ఉత్తమ్

07:38 - January 30, 2018

హైదరాబాద్ : దావోస్‌ స‌ద‌స్సులో పాల్గొన‌డం కేటీఆర్‌కు ద‌క్కిన అరుదైన గౌర‌వంగా ప్రభుత్వం చెప్పుకోవ‌డం సిగ్గుచేట‌న్నారు పీసీసీ చీఫ్‌ ఉత్తమ్‌ కుమార్‌ రెడ్డి. ఏ ప్రభుత్వం రిజిస్ట్రేష‌న్‌ చేసుకున్నా.. ఆ స‌ద‌స్సుకు ఆహ్వానిస్తార‌ని ఆయ‌న అన్నారు. దావోస్‌ స‌ద‌స్సుతో తెలంగాణ‌కు భారీగా పెట్టుబ‌డులు వ‌చ్చాయ‌ని కేటీఆర్‌ ప్రక‌టించ‌డం ప‌చ్చి బూట‌క‌మ‌న్నారు. కేటీఆర్‌ చెబుతున్న బీఆర్‌ శెట్టి... గ‌తంలో ప్రక‌టించిన పెట్టుబ‌డులు ఎటు పోయాయ‌ని ప్రశ్నించారు. కేటీఆర్‌కు చిత్త శుద్ది ఉంటే.. దావోస్‌కు వెళ్ళేందుకు ప్రభుత్వం రిజిస్ట్రేష‌న్ చేసుకుందో లేదో స్పష్టం చేయాల‌ని డిమాండ్‌ చేశారు. ఉత్తమ్‌ స‌మ‌క్షంలో ఇబ్రహీంప‌ట్నం నియోజ‌క‌వ‌ర్గంలోని మాల్‌ టీఆర్ఎస్‌ స‌ర్పంచ్‌తో పాటు ఆయ‌న అనుచ‌రులు కాంగ్రెస్ పార్టీలో చేరారు.

06:54 - January 21, 2018

హైదరాబాద్ : పంచాయితీ రాజ్ చట్టంలో మార్పులపై వివాదం రోజురోజుకు హీటెక్కుతోంది. సబ్ కమిటీ రిపోర్టుపై మొదటి నుంచి అసంతృప్తి వ్యక్తం చేస్తున్న కాంగ్రెస్... సర్పంచ్‌లకు ప్రత్యక్ష పద్ధతిలోనే ఎన్నికలు నిర్వహించాలని మరోసారి డిమాండ్‌ చేసింది. దీనికి సంబంధించి ఈనెల 28న అన్ని పంచాయతీల్లో తీర్మానాలు చేస్తామని TPCC చీఫ్ ఉత్తమ్ కుమార్ రెడ్డి తెలిపారు. హైదరాబాద్ సోమాజీగూడలో సర్పంచ్‌ల ఐక్యవేదిక ఆధ్వర్యంలో పంచాయతీరాజ్‌ చట్ట సవరణపై రౌండ్ టేబుల్ సమావేశం జరిగింది. ఈ కార్యక్రమంలో ఉత్తమ్‌తో పాటు ప్రొ.కోదండరామ్, చాడ వెంకట్‌రెడ్డి, ఆర్.కృష్ణయ్య, హరగోపాల్, ప్రొ.నాగేశ్వర్‌లు పాల్గొన్నారు. ప్రభుత్వం పరోక్ష పద్ధతిలో సర్పంచ్‌ ఎన్నికలు నిర్వహించే ప్రయత్నం మానుకోకుంటే సర్పంచ్‌ల సంఘాలతో కలిసి పెద్ద ఎత్తున ఉద్యమిస్తామని ఉత్తమ్ హెచ్చరించారు. 

18:10 - January 20, 2018

హైదరాబాద్ : స్థానిక సంస్థలను నిర్వీర్యం చేసిన ఘనత కేసీఆర్‌ దక్కిందని టీపీసీసీ అధ్యక్షుడు ఉత్తమ్‌కుమార్‌ తీవ్రంగా విమర్శించారు.  జడ్పీటీసీ మొదలు శాసనసభ, క్యాబినెట్‌ దేనికీ విలువలేకుండా పోయిందన్నారు. కేవలం ఆయన కుటుంబంలోని నలుగురి కనుసన్నల్లోనే అన్ని సాగుతున్నాయంటూ ఉత్తమ్ దుయ్యబట్టారు.

