ఎమ్మెల్యే

15:36 - October 16, 2018

నల్గొండ :  చారిత్రక ప్రాశస్త్యం ఉన్న ప్రాంతం. క్రీస్తు శకం 225 నుంచి 300 వరకు పరిపాలించిన ఇక్ష్వాకుల వైభవాన్ని చాటిన ప్రాంతం. శాతవాహన, ఇక్ష్వాకులు, రాష్ట్రకూటులు, విష్ణుకుండిన, చాళుక్య, కాకతీయ, పద్మనాయక, కుతుబ్‌షాహీ, ఆసఫ్‌ జాహీ వంటి పలు చారిత్రక పాలనలను రుచి చూసిన జిల్లా నల్లగొండ ప్రాంతం. అంతేకాదు ఆధునిక రాజకీయ పరిపాలన అంతటికీ ఈ జిల్లా  ఒక ప్రదర్శనశాలవంటిది.  మహాకవులు, పోరాటయోధులు, సాహితీవేత్తలు పుట్టిన గడ్డ నల్గొండ గడ్డ.
జిల్లా పుట్టు పూర్వోత్తరాలు..
గ్రంథాలయ ఉద్యమాలకు, భూదానోద్యమాలకు, తెలంగాణా సాయుధ పోరాటాలకు, విప్లవోద్యమాలకు పుట్టినిల్లయిన నల్గొండ జిల్లా ఎన్నెన్నో మార్పులతో 1905లో ప్రత్యేకంగా ఏర్పడింది. పట్టణం ప్రాచీన నామం నీలగిరి. రెండు నల్లరాతి కొండల నడుమ ఉన్న ప్రదేశం కావడంతో దీనికి నీలగిరి అని పేరు వచ్చింది. నీలగిరి క్రమంగా నల్లకొండ.. నల్లగొండ... నల్గొండగా స్థిరపడింది. 1961 దాకా జిల్లా సరిహద్దుల్లో  ఎన్నో మార్పులు చోటు చేసుకున్నాయి. ఈ నేపథ్యంలో రాష్ట్ర విభజన అనతరం తెలంగాణ రాష్ట్ర తొలి సీఎం కేసీఆర్ పాలనలో కూడా కొత్త జిల్లాల ఏర్పటులో కూడా పలు మార్పులు చోటుచేసుకున్నాయి. జిల్లాల పునర్విభజనలో భాగంగా నల్లగొండ నుంచి సూర్యాపేట, యాదాద్రి జిల్లాలు అవతరించాయి. 

నల్గొండ జిల్లాలో మహిళా ఓటర్లే అధికం
నియోజకవర్గం మహిళలు ఫురుషులు
నల్గొండ 1,06,989  1,04,780 
నాగార్జునసాగర్ 1,02,841  1,01,769 
మిర్యాలగూడ 1,04,023  1,01,817 
హుజూర్‌నగర్  1,10,581 1,08,104 
సూర్యాపేట 1,02,506 1,00,850 
కోదాడ 1,07,564  1,04,780 

