చంద్రబాబు నాయుడు

07:39 - December 14, 2017

ఆంధ్రప్రదేశ్‌ జీవనాడి పోలవరం ప్రాజెక్టును 2018 నాటికి పూర్తి చేయాలని కేంద్ర, రాష్ట్ర ప్రభుత్వాలు నిర్ణయించారు. ఈ విషయంలో ఎవరికీ ఎటువంటి అనుమానాలు కానీ, అపోహలు కానీ అవసరంలేదని రెండు ప్రభుత్వాలు స్పష్టం చేశాయి. పెండింగ్‌ బిల్లులు చెల్లించేందుకు కేంద్రం అంగీకరించింది. ఈ అంశంపై టెన్ టివిలో జరిగిన ప్రత్యేక చర్చలో సూర్యప్రకాష్ (టిడిపి), మధుసూధన్ (వైసీపీ)లు పాల్గొని అభిప్రాయాలు వ్యక్తం చేశారు. 

10:17 - December 8, 2017

విజయవాడ : తన తండ్రి ఆస్తుల్లో పెద్దగా మార్పు లేదని, మార్కెట్ విలువ ప్రకారమే ఆస్తుల విలువ మారుతూ వస్తోందని ఏపీ సీఎం చంద్రబాబు నాయుడు తనయుడు, ఏపీ మంత్రి నారా లోకేష్ పేర్కొన్నారు. వరుసగా ఏడో సారి నారా వారి ఆస్తులను ఆయన వెల్లడించారు. కుమారుడు దేవాన్ష్ ఆస్తుల్లోనూ మార్పు లేదన్నారు. చంద్రబాబు నికర ఆస్తులు రూ. 2.53 కోట్లు, భువనేశ్వరి ఆస్తులు రూ. 25.41 కోట్లు, లోకేశ్ నికర ఆస్తులు రూ. 15.21 కోట్లు, బ్రహ్మణి నికర ఆస్తులు రూ.15.01 కోట్లు, దేవాన్ష్ నికర ఆస్తులు రూ.11.54 కోట్లు అని తెలిపారు. తమపై కొంతమంది ఆరోపణలు చేస్తున్నారని, ఆరోపణలు చేసే ముందు వాళ్ల ఆస్తులు ప్రకటిస్తే బాగుంటుందని సూచించారు. పద్ధతి ప్రకారం వ్యాపారం చేయడం తప్పుకాదని, వైసీపీ అధినేత జగన్మోహన్ రెడ్డి కూడా తమ ఆస్తుల వివరాలను ప్రకటించాలన్నారు. 

09:31 - December 8, 2017

విజయవాడ : తాము ఒక పద్ధతి ప్రకారం వెళుతున్నామని సీఎం చంద్రబాబు నాయుడు తనయుడు, ఏపీ మంత్రి నారా లోకేష్ పేర్కొన్నారు. శుక్రవారం ఆయన నారా వారి ఆస్తులను ప్రకటించారు. గత ఆరేళ్లుగా ఆయన ఆస్తులను ప్రకటిస్తున్న సంగతి తెలిసిందే. పద్ధతి ప్రకారం చేసుకుంటూ వెళుతున్నామని, ఆదాయం వస్తుందంటే హెరిటేజ్ సంస్థ నుండి..రెంటల్స్ కారణమన్నారు. ఏ రాజకీయ కుటుంబం చేయని విధంగా ఆస్తులను ప్రకటించడం జరుగుతోందన్నారు. ఆరోపణలు చేయవచ్చు కానీ అంతకంటే ముందు ఆస్తులను ప్రకటించాలని, అలా చేయకపోతే ప్రజలు నమ్మరని తెలిపారు. 2004 కంటే ఎంతుంది ? ఇప్పటి వరకు ఆస్తులు ఎంతున్నాయో చెప్పాలని సూచించారు. గతంలో దివంగత వైఎస్ సీఎంగా ఉన్న సమయంలో హెరిటేజ్ కంపెనీపై ఎన్నో ఛార్జీషీట్ లు దాఖలు చేశారని గుర్తు చేశారు. కానీ ఏమి నిరూపించలేకపోయారని, వైసీపీ నేతలు కూడా ఆస్తులను ప్రకటించాలని సూచించారు. జగన్ అక్రమమార్గంలో ఆస్తులను సంపాదించుకున్నారని ఆరోపించారు. పోలవరం నిర్మాణంపై జగన్..పవన్ కు చాలా తేడా ఉందని, పోలవరం నిర్మాణం కావద్దని జగన్ కోరుకుంటున్నారని తెలిపారు.

