గద్దర్

10:15 - January 22, 2018

హైదరాబాద్ : ప్రభుత్వ హామీల అమలు కోరుతూ రాష్ట్ర వ్యాప్తంగా టీ మాస్ కలెక్టరేట్ల ముట్టడి చేపట్టింది. ఈ ఆందోళనలో పాల్గొనేందుకు ప్రజలు భారీగా తరలివస్తున్నారు. పార్టీలకతీతంగా తెలంగాణ సామాజిక ప్రజా సంఘాల ఐక్య వేదిక (టీ మాస్‌) ఏర్పడిన సంగతి తెలిసిందే. ప్రజా సమస్యల పరిష్కారానికి సమైక్యంగా పోరాటాలను చేయాలని టీ-మాస్‌ ఫోరం ఇటీవలే పిలుపునిచ్చిన సంగతి తెలిసిందే. అందులో భాగంగా రాష్ట్ర వ్యాప్తంగా ఉన్న గ్రామాల్లో సమస్యలపై అధ్యయనం చేసి అధికారులకు వినతిపత్రాలు ఇచ్చారు. మండల కార్యాలయాల ఎదుట ధర్నాలు నిర్వహించారు. కానీ స్పందన లేకపోయేసరికి జనవరి మాసం మొత్తం ఆందోళనలు చేయాలని నిర్ణయం తీసుకుంది. సోమవారం హైదరాబాద్ తో పాటు రాష్ట్ర వ్యాప్తంగా కలెక్టరేట్ల ముట్టడి నిర్వహిస్తోంది. హైదరాబాద్, రంగారెడ్డి జిల్లాల కలెక్టరేట్ల వద్ద టీ మాస్ నేతలు ఆందోళన నిర్వహించారు. హైదరాబాద్ కలెక్టరేట్ వద్ద టీమాస్ కన్వీనర్ జాన్ వెస్లీ, టీ మాస్ నేత, ప్రజా గాయకుడు గద్దర్ పాల్గొననున్నారు. ఆయా కలెక్టరేట్ల వద్ద పోలీసులు భారీ బందోబస్తు ఏర్పాటు చేశారు. 

06:55 - January 21, 2018

హైదరాబాద్ : ప్రజా సమస్యలపై టీమాస్ తమ పోరాటాన్ని మరింత ఉధృతం చేయాలని నిర్ణయించింది. టీఆర్‌ఎస్‌ ప్రభుత్వ హామీల అమలు కోసం ఈనెల 22న కలెక్టరేట్ల ముట్టడి చేపడుతున్నట్టు టీమాస్‌ రాష్ట్ర కన్వీనర్‌ జాన్‌వెస్లీ తెలిపారు. కేసీఆర్‌ ప్రజలకు ఇచ్చిన ఏ ఒక్కహామీని అమలు చేయలేదన్నారు. రాష్ట్రంలో ఇళ్లులేని కుటుంబాలు 20 లక్షలకుపైగా ఉంటే... కేవలం 4462 డబుల్‌ బెడ్‌రూమ్‌ ఇళ్లే ఇప్పటి వరకు కేటాయించారని విమర్శించారు. హైదరాబాద్‌ సుందరయ్య విజ్ఞాన కేంద్రంలో నిర్వహించిన మీడియా సమావేశంలో ప్రజాగాయకుడు, టీమాస్‌ నేత గద్దర్‌తో కలిసి వెస్లీ మాట్లాడారు. కవులు, కళాకారులతో సాంస్కృతిక ఉద్యమం చేపట్టనున్నట్టు గద్దర్ తెలిపారు. 

