కడప

19:45 - April 29, 2017
18:59 - April 29, 2017

కడప : జిల్లాలో వైసీపీ పట్టుసడలుతోందా? ఒకప్పుడు ప్రత్యర్థులకు సవాల్‌గా ఉండే ప్రాంతం.. ఇప్పుడు రెడ్‌ కార్పెట్‌ పరుస్తోందా? కడపలో ఏం జరుగుతుంది? వైసీపీ ప్రాబల్యం కోల్పోతుందా? ప్రస్తుతం వైసీపీ శ్రేణులలో తలెత్తుతున్న ప్రశ్నలు ఇవి.
వైసీపీకి ఎదురుదెబ్బ
వైసీపీ అధినేత జగన్‌  కుటుంబానికి కడప జిల్లా కంచుకోట. ప్రత్యర్థులకు పట్టు దొరకని ప్రాంతం. వైఎస్ రాజారెడ్డి నుంచి రాజశేఖర రెడ్డి వరకు.. అంచెలంచలుగా జిల్లాలో తమ రాజకీయ ప్రాబల్యాన్ని పెంచుకుంటూ వచ్చారు.  కడప జిల్లా అంటే వైఎస్.. వైఎస్ అంటే కడప జిల్లా అనేంతగా జిల్లాలో ఎదిగారు. అలాంటి ప్రాంతంలో ఇప్పుడు వైసీపీకి ఎదురుదెబ్బ తగిలింది. 
స్థానిక సంస్థ ఎన్నికల్లో ఓడిపోయిన వైఎస్‌ వివేకానందరెడ్డి
ఇటీవల జరిగిన స్థానిక సంస్థల ఎన్నికల్లో వైఎస్‌ జగన్.. బాబాయ్  వివేకానందరెడ్డి ఓడిపోయారు. దీంతో జిల్లా మీద జగన్ కుటుంబం పట్టు సడులుతోందన్న అభిప్రాయం పార్టీ శ్రేణుల్లో వ్యక్తమవుతోంది. శతవిధాల ప్రయత్నించినా...వైఎస్  వివేకా ఓడిపోవడం పార్టీ శ్రేణుల్ని కలవరపాటుకు గురిచేస్తోంది. జిల్లాలో తొమ్మిది మంది  వైసీపీ ఎమ్మెల్యేలు  గెలిచినా... అధికార పార్టీని ఎదుర్కోవడంలో విఫలమయ్యారనే  భావన పార్టీ శ్రేణుల్లో వ్యక్తమవుతోంది.
ఓటమికి నాయకత్వ లోపమే కారణమని విమర్శలు
అధికార పార్టీ డబ్బు ఎర చూపి గెలిచిందని.. ఎంత చెప్పుకున్నా...పార్టీ శ్రేణుల్లో మాత్రం అది స్థైర్యాన్ని నింపలేకపోతోంది. జిల్లాలో పటిష్టమైన నాయకత్వ లోపం కారణంగానే వైసీపీ ఓటమిని చవిచూడాల్సి వచ్చిందని పలువురు అంటున్నారు.  తండ్రి తరహాలో జగన్‌ వ్యవహార శైలి లేకపోవడం... జగన్‌ పులివెందులకే పరిమితం కావడంతో జిల్లాలో వైసీపీ బలహీన పడుతుందని విశ్లేషకులు అంటున్నారు. దీంతోపాటు జిల్లాలో బలమైన నేత అయిన ఆదినారాయణరెడ్డి పార్టీని వీడటం లాంటి పరిణామాలు కూడా పార్టీని దెబ్బతీస్తున్నాయంటున్నారు. అలాగే జిల్లా నాయకత్వం ప్రెస్‌ మీట్‌లకే పరిమితమవుతోందని..క్షేత్రస్థాయి సమస్యలను పట్టించుకోవడం లేదన్న విమర్శ కూడా  ఉంది. అలాగే  ఆకేపాటి అమరనాథ్ రెడ్డి.. జిల్లా అధ్యక్షుడిగా విఫలమయ్యారని పార్టీ వ్యక్తులే చెబుతున్నారు.  
నష్ట నివారణకు యోచిస్తున్న జగన్‌
అయితే  నష్ట నివారణ చర్యలు తీసుకోవాలనే  యోచనలో జగన్‌ ఉన్నట్టు తెలుస్తోంది. జిల్లాలో మళ్లీ తమ ప్రాబల్యాన్ని పెంచుకోవడానికి...తమ కుటుంబ ముద్ర చెరిగిపోకుండా ఉండేందుకు పార్టీ జిల్లా పగ్గాలు వైఎస్ వివేకాకు ఇచ్చే ఆలోచనలో జగన్ ఉన్నట్టు తెలుస్తోంది. మరోవైపు  టీడీపీ నాయకులు మాత్రం అందివచ్చిన ప్రతి అవకాశాన్ని సద్వినియోగం చేసుకోవాలని చూస్తున్నారు. స్థానిక నాయకత్వం నుంచి జిల్లా నాయకత్వం వరకు ఎవరు పార్టీలోకి వచ్చినా తీసుకునేందుకు సిద్ధంగా ఉన్నారు. 