సీఎం చంద్రబాబు నాయుడు ఆస్తుల్లో పెద్దగా మార్పులేవని, బాబుకు రూ. 3కోట్ల అప్పులున్నాయన్నారు. ఉన్న ఇల్లును కూల్చివేసి కొత్తగా ఇల్లు కట్టుకోవడం జరిగిందని, ఇందుక రూ. 4 కోట్లు ఖర్చు చేసినట్లు తెలిపారు. లోకేష్ ఆస్తుల విలువ రూ. 15.20 కోట్లు, బ్రాహ్మణి ఆస్తుల విలువ రూ. 15 కోట్లు. 

13:14 - December 7, 2017

విజయవాడ : ప్రతిపక్షాలు పోలవరం ప్రాజెక్టు నిర్మాణాన్ని ప్రతిపక్షాలు అడ్డుకుంటున్నాయని ఏపీ సీఎం చంద్రబాబు నాయుడు పేర్కొన్నారు. గురువారం ఆయన మీడియాతో మాట్లాడారు. కేంద్ర మంత్రి నితిన్ గడ్కరిని కలిసిన కాంగ్రెస్ నేతలు ఈ అంశంపై ఫిర్యాదు చేశారని తెలిపారు. ఈ ప్రాజెక్టును పూర్తి చేయడం తన లక్ష్యమని తెలిపారు. పోలవరం నిర్మాణానికి అడ్డంకులు సృష్టిస్తూ కోర్టుల్లో కేసులు వేస్తున్నారని పేర్కొన్నారు. ఎట్టిపరిస్థితుల్లో ప్రాజెక్టు పూర్తి చేయాలనే లక్ష్యంగా ఉన్నట్లు రాష్ట్ర ప్రభుత్వం ఎందుకు చేయాలని ప్రశ్నిస్తున్నారని పేర్కొన్నారు. 

12:14 - December 7, 2017

విజయవాడ : దక్షిణకొరియా పర్యటన ముగించుకున్న సీఎం చంద్రబాబు నాయుడు అమరావతికి చేరుకున్నారు. బుధవారం అర్ధరాత్రి గన్నవరం చేరుకున్న బాబుకు ఏపీ మంత్రులు, ఎమ్మెల్సీలు, ఎమ్మెల్యేలు ఘన స్వాగతం పలికారు. ఈ సందర్భంగా పర్యటనకు సంబంధించిన విశేషాలను బాబు గురువారం మీడియాకు తెలియచేశారు.

5వేల కోట్లు పెట్టుబడులు వచ్చే విధంగా ఒప్పందాలు చేసుకున్నట్లు, రాష్ట్రంలో పెట్టుబడులు పెట్టేందుకు చాలా కంపెనీలు ఆసక్తి చూపిస్తున్నాయన్నారు. జపాన్ కంపెనీలతో ఎప్పటి నుండో తాము పనిచేయడం జరుగుతోందని, ఆయా కంపెనీలు ఏపీకి రావాలని ఆకాంక్షించారు. ప్రపంచంలో ఉన్న నాలెడ్జ్ ను ఏపీకి తీసుకొచ్చే విధంగా కృషి చేయడం జరుగుతోందన్నారు. రాబోయే రోజుల్లో ఏపీ పరిశ్రమల హబ్ గా మారుతుందని పేర్కొన్నారు. ఇంటర్నేషనల్ లాంగ్వేజెస్ నేర్చుకోవాల్సిన అవసరం ఉందని పేర్కొన్నారు. 

