కృష్ణా

12:18 - January 20, 2018

కృష్ణా : విజయవాడ దుర్గగుడిలో నూతన ఈవో ప్రతిపాదన చర్చనీయాంశంగా మారింది. దుర్గమ్మ చెంత తాంత్రిక పూజల వ్యవహారం వివాదాలకు దారితీయడంతో ఈవో సూర్యకుమారిపై బదిలీవేటు వేశారు. అయితే ఈ స్థానంలో మళ్లీ ఐఎఎస్‌ను నియమిస్తారా లేదా దేవాదాయ శాఖకు చెందిన రీజినల్ జాయింట్ కమిషనర్ స్థాయి అధికారిని నియమిస్తారన్నదానిపై ఉత్కంఠ నెలకొంది. ఆలయంలో కొన్నేళ్ల నుండి ఈవోగా పనిచేసేవారు వివాదాస్పదంగామారడం, ఆలయంలో ఇష్టానుసారంగా నిర్ణయాలు తీసుకుంటున్న నేపథ్యంలో ఇక నుండి ఈవోల వ్యవహారంలో ప్రభుత్వం ఆచితూచి వ్యవహరించాలని చూస్తోంది.

దేవాదాయ శాఖ ఇన్‌చార్జ్‌గా అనురాధ
ప్రస్తుతం దేవాదాయ శాఖ ఇన్‌చార్జ్‌గా ఉన్న వైవీ అనురాధ దేవాలయానికి కార్యనిర్వహణాధికారిగా బాధ్యతలు చేపట్టారు. మరి కొన్ని రోజుల్లో ప్రభుత్వం కొత్త ఈవోను నియమించాల్సి ఉంది. అయితే దేవస్థానానికి చెందిన కొంత మంది అధికారులు, అర్చకులు తమకు అనుకూలంగా ఉండే అధికారిని ఈవోగా నియమించాలని కోరుతున్నట్లు తెలుస్తోంది. ఇటీవల దుర్గగుడిలో దీర్ఘకాలంగా పని చేసిన ఏఈవో, సూపరింటెండెంట్లు, గుమస్తాలను మొత్తం 23 మందికి పైగా సిబ్బందిని ఇతర ఆలయాలకు బదిలీ చేశారు. వీరిలో కొంత మంది తమ పలుకుబడితో తిరిగి ఆలయానికి వచ్చేందుకు చక్రం తిప్పుతున్నారు. వీరందరూ కలసి సింహాచలం ఈవోగా ఉన్న రామచంద్రమోహన్‌ను దుర్గగుడికి ఈవో నియమించాలని పైస్థాయిలో పట్టుబడుతున్నారని ఆలయంలో చర్చ జరుగుతోంది.

ద్వారకా తిరుమల ఆలయ ఈవో త్రినాథరావు
ఓ వైపు దుర్గగుడి ఈవోగా పలువురి పేర్లు వినబడుతున్నాయి. ముంబయికి చెందిన ఐఆర్‌ఎస్‌ అధికారి కోటేశ్వరమ్మ, ద్వారకా తిరుమల ఆలయ ఈవో త్రినాథరావును తీసుకువచ్చే ప్రయత్నాలు జరుగుతున్నాయి. దుర్గగుడిలో చోటు చేసుకున్న ఘటనలు పునరావృతం కాకుండా ఉండాలంటే ఇంతకు ముందు దుర్గగుడిలో ఈవోగా పనిచేసి మంచి పేరు సంపాదించుకున్న ఈవోల పేర్లను ప్రభుత్వం పరిశీలిస్తోంది. ఎలాంటి వివాదాస్పద నిర్ణయాలు, రాజకీయాల్లేకుండా పరిపాలనా బాధ్యతలను సమర్థవంతంగా నిర్వర్తించే అధికారుల పేర్లను ప్రభుత్వం పరిశీలనలోకి తీసుకోనుంది. ఆలయ ఈవో నియామకంపై తుది నిర్ణయం సీఎం చంద్రబాబుదే కాబట్టి దేవాదాయ శాఖ చైర్మన్‌తో పాటు దేవాదాయశాఖ మంత్రి, ఆలయ అధికారులతో సీఎం సంప్రదింపులు జరపనున్నారు. 

