కష్టాలు

08:17 - May 4, 2018

ప్రకాశం : వాతావరణం అనుకూలించకపోయినా  భయపడలేదు... వరుణుడు కరుణించకపోయినా అధైర్యపడలేదు... అన్నీంటిని తట్టుకుని నిలబడిన అన్నదాతను  మార్కెట్ కష్టాలు కంటతడి పెట్టిస్తున్నాయి. చేతికి అందిన పంటను అమ్ముకోలేక రైతులు నానా అవస్థలు పడుతున్నారు. ప్రకాశం జిల్లాలో కందిరైతుల కష్టాలపై టెన్‌టీవీ ఫోకస్‌..
అన్నదాలు కష్టాలపాలు 
ప్రభుత్వ ముందుచూపులేమి, అధికారుల నిర్లక్ష్యం.. అన్నదాలను కష్టాలపాలు చేస్తున్నాయి. ఆరుగాలం శ్రమించి పంటను అమ్ముకుందామనే సరికి మార్కెట్‌ గేట్లు మూతపడ్డాయి. ప్రకాశంజిల్లా కనికగిరిలో కందిరైతులు తీవ్రంగా నష్టపోతున్నారు. ప్రకాశం జిల్లాలో 35 వేల మెట్రిక్ టన్నుల మేరకు కందుల సేకరణకు ప్రభుత్వం అలాట్ మెంట్ ఇచ్చింది. 21 వేల మెట్రిక్ టన్నులు కొనుగోలు చేసింది. వీటిలో 50వేల మెట్రిక్ టన్నులు పర్చూరు గోడౌన్ లోను 10 వేల మెట్రిక్ టన్నులు సేకరణ కేంద్రాల్లోనూ, సొసైటీ కేంద్రాల్లోనూ నిల్వ ఉంచింది. గోడౌన్లూ ఖాళీలేవనే పేరుతో 14వేల మెట్రిక్ టన్నులు సేకరించకుండానే కొనుగోళ్లు ఆపేసింది. దీంతో కందిరైతులు పంటను తీసుకొచ్చి గోడౌన్ల ముందు పడిగాపులు పడుతున్నారు. 
కందులను కొనుగోలు చేయాలి : అన్నదాతలు 
కనిగిరి నియోజకవర్గ పరిధిలో 6 మండలాల్లో కందులు కొనుగోలు కేంద్రాలు ప్రారంభించినప్పుటికీ ..  ఇప్పటి వరకు 20 శాతం కూడా కొనుగోలు చేయలేకపోయింది. వారం రోజులుగా కనిగిరి మార్కెట్ యార్డ్‌లో 4 వేల టన్నుల కందుల నిల్వలు పోగుపడ్డాయి. కొనుగోళ్లు ఆగిపోవడంతో రైతులు ఇలా గోడౌన్‌ బయటే సరుకును ఉంచేశారు. చేతికి వచ్చి పంట రైతు నోటికి అందకుండా పోయిందని కందిరైతులు ఆవేదన పడుతున్నారు. ఇప్పటికై ప్రభుత్వం, మార్కెటింగ్‌శాఖ అధికారులు కల్పించుకుని కందులను కొనుగోలు చేయాలని అన్నదాతలు కోరుతున్నారు.  

 

13:42 - April 24, 2018

ఆదిలాబాద్‌ : జిల్లాలోని ఏజెన్సీప్రాంతంలో తాగునీటి సమస్య తీవ్రమైంది. వేసవి ప్రారంభంలోనే... గిరిజనానికి చెలిమల నీరే దిక్కైంది.  గుక్కెడు మంచినీటి కోసం గిరి గ్రామాలు... పుట్టెడు కష్టాలు పడుతున్నాయి.  బిందెడు నీటికోసం మహిళలు మైళ్లదూరం నడవాల్సిన దుస్థితి నెలకొంది. ఆదిలాబాద్‌ ఏజెన్సీ ప్రజల నీటికష్టాలపై 10టీవీ స్పెషల్‌ స్టోరీ...

