చంద్రబాబు

21:32 - December 14, 2018

హైదరాబాద్: తెలంగాణలో మహాకూటమి అధికారంలోకి వస్తే.. టీడీపీ భవిష్యత్‌ వెలిగిపోతుందని భావించిన చంద్రబాబుకు షాక్‌లు తగులుతున్నాయి. చంద్రబాబుకు వ్యతిరేకంగా ఏపీలో తాము ప్రచారం చేస్తామని కేసీఆర్‌, అసదుద్దీన్‌లు చెప్పడం సంచలనంగా మారింది. అసద్‌ ప్రకటనతో వైసీపీ నేతలు సంతోషంగా ఉంటే.. అధికార టీడీపీ పార్టీ ఢీలా పడుతోంది.
తెలంగాణ ఎన్నికల ఫలితాలతో ఏపీలో రాజకీయ పరిణామాలు మారిపోతున్నాయి. తెలంగాణలో మహాకూటమి ఓటమితో.. అధికార టీడీపీ పార్టీ డీలాపడితే.. వైసీపీ మాత్రం మంచి సంతోషంగా ఉంది. తాజాగా అసదుద్దీన్‌ జగన్‌ తరపున ప్రచారం చేస్తానని ప్రకటించడంతో వైసీపీ నేతల సంతోషానికి హద్దే లేకుండా పోయింది.
తెలంగాణ ఎన్నికల్లో మహాకూటమి తరపున చంద్రబాబు వచ్చి ప్రచారం చేయడంతో.. రానున్న ఏపీ ఎన్నికల్లో తెలంగాణ నేతలు ప్రచారం చేసేందుకు సిద్ధమవుతున్నారు. అయితే.. వీరంతా టీడీపీ తరపున కాదు.. ప్రతిపక్ష నేత జగన్‌ తరపున ప్రచారం చేస్తామంటున్నారు. ఇప్పుడు ఇదే హాట్‌ టాపిక్‌గా మారింది. తెలంగాణలో చంద్రబాబు ప్రచారం చేసి విఫలమయ్యారు. కానీ.. మేము మాత్రం ఏపీలో ప్రచారం చేసి సక్సెస్‌ అవుతామంటున్నారు అసదుద్దీన్‌ ఓవైసీ.
ఇక జగన్‌కు అసదుద్దీన్‌ మధ్య చాలా కాలంగా స్నేహం ఉంది. వైఎస్‌ హయాం నుండి ఇద్దరి మధ్య మంచి సంబంధాలున్నాయి. వైఎస్‌ సీఎంగా ఉన్నప్పుడు దేశంలో ఎక్కడాలేని విధంగా ముస్లింలకు నాలుగు శాతం రిజర్వేషన్లు ఇచ్చారు. అప్పటినుండి వైఎస్‌ కుటుంబంతో ఓవైసీకి స్నేహబంధం మరింత బలపడింది. అక్బరుద్దీన్‌పై దాడి జరిగిన సమయంలో జగన్‌ పరామర్శించగా... ఇటీవల జగన్‌పై దాడి జరిగిన నేపథ్యంలో అసద్‌ పరామర్శించారు.
అసదుద్దీన్‌ వ్యాఖ్యలతో వైసీపీ నేతలు మంచి హుషారుగా ఉన్నారు. ప్రజాస్వామ్యంలో ఎవరైనా, ఎక్కడికైనా వెళ్లి ప్రచారం చేయొచ్చు అంటున్నారు. ఓవైసీ వైసీపీ తరపున ప్రచారం చేస్తే మంచిదే అంటున్నారు వైసీపీ నేతలు.
మొత్తానికి ఏపీలో ప్రచారం చేస్తానన్న ఓవైసీ వ్యాఖ్యలతో రాజకీయ వాతావరణం హీటెక్కింది. మరి నిజంగానే ఓవైసీ ఏపీలో ప్రచారం చేస్తారా ? ఓవైసీ ప్రచారం చేస్తే వైసీపీకి కలిసి వస్తుందా ? అనేది ఇప్పుడు హాట్‌ టాపిక్‌గా మారింది.

