గడ్కరి

18:41 - July 13, 2018

విశాఖపట్టణం : జిల్లాలో కేంద్ర మంత్రి నితిన్ గడ్కరి పర్యటిస్తున్నారు. ఆయనతో పాటు సీఎం చంద్రబాబు కూడా ఉన్నారు. ఈ సందర్భంగా విశాఖ పోర్టులో గడ్కరి మొక్కలు నాటారు. రూ. 6800 కోట్లతో రోడ్డు నిర్మాణ ప్రాజెక్టు పనులకు ఆయన శంకుసాప్థపన చేశారు.

రూ. 100 కోట్లతో విశాఖ పోర్టు నుండి ఎన్ హెచ్ 16 వరకు 4.15 కి.మీటర్ల మేర నిర్మించిన రహదారిని జాతీకి అంకితం చేశారు. రూ. 2,013 కోట్లతో ఆనందపురం -పెందుర్తి రోడ్డు పనులకు...రూ. 549 కోట్లతో షీలానగర్ - సబ్బవరం రోడ్డు నిర్మాణానికి...రూ. 1,665 కోట్లతో రణస్థలం - నర్సన్నపేట రోడ్డు విస్తరణ పనులకు... కేంద్ర మంత్రి గడ్కరి శంకుస్థాపన చేశారు. ఇదిలా ఉంటే ఏయూ కన్వెన్షన్ హాల్ లో ఈ కార్యక్రమం జరుగుతోంది. హాల్ బయట బిజెపి..టిడిపి కార్యకర్తలు మోహరించి పోటా పోటీగా నినాదాలు చేశారు. 

15:39 - July 12, 2018

హైదరాబాద్ : పోలవరం ప్రాజె క్టుపై రాష్ట్ర ప్రభుత్వం డొల్లతనం మరోసారి బయటపడిందని వైసిపి నేత బోత్స సత్యనారాయణ వ్యాఖ్యానించారు. ప్రాజెక్టు సందర్శనకు వచ్చిన కేంద్ర జలవనరుల శాఖ మంత్రి గడ్కరి అడిగిన ప్రశ్నలకు రాష్ట్ర ప్రభుత్వం సమాధానం చెప్పలేకపోయిందని పేర్కొన్నారు. డీపీఆర్ లో మార్పులు..గడ్కరి నిలదీస్తే ముఖ్యమంత్రి, అధికారులు నీళ్లు నమిలారని, ప్రాజెక్టు ఎప్పటిలోగా పూర్తి చేస్తారో చెప్పాలని నిలదీశారు. 

21:00 - July 11, 2018

పశ్చిమగోదావరి : పోలవరం ప్రాజెక్టు సివిల్‌ నిర్మాణాలన్నీ వచ్చే ఏడాది ఫిబ్రవరిలోగా పూర్తి చేయాలని కేంద్ర జలవనరుల శాఖ మంత్రి నితిన్‌ గడ్కరీ కాంట్రాక్ట్‌ ఏజెన్సీలను ఆదేశించారు. సాధ్యమైనంత త్వరగా పోలవరం పూర్తిచేసి రైతులకు సాగునీరు అందించాలని కేంద్ర ప్రభుత్వం లక్ష్యంగా పెట్టుకుందని గడ్కరీ చెప్పారు. ఏపీ ప్రభుత్వం అధికారులు మూడు రోజులు ఢిల్లీలో మకాంవేసి.. ప్రాజెక్టుకు సంబంధించిన అన్ని సమస్యలు పరిష్కరించుకోవాలని పోలవరంను సందర్శించిన గడ్కరీ సూచించారు. కేంద్ర జలవనరుల శాఖ మంత్రి నితిన్‌ గడ్కరీ పోలవరం ప్రాజెక్టును సందర్శించారు. పోలవరం నిర్మాణ పనుల పురోగతిని పరిశీలించారు. కాంట్రాక్టు సంస్థలు, కేంద్ర, రాష్ట్ర ప్రభుత్వ అధికారులతో సమీక్షించారు. జరుగుతున్న పనులపై సంతృప్తి వ్యక్తం చేశారు.

