కేటీఆర్

07:27 - May 26, 2018

హైదరాబాద్ : గ్రేటర్‌ హైదరాబాద్‌లో మౌలిక వసతులు మెరుగుపరుస్తున్నామని... ప్రజల భాగస్వామ్యంతోనే విశ్వనగరంగా తీర్చిదిద్దగలమని మంత్రి కేటీఆర్‌ అన్నారు. ఈ సందర్భంగా కూకట్‌పల్లిలోని నిజాంపేటలో 'మన నగరం' కార్యక్రమాన్ని నిర్వహించారు. వచ్చే నాలుగు నెలల్లో రాష్ట్రంలో 56 రిజర్వాయర్‌లు పూర్తి చేసి 150 లీటర్లు ప్రతి మనిషికి అందించాలన్నదే ప్రభుత్వ లక్ష్యమని తెలిపారు. మూసి సుందరీకరణను యుద్ధప్రతిపాదికన చేపట్టామన్నారు. 

06:50 - May 25, 2018

హైదరాబాద్ : నందమూరి బాలకృష్ణ తాను ఎంతగానో ఇష్టపడే నటుడని తెలంగాణ ఐటీ, మున్సిపల్‌ మంత్రి కేటీఆర్‌ అన్నారు. ఎన్టీఆర్‌పై అభిమానంతోనే తన తండ్రి కేసీఆర్‌ తనకు తారక రామారావు అని పేరు పెట్టారని తెలిపారు. జూబ్లీహిల్స్‌లోని బసవతారకం కేన్సర్‌ ఆస్పత్రిలో క్యాన్సర్‌ యూనిట్‌ను నటుడు బాలకృష్ణతో కలిసి కేటీఆర్‌ ప్రారంభించారు. క్యాన్సర్‌ను అవగాహనతోనే నిర్మూలించవచ్చని.. ప్రజల్లో అవగాహన కల్పించాలని మంత్రి కేటీఆర్ అన్నారు. తారకరామారావు పేరును నిలబెట్టేలా పని చేస్తానని కేటీఆర్ తెలిపారు. కేసీఆర్ తన కొడుకుకి ఎన్టీఆర్ పేరు పెట్టడం సంతోషకరమని బాలకృష్ణ అన్నారు. ప్రపంచ స్థాయి ప్రమాణాలతో క్యాన్సర్‌కు చికిత్స అందిస్తున్నామని బాలకృష్ణ తెలిపారు. ఎన్టీఆర్‌ బయోపిక్‌లో బసవతారకం హాస్పిటల్‌ గురించి ఉంటుందని బాలకృష్ణ చెప్పారు.

12:35 - May 24, 2018

హైదరాబాద్ : బసవతారకం ఇండో అమెరికన్ క్యాన్సర్ ఆసుపత్రిలో అడ్వాన్స్డ్ బోన్ మ్యారో ట్రాన్స్ ప్లాంటేషన్ ప్రారంభించడం ఆనందంగా ఉందని మంత్రి కేటీఆర్ పేర్కొన్నారు. అవసరమైన వారు దీనిని ఉపగించుకోవచ్చన్నారు. ట్రాన్స్ ప్లాంటేషన్ కు సహకరించిన ముఖ్యమంత్రి కేసీఆర్ కు అభినందనలు తెలియచేస్తున్నట్లు సినీ నటుడు, హిందూపురం ఎమ్మెల్యే బాలకృష్ణ తెలిపారు. మరింత సమాచారం కోసం వీడియో క్లిక్ చేయండి.

 