20:39 - December 14, 2018

హైదరాబాద్: ఎన్నికలకు 6 నెలల ముందే ఏపీ రాజకీయాలు వేడెక్కాయి. తెలంగాణ ఎన్నికల ఫలితాలు, ముఖ్యమంత్రి కేసీఆర్ వ్యాఖ్యలు ఏపీ రాజకీయాలపై ప్రభావం చూపాయి. ఏపీ రాజకీయాల్లోనూ వేలు పెడతామని కేసీఆర్ చేసిన వ్యాఖ్యలు దుమారం రేపుతున్నాయి. కేసీఆర్ వ్యాఖ్యల ఆధారంగా ప్రతిపక్షం వైఎస్ఆర్ కాంగ్రెస్ పార్టీని తెలుగుదేశం పార్టీ టార్గెట్ చేసింది. కేసీఆర్, జగన్ ఒకటే అని ఆరోపణలు గుప్పించింది. టీఆర్ఎస్ విజయంపై వైసీపీ సంబరాలు అందుకే అని విమర్శలు చేసింది. ఏపీకి ప్రత్యేక హోదా రాకుండా అడ్డుపడుతున్న కేసీఆర్‌తో ఎలా జతకడతారు? అని ప్రశ్నిస్తూ సెంటిమెంట్‌ను రగిల్చే ప్రయత్నం చేసింది.
ఏపీ సీఎం, మంత్రుల మాటల దాడులతో ఉక్కిరిబిక్కిరవుతున్న వైసీపీ.. ఎట్టకేలకు స్పందించింది. తెలుగుదేశం పార్టీ ఆరోపణలపై వైసీపీ నాయకులు ఎదురుదాడికి దిగారు. టీఆర్‌ఎస్‌ను, కేసీఆర్‌ను నెత్తిన పెట్టుకోవాలని చూసింది మీరేనంటూ టీడీపీ నేతలపై బొత్స సత్యనారాయణ ఫైర్ అయ్యారు. కేసీఆర్‌-బాబు లాలూచీ పడకుండా ఉంటే వేరుగా ఉండేదని అన్నారు. ఇవేమీ తెలియకుండా టీడీపీ మంత్రులు అనవసరంగా మాట్లాడుతున్నారని మండిపడ్డారు. తమకు రాష్ట్ర ప్రయోజనాలే ముఖ్యమని, తామెవరితోనూ పొత్తుపెట్టుకునే ప్రసక్తే లేదని బొత్స స్పష్టం చేశారు.

20:04 - December 14, 2018

విశాఖ : ఎయిర్‌పోర్టులో వైసీపీ అధినేత జగన్‌పై జరిగిన హత్యాయత్నం కేసులో హైకోర్టుకు కేంద్ర హోంశాఖ సీల్డ్ కవర్‌లో నివేదికను సమర్పించింది. సిఐఎస్ఎఫ్ అధికారులు ఇచ్చిన రిపోర్ట్ ఆధారంగా కేంద్ర హోంశాఖ ఈ నివేదికను తయారు చేసింది. అయితే ఈ నివేదికపై కోర్టు అసంతృప్తి వ్యక్తం చేస్తూ మరోసారి పూర్తి వివరాలతో సమర్పించాలని ఆదేశించింది. తనపై జరిగిన దాడిపై ఏపీ ప్రభుత్వ అజమాయిషీలేని ప్రత్యేక దర్యాప్తు సంస్థతో విచారణ జరిపించాలని జగన్‌ కోర్టును కోరారు. దీనిపై కేంద్ర ప్రభుత్వ వైఖరి చెప్పాలని కోర్టు ఆదేశించిన నేపధ్యంలో కేంద్ర హోంశాఖ సీల్డ్ కవర్‌లో దర్యాప్తు నివేదికను కోర్టుకు సమర్పించింది. ఈ కేసు విచారణను ఉమ్మడి ధర్మాసనం డిసెంబర్ 21వ తేదీకి వాయిదా వేసింది.