పోలవరం సివిల్‌ పనులను వచ్చే ఏడాది ఏప్రిల్‌ నాటికి పూర్తి చేస్తామని కాంట్రాక్ట్‌ సంస్థలు గడ్కరీ దృష్టికి తెచ్చాయి. అయితే వచ్చే లోక్‌సభ ఎన్నికలను దృష్టిలో పెట్టుకుని 2019 ఫిబ్రవరిలోగానే సివిల్‌ నిర్మాణాలను పూర్తి చేయాలని గడ్కరీ ఆదేశించారు. ఇందుకు కాంట్రాక్టు సంస్థలు సుముఖత వ్యక్తం చేశాయి. ప్రాజెక్టు పనుల కోసం అడ్వాన్స్‌ ఇవ్వాలని ముఖ్యమంత్రి చంద్రబాబు కోరగా... ప్రాజెక్టు నిర్మాణ వ్యయం పెరిగినందున.. ఇది సాధ్యంకాదన్నారు. పెరిగిన నిర్మాణ వ్యయానికి ఆర్థిక శాఖ అనుమతి తీసుకోవాల్సి ఉందన్నారు. రాష్ట్ర ప్రభుత్వ అధికారులు మూడు రోజులు ఢిల్లీలో మకాంవేసి... కేంద్ర అధికారులతో చర్చించి, అన్ని సమస్యలు పరిష్కరించుకోవాలని గడ్కరీ సూచించారు. ఇందుకు చంద్రబాబు సుముఖత వ్యక్తం చేశారు. అన్ని సమస్యలు పరిష్కరించుకున్న తర్వాత పెరిగిన నిర్మాణ వ్యయంపై ఎనిమిది రోజుల్లో ఆర్థిక శాఖను వివేదిస్తానని గడ్కరీ చెప్పారు.

పోలవరం నిర్మాణ వ్యయం పెరిగినందున సమగ్ర ప్రాజెక్టు నివేదికను సమర్పించాలని గడ్కరీ రాష్ట్ర ప్రభుత్వ అధికారులను ఆదేశించారు. నిర్వాసితులకు పునరావాసం, పునర్నిర్మాణ కార్యక్రమాల అమల్లో గిరిజనులకు ప్రాధాన్యత ఇవ్వాల్సిన అవసరాన్ని గుర్తు చేశారు. రాజకీయాలకు అతీతంగా పోలవరం ప్రాజెక్టునుపూర్తి చేసేందుకు కేంద్ర ప్రభుత్వం కట్టుబడి ఉందని గడ్కరీ చెప్పారు. గడ్కరీ ఆదేశాలపై ముఖ్యమంత్రి చంద్రబాబు స్పందిస్తూ.. కేంద్ర కోరిన అన్ని వివరాలను అందిస్తామన్నారు. పోలవరం ప్రాజెక్టు స్థలంలో కేంద్ర మంత్రి గడ్కరీని కలిసేందుకు వచ్చిన బీజేపీ కార్యకర్తలను పోలీసులు అడ్డుకున్నారు. దీంతో పోలీసులకు.. బీజేపీ కార్యకర్తలకు మధ్య స్వల్ప వాగ్వాదం నెలకొంది. 

18:51 - July 11, 2018

పశ్చిమగోదావరి : పోలవరం పర్యటనలో కేంద్ర మంత్రి నితిన్ గడ్కరి పశ్చిమగోదావరి జిల్లాకు చేరుకున్నారు. పోలవరం నిర్మాణం జరుగుతున్న అనంతరం కేంద్ర, రాష్ట్ర ప్రభుత్వాలు సహకరించుకున్నాయి. కానీ ఇటీవలే టిడిపి..జిజెపి మధ్య సంబంధాలు తెగిపోవడం...ఇరు పార్టీల మధ్య విమర్శలు..ఆరోపణలు గుప్పుమంటున్నాయి. పోలవరం నిధుల విషయంలో తీవ్ర ఆరోపణలు వెల్లువెత్తాయి. ఈ నేపథ్యంలో గడ్కరి పర్యటించడం ప్రాధాన్యత సంతరించుకుంది. బాబు..గడ్కరి మధ్య ఎలాంటి చర్చలు జరుగుతాయనేది దానిపై ఉత్కంఠ నెలకొంది.