రాజకీయ చైతన్యం అధికంగా ఉన్న ఉమ్మడి నల్గొండ జిల్లాలో మహిళలకు సరైన ప్రాతినిధ్యం దక్కడం లేదు. ఇటీవల ఎన్నికల కమిషన్‌ విడుదల చేసిన ఓటరు జాబితాలో పూర్వ నల్గొండ జిల్లాలోని పన్నెండింటిలో సగం స్థానాల్లో మహిళా ఓటర్లే ఎక్కువున్నారు. అయినా.. వారికి ఆ సెగ్మెంటుల్లో పోటీచేసే అవకాశం నామమాత్రంగానే ఉంది. నల్గొండ, నాగార్జునసాగర్, మిర్యాలగూడ, కోదాడ, సూర్యాపేట, హుజూర్‌నగర్‌లలో పురుష ఓటర్ల కంటే మహిళా ఓటర్లే అధికంగా ఉన్నారు. ఒక్క కోదాడలో మినహాయిస్తే ప్రస్తుతం ప్రధాన రాజకీయ పార్టీలే కాదు చిన్న పార్టీలు కూడా మహిళలకు టిక్కెట్ ఇచ్చేందుకు సుముఖత చూపించకపోవడం గమనార్హం.   కమ్యూనిస్టుల ప్రభావం అధికంగా ఉండటంతో రాష్ట్రంలోని మిగతా జిల్లాలతో పోలిస్తే ఇక్కడే ఎక్కువగా పోరాటాలు సాగేవి. చైతన్యం వెల్లివిరిసేది. అయినా మహిళలకు రాజకీయాల్లో ఎమ్మెల్యే తరహా పదవులను చేరుకోవడం కష్టంగా మారింది. ఉమ్మడి జిల్లాలోని నాగార్జునసాగర్, మునుగోడు, మిర్యాలగూడ, సూర్యాపేట, హుజూర్‌నగర్‌ నియోజకవర్గాల్లో ఇప్పటివరకు ఒక్కరు కూడా మహిళలు ఎమ్మెల్యేలుగా ఎన్నికకాకపోవడం గమనార్హం. మహిళలు ఎన్నికకాని ఆరు నియోజకవర్గాల్లో నాలుగింటిలో మహిళ ఓటర్లు పురుష ఓటర్ల కంటే ఎక్కువగా ఉన్నారని తాజాగా ప్రకటించిన ఓటరు జాబితాలో వెల్లడించడం తెలిసిందే. 

 

17:44 - October 15, 2018

ఢిల్లీ : 'మీ టు' ఉద్యమం పలు రంగాలలో ప్రకంపనలు పుట్టిస్తోంది. తమకు జరిగిన సంఘటనలపై గళం ఎత్తి ఎలుగెత్తి చాటుతున్నారు మహిళలు. బాధ పడినవారు కాదు బాధ పెట్టినవారే తలదించుకోవాలని మహిళలు గళమెత్తుతున్నారు. తమలో వున్న నైపుణ్యాలను నిరూపించుకునేందుకు మహిళలు పలు రంగాలలో అడిగిడి తమ సత్తా చాటుతున్నారు. కానీ పలు వేధింపుల మాటున మౌనంగా రోదిస్తు తమతాము నిరూపించుకుంటున్నారు. కానీ ఇటీవల కాలంలో మౌనం మీడి మీటు అంటున్నారు. వేదికలపై తమకు జరిగిన అన్యాయాలను ప్రశ్నిస్తున్నారు. పెద్దల ముసుగులో ప్రబుద్ధులు జరుపుతున్న హేయమైన హింసను బట్టబయలు చేస్తున్నారు. దీన్ని తట్టుకోలేని కొందరు మహిళలపై మరోవిధంగా మాటలతో దాడి చేస్తున్నారు. కాగా ఆ దాడి చేసేవారిలో మహిళలు వుండటం విచారించదగిన విషయం. వారు కూడా ప్రజాప్రతినిధులుగా వుండే మహిళలు కావటం మరింత సిగ్గుచేటైన విషయం. 
సినీ పరిశ్రమతో పాటు మీడియా, రాజకీయ రంగాల్లో తమను లైంగికంగా వేధించిన ప్రబుద్ధుల పేర్లను మహిళలు ‘మీ టూ’ ఉద్యమం కింద బయటపెడుతున్న సంగతి తెలిసిందే. బాలీవుడ్ నటులు నానా పటేకర్, అలోక్ నాథ్, దర్శకులు సాజిద్ ఖాన్, సుభాష్ ఘయ్, గీత రచయిత వైరముత్తు, కేంద్ర మంత్రి ఎంజే అక్బర్ తమను వేధించారని పలువురు మహిళలు ఆరోపించారు. ఈ నేపథ్యంలో మధ్యప్రదేశ్ బీజేపీ ఎమ్మెల్యే ఉషా ఠాకూర్ బాధిత మహిళలపై వివాదాస్పద వ్యాఖ్యలు చేశారు. కెరీర్ లో ఎదుగుదల, సొంత ప్రయోజనాల కోసం కొందరు మహిళలు రాజీ పడతారని వ్యాఖ్యానించారు.


