ఏపీ

19:21 - September 18, 2018

శ్రీకాకుళం : ఈ వాహనానికి పెట్రోల్‌ అవసరం లేదు. వాయుకాలుష్యం సమస్యే ఉత్పన్నంకాదు. జీపీఎస్‌ విధానంతో ఆ వాహనం ఎక్కడుందో తెలుసుకోవచ్చు.  తక్కువ ఖర్చుతో ఎక్కువ దూరం ప్రయాణించవచ్చు. శ్రీకాకుళం జిల్లా కుర్రాళ్లు రూపొందించారు. 

శ్రీకాకుళం జిల్లా ఎచ్చెర్ల మండలం చిలకపాలెంలోని శివానీ ఇంజనీరింగ్‌ కళాశాల విద్యార్థులు మరోసారి తమ సత్తా చూపారు. తక్కువ పెట్టుబడితో వినూత్న బైక్‌ను తయారు చేసి అందరి ప్రశంసలు అందుకుంటున్నారు. పర్యావరణానికి ఎలాంటి హాని కలుగచేయని ఈ నానోబైక్‌ ఇప్పుడు సిక్కోలు రోడ్లపై రయ్‌మంటూ దూసుకెళ్తోంది. ఈ నానో బైక్‌ తయారీకి ఖర్చు అయ్యింది కేవలం 13 వేల రూపాయలు మాత్రమే. ఇది పూర్తిగా బ్యాటరీ ద్వారా నడుస్తోంది. ఎలాంటి ఇంధనం దీనికి అవసరం లేకుండా విద్యార్థులు తీర్చిదిద్దారు.

నానోబైక్‌ బ్యాటరీని మూడు గంటలపాటు చార్జింగ్‌ చేస్తే... 60కిలోమీటర్ల వరకు ప్రయాణించవచ్చు.  ఇది వంద కేజీల బరువును మోయగలదు.  గరిష్టంగా 40 కిలోమీటర్ల స్పీడ్‌తో నడువగలదు. నెలరోజుల్లో ఈ బైక్‌ను తయారు చేసినట్టు ఇంజనీరింగ్‌ విద్యార్థులు చెబుతున్నారు. తమకు మరింత ప్రోత్సాహం అందిస్తే.. ఇలాంటి బైక్‌లు ప్రజలకు అందుబాటులోకి తెస్తామంటున్నారు.

శివానీ ఇంజనీరింగ్ కళాశాలలో ద్వితీయ సంవత్సరం చదువుతున్నా నిఖిల్ నేతృత్వంలోని విద్యార్థుల బృందం తయారుచేసిన నానో బైక్ ను క్రాంతి అనే లెక్చలర్ పర్యవేక్షణ లో రూపొందించబడింది. ఈ బైక్‌ అందరి ప్రశంసలు  అందుకుంటోంది. వేల రూపాయల నుండి లక్షల రూపాయల వరకూ ఖర్చు చేసి ద్విచక్ర వాహనాలు కొనుగోలు చేస్తున్న ఈ రోజుల్లో కేవలం పదమూడు వేల రూపాయలతోనే ఎన్నో సౌకర్యాలు కలిగిన ఈ నానో బైక్ అందుబాటులోకి రావడం నిజంగా అభినందనీయమే. విద్యార్థుల కృషికి అందరి నుంచి ప్రశంసలు వెల్లువెత్తుతున్నాయి.