రెండు గంటల ముందే చేరుకున్న బాబు అక్కడున్న అధికారులతో సమీక్ష సమావేశం నిర్వహించారు. అనంతరం గడ్కరి చేరుకున్నారు. ఇదిలా ఉంటే బీజేపీ నేతలు కార్యకర్తలు...ఆందోళన చేపట్టారు. తమను అనుమతించాలని..గడ్కరితో మాట్లాడుతామని నేతలు పేర్కొన్నారు. కానీ పాస్ లున్న వ్యక్తులకు మాత్రమే అనుమతినిస్తామని పోలీసులు స్పష్టం చేశారు. దీనితో ప్రభుత్వానికి వ్యతిరేకంగా నినాదాలు చేశారు. 

18:32 - July 11, 2018

ఢిల్లీ : పోలవరం ప్రాజెక్టు విషయంలో కొన్ని టెక్నికల్ సమస్యలు ఉన్నాయని..ఈ విషయంలో రాజకీయం లేదని కేంద్ర మంత్రి నితిన్ గడ్కరి వెల్లడించారు. బుధవారం ఆయన ప్రాజెక్టులో జరుగుతున్న పనులను పరిశీలించారు. అనంతరం బాబు..మోడీ మీడియాతో మాట్లాడారు. వ్యవసాయానికి నీరు ఎంతో ప్రధానమైందని, ఈ విషయంలో ప్రధాన మంత్రి మోడీ సానుకూలంగా ఉన్నారని, ప్రస్తుతం తాను ఇక్కడకు వచ్చి పనులను పరిశీలించడం జరిగిందన్నారు.

 తాను పోలవరానికి రావడం ఇది రెండోసారి కేంద్ర మంత్రి నితిన్ గడ్కరి తెలిపారు. పోలవరం పూర్తి చేయడానికి మోడీ కట్టుబడి ఉన్నారని, ప్రాజెక్టు ఏపీకి కొత్త జీవాన్ని ఇస్తుందని, త్వరగా పూర్తి చేయాలని కాంట్రాక్టర్ ను కోరడం జరగిందన్నారు. పోలవరం ఏపీకే కాదు..దేశానికి కీలకమైన ప్రాజెక్టు అని అభివర్ణించారు. పోలవరం రైతులకు జీవితాన్ని ఇస్తుందని, కేంద్ర, రాష్ట్ర అధికారులు మూడు రోజుల పాటు ఇక్కడే ఉండి సమస్యలను పరిష్కరించాలని సూచించామన్నారు. పెరిగిన ప్రాజెక్టు అంచనాను ఆర్థిక శాఖకు పంపిస్తామని ప్రకటించారు. 

ప్రతి నెలా ఇక్కడకు వస్తానని హామీనివ్వడం జరిగిందని, కానీ కొన్ని సమస్యల వల్ల ఇక్కడకు రావడం జరగలేదన్నారు. ఈ విషయంలో తాను ఢిల్లీలో రివ్యూ మీటింగ్ ఏర్పాటు చేయడం జరిగిందని, ఇందులో కొన్ని సమస్యలు ఉన్నట్లు గుర్తించినట్లు తెలిపారు. ఆర్థిక మంత్రితో చర్చించి బాబు కోరినట్లుగా నిధుల అడ్వాన్స్ వచ్చే విధంగా చూస్తానని, డబ్బుల సమస్య లేదన్నారు. గిరిజన ప్రాంతాలకు మొదటి ప్రాధాన్యత ఇవ్వాలని, వారికి మౌలిక సదుపాయాలు కల్పించే విధంగా కృషి చేయాలన్నారు. కేంద్ర, రాష్ట్ర ప్రభుత్వాలు వారికి న్యాయం జరిగే విధంగా చూస్తామని, ఈ విషయంలో రాజకీయం అవసరం లేదని..కేవలం అభివృద్ధే ధ్యేయంగా పనిచేస్తామన్నారు. 