ఉమ్మడి ఆదిలాబాద్‌ జిల్లా పచ్చని అడవి అందాలకు నెలవు. ఈ జిల్లా కోనసీమను తలపిస్తుంది.  ప్రాణహిత, పెనుగంగా, పెద్దవాగు లాంటి నదులు ఉన్నాయి. ప్రజల తాగునీరు, సాగునీరు కోసం ప్రభుత్వం కోట్ల రూపాయలు ఖర్చు చేస్తోంది. అయినా కుమ్రంభీం ఆసిఫాబాద్‌ జిల్లా సిర్పూరు నియోజకవర్గ ప్రజలకు మాత్రం నీటికష్టాలు తప్పడం లేదు. ఎన్నో నదులున్నా  ప్రజల తాగునీటికి తిప్పలు తప్పడం లేదు. 

వేసవికాలం ఇప్పుడిప్పుడే మొదలైంది. కానీ ఏజెన్సీ ప్రాంతం మాత్రం తాగునీటితో అల్లాడుతోంది. బెజ్జూరు మండల కేంద్రంతోపాటు జైహింద్‌పూర్‌, తలాయి, కుష్నేపల్లిలో నీటికష్టాలు వర్ణనాతీతం. గుక్కెడు నీటికోసం ప్రజలు వాగులలో సెలిమలు తోడుకుని తెచ్చుకుంటున్నారు. కౌటాల మండలం పాత కన్నెపల్లిలో గ్రామం మొత్తానికి ఒకే వ్యవసాయ బావి దిక్కైంది. గ్రామంతా ఆ బావి నుంచే తాగునీరు తెచ్చుకుంటున్నారు. మూరుమూల మండలమైన దహేగాంలోని మొట్లగూడ, రాంపూర్‌ గ్రామప్రజల పరిస్థితి అయితే మరీ దారుణంగా తయారైంది. మంచినీటి కోసం మహిళలు 3 నుంచి 5 కిలోమీటర్లు నడిచి వెళ్లి పెద్దవాగులో చెలిమలు తోడుకుని నీరు తెచ్చుకుంటూ దాహం తీర్చుకుంటున్నారు. 
 
మార్చి మాసం నుంచే ఏజెన్సీ ప్రాంతంలో తాగునీటి ఇక్కట్లు మొదలయ్యాయి. ఈ గ్రామాల్లో బోర్లు వేసినా పనిచేయడం లేదు.  వాగులో చెలిమల ద్వారా తెచ్చుకున్న నీటిని తాగి తరచూ రోగాల బారిన పడుతున్నారు. పలువురు చనిపోయారు కూడా. తాగునీటి సమస్యను పరిష్కరించాలని స్థానిక అధికారుల దృష్టికి గ్రామస్తులు పలుమార్లు తీసుకెళ్లారు. అయినా వారి నుంచి ఎలాంటి స్పందన లేదు. పరిస్థితి ఇప్పుడే ఇలా ఉంటే రానున్న రోజుల్లో మరెలా ఉంటుందో తలచుకుని గిరిజనులు ఆందోళన వ్యక్తం చేస్తున్నారు.

బోథ్‌ నియోజకవర్గంలోనూ తాగునీటికి ప్రజలు అల్లాడుతున్నారు. భూగర్భ జలాలు అడుగంటిపోయి గుక్కెడు నీరు లేక అవస్థలు పడుతున్నారు. ప్రతి వేసవికాలంలోనూ ఇక్కడ నీటిఎద్దడి ఉంటోంది.  బోర్లు ఉన్నా.. అందులో నీరులేక పనిచేయవు.  పొచ్చెర్లలో ఎడ్లబండ్ల ద్వారా శివారులోని బావి నుంచి నీటిని తెచ్చుకుంటున్నారు. చుట్టుపక్కల గ్రామాల్లోనూ ఇదే పరిస్థితి.

ఆదిలాబాద్‌ నియోజకవర్గంలోనూ తాగునీటి ఎద్దడి తీవ్రంగా ఉంది.  జిల్లా కేంద్రానికి కేవలం 15 కిలోమీటర్ల దూరంలోని ఖండాల, ఖానాపూర్‌ గ్రామాల్లో చుక్కనీరు దొరకని పరిస్థితి నెలకొంది. తాగునీటి కోసం ప్రజలు  గుట్టలు దిగి మరీ తమ ప్రాణాలమీదకు తెచ్చుకుంటున్నారు. మాంగ్లి, కేబీ కాలనీ, ధర్మూగూడలో మంచినీటి కటకట ఏర్పడింది.  మూడు నాలుగు కిలోమీటర్లు వెళ్లి నీరు తెచ్చుకోవాల్సిన పరిస్థితి దాపురించింది. ఉట్నూరు ఏజెన్సీ ప్రాంతంలోనూ నీటి ఎద్దడి ఇప్పటికే మొదలైంది.