కెరీర్లో ముందుకు వెళ్లేందుకు.. కెరీర్‌ను డెవలప్ చేసుకునేందుకు కొందరు మహిళలు విలువలు, సిద్ధాంతాలకు తిలోదకాలు ఇస్తారని..అందుకే మహిళలు ఇబ్బందులకు గురవుతారని..ఈ క్రమంలో ప్రయోజనాలు పొందినవారే ఇప్పుడు ‘మీ టూ’ ఉద్యమాన్ని దుర్వినియోగం చేస్తున్నారని ఉషా ఠాకూర్ లైంగిక వేధింపులకు గురైన మహిళలపై వివాదాస్పద వ్యాఖ్యలు చేశారు. దీనిపై నెటిజన్లు దుమ్మెత్తి పోస్తున్నారు. కాగా  గతంలో కూడా ఉషా ఠాకూర్ నవరాత్రి ఉత్సవాల వద్దకు హిందూ అమ్మాయిలను చూడటానికే ముస్లిం యువకులు వస్తారనీ, వారిని అనుమతించకూడదని ఉష వివాదాస్పద వ్యాఖ్యలు చేసిన విషయం గమనించాల్సిన విషయం. కాగా బీజేపీ నేతలే ఎక్కువగా మహిళలపై వివాదాస్పద వ్యాఖ్యలు చేస్తుండటం మరింతగా గమనించాల్సిన విషయం. 

08:03 - October 10, 2018

విశాఖపట్నం : మన్యంలో మరోసారి ఉద్విగ్న వాతావరణం నెలకొంది. డిప్యూటీ సీఎం చినరాజప్పతోపాటు మంత్రి నారా లోకేష్‌ నేడు విశాఖ జిల్లాలో పర్యటించనున్నారు. మరోవైపు గిరిజన ప్రజాప్రతినిధులు వ్యాపారులు ఏజెన్సీని వదిలి వెళ్లాలని పోలీసులు హెచ్చరిస్తున్నారు. ఇదే సమయంలో మావోయిస్టు పార్టీ సెంట్రల్‌ కమిటీ పేరుతో ఓ లేఖ విడుదలైంది. దీంతో ఒక్కసారిగా మన్యంలో మరోసారి ఉద్రిక్త వాతావరణం నెలకొంది.విశాఖ మన్యంలో మరోసారి ఉద్రిక్త పరిస్థితులు నెలకొన్నాయి. ఎప్పుడు ఏం జరుగుతుందోన్న టెన్షన్‌ నెలకొంది. నేడు ఏపీ హోంమంత్రి చినరాజప్ప, ఐటీమంత్రి నారా లోకేష్‌ ఇవాళ మావోయిస్టుల చేతిలో హతమైన కిడారి సర్వేశ్వరరావు, సోమ కుటుంబ సభ్యులను పరామర్శించనున్నారు. ఉదయం 9 గంటలకు  రోడ్డు మార్గంలో పాడేరులోని కిడారి సర్వేశ్వరరావు ఇంటికి చేరుకుని వారి కుటుంబ సభ్యులను పరామర్శించనున్నారు.  అనంతరం అక్కడి నుంచి అరకు వెళ్లి సివేరి సోమా కుటుంబ సభ్యులనూ వారు పరామర్శించనున్నారు.  ఈ నేపథ్యంలో పోలీసులు భద్రత మరింత కట్టుదిట్టం చేశారు. నారా లోకేష్‌ పర్యటనకు ఒక రోజు ముందు మన్యంలో మావోయిస్టులు విడుదల చేసిన లేఖ  కలకలం రేపుతోంది.  టీడీపీకి చెందిన కిడారి  సర్వేశ్వరరావు, సోమ హత్యలకు గల కారణాలను ఆ లేఖలో వెల్లడించారు. గిరిజనులకు   ద్రోహం చేస్తున్నందునే ప్రజాకోర్టులో వారికి శిక్ష విధించామని లేఖలో పేర్కొన్నారు.  బాక్సైట్‌ తవ్వకాలకు అనుకూలంగా వ్యవహరిస్తున్నారని, గూడ క్వారీ విషయంలో ఎన్నోసార్లు వారిని హెచ్చరించినా పద్దతి మార్చుకోలేదన్నారు.  అందుకే అతడికి ప్రజాకోర్టులో శిక్ష విధించామని స్పష్టం చేశారు.  బాక్సైట్‌ తవ్వకాలకు ఎవరు అనుకూలంగా ఉన్నా వదిలేది లేదని లేఖలో హెచ్చరించారు.  ఎమ్మెల్యే గిడ్డి ఈశ్వరి అధికార పార్టీకి 20 కోట్లకు అమ్ముడుపోయారని అందులో ఆరోపించారు.  బాక్సైట్‌ తవ్వకాలకు వ్యతిరేకంగా ఉద్యమించాలని, పద్దతి మార్చుకోకపోతే కిడారి, సోమలకు పట్టిన గతే ఆమెకు పడుతుందని హెచ్చరించారు.   ఈ నేపథ్యంలో ఇవాళ నారా లోకేష్‌ కిడారి, సోమ కుటుంబాల పరామర్శకు వస్తున్నారు. దీంతో ఏం జరుగుతుందన్న ఆందోళన గిరిజనుల్లో వ్యక్తమవుతోంది.