17:07 - September 18, 2018

కర్నూల్ : కాంగ్రెస్ నిర్వహిస్తున్న సత్యమేవ జయతే సభలో కాంగ్రెస్ జాతీయ అధ్యక్షుడు రాహుల్ గాంధీ పాల్గొన్నారు. ఈ సందర్భంగా ఆయన మాట్లాడుతు..భారతదేశంలోనే తొలి దళిత ముఖ్యమంత్రి దామోదరం సంజీవయ్య అనీ..అందుకే ఢిల్లీ నుండి వచ్చిన వెంటనే సంజీవయ్యగారి నివాసానికి వెళ్లానని రాహుల్ గాంధీ తెలిపారు. జవహర్ లాల్ నెహ్రూ ప్రధానిగా వున్న సమయంలో సంజీవయ్యను సీఎంగా చేయాలనే ప్రతిపాదన వచ్చిందని రాహుల్ తెలిపారు. తెలుగు వారైన కోట్ల విజయభాస్కర్ రెడ్డి, నీలం సంజీవరెడ్డి, ప్రధానిగా పీవీ నర్శింహారావులను మీరు గెలిపించారనీ..నిజాయితీపరులైన నాయకులను మీరెప్పుడు గెలిపించారనీ..మాకు అవకాశం ఇస్తే అటువంటి నాయకులను కాంగ్రెస్ పార్టీ తయరు చేస్తుందని హామీ ఇస్తున్నాననీ రాహుల్ పేర్కొన్నారు. దేశానికే ఏపీ దశ, దిశ, నిర్ధేశం చేసిందన్నారు. కాంగ్రెస్ పార్టీకి ఏపీతో సుదీర్ఘమైన అనుబంధం వుందని రాహుల్ గుర్తు చేసుకున్నారు. 

 

16:04 - September 18, 2018

ఢిల్లీ : భిన్నత్వంలో ఏకత్వం భారతదేశ ప్రతీక..అనేక వృత్తులు, అనేక సంప్రదాయాలు, అనేక భాషలు, అనేక మతాలు.. ఇలా అన్నీ కలగలిస్తేనే భారతదేశం. మరి ఆ సంప్రదాయాలు, కళలు అన్నీ  ఒకే చోట కనిపిస్తే... అది ఎంత చూడముచ్చటగా ఉంటుందో. అన్నీ ఒకే చోటా ఎలా సాధ్యమనుకుంటున్నారా.. భారత్ పర్యటన్ పర్వ్ -2018తో సాధ్యమే..దేశ రాజధాని ఢిల్లీ..  వివిధ రాష్ట్రాల సంస్కృతి సాంప్రదాయాలతో  కళకళలాడుతుంది..రాజ్ పథ్ వేదికగా 12 రోజుల పాటు పర్యటన్ పర్వ్ ఘనంగా జరగుతుంది...అసలేంటీ పర్యటన్ పర్వ్. 

దేశంలో పర్యాటక రంగ అభివృద్దికి కేంద్ర పర్యాటక శాఖ, రాష్ట్ర ప్రభుత్వాలు సంయుక్తంగా నడుం బిగించాయి. ఇందులో భాగంగానే... దేశంలోని పర్యాటక ప్రాంతాలను ప్రాచుర్యం లోకి తేవడం పై రెండేళ్ళుగా దేశ రాజధానిలో పర్యటన్ నిర్వహిస్తున్నారు.
ఢిల్లీలో రాష్ట్రపతి భవన్, ఇండియా గేట్ మధ్య ఉన్న రాజ్ పథ్ లాంజ్ లో పర్యటన్ పర్వ్ వేదికను కేంద్రం ప్రభుత్వం ఏర్పాటు చేసింది. రాజ్ పథ్ కు ఇరువైపులా దేశంలోని అన్ని రాష్ట్రాల స్టాళ్లను ఏర్పాటు చేశారు. చారిత్రక కట్టడాలు, ప్రాంతాలు, దర్శనీయ ప్రదేశాలకు మరింత ప్రాచుర్యం లభించేలా ఈ పర్వ్ లో ప్రదర్శనలు ఏర్పాటు చేశారు.ఏపీ  పర్యాటక శాఖ సైతం  ఇందులో స్టాల్ ఏర్పాటు చేసి ఏపీలోని పర్యాటక ప్రాంతాల వివరాలను ప్రత్యేకతలను ప్రజలకు తెలియజేస్తున్నారు..

