కర్ణాటక

14:59 - April 19, 2018

ఢిల్లీ : కర్నాటక రాష్ట్ర ఎన్నికల ఫలితాలు దేశ రాజకీయాలపై ప్రభావం చూపనున్నాయి. కర్నాటకలో సాధారణ ఎన్నికలను కాంగ్రెస్, బీజేపీ పార్టీలు ప్రతిష్టాత్మకంగా తీసుకున్నాయి. 2019ఎన్నికలను సెమీ ఫైనల్ గా భావిస్తున్న జాతీయ పార్టీలు కర్నాటక పీఠాన్ని దక్కించుకునేందుకు సర్వశక్తులూ ఒడ్డుతున్నాయి. కర్నాటక రాజకీయాల్లో కింగ్‌ మేకర్‌గా వ్యవహరిస్తున్న జేడీయస్ పార్టీ మరోసారి అధికారం కోసం పావులు కదుపుతోంది. కర్నాటక ఎన్నికల రణరంగంపై 10టీవీ స్పెషల్‌ స్టోరీ...

కర్నాటకలో ఎన్నికలు సమీపిస్తున్న కొద్దీ రాజకీయ నాయకుల్లో అలజడి రెట్టింపవుతోంది. నువ్వా- నేనా అన్న రీతిలో పోటా పోటీగా ప్రచారం సాగిస్తున్నారు. ఇప్పటికే టికెట్లు దక్కించుకున్న అభ్యర్థులు ముమ్మరంగా ప్రచారం సాగిస్తుంటే.. మరికొందరు ఆశావాహులు టికెట్ల కోసం ఎదురు చూస్తున్నారు. బీజేపీ, కాంగ్రెస్ ప్రకటించిన మొదటి విడత జాబితాలో టికెట్‌ దక్కనివారిలో కొందరు అసమ్మతిని వెళ్లగక్కుతుంటే... మరికొందరు పార్టీ ఆఫీసులోని ఫర్నీచర్ ధ్వంసం చేసి, దిష్టి బొమ్మలను తగలబెడుతున్నారు.. ఈ సారి కాంగ్రెస్, బీజేపీల్లో దేనికీ సంపూర్ణ మెజారిటీ రాకపోవచ్చని రాజకీయ విశ్లేషకులు అభిప్రాయపడుతున్నారు. అధికార పీఠం దక్కించుకోవడంలో జేడియస్ పార్టీ కింగ్ మేకర్ పాత్ర పోషించే ఆవకాశం కనబడుతోందని అంటున్నారు.

కన్నడలో మే12న పోలింగ్‌ జరుగనుంది. అదేనెల 15న ఫలితాలు వెలువడనున్నాయి. మొత్తానికి కర్నాటక పీఠం కాషాయానిదా లేక కాంగ్రెస్‌దా అన్నది ఫలితాలు వెలుడితేగాని తేలదు. ఆరున్నర కోట్ల జనాభాలో.. నాలుగు కోట్ల తొంభై ఆరు వేల మంది ఓటర్లకు గాను... 56,696 పోలింగ్ కేంద్రాలను ఏర్పాటు చేసింది ఎన్నికల కమిషన్. 224 శాసన సభ స్థానాల్లో ఎన్నికలు జరగనున్నాయి. నూటా పదమూడు స్థానాల్లో విజయం సాధించిన పార్టీకే అధికారం దక్కనుంది. కర్నాటకలో లింగాయితులు ఇరవై ఏడు శాతం ఉన్నారు. వీరి మద్ధతు ఏపార్టీకి ఉంటే వారిదే విజయం.

ఈ సారి అన్ని ప్రధాన పార్టీల అగ్రనేతలు తమ వారసులను రంగంలోకి దించేందుకు సిద్ధమౌతున్నట్లు తెలుస్తోంది.. నామినేషన్ల దాఖలుకు 24వతేది ఆఖరు కావడంతో కాంగ్రెస్, బీజేపీ, జేడియస్‌లు అభ్యర్థుల ఎంపికపై కరత్తును ముమ్మరం చేశాయి. మైసూర్ జిల్లాలోని వరుణ నియోజక వర్గంలో పోటీ ఆసక్తికరంగా మారనున్నాయి. వరుణ నియోజక వర్గం నుంచి ముఖ్యమంత్రి సిద్దారామయ్య కుమారుడు యతీంద్ర, బిజేపి ముఖ్యమంత్రి అభ్యర్థి బీ.ఎస్.యడ్యూరప్ప కుమారుడు విజయేంద్ర ఇక్కడి నుంచే పోటికి దిగనున్నారు. 

