కడప

12:53 - December 12, 2017

కడప : ప్రైవేట్ విద్యాలయాల్లో విద్యార్థుల మరణాలు పెరిగుతున్నాయి. మరో విద్యా కుసుమం నేలరాలింది. ప్రైవేట్ స్కూల్ లో ఓ విద్యార్థి ఆత్మహత్యకు పాల్పడ్డారు. కడప మౌంట్ ఫోర్డ్ స్కూలులో 9వ తరగతి చదువుతున్న విద్యార్ధి చరణ్‌రెడ్డి ఆత్మహత్య కలకలం సృష్టిస్తోంది. చరణ్‌రెడ్డి టై తో ఉరివేసుకున్నాడు. పోలీసులకు సమాచారం ఇవ్వకుండా చరణ్‌రెడ్డిని స్కూలు యాజమాన్యం రిమ్స్‌ ఆసుపత్రికి తరలించారు. బాలుడి తల్లిదండ్రులు స్కూలు వద్ద ఆందోళనకు దిగారు. స్కూలు యాజమాన్యం పరారీలో ఉన్నట్లు తెలుస్తోంది. 

 

21:46 - December 11, 2017

కడప : విభజన హామీ చట్టంలో ఇచ్చిన విధంగా కడప జిల్లాలో ఉక్కు పరిశ్రమ ఏర్పాటు చేసే వరకు ఉద్యమాన్ని ఆపే ప్రసక్తే లేదని ఉక్కు పరిశ్రమ సాధన సమితి హెచ్చరించింది. స్టీల్‌ ప్లాంటు ఏర్పాటు చేయాలని కోరుతూ ఈ నెల 13న సీపీఎం ఆధ్వర్యంలో భారీ బహిరంగ సభను నిర్వహిస్తున్నట్లు పార్టీ నేతలు తెలిపారు. ఇంటిగ్రేటెడ్‌ స్టీలు ప్లాంటు ఏర్పాటుతోనే సామాజిక న్యాయం జరుగుతుందని, చిన్నా చితకా పరిశ్రమ అంటే ఒప్పుకునేది లేదన్నారు. 13న కడపలో జరిగే సభకు సీపీఎం జాతీయ ప్రధాన కార్యదర్శి సీతారాం ఏచూరి ముఖ్య అతిధిగా వస్తున్నారని ఉక్కు పరిశ్రమ సాధన సమితి సభ్యులు తెలిపారు.

06:26 - December 11, 2017

కడప : అసలే దుర్మార్గుడు ఆపై పోలీస్‌ ఉద్యోగం.. ఇక అడ్డే లేదన్నట్టు రెచ్చిపోయాడా ఖాకీ. అక్రమ కేసులు పెట్టిస్తానంటూ.. పలువురు మహిళలను లొంగదీసుకున్నాడు. ముగ్గురు మహిళలను వివాహం చేసుకున్నాడు. భర్త వేధింపులు భరించలేక మహిళాకమిషన్‌ ను ఆశ్రయించింది మూడో భార్య. కడప జిల్లాలో ఓ పోలీస్‌ హెడ్‌కానిస్టేబుల్‌ బాగోతం ఇది. ఈమె పేరు యశోద. వయసు 23 ఏళ్ళు. ఇద్దరు పిల్లలు. 13 ఏళ్ల వయసులో 7వ తరగతి చదువుతుండగా.. తనపై అత్యాచారం చేసిన హెడ్ కానిస్టేబుల్ చంద్రశేఖర్‌.. బలవంతంగా పెళ్లి చేసుకున్నాడని ఆవేదన వ్యక్తం చేస్తోంది. తనకు అయినవారు ఎవరూ లేకపోవడంతో.. చంద్రశేఖర్‌ ఇష్టం వచ్చినట్టు ప్రవర్తించేవాడని యశోద ఆవేదనగా చెబుతోంది. పైగా ఈమధ్య ఇతర మగాళ్లతో గడపాలంటూ వేధిస్తున్నాడని ఏపీ మహిళాకమిషన్‌ చైర్మన్‌ నన్నపనేని రాజకుమారి ఎదుట కన్నీరు పెట్టుకుంది.