12:57 - October 2, 2018

విశాఖపట్నం : మావోయిస్టుల చేతిలో అంత్యంత కిరాతకంగా చంపబడ్డ ఎమ్మెల్యే కిడారి హత్యకు అత్యంత సన్నిహితుల వల్లనే జరిగిందని వాస్తవాలు వెలుగులోకి వచ్చాయి. నమ్మినవారే కిడారిని మావోల చేతికి అప్పగించారా? అంటే అవుననే సమాధానాలు వస్తున్నాయి. ఎమ్మెల్యే కిడారికి అతి సన్నిహితుడిగా, విశ్వాసపాత్రుడిగా వ్యవహరించిన ఓ వ్యక్తి చేసిన నమ్మకద్రోహమే సర్వేశ్వరరావు, మాజీ ఎమ్మెల్యే సివేరి సోమ మావోయిస్టుల చేతికి చిక్కి, వారి చేతిలో హత్యకు గురికావడానికి కారణమైంది. ఆ వ్యక్తి కిడారిని బావా బావా.. అంటూ ఆప్యాయంగా పిలుస్తూనే ఆయన ప్రతి కదలికనూ మావోయిస్టులకు పక్కాగా చేరవేయడం గమనార్హం. విశాఖ జిల్లా డుంబ్రిగుడ మండలంలోని ఓ మారుమూల గ్రామానికి చెందిన ఓ రాజకీయ నాయకుడు. అతని భార్య స్త్రీ, శిశు సంక్షేమ శాఖలో చిరుద్యోగిగా పనిచేస్తున్నారు. అతడు సోమకు దగ్గరి బంధువవుతారని సమాచారం. అతనితో పాటు మరికొందరిని పావులుగా ఉపయోగించుకునే జంట హత్యల ప్రణాళికను మావోయిస్టులు పక్కాగా అమలుచేశారని పోలీసుల దర్యాప్తులో తేలింది.
ఆ నాయకుడిది, కిడారిది వేర్వేరు గిరిజన తెగలైనా కిడారితో అతను  విశ్వసనీయంగా, చనువుగా ఉండేవాడని పోలీసు వర్గాలు చెబుతున్నాయి. గత నాలుగు రోజులుగా భార్యభర్తలు ఇద్దర్ని పోలీసులు వేర్వేరుగానూ, కలిపి ప్రశ్నించి కీలక సమాచారం రాబట్టారు. వీరిరువురు ప్రస్తుతం పోలీసుల అదుపులోనే ఉన్నారని సమాచారం. జంట హత్యలకు రెక్కీ నిర్వహించే క్రమంలో రెండు, మూడు సార్లు లివిటిపుట్టు ప్రాంతంలో పర్యటించిన మావోయిస్టులకు అతనే ఆశ్రయమిచ్చినట్లు తెలిసింది. ఆంధ్రా-ఒడిశా సరిహద్దుల్లోని అటవీప్రాంతంలో మావోయిస్టులు ఉన్నప్పుడు వారిని కలవడం, అక్కడికి సమీపంలోని కొందరు గ్రామస్థులతో ఆహారం సిద్ధం చేయించారని తెలిసింది. ఆహారం అందజేశారన్న అనుమానం ఉన్న వ్యక్తులను కూడా పోలీసులు పిలిచి విచారిస్తున్నారు. సర్రాయిలో గ్రామదర్శినికి కిడారి  అరకులో బయల్దేరారనే సమాచారం కూడా ఆ గ్రామస్థాయి నాయకుడి ద్వారానే మావోయిస్టులకు చేరిందని పోలీసులు నిర్ధారణకు వచ్చారు. అందుకు సంబంధించి కాల్‌ డేటా విశ్లేషణలోనూ కొన్ని కీలక ఆధారాలు లభ్యమయ్యాయి.
 