 

13:11 - January 20, 2018
18:06 - January 18, 2018

హైదరాబాద్ : పంచాయితీ రాజ్ చట్టంలో మార్పులపై ప్రభుత్వం వెంటనే అఖిలపక్ష సమావేశం ఏర్పాటు చేయాలని కాంగ్రెస్ పార్టీ డిమాండ్ చేసింది. కేసీఆర్ ప్రభుత్వం ఇష్టం వచ్చినట్లుగా మార్పులు చేస్తే.. ఊరుకునేది లేదని టీపీసీసీ చీఫ్ ఉత్తమ్ కుమార్‌ రెడ్డి స్పష్టం చేశారు. అసలు తెలంగాణలో లోకల్ బాడీ వ్యవస్థను కేసీఆర్ ప్రభుత్వం నిర్వీర్యం చేసిందని ఆయన ఆరోపించారు. సబ్ కమిటీ రిపోర్టుపై వెంటన్ ఆల్‌ పార్టీ మీటింగ్ నిర్వహించి అన్ని విషయాలు స్పష్టం చేయాలని ఉత్తమ్ డిమాండ్ చేశారు.

21:41 - January 16, 2018

హైదరాబాద్ : తెలంగాణలో మానవ హక్కుల ఉల్లంఘన జరుగుతోందన్నారు టీపీసీసీ అధ్యక్షుడు ఉత్తమ్ కుమార్ రెడ్డి. చంచల్ గూడ జైలులో రిమాండ్‌లో ఉన్న ఎమ్మార్పీఎస్  అధ్యక్షుడు మందకృష్ణ మాదిగ, టీడీపీ నేత ఒంటేరు ప్రతాప్‌రెడ్డిలను ఉత్తమ్, మాజీ మంత్రి శ్రీధర్ బాబు కలుసుకున్నారు. రాష్ట్రంలో ప్రజాస్వామ్యం ప్రమాదకర పరిస్థితిలో పడిందన్నారు ఉత్తమ్. మందకృష్ణ, ఒంటేరులను అన్యాయంగా అరెస్ట్ చేశారని.. వారిని బేషరతుగా విడుదల చేయాలని.. ఉత్తమ్ డిమాండ్ చేశారు.

07:09 - January 11, 2018

హైదరాబాద్ : తెలంగాణలో కాంగ్రెస్‌ పార్టీ మంచి జోష్‌లో ఉంది. పీసీసీ రథసారధి ఉత్తమ్‌కుమార్‌రెడ్డి దూకుడు పెంచారు. గులాబీ సర్కార్‌పై అన్ని వర్గాల్లో వ్యతిరేకత పెరిగిందని భావిస్తున్న హస్తంపార్టీ.... రాజకీయ వాతావరణాన్ని తమకు అనుకూలంగా మలచుకునేందుకు ప్రణాళికలు వేస్తోంది. ఇతర పార్టీల నుంచి నేతలు హస్తంగూటికి క్యూ కడుతుండడంతో మంచి ఊపుమీదున్న కాంగ్రెస్‌... క్యాడర్‌లో మరింత సమరోత్సాహాన్ని నింపేందుకు రెడీ అవుతోంది. పీసీసీ చీఫ్‌ ఉత్తమ్‌కుమార్‌రెడ్డి తన యాక్షన్‌ప్లాన్‌ను సిద్ధం చేసుకుంటున్నారు.