ఇదిగో ఈ ఫోటోలో కనిసిస్తున్న ఇతడే హెడ్‌కానిస్టేబుల్‌ చంద్రశేఖర్. కడప జిల్లా ఓబులవారిపల్లె మండల కేంద్రంలో హెడ్‌కానిస్టేబుల్‌గా పనిచేస్తున్నాడు. ఒంటిమీద ఖాకీ డ్రెస్‌ ఉందన్న పొగరుతో.. ఇష్టం వచ్చినట్టు ప్రవర్తిస్తున్నాడు. ఇప్పటికే మూడు పెళ్లిల్లు చేసుకున్నాడు. మండల పరిధిలో కీచకుడిగా మారిన హెడ్‌కానిస్టేబుల్‌ బాగోతాన్ని ఆయన మూడో భార్య యశోద బయటపెట్టింది. తనను వ్యభిచారం చేయాలంటూ నిత్యం వేధిస్తున్నాడని మహిళా కమిషన్‌ చైర్మన్‌ ముందు మొరపెట్టుకుంది. తన పెళ్లి ఫోటోలు, పిల్లల ఫోటోలు.. ఇతర బాధలు పెట్టిన ఆధారాలన్నింటిని చైర్మన్‌ ముందు బయటపెట్టింది బాధితురాలు. అంతటితోనే ఆగలేదు.. తప్పుడు కేసులు పెట్టి పరువు తీస్తానంటూ.. పలువురు మహిళలను వేధించి లొంగదీసుకున్నాడని బాధితురాలు ఆరోపిస్తోంది.

యశోధ ఫిర్యాదుపై స్పందించిన మహిళా కమిషన్‌ చైర్మన్‌ వెంటనే పోలీసు ఉన్నతాధికారుల దృష్టికి సమస్యను ఫోన్ ద్వారా వివరించారు. హెడ్‌కానిస్టేబుల్‌ చంద్రశేఖర్ పై వెంటనే చర్యలు తసుకోవాలని ఆదేశించారు. నిందితుణ్ణి తక్షణం విధుల నుంచి, నిర్భయ చట్టం కింద కేసును నమోదు చేయాలన్నారు. మహిళా కమిషన్‌ ఆదేశాలతో అయినా ఈ కీచక ఖాకీపై కఠిన చర్యలు తీసుకుని, బాధితులకు న్యాయం చేయాలని మహిళా సంఘాలు కోరుతున్నాయి. 

21:52 - December 8, 2017

కడప : ఖమ్మం, కడప జిల్లాలో ఉక్కు కర్మాగారాల ఏర్పాటు అంశంపై మరో 10 రోజుల్లో నివేదిక వస్తుందని ఉపరాష్ట్రపతి వెంకయ్యనాయుడు అన్నారు. ప్రొద్దుటూరులో అమృత్ పథకం క్రింద అభివృద్ధి పనులకు వెంకయ్యనాయుడు శంకుస్థాపన చేశారు. ఆ తర్వాత అనిబిసెంట్ పురపాలక ఉన్నత పాఠశాల శతాబ్ది ఉత్సవాలకు ముఖ్య అతిథిగా హాజరయ్యారు. కన్నతల్లిని, మాతృభూమిని, చదువుకున్నపాఠశాలను మరువకూడదని ఉపరాష్ట్రపతి వెంకయ్యనాయుడు అన్నారు. గూగుల్ కంటే గురువే గొప్పవాడన్న విషయాన్ని అందరూ గుర్తుపెట్టుకోవలన్నారు. 

 

19:26 - December 8, 2017

కడప : ప్రభుత్వం రైతులను అన్ని విధాల ఆదుకుంటుంటే  ప్రతిపక్ష నేత జగన్ పాదయాత్రలో రైతులు నాశనం అయిపోయారంటూ వ్యాఖ్యానించడం సరికాదన్నారు మంత్రి సోమిరెడ్డి చంద్రమోహన్‌రెడ్డి.  రైతుల్లో ఆత్మస్థైర్యాన్ని నింపాల్సింది పోయి వారిని మరింత కృంగదీసేలా జగన్ మాట్లాడుతున్నారని మండిపడ్డారు. కడప ఆర్ ఆండ్ బీ గెస్ట్‌ గెస్ట్ హౌస్‌లో జరిగిన కార్యకర్తల సమావేశంలో సోమిరెడ్డి పాల్గొన్నారు. వ్యవసాయంలో టెక్నాలజీని వాడుకోవడంలో ఏపీ ముందుందన్నారు సోమిరెడ్డి... రైతుల్ని ఆదుకోవడంలో కూడా ఏపీ సర్కారే ముందుందని స్పష్టం చేశారు. 