07:52 - September 28, 2018

పశ్చిమగోదావరి : జనసేన అధ్యక్షుడు పవన్‌ కల్యాణ్‌పై టీడీపీ ఎమ్మెల్యే చింతమనేని ప్రభాకర్‌ నిప్పులు చెరిగారు. తనపై చేసిన ఆరోపణలపై ఎన్ని కమిటీలు అయినా వేసుకొని నిరూపించాలని సవాల్‌ చేశారు.  పవన్‌ కల్యాణ్‌ ఓ గల్లీ నాయకుడి స్థాయికి దిగజారి మాట్లాడుతున్నారని మండిపడ్డారు. తాను రాజ్యాంగయేతర శక్తిగా ఎదుగుతున్నానని చేసిన ఆరోపణలు నిరూపించాలని డిమాండ్‌ చేశారు. తానను రౌడీ షీటర్‌ అని పవన్‌ చెప్పాల్సిన అవసరం లేదని, తానేంటో దెందులూరు ప్రజలకు తెలుసన్నారు. నాణానికి ఒక వైపే చూస్తున్నారని రెండో వైపు​ చూస్తే పవన్‌ తట్టుకోలేరని హెచ్చరించారు.
నియోజక వర్గం అభివృద్ధిపై ఒక్క కామెంట్‌ చేయలేకనే వ్యక్తిగతంగా విషయాలు మాట్లాడుతున్నారని విమర్శించారు. తాను కూడా వ్యక్తిగత విషయాలు మాట్లాడితే పవన్‌ కల్యాణ్‌ మూడు రోజుల అన్నం తినడం మానేస్తాడని ఎద్దేవా చేశారు. పవన్‌కు దమ్ముంటే దెందులూరులో తనపై పోటీ చేసి గెలవాలి సవాల్‌ చేశారు. తనపై పవన్‌ గెలిస్తే ఆయనకు సన్మానం చేసి ఆయనతో నడుస్తానన్నారు. ఓడిపోతే షేక్‌ హ్యాండ్‌ ఇచ్చి వెళ్లిపోవాలని పేర్కొన్నారు. పార్లమెంట్‌ లో ఎమ్మెల్యేలు ఉంటారంటూ అవగాహన లేని మాటలు మాట్లాడుతున్నారని మండిపడ్డారు. 18 ఏళ్ల వాడిని పోటీకి నిలబెడతాను అంటున్నారు. ఆ వయసులో అసెంబ్లీలో పోటీ చేసే​అవకాశం లేదని కూడా పవన్‌కు తెలియదని ఎద్దేవా చేశారు. రాజకీయ జ్ఞానం కోసం పవన్‌ తనతో ట్యూషన్‌ పెట్టించుకోవాలని ఎద్దేవా చేశారు. కాగా బుధవారం దెందులూరులో పర్యటించిన జనసేన అధినేత పవన్ కల్యాణ్... ఎమ్మెల్యే చింతమనేనిపై సంచలన వ్యాఖ్యలు చేసిన సంగతి తెలిసిందే. చింతమనేనిపై చాలా కేసులున్నా .. రాష్ట్ర ప్రభుత్వ పట్టించుకోవడం లేదని పవన్ ఆరోపించారు. విదేశాల్లో అయితే పర్యవసనాలు తీవ్రంగా ఉండేవని వ్యాఖ్యానించారు.