18:29 - July 11, 2018

పశ్చిమగోదావరి : పోలవరం ప్రాజెక్టు 2019 సంవత్సరానికల్లా పూర్తి చేయడానికి కృషి చేస్తామని ఏపీ సీఎం చంద్రబాబు నాయుడు వెల్లడించారు. కేంద్ర మంత్రి నితిన్ గడ్కరి పోలవరం ప్రాజెక్టు పనులను పరిశీలించారు. ఈసందర్భంగా బాబు మాట్లాడుతూ...గతంలో డయా ఫ్రం వాల్ 553.8 మీటర్ల పని చేయడం జరిగిందని, ప్రస్తుతం 1396.06 మీటర్లు చేయడం జరిగిందన్నారు.

ఫిబ్రవరి నాటికి పోలవరం కాంక్రీట్ పనులను పూర్తి చేస్తామని వెల్లడించారు. 2019 డిసెంబర్ నాటికి డెడ్ లైన్ పెట్టుకున్నట్లు, సవరించిన అంచనాల ప్రకారం పోలవరానికి రూ. 57,940 కోట్లు అవసరమన్నారు. భూ సేకరణకు రూ. 33వేల కోట్ల అవసరమని, 2013 చట్టం ప్రకారం ఖర్చు అంచనాలు పెరిగినట్లు తెలిపారు. మెజార్టీ పనులన్నీ వచ్చే ఏడాది ఫిబ్రవరి లోపు పూర్తి చేయాలని లక్ష్యంగా పెట్టుకున్నట్లు వెల్లడించారు. 

పోలవరం ప్రాజెక్టుకు చరిత్ర ఉందని..1941లో ఈ ప్రాజెక్టు డీపీఆర్ సర్వే చేయడం జరిగిందని, 1983 లో అడ్మిట్ చేయడం జరిగిందన్నారు. 2010- 11లో రూ. 1.610 కోట్లు ఎస్టిమేట్ చేయడం జరిగిందని..ఇందుకు ప్లానింగ్ కమిషన్ అనుమతినిచ్చిందన్నారు. 2017లో మొత్తం క్లియరెన్స్ ఇచ్చిందన్నారు. 2013- 2014 ప్రకారం రూ. 57,940 కోట్లు ఎస్టిమేట్ ఇచ్చిందన్నారు. భూసేకరణ ప్రధాన సమస్యగా మారిందని..ఇక్కడ ఖర్చు బాగా పెరిగిందన్నారు. 90 శాతం రైట్ కెనాల్ పనులు పూర్తయ్యాయని, లెఫ్ట్ కెనాల్ పనులు కూడా తొందరగా పూర్తి చేసేందుకు కృషి చేస్తామన్నారు. పోలవరం ప్రాజెక్టుకు సంబంధించిన పనులన్నీ 2019 డిసెంబర్ వరకు పూర్తి చేయాలనే లక్ష్యంగా పెట్టుకున్నట్లు వెల్లడించారు. రెండు లక్షల క్యూబిక్ మీటర్ల పనులు ప్రతి నెలా జరుగుతున్నాయన్నారు. డీపీఆర్ 2 అనుమతి, కొంత నిధుల అడ్వాన్స్.. విడుదల చేస్తే పనులన్నీ తొందరగా జరుగుతాయని..ఈ సమస్యను పరిష్కరించాలని మంత్రిని కోరినట్లు వెల్లడించారు. 