ఎండ తీవ్రత రోజురోజుకు పెరుగుతోంది. భూగర్భ జలాలు అడుగంటి పోతున్నాయి. గుక్కెడు నీటికోసం మనుషులే అల్లాడుతోంటే.. ఇక మూగజీవాల పరిస్థితి ఎలా ఉంటుందో ఊహించవచ్చు. వాగులు, కుంటలు ఎండిపోవడంతో మూగజీవాలు నీరులేక అల్లాడుతున్నాయి. కొంతమంది వాటిని అమ్మేస్తున్నారు. గ్రామాల్లో నీటితొట్టెలు నిర్మించినా వాటిలోనీరు లేకపోవడంతో పశువుల దాహార్తి తీరడం లేదు.  

తాగునీటి కష్టాలపై ప్రజలు పలుమార్లు అధికారులకు విన్నవించారు. వాటర్‌ ట్యాంకర్ల ద్వారా వేసవికాలం మంచినీటి సరఫరా చేయాలని కోరారు. అయినా అధికారుల్లో మాత్రం చలనం లేదు. ఇప్పటికైనా ఉన్నతాధికారులు స్పందించి తమ దాహార్తిని తీర్చాలని ప్రజలు కోరుతున్నారు.

13:35 - April 24, 2018

ప్రకాశం : జిల్లాలో భానుడు ప్రతాపం చూపుతుండడంతో తాగునీటి కష్టాలు మొదలయ్యాయి. గుక్కెడు మంచినీరు దొరకక ప్రజలు అల్లాడుతున్నారు. బావులు, చెలిమేల వద్ద బారులు తీరుతున్నారు. పట్టణాల్లోనూ తాగునీటి కష్టాలు తప్పడం లేదు. దీంతో మహిళలకు నీటి ట్యాంకర్ల దగ్గర బిందెల యుద్ధం తప్పడం లేదు. 

వేసవి ప్రారంభంలోనే ప్రకాశం జిల్లాలో తాగునీటి సమస్య తీవ్రరూపం దాల్చింది. వర్షాభావానికి తోడు, ముందు చూపు లేని అధికారుల నిర్వాకంతో  ప్రజలు తీవ్ర తాగునీటి సమస్యను ఎదుర్కొంటున్నారు.  ఇక గ్రామాల్లోనైతే నీటి కోసం చెలిమెలు, బావుల వద్ద జనం బారులు తీరుతున్నారు. 

పట్టణాల్లోనూ ప్రజలు తాగునీటి కోసం ఇబ్బందులు పడుతున్నారు. జిల్లా కేంద్రమైన  ఒంగోలుతోపాటు ఇతర పట్టణాల్లోనూ  మంచినీటి కటకట ఏర్పడింది. చాలా కాలనీలకు మంచినీటి సరఫరానే లేదు. వారానికి ఒకసారి ట్యాంకర్లతో నీటిసరఫరా చేస్తున్నారు. దీంతో ట్యాంకర్‌ రాగానే జనం నీటికోసం ఎగబడుతున్నారు. మహిళలు బిందెలతో యుద్ధమే చేస్తున్నారు. సరిపడ నీరుదొరకక అధికారులపై మహిళలు మండిపడుతున్నారు. పలుచోట్ల ఖాళీ బిందెలతో నిరసన తెలియజేస్తున్నారు. 

ప్రకాశం జిల్లాలో ఉష్ణోగ్రతలు భారీగా పెరిగాయి. సూర్యుడి ప్రతాపానికి జనం విలవిల్లాడిపోతున్నారు. సాధారణం కంటే నాలుగు డిగ్రీల ఉష్ణోగ్రత అధికంగా నమోదవుతోంది.  ఉదయం 10 గంటల నుంచి జనం బయటికి రావలంటే భయపడుతున్నారు. దీంతో రోడ్లు నిర్మానుష్యంగా మారుతున్నాయి. ఇప్పుడే పరిస్థితి ఇలా ఉంటే రానున్న రోజుల్లో మరెలా ఉంటుందోన్న ఆందోళన వ్యక్తమవుతోంది. జిల్లాలో బలంగా వీస్తున్న వడగాలులకు వృద్ధులు చనిపోతున్నారు. 