 

06:59 - April 28, 2017

కడప : బాహుబలి 2 సినిమా విడుదల సందర్భంగా జిల్లాలోని రైల్వే కోడూరులో ప్రభాస్‌ అభిమానులు ర్యాలీ నిర్వహించారు. బ్యాండు భాజాలు, డ్యాన్సులతో హోరెత్తించారు. ర్యాలీలో 9 తెల్లగుర్రాలు ప్రత్యేక ఆకర్షణగా నిలిచాయి. అనంతరం స్థానిక సిద్దేశ్వర థియేటర్‌ దగ్గర అన్నదానం చేశారు. 

18:52 - April 26, 2017

కడప : జిల్లా రాజంపేటలో దారుణం జరిగింది. ఖాజీపేట నుండి తిరుపతి వెళ్తున్న ఇంటర్‌ విద్యార్థి నవీన్‌కుమార్‌రెడ్డిపై దుండగులు పెట్రోల్‌ పోసి నిప్పంటించారు. తీవ్రగాయాలైన నవీన్‌ను ఆస్పత్రికి తరలించారు. నవీన్‌ పరిస్థితి విషమంగా ఉంది. ఇంటర్‌ ఇంప్రూవ్‌మెంట్‌ పరీక్ష రాసేందుకు నవీన్‌ తిరుపతి వెళ్తుండగా ఈ ఘటన చోటు చేసుకుంది. అయితే.. ఈ ఘటనకు గల కారణాలను పోలీసులు దర్యాప్తు చేస్తున్నారు.

 

18:42 - April 20, 2017

కడప: కడప మార్కెట్ యార్డును వైసీపీ నేతలు సందర్శించారు. ఎంపీ అవినాష్ రెడ్డి, ఎమ్మెల్యేలు అంజాద్‌ భాష, రఘురామిరెడ్డిలు.. పసుపు రైతు పడుతున్న కష్టాలను స్వయంగా అడిగి తెలుసుకున్నారు. పసుపు పంటకు మద్దతు ధర కల్పించాలని ప్రభుత్వాన్ని డిమాండ్‌ చేశారు. 

18:40 - April 20, 2017

కడప: జిల్లాలో తమ్ముళ్లను పక్కన పెట్టిన.. తెలుగుదేశం పార్టీకి గట్టి దెబ్బే తగిలేలా ఉంది. ఇక తాడోపేడో తేల్చుకోవడానికి టీడీపీ సీనియర్ నేతలు సిద్ధమవుతున్నారు. దానికి ఫలితమే ఇదిగో ఈ ఆమరణ నిరాహార దీక్ష. తమ ఉనికి కోసం నిరసన బాట పట్టారు.

కడప జిల్లాలో పట్టు కోసం ప్రయత్నిస్తున్న టీడీపీలో...