10:52 - January 20, 2018

కృష్ణా : సీపీఎమ్‌ కృష్ణా జిల్లా తూర్పు ప్రథమ మహా సభలు గుడివాడలో ప్రారంభమయ్యాయి. ఈ సందర్భంగా సీపీఎమ్‌ నాయకులు, కార్యకర్తలు పెద్ద ఎత్తున ర్యాలీ నిర్వహించి సభా ప్రాంగణానికి చేరుకున్నారు. మూడు రోజుల పాటు ఈ మహాసభలు జరగనున్నాయి. మరింత సమాచారం కోసం వీడియో క్లిక్ చేయండి.

07:34 - January 20, 2018

కృష్ణా : ఏపీ ఏసీబీ అధికారులు వేగం పెంచారు. అవితినీతి చేపలు, జలగలు, తిమింగలాను వరుసగా పట్టుకుంటున్నారు. అన్ని స్థాయిల్లో అవినీతిని కూకటివేళ్లతో పెకలించేందుకు సోదాలు, దాడులు విస్తృతం చేస్తున్నారు. ఏసీబీ దాడులతో అక్రమార్కులు హడిలిపోతున్నారు. ప్రజలను జలగల్లాపటుకుని పీడించి సంపాదించిన అవినీతి సొమ్ముతో కట్టిన మేడలు, కొనుగోలు చేసిన కార్లు, బంగారు ఆభరణాలను స్వాధీనం చేసుకుంటూ అక్రమార్కులు గుండెల్లో గుబులు పుట్టిస్తున్నారు. గతంలో గ్రామ రెవెన్యూ అధికారులు, గ్రామ పరిపాలనాధికారులు, కార్యదర్శలు వంటి చిన్న చేపలను పట్టుకున్న ఏసీబీ అధికారులు ఇప్పుడు పెద్ద చేపలపై గురిపెట్టారు. కృష్ణా జిల్లాలో గత ఏడాది పట్టుబడ్డ 15 కేసుల్లో 13 లంచం కేసులు. మిగిలిన రెండూ ఆదాయానికి మించిన ఆస్తులు కేసులు.

16 కోట్ల రూపాయలు...
విజయవాడ ప్రభుత్వ పారిశ్రామిక శిక్షణా సంస్థ అధికారి ఇంట్లో ఆదాయానికి మించి 16 కోట్ల రూపాయల ఆస్తులు బయటపడ్డాయంటే అవినీతి ఏ స్థాయిలో ఉందో అర్థం చేసుకోవచ్చు. పొలం నుంచి హెచ్‌టీ విద్యుత్‌ స్తంభం తొలగించేందుకు ఒక రైతు నుంచి అసిస్టెంట్‌ ఇంజినీర్‌ వరప్రసాద్‌ రెండు లక్షల లంచం తీసుకుంటూ ఏసీబీకి పట్టుపడ్డాడు. విజయవాడ నగర పాలక సంస్థలో 18 లక్షల రూపాయల బిల్లు చెల్లించేందుకు కాంట్రాక్టర్‌ నుంచి లక్ష లంచం తీసుకుంటూ ముఖ్య గణాంకాధికారి శివశంకర్‌ ఏసీబీకి అడ్డంగా దొరికిపోయాడు. తూర్పుగోదారి జిల్లాలోని ఓ ఆలయ ఈవో చీమలకొండ సాయి లంచం తీసుకొంటూ ఏసీబీకి చిక్కాడు. అక్రమార్కుల ఆస్తుల స్వాధీనానికి కొత్త చట్టం అమల్లోకి వచ్చిన తర్వాత ఏసీబీ అధికారులు దాడులు విస్తృతంచేసి... అవినీతిపరులు ఆటలు కట్టించేందుకు ప్రయత్నిస్తున్నారు. ఈ విషయంలో ప్రజలను కూడా చైతన్యం చేస్తోంది. 