వర్షాభావ పరిస్థితులతో ప్రకాశం జిల్లాలో భూగర్భ జలాలు పూర్తిగా అడుగంటిపోయాయి. ప్రాజెక్ట్‌లు, చెరువులు, కుంటలు ఎండిపోయాయి.  దీంతో కోట్లు వెచ్చించి నిర్మించిన రక్షిత మంచి నీటి పథకాలు అలంకార ప్రాయంగా మారాయి. అయితే జనం వాటర్‌ అధికారుల తీరుపై ఆగ్రహం వ్యక్తం చేస్తున్నారు. నీటి ఎద్దడిపై ఎలాంటి ముందుచూపు లేకుండా తమను ఇబ్బందులకు గురిచేస్తున్నారని ప్రజలు అంటున్నారు. తమ తాగునీటి కష్టాలు తీర్చాలని కోరుతున్నారు. 

17:57 - April 23, 2018

నిజామాబాద్ : రైతులను సాగు నీటి కష్టాలు వెంటాడుతున్నాయి.. భూగర్భజలాలు పాతాళానికి పడిపోవడంతో సుమారు అరవై వేల బోరు బావులు అడుగంటాయి.. చేతికొచ్చిన పైరు ఎండి పోవడంతో రైతన్న భవితవ్యం ప్రశ్నార్దకంగా మారింది.కొందరు పంటను కాపాడుకునేందుకు విశ్వ ప్రయత్నాలు చేస్తుంటే... మరికొందరు ఎండిన పంటను పశువులకు మేతగా వేస్తున్నారు.. ఇంకొందరు పంటకు నిప్పు పెట్టి.. నిరసన వ్యక్తం చేస్తున్నారు.

ఉమ్మడి నిజామాబాద్ జిల్లాలో సాగునీటి కష్టాలు..
ఉమ్మడి నిజామాబాద్ జిల్లా రైతులు సాగునీటి సమస్యతో తల్లడిల్లుతున్నారు. రబీ సాధారణ సాగు విస్తీర్ణం తొంభై వేల హెక్టార్లు కాగా.. 87 వేల హెక్టార్లలో వరి, 22 వేల హెక్టార్లలో మొక్క జొన్న సాగు చేశారు. బోరు బావులపై ఆధారపడ్డ రైతులకు సాగునీటి కష్టాలతో కంటిమీద కునుకు లేకుండా పోయింది.. అరవై వేలకు పైగా బోరుబావులు అడుగంటాయి.. ఇరవై వేల హెక్టార్లలో వరి పంట పూర్తిగా ఎండిపోయింది. ప్రధానంగా భీంగల్, ఇందల్ వాయి, కమ్మర్ పల్లి, మెర్తాడ్, ధర్పల్లి, వర్ని, జక్రాన్ పల్లి, డిచ్ పల్లి, కామారెడ్డి, ఎల్లారెడ్డి, లింగంపేట మండలాల్లో పరిస్ధితి మరీ దయనీయంగా మారింది.

పసిపాపలా కాపాడిన పైరు కళ్లముందే ఎండుతోంది..
పసిపాపలా కాపాడుకున్న పైరు కళ్ల ముందే ఎండుతుంటే రైతన్నలు ఆందోళన చెందుతున్నారు. పంటను కాపాడుకునేందుకు కొందరు బోర్లమీద బోర్లు వేస్తూ.. భగీరథ ప్రయత్నం చేస్తుంటే.. మరికొందరు ట్యాంకర్ల ద్వారా నీళ్లు పారిస్తున్నారు. ఇంకొందరు పంటకు నిప్పు పెట్టి నిరసన వ్యక్తం చేస్తున్నారు. ఎండిన పంటను చూసి.. ఇందల్ వాయి మండలం లోలం గ్రామానికి చెందిన రైతు గుండె తల్లడిల్లి చేను వద్దే కుప్పకూలి పోయాడు... ఇందలవాయి మండలం గన్నారం మెగ్యానాయక్ తాండాకు చెందిన లక్ష్యణ్, దర్పల్లి మండలం గొవింద్ పల్లి గ్రామానికి చెందిన రాకేష్ ఆత్మహత్యకు పాల్పడ్డారు.

