చెన్నై

21:31 - April 24, 2017

ఢిల్లీ : పార్టీ సింబల్‌ రెండాకుల గుర్తు కోసం ఎన్నికల కమిషన్‌కు లంచం ఇవ్వజూపిన కేసులో ఏఐఏడిఎంకే నేత టిటివి దినకరన్‌ను ఢిల్లీ క్రైం బ్రాంచ్‌ పోలీసులు వరుసగా మూడోరోజు కూడా ప్రశ్నిస్తున్నారు. చాణక్యపురి ఇంటర్‌ స్టేట్‌ సెల్‌ కార్యాలయంలో మధ్యాహ్నం 3 గంటలకు ఆయన పోలీసుల ఎదుట హాజరయ్యారు. పార్టీ సింబల్‌ కోసం దినకరన్‌ మధ్యవర్తి సుఖేష్‌ చంద్రశేఖర్‌ ద్వారా ఈసీ అధికారికి 50 కోట్లు లంచం ఇచ్చేందుకు డీల్‌ కుదుర్చుకున్నట్లు వచ్చిన ఆరోపణలపై పోలీసులు ఆయనను విచారణ జరుపుతున్నారు. ఇవాళ దినకరన్‌-సుఖేష్‌ను ముఖా ముఖిగా ప్రశ్నించే అవకాశం ఉంది. రెండు రోజుల విచారణలో దినకరన్‌ నుంచి పోలీసులు పలు కీలక సమాచారం సేకరించినట్లు సమాచారం. ఈ కేసులో దినకరన్‌ మధ్యవర్తిగా చెబుతున్న సుకేశ్‌ చంద్రశేఖరన్‌ను ఇదివరకే ఢిల్లీ పోలీసులు ఓ ఫైవ్‌స్టార్‌ హోటల్‌లో అరెస్ట్‌ చేశారు. అతడి నుంచి కోటి 3 లక్షల నగదు స్వాధీనం చేసుకున్నారు.

08:04 - April 22, 2017

చెన్నై : ప్రముఖ తమిళ నటుడు ధనుష్‌ తమ కుమారుడేనని మధురై కోర్టుకెక్కిన మేలూరు గ్రామానికి చెందిన కదిరేశాన్, మీనాక్షి దంపతులకు గట్టి ఎదురుదెబ్బ తగిలింది. తామే తల్లిదండ్రులమన్న వృద్ధ దంపతుల వాదనను మద్రాస్‌ హైకోర్టుకు చెందిన మధురై బెంచ్‌ కొట్టి వేసింది. తాము వృద్ధాప్యంలో ఉన్నందున నటుడు ధనుష్ నుండి నెలసరి 60 వేల రూపాయిల జీవన భృతిని కోరుతూ గత ఏడాది కదిరేశన్‌ దంపతులు మధురై కోర్టులో పిటిషన్‌ దాఖలు చేశారు. తమ వాదనను సమర్థించుకునేందుకు ధనుష్‌కు చెందిన టెన్త్‌ క్లాస్‌ సర్టిఫికేట్‌ పొందు పరిచారు. అందులో ధనుష్‌కు చెందిన పుట్టుమచ్చల వివరాలు కూడా పేర్కొన్నారు.
రుజువు కాని ఆధారాలు 
ధనుష్‌కు డిఎన్‌ఏ పరీక్షలు కూడా జరపాలని కదిరేశన్‌ దంపతులు డిమాండ్‌ చేశారు. ధనుష్‌ తరపు న్యాయవాది ఇందుకు నిరాకరించారు. కదిరేషన్‌ దంపతులు చెప్పేదంతా అవాస్తవమని ఈ కేసును కొట్టి వేయాలని లాయర్ విజ్ఞప్తి చేశారు. ధనుష్‌ని బ్లాక్‌ మెయిల్‌ చేసేందుకే దంపతులుగా అవతారమెత్తారని ఆయన పేర్కొన్నారు. ఈ ఏడాది ఫిబ్రవరి 28న ఐడెంటిఫికేషన్‌ మార్క్స్‌కు సంబంధించి ధనుష్‌కు వైద్య పరీక్షలు నిర్వహించారు. మధురై మెడికల్‌ కళాశాల వైద్యులు నిర్వహించిన పరీక్షల్లో ధనుష్‌ శరీరంపై రెండు పుట్టుమచ్చలున్నట్లు నిర్ధారణ కాలేదు. దీంతో కేసు ధనుష్‌కు అనుకూలంగా మారింది. చదువుకునే సమయంలో హాస్టల్ నుంచి పారిపోయిన ధనుష్‌ దర్శకుడు కస్తూరీరాజాను కలుసుకున్నాడని కదిరేషన్‌దంపతులు పిటిషన్‌లో పేర్కొన్నారు. కనిపించకుండాపోయిన కుమారుడు తదనంతరం సినిమాల్లో హీరో ధనుష్ గా దర్శనమిచ్చాడని తెలిపారు. సినిమాల్లో విజయం సాధించడంతో కస్తూరీరాజా కుటుంబం ధనుష్‌ను కొడుకుగా దత్తత తీసుకున్నట్లు అప్పట్లో వెల్లడించారు. కదిరేశన్‌ దంపతులు చూపిన ఆధారాలేవీ రుజువు కాకపోవడంతో ధనుష్‌కు పెద్ద ఊరట లభించింది.