దేశంలోని అన్ని రాష్ట్రాల సంస్కృతి సంప్రదాయాలను తెలియజేసేలా ఏర్పాటు చేసిన స్టాల్స్ లో దేశంలోని పురాతన వస్తువులు సహా ఆహార పదార్థాల స్టాళ్లు పర్యాటకులను విశేషంగా ఆకట్టుకుంటున్నాయి. పర్యాటక స్థలాలకు ప్రాచుర్యంతో పాటు అక్కడి ఆచార వ్యవహారాలను అందరికీ తెలియజేస్తున్నారు. తెలుగురాష్ట్రాల నుంచి చేనేత, హస్తకళలను ఇక్కడ ప్రదర్శిస్తున్నారు.
12 రోజులపాటు జరిగే ఈ పర్యటన్ పర్వ్ లో ప్రతి రోజు ఒక రాష్ట్రానికి సంబంధించిన ప్రత్యేక కార్యక్రమాలను ప్రదర్శిస్తారు..ఏపీ కూచిపూడి నృత్య ప్రదర్శన 21న ఢిల్లీలోని తెలుగువాసులను అలరించబోతుంది..అయితే పర్యటన్ పర్వ్ లో తెలంగాణ రాష్ట్రానికి సంబంధించిన స్టాల్స్ లేకపోవడం కొంత వెలితిగా అనిపిస్తోంది. 

09:17 - September 18, 2018

కర్నూలు : గతంలో ప్రత్యేక తెలంగాణ కోసం ఆత్మబలిదానాలు అయ్యాయి. ఇప్పుడు ఆంధ్రప్రదేశ్ లో ప్రత్యేకహోదా కోసం ఆత్మబలిదానాలు చేసుకుంటున్నారు. జిల్లాలో విషాదం నెలకొంది. ఏపీకి ప్రత్యేకహోదా కోసం ఓ విద్యార్థి ఆత్మహత్యకు పాల్పడ్డాడు. కర్నూలు జిల్లా జలదుర్గంలో 10 వతరగతి చదువుతున్నమహేందర్ అనే విద్యార్థి తన అన్నకు ఉద్యోగం రాకపోవడంతో ఆత్మహత్యకు పాల్పడ్డాడు. సూసైడ్ నోట్ రాసి ఆత్మహత్యకు చేసుకున్నాడు. ప్రత్యేక హోదా వస్తే తన అన్నకు ఉద్యోగం వచ్చేందని సూసైడ్ లో పేర్కొన్నారు. ప్రత్యేక హోదా కోసం ఆత్మహత్య చేసుకుంటున్నట్లు పేర్కొన్నారు. 

 

19:55 - September 17, 2018

అమరావతి : తెలుగు రాష్ట్రాలలో సంచలనం కలిగించిన పరువు హత్య ప్రణయ్ దారుణ హత్యపై ఏపీ సీఎం చంద్రబాబు నాయుడు అసెంబ్లీ సమావేశాల సందర్భంగా  స్పందించారు. ప్రణయ్ హత్యపై చంద్రబాబు ఆవేదన వ్యక్తం చేశారు. కులమతాలకు అతీతంగా పిల్లలకు పెళ్లి చేయించాల్సిన బాధ్యత పెద్దలపై ఉందన్నారు. అహంకారం, అహంభావంతో మనుషులను చంపే స్థితికి దిగజారడం ఆందోళనకరమైన విషయమన్నారు. తాము పెళ్లికానుక పథకాన్ని తీసుకురావడం వెనకున్న ముఖ్య ఉద్దేశం కులాంతర వివాహాలను ప్రోత్సహించడమేనని చంద్రబాబు తెలిపారు. పెళ్లికానుక పథకంలో కులాంతర వివాహాలకు ఎక్కువ ప్రాధాన్యతను ఇచ్చామని ఈ సందర్భంగా సీఎం చంద్రబాబు తెలిపారు. 
తక్కువ కులం ఉన్న వ్యక్తిని కూతురు పెళ్లి చేసుకుందనే ఉద్దేశంతో కన్నకుమార్తె భర్తను కన్న తండ్రే చంపించాడంటే... ఈ సమాజంలో ఎంతటి అహంకారం పేరుకుపోయిందో అర్థం చేసుకోవచ్చన్నారు. అబ్బాయి యోగ్యుడు అయి..అమ్మాయికి నచ్చినప్పుడు, పెళ్లి చేసుకుని వారిద్దరూ సంతోషంగా ఉంటారనే నమ్మకంతో తల్లిదండ్రులు వారివురికి వివాహం చేసి ఆశీర్వదించాలని..ఒకవేళ  వారి వివాహం కన్నవారికి ఇష్టం లేకపోతే..వారి మానాన వారిని వదిలేయాయని...ఇలా దారుణంగా హతమార్చడం అనాగరిక చర్య అని అన్నారు. ఈ హత్య వల్ల అమ్మాయి తండ్రి సాంధించింది ఏమీ లేదని ఇకనైనా తల్లిదండ్రుల ఆలోచనల్లో మార్పు రావాల్సిన అవుసరం వుందని సీఎం చంద్రబాబునాయుడు అన్నారు.