 

07:31 - September 28, 2018

పశ్చిమగోదావరి : చంద్రబాబు పాలనలో ఆఫ్టరాల్‌ ఒక ఆకురౌడీ, వీధిరౌడీ,  పోలీసులను, హమాలీలను. మహిళా అధికారులపై దౌర్జన్యాలకు పాల్పడతు చేయి చేసుకుంటున్నాడనీ ఎస్‌ఐ చొక్కా పట్టుకుంటున్నాడని  పవన్‌ టీడీపీ ఎమ్మెల్యే చింతమనేనిపై తీవ్ర విమర్శలు చేశారు. ‘ముఖ్యమంత్రిగారిలా చేతులు కట్టుకుని కూర్చోవడానికి మేం సిద్ధంగా లేమన్నారు. 36 కేసులు పెండింగ్‌లో ఉన్న ఒక వ్యక్తిని ప్రభుత్వ విప్‌గా నియమించి ప్రజలకు ఏ సంకేతాలు ఇస్తున్నారు..?’ అని ప్రశ్నించారు. చింతమనేని ప్రభాకర్‌ ఏలూరు పరిసరాల్లోకి వచ్చి రౌడీయిజం చేస్తే కాళ్లు విరగ్గొట్టి కూర్చోపెడతామని హెచ్చరించారు. క్రిమినల్‌ ఎమ్మెల్యేలపై చర్యలు తీసుకోకపోతే జాతీయ మానవహక్కుల సంఘానికి, ఎస్సీ, ఎస్టీ కమిషన్‌కు, అలాగే గవర్నర్‌కు, డీజీపీ, చీఫ్‌ సెక్రటరీకి ఫిర్యాదు చేస్తామని పవన్ కళ్యాణ్ తెలిపారు.

 

18:09 - September 27, 2018

హైదరాబాద్ : ఎంఐఎం అధినేత అసదుద్దీన్ ఒవైసీ, ఆయన సోదరుడు, ఎమ్మెల్యే అక్బరుద్దీన్ ఒవైసీలకు హైకోర్టు షాక్ ఇచ్చింది. హైదరాబాద్ బండ్లగూడలో ఒవైసీ ఆసుపత్రికి తెలంగాణ ప్రభుత్వం 6500 గజాల స్థలాన్ని కేటాయించడంపై స్టే విధించింది. రూ. 40 కోట్ల విలువైన స్థలాన్ని కేవలం రూ. 3.75 కోట్లకే టీఆర్ఎస్ ప్రభుత్వం కేటాయించిందంటూ అనిషా అనే వ్యక్తి హైకోర్టులో పిటిషన్ వేశారు. సుప్రీంకోర్టు గైడ్ లైన్స్ ను పట్టించుకోకుండా ఒవైసీ సోదరులకు ప్రభుత్వ భూమిని ఎలా కేటాయిస్తారని పిటిషన్ లో ఆయన ప్రశ్నించారు. ఒవైసీ సోదరులకు కేటాయించిన స్థలాన్ని వెంటనే వెనక్కి తీసుకునేలా ఆదేశించాలని కోరారు. ఈ పిటిషన్ ను విచారించిన హైకోర్టు... భూమి కేటాయింపులపై మూడు నెలల వరకు స్టే విధించింది. ఒవైసీ సోదరులకు నోటీసులు జారీ చేస్తూ...తదుపరి విచారణను మూడు నెలలకు వాయిదా వేసింది.

 