20:05 - January 19, 2018

కృష్ణా : అభిమానులకు, కార్యకర్తలకు పవన్ ప్రకటన విడుదల చేశారు. పార్టీ నిర్మాణ దశలో ఉందని, అన్ని విషయాల్లో ఆచరణాత్మకంగా అడుగులు వేస్తున్నామని, మనకు ప్రజా సమస్యులు పరిష్కరమే ముఖ్యమని పవన్ ప్రకటనలో పేర్కొన్నాడు. కొందరు కావాలనే పేరు కోసమో మన దృష్టిని మళ్లించడానికో చిరాకు పెట్టడానికి ప్రయత్నాలు చేస్తుంటారని, అలాంటి వారి విషయంలో స్పందించకండని కార్యకర్తలు, అభిమానులకు సూచించారు. పార్టీపై వ్యక్తిగతంగా విమర్శలు చేసినా హుందాగానే ఉందామని, అందరూ ఓర్పుతో ఉండండి, మీ ఆవేశం పార్టీకి హాని అని పవన్ అన్నారు. పార్టీపై, నాపై కొందరు చేస్తున్న విమర్శలకు లెక్కగడుతున్న అవి హద్దు మీరిప్పుడు స్పందిస్తానని పవన్ స్పష్టం చేశారు. మరింత సమాచారం కోసం వీడియో క్లిక్ చేయండి.

16:36 - January 18, 2018

కృష్ణా : విభజన హామీలపై మోడీతో సీఎం చంద్రబాబు చేసుకున్న ఒప్పందాన్ని బయటపెట్టాలని ఏపీ సీపీఎం కార్యదర్శి మధు డిమాండ్ చేశారు. కేంద్రం విభజన హామీలను అమలు చేయకుండా ఏపీ వివక్ష చూపుతుందని ఆయన తెలిపారు.

 

18:48 - January 17, 2018

కృష్ణా : మచిలీపట్నం నౌకాశ్రయం నిర్మాణానికి అవసరమైన భూముల కోసం మూడున్నరేళ్లుగా జాప్యం జరుగుతోంది. 2014 ఎన్నికల్లో టీడీపీ అధికారంలోకి వస్తే ఆరునెలల్లో పోర్టు పనులు ప్రారంభిస్తామని చంద్రబాబు హామీ ఇచ్చినప్పటికీ మూడున్నరేళ్లయినా ఆ హామీ కార్యరూపం దాల్చలేదు. ప్రధానంగా పోర్టు నిర్మాణానికి కావలసిన భూముల సమస్య ప్రభుత్వానికి తలనొప్పిగా మారింది. ప్రస్తుతం వచ్చే ఎన్నికలను దృష్టిలో ఉంచుకున్న చంద్రబాబు పోర్టు నిర్మాణంపై దృష్టిసారించారు. అయితే పోర్టు నిర్మాణం కోసం 2015లోనే దృష్టి సారించినప్పటికీ భూములు ఇచ్చేందుకు రైతులు నిరాకరించారు. దీంతో ప్రభుత్వం భూ సమీకరణకు మొగ్గు చూపింది. దీంతో కొందరు రైతులు భూములు అప్పగించేందుకు ముందుకు వచ్చారు. మరికొన్ని భూములను ప్రభుత్వం బలవంతంగా లాక్కోవడానికి ప్రయత్నించగా ప్రజా సంఘాల ఆందోళనతో వెనక్కి తగ్గింది. దీంతో ప్రభుత్వ విధానాలపై వామపక్షాలు మండిపడుతున్నాయి.