20:38 - December 13, 2018

హైదరాబాద్: నందమూరి హరికృష్ణ ఇంత త్వరగా చనిపోవడానికి ఏపీ ముఖ్యమంత్రి చంద్రబాబు నాయుడే కారణం అని ప్రముఖ సినీ రచయిత, నటుడు పోసాని కృష్ణమురళి అన్నారు. ఎన్టీ రామారావు మృతికి కూడా చంద్రబాబే కారణం అన్నారాయన. చంద్రబాబు చేసిన ద్రోహాన్ని తలుచుకుని హరికృష్ణ కుమిలి కుమిలి ఏడ్చారని చెప్పారు. ఎన్టీ రామారావు ఎంత కుమలిపోయాడో హరికృష్ణ కూడా అంతే కుమిలిపోయారని పోసాని తెలిపారు. 10టీవీకిచ్చిన ఎక్స్‌క్లూజివ్ ఇంటర్వ్యూలో పోసాని కృష్ణమురళి తన మనోగతాన్ని వెల్లడించారు. ప్రస్తుత రాజకీయాలపై కీలక వ్యాఖ్యలు చేశారు. కేసీఆర్ అంటే ఎందుకిష్టం? చంద్రబాబు అంటే ఎందుకు ద్వేషం? అనే అంశాలపై వివరణ ఇచ్చారు.
ఎన్టీఆర్ మృతికి బాబే కారణం:
ఎన్టీ రామారావుకి చంద్రబాబు వెన్నుపోటు పొడిచారని, ఆయన నుంచి పార్టీని లాక్కున్నారని పోసాని వాపోయారు. హరికృష్ణ కుటుంబానికి అన్యాయం చేశారని ఆరోపించారు. కొడుకుని ఎమ్మెల్సీ చేసి మంత్రిని చేసిన చంద్రబాబు.. హరికృష్ణని అదే విధంగా ఎందుకు మంత్రిని చేయలేదని ప్రశ్నించారు. లోకేష్‌కు ఎలాంటి క్వాలిఫికేషన్ లేకున్నా మంత్రి పదవి ఇచ్చారని మండిపడ్డారు. తెలంగాణ ఎన్నికల్లో సుహాసినిని నిలబెట్టి బలిపశువుని చేశారని ఆవేదన వ్యక్తం చేశారు. హరికృష్ణ మీద ప్రేమే ఉంటే.. సుహాసినిని ఎమ్మెల్సీ చేసి మంత్రి పదవి ఇవ్వొచ్చు కదా? అని చంద్రబాబుని నిలదీశారు. ఎవరి వల్ల ఉపయోగం ఉంటుందో వారికి మాత్రమే చంద్రబాబు పదవులు ఇస్తారని పోసాని ద్వజమెత్తారు. సుహాసినిని నిలబెడితే కమ్మ సామాజికవర్గం వాళ్లంతా ఓటు వేస్తారనే స్వార్థంతో చంద్రబాబు అలా చేశారని ఆరోపించారు. ఎన్టీ రామారావుపై చెప్పులు వేయించి ఘోరంగా అవమానించింది చంద్రబాబే అని పోసాని అన్నారు. ఆయన పార్టీ లాక్కున్నారని, ఎన్టీ రామారావుని చంపింది కూడా బాబే అని పోసాని తీవ్ర వ్యాఖ్యలు చేశారు. ఎన్టీ రామారావుకి చంద్రబాబు ద్రోహం చేసినా.. ఎన్టీఆర్ కొడుకుల్లో ఒక్కరు కూడా చంద్రబాబుని నిలయదీకపోవడం బాధాకరమన్నారు. అదే స్థానంలో తాను ఉండి ఉంటే చంద్రబాబు చొక్కా పట్టుకుని నిలదీసేవాడిని అన్నారు.