14:32 - December 30, 2017

పశ్చిమగోదావరి : పోలవరం కథ కంచికి చేరుతోందా..? మరో ఏడాదిలో ప్రాజెక్టు పూర్తిచేయాలన్న ఏపీ ప్రభుత్వం మాటలకే పరిమితం అవుతోందా..? కేంద్ర రాష్ట్ర ప్రభుత్వాల తీరుతో.. ఇప్పటికే నిర్మాణ పనులకు బ్రేకులు పడగా ..తాజాగా కాంట్రాక్టు సంస్థ ట్రాన్స్‌ ట్రాయ్‌పై కెనరాబ్యాంకు దివాలా పిటిషన్‌ దాఖలు చేసింది. దీంతో మరో ఏడాదిలో నీరు ఇచ్చేమాట అటుంచితే.. మరో రెండేళ్లయినా ప్రాజెక్టు పూర్తికాని రిస్థితి తలెత్తింది. నిర్మాణం పూర్తికాకుండానే పోలవరం మునిగిపోతోంది.. అయితే నీటితో కాదు.. కాంట్రాక్టు సంస్థ నిర్వాకంతో పోలవరం ప్రధాన నిర్మాణ సంస్థ ట్రాన్స్‌ ట్రాయ్‌పై కెనరాబ్యాంకు దివాలా పిటిషన్‌ దాఖలు చేసింది. దీంతో మరో ఏడాదిలో పోలవరం నుంచి నీరు ఇస్తామని ప్రకటించిన ఏపీ ప్రభుత్వం ఇపుడు దిక్కుతోచని స్థితిలో పడిపోయింది.

ట్రాన్స్‌ ట్రాయ్‌ సంస్థ తమకు 725 కోట్ల రూపాయల మేరకు బకాయి పడిందని కెనరాబ్యాంకు అంటోంది. ఈనెల 22న వరకు 489 కోట్లు చెల్లించాల్సి ఉండగా .. ట్రాన్స్‌ట్రాయ్‌ కంపెనీ బ్యాంకు గ్యారెంటీ కింద 379 కోట్లు మాత్రమే ఉంచిgదని కెనరా బ్యాంకు పేర్కొంది. ఈమేరకు నేషనల్‌ కంపెనీ లా ట్రిబ్యునల్‌ను ఆశ్రయించిన బ్యాంకు అధికారులు... ట్రాన్స్‌ట్రాయ్‌ కాంట్రాక్టు సంస్థ దివాలా తీసినట్టు ప్రకటించాలని కోరారు. దీనిపై ట్రిబ్యునల్‌ ఇన్‌సాల్వెన్సీ ప్రక్రియ ప్రారంభించనుందని కెనారాబ్యాంకు అధికారులు తెలిపారు. మరోవైపు ఇప్పటికే పోలవరం అంశంలో కేంద్రం - ఏపీ ప్రభుత్వాల మధ్య వివాదం నడుస్తోంది. స్పిల్‌వే, కాపర్‌డ్యాం లాంటి కీలకమైన పనుల నుంచి ప్రధాన కాంట్రాక్టర్‌ అయిన ట్రాన్స్‌ట్రాయ్‌ను తొలగించాలని చంద్రబాబు ప్రభుత్వం కోరుతుండగా.. దీనిపైమరో రెండు నెలల తర్వాతే నిర్ణయమని కేంద్ర మంత్రి నితిన్‌గడ్కరీ గడువు విధించారు. దీంతో ఆర్థికంగా చతికిల పడిన ట్రాన్స్‌ట్రాయ్‌ను కొనసాగిస్తే.. 2019నాటికి ప్రాజెక్టు నిర్మాణం కష్టమేనని ఏపీ ప్రభుత్వం భావిస్తోంది. అందుకే కీలక పనులకు కొత్తగా టెండర్లు కూడా పిలిచింది. అయితే కేంద్రం జోక్యంతో ఆ ప్రక్రియకు బ్రేకులు పడ్డాయి. ఈ నేపథ్యంలో తాజాగా కెనరాబ్యాంకు ట్రాన్స్‌ట్రాయ్‌పై దాఖలు చేసిన దివాలా పిటిషన్‌ .. ప్రాజెక్టు నిర్మాణానికి శరాఘాతంగా మారే అవకాశం ఉందని ఇంజనీరింగ్ నిపుణులు అభిప్రాయ పడుతున్నారు.