700 ఎకరాలు సేకరించారు...
పోర్టు నిర్మాణానికి అవసరమైన 2వేల 282 ఎకరాల పట్టా భూముల్లో భూ సమీకరణ ద్వారా ఇప్పటివరకు సుమారు 700 ఎకరాలు సేకరించారు. మిగిలిన భూములు సందిగ్ధంలో ఉన్నాయి. ముఖ్యంగా మాగాణి భూములుగా ఉన్న తమ భూములను మెట్ట భూములుగా నమోదు చేసి, తక్కువ లీజు పొందాల్సి వస్తుందన్న అభిప్రాయం రైతుల్లో ఉంది. దీంతో రైతుల్లో నెలకొన్న అనుమానాలను నివృత్తి చేసే దిశగా చంద్రబాబు చర్యలు ప్రారంభించారు. భూ సమీకరణ ద్వారా భూములిచ్చిన రైతులకు పదేళ్లపాటు కౌలు చెల్లిస్తారు. మాగాణికి ఏడాదికి 50వేలు చొప్పున, మెట్ట భూమికి 30వేల చొప్పున ప్రతి ఏడాది 10 శాతం పెంపుతో కౌలు చెల్లించనున్నారు. అయితే మెట్ట భూములుగా గుర్తించిన తమ భూములను మాగాణిగానే పరిగణించాలని రైతులు డిమాండ్‌ చేస్తున్నారు. రైతుల డిమాండ్లను ప్రభుత్వం నెరవేర్చి పోర్టు నిర్మాణాన్ని త్వరితగతిన పూర్తి చేస్తుందో లేదో వేచి చూడాలి. 

18:47 - January 17, 2018

కృష్ణా : విజయవాడ మొగల్రాజపురంలో ఈనెల 19న సత్యమ్ సైంటిఫిక్ వాస్తు కార్యాలయం ప్రారంభోత్సవం కానుంది. ప్రారంభోత్సవానికి మత్రి దేవినేని ఉమ వస్తున్నట్లు వాస్తు నిపుణుడు మామిడి సత్యనారాయణ తెలిపారు. వ్యక్తి సమస్యలను తెలుసుకొని రెమెడీ చేయడమే వాస్తు ముఖ్య ఉద్దేశ్యమని ఆయన అన్నారు. ఇంట్లో లోపాలను గుర్తించి పరిష్కరించడమే కాకుండా కట్టడాల్ని కూల్చకుండా వాస్తు ద్వారా సరిచేయొచ్చని సత్యనారాయణ తెలిపారు.

17:29 - January 16, 2018

కృష్ణా : సంక్రాంతి పండుగ సందర్భంగా ఉభయ గోదావరి జిల్లాలో జోరుగా కోళ్ల పందాలు కొనసాగుతున్నాయి. చివరి రోజైన కనుమ రోజున పందాలు మరింత జోరందుకున్నాయి. జిల్లాలో ఏకంగా వందల కోట్ల రూపాయలు చేతులు మారినట్లు సమాచారం. బరులు ఏర్పాటు చేసి కోళ్లకు కత్తులు కట్టి పందాలు కాస్తున్నా పోలీసులు ఏ మాత్రం పట్టించుకోవడం లేదు. పందాలు ఒకవైపు జరుగుతుండగానే మరోవైపు మద్యం ఏరులై పారింది. రామలింగేశ్వరనగర్ లో కూడా పందాలు జోరుగా సాగాయి. కానీ తాము కత్తులు కట్టి పందాలు నిర్వహించడం లేదని నిర్వాహకులు పేర్కొంటున్నారు. మరింత సమాచారం కోసం వీడియో క్లిక్ చేయండి. 

21:17 - January 15, 2018

కర్నూలు : జిల్లా డోన్‌లో యువకులు కాసేపు వీరంగం సృష్టించారు. మద్యం తాగి... చేతిలో వేట కొడవళ్లతో ప్లైఓవర్ కింద హడావుడి చేశారు. డోన్‌లో విచ్చలవిడిగా మద్యం అమ్మకాలు, బెల్ట్ షాపుల వద్ద ఇలాంటి ఘటనలు తరచు జరుగుతున్నాయని స్థానికులు చెబుతున్నారు. పోలీసులు వచ్చేలోపు ఉడాయించడం షరామామూలేనని అంటున్నారు. ఇలాంటి ఘటనలపై పోలీస్ ఉన్నతాధికారులు జోక్యం చేసుకోవాలని విజ్ఞప్తి చేస్తున్నారు.