2019 సార్వత్రిక ఎన్నికలే లక్ష్యంగా
2019 సార్వత్రిక ఎన్నికలే లక్ష్యంగా ఉత్తమ్‌కుమార్‌రెడ్డి వ్యూహాలు రచిస్తున్నారు. ఎన్నికల వరకు తానే పీసీసీ చీఫ్‌గా కొనసాగుతానని భావిస్తున్న ఆయన...స్పీడ్‌ పెంచారు. ఇప్పటికే గులాబీబాస్‌పై ఒంటికాలిపై లేస్తూ సర్కార్‌ వైఫల్యాలను ఎండగడుతున్న ఆయన... అన్ని నియోజకవర్గాల ప్రజలతో మమేకం అయ్యేందుకు ప్లాన్‌ చేసుకుంటున్నారు. ఇందుకోసం బస్సుయాత్రనే సరైందని భావిస్తున్నారు. బస్సుటూర్‌తో పార్టీలో నేతల మధ్య సమన్వయం ఏర్పర్చుకోవడం.. అందిరితో కలిసి సమష్టిగా యాత్రం చేయడంతో నాయకుల మధ్య విభేదాలకు చెక్‌ పెట్టవచ్చని భావిస్తున్నారు. బస్సుయాత్ర గతంలో కాంగ్రెస్‌కు బాగా కలిసివచ్చిందన్న సెంటిమెంట్‌ కూడా ఉండడంతో ... మళ్లీ దాన్నే ఉత్తమ్‌ ఎంచుకున్నారు.1999లో పీజేఆర్‌ సీఎల్పీ లీడర్‌గా ఉన్నప్పుడు హైదరాబాద్‌ పెద్దమ్మగుడి నుంచి చేపట్టిన బస్సుయాత్రతో పార్టీకి బాగా కలిసివచ్చింది. ఆ తర్వాత వైఎస్‌ చేవెళ్ల నుంచి పాదయాత్ర చేసిన తర్వాత.. మళ్లీ నేతలందరినీ కలుపుకొని 2003లో బస్సుయాత్ర చేపట్టారు. ఆ బస్సుయాత్ర తర్వాత 2004లో కాంగ్రెస్‌ అధికారం కైవసం చేసుకుంది. కాంగ్రెస్‌కు బస్సుయాత్ర సెంటిమెంట్‌గా మారడంతో ఇప్పుడు ఉత్తమ్‌కుమార్‌రెడ్డి కూడా అదే సెంటిమెంట్‌ను ఫాలో కావాలని భావిస్తున్నారు.

బస్సు యాత్ర...
కాంగ్రెస్‌ పార్టీకి చెందిన పలువురు సీనియర్‌ నేతలు పాదయాత్ర చేస్తామంటూ హైకమాండ్‌ దగ్గర వినతులు పెట్టుకున్నారు. కోమటిరెడ్డి వెంకట్‌రెడ్డి తాను రాష్ట్ర వ్యాప్త పాదయాత్ర చేస్తానంటూ హైకమాండ్‌ తలుపు తట్టారు. పీసీసీ వర్కింగ్‌ ప్రెసిడెంట్‌ మల్లు భట్టివిక్రమార్క కూడా దళితుల ఆత్మగౌరవయాత్ర పేరుతో పాదయాత్రకు సిద్ధమయ్యారు. ఇటీవలే కాంగ్రెస్‌లో చేరిన రేవంత్‌రెడ్డి కూడా పాదయాత్రపై అధిష్టానం దగ్గర ప్రతిపాదన పెట్టినట్టు తెలుస్తోంది. అయితే వ్యక్తిగత పాదయాత్రలతో పార్టీకి మరికొన్ని సమస్యలు కొనితెచ్చుకున్నట్టు అవుతుందని భావించిన ఢిల్లీ పెద్దలు ఎవరికీ అనుమతి ఇవ్వలేదు. దీన్ని అవకాశంగా తీసుకున్న ఉత్తమ్‌.... పాదయాత్రలన్నింటికీ చెక్‌పెట్టేలా బస్సుయాత్రను తెరమీదికి తీసుకొచ్చారు. పార్టీ ముఖ్యనేతలతో కలిసి అన్ని నియోజకవర్గాలను ఒకసారి చుట్టిరావాలని రూట్‌మ్యాప్‌ కూడా ఉత్తమ్‌ సిద్ధం చేసుకున్నారు. అయితే ఈ బస్సుయాత్రను ఎక్కడి నుంచి ప్రారంభించాలన్నది మాత్రం ఇంకా స్పష్టత రాలేదు. గద్వాల జిల్లాలోని జోగులాంబా దేవాలయం నుంచి ప్రారంభించాలని ఓ ప్రతిపాదన ఉంటే... యాదాద్రి నుంచి మొదలుపెడితే ఎలా ఉంటుందని ఆలోచిస్తున్నారు. దీనిపై ఒకటి రెండు రోజుల్లో నిర్ణయం తీసుకునే అవకాశముంది. బస్సుయాత్రను కూడా ఉత్తమ్‌కుమార్‌రెడ్డి పకడ్బందీగా ప్లాన్‌ చేసినట్టు తెలుస్తోంది. ముఖ్యమైన నేతలు ఇద్దరు లేదా ముగ్గురు మాత్రమే పూర్తిస్థాయి బస్సులో కొనసాగేలా ప్లాన్‌ చేసినట్టు తెలుస్తోంది. మిగతా నేతలు ఎవరికి సంబంధించిన నియోజకవర్గాల్లో వారు బస్సుయాత్రలో పాల్గొనాలని నిర్ణయించారు. అన్ని వ్యూహాలను సిద్ధంచేసుకుని బస్సుయాత్ర చేపట్టాలని ఉత్తమ్‌తీసుకున్న నిర్ణయం పార్టీకి ఏమేరకు ఉపయోగపడనుందో వేచి చూడాలి.