 

 

 

14:02 - April 21, 2017

చెన్నై : ప్రముఖ నటుడు సత్యరాజు కర్ణాటక ప్రజలకు క్షమాపణ చెప్పారు. ఆయన ట్విట్టర్ ద్వారా రెండేళ్ల క్రితం చేసిన వ్యాఖ్యలకు క్షమాపణలు చెబుతున్నానని, తాను ఎప్పుడు కర్ణాటక ప్రజలకు వ్యతిరేకం కాదని స్పష్టం చేశారు. తన మీద ఉన్న కోపంతో 'బాహుబలి 2' సినిమా అడ్డుకోవద్దని కోరారు. ఎప్పుడు తమిళులకు మద్దతగానే మాట్లాడతానని సత్యరాజు పేర్కొన్నారు. క్షమాపణలు చెప్పాలని కోరుతున్న వారు కట్టప్ప చెప్పిన సారీతో శాంతిస్తారా ? లేదా ? అనేది చూడాలి.

 

11:39 - April 21, 2017

చెన్నై : హీరో ధనుష్ పై తుది తీర్పు వెల్లడైంది. ధనుష్ తమ కొడుకేనని..తమ బాగోగులు చేసుకోవడం లేదని మేలూర్ కు చెందిన కదిరేషన్ వృద్ధ దంపతులు కోర్టును ఆశ్రయించిన సంగతి తెలిసిందే. ఈ కేసులో మద్రాసు హైకోర్టు శుక్రవారం తుదితీర్పును వెల్లడించింది. ఈ తీర్పులో ధనుష్ కు ఊరట లభించినట్లైంది. కదిరేషన్ దంపతులు పిటిషన్ ను హైకోర్టు కొట్టివేసింది.
తాను 1983లో జులై 28న ఎగ్మోర్ ప్రభుత్వ ఆస్పత్రిలో కృష్ణమూర్తి, విజయలక్ష్మి దంపతులకు జన్మించానని...అప్పట్లో తన పేరు వెంకటేశ్ ప్రభు అని, సినిమాల్లోకి వచ్చాక ధనుష్‌ కే రాజాగా పేరు మార్చుకున్నానని మద్రాస్ హైకోర్టులో ధనుష్ పిటిషన్ దాఖలు చేశారు. 1985 నవంబర్7న మధురైలోని ప్రభుత్వ రాజాజీ ఆస్పత్రిలో జన్మించాడని తమ వద్ద ఆధారాలున్నాయని కదిరేషన్ వృద్ధ దంపతులు కౌంటర్ దాఖలు చేశారు. దీనిపై విచారణ చేపట్టిన కోర్టు ఇరువురు జనన ధృవీకరణ, విద్యా సంబంధ పత్రాలను సమర్పించాలని ఆదేశించింది. అనంతరం తుది తీర్పును వెల్లడించింది.

13:12 - April 19, 2017
10:16 - April 19, 2017

చెన్నై : తమిళనాడు రాష్ట్రంలో గంటగంటకు రాజకీయాలు మారుతున్నాయి. తాజాగా టీటీవి దినకరన్ కు మరో షాక్ తగిలింది. దినకరన్ కు ఢిల్లీ క్రైం బ్రాంచ్ పోలీసులు లుక్ అవుట్ నోటీసులు జారీ చేశారు. ప్రధాన విమాశ్రయాలకు లుక్ అవుట్ నోటీసులు పంపారు. నేడు దినకరన్ అరెస్ట్ చేసే అవకాశం ఉందని తెలుస్తోంది. పార్టీ గుర్తు కోసం ఈసీకి దినకరన్ లంచాలు ఇవ్వజూపారనే ఆరోపణలు ఉన్న సంగతి తెలిసిందే. దీనిపై పోలీసులు దర్యాప్తు చేపట్టారు. ఇది ఇలా ఉంటే బుధవారం మరోసారి పన్నీరు సెల్వం, పళని స్వామి వర్గాల మధ్య చర్చలు జరగనున్నాయి. దాదాపు రెండు వర్గాలు విలీనయ్యే దిశగా కదులుతున్నాయి. సెల్వం షరతుల మేరకు ఇప్పటికే పార్టీ నుంచి శశికళ, ఆమె కుటుంబ సభ్యులను బహిష్కరించిన విషయం తెలిసిందే. తాజాగా జరిగే ఈ చర్చల్లో ఎలాంటి పరిణామాలు చోటు చేసుకుంటాయో వేచి చూడాలి.