11:03 - September 26, 2018

విశాఖపట్నం : ప్రజలకు సేవ చేసేందుకే రాజకీయాల్లో వచ్చామని నేతలు ప్రస్తావిస్తుంటారు. కానీ వారి ఆలోచనలు వేరుగా వున్నాయా? అంటే నిజమనే అనుకోవచ్చా? అవినీతి, పైరవీలు, కోట్లు దోచుకోవటం, కాంట్రాక్ట్ రాబట్టుకోవటం వంటి పలు అవినీతిపనులను అలవాటుపడుతున్న నేతల ప్రాణం మావోల గుప్పెట్లో పెట్టుకుంటాం అంటు హెచ్చరించింది అరకు ఘటన హెచ్చరించిందా? అంటే మావోల సమాచారం అవుననే చెబుతోంది. ఒకపార్టీలో గెలిచి ఆ పార్టీ అధికారంలోకి రాకుంటే అధికారంలోకి వచ్చిన పార్టీలలోకి జంప్ అవుతున్న నేతలను మావోలు టార్గెట్ చేస్తున్నట్లుగా వారి సమాచారం తెలుపుతోంది. మావోల చేతిలో ఘోరంగా చంపబడ్డ అరకు ఎమ్మెల్యే కిడారి సర్వేశ్వరరావుకు మావోల హెచ్చరిక ఇదే..

కోట్ల రూపాయలు తీసుకుని పార్టీ మారావు. ఆ డబ్బు చాలలేదా? బాక్సైట్ కోసమే రోడ్లు వేసుకుంటు గిరిజనుల అభివృద్ధి కోసమే వేస్తున్నామనీ మాయమాటలు చెప్పి ఎంతకాలం అడవిబిడ్డలను మోసం చేస్తారు? బాక్సైట్ కోసం భూములు తవ్వితే గిరిజనుల జీవితాలు బుగ్గిపాలవుతాయనీ..ఇప్పటికే నీకు చాలా అవకాశాలు ఇచ్చాం. ఇక చాలు అంటు కిడ్నాప్ చేసిన అరకు ఎమ్మెల్యే కిడారి సర్వేశ్వరరావును కిడ్నాప్ చేసి తీసుకెళ్లి, ప్రజాకోర్టును నిర్వహించిన మావోయిస్టులు ఆయన్ను కాల్చివేసే ముందు చెప్పిన మాటలివి. కాగా ఈ ఘటన చాలా మంది గిరిజనులు ప్రత్యక్షంగా చూశారు. నేతల హత్యల తరువాత గిరిజనులు ఈ వివరాలను ఒక్కొక్కటిగా వెల్లడిస్తున్నారు. 
 

22:12 - September 25, 2018

విశాఖ : అరకు ఎమ్మెల్యే, మాజీ ఎమ్మెల్యేల హత్యలతో విశాఖ మన్యం నివురుగప్పిన నిప్పులా ఉంది. ఇద్దరి హత్యలతో విశాఖ ఏజెన్సీలో వాతావరణం వేడెక్కింది. ఏపీతోపాటు ఒడిశా, చత్తీస్‌ గఢ్‌ పోలీసు బలగాలు ఏజెన్సీని భారీ ఎత్తున జల్లెడ పడుతుండడంతో యుద్ధ క్షేత్రాన్ని తలపిస్తోంది. దీనికి తోడు మావోయిస్టులు మన్యంలోనే ఉన్నారన్న వార్తలతో బలగాలు అడుగు కూడా వదలకుండా కూంబింగ్‌ నిర్వహిస్తున్నాయి. అటు.. కిడారి హత్యకు ముందు మావోలు ఆయన వాహనాన్ని చుట్టుముట్టడం.. హత్య తర్వాత పారిపోతున్న వీడియోలు వెలుగులోకి రావడం మరింత ఆందోళనకు గురి చేస్తోంది. 

హత్యకు ముందు ఎమ్మెల్యే వాహనాన్ని మావోయిస్టులు చుట్టుముట్టిన వీడియో వెలుగులోకి రావడం ఉద్రిక్తతను మరింత పెంచింది. కిడారి వెళుతున్న సమయంలో ఆయన వాహనాన్ని సుమారు 20 మంది మావోయిస్టులు నిలిపి, దాని చుట్టూ నిలబడటం ఇందులో స్పష్టంగా కనిపిస్తోంది. ఆ తర్వాత ఆయన్ను కారు నుంచి బలవంతంగా దించి లాక్కెళ్ళారు. ఈ దృశ్యాలు ఇప్పుడు వైరల్‌ అవుతున్నాయి. 