 

19:07 - September 17, 2018

అనంతపురం : పుట్టుకతోనే ఎవరు స్వామీజీలుగా కారు. కొందరు సమాజంలో వుండే బలహీనతలను ఆసరాగా చేసుకుని స్వామీజీలుగా చెలామణీ అవుతుంటారు. కొన్ని కొన్ని మ్యాజిక్ లు చేస్తు ప్రజలకు ఆకట్టుకుని అయ్యవార్లుగా కొనసాగిపోతుంటారు. ప్రజలు కూడా వారిని ఫాలో అయిపోతుండటంతో వారు ఆశ్రమాలను ఏర్పాటు చేసుకుని ఆస్తులు కూడా బెట్టుకుని..వారికి వారే అవతారపురుషులుగా చెలామణీ అయిపోతుంటారు. ఈ నేపథ్యంలో తాడిపత్రిలో స్వామీజీ అవతారంగా చెలామణీ అవుతు పతాక శీర్షికలకు ఎక్కారు పేరు ప్రభోదానంద స్వామి. చిన్నపొడమల గ్రామంలో ఆశ్రమం వినాయక నిమజ్జనం సందర్భంగా స్వామి అనుచరులకు, స్థానికులకు మధ్య జరిగిన దాడిలో ఒకరు మరణించగా, పలువురు తీవ్రంగా గాయపడ్డారు. గ్రామస్తులకు మద్దతుగా ఎంపీ దివాకర్ రెడ్డి తాడిపత్రి పోలీస్ స్టేషన్ ఎదుట బైఠాయించారు. చివరకు ఏపీ ముఖ్యమంత్రి చంద్రబాబు ఈ విషయంలో కలుగజేసుకోవాల్సిన పరిస్థితి తలెత్తింది. ఈ నేపథ్యంలో అసలు ఎవరీ ప్రబోధానంద స్వామి అనే ప్రశ్న తలెత్తింది. అసలు హిందూత్వమే తన మతం అనే ఎజెండా కలిగిన బీజేపీ..ప్రభోదానంద పాత్రను వినియోగించుకుంటు టీడీపీపై కుట్రలో భాగంగా అనంతలో చిచ్చు రాజేసిందా? అసలు బీజేపీకీ, ప్రభోదానందకు సంబంధం ఏమిటి? గణేష్ నిమజ్జనం వేడుకల్లో జరిగిన ఘటన ఉద్రిక్తతగా మారటానికి గల సంబంధం ఏమిటి? అసలు ఎవరీ ప్రభోదానంద?..
ప్రబోధానంద స్వామి అసలు పేరు పెద్దన్న చౌదరి. స్వగ్రామం అనంతపురం జిల్లా పెదపప్పూరు మండలం అమ్ములదిన్నె. ఆర్మీలో వైర్ లెస్ ఆపరేటర్ గా పని చేశారు. 1980లో ఆర్మీ నుంచి ఆయన బయటకు వచ్చేశారు. ఆ తర్వాత కొంత కాలం ఆర్ఎంపీగా పని చేశారు. 1980-93 మధ్య ఆయన పూర్తిగా అజ్ఞాతంలోనే ఉన్నారు. అప్పుడే పెద్దన్న  ఉత్తర భారతానికి వెళ్లి..కొంతకాలానికి  బాబా అవతారం ఎత్తి మహారాష్ట్రలో ఓ ఆశ్రమాన్ని స్థాపించేశారు. 
అనంతరం 1993లో చిన్నపొడమల గ్రామానికి విచ్చేసి.. ఆశ్రమం అనే పేరుతో 15 ఎకరాలలో పెద్ద సామ్రాజ్యాన్ని నిర్మించేశాడు. ప్రబోధాశ్రమము, శ్రీకృష్ణ మందిరము, ఇందూ జ్ఞాన వేదికలను స్థాపించారు. త్రైత సిద్ధాంతం పేరుతో కొత్త మతాన్ని స్థాపించి ప్రబోధాలను మొదలు పెట్టారు. అలా 2017లో ప్రబోధానంద బీజేపీలో చేరి ప్రస్తుతం అనంతలో చిచ్చురాజేశారు ఈ పెద్దన్న చౌదరి అలియాస్ ప్రభోదానంద స్వామీజీవారు. మరి ఈ స్వామీజి రాజేసిన ఉద్రిక్తలు టీడీపీ ప్రభుత్వంపై బీజేపీ రాజేసిన కుట్రగా భావింవచ్చా? అనే అనుమానాలు తలెతుతున్నాయి. 