మరోవైపు రాజకీయ పార్టీల్లో  కుటుంబ పాలనపైనా విమర్శలు వెల్లువెత్తుతున్నాయి. కర్నాటక రాజకీయాల్లో చక్రం తిప్పతున్న  జేడియస్‌లో కుటుంబ పాలన కొనసాగుతోందంటూ.. ఆ పార్టీ నేతలే అసంతృప్తిని వెళ్ళగక్కుతున్నారు.. ముఖ్యంగా ఆ పార్టీ అధ్యక్షుడు దేవేగౌడ తన మొదటి కుమారుడు, మాజీ ముఖ్యమంత్రి అయిన కుమారస్వామి గౌడకే ఎక్కువ ప్రాధాన్యత ఇస్తున్నారు. ఇక రెండో కుమారుడైన రేవణ్ణగౌడ కుమారుడు ప్రజ్వల్ గౌడకు ప్రజల్లో మంచి ఫాలోయింగ్ ఉన్నందున ఈసారి ప్రజ్వల్ గౌడకు ఎమ్మెల్యేగా పోటీ  చేసేందుకు అవకాశం ఇవ్వాలని కొందరు నాయకులు కోరుతున్నారు. ఒక వేళ ప్రజ్వల్ గౌడ ఎమ్మెల్యేగా విజయం సాధిస్తే ముఖ్యమంత్రి పదవి అడుగుతారన్న ఆలోచనతో... కుమారస్వామి గౌడ సిఎం పదవికి ఎసరుపెట్టకుండా ముందుచూపుతోనే మనుమడైన ప్రజ్వల్ గౌడను ఈసారి పార్లమెంట్  అభ్యర్థిగా ప్రకటించి.. పార్టీలో అసమ్మతితోపాటు..  కుటుంబ కలహాలకు కూడా అడ్డుకట్ట వేశారని విశ్లేషకులు అభిప్రాపడుతున్నారు.

ఇక సుమారు వంద స్థానాల్లో లింగాయితులు గెలుపును శాసించగలరన్న విషయం గత ఎన్నికల్లో రుజువైంది.. వీరి తర్వాత స్ధానం ఎస్సీ. ఎస్టీ సామాజిక వర్గాలదే. ఇరవైఐదు శాతం ఉన్న  ఎస్సీ, ఎస్టీలు ప్రధాన పార్టీల జయాపజయాలను  ప్రభావితం చేయనున్నారు. దీంతో  బీజేపీ ఎస్టీలకు  ఉప ముఖ్యమంత్రి పదవి ఇస్తామని ప్రకటించింది. అందులో భాగంగానే బళ్లారి జిల్లా మొలకాల్మూరు నియోజక వర్గం నుంచి శ్రీరాములును దింపి... ఆ వర్గం ఓటర్లకు గాలం వేస్తోంది.. కానీ..  సిట్టింగ్ ఎమ్మెల్యే తిప్పేస్వామిని కాదని.. బళ్ళారి ఎంపిగా ఉన్న శ్రీరాములుకు టికెట్టు ఇవ్వడంపై తీవ్ర అసంతృప్తి వ్యక్తమవుతోంది.  ప్రచారం చేస్తున్న ఎం.పి శ్రీరాములుపై చీపురులు, చెప్పులతో దాడులు కూడా జరిగాయి. ఇక కాంగ్రెస్‌లో పదకొండుమంది సిట్టింగులకు చోటు దక్కలేదు. జాబితాలో  పేర్లు లేని నేతలు ఆగ్రహంతో విధ్వంసం సృష్టించారు. బెంగళూరులోని కర్నాటక కాంగ్రెస్ కార్యాలయంలో కార్యకర్తలు ఫర్నీచర్‌ ధ్వంసం చేశారు. కర్నాటకలో ఎక్కువ భాగం  ఆంధ్రప్రదేశ్‌ సరిహద్దులో ఉండటంతో...  తెలుగువారి ఓట్లు సైతం కర్నాటక ఎన్నికల్లో  కీలకంగా మారనున్నాయి. ఈ నేపథ్యంలో ఆంధ్ర ప్రదేశ్‌కు ప్రత్యేక హోదా అంశాన్ని అస్ర్తంగా చేసుకుని తెలుగు ఓటర్లకు గాలం వేయాలని చూస్తోంది కాంగ్రెస్. కాగా.. బీజేపీ మాత్రం  కర్నాటక  అభివృద్దికి భారీగా నిధులు కేటాయిచామన్న అంశాన్ని ప్రచారం చేయాలని చూస్తోంది.  మొత్తానికి హోరాహోరీగా సాగుతున్న కర్నాటకలో అధికారపీఠం ఎవరిదన్న చర్చ జోరుగా సాగుతోంది. అది తెలియాలంటే మే 15 వరకు వేచి చూడాల్సిందే.