06:38 - May 23, 2018

హైదరాబాద్ : గ్రేటర్‌ హైదరాబాద్‌లో తాగునీటి కష్టాలను దాదాపుగా పరిష్కరించామన్నారు మంత్రి కేటీఆర్‌. శేరిలింగంపల్లి జోన్‌లో సుడిగాలి పర్యటన చేసిన మంత్రి పలు అభివృద్ధి కార్యక్రమాలకు శంకుస్థాపనలు చేశారు. తాగునీటి రిజర్వాయర్లను ప్రారంభించారు. గ్రేట‌ర్‌ హైదరాబాద్‌ ప‌రిధిలో త్రాగునీటికి ఇబ్బందులు లేకుండా చేయడంలో మంచి ఫ‌లితాలు సాధించామని తెలంగాణ ప్రభుత్వం అంటోంది. శేరిలింగం ప‌ల్లి ప‌రిధిలోని వివిధ ప్రాంతాల్లో హైద‌రాబాద్ జ‌ల‌మండ‌లి నిర్మించిన నీటి రిజ‌ర్వాయ‌ర్‌ను మంత్రి కేటీఆర్‌ ప్రారంబించారు. దీంతో గ్రేటర్ శివారు మున్సిపాలిటిల్లో తాగునీటి ఇబ్బందులు త‌గ్గుతాయ‌న్నారు. రెండేళ్ల క్రితం 1900కోట్ల రూపాయల హాడ్కో రుణంతో పారంభ‌మైన ప‌నులు చాలా వ‌ర‌కు తుదిదశ‌కు చేరుకున్నాయ‌న్నారు. గ్రేట‌ర్ ప‌రిధిలో రాబోయే రోజుల్లో ఎమాత్రం తాగు నీటికి ఇబ్బందులు లేకుండా చేయడాని కేశ‌వ‌పూర్ వ‌ద్ద భారీ రిజ‌ర్వాయ‌ర్ నిర్మించేందుకు ప్రణాళిక‌లు త‌యారవుతున్నాయని మంత్రి కేటీఆర్‌ తెలిపారు.

జిహెచ్ఎంసి అధ్వర్యంలో నిర్మాణం అవుతున్న ప‌లు రోడ్దు ప‌నుల‌కు శంకు స్థాప‌న చేయడంతో పాటు శిల్పారామం వ‌ద్ద నిర్మించిన ఎసి బ‌స్ స్టాప్ ను మంత్రికేటీర్‌ ప్రారంభించారు. సిటి ప్రయాణికుల‌కు సుఖ‌వంత‌మైన ప్రయాణం క‌ల్పిండమే త‌మ ఉద్యేశ‌మన్నారు మంత్రులు. అందులో భాగంగానే గ్రేట‌ర్ ప‌రిధిలో ఈఎడాది 1120కోట్ల రోడ్లను అభివృద్ది చేశామన్నారు. గ్రేటర్‌లో ఉన్న పార్కులు, చెరువుల ప‌రిర‌క్షణ‌లో ప్రజల భాగస్వామ్యం ఉండాలన్నారు. నగరపరిధిలో 541కోట్లతో 40చెరువుల‌ను అభివృద్ధి చేస్తున్నామన్నారు. శివారు ప్రాంతాల్లో మురుగునీటి పారుద‌ల‌కోసం 3200కోట్లతో ప్రణాళికను త‌యారు చేశామ‌ని మంత్రి కేటీఆర్‌ అన్నారు. తాము చేపట్టిన పథకాల వల్ల గ్రేటర్‌ హైదరాబాద్‌లో పరిధిలో 95శాతం నీటికష్టాలు తొలిగిపోయయని మంత్రి కేటీఆర్‌ చెప్పడంపై నగర ప్రజలు విస్మయం వ్యక్తం చేస్తున్నారు. వాటర్‌ క్యాన్లు కొనుక్కుని రోజులు గడుపుకుంటున్న పరిస్థితులు ఉంటే.. తాగునీటి కష్టాలే లేవనడంపై ఆగ్రహం వ్యక్తం చేస్తున్నారు. 

14:51 - May 17, 2018

రాజన్న సిరిసిల్ల : డెబ్భై ఏళ్లలో రైతుల కోసం ఏ ప్రభుత్వం చేయని కార్యక్రమాన్ని తెలంగాణ ప్రభుత్వం చేపట్టిందన్నారు మంత్రి కేటీఆర్‌. ఎన్నికల కోసమే రైతు బంధు అన్న విపక్షాల విమర్శలను తిప్పి కొట్టారు. రైతుబంధు పథకంతో రైతుల కళ్లల్లో ఆనందం కనిపిస్తుంటే కాంగ్రెస్‌ నేతల కళ్లల్లో భయం కనిపిస్తుందని విమర్శించారు. రాజకీయాలకు అతీతంగా రైతుల కోసం ముందుకు వెళదామన్నారు కేటీఆర్‌. ఈ సందర్భంగా రాజన్న సిరిసిల్ల జిల్లా నామాపురంలో రైతు బంధు కార్యక్రమంలో మంత్రి పాల్గొన్నారు. జూన్‌ 2 నుండి దేశం మొత్తం అబ్బురపడేలా రాష్ట్రంలోని రైతులందరికీ 5 లక్షల ఉచిత బీమా కార్యక్రమం చేపడతామని తెలిపారు. రైతులకు చెక్కులు పంపిణీ చేశారు మంత్రి.  