కడప జిల్లాలో పట్టు కోసం ప్రయత్నిస్తున్న టీడీపీలో చెలరేగుతున్న అసంతృప్తి.. పార్టీ అధిష్టానికి తలనొప్పిగా మారుతోంది. జిల్లాలో టీడీపీ పట్టు సాధించడం అంత సులువు కాదన్న విషయం స్పష్టంగా అర్ధమవుతోంది. ఈ మధ్యే వైసీపీలోని బలమైన నాయకత్వాన్ని టీడీపీ అధిష్టానం పార్టీలోకి తీసుకుంది. వైసీపీ నేతలు టీడీపీలోకి రావడాన్ని కొందరు వ్యతిరేకించారు. కానీ పార్టీ పటిష్టత కోసం రాజీ పడ్డారు.

పదేళ్లు ప్రతిపక్షంలో ఉండి పోరాడిన సీనియర్లను కాదని..

పదేళ్లు ప్రతిపక్షంలో ఉండి పోరాడిన సీనియర్లను కాదని.. వైసీపీ నుంచి వచ్చిన నేతలకు ప్రాధాన్యమివ్వడం.. జిల్లా తెలుగు దేశంలో కాక పుట్టిస్తోంది. ఇటీవలే జమ్మలమడుగులో టీడీపీ కార్యకర్తలు ఆదినారాయణ రెడ్డికి మంత్రి పదవి ఇవ్వడాన్ని వ్యతిరేకించారు. ఆందోళనకు దిగారు. అది చల్లారక ముందే కడప నగరంలో సీనియర్ టీడీపీ నాయకులు రోడ్డెక్కారు. తమకు ప్రాధాన్యం ఇవ్వడం లేదంటూ ఏకంగా ఎన్టీఆర్‌ విగ్రహం ముందు నిరాహార దీక్షకు దిగారు. అయితే వారి దీక్షను పోలీసులు భగ్నం చేశారు.

వైసీపీలోంచి వచ్చిన వారి హవానే...

ఇప్పుడు కడప జిల్లాలో వైసీపీలోంచి వచ్చిన వారి హవానే నడుస్తోంది. వాళ్లకే కాంట్రాక్టులు, పదవులు, ప్రాధాన్యత దక్కుతోందని టీడీపీ సీనియర్ నేతలు వాపోతున్నారు. ఇటీవల కడప నగరానికి దాదాపు 15 కోట్ల పనులకు నిధులు విడుదల అయ్యాయి. ఇందులో చాలా వరకు వైసీపీలో నుంచి టీడీపీలోకి వచ్చిన వారికి కాంట్రాక్టులు ఇచ్చారు. సీనియర్ కార్యకర్తల్ని ఎవరినీ పట్టించుకోవడం లేదని కొందరు నేతలు ఆరోపిస్తున్నారు. పార్టీ అధిష్టానం దృష్టికి ఈ విషయం తీసుకెళ్లేంత వరకు తమ పోరాటం కొనసాగిస్తామని చెబుతున్నారు. మొత్తానికి కడప జిల్లాలో టీడీపీ మినీ వైసీపీగా మారిందనే వాదనలు వినిపిస్తున్నాయి. 