22:16 - January 5, 2018

జగిత్యాల : ప్రత్యేక తెలంగాణ వచ్చింది కానీ త్యాగాల తెలంగాణ రాలేదన్నారు టీ మాస్‌ నేత గద్దర్‌. జగిత్యాల జిల్లా కేంద్రంలో జరిగిన టీ-మాస్‌ ఆవిర్భావ దినోత్సవ వేడుకల్లో ఆయన పాల్గొన్నారు. సమైక్య రాష్ట్రంలో జరిగినట్లే ఇప్పుడు కూడా ఎన్‌ కౌంటర్లు జరుగుతున్నాయని ఆవేదన వ్యక్తం చేశారు. సీఎం కేసీఆర్‌ ఇచ్చిన హామీలు ఒక్కటికూడా నెరవేర్చలేదంటూ మండిపడ్డారు. తెలంగాణ వస్తే ఉద్యోగాలు వస్తాయన్నారు కానీ ఇంకా నిరుద్యోగులు అలానే ఉన్నారన్నారు. తెలంగాణ మంత్రి వర్గంలో ఉద్యమంలో పాల్గొన్న నేతలు ఒక్కరు కూడా లేరంటూ ఆరోపించారు. 

14:34 - December 30, 2017

నల్గొండ : 93 శాతం ఉన్న బహుజనులు ఏకం కావాలని ప్రజా గాయకుడు, టీమాస్‌ రాష్ట్ర స్టీరిందగ్‌ కమిటీ సభ్యులు గద్దర్‌ పిలుపునిచ్చారు. నల్గొండ జిల్లా.. మిర్యాలగూడలో టీ మాస్‌ ఆవిర్భావ సభ జరిగింది. ఈ సందర్భంగా.. గద్దర్‌ తన పాటతో టీమాస్‌ లక్ష్యాన్ని ప్రజలకు వివరించారు. రాష్ట్రంలో నియంత్రణ పాలన సాగిస్తున్న ప్రభుత్వానికి వచ్చే ఎన్నికల్లో ప్రజలు బుద్ధి చెప్పడం ఖాయమని గద్దర్‌ అన్నారు. అలాగే కేంద్ర రాష్ట్ర ప్రభుత్వాలు ఎన్నికల సమయంలో ఇచ్చిన హామీలను అమలు చేయడం లేదని, కేసీఆర్‌ దొరల పాలన సాగిస్తున్నాడని.. టీ మాస్‌ రాష్ట్ర కన్వీనర్‌ జాన్‌ వెస్లీ, మాజీ ఎమ్మెల్యే జూలకంటి రంగారెడ్డి అన్నారు. 

17:23 - December 4, 2017

హైదరాబాద్ : కోదండరాం స్వలాభం కోసం నిరుద్యోగ సమస్యపై పోరాడటం లేదని ప్రముఖ విద్యావేత్త చుక్కా రామయ్య అన్నారు. ఇది నిరుద్యోగులందరి సమస్య అని చెప్పారు. నిరుద్యోగ సమస్యను ఏజెండాపైకి తీసుకురావడమే కోదండరాం చేసిన తప్పా అని ప్రభుత్వాన్ని ఆయన ప్రశ్నించారు. అరెస్ట్‌లు, నిర్బంధాలతో ఉద్యమాలను ప్రభుత్వం ఎప్పుడూ ఆపలేదన్నారు. ఇప్పటికైనా కేసీఆర్‌ నిరుద్యోగుల్లో గూడుకట్టుకున్న అసంతృప్తిని గుర్తించాలని, వెంటనే ఖాళీ పోస్టులను భర్తీ చేయాలని డిమాండ్‌ చేశారు. ప్రత్యేక తెలంగాణ ఉద్యమమంతా విద్యార్థుల త్యాగాల ఉద్యమమేనని ప్రజాగాయకుడు, యుద్ధనౌక గద్దర్‌ అన్నారు. కొట్లాడితేనే తెలంగాణ వచ్చిందని.... కొట్లాడే కొలువులు తెచ్చుకుందామని పిలుపునిచ్చారు. పోరాటంతోనే హక్కులు సాధించుకోవాలన్నారు. ఈ సందర్భంగా పాటలుపాడి నిరుద్యోగులను ఉత్సాహపరిచారు. 