నీటి జాడలేని బోర్లు..
కొండంత ఆశతో సాగుచేసిన రైతుల ఆశలు అడియాశలవుతున్నాయి. పొట్ట దశకు చేరిన వరి పంటలు నీరందక పూర్తిగా ఎండిపోతుంటే అన్నదాతలు అంతులేని ఆవేదనలో మునిగిపోతున్నారు. నెలలోపు వెయ్యికి పైగా బోర్లు తవ్వితే.. సుమారు తొంభై శాతం బోర్లలో చుక్కనీరు పడలేదు. ఒక్క ఇందల్వాయి మండలం బీబీనగర్ తండాలో వంద బోర్లు వేస్తే.. అన్నీ ఎండిపోయాయి.. పంటతోపాటు.. బోర్లకోసం చేసిన అప్పులతో దిక్కుతోచని స్థితిలో పడ్డారు రైతులు. అందరికీ అన్నం పెట్టే అన్నదాతకే కరువొచ్చిందని రైతన్నలు ఆవేదన చెందుతున్నారు..ప్రభుత్వం ఇప్పటికైనా రైతులకు న్యాయం చేయాలని పలువురు కోరుతున్నారు.

15:43 - March 31, 2018

జగిత్యాల : లక్ష్యానికి మించి అదనంగా ప్రసూతిలు చేసి రాష్ట్రంలోనే మొదటి స్థానం సాధించిన ఘనత జిగిత్యాల జిల్లా మెట్‌పల్లి ప్రభుత్వాసుపత్రికి  ఉంది.  ఇది నాణానికి ఒక వైపు మాత్రమే. మరో వైపు తాగడానికి గుక్కెడు మంచి నీళ్లు లేక ఆసుపత్రికి వచ్చే  రోగులు నానా అవస్థలు పడుతున్నారు. వచ్చిన రోగులు, బంధువులు నీళ్ల బాటిళ్లు పట్టుకొని రోడ్లపై తిరుగుతున్నారు.  నీళ్ల కష్టాలను భరించలేక ప్రైవేటు ఆస్పత్రులను  ఆశ్రయించి వేలకు వేలు సమర్పించుకుంటున్నారు. 
మెట్‌పల్లి ప్రభుత్వ ఆసుపత్రిలో తాగునీటి కష్టాలు
జగిత్యాల జిల్లా.. మెట్‌పల్లిలోని 50 పడకల ప్రభుత్వ ఆసుపత్రి లక్ష్యానికి మించి ప్రసూతిలు చేసి రాష్ట్రంలోనే మొదటి స్థానం సాధించింది. అలాంటి ప్రభుత్వ ఆసుపత్రికి నేడు రోగులు వచ్చే పరిస్థితి లేకుండా పోయింది. తాగునీటి కష్టాలతో వచ్చిన రోగులు రోడ్లపై బాటిల్లు పట్టుకుని తిరగాల్సిన పరిస్థితి నెలకొంది. ఆసుపత్రిలో వైద్యులకు మంచి పేరుడంతో.. చికిత్స కోసం చుట్టు పక్కల ప్రాంతాల్లోని జనం ఆసుపత్రికి తరలి వచ్చేవారు. కానీ ఎండలు మండుతుండడంతో ఆసుపత్రి వారు రోగుల దాహాన్నితీర్చలేకపోతుడడంతో రోగులు ఆసుపత్రికి రావడం మానేస్తున్నారు.
తాగునీరు లేక బాలింతలు, సిబ్బంది అవస్థలు
మెట్‌పల్లి ప్రభుత్వాసుపత్రిలో చేతి పంపుతో పాటు నాలుగు బోర్లు ఎండిపోయాయి.  ఒక బోరు నుంచి వచ్చే నీటిని పట్టుకొని రోగులు ఇన్నిరోజులు తమ దాహార్తిని తీర్చుకున్నారు. ప్రస్తుతం ఈ బోరు నుంచి కూడా నీళ్లు రాకపోవడంతో అవస్థలు పడుతున్నారు. వారం రోజుల నుండి రోగులు తాగునీటి కోసం నానా తంటాలు పడుతున్నారు. వీరితో పాటు ఆసుపత్రిలో విధులు నిర్వహించే సిబ్బంది కూడా తాగునీటి కోసం ఇబ్బంది పడుతున్న పరిస్థితి. ఇక బాలింతల పరిస్థితి దారుణంగా తయారైంది. బాలింతలు, వారి బంధువులు మూత్రశాలలకు వెళ్లాలంటే నీరు లేక అవస్థలు పడుతున్నారు.  
ప్రయివేటు ఆస్పత్రులను ఆశ్రయిస్తున్న రోగులు
ప్రభుత్వ ఆసుపత్రిలో నీళ్ల కష్టాలతో రోగులు వైద్యం కోసం ప్రయివేటు ఆసుపత్రులను ఆశ్రయిస్తున్నారు. దొరికిందే ఛాన్సుగా ప్రవేటు ఆసుపత్రులు రోగుల నుంచి వేలకు వేలకు లాగేస్తున్నారు. ప్రజలు ప్రభుత్వ ఆసుపత్రులలో వైద్యం, ప్రసూతులు చేయించుకోవాలని చెప్తున్న ప్రభుత్వం ఆసుపత్రిలో కనీస అవసరాల కల్పనను మాత్రం గాలికి వదిలేసింది. మెట్‌పల్లి ఆసుపత్రిలో తాగునీటి సమస్యను పరిష్కరించడంతో పాటు ఇతర సౌకర్యాలు కల్పించాలని స్థానికులు కోరుతున్నారు. 