20:43 - December 3, 2017

పోల‌వ‌రం ప్రాజెక్టు నిర్మాణం కేంద్రమే నిర్మాణం చేయాలని కాంగ్రెస్ ఎంపీ కేవీపీ పేర్కొన్నారు. ఆయన ఇటీవలే హైకోర్టును ఆశ్రయించిన సంగతి తెలిసిందే. ఆర్తిక సమస్యలతో సతమతమౌతున్న అవసరం లేని పోలవరం భారాన్ని మోయాల్సినవసరం లేదన్నారు. కానీ రాష్ట్రమే నిర్మాణం చేయాలన్న ఏపీ రాష్ట్ర ప్రభుత్వ నిర్ణయం వెనుక మతలబేంటో తెలియడం లేదన్నారు. పోలవరం నిర్మాణానికి అన్ని అనుమతులూ తీసుకువచ్చింది దివంగత సీఎం వైఎస్ రాజశేఖరరెడ్డేనని ఆయన చెప్పారు. పోలవరం నిర్మాణంపై రాష్ట్ర ప్రభుత్వం తీసుకుంటున్న వైఖరి..కేంద్రం స్పందన..ఇతర విషయాలపై తెలుసుకొనేందుకు టెన్ టివి ప్రయత్నించింది. అందులో భాగంగా ఆయనతో ఇన్ పుట్ ఎడిటర్ కృష్ణ సాయిరాం ముచ్చటించారు. పూర్తి విషయాలకు వీడియో క్లిక్ చేయండి. 

21:17 - December 2, 2017

విజయవాడ : కాపులను బీసీలో చేరుస్తూ ప్రభుత్వం తీసుకున్న నిర్ణయంపై.. ఏపీలో మిశ్రమ స్పందన వస్తోంది. కాపు సంఘాలు హర్షం వ్యక్తం చేస్తుంటే.. బీసీ నాయకులు ఆగ్రహం వ్యక్తం చేస్తున్నారు. ఆంధ్రప్రదేశ్‌లో... బీసీల్లో చేర్చాలంటూ ... కాపు సామాజిక వర్గం చేసిన పోరాటానికి ఫలితం దక్కింది. కాపులకు ఐదు శాతం రిజర్వేషన్లు కల్పిస్తూ.. ఏపీ ప్రభుత్వం నిర్ణయం తీసుకుంది. అయితే ప్రభుత్వం తీసుకున్న ఈ నిర్ణయం పట్ల కొందరు ఆనందం వ్యక్తం చేస్తే.. మరికొందరు.. మండిపడుతున్నారు.

కాపులకు రిజర్వేషన్‌ కల్పించడంతో... తిరుపతి, విశాఖపట్నంలలో కాపు సామాజిక వర్గీయులు సంబరాలు జరుపుకున్నారు. ఈ సందర్భంగా సీఎం చంద్రబాబునాయుడుకు ధన్యవాదాలు తెలియజేసుకున్నారు. కాపులను బీసీల్లో చేర్చే నిర్ణయంపై కాపు ఉద్యమ నేత... ముద్రగడ పద్మనాభం సంతోషం వ్యక్తం చేశారు. అయితే ఐదు శాతం రిజర్వేషన్‌ల కల్పించడంపై అసంతృప్తి వ్యక్తం చేశారు. పది శాతం రిజర్వేషన్‌ కల్పించాలని ఆయన కోరారు. అలాగే కాపులను బీసీలో చేర్చడం కాపులకు చరిత్రలో మర్చిపోలేని రోజని, రిజర్వేషన్లతో కాపులకు మెరుగైన అవకాశాలు అందుతాయని పలువురు నాయకులు అభిప్రాయపడ్డారు.

బీసీల్లో కాపులను చేర్చడాన్ని నిరసిస్తూ.. పలు జిల్లాలో బీసీ సంఘాల నాయకులు ఆందోళనలు చేశారు. ప్రభుత్వ దిష్టిబొమ్మను దహనం చేసి.. తమ వ్యతిరేకతను తెలియజేశారు. బీసీలకు అన్యాయం జరుగుతుందని .. నినదించారు. ప్రభుత్వ నిర్ణయాన్ని బీసీ సంక్షేమ సంఘం కూడా ఖండించింది. వెంటనే నిర్ణయం వెనక్కి తీసుకోవాలని బీసీ సంక్షేమ సంఘం జాతీయ అధ్యక్షుడు ఆర్.కృష్ణయ్య డిమాండ్ చేశారు.