21:11 - April 16, 2017

కడప : పొద్దుటూరు మున్సిపల్‌ చైర్మన్‌ ఎన్నిక వ్యవహారం.. రణరంగాన్ని తలపించింది. ఎన్నిక వాయిదా వేయాలంటూ టీడీపీ నేతలు... జరిపి తీరాల్సిందేనంటూ వైసీపీ నేతలు పట్టుబట్టారు. పంతం నెగ్గించుకునేందుకు ఇరువర్గాలూ హంగామా సృష్టించాయి. టీడీపీ సభ్యులు బల్లలు, కుర్చీలు విరిచేయగా... వైసీపీ ఎమ్మెల్యే రాచమల్లు ఏకంగా ఆర్ డీవోను కొట్టినంత పనిచేశారు. 
కుర్చీలు విసిరివేత  
తమ్ముళ్లు కోపంతో కుర్చీలు విరిచేశారు. అదే ఊపులో బల్లలు పగలగొట్టారు. తామేమీ తక్కువ తినలేదన్నట్లు వైసీపీ నేతలూ తిట్లపురాణం అందుకున్నారు. అధికారులను అడ్డుకునే క్రమంలో దాదాపు కొట్టినంత పని చేశారు.
నేతల హంగామా 
ఇదీ ప్రొద్దుటూరు మున్సిపల్‌ చైర్మన్‌ ఎన్నికల్లో నేతల ప్రవర్తన తీరు.. రెండోరోజూ మున్సిపల్ చైర్మన్‌ ఎన్నికలోనూ నేతలు హంగామా సృష్టించారు.. ఆదివారం ఉదయం... ఎన్నికల ప్రొసీడింగ్ అధికారి, ఆర్‌డీవో వినాయకం, జాయింట్‌ కలెక్టర్‌ శ్వేత ఎన్నికల ప్రక్రియను ప్రారంభించారు.. కౌన్సిలర్ల పేర్ల నమోదు కార్యక్రమం చేపట్టారు..  అధికారుల విజ్ఞప్తితో వైసీపీ కౌన్సిలర్లు తమ పేర్లు నమోదు చేయించుకున్నారు.. టీడీపీ కౌన్సిలర్లు మాత్రం పేర్ల నమోదుకు ముందుకు రాలేదు.. తమ పార్టీకిచెందిన ఏడుగురు కౌన్సిలర్లు వైసీపీకి మద్దతు ఇస్తున్నారని... ఎన్నిక జరిగితే చైర్మన్‌ పదవి తమకు దక్కదని తెలుగు తమ్ముళ్లు భావించారు.. ఎన్నిక వాయిదావేయాలంటూ మున్సిపల్ ఇంచార్జ్ చైర్మన్‌ జాబీవుల్లా, కౌన్సిలర్‌ గణేశ్‌ బాబు, మరో 12మంది కౌన్సిలర్లు నిరసనకు దిగారు.. బెంచీలు, కుర్చీలు ధ్వంసం చేశారు.. 
ఎన్నిక ప్రక్రియ వాయిదా 
ఉదయం 11నుంచి మధ్యాహ్నం ఒకటిన్నరవరకూ ఈ ఆందోళన కొనసాగింది. ఉద్రిక్తత నేపథ్యంలో ఎన్నిక ప్రక్రియను వాయిదా వేస్తున్నట్లు ఆర్‌డీవో ప్రకటించారు. ఈ సమస్యను ఎన్నికల కమిషన్‌ దృష్టికి తీసుకువెళుతున్నట్లు తెలిపారు. ఈ వాయిదాపై టీడీపీ నేతలు సంతోషం వ్యక్తం చేశారు. ఎన్నిక వాయిదాపడగానే వైసీపీనుంచి తీవ్ర వ్యతిరేకత వ్యక్తమైంది. ఎమ్మెల్యే రాచమల్లు తమ పార్టీ కౌన్సిలర్లతోకలిసి   ఆర్‌డీవోతో వాగ్వాదానికి దిగారు.. ఇష్టంవచ్చినట్లు తిడుతూ దాదాపు కొట్టినంత పనిచేశారు. ఎన్నిక జరిపేంతవరకూ అక్కడినుంచి కదలమంటూ నేలపై పడుకుని ఆర్‌డీవోను అడ్డుకున్నారు..  
ఉద్రిక్త పరిస్థితి 
వైసీపీ నేతల నిరసనతో అక్కడి పరిస్థితి ఉద్రిక్తంగా మారింది. పోలీసుల సహాయం తీసుకున్న ఆర్‌డీవో అక్కడి నుంచి వెళ్లిపోయారు. అటు ఎన్నిక వాయిదాపై మండిపడ్డ రాచమల్లు..... ఎమ్మెల్యే పదవికి రాజీనామా చేస్తున్నట్లు ప్రకటించారు.    తన కాలిచెప్పునుతీసుకొని చేతిపై కొట్టుకుంటూ ఆగ్రహం వ్యక్తం చేశారు.. ఇంత భద్రత ఉన్నా ఎందుకు ఎన్నిక నిర్వహించలేకపోయారని ప్రశ్నించారు.. 
సీఎం చంద్రబాబు ఆగ్రహం 
కొద్దిసేపటి తర్వాత రెండువర్గాలకు చెందిన కౌన్సిలర్లు అక్కడినుంచి వెళ్లిపోవడంతో గొడవ సద్దుమణిగింది.. శనివారం కూడా ఇదే తరహా హంగామాతో ఎన్నిక వాయిదా పడింది. సండేరోజూ ఇదే పరిస్థితి కొనసాగడంతో మరోసారి వాయిదాపడింది. ప్రొద్దుటూరు మున్సిపల్‌ చైర్మన్‌ ఎన్నిక వ్యవహారం గందరగోళంగా మారడంపై సీఎం చంద్రబాబునాయుడు ఆగ్రహం వ్యక్తం చేశారు. ప్రజాస్వామ్య పద్ధతిలో ఎన్నికలు జరగాలని... హింసాత్మక ధోరణి సరికాదని పార్టీలన్నీ సంయమనం పాటించాలని సూచించారు. ఘటనకు బాధ్యులైన వారిపై చర్యలు తీసుకోవాలని అధికారుల్ని ఆదేశించారు..  తమ పార్టీలో క్రమశిక్షణ ఉల్లంఘిస్తే ఎంతటివారైనా ఉపేక్షించేది లేదని సీఎం హెచ్చరించారు. 