 

18:45 - January 20, 2018

హైదరాబాద్ : అడిక్‌మెట్ డివిజన్‌లోని వడ్డెరబస్తీ కష్టాల్లో కూరుకుపోయింది. చాలీచాలని ఇంట్లో.. కనీస సౌకర్యాలు లేక బస్తీవాసులు నానా అవస్థలు పడుతున్నారు. టాయిలెట్ సౌకర్యం లేక బస్తీని ఆనుకుని ఉన్న రైల్వే ట్రాక్ వద్దకు వెళ్లి అనేకమంది చనిపోయిన పరిస్థితి. ప్రభుత్వం పేదల కోసం ఎన్నో సంక్షేమ పథకాలు చేపడుతున్నా అవేమీ మాకు చేరడం లేదని బస్తీవాసులు ఆవేదనతో చెబుతున్నారు. గూడులేని తమకు డబుల్ బెడ్‌రూం ఇళ్లు ఇప్పించడంతో కనీస సౌకర్యాలు కల్పించాలని వేడుకుంటున్నారు. బస్తీలోని పేదల కష్టాలపై 10 టివి గ్రౌండ్ రిపోర్ట్. మరిన్ని వివరాలను వీడియోలో చూద్దాం.. 

12:41 - January 13, 2018

హైదరాబాద్ : పండగపూట ప్రజలకు నగదు కష్టాలు తప్పడంలేదు.. నోట్లరద్దు తర్వాత.. జనాలకు కొన్ని రోజుల తర్వాత పరిస్థితి సద్దుమణిగినట్లు అనిపించినా  పరిస్థితి మళ్ళీ మొదటికొచ్చింది. హైదరాబాద్‌ నగరంలోని ఏటీఎమ్‌లలో ఎక్కడ చూసినా నోక్యాష్‌ బోర్డులే దర్శనమిస్తున్నాయి. నగరంలో నగదు కష్టాలపై టెన్‌టీవీ ప్రత్యేక కథనం..
మళ్ళీ నోట్లపాట్లు 
ప్రజలకు మళ్ళీ నోట్లపాట్లు మొదలయ్యాయి... సంక్రాంతి సమయంలో హైదరాబాద్‌లో  ఏటీఎంలలో నోక్యాష్‌ బోర్డులు కనిపిస్తున్నాయి. దీంతో ప్రజలు తీవ్రంగా ఇబ్బందులు పడుతున్నారు.  బీఈ నిబంధనల ప్రకారం బ్యాంకుల్లో ఎలాగు నగదు పరిమితంగానే వస్తోంది. ఐతే ఏటీఎంలలో డబ్బు వస్తుందనుకుని వెళ్తున్న ప్రజలకు నిరాశే ఎదురవుతోంది. పండక్కు  ఊర్లకు వెళ్ళాలన్నా... షాపింగ్ చేయాలన్నా నగదు కావాలి. కానీ గత రెండు రోజులుగా ఏ ఏటీఎంకు వెళ్ళినా డబ్బులేదని నగర వాసులు ఆవేదన వ్యక్తం చేస్తున్నారు. 
ఏటీఎంలలో నోక్యాష్‌ బోర్డులు