10:01 - April 17, 2018

అమరావతి : ఏపీకి ప్రత్యేక హోదా తమ వంతు పోరాటం చేస్తామన్న తెలుగువారు కేంద్ర ప్రభుత్వాన్ని హెచ్చరించారు. ప్రత్యేక హోదా ఇవ్వకుంటే కర్నాటక ఎన్నికల్లో తెలుగువారి సత్తా చూపిస్తామని హెచ్చరికలు జారీ చేశారు. ఏపీకి ప్రత్యేక హోదా ఇచ్చి తీరాలని తెలుగువారు డిమాండ్ చేస్తున్నారు. తెలుగు వారు ఎక్కడ వున్నా వారి రాష్ట్ర శ్రేయస్సును మరచిపోరనే వాస్తవం ఈ ఘటనతో మరోసారి రుజువయింది. తాము వున్నది పొరుగు రాష్ట్రమైన కర్ణాటకలోనైనా ఏపీకి ప్రత్యేక హోదా ఇవ్వాలని దానికోసం సీఎం చంద్రబాబుకు తమ మద్ధతును తెలిపారు కర్ణాటకలోని తెలుగువారు. ప్రత్యేక హోదా కోసం సీఎం ముఖ్యమంత్రి చంద్రబాబు చేస్తున్న పోరాటంలో కర్ణాటకలో ఉన్న తెలుగువారు మద్దతిచ్చారు. సచివాలయంలో చంద్రబాబును కలిసి సంఘీభావం తెలిపారు. 

15:42 - April 13, 2018

కర్ణాటక : కర్నాటక అసెంబ్లీ ఎన్నికల్లో మాజీ ప్రధాని దేవెగౌడ నేతృత్వంలోని జేడీఎస్ తరుపున ప్రచారం చేస్తానని తెలంగాణ ముఖ్యమంత్రి కేసీఆర్‌ ప్రకటించారు. కాంగ్రెస్‌, బీజేపీలకు వ్యతిరేకంగా ప్రత్యామ్నాయ రాజకీయ కూటమి ఏర్పాటుపై దేవెగౌదతో చర్చలు జరిపిన కేసీఆర్‌.. ఎన్నికల ప్రచారం గురించిన మీడియా అడిగిన ప్రశ్నలపై స్పందించారు. జేడీఎస్‌ ఎక్కడ కోరుకుంటే అక్కడ ప్రచారం చేస్తానని చెప్పారు. హైదరాబాద్ సంస్థానం నుంచి వేరుపడి కర్నాటకలో ప్రచారం చేయమన్నా చేస్తానన్నారు.

కాంగ్రెస్, బీజేపీపై విరుచుకుపడ్డ కేసీఆర్..
దేశంలో కాంగ్రెస్‌, బీజేపీలకు వ్యతిరేకంగా ప్రత్యామ్నాయ రాజకీయ కూటమి ఏర్పాటు చేయాల్సిన అవసరం వచ్చిందని తెలంగాణ ముఖ్యమంత్రి కేసీఆర్‌ చెప్పారు. దేశాన్ని 65 సంవత్సరాలకుపైగా పాలించిన కాంగ్రెస్‌, బీజేపీలు ప్రజా సమస్యల పరిష్కారంలో ఘోరంగా విఫలమయ్యాయని విమర్శించారు. ఫెడరల్‌ ఫ్రంట్‌ ఏర్పాటుపై బెంగళూరులో జేడీఎస్‌ అధినేత, మాజీ ప్రధాని దేవెగౌడతో చర్చలు జరిపిన కేసీఆర్‌.. కాంగ్రెస్, బీజేపీపై విరుచుకుపడ్డారు. రాష్ట్రాల మధ్య సాగునీటి సమస్యలు తలెత్తడానికి కేంద్ర ప్రభుత్వ విధానాలే కారణమని కేసీఆర్‌ విమర్శించారు. ప్రజలు, రైతులు ఎదుర్కొంటున్న సమస్యల పరిష్కారం కోసం ఏర్పాటయ్యే ఫెడరల్‌ ఫ్రంట్‌లో ఏ రాజకీయ పార్టీలైనా చేరవచ్చని మాజీ ప్రధాని దెవెగౌడ ఆహ్వానించారు. 