ట్రాన్స్‌ట్రాయ్‌పై కెనరాబ్యాంకు పిటిషన్‌ నేపథ్యంలో విపక్షాలు విమర్శలను మరింత పెంచాయి. ఓవైపు కేంద్రం, తాజాగా కెనరా బ్యాంకు పిటిషన్‌తో ఏపీ ప్రభుత్వం మరింత ఒత్తిడిని ఎదుర్కొంటోంది. మరో ఏడాదిలో గ్రావిటీద్వారా పోలవరం నీరు పొలాలకు అందిస్తామని చెబుతున్న చంద్రబాబు సర్కారుకు ఈ పరిస్థితి సవాల్‌గా మారింది. సీఎం చంద్రబాబు ఈ సమస్యను ఎలా పరిష్కరిస్తారనేది ఇపుడు ఆసక్తిగా మారింది. 

07:39 - December 14, 2017

ఆంధ్రప్రదేశ్‌ జీవనాడి పోలవరం ప్రాజెక్టును 2018 నాటికి పూర్తి చేయాలని కేంద్ర, రాష్ట్ర ప్రభుత్వాలు నిర్ణయించారు. ఈ విషయంలో ఎవరికీ ఎటువంటి అనుమానాలు కానీ, అపోహలు కానీ అవసరంలేదని రెండు ప్రభుత్వాలు స్పష్టం చేశాయి. పెండింగ్‌ బిల్లులు చెల్లించేందుకు కేంద్రం అంగీకరించింది. ఈ అంశంపై టెన్ టివిలో జరిగిన ప్రత్యేక చర్చలో సూర్యప్రకాష్ (టిడిపి), మధుసూధన్ (వైసీపీ)లు పాల్గొని అభిప్రాయాలు వ్యక్తం చేశారు. 

06:26 - December 14, 2017

ఢిల్లీ : ఆంధ్రప్రదేశ్‌ జీవనాడి పోలవరం ప్రాజెక్టును 2018 నాటికి పూర్తి చేయాలని కేంద్ర, రాష్ట్ర ప్రభుత్వాలు నిర్ణయించారు. ఈ విషయంలో ఎవరికీ ఎటువంటి అనుమానాలు కానీ, అపోహలు కానీ అవసరంలేదని రెండు ప్రభుత్వాలు స్పష్టం చేశాయి. పెండింగ్‌ బిల్లులు చెల్లించేందుకు కేంద్రం అంగీకరించింది. నిర్వాసితుల పునరావాస పథకంతోపాటు సవరించిన అంచనాలపై పరిశీలించి నిర్ణయం తీసుకుంటామని.. ముఖ్యమంత్రి చంద్రబాబుతో నిర్వహించిన భేటీలో కేంద్ర జలనవరలు శాఖ మంత్రి నితిన్‌ గడ్కరీ హామీ ఇచ్చారు. రాష్ట్ర నీటిపారుదల శాఖ మంత్రి దేవినేని ఉమ, కేంద్ర, రాష్ట్ర పభుత్వ అధికారులు పాల్గొన్న ఈ సమావేశంలో పోలవరం ప్రాజెక్టు నిర్మాణంపై చర్చించారు. పనుల పురోగతి, నిధుల విడుదల, సవరించిన అంచానాలు, నిర్వాసితుల పునరావాసం, పునర్నర్మాణం వంటి అంశాలు ఈ భేటీలో చర్చకు వచ్చాయి. పోలవరం ప్రధాన కాంట్రాక్టర్‌ నుంచి కొన్ని పనులు వేరుచేసి, కొత్తవారికి అప్పగించేందుకు ఏపీ ప్రభుత్వం పిలిచిన టెండర్ల అంశం చర్చకు వచ్చింది. ప్రస్తుతం పనులు చేస్తున్న కాంట్రాక్టర్‌కు నెల రోజుల గడువు ఇవ్వాలని నిర్ణయించారు. పనుల్లో పురోగతి లేకపోతే కొత్త టెండర్లపై అప్పుడు నిర్ణయం తీసుకునే అంశంపై కేంద్ర, రాష్ట్ర ప్రభుత్వాలు అంగీకారానికి వచ్చాయి.