17:30 - December 31, 2017

హైదరాబాద్ : తెలంగాణాలో కేసీఆర్‌ కుటుంబపాలన సాగుతుందన్నారు టీపీసీసీ చీఫ్‌ ఉత్తమ్‌కుమార్‌ రెడ్డి. రాష్ట్రంలో కొనసాగుతోన్న తుగ్లక్‌ పాలనను ప్రజలు అంతమొందించాలన్నారు. దళితులకు, మైనారిటీలకు ఇచ్చిన హామీలు నెరవేర్చడంలో కేసీఆర్‌ విఫలమయ్యారని, ఉత్తమ్‌ విమర్శించారు. ప్రభుత్వ పాఠశాలల్లో మౌళిక సదుపాయాలు లేకనే ప్రజలు ప్రైవేట్‌ పాఠశాలల బాట పడుతున్నారని సీఎల్పీ ఉపనేత జీవన్‌ రెడ్డి ఆరోపించారు. ప్రభుత్వం చెప్పిన కేజీ టూ పీజీ ఎక్కడ ఉందో తెలియదన్నారు. ఉపాధ్యాయ నియామకాల్లో, పదోన్నతుల్లో ఇంకా అన్యాయమే జరుగుతోందని ఆయన ఆరోపించారు. విద్యాహక్కు చట్టం అమలు చేయాలని.. ఉపాధ్యాయుల సమస్యల పరిష్కరించాలని జీవన్‌ రెడ్డి డిమాండ్‌ చేశారు.

17:24 - December 28, 2017

హైదరాబాద్ : తెలంగాణలో కేసీఆర్ పాలన బ్రిటీష్‌ పరిపాలనను తలపిస్తోందని టీపీసీసీ చీఫ్ ఉత్తమ్‌కుమార్ రెడ్డి విమర్శించారు. హైదరాబాద్ గాంధీభవన్‌లో జరిగిన కాంగ్రెస్ పార్టీ 133 ఆవిర్భావ దినోత్సవ వేడుకలలో ఉత్తమ్‌తో పాటు కాంగ్రెస్ సీనియర్ నేతలు, కార్యకర్తలు పాల్గొన్నారు. ఈ సందర్భంగా ఆయన పార్టీ జెండాను ఆవిష్కరించారు. తెలంగాణలో నిత్యం దళితులు, గిరిజనులకు అవమానం జరుగుతోందని ఉత్తమ్ ఆరోపించారు. 2019లో రాహుల్ గాంధీ నాయత్వంలో కాంగ్రెస్ ప్రభుత్వాలు ఏర్పడే విధంగా పనిచేయాలంటూ కాంగ్రెస్ శ్రేణులకు ఆయన పిలుపునిచ్చారు.

 

17:35 - December 2, 2017

హైదరాబాద్ : గ్రేటర్‌లో కాంగ్రెస్‌ పార్టీ నీరుగారిపోతోందా? రోజురోజుకు హస్తంపార్టీ హైదరాబాద్‌లో నిస్తేజంగా మారుతోందా? రాష్ట్రమంతా కాంగ్రెస్‌ జోష్‌గా ఉన్న గ్రేటర్‌లో డీలా పడటానికి కారణమేంటి? గులాబీ పార్టీ మూడేళ్ల పాలనపై ఒంటికాలుపై లేస్తున్న కాంగ్రెస్‌ పార్టీ... రాష్ట్రమంతా తన జోరు పెంచింది. ప్రభుత్వానికి వ్యతిరేకంగా వాయిస్‌పెంచి... ప్రజాక్షేత్రంలోకి వెళ్తోంది. ప్రభుత్వ వైఫల్యాలను ఎండగడుతూ క్యాడర్‌లో నూతనోత్తేజం నింపుతోంది. ఆపరేషన్‌ ఆకర్ష్‌కు తెరలేపి అధికార పార్టీకి ఝలక్‌ ఇస్తోంది. రాష్ట్రమంతటా కాంగ్రెస్‌ దూకుడు ప్రదర్శిస్తోంది. కానీ రాష్ట్రానికి గుండెకాయలాంటి హైదరాబాద్‌లో మాత్రం వింత పరిస్థితిని ఎదుర్కొంటోంది. అదే ఇప్పుడు పీసీసీకి తలనొప్పిగా మారింది.