 

14:44 - September 17, 2018

అనంతపురం : అనంతలో ఉద్రిక్తత పరిస్థితులు కొనసాగుతున్నాయి. నిన్న పీఎస్ ముందు బైఠాయించిన ఎంపీ జేసీ దివాకర్ చేసిన నిరసనలపై సీఎం చంద్రబాబు అసంతృప్తి వ్యక్తంచేశారు. ఈ నేపథ్యంలో తాడిపత్రిలో ప్రబోధానంద ఆశ్రమంలో ఉన్న భక్తులను బయటకు రప్పించేందుకు తాజాగా ఉగ్రవాదులను ఏరివేసే ప్రత్యేక అక్టోపస్ బలగాలను కూడా రంగంలోకి దించారు. ప్రబోధానంద ఆశ్రమంలో ఉన్నవారి వద్ద ఆయుధాలు ఉండొచ్చన్న అనుమానంతో పోలీసులు ముందస్తు జాగ్రత్తలు తీసుకుంటున్నారు. శాంతిభద్రతలను అదుపులోకి తీసుకురావాలని సీఎం చంద్రబాబు ఆదేశించిన నేపథ్యంలో తాడిపత్రికి  2,000 మందికిపైగా పోలీసులు చేరుకున్నారు. ఉగ్రవాదులను ఏరివేసే అక్టోపస్ బలగాలు కూడా ఆశ్రమం వద్దకు వచ్చేశాయి. దీంతో ఎప్పుడైనా ఆపరేషన్ మొదలయ్యే పరిస్థితులు నెలకొన్నాయి. 
మరోవైపు జేసీ సోదరులు తమపై కక్ష కట్టారని ఆశ్రమ నిర్వాహకులు ఆరోపిస్తున్నారు. జేసీ వర్గీయులు తమపై దాడిచేసి విధ్వంసం సృష్టించారని..భక్తుల ప్రాణాలను కాపాడటానికి జేసీ వర్గీయులను తాము అడ్డుకున్నామని వారు తెలిపారు. కాగా ప్రస్తుతం తాళం వేసుకుని ఆశ్రమం లోపల ఉండిపోయిన వారిని బయటకు తెచ్చేందుకు అధికారులు చురుగ్గా ఏర్పాట్లు చేస్తున్నారు. ముందు జాగ్రత్తగా పలు అంబులెన్సులను ఆశ్రమం వద్ద సిద్ధంగా వుంచేందుకు కూడా ఏర్పాట్లు చేపట్టారు. ఆపరేషన్ చేపట్టేందుకు అక్టోపస్ టీం కమ్యూనికేషన్, ఇతర వ్యవస్థలను సిద్ధం చేసుకుంటోంది.
ఈ విషయమై తాడిపత్రి పోలీస్ స్టేషన్  ముందు ధర్నాకు కూర్చున్న ఎంపీ జేసీ దివాకర్ రెడ్డి స్పందించారు. వినాయక నిమజ్జనానికి వెళుతుండగా ప్రజలపై దాడిచేసిన ప్రబోధానంద వర్గీయులు స్వామి వారి విగ్రహాన్ని ధ్వంసం చేశారని ఆరోపించారు. ఈ సందర్భంగా జరిగిన అల్లర్లలో అన్ని సామాజిక వర్గాలకు చెందినవారు గాయపడ్డారని వెల్లడించారు. ఆశ్రమాన్ని ఖాళీ చేసి దెోషులను అరెస్ట్ చేసేవరకూ తాను వెనక్కు తగ్గబోనని స్పష్టం చేశారు.