19:33 - December 1, 2017

అరే నాయనా..? తెలంగాణ సర్కారోళ్లు.. జర్ర మీరీ డ్రామాలు బంజేయుండ్రిరా నాయనా..? బ్రహ్మదలిస్తె ఆవుసుకు కొద్వనా..? మొగడు తలిస్తె దెబ్బలకు కొద్వనా..?..అంబర్ పేట అన్మంతన్న ఉన్నతాన ఉండెతట్టు లేడుగదా..? అరే నాయన ఎటువోతున్నదిరో లోకము.? డాక్టర్ టీవీ స్టూడియోల గూసుంటడు.. పేషెంట్ ఇంటికాడుంటది.. అరే గాంధీ తాతకు అప్పట్ల బుర్ర ఎల్గనట్టుందిగని.. గంగెద్దు కింద వన్నడు గద్దరన్న.. తన్ను తన్నుమని తన్నిపిచ్చుకోని మరీ సప్పట్లు గొట్టిచ్చుకున్నడు తాత..అరే ఈ తెలంగాణలున్న ప్రతిపక్షాలోళ్లకు ఏం పనిలేనట్టుందివా..? నల్లనీళ్లకాడనో శాతబాయికాడనో ఎట్లుంటదమ్మా పంచాది..? గీ గరం..గరం..ముచ్చట్ల కోసం వీడియో క్లిక్ చేయండి....

21:28 - November 5, 2017

హైదరాబాద్ : సచివాలయానికి వాస్తు బాగోలేకపోతే తెలంగాణ రాష్ట్రం ఎలా వచ్చిందని ప్రొఫెసర్‌ కంచ ఐలయ్య ప్రశ్నించారు. పాఠశాలల్లో తెలుగును తప్పనిసరి చేస్తూ నిర్ణయం తీసుకున్న కేసీఆర్...తన మనవడిని తెలుగు మీడియం స్కూల్లో ఎందుకు చదివించడం లేదన్నారు. టీమాస్‌ ఆవిర్భావ సభలో సీఎం కేసీఆర్‌పై కంచ ఐలయ్య ప్రశ్నల వర్షం కురిపించారు. అటు ప్రజాగాయకుడు గద్దర్‌ సైతం తెలంగాణ ప్రభుత్వంపై విమర్శలు గుప్పించారు.

సికింద్రాబాద్‌ కంటోన్మెంట్‌లో జరిగిన టీమాస్‌ ఆవిర్భావ సభలో వక్తలు తెలంగాణ ప్రభుత్వంపై విమర్శలు ఎక్కుపెట్టారు. సచివాలయానికి వాస్తు బాగోలేకపోతే తెలంగాణ రాష్ట్రం ఎలా వచ్చిందని ప్రొఫెసర్‌ కంచ ఐలయ్య ప్రశ్నించారు. కొత్త సచివాలయం నిర్మించాలన్న కేసీఆర్ ఆలోచనే తప్పని... దానిపై ఖర్చు పెట్టే బదులు, ఆ నిధులను పత్తి రైతుల సమస్యలు పరిష్కరించేందుకు వినియోగిస్తే బాగుంటుందన్నారు. రాష్ట్రంలోని అన్ని పాఠశాలల్లో తెలుగును తప్పనిసరి చేస్తూ నిర్ణయం తీసుకున్న కేసీఆర్... తన మనవడిని మాత్రం తెలుగు మీడియం స్కూల్లో ఎందుకు చదివించడం లేదని ప్రశ్నించారు. ప్రతి ప్రభుత్వ పాఠశాలలో ఇంగ్లీష్ మీడియంను తప్పనిసరి చేయాలని డిమాండ్ చేశారు. త్వరలోనే వరంగల్‌లోని పత్తి మార్కెట్ ను సందర్శించి, అక్కడి వ్యాపారుల ఆగడాలు బయటపెడతామని అన్నారు. ఆత్మహత్యకు పాల్పడిన ప్రతి పత్తి రైతు ఇంట్లో టీమాస్ నిద్ర చేస్తుందని చెప్పారు.