06:24 - May 14, 2018

హైదరాబాద్ : తెలంగాణ ప్రభుత్వం ప్రతిష్ఠాత్మకంగా అమలు చేస్తున్న రైతుబంధు పథకం మహోద్యమంగా కొనసాగుతోంది. గ్రామ గ్రామాన లబ్ధిదారులైన రైతులకు పెట్టుబడి సాయం కింద చెక్కులు అందజేస్తున్నారు. మంత్రులు, ఎంపీలు, ఎమ్మెల్యేలు, ఎమ్మెల్సీలు, ఇతర ప్రజాప్రతినిధులు అన్నదాతలకు చెక్‌లతోపాటు పట్టాదారు పాసుపుస్తకాలు పంపిణీ చేస్తున్నారు. రాజన్నసిరిసిల్ల జిల్లా కోనరావుపేటలో జరిగిన రైతుబంధు చెక్కుల పంపిణీ కార్యక్రమంలో మంత్రి కేటీఆర్‌ తదితరులు పాల్గొన్నారు. రైతులకు చెక్కులతోపాటు పట్టాదారు పాసుపుస్తకాలు పంపిణీ చేశారు. ఈసందర్భంగా కేటీఆర్‌... రైతులకు పెట్టుబడి సాయం పథకం దేశానికే ఆదర్శమన్నారు.

మెదక్‌ నియోజకవర్గంలో జరిగిన రైతుబంధు పథకం చెక్కుల పంపిణీ కార్యక్రమంలో ఉప ముఖ్యమంత్రి మహమూద్‌ అలీ, వ్యవసాయ శాఖ మంత్రి పోచారం శ్రీనివాసరెడ్డి, ఉపసభాపతి పద్మా దేవేందర్‌రెడ్డి, రాష్ట్ర రైతు సమన్వయ సమితి అధ్యక్షుడు గుత్తా సుఖేందర్‌రెడ్డి తదితరులు పాల్గొన్నారు. రంగారెడ్డి జిల్లా ఇబ్రహీంపట్నం మండలం భగాయత్‌లో జరిగిన రైతుబంధు పథకం చెక్కుల పంపిణీ కార్యక్రమంలో రవాణా శాఖ మంత్రి మహేందర్‌రెడ్డి, ఎమ్మెల్యే మంచిరెడ్డి కిషన్‌రెడ్డి తదితరులు పాల్గొన్నారు.

పెద్దపల్లి జిల్లా ధర్మారం మండలంలోని పలు గ్రామల్లో రైతుబంధు చెక్కుల పంపిణీ కార్యక్రమాలు జరిగాయి. ఎంపీ బాల్క సుమన్‌, ప్రభుత్వ చీఫ్‌విప్‌ కొప్పులు ఈశ్వర్‌ తదితరులు పాల్గొన్ని రైతుకుల చెక్కులు, పట్టాదారు పాసుపుస్తకాలు పంపిణీ చేశారు.

సంగారెడ్డి జిల్లా పటాన్‌చెరులో రైతుబంధు చెక్కులు, పట్టాదారు పాసుపుస్తకాల పంపిణీ కార్యక్రమంలో ఎమ్మెల్యేమహిపాల్‌రెడ్డి, ఎమ్మెల్సీ భూపాల్‌రెడ్డి తదితరులు పాల్గొన్నారు.

వరంగల్‌ రూరల్‌ జిల్లా వర్ధన్నపేట, పర్వతగిరి మండలాల్లో జరిగిన రైతుబంధు చెక్కుల పంపిణీ కార్యక్రమాల్లో ఎంపీ బండ ప్రకాశ్‌, ఎమ్మెల్యే రమేశ్‌ పాల్గొన్నారు. రైతు సంక్షేమ కార్యక్రమాల అమల్లో తెలంగాణ దేశంలోనే అగ్రస్థానంలో ఉందన్నారు. తెలంగాణ వ్యాప్తంగా రైతుబంధు చెక్కుల పంపణీ పథకం అమలు కొసాగుతోంది. 