అంతేకాదు.. తర్వాత మాజీ ఎమ్మెల్యే సోమను కాల్చి పారిపోతున్న విజువల్స్ కూడా వెలుగులోకి రావడం కలకలం రేపుతోంది. ఎమ్మెల్యే కిడారి సర్వేశ్వరరావు, మాజీ ఎమ్మెల్యే సివేరి సోమలను అడ్డుకుని, తుపాకులతో కాల్చి దారుణంగా చంపిన మావోలు అక్కడి నుంచి పారిపోతున్న దృశ్యాలు మీడియాకు చిక్కాయి. 

సోమపై కాల్పుల తర్వాత పరిగెడుతున్న వారిలో పశ్చిమగోదావరి జిల్లాకు చెందిన కామేశ్వరి అలియాస్ సింద్రి, తూర్పు గోదావరి జిల్లాకు చెందిన జలుమూరు శ్రీనుబాబు అలియాస్ రైనోగా పోలీసులు అనుమానిస్తున్నారు. హత్యల అనంతరం మావోయిస్టులు పారిపోతుండగా, కొందరు స్థానికులు తమ సెల్ ఫోన్లలో ఈ దృశ్యాలను చిత్రీకరించారు. ఎమ్మెల్యేను చుట్టుముట్టినప్పటి నుంచి కాల్చి చంపినప్పటి వరకూ ఉన్న వీడియోలు బయటకు రావడంతో మన్యంలో పరిస్థితి మరింత టెన్షన్‌గా మారింది. 

08:13 - September 24, 2018

విశాఖపట్నం : ఎమ్మెల్యే కిడారి సర్వేశ్వరరావు...చివరిసారి ఎవరితో మాట్లాడారు. మరణాన్ని నవ్వుతూనే ఆహ్వానించారా ? మావోయిస్టులు తనను చంపేస్తారన్న విషయం సర్వేశ్వరరావుకు ముందే తెలుసా ? మరణాన్ని సర్వేశ్వరరావు ముందే ఊహించారా ?

2014 ఎన్నికల్లో అరకు నుంచి వైసీపీ తరపున పోటీ చేసిన....ఎమ్మెల్యేగా విజయం సాధించారు కిడారి సర్వేశ్వరరావు. వైసీపీలో ఇమడలేకపోవడంతో....ముఖ్యమంత్రి చంద్రబాబు సమక్షంలో తెలుగుదేశం పార్టీలో చేరారు. ఆ తర్వాత నియోజకవర్గంలో ఎన్నో అభివృద్ది కార్యక్రమాలు చేపట్టి...గిరిజనుల్లో మంచి పేరు సంపాదించారు. అయితే చావును మాత్రం నవ్వుతూనే ఆహ్వానించారు. మనం కూడా శవం అవతాం కదా...అయితే అది ఒక రోజు ముందు లేదంటే వెనక అవ్వొచ్చన్నారు.

కిడారి సర్వేశ్వరావు హత్యకు ముందు రోజు రాత్రి...మంత్రి నక్కా ఆనంద్ బాబుతో మాట్లాడారు. తాను ఫోను చేస్తే.. సిగ్నల్స్ సరిగ్గా లేవని 15 నిమిషాల్లో ఫోన్ చేస్తానంటూ పెట్టేశారని మంత్రి నక్కా ఆనంద్ బాబు చెప్పారు. 20 నిమిషాల తర్వాత ఫోన్ చేశారని గుర్తు చేశారు. 25న విశాఖ వస్తున్నానని చెప్పిన సర్వేశ్వరరావు....ఆ రోజు జిల్లా మీటింగ్ ఉందని చెప్పారన్నారు.  ఇంతలోనే ఇలా జరగడం కలిచివేసిందన్నారు. ఇలా జరుగుతుందని ఊహించలేదన్నారు. 
ప్రజల సమస్యలను ఎప్పుడూ ప్రభుత్వం దృష్టికి తీసుకొస్తూ ఉండేవారని టీడీపీ నేతలు చెబుతున్నారు. మాజీ ఎమ్మెల్యే సోమ కూడా గిరిజనుల సంక్షేమం కోసం పాటు పడేవారని నేతలు గుర్తు చేస్తున్నారు. 

Pages

Don't Miss

Subscribe to RSS - ఎమ్మెల్యే