 

 

19:34 - December 7, 2017

కడప : జిల్లాలో స్టీల్‌ప్లాంట్‌ ఏర్పాటు చేయాలని ఉక్కు ఫ్యాక్టరీ సాధన కమిటీ డిమాండ్‌ చేసింది. స్టీల్‌ప్లాంట్‌ సాధన కోసం ఎస్‌ఎఫ్‌ఐ - డీవైఎఫ్‌ఐ ఆధ్వర్యంలో సాగుతోన్న జీపుయాత్ర కడప జిల్లాలోని బద్వేలు చేరింది. ఈ సందర్భంగా జీపుయాత్రకు విద్యార్థులు, యువకులు ఘన స్వాగతం పలికారు. తక్షణమే కడపలో ఉక్కు పరిశ్రమను ఏర్పాటు చేయాలని. ఉక్కు ఫ్యాక్టరీ సాధన కమిటీ కన్వీనర్‌ ఆంజనేయులు డిమాండ్‌ చేశారు. రాయలసీమలోని ప్రాజెక్టులనూ పూర్తి చేయాలన్నారు. ఈనెల 15 నుంచి జరిగే పార్లమెంట్‌ సమావేశాల్లో దీనిపై ఓ నిర్ణయం తీసుకోవాలని కోరారు. ఉక్కు ఫ్యాక్టరీ సాధన కోసం ఈనెల 15న కడపలో జరిగే బహిరంగ సభలో విద్యార్థులు, యువకులు, మేధావులు పెద్ద సంఖ్యలో పాల్గొనాలని ఆయన పిలుపునిచ్చారు. 

 

19:29 - December 6, 2017

కడప : జిల్లాలో.. ఉక్కు పరిశ్రమ ఏర్పాటు చేయడం వల్ల యువతకు ఉపాధి అవకాశాలు లభిస్తాయని పలువురు జర్నలిస్టులు  అన్నారు. జిల్లాలో ఉక్కు పరిశ్రమ ఏర్పాటు చేయాలని కలెక్టర్  బాబురావు నాయుడుకు.. జర్నలిస్ట్‌లు వినతిపత్రం అందజేశారు. ఉక్కు ఫ్యాక్టరీ ఏర్పాటుపై కేంద్ర, రాష్ట్ర ప్రభుత్వాలు నిర్లక్ష్యంగా వ్యవహరిస్తున్నాయని జర్నలిస్ట్‌ నాయకులు అన్నారు. ఉక్కు పరిశ్రమకు సంబంధించిన విషయాన్ని ప్రభుత్వం దృష్టికి తీసుకెళ్తానని కలెక్టర్ బాబురావు నాయుడు జర్నలిస్టులకు హామీ ఇచ్చారు.

 

18:41 - December 4, 2017

కడప : రజకులను ఎస్సీజాబితాలోకి చేర్చాలని రాష్ట్ర రజక సంఘం అధ్యక్షుడు పాతపాటి అంజిబాబు డిమాండ్‌ చేశారు. 18 రాష్ట్రాలు, 3 కేంద్రపాలిత ప్రాంతాల్లో ఎస్సీలుగా ఉన్న రజకులను ఏపీలో విస్మరించడం దారుణమన్నారు. కాపులను బీసీల్లోకి, వాల్మీకి బోయలను ఎస్టీల్లోకి చేర్చి రజకులను విస్మరించడంపై మండిపడ్డారు. ఇప్పటికైనా చంద్రబాబు రజకులను ఎస్సీ జాబితాలోకి చేర్చాలని లేదంటే ఉద్యమాలు చేసి సాధించుకుంటామని హెచ్చరించారు. 

14:48 - December 4, 2017

కడప : జిల్లాలో వైసీపీ ఎమ్మెల్యే రవీంద్రనాథ్‌ రెడ్డి అభివృద్ధి పనులకు అడ్డంపడుతూ టీడీపీ నాయకులపై విమర్శలు చేయడం హాస్యాస్పదం అన్నారు కమాలపురం టీడీపీ ఇంచార్జ్‌ పుత్త నరసింహారెడ్డి. కమలాపురం నియోజకవర్గ పరిధిలోని సర్వరాయసాగర్‌ ప్రాజెక్టును ఇతర చెరువులను ఆయన పరిశీలించారు. నీటితో చెరువులను చూసి హర్షం వ్యక్తం చేశారు. కమాలాపురం నియోజకవర్గంలో అభివృద్ధి పనుల్లో జాప్యం జరగడానికి కారణం రవీంద్రనాథ్‌ రెడ్డి అని ఎద్దేవా చేశారు.

14:46 - December 4, 2017

కడప : జిల్లా ప్రొద్దుటూరు హోమస్‌ పేటవీధిలో కన్వ మార్ట్‌ ఫ్యామిలీ స్టోర్‌ రెడిమేడ్‌ షోరూమ్‌ ప్రారంభమైంది. ప్రజల అవసరాలను దృష్టిలో పెట్టుకొని తమ షోరూంను రూపొందించామని యాజమాన్యం తెలిపింది. ప్రముఖ వ్యాపార వేత్త బూసెట్టి.రామ్మోహన్‌ రావు ముఖ్య అతిథిగా హాజరై షోరూం ప్రారంభించారు.

Pages

Don't Miss

Subscribe to RSS - కడప