12:29 - May 13, 2018

కరీంనగర్ : గతంలో ఉన్న పరిస్థితి ప్రస్తుతం రైతులు ఎదుర్కోవడం లేదని మంత్రి కేటీఆర్ పేర్కొన్నారు. రైతు బంధు కార్యక్రమంలో ఆయన పాల్గొని ఏర్పాటు చేసిన సభలో ప్రసంగించారు. గతంలో రైతులకు కరెంటు సమస్య..ఎరువుల సమస్యలు ఎదుర్కొనే వారని, ప్రస్తుతం తెలంగాణ రాష్ట్రంలో రైతులకు అలాంటి సమస్యలు రావడం లేదన్నారు. 4 లక్షల మెట్రిక్ టన్నులకు మాత్రమే వ్యవసాయ గోదాములు కట్టారని, ప్రభుత్వం అధికారంలోకి వచ్చాక 24 లక్షల టన్నుల గోదాములు కట్టడం జరిగిందన్నారు. శ్రీపాద ఎల్లంపల్లి ద్వారా త్వరలోనే నీళ్లు వస్తాయన్నారు. 

18:57 - May 5, 2018

హైదరాబాద్ : పెరుగుతున్న జనాభాను దృష్టిలో ఉంచుకొని.. హైదరాబాద్‌ మహానగరంలో నాలుగు రహదారులను నిర్మిస్తున్నామన్నారు మంత్రి కేటీఆర్‌. అంబర్‌పేట, మెదక్‌, ఆరాంఘర్‌, శంషాబాద్‌ రోడ్డు పనుల విస్తరణ పనులకు ఆయన శంఖుస్థాపన చేశారు. అనంతరం ఏర్పాటు చేసిన సభలో మంత్రి కేటీఆర్ మాట్లాడుతు.. దశాబ్దాల పాటు సమస్యగా ఉన్న ఉప్పల్ క్రాస్ రోడ్స్‌లో స్కైవే, ఎలివేటెడ్‌ కారిడోర్‌తో పాటు.. అంబర్‌పేట్‌లో ఛే నెంబర్‌ వద్ద ఉన్న ఫ్లైఓవర్‌, నర్సపూర్ కూడళ్లలో ఉన్న సమస్యలను కేంద్ర, రాష్ట్ర ప్రభుత్వాలు సత్వరమే పూర్తి చేస్తాయన్నారు కేటీఆర్‌. 

21:56 - April 27, 2018

హైదరాబాద్ : అవినీతి ఆరోపణలతో కేసీఆర్‌ ప్రభుత్వాన్ని ఉక్కిరి బిక్కిరి చేస్తున్న టీపీసీసీ చీఫ్‌ ఉత్తమ్‌కుమార్‌రెడ్డి... ఈ విషయంలో టీఆర్‌ఎస్‌ సర్కారుపై స్వరం మరింత పెంచారు. వచ్చే ఎన్నికల్లో అధికారం కాంగ్రెస్‌దే అన్న ధీమాతో ఉన్న ఉత్తమ్‌... పవర్‌లోకి వచ్చిన తర్వాత కేసీఆర్‌ కుటుంబం అవినీతిపై విచారణ జరిపిస్తామన్న వాదాన్ని వినిపిస్తున్నారు. శంషాబాద్‌ విమానాశ్రయం వరకు మెట్రో రైలు ప్రాజెక్టు పొడిగింపు, కొన్ని ఫార్మా కంపెనీలకు భూకేటాయింపుల్లో వేలకోట్ల అవినీతి జరిందని ఆరోపిస్తున్నారు. అవినీతి ఆరోపణలపై టీఆర్‌ఎస్‌ ప్రభుత్వాన్ని ఎండగడుతున్న తెలంగాణ కాంగ్రెస్‌ నేతలు... దీనిని మరింత విస్తృతంగా ప్రజల్లోకి తీసుకెళ్లాలని నిర్ణయించారు. బస్సుయాత్రలో ముఖ్యమంత్రి కేసీఆర్‌ ప్రభుత్వ వైఫల్యాలను ఎండగడుతున్న టీపీసీసీ చీఫ్‌ ఉత్తమ్‌కుమార్‌రెడ్డి.. మీడియా చిట్‌చాట్‌లో కేసీఆర్‌ కుటుంబంపై ఆరోపణల స్వరం పెంచారు.

ఫార్మా కంపెనీలకు భూకేటాయింపుల్లో వేల కోట్ల అవినీతి
కేసీఆర్‌ తనయుడు కేటీఆర్‌ నిర్వహిస్తున్న మంత్రిత్వ శాఖల్లో భారీ స్థాయిలో అవినీతి జరుగుతోందని ఉత్తమ్‌ ఆరోపిస్తున్నారు. మాదాపూర్‌తోపాటు, రంగారెడ్డి జిల్లాలో రెండు ఫార్మా కంపెనీలకు భూకేటాయింపులు జరపడంతో వేల కోట్ల అవినీతి జరిగిందన్నది ప్రధాన ఆరోపణ. ఆయా కంపెనీలకు వందలాది ఎకరాల భూములు కేటాయించడం, రాయితీలు కల్పించడంలో భారీగా ముడుపులు ముట్టాయన్న వాదాన్ని లేవనెత్తుతున్నారు. దోచుకున్న డబ్బును దాచుకునేందుకు తరచూ విదేశీ పర్యటనలు చేస్తున్నారని ఆరోపిస్తున్నారు.