19:57 - March 27, 2018

కర్ణాటకలో ఎన్నికల నగారా మోగింది. రాష్ట్రంలోని మొత్తం 224 అసెంబ్లీ స్థానాలకు ఎన్నికలు జరుగనున్నాయి. కర్నాటకలో 4.96 కోట్ల మంది ఓటర్లకు గాను..56,696 పోలింగ్ కేంద్రాలను ఏర్పాటుచేశారు. పోలింగ్ కేంద్రాల వద్ద భారీగా బందోబస్తు ఏర్పాటుచేశారు. దీంతో నేటి నుండే ఎన్నికల నియామావళి అమలులోకి రానుంది. మే 12న పోలింగ్, 15న ఓట్ల కౌంటింగ్ జరుగనుంది. ఈ నేపథ్యంలో కర్ణాటక పీఠం ఎవరిని వరించనుంది? కాషాయానికా? కాంగ్రెస్ కా? అనే విషయంపై ఉత్కంఠ నెలకొంది. ఈ అంశంపై చర్చను చేపట్టింది 10టీవీ. ఈచర్చలో ప్రముఖ రాజకీయ విశ్లేషకులు తెలకపల్లి రవి, కాంగ్రెస్ అధికార ప్రతినిధి అద్దంకి దయాకర్, బీజేపీ ప్రధానకార్యదర్శి ప్రేమేందర్ రెడ్డి పాల్గొన్నారు. 

16:56 - March 27, 2018

కర్ణాటక: బిజెపి అధ్యక్షుడు అమిత్‌ షా ప్రెస్‌ కాన్ఫరెన్స్‌లో నోరు జారారు. కర్ణాటక మాజీ సిఎం యడ్యూరప్పను అవినీతి పరుడిగా పేర్కొంటూ వ్యాఖ్యానించారు. సిద్ధరామయ్య ప్రభుత్వాన్ని టార్గెట్‌ చేస్తూ మాట్లాడుతున్న షా...ఇప్పటిదాకా తాను గమనించిన ప్రభుత్వాల్లో యడ్యూరప్ప ప్రభుత్వమే అత్యంత అవినీతిమయమైందని చెప్పారు. ఆ సమయంలో షా పక్కనే ఉన్న యడ్యూరప్ప కంగుతిన్నారు. వెంటనే పక్కనున్న మరోనేత షా చెవిలో ఈ విషయం చెప్పగా...యడ్యూరప్ప కాదు...సిద్ధరామయ్య అని సవరించుకున్నారు. అమిత్‌ షా నిజమే మాట్లాడారంటూ కాంగ్రెస్‌ ఆ వీడియోను సోషల్‌ మీడియాలో పోస్ట్‌ చేసింది.

06:15 - November 7, 2017

హైదరాబాద్:సెల్ఫీ సరదా ఓ ఐదుగురి ప్రాణాలను బలితీసుకుంది. హైదరాబాద్‌ సుల్తాన్‌ బజార్‌కు చెందిన ప్రకాష్‌ కుటుంబం కర్నాటకు వెళ్లింది. గంగావతి దగ్గర చెరువులో స్నానానికంటూ ఆరుగురు దిగారు. సెల్ఫీ తీసుకుంటుండగా ప్రమాదవశాత్తూ చెరువులో పడిపోయారు. ఈ ప్రమాదంలో ఐదుగురు చనిపోయారు. మృతులను పవిత్ర, పావని, పౌర్ణిక, ఆశిష్‌ ,ఘురాజన్‌గా గుర్తించారు. ఐదుగురి మృతితో సుల్తాన్‌బజార్‌లో విషాదం నెలకొంది.

21:49 - October 27, 2017

కర్నాటక : డీఎస్పీ గణపతి ఆత్మహత్య ఘటనలో కర్ణాటక మంత్రి కేజే జార్జ్‌పై కేసు నమోదైంది. గణపతి ఆత్మహత్య చేసుకునేలా ప్రేరేపించారన్న ఆరోపణలతో జార్జ్‌తో పాటు మరో ఇద్దరు సీనియర్‌ పోలీసులపై సీబీఐ కేసు నమోదు చేసింది. కొడగు జిల్లా డిఎస్పీగా విధులు నిర్వహిస్తున్న గణపతి గత ఏడాది జూలైలో ఆత్మహత్య చేసుకున్నారు. తనను మంత్రి, ఇద్దరు సీనియర్‌ అధికారులు వేధిస్తున్నారని గణపతి చెప్పారు. ఈ ఘటనపై మంత్రితో పాటు ఇద్దరు పోలీసు అధికారులపై కేసు నమోదు చేశారు. గణపతి హత్యతో వీరికి సంబంధం లేదని పోలీసులు కేసు మూసివేశారు. దీంతో గణపతి కుటుంబం సుప్రీంకోర్టును ఆశ్రయించింది. ఈ కేసును సిబిఐకి అప్పగించిన సుప్రీంకోర్టు 3 నెలల్లోగా నివేదిక అందించాలని ఆదేశించింది. దీనిపై విచారణ జరిపిన సిబిఐ అధికారులు జార్జిపై చార్జిషీటు దాఖలు చేశారు.