 

19:31 - September 16, 2018

అనంతపురం : పోలీసులపై టీడీపీ ఎంపీ జేసీ దివాకర్ రెడ్డి తీవ్రంగా మండిపడ్డారు. పోలీసులకు ఇంగితం లేదా అంటు పీఎస్ ముందు బైఠాయించారు. చిన్నపొలమాడలో పోలీసుల వైఫల్యానికి నిరసనగా జేసీ పీఎస్ ముందు బైఠాయించి ఆందోళన చేపట్టారు. ఇంతమందిని చావగొడుతుంటే పట్టించుకోరా? అంటు మండిపడ్డారు. ఆశ్రమంలోకి వెళ్లటానికి పోలీసులకు ఇంత భయం ఎందుకు? పోలీసులకు , ఆ వాళ్లకు ఏం సంబంధాలున్నాయో నంటు అనుమానం వ్యక్తం చేశారు. అందర్నీ అరెస్ట్ చేసేదాకా తాను పీఎస్ ముందునుండి కదిలేది లేదని జేసీ స్పష్టంచేశారు. డేరా బాబా చేసినట్లే  ప్రబోధానంద చేస్తున్నాడని ఆయన ఆశ్రమంలోకి వెళ్లేందుకు పోలీసులు ఎందుకు భయపడుతున్నారని ప్రశ్నించారు. 
ఈ రోజు జరిగిన ఘర్షణల్లో దుండగులు ఇద్దరు వ్యక్తుల గొంతు కోశారు. ఇరువర్గాలు పరస్పరం దాడి చేసుకోవడంతో దాదాపు 10 మంది తీవ్రంగా గాయపడ్డారు. వీరిలో ముగ్గురి పరిస్థితి విషమంగా ఉంది. ఈ ఘటనలో పలు ప్రభుత్వ, ప్రైవేటు వాహనాలు ధ్వంసమయ్యాయి. దాదాపు 2,000 మంది ప్రబోధానంద అనుచరులు, చిన్న పొడమల గ్రామస్తులకు ఈ ఘర్షణ చోటుచేసుకుంది. గ్రామస్తులకు మద్దతుగా నిలిచిన అనంతపురం ఎంపీ జేసీ దివాకర్ రెడ్డి.. ఆశ్రమ నిర్వాహకులను వెంటనే అరెస్ట్ చేయాలని డిమాండ్ చేశారు.

 

17:11 - September 16, 2018

ప్రకాశం : కరువు కోరల్లో చిక్కుకున్న ప్రకాశం జిల్లా పంటపొలాల్లో పచ్చదనం పరచుకోనుంది. సాగునీటికి భరోసా కల్పించే మహత్తర ప్రణాళిక ఖరారైంది.  దశాబ్దానికిపైగా నత్తనడకన నడిచిన గుండ్లకమ్మ ప్రాజెక్టు నిర్మాణ పనులు తుదిదశకు చేరడంతో.. భూములు సస్యశ్యామలం కానున్నాయి. మత్స్య, పాడి, పర్యాటక రంగాలు అభివృద్ది చెందనున్నాయి.  ఈనెలాఖరులో ముఖ్యమంత్రి చంద్రబాబు  ఈ ప్రాజెక్టును ప్రారంభించనున్నట్లు సమాచారం. దీంతో మోడువారిన రైతుల మోముల్లో వెలుగులు పూస్తున్నాయి.

కరవు కోరల్లో చిక్కుకున్న ప్రకాశం జిల్లా పొలాల్లో సాగునీరు గలగలా పారనుంది. వెలుగొండ తరువాత అత్యంత ప్రాధాన్యతగల కందుల ఓబులరెడ్డి గుండ్లకమ్మ జలాశయం ద్వారా సాగు నీరందించేందుకు ఏపీ ప్రభుత్వం శ్రీకారం చుట్టింది.  గుండ్లకమ్మ నదిపై మద్దిపాడు మండలం మల్లవరం వద్ద నిర్మించిన ఈ ప్రాజెక్టుతో.. పరిసర ప్రాంత ప్రజలు, రైతుల్లో సంతోషం వ్యక్తమవుతోంది. 2003లో సీఎంగా ఉన్న  చంద్రబాబు తెరపైకి తెచ్చిన ఈ ప్రాజెక్టును.. ఆతర్వాత దివంగత ముఖ్యమంత్రి వైయస్ రాజశేఖరరెడ్డి అత్యంత వేగంగా నిర్మించారు. 