కర్ణుడి చావుకు కారణాలు అనేకం అన్నట్టు తయారైంది గ్రేటర్‌లో కాంగ్రెస్‌ పరిస్థితి. గ్రేటర్‌ ఎన్నికల్లో పార్టీ ఓటమి ఇందుకు ఒక కారణమైతే.... అధికారపార్టీ దూకుడు పెంచడం మరో కారణం. అంతేకాదు... ఆపరేషన్‌ ఆకర్ష్‌తో అధికార టీఆర్‌ఎస్‌ గ్రేటర్‌లోని కాంగ్రెస్‌ నేతలను కారెక్కించుకోవడం మరో ప్రధాన కారణం. గ్రేటర్‌ కాంగ్రెస్‌ ముఖ్యనేతల తీరు పార్టీకి శాపంగా మారిందన్నది క్యాడర్‌ వాదన. గతంలో మంత్రులుగా, ఎమ్మెల్యేలుగా ఒక వెలుగు వెలిగిన నేతలు... ఇప్పుడు పార్టీకి అంటిముట్టనట్టుగా వ్యవహరిస్తున్నారు. పార్టీ కార్యక్రమాలకు దూరంగా ఉండడంతో అది క్యాడర్‌పై తీవ్ర ప్రభావం చూపెడుతోంది. గతంలో మంత్రులుగా పనిచేసిన దానం నాగేందర్‌, ముఖేష్‌గౌడ్‌ వ్యవహారశైలి గ్రేటర్‌లో పార్టీనిక నష్టం చేస్తుందన్న అభిప్రాయం క్యాడర్ టూ లీడర్‌ వరకు వ్యక్తం అవుతోంది. సార్వత్రిక ఎన్నికల్లో ఓడిపోయిన తర్వాత ముఖేష్‌గౌడ్‌ నాటి నుంచి నేటి వరకు పార్టీ కార్యక్రమాలకు దూరంగా ఉంటున్నారు. గాంధీభవన్‌వైపే ఆయన కన్నెత్తి చూడటం లేదు. తన కుమారుడిని కాంగ్రెస్‌ పార్టీ గ్రేటర్‌లో మేయర్‌ అభ్యర్థిగా ప్రకటించినా... ఆయన పార్టీ కోసం చేసిందేమీ లేదన్నది క్యాడర్ వాదన.

గ్రేటర్‌ కాంగ్రెస్‌ మరో ముఖ్యనేత దానం నాగేందర్ వ్యవహారశైలి పార్టీని మరింత డీలా పడేలా చేసిందన్నది బహిరంగ రహస్యమే. దానం టీఆర్‌ఎస్‌లోకి వెళ్లేందుకు చేసిన ప్రయత్నాలతో మొత్తం క్యాడర్‌ డీలా పడేలా చేసింది. ఇప్పటికీ ఆయన వైఖరి మాత్రం అలాగే ఉందన్న అభిప్రాయం క్యాడర్‌లో వ్యక్తమవుతోంది. పీసీసీ వర్కింగ్‌ ప్రెసిడెంట్‌ పదవిని ఆశిస్తున్న దానం.... దింపుడు కల్లం ఆశలతో పార్టీలో కొనసాగుతున్నారన్న చర్చ నడుస్తోంది. అందుకే అప్పుడప్పుడు ఓ కార్యక్రమంలో మెరిసి... ఆ తర్వాత మాయమవుతున్నారన్న అభిప్రాయం నేతల్లో వ్యక్తమవుతోంది. ముఖ్యనేతలంతా ఇలా మొహం చాటేస్తుండడంతో గ్రేటర్‌లో కార్యక్రమాలకు నాయకత్వం వహించేవారే కరువయ్యారు. గ్రేటర్‌లో ఉన్న నాయకులంతా సీనియర్లుకావడం, మొన్నటి వరకు మంత్రులుగా పనిచేయడంతో వీరందరినీ సమన్వయం చేయడం పార్టీ ముఖ్యులకు సైతం తలనొప్పిగా మారింది. క్యాడర్‌లో జోష్‌ ఉన్నాకూడా అది పార్టీలో కనిపించడం లేదు. ఇకనైనా హైకమాండ్‌ గ్రేటర్‌ కమిటీని ఏర్పాటు చేసి.. పార్టీ బలోపేతానికి కృషి చేయాలన్న డిమాండ్‌ వినిపిస్తోంది. 

Pages

Don't Miss

Subscribe to RSS - ఉత్తమ్