అదేవిధంగా వైసీపీ నేత పిల్లి సుభాష్ చంద్రబోస్ కూడా ప్రభుత్వ తీరుని తప్పుబట్టారు. కాపు రిజర్వేషన్లకు వ్యతిరేకంగా ఉద్యమిస్తామని హెచ్చరించారు. అలాగే కాపు రిజర్వేషన్‌కు తాము వ్యతిరేకం కాకపోయినా.. బీసీలకు ఏ మేరకు న్యాయం చేయగలరో తేటతెల్లం చేయాలని కాంగ్రెస్‌ నాయకులు కోరుతున్నారు. అదేవిధంగా వాల్మీకులను ఎస్టీ జాబితాలో చేర్చే నిర్ణయంపై కూడా భిన్న స్పందనలు వస్తున్నాయి. ఈ నిర్ణయంపై అనంతపురంలో.. వాల్మీకి నాయకులు సంబరాలు జరుపుకుంటే.. కర్నూలులో గిరిజన సంఘాలు ఆందోళన చేపట్టాయి. 

21:21 - December 1, 2017

 

విజయవాడ : పోలవరం ప్రాజెక్టు పనులు నిలిపివేయాలంటూ కేంద్రం రాసిన లేఖపై ఏపీలో రాజకీయ రగడ జరుగుతోంది. ఇందుకు చంద్రబాబు కేంద్రాన్ని నిందిస్తుంటే.. టీడీపీ మిత్రపక్షమైన బీజేపీ సహా ఇతర ప్రతిపక్షాలు ముఖ్యమంత్రి వైఖరిని తప్పుపడుతున్నాయి. మరోవైపు ఎవరు ఎన్ని అడ్డంకులు, అవరోధాలు సృష్టించినా పోలవరం ప్రాజెక్టుపై వెనుకడుగు వేసే ప్రసక్తేలేదని ఏపీ ముఖ్యమంత్రి చంద్రబాబు స్పష్టం చేశారు. పోవలరం నిర్మాణంతోపాటు రాష్ట్రాభివృద్ధికి చేయూత ఇవ్వాల్సిన బాధ్యత కేంద్రంపై ఉందన్న విషయాన్ని మరోసారి గుర్తు చేశారు. రాష్ట్రాభివృద్ధిలో ముడిపడివున్న అతి సున్నితమైన పోలవరం అంశాన్ని రాజకీయం చేయొద్దని టీడీఎల్‌పీ సమావేశంలో పార్టీలకు విజ్ఞప్తి చేశారు.

అమరావతిలో తెలుగుదేశం శాసనసభాపక్షం సమావేశం జరిగింది. టీడీపీ జాతీయ అధ్యక్షుడు, ముఖ్యమంత్రి చంద్రబాబు అధ్యక్షతన జరిగిన ఈ భేటీకి పార్టీ ఎమ్మెల్యేలు, ఎమ్మెల్సీలు హాజరయ్యారు. అసెంబ్లీ సమావేశాలు జరుగుతున్న తీరుతోపాటు రాష్ట్రాభివృద్ధికి ప్రభుతం తీసుకుంటున్న చర్యలపైనా సమావేశంలో చర్చించారు. అమరావతిలో ప్రభుత్వ ఉద్యోగులు, కార్యదర్శులు, శాసనసభ్యులకు నిర్మిస్తున్న వసతి, సచివాలయం కొత్త నమూనాల గురించి సీఎం శాసనసభ్యుల దృష్టికి తెచ్చారు.