15:19 - January 14, 2018

కృష్ణా : సంక్రాంతి పండుగొచ్చేసింది...ఇంకేముంది పందాలకు తెరలేపారు. ముఖ్యంగా నిర్వహించే కోళ్ల పందాలపై నిబంధనలు పాటించాలని సుప్రీం చెప్పడం..పోలీసులు హెచ్చరికలు జారీ చేయడంతో కోళ్ల పందాలపై టెన్షన్ వాతావరణం నెలకొంది. ఎట్టి పరిస్థితుల్లో సుప్రీంకోర్టు ఇచ్చిన సూచనలు పాటించాలని...కోళ్లకు కత్తులు కట్టుకోకుండా ఆడించాలని పోలీసులు సూచించారు. గత నాలుగు రోజుల నుండి ఎలాంటి పందాలు నిర్వహించలేదు. కానీ ఆదివారం మధ్యాహ్నానికి పరిణామాలు మారిపోయాయి. జిల్లా వ్యాప్తంగా బరులు ఏర్పాటు చేసి కోళ్ల పందాలు నిర్వహిస్తుండడం గమనార్హం. పోలీసులు ఎక్కడా అడ్డుకోవడం లేదని తెలుస్తోంది. వైసీపీ..టీడీపీ నేతలు దగ్గరుండి పందాలను నిర్వహిస్తున్నట్లు విమర్శలు వెల్లువెత్తుతున్నాయి. బరుల్లో మద్యం ఏరులై పారుతోంది. కోళ్ల పందాలతో పాటు ఇతర జూదాలు సాగుతున్నాయి. కోళ్లకు కత్తులు కట్టి బరుల్లోకి దింపుతున్నట్లు వేలల్లో బెట్టింగులు కొనసాగుతున్నట్లు తెలుస్తోంది. కృష్ణా జిల్లాలోని జగ్గయ్యపేట మండలం చిల్లకల్లులో జోరుగా కోళ్ల పందాలు కొనసాగుతున్నా పోలీసులు పట్టించుకోవడం లేదు.

తూర్పుగోదావరి..
ఇక తూర్పుగోదావరి జిల్లాలో ఇదే పరిస్థితి నెలకొంది. సంక్రాంతి సంబురాల పేరిట పందాలు నిర్వహిస్తున్నారు. ఈ పందాల్లో పాల్గొనడానికి వివిధ నగరాల నుండి భారీగా జనాలు తరలివస్తున్నారు. కార్లు..ద్విచక్రవాహనాలతో ఆయా ప్రాంతాలు కిక్కిరిసిపోతున్నాయి. ముమ్మిడివరం నియోజవకర్గం ఐ.పోలవరం (మం) మురుమల్లలో జోరుగా కోళ్ల పందాలు కొనసాగుతున్నాయి. ఎమ్మెల్యే బుచ్చిబాబు, ఎమ్మెల్సీ బొడ్డు భాస్కర్ రావు ఆధ్వర్యంలో ఈ పందాలు జరుగుతున్నాయి. వీఐపీల కోసం ఒకటి, సామాన్యుల కోసం ఒకటి బరులు ఏర్పాటు చేశారు. నగరాల నుండి భారీగా జనాలు తరలివస్తున్నారు. కార్లు..దిచక్రవాహనాలతో ఆయా ప్రాంతాలు కిక్కిరిసిపోయాయి. కోళ్ల పందాలతో పేకాట కూడా జోరుగా కొనసాగుతోంది. రెవెన్యూ, పోలీసులకు భారీగా ముడుపులు అందాయనే ఆరోపణలు వినిపిస్తున్నాయి.

Pages

Don't Miss

Subscribe to RSS - కృష్ణా