18:24 - December 13, 2018

హైదరాబాద్: తెలంగాణ ముఖ్యమంత్రి కేసీఆర్‌పై ప్రముఖ సినీ రచయిత, నటుడు పోసాని కృష్ణమురళి ప్రశంసల వర్షం కురిపించారు. జనం నుంచి పుట్టిన నాయకుడు కేసీఆర్ అని, క్రెడిబులిటీ ఉన్న లీడర్ అని, దేశంలోనే బెస్ట్ సీఎం అని కితాబిచ్చారు. రైతు బంధు, పెన్షన్లు, కంటి వెలుగు, కళ్యాణ లక్ష్మి, మిషన్ భగీరథ లాంటి సంక్షేమ పథకాలు తెలంగాణలో తప్ప దేశంలో ఎక్కడా లేవన్నారు. 10 టీవీకిచ్చిన ఎక్స్‌క్లూజివ్ ఇంటర్వ్యూలో ప్రస్తుత రాజకీయలపై పోసాని కీలక వ్యాఖ్యలు చేశారు. కేసీఆర్ అంటే తనకు ఎందుకు ఇష్టమో, అభిమానమో తెలిపారు. కేసీఆర్‌ తనకు ఆరాధ్య నాయకుడు కావడానికి గల కారణాలను తెలిపారు. అసెంబ్లీ ఎన్నికల్లో టీఆర్ఎస్ గెలవాలని దేవుడిని ఎందుకు ప్రార్థించారో వెల్లడించారు. తెలంగాణ ముఖ్యమంత్రి కేసీఆర్‌ను ప్రశంసలతో ముంచెత్తారు. కేసీఆర్ బక్కగా, 40 కిలోలు ఉంటారు, కానీ. 400 కిలోల ఆర్డీఎక్స్‌తో సమానం అన్నారు. బ్లాస్ట్ అయితే ఇండియా మొత్తం పేలిపోతుందన్నారు. తెలంగాణలో ప్రజలు సుఖంగా ఉన్నారు అంటే.. దానికి కేసీఆరే కారణం అన్నారు. తెలంగాణను మరింతగా అభివృద్ది చేసే సత్తా, బంగారు తెలంగాణగా మార్చే శక్తి కేసీఆర్‌కు మాత్రమే ఉందని పోసాని స్పష్టం చేశారు. ఎవరి దయాదాక్షిణ్యాల వల్ల తెలంగాణ రాలేదని, కేసీఆర్ పోరాటం చేసి, తన ప్రాణాలను పణంగా పెట్టి తెలంగాణను తెచ్చుకున్నారని పోసాని చెప్పారు.

18:40 - December 9, 2018

విజయవాడ: తెలంగాణలో అధికార మార్పిడి ఖాయం అని ఏపీ టీడీపీ ఎమ్మెల్సీ బుద్ధా వెంకన్న జోస్యం చెప్పారు. ప్రజాకూటమి విజయం తథ్యమన్నారాయన. వైసీపీ అధినేత జగన్, జనసేన చీఫ్ పవన్ కళ్యాణ్.. టీఆర్ఎస్‌కు లోపాయికారిగా సహకరించినా.. ప్రజలు మహాకూటమికే పట్టంకట్టబోతున్నారని బుద్దా వెంకన్న చెప్పారు. తెలంగాణలో ప్రజాకూటమి గెలవబోతోందన్న బుద్దా వెంకన్న.. దానికి ముఖ్యకారణం ఏపీ ముఖ్యమంత్రి చంద్రబాబు నాయుడే అని చెప్పారు. తెలుగువారు దమ్ము, ధైర్యంతో మహాకూటమి ఏర్పాటు చేసి.. తెలుగు ప్రజలంతా ఐక్యమంతంగా ఉండాలని, తెలుగు ప్రజలకు ద్రోహం జరక్కుండా చూసేందుకు చంద్రబాబు మహాకూటమిలో భాగస్వామ్యం అయ్యారని బుద్దా వెంకన్న చెప్పారు.