విభజనతో అన్ని విధాల నష్టపోయిన రాష్ట్రానికి చేయూత ఇవ్వాల్సిన బాధ్యత కేంద్రంపై ఉందని చంద్రబాబు టీడీఎల్‌పీ భేటీలో అన్నారు. పోలవరం పనులు నిలిపివేయాలంటూ కేంద్ర జలనవరుల శాఖ కార్యదర్శి అమర్‌జిత్‌సింగ్‌ రాసిన లేఖపై ప్రధాని మోదీతో మాట్లాడాలని చంద్రబాబు నిర్ణయించుకున్నారు. పోలవరం ఆపాలంటూ కేంద్రం రాసిన లేఖపై రాజకీయ పార్టీలు రకరకాల వ్యాఖ్యలు చేస్తున్న తరుణంలో చంద్రబాబు తీవ్రంగా స్పందించారు. పోలవరం లేఖను బీజేపీ-టీడీపీ సంబంధాలతో ముడిపెట్టడాన్ని తప్పు పట్టారు. పార్టీ ప్రజాప్రతినిధులెవ్వరూ కూడా దీనిపై రాజకీయ వ్యాఖ్యలు చేయొద్దని ఆదేశించారు.

మరోవైపు పోలవరం లేఖపై చంద్రబాబు తీవ్రంగా స్పదిస్తున్న తీరును బీజేపీ తప్పుపడుతోంది. పద్నాలుగు వందల కోట్ల స్పిల్‌వే టెండర్ల ప్రక్రియలో లోపాలు ఉండటం వలనే కేంద్రం జోక్యం చేసుకోవాల్సి వచ్చిందని బీజేపీ ఎమ్మెల్సీ సోము వీర్రాజు మండపడ్డారు. పోలవరం నిర్మాణాన్ని నీరుకార్చేందుకు చంద్రబాబు ప్రయత్నిస్తున్నారని వైసీపీ ఆరోపించింది. కేంద్రం నిర్మిస్తామని చెప్పినా... దరిద్రపు ఆలోచనలతోనే చంద్రబాబు ఈ ప్రాజెక్టు బాధ్యతలను భుజాలకెత్తుకున్నారని వైసీపీ ఎంపీ మేకపాటి రాజమోహన్‌రెడ్డి ఆగ్రహం వ్యక్తం చేశారు. అటు సీపీఐ కూడా.. మోదీ బ్లాక్‌మెయిల్‌ రాజకీయాలు చేస్తున్నారని ఆరోపిస్తూ.. చంద్రబాబు ఇప్పటికైనా అఖిలపక్షాన్ని ఢిల్లీకి తీసుకు వెళ్లాలని పార్టీ కార్యదర్శి నారాయణ డిమాండ్‌ చేశారు. పోలవరంపై కేంద్ర, రాష్ట్ర ప్రభుత్వాలు నాటకాలు ఆడుతున్నాయిన ఏపీ పీసీసీ చీఫ్‌ రఘువీరెడ్డి విమర్శించారు. పోలవరం పనులు నిలిపివేయాలంటూ కేంద్రం రాసిన లేఖపై పరస్పర నిందారోపణలు చేసుకుంటున్న రాజకీయ పార్టీలకు లోక్‌సత్తా నేత జయప్రకాశ్‌నారాయణ్‌ చురకలు అంటించారు. కేంద్రం స్పష్టత ఇచ్చే వరకు పోలవరంపై రగులుతున్న రాజకీయ రగడ సమసిపోయే అవకాశాలు కనిపించడంలేదని భావిస్తున్నారు. 