15:48 - April 16, 2017

కడప : ప్రొద్దుటూరు మున్సిపల్ ఎన్నికల్లో మరోసారి ఉద్రిక్తత నెలకొంది. టీడీపీ నేతలు దౌర్జన్యానికి పాల్పడ్డారని ఆరోపిస్తూ వైసీపీ ఎమ్మెల్యే రాజమల్లు తన నిరసనను తెలిపారు. ప్రొద్దుటూరులో ఎమ్మెల్యే రాజమల్లు తనను తాను చెప్పుతో కొట్టుకున్నాడు. ఎమ్మెల్యే పదవికి రాజీనామా చేస్తానని రాజమల్లు హెచ్చరించారు. తీవ్ర ఉద్రిక్త పరిస్థితుల నేపథ్యంలో రిటర్నింగ్ అధికారి ఎన్నికను వాయిదా వేశారు. ఈ విషయాన్ని ఈసీ దృష్టి తీసుకెళ్తానని అధికారి తెలిపారు. ఉద్రిక్త పరిస్థితులకు టీడీపీ వర్గ విభేదాలే కారణమని తెలుస్తోంది.

21:45 - April 15, 2017
13:25 - April 15, 2017

కడప : ప్రొద్దుటూరు మున్సిపల్‌ చైర్మన్‌ ఎన్నికలో ఉద్రిక్తత నెలకొంది. చైర్మన్‌ ఎన్నిక రేపటికి వాయిదా పడింది. ఎన్నిక సమయంలో టీడీపీ-వైసీపీ సభ్యులు ఘర్షణకు దిగారు. హాల్లో ఫర్నిచర్‌ను టీడీపీ కౌన్సిలర్లు ధ్వంసం చేశారు. మినిట్స్‌ పుస్తకాలను లాక్కెళ్లారు. అడ్డుకునేందుకు వైసీపీ సభ్యులు ప్రయత్నించారు. దీంతో అక్కడ ఉద్రిక్త పరిస్థితి ఏర్పడింది. కాగా ఓటమి భయంతోనే టీడీపీ ఎన్నిక వాయిదా వేయించిందని వైసీపీ సభ్యులు ఆరోపించారు.

 

 

Pages

Don't Miss

Subscribe to RSS - కడప