09:01 - April 19, 2017

చెన్నై : తమిళనాడు రాజకీయాల్లో కీలక పరిణామాలు చోటుచేసుకుంటున్నాయి. పార్టీనుంచి శశికళ కుటుంబసభ్యుల తొలగింపుతర్వాత పళనిస్వామి మరో ముఖ్య నిర్ణయం తీసుకున్నారు. ఇవాళ పన్నీర్‌ సెల్వం వర్గంతో పళనిస్వామి వర్గం భేటీ కానుంది. ఈ సమావేశంతర్వాత పార్టీ విలీనంపై ప్రకటన చేసే అవకాశమున్నట్లు తెలుస్తోంది. అన్నాడీఎంకే కార్యాలయం వద్ద పోలీసులు భారీ బందోబస్తు ఏర్పాటు చేశారు. పార్టీ నుంచి శశికళను, కుటుంబసభ్యుల్ని బహిష్కరిస్తూ పళనిస్వామి ప్రకటన చేశారు. 20మంది మంత్రులతో కలిసి ఏకగ్రీవ తీర్మానం చేశారు. మరోవైపు శశికళ కుటుంబసభ్యుల తొలగింపు నిర్ణయాన్ని దినకరన్ వ్యతిరేకిస్తున్నారు. నేడు ఫెరా కేసులో దినకరన్ కోర్టు ముందుకు రానున్నారు. 

 

10:46 - April 18, 2017

చెన్నై : తమిళ రాజకీయాలు మళ్లీ వేడెక్కాయి. గత కొద్ది రోజుల కిందట సీఎం జయలలిత మృతి చెందిన అనంతరం పలు రాజకీయ పరిణామాలు చోటు చేసుకున్న సంగతి తెలిసిందే. తాజాగా మరోసారి హాట్ హాట్ గా రాజకీయాలు నడుస్తున్నాయి. రెండు వర్గాలుగా విడిపోయిన అన్నాడీఎంకే విలీనం దిశగా చర్చలు జరుపుతున్నట్లు తెలుస్తోంది. పళని స్వామి, పన్నీర్ సెల్వం వర్గాలకు మధ్యవర్తిగా తంబిదురై వ్యవహరిస్తున్నారు. పళని స్వామికి సీఎం పదవి, పన్నీరుకు పార్టీ  ప్రధాన కార్యదర్శి పదవులు వచ్చే విధంగా ఒప్పందం కుదిరే అవకాశం ఉంది. నేడు మంత్రులతో పన్నీరు భేటీ అయ్యే అవకాశాలు ఉన్నాయి. రెండు వర్గాలు విలీనం అయితే శశికల శకం ముగిసినట్టే అని విశ్లేషకులు అంటున్నారు. ఇది ఇలా ఉంటే శశికల మేనల్లుడు దినకరన్ ను ఢిల్లీ క్రైం బ్రాంచ్ పోలీసులు అరెస్టు చేయనున్నారు. రెండాకుల గుర్తు కోసం దినకరన్ ఈసీకి అంచం ఇవ్వజూపి విషయంలో అడ్డంగా దొరికిపోయిన విషయం తెలిసిందే. 

10:42 - April 18, 2017

చెన్నై : తమిళనాడులో రాజకీయాలు హాట్ హాట్ గా సాగుతున్నాయి. తమిళ రాజకీయాలు మరోసారి వేడెక్కాయి. శశికళ మేనల్లుడు దినకరన్ చుట్టూ ఉచ్చు బిగుస్తోంది. పోలీసులు దినకరన్ కు నోటీసులు ఇవ్వనున్నారు. నేడు దినకరన్ ను అరెస్టు చేసే అవకాశం ఉంది. రెండాకుల గుర్తు కోసం ఈసీకీ రూ.50 కోట్లు ఇచ్చే ప్రయత్నంలో దినకరన్ బుక్ అయ్