర్తి చేసింది. దివంగత సిఎం జయలలిత మరణంతో ఇక్కడ ఉప ఎన్నిక జరుగుతోంది. జయలలిత మరణం తర్వాత తమిళనాడులో జరుగుతున్న తొలి ఎన్నిక ఇదే కావడంతో ప్రధాన పార్టీలన్నీ గెలుపై దృష్టి పెట్టాయి.
ఎన్నికల కమిషన్‌ అన్ని ఏర్పాట్లు పూర్తి 
చెన్నైలోని ఆర్‌కె నగర్‌ ఉపఎన్నికకు రంగం సిద్ధమైంది. గురువారం పోలింగ్‌ జరగనుండడంతో ఎన్నికల కమిషన్‌ అన్ని ఏర్పాట్లు పూర్తి చేసింది. ఆర్‌ కె నగర్‌కు ప్రాతినిధ్యం వహించిన అన్నాడిఎంకే అధినేత్రి దివంగత సిఎం జయలలిత మృతితో ఇక్కడ ఎన్నిక అనివార్యమైంది. ఈ ఎన్నికలో గెలుపు కోసం ప్రధాన పార్టీలైన అన్నాడిఎంకె, డిఎంకె ప్రచారం చివరిరోజు వరకూ అన్ని శక్తియుక్తులూ ఒడ్డాయి.
బరిలో 59 మంది అభ్యర్థులు 
ఆర్‌కె నగర్‌ ఉప ఎన్నికల బరిలో 59 మంది అభ్యర్థులు ఉన్నప్పటికీ ప్రధానంగా 'త్రిముఖ' పోటీ కనిపిస్తోంది. అధికార అన్నాడీఎంకే అభ్యర్థి ఇ.మధుసూదనన్, ఇండిపెండెంట్‌గా శశికళ వర్గం నేత టీటీపీ దినకరన్, ప్రతిపక్ష డీఎంకే అభ్యర్థి ఎన్.మరుదు గణేష్ మధ్యే ప్రధాన పోటీ నెలకొంది. 
ప్రధాన పార్టీలన్నీ గెలుపై దృష్టి 
జయలలిత మరణం తర్వాత తమిళనాడులో జరుగుతున్న తొలి ఎన్నిక ఇదే కావడంతో ప్రధాన పార్టీలన్నీ గెలుపై దృష్టి పెట్టాయి. ముఖ్యంగా ముఖ్యమంత్రి పళనిస్వామి, ఉపముఖ్యమంత్రి పన్నీర్ సెల్వం సారథ్యంలోని అన్నాడీఎంకేకు ఈ ఉపఎన్నిక ప్రతిష్టాత్మకంగా మారింది.  అన్నాడిఎంకే పార్టీ సింబల్‌ రెండాకులు పళని, పన్నీర్‌ వర్గానికే దక్కడంతో  గెలుపుపై ధీమాతో ఉన్నారు. మరోవైపు శశికళ మేనల్లుడు దినకరన్‌ కూడా గెలుపు కోసం తీవ్రంగా శ్రమించారు. ఆర్కే నగర్‌ నియోజకవర్గంలో మొత్తం ఓటర్ల సంఖ్య 2,28,234. వీరిలో పురుషులు 1,10,903, స్త్రీలు 1,17,232.  లింగమార్పిడి వ్యక్తులు 99 మంది ఓటుహక్కు వినియోగించుకోనున్నారు. 
ఎన్నికల కమిషన్‌ ప్రత్యేక చర్యలు 
ఆర్కేనగర్ ఉప ఎన్నిక కీలకంగా మారడంతో ఎన్నికల కమిషన్‌ ప్రత్యేక చర్యలు చేపట్టింది. 21 మంది పరిశీలకులు ఎన్నికలను పర్యవేక్షించనున్నారు.  పోలింగ్‌ స్టేషన్ల వద్ద 2,500 మంది భద్రతా సిబ్బందిని మోహరించింది. 200కు పైగా నిఘా కెమెరాలు, 21 ఫ్లైయింగ్ స్క్వాడ్‌లు, 21 స్టాటిక్ సర్విలెన్స్ టీమ్‌లు, వీడియో రికార్డింగ్ పరికరాలతో కూడిన 20 మానిటరింగ్ టీమ్‌లు, 45 చెక్‌పోస్ట్‌లు ఏర్పాటు చేశారు. ఆర్‌కె నగర్‌ ఉప ఎన్నిక ఓట్ల లెక్కింపు డిసెంబర్‌ 24న జరుగుతుంది. అదేరోజు ఎన్నికల ఫలితాన్ని ప్రకటించనున్నారు. అన్నాడిఎంకేలో అంతర్గతపోరు , ప్రభుత్వ వైఫల్యంతో ఓటర్లు ఎవరికి పట్టం కడతారనే ఉత్కంఠ నెలకొంది.

 

Pages

Don't Miss

Subscribe to RSS - ఈసీ