ఏటీఎం కార్డులు పట్టుకుని ఎన్ని చోట్లకు తిరిగినా... నోక్యాష్‌  బోర్డులే దర్శనమిస్తున్నాయని  ప్రజలు ఆగ్రహం వ్యక్తం చేస్తున్నారు. తమ అకౌంట్లలో డబ్బున్నా కూడా పండగ పూట ఇబ్బందులు పడాల్సి వస్తోందని మండిపడుతున్నారు. మా డబ్బు మేము తీసుకోవడానికి కూడా బ్యాంకుల వారిని అడుక్కుంటున్నట్లు ఉందని వారు ఆవేదన వ్యక్తం చేస్తున్నారు. నగదు సమస్య కేవలం హైదరాబాద్‌ నగరంలోనే కాదు.. తెలంగాణ రాష్ర్టవ్యాప్తంగా ఇదే పరిస్థితి నెలకొంది. అన్ని జిల్లాల్లోనూ ఏ ఏటీఎం ముందు చూసినా నో క్యాష్‌ బోర్డులే కనిపిస్తున్నాయి. ఇప్పటికైన ప్రభుత్వం, బ్యాంకు అధికారులు స్పందించి సమస్యను పరిష్కరించాలని ప్రజలు కోరుతున్నారు.

 

17:53 - January 12, 2018
20:16 - January 8, 2018

భద్రత లేని సంచార జీవితం.... గంగిరెద్దు కుటుంబాల కష్టాలు... ఇదే అంశంపై మానవి నిర్వహించిన వేదిక చర్చా కార్యక్రమంలో గంగిరెద్దు కుటుంబ సభ్యులు రజిని, పద్మ పాల్గొని, మాట్లాడారు. తెలంగాణ ప్రభుత్వం అన్ని కుల వృత్తుల వారికి సహాయం చేస్తూ తమ కుల వృత్తిని మానేయాలని ప్రభుత్వం ఒత్తిడి చేస్తోందన్నారు. తమపై లైంగిక దాడులు జరుగుతున్నాయని అన్నారు. షీ టీమ్స్ వల్ల తమకు ఎలాంటి ఉపయోగం లేదన్నారు.  మరిన్ని వివరాలను వీడియోలో చూద్దాం... 

11:46 - December 29, 2017

పశ్చిమ బెంగాల్ : కోల్‌కతాలో తెలుగు విద్యార్థుల కష్టాలు పడుతున్నారు. ఇండియన్ హిస్టరీ కాంగ్రెస్‌కు హాజరయ్యేందుకు తెలుగు రాష్ట్రాల నుంచి 100 మంది విద్యార్థులు వెళ్లారు. వసతి సదుపాయాలు లేకపోవడంతో విద్యార్థులు వరండాల్లో పడుకుంటున్నారు. వసతి ఏర్పాట్లకు జాదవపూర్ యూనివర్సిటీ 1500 రూపాయలు వసూలు చేసింది. ఉత్తర, దక్షిణ భారత విద్యార్థుల మధ్య వివక్ష చూపుతున్నారని తెలుగు విద్యార్థులు ఆగ్రహం వ్యక్తం చేశారు. అక్కడి విద్యార్థులకు రూములు ఇచ్చి తమకు ఇవ్వడం లేదని ఆక్రోశం వెల్లగక్కారు. రెండురోజులుగా రూములు ఇవ్వకుండా సాకులు చెబుతున్నారని ఆరోపించారు. మరిన్ని వివరాలను వీడియోలో చూద్దాం.. 

 

Pages

Don't Miss

Subscribe to RSS - కష్టాలు