దివంగత సీఎం వైయస్సార్‌ అకాల మరణంతో ఈ ప్రాజెక్టుపై నిర్లక్ష్యపు నీడలు కమ్ముకున్నాయి.  పైగా కోర్టు కేసులతో కూడా పనుల్లో జాప్యం జరిగింది.  లోటు బడ్జెట్‌లో ఉన్నా... జిల్లాలో కరవు పరిస్థితులను గుర్తించిన సీఎం చంద్రబాబు ఈ ప్రాజెక్టు కోసం చాలా కృషిచేశారని అధికార పార్టీ నేతలు అంటున్నారు. గుక్కెడు తాగునీరు లేని పరిస్థితుల్లో ప్రాజెక్టును ప్రారంభిస్తున్నందుకు సంతోషంగా ఉందంటున్నారు.

ఆరుతడి పంటలు సైతం వేసుకోలేని పరిస్థితుల్లో ఈ ప్రాజెక్టుకు నీరు ఇస్తారన్న సమాచారంతో ఆప్రాంత రైతులు తమ సంతోషాన్ని వ్యక్తం చేస్తున్నారు. ఇప్పటికైనా ప్రభుత్వం తమ ధీన పరిస్థితులను అర్ధం చేసుకుందంటూ..సీఎంకు తజ్ణతలు తెలుపుతున్నారు.గుండ్ల కమ్మ ప్రాజెక్టు పర్యాటక ప్రదేశంగానూ ఆకట్టుకుంటోంది. ఈ ప్రాజెక్టును సందర్శించేందుకు  పొరుగు జిల్లాలైన గుంటూరు, నెల్లూరు జిల్లా పర్యాటకులు వస్తున్నారు.బోటింగ్, ఫిషరీ,  పచ్చదనం పరచుకున్న అహ్లాదకర వాతావరణంతో ప్రజలను అమితంగా ఆకట్టుకుంటోంది.నిండుకుండను తలపిస్తున్న ప్రాజెక్టులో  పర్యాటకులతో  సందడి నెలకొంది. దశాబ్దాలుగా బీటలు వారిన పంటపొలాల్లో గుండ్లకమ్మ ప్రాజెక్టు వల్ల పచ్చదనం పరచుకోనుంది. పంటలు లేక బక్కచిక్కిన రైతుల ముఖాలు ఆనందంతో వెలిగిపోతున్నాయి.

16:07 - September 16, 2018

తూర్పుగోదావరి : కని పెంచిన కన్న తండ్రే కొడుకు పాలిట కాలయముడయ్యాడు. ప్రయోజకుడవుతాడని భావించిన కొడుకు చెడువ్యసనాలకు బానిసై తనకు భారంగా మారాడని కత్తితో నరికి చంపాడు తండ్రి. కాకినాడ రూరల్ మండలం స్వామినగర్ పంచాయతీ పరధిలోని బుల్లబ్బాయిరెడ్డినగర్‌లో చోటు చేసుకున్న ఈ ఘటన స్థానికంగా కలకలం రేపింది. గోనాడ అప్పారావు కుమారుడైన గోవింద్‌ చెడు వ్యసనాలకు బానిసై ప్రతిరోజు ఇంట్లో తండ్రిని డబ్బుల కోసం వేధిస్తున్నాడు. ఈ నేపథ్యంలో తండ్రీ కొడుకులమధ్య ఘర్షణ జరిగింది. కాసేపటికి గొడవ సద్దుమణిగినప్పటికీ తెల్లవారు జామున కొడుకు గోవింద్‌ను బయటకు పిలిచి గొడవ పడ్డాడు తండ్రి. అప్పటికే గోవంద్‌ను హతమార్చాలని పథకం వేసిన అప్పారావు అతనిపై కత్తితో దాడి చేశాడు. దీంతో గోవింద్‌ అక్కడికక్కడే మృతి చెందాడు. అనంతరం అప్పారావు పోలీసులకు లొంగిపోయాడు.    

 

Pages

Don't Miss

Subscribe to RSS - ఏపీ