16:31 - December 1, 2017

హైదరాబాద్ : పోలవరం ప్రాజెక్టును ఏపీ సీఎం చంద్రబాబు నాయుడు ఏం చేయదల్చుకున్నారని వైసీపీ నేత ఉమ్మారెడ్డి సూటిగా ప్రశ్నించారు. పోలవరం నిర్మాణం విషయంలో పలు సందేహాలు వ్యక్తమౌతున్న సంగతి తెలిసిందే. గురువారం ఏపీ శాసనసభలో సీఎం చంద్రబాబు నాయుడు చేసిన ప్రకటన రాజకీయ ప్రకంపనలు సృష్టిస్తోంది. దీనిపై ఉమ్మారెడ్డి మీడియాతో మాట్లాడారు. పోలవరం నిర్మాణ విషయంలో కేంద్రం కట్టుబడి లేదని..డబ్బులు కూడా ఇవ్వడం లేదనే లీకులు వస్తున్నాయని తెలిపారు. పోలవరం నిర్మాణం విషయంలో ప్రభుత్వం కట్టుబడి ఉందా ? లేదా ? అని ప్రశ్నించారు. అభివృద్ధి విషయంలో ప్రతిపక్షం విమర్శలు చేస్తే..ప్రభుత్వం పలు ఆరోపణలు గుప్పిస్తోందని తెలిపారు. 2018లోగా పోలవరం పూర్తి చేస్తామని..పదే పదే చెప్పారని గుర్తు చేశారు. ఇప్పటి వరకు పోలవరం పనులు ఎంత వరకు పూర్తయ్యాయో చెప్పకుండా...స్పష్టమైన మాటలు చెప్పకుండా ఏదో చెప్పి తప్పించుకోవాలని చూస్తున్నారని తెలిపారు. పోలవరం నిర్మాణం విషయంలో అనేక ప్రశ్నలు ఉత్పన్నమౌతున్నాయని, పోలవరాన్ని బాబు అసలు ఏం చేయబోతున్నారని ప్రశ్నించారు. 

14:15 - December 1, 2017

విజయవాడ : పోలవరం నిర్మాణంపై విరుద్ధ ప్రకటనలతో ప్రజల్లో గందరగోళ పరిస్థితులు నెలకొన్నాయి. పోలవరం పనుల టెండర్లు ఆపాలని కేంద్రం నుండి లేఖ రావడంతో సీఎం చంద్రబాబు నాయుడు గురువారం అసెంబ్లీలో ఓ ప్రకటన చేసిన సంగతి తెలిసిందే. పనులు కేంద్రానికి అప్పగించేందుకు సిద్ధమని ప్రకటించారు. కానీ శుక్రవారం నాడు జరిగిన టిడిఎల్పీ సమావేశంలో మాత్రం సీఎం బాబు కొంత మెతకవైఖరిని కనబర్చినట్లు సమాచారం.

శుక్రవారం నాడు జరిగిన టిడిఎల్పీ సమావేశం కాసేపటి క్రితం ముగిసింది. ఈ సమావేశం అనంతరం ఎమ్మెల్యే జలీల్ ఖాన్ విందు ఏర్పాటు చేశారు. అసెంబ్లీలో జరిగిన తీరు..ప్రతిపక్షం లేకుండానే సభ జరగడం..ఇందుకు ప్రజలకు ఏ విధమైన సమాచారం అందింది..దానిపై చర్చించారు.

మరోవైపు పోలవరం అంశంపై సుదీర్ఘంగా చర్చించారు. కేంద్రంతో ఏ విధంగా సహకారం తీసుకోవాలి దానిపై బాబు వివరించినట్లు తెలుస్తోంది. త్వరలోనే ప్రధాన మంత్రి నరేంద్ర మోడీ...కేంద్ర మంత్రి గడ్కరి..లతో సమావేశమవుతానని...భూ సేకరణ చట్టం ప్రకారం అధిక భారం రాష్ట్రంపై పడుతుందని..ఇందుకు కేంద్రం సహకారం అందించాలని కోరనున్నట్లు తెలిపినట్లు సమాచారం. కేంద్రంతో ఘర్షణ కాకుండా సఖ్యతతో మెలగాలని భావిస్తున్నట్లు, ఈ నేపథ్యంలో కేంద్రంపై విమర్శలు..వ్యాఖ్యలు చేయవద్దని బాబు సూచించినట్లు తెలుస్తోంది. పోలవరం అభివృద్ధితో కూడుకున్న అంశమని పేర పేర్కొన్నారు. ఇటీవలే జరిగిన టిడిపి నేతల ఘర్షణపై బాబు ఒకింత ఆగ్రహం వ్యక్తం చేశారు. ఎమ్మెల్యేలకు హితబోధ చేశారని చెప్పవచ్చు. 

Pages

Don't Miss

Subscribe to RSS - చంద్రబాబు నాయుడు