శంషాబాద్‌ వరకు మెట్రో రైలు ప్రాజెక్టు పొడిగింపులో అవినీతి
కేసీఆర్‌ పాలనలో ప్రజలు అప్పులపాలైతే... ముఖ్యమంత్రి కుటుంబం మాత్రం భారీగా ఆస్తులు కూడబెట్టుకొందన్న వాదాన్ని ఉత్తమ్‌ విపినిస్తున్నారు. శంషాబాద్‌ వరకు మెట్రోరైలు ప్రాజెక్టు పొడిగింపులో వందల కోట్ల అవినీతి జరిగిందన్న రేవంత్‌రెడ్డి చేసిన ఆరోపణలపై ప్రభుత్వం ఎందుకు సమాధానం చెప్పలేదని ప్రశ్నించారు. కాంగ్రెస్‌ అధికారంలోకి వచ్చిన తర్వాత కేసీఆర్‌ కుటుంబం అవినీతిపై విచారణకు ఆదేశిస్తామన్నారు.

బస్సు యాత్రకు ప్రజల నుంచి అనూహ్య స్పందన
వచ్చే ఎన్నికల్లో కాంగ్రెస్‌ గెలుపు ధీమాతో ఉన్న ఉత్తమ్‌... ఇందుకు పలు సమీకరణలను ప్రస్తావిస్తున్నారు. బస్సు యాత్రకు ప్రజల నుంచి అనూహ్య స్పందన వస్తోందన్నది ఆయన వాదన. దక్షిణ తెలంగాణతోపాటు టీఆర్‌ఎస్‌ బలంగా ఉన్న ఉత్తర తెలంగాణలో కూడా కాంగ్రెస్‌ అనుకూల పవనలు ఉన్నాయని చెబుతున్నారు. కాంగ్రెస్‌ చేయిస్తున్న సర్వేల్లో రోజు రోజుకు పార్టీ బలం పెరుగుతోందని చెబుతున్నారు. ఇప్పకిప్పుడు ఎన్నికలు నిర్వహించినా కాంగ్రెస్‌కు 80 సీట్లు తగ్గవన్న గణాంకాలు ఉత్తమ్‌ చూపిస్తున్నారు. పొత్తులపై స్పందిస్తూ.. ఈ విషయంలో ఇంతవరకు ఎవరితో మాట్లాడలేదంటున్న ఉత్తమ్‌... తుది నిర్ణయం మాత్రం అధిష్టానానిదేనని చెబుతున్నారు. మొత్తంమీద వచ్చే ఎన్నికల్లో అధికారంపై ఆశలు పెంచుకున్న ఉత్తమ్‌కుమార్‌రెడ్డి... కేసీఆర్‌ కుటుంబంపై వస్తున్న అవినీతి ఆరోపణలను మరింత విస్తృతంగా ముందుకు తీసుకెళ్లాలని నిర్ణయించారు. 

21:59 - April 23, 2018

మేడ్చల్ : ఈనెల 27న జరగబోయే టీఆర్‌ఎస్ ప్లీనరీని ఘనంగా నిర్వహిస్తామని ఐటీ, పురపాలిక శాఖ మంత్రి కేటీఆర్ స్పష్టం చేశారు. కొంపల్లిలో ప్లీనరీ ఏర్పాట్లను మంత్రి పరిశీలించారు. ప్లీనరీ నిర్వహణ కోసం 9 కమిటీలు ఏర్పాటు చేస్తున్నామని తెలిపారు. ఉదయం 10 గంటల నుంచి సాయంత్రం 5 గంటల వరకు ప్లీనరీ జరగనుంది. రాష్ట్ర వ్యాప్తంగా సుమారు 13 వేల మంది ప్రతినిధులు హాజరుకానున్నారని చెప్పారు. ప్లీనరీకి వచ్చే వారి కోసం అన్ని ఏర్పాట్లు చేస్తున్నామని కేటీఆర్ పేర్కొన్నారు. 

Pages

Don't Miss

Subscribe to RSS - కేటీఆర్