15:46 - December 5, 2018

సూర్యపేట : టీడీపీ జాతీయ అధ్యక్షుడు, ఏపీ సీఎం చంద్రబాబు బీజేపీ, టీఆర్ఎస్ లపై తీవ్రస్థాయిలో మండిపడ్డారు. రెండు పార్టీల విధానాలను ఎండగట్టారు. రాజ్యాంగబద్ధ సంస్థలను బీజేపీ నాశనం చేసిందని మండిపడ్డారు. నోట్ల రద్దు, జీఎస్టీతో ప్రజలు ఇబ్బందిపడుతున్నారని తెలిపారు. మోడీ అందరిపై దాడి చేస్తున్నారని పేర్కొన్నారు. ప్రజా బలం లేని పార్టీ బీజేపీ అని ఎద్దేవా చేశారు. రాష్ట్రాన్ని కేసీఆర్, దేశాన్ని మోడీ నాశనం చేస్తున్నారని విమర్శించారు. దేశాన్ని కాపాడుకునేందుకే కాంగ్రెస్ తో కలిశామని తెలిపారు. కోదాడలో నిర్వహించిన ప్రజా కూటమి బహిరంగ సభలో చంద్రబాబు పాల్గొని, మాట్లాడారు. 
రాష్ట్రంలో ప్రజాస్వామ్యం లేదు...
కేసీఆర్ తనను ఎందుకు తిడుతున్నారో అర్థం కావడం లేదన్నారు. ఎంఐఎం, బీజేపీతో కేసీఆర్ స్నేహం చేస్తున్నారని పేర్కొన్నారు. రాష్ట్రాన్ని కేసీఆర్ అప్పులపాలు చేశారని విమర్శించారు. ఈ ఎన్నికల్లో టీఆర్ ఎస్ ను ఓడించాలని పిలుపు ఇచ్చారు. టీడీపీ, కాంగ్రెస్ కలిసి ఓఆర్ఆర్, హైటెక్ సిటీ కట్టామని తెలిపారు. దేశంలో రెండే కూటములున్నాయని..టీఆర్ఎస్, ఎంఐఎం ఎవరికి మద్దతు ఇస్తారో చెప్పాలని డిమాండ్ చేశారు. ప్రభుత్వాలు ప్రజల కోసం పని చేయాలన్నారు. రాష్ట్రంలో ప్రజాస్వామ్యం లేదని విమర్శించారు. రేవంత్ ను అక్రమంగా అరెస్టు చేశారని పేర్కొన్నారు. ప్రజల కోసమే తెలంగాణకు వచ్చానని తెలిపారు. ఈవీఎంలతో ప్రజలు జాగ్రత్తగా ఉండాలన్నారు. 

 

10:24 - December 4, 2018

మరొక్క రోజే మిగిలింది. ఆ తర్వాత మైకులన్నీ మూగబోతాయి. ప్రచారం బంద్ అవుతుంది. దీంతో అన్ని పార్టీలు ముమ్మరం చేశాయి. తెలంగాణ అసెంబ్లీ ఎన్నికల ప్రచారం డిసెంబర్ 5తో ముగియనుంది. ప్రచారం ముగింపునకు కౌంట్‌డౌన్‌ మొదలవడంతో అన్ని పార్టీల అభ్యర్థులు ప్రచారాన్ని మరింత ఉధృతం చేశారు. ఫుల్ స్పీడ్‌తో జనాల మధ్య తిరిగేస్తున్నారు. హామీల వర్షం కురిపిస్తున్నారు. ఓటర్లను ఆకట్టుకునేందుకు అన్ని రకాల ప్రయత్నాలు చేస్తున్నారు. టీఆర్ఎస్ అధినేత కేసీఆర్‌ ఐదు ప్రజా ఆశీర్వాద సభల్లో మాట్లాడనున్నారు. అలంపూర్‌, గద్వాల, మక్తల్‌, కొడంగల్‌, వికారాబాద్‌ నియోజకవర్గాల్లో కేసీఆర్‌ పర్యటించనున్నారు.
* ఎన్నికల ప్రచారం ముగింపునకు కౌంట్‌డౌన్
* ఐదు నియోజకవర్గాల్లో కేసీఆర్‌ ప్రచార సభలు
* అలంపూర్, గద్వాల, మక్తల్, కొడంగల్, వికారాబాద్‌ నియోజకవర్గాల్లో ప్రజా ఆశీర్వాద సభలు