రాష్ట్రంలో నెలకొన్న తాజా పరిస్థితులు, రాజకీయ పరిణామాలపై ప్రజా గాయకుడు గద్దర్ ప్రదర్శించిన కళారూపం ఆహూతులను ఆలోచింప చేసింది. రాష్ట్ర ప్రభుత్వం అవసరం లేకున్నా కొత్త సచివాలయ నిర్మాణం చేస్తోందని గద్దర్‌ అన్నారు. కంటోన్మెంట్ ఏరియాలో నిర్మాణం చేయాలంటే ముందుగా అక్కడి ప్రజల ఆమోదం పొందాలన్నారు. కంటోన్మెంట్ ప్రాంతంలో పుచ్చలపల్లి సుందరయ్య లాంటి ఎందరో వీరులు నివాసమున్నారని గుర్తు చేశారు. దళితులు, బహుజనులకు ప్రభుత్వం బైసన్‌పోలో గ్రౌండ్స్‌లో డబుల్ బెడ్‌రూం ఇళ్లు నిర్మించి ఇవ్వాలని డిమాండ్ చేశారు. కేసీఆర్‌ ఎన్నికల సమయంలో ఇచ్చిన హామీలు నెరవేర్చడంలో ఘోరంగా విఫలమయ్యారని... స్టీరింగ్‌ కమిటీ కన్వీనర్‌ జాన్‌ వెస్లీ అన్నారు. ప్రభుత్వం ప్రజాసమస్యలను పరిష్కరించకపోతే.. జనవరి నుంచి టీమాస్‌ ఆధ్వర్యంలో పోరాటాలు చేస్తామన్నారు. రాష్ట్ర రాజకీయాలను ప్రభావితం చేసే దిశగా టీమాస్‌ ప్రజా సమస్యల పరిష్కారానికి కృషిచేస్తుందన్నారు. ప్రజాగాయకుడు గద్దర్‌ చలోక్తులు, విమర్శలు..ప్రొఫెసర్‌ కంచె ఐలయ్య ప్రశ్నలతో టీమాస్‌ ఆవిర్భావ సభ ఆద్యంతం ఆసక్తిగా సాగింది. 

20:56 - October 17, 2017
06:42 - October 15, 2017

ఆసిఫాబాద్ : కొమురం భీం ఆసిఫాబాద్‌ జిల్లా కేంద్రంలో టీ-మాస్‌ ఆవిర్భావ సభ జరిగింది. ఈ సభకు టీ-మాస్‌ ఫోరం స్టీరింగ్‌ కమిటీ సభ్యులు హాజరయ్యారు. ప్రజల భవిష్యత్‌ కోసమే టీ-మాస్‌ ఏర్పడిందన్నారు గద్దర్‌. ప్రజా సమస్యలు పరిష్కరిస్తానని అధికారంలోకి వచ్చిన నేతలు.. హామీలన్నీ విస్మరిస్తున్నారన్నారు. రాష్ట్రంలో కేసీఆర్‌ కుటుంబ పాలన నడుస్తుందన్నారు సాయిబాబు. వచ్చే ఎన్నికల్లో కేసీఆర్‌కు గుణపాఠం చెప్పాల్సిన అవసరముందన్నారు. ఇక ఈ సభలో ఆడపిల్లలపై గద్దర్‌ పాడిన అందరిని అలరించింది. 

17:31 - September 22, 2017

హైదరాబాద్: పాటలతో కదం తొక్కే ప్రజా యుద్ధ నౌక గద్దర్‌..బతుకమ్మ ఆడి సందడి చేశారు. టీమాస్‌ ఫోరం ఆధ్వర్యంలో చదువుల బతుకమ్మ సంబరాలు...హైదరాబాద్‌ సుందరయ్యపార్కులో ఘనంగా జరిగాయి. విద్యార్థినులు, మహిళలు బతుకమ్మ ఆడారు. ఆడపిల్లలను ఎదగనిద్దాం, బతుకనిద్దాం, చదువనిద్దాం అన్న నినాదంతో చదువుల బతుకమ్మ సంబరాలు నిర్వహిస్తున్నట్లు గద్దర్‌ తెలిపారు. 

Pages

Don't Miss

Subscribe to RSS - గద్దర్