 

15:57 - October 11, 2017

అనంతపురం : జిల్లాలోని అగలి మండలంలో ప్రవహించే స్వర్ణముఖీ నదీ జలాల విషయంలో.. మరోసారి ఆంధ్రా, కర్ణాటక రైతుల మధ్య వివాదం చెలరేగింది. గత వారం రోజుల నుంచి కురుస్తున్న భారీ వర్షాలకు స్వర్ణముఖి నది ఉధృతంగా ప్రవహిస్తోంది. భారీగా నీరు ప్రవహించడంతో ఆంధ్రా చెరువులకు వచ్చే వంక కోతకు గురైంది. దీంతో అగలి మండల రైతులు వంకకు మరమ్మతులు చేప్టట్టడానికి కర్ణాటక సరిహద్దు ప్రాంతానికి వెళ్లారు. విషయం తెలుసుకున్న కర్ణాటక రైతులు అక్కడికి చేరుకొని.. మరమ్మతులు చేపట్టకూడదని ఆంధ్రా రైతులతో వాగ్వాదానికి దిగారు. కర్ణాటక రాష్ట్ర పోలీసులు అక్కడికి  చేరుకొని ఇరు రాష్ట్రాల రైతులను వారించారు. గతంలోనూ ఈ విషయమై రెండు రాష్ట్రాల మధ్య గొడవలు జరిగాయి.

 

20:06 - October 5, 2017

బెంగళూరు : బెంగళూరులో ఇవాళ మధ్యాహ్నం భారీ వర్షం కురియడంతో జనజీవనం స్తంభించింది. వరద నీటితో రోడ్లు నదులను తలపించాయి. వందలాది వాహనాలు రోడ్లపై నిలిచిపోవడంతో ట్రాఫిక్‌ జామ్‌ అయింది. నాళాలు పొంగి పొర్లడంతో లోతట్టు ప్రాంతాలు జలమయమయ్యాయి. మధ్యాహ్నం ఒంటిగంట నుంచి 2 గంటల మధ్య 42 మిల్లీమీటర్ల వర్షపాతం నమోదైంది. భారీవర్షాలకు 4 భారీ వృక్షాలు కూలిపోయినట్లు 'బృహత్ బెంగళూరు మహానగర పాలికె' తెలిపింది. ప్రజలు అప్రమత్తంగా ఉండాలని, సురక్షిత ప్రాంతాలకు తరలివెళ్లాలని పలు సూచనలు చేసింది. మరోవైపు కర్ణాటకలో మాండ్య జిల్లాలో బుధవారం కురిసిన భారీ వర్షానికి చెరకు తదితర పంటలు నీటిలో కొట్టుకుపోయాయి.

 

15:36 - September 21, 2017

బెంగళూరు : కర్ణాటక మాజీ ముఖ్యమంత్రి ఎస్.ఎం.కృష్ణ అల్లుడు...కాఫీ డే కంపెనీ యజమాని వీజీ సిద్ధార్థ ఇళ్లపై ఐటి దాడులు నిర్వహించింది. బెంగళూరు విఠల్‌ మాల్యా రోడ్డులోని కేఫ్‌ చైన్‌ కేఫ్‌ కాఫీ డే ప్రధాన కార్యాలయంలో కూడా ఐటి సోదాలు చేస్తోంది. బెంగళూరుతో పాటు ముంబై, చెన్నై, చిక్‌మంగళూరులోని సిద్ధార్థకు సంబంధించిన 20 చోట్ల ఏకకాలంలో ఐటి తనిఖీలు చేపట్టింది. చెన్నైలో కృష్ణ కుటుంబానికి సంబంధించిన కంపెనీ సికల్‌ లాజిస్టిక్ ప్రయివేట్‌ లిమిటెడ్‌లో కూడా సోదాలు నిర్వహించింది. 46 ఏళ్ల పాటు కాంగ్రెస్‌లో కొనసాగిన ఎస్‌ఎమ్‌ కృష్ణ ఇటీవలే బిజెపిలో చేరారు. ఆయన గతంలో కర్ణాటక ముఖ్యమంత్రిగా, విదేశాంగ శాఖ మంత్రిగా, మహారాష్ట్ర గవర్నర్‌గా బాధ్యతలు నిర్వర్తించారు

Pages

Don't Miss

Subscribe to RSS - కర్ణాటక