టీడీపీ అధినేత చంద్రబాబు నాయుడు...సికింద్రాబాద్‌లో ఎన్నికల ప్రచారం చేయనున్నారు. నియోజకవర్గంలో రోడ్‌ షోలు, సభల ద్వారా ఎన్నికల ప్రచారం చేయనున్నారు. మధ్యాహ్నం మూడున్నరకు మైలార్‌గడ్డలో జరిగే సభలో ప్రసంగిస్తారు. వెస్ట్ మారేడ్‌పల్లి, అన్నా నగర్ చౌరస్తా మీదుగా బాపూజీ నగర్‌ చౌరస్తాకు చేరుకుంటారు. తర్వాత మల్కాజ్‌గిరి నియోజకవర్గంలో కూటమి అభ్యర్థి దిలీప్‌ కుమార్ తరపున చంద్రబాబు ప్రచారం చేయనున్నారు.

* ఆర్మూర్‌లో ఎంపీ కవిత పర్యటన.. జీవన్ రెడ్డికి మద్దతుగా ప్రచారం
* ఖమ్మంలో కేటీఆర్ రోడ్ షో.. తుమ్మల, పువ్వాడ అజయ్‌కు మద్దతుగా ప్రచారం
* డిచ్‌పల్లిలో బీజేపీ అభ్యర్థి ఆనంద్‌రెడ్డి తరఫున స్మృతి ఇరానీ ప్రచారం
* సూర్యాపేటలో విజయశాంతి రోడ్ షో, దామోదర్‌రెడ్డికి మద్దతుగా ప్రచారం

11:13 - December 3, 2018

హైదరాబాద్ : సినిమాల్లో పంచ్ డైలాగ్సే కాదు..ఎమోషనల్ డైలాగ్స్ లో కూడా బాలయ్యది ఓ స్పెషల్. అటు ఎమ్మెల్యేగా..ఇటు ట్రెండ్ సినిమాలతో అభిమానులను ఆకట్టుకోవటమే కాదు తెలంగాణ ఎన్నికల ప్రచారంలో పాల్గొన్న బాలయ్య తెలంగాణ యాసలోకూడా అదరగొట్టేస్తున్నారు. నగరంలోని శేరిలింగంపల్లి నియోకవర్గంలో రోడ్డు షోలో తెలంగాణ యాస, భాషతో మాట్లాడి సభికుల్లో జోష్‌ నింపారు. ప్రభుత్వం రైతుల్ని ఇబ్బంది పెట్టడం వల్లే వందలాది మంది ఆత్మహత్య చేసుకున్నారని ధ్వజమెత్తారు. ఎందరో త్యాగాల ఫలితంగా వచ్చిన తెలంగాణలో ఉపాధి, ఉద్యోగాల్లేక పలువురు ఆత్మహత్యకు పాల్పడడం ఆవేదన కలిగించే విషయమన్నారు. 