పోలవరం ప్రాజెక్టును 2018 నాటికి పూర్తి చేసే విధంగా రెండు ప్రభుత్వాలు సమన్వయంతో పని చేయాలని గడ్కరీ, చంద్రబాబు భేటీలో నిర్ణయించారు. జరుగుతున్న పనులపై ఏరోజుకు ఆరోజు నివేదిక తెప్పించుకునే విధంగా కేంద్ర నీటిపారుదల శాఖ కార్యదర్శి తరుపున పోలవరంలో ఒక ప్రతినిధిని నియిమిస్తారు. కేంద్ర జలవనరుల మంత్రి సలహాదారు మూడు రోజులకు ఒకసారి పోలవరం పనులపై నివేదిక ఇచ్చే ఏర్పాటు చేశారు. ప్రతి పదిహేను రోజులకు ఒకసారి పోలవరం పనులు ప్రత్యక్షంగా పర్యవేక్షించాలని గడ్కరీ నిర్ణయించారు. అంచనాల ఆధారంగా ఇప్పటి వరకు చేసిన పనులకు పెండింగ్‌ బిల్లులను చెల్లించేందుకు కేంద్రం అంగీకరించింది.

పోలవరం ప్రాజెక్టు సవరించిన అంచనాలపై కూడా ఈ భేటీలో చర్చకు వచ్చింది. అయితే వీటిపై కేంద్ర అధికారులు కొన్ని సందేహాలు వ్యక్తం చేయడంతో మరో వారంలో అన్ని వివరణలతో మరోసారి నివేదిక పంపాలని నిర్ణయించారు. ప్రాజెక్టును పూర్తిచేసి, ప్రజలకు అందుబాటులోకి తీసుకువచ్చే అంశంపైనే ఎక్కువగా చర్చించారు. భూసేకరణ చట్టం ప్రకారం పోలవరం నిర్వాసితులకు పునరావాసం కల్పించే అంశంపై ఈ సమావేశంలో సవివరంగా చర్చించారు. ఎనిమిది మండలాల్లోని 371 గ్రామాల్లో పునరావాసం, పునర్నిర్మాణ పథకం అమలుపై సమీక్షించారు. మొత్తం లక్షా 92 వేల 259 మందికి పునరావాసం కల్పించాలని లెక్క తేల్చారు. 95,472 కుటుంబాలకు పునర్నర్మాణం చూపించాలని నివేదించారు. 2013 భూసేకరణ చట్టం ప్రకారం ఇందుకు 30 వేల కోట్లకు పైగా కావాల్సి వస్తుందని ఏపీ ప్రభుత్వం నివేదించింది. అయితే ఈ అంశంపై పరిశీలించిన నిర్ణయం తీసుకుంటామని నితిన్‌ గడ్కరీ హామీ ఇచ్చారు. గడ్కరీతో నిర్వహించిన భేటీ తర్వాత 2018 నాటికి పోలవరం నుంచి గ్రావిటీ ద్వారా నీరు ఇవ్వగలమన్న ఆశాభావంతో చంద్రబాబు ఉన్నారు. 

13:14 - December 7, 2017

విజయవాడ : ప్రతిపక్షాలు పోలవరం ప్రాజెక్టు నిర్మాణాన్ని ప్రతిపక్షాలు అడ్డుకుంటున్నాయని ఏపీ సీఎం చంద్రబాబు నాయుడు పేర్కొన్నారు. గురువారం ఆయన మీడియాతో మాట్లాడారు. కేంద్ర మంత్రి నితిన్ గడ్కరిని కలిసిన కాంగ్రెస్ నేతలు ఈ అంశంపై ఫిర్యాదు చేశారని తెలిపారు. ఈ ప్రాజెక్టును పూర్తి చేయడం తన లక్ష్యమని తెలిపారు. పోలవరం నిర్మాణానికి అడ్డంకులు సృష్టిస్తూ కోర్టుల్లో కేసులు వేస్తున్నారని పేర్కొన్నారు. ఎట్టిపరిస్థితుల్లో ప్రాజెక్టు పూర్తి చేయాలనే లక్ష్యంగా ఉన్నట్లు రాష్ట్ర ప్రభుత్వం ఎందుకు చేయాలని ప్రశ్నిస్తున్నారని పేర్కొన్నారు. 

Pages

Don't Miss

Subscribe to RSS - గడ్కరి