ల్యాప్‌టాప్‌ కనిపెట్టింది మీరేనా’ అంటూ ఏపీ సీఎం చంద్రబాబును వ్యంగ్యంగా విమర్శిస్తున్న వారికి తనదైన శైలిలో జవాబిచ్చారు బాలయ్య. చంద్రబాబు రాజకీయ జీవితం హిస్టరీ అయితే మీది లాటరీ అని, రాళ్లగుట్టలతో నిండిన హైదరాబాద్‌ను హైటెక్‌ సిటీగా అభివృద్ధి చేసిన ఘనత బాబుదని కౌంటర్ ఎటాక్ ఇచ్చారు ప్రత్యర్థి పార్టీ నాయకులకు.చరిత్ర చెరిపేస్తే చెరిగిపోయేది కాదని, సైబరాబాద్‌ సృష్టికర్త ముమ్మాటికీ చంద్రబాబేనని బాలకృష్ణ ప్రశంసించారు. స్వరాష్ట్రం సిద్ధించిన తరువాత రైతు రాజ్యం వస్తుందని అంతా ఆశిస్తే రాబందుల రాజ్యం వచ్చిందని..టీడీపీ ఒక కులం, మతం కోసం పుట్టిన పార్టీ కాదని, సామాజిక న్యాయం కోసం ప్రజల్లోంచి పుట్టిన పార్టీ తెలుగుదేశం పార్టీ అనీ..కారుకూతలు కూస్తున్న వారికి ఓటర్లే బుద్ధి చెప్పాలని పిలుపునిచ్చారు. బాలయ్య మాటలతో టీడీపీ శ్రేణుల్లో సరికొత్త జోష్ నిండింది.
 

10:21 - December 2, 2018

హైదరాబాద్ : తెలంగాణలో ఎన్నికల ప్రచారం ముమ్మరంగా సాగుతోంది. రాష్ట్ర వ్యాప్తంగా విస్తృతంగా ప్రచారం నిర్వహిస్తున్నారు. రాజకీయ పార్టీలు ప్రచారాన్ని వేగవంతం చేశాయి. ఓటర్లను ఆకర్షించేందుకు ఆయా పార్టీలు ప్రముఖులను ఎన్నికల ప్రచారంలోకి దింపుతున్నాయి. వారితో ప్రచారం చేయించి, ఓట్లు పొందాలని భావిస్తున్నారు. ప్రచారానికి ఇంకా 4 రోజులే మిగిలివుండటంతో ప్రచారాన్ని వేగవంతం చేశారు. టీడీపీ జాతీయ అధ్యక్షుడు, ఏపీ సీఎం చంద్రబాబు ఇవాళా తెలంగాణలో ప్రచారం చేయనున్నారు. చంద్రబాబుతోపాటు హీరో, ఎమ్మెల్యే బాలకృష్ణ ప్రచారం చేయనున్నారు. హైరాదాబాద్ లో చంద్రబాబు, బాలకృష్ణ రోడ్ షోలు నిర్వహించనున్నారు. మహాకూటమి తరపున ప్రచారం చేయనున్నారు. డిసెంబర్ 1 నుంచి 5 వరకు తెలంగాణలో చంద్రబాబు ప్రచారం చేయనున్నారు. మహాకూటమి అభ్యర్థుల తరపున ప్రచారం చేస్తున్నారు. బాబుతోపాటు హీరో, ఎమ్మెల్యే బాలకృష్ణ కూడా ఎన్నికల ప్రచారంలో పాల్గొననున్నారు. నిన్న రాజేంద్రనగర్, కూకట్ పల్లిలో చంద్రబాబు ప్రచారం నిర్వహించారు. సనత్ నగర్ లో బాలకృష్ణ పర్యటించారు.
ఉప్పల్, మలక్ పేట, శేరిలింగంపల్లిలో ప్రచారం    
ఇవాళా ఉప్పల్, మలక్ పేటలో చంద్రబాబు ఎన్నికల ప్రచారం నిర్వహించనున్నారు. ఆజాద్, కర్ణాటక మంత్రి శివకుమార్ పాల్గొనున్నారు. శేరిలింగంపల్లిలో నేడు బాలకృష్ణ ఎన్నికల ప్రచారం చేయనున్నారు. ఇప్పటికే చంద్రబాబు, రాహల్ గాంధీ హైదరాబాద్ లో ఎన్నికల ప్రచారంలో పాల్గొన్నారు. మేడ్చల్ లో ఏర్పాటు చేసిన కాంగ్రెస్ సభలో సోనియాగాంధీ, రాహుల్ గాంధీ పాల్గొన్న సంగతి తెలిసిందే. 

 

Pages

Don't Miss

Subscribe to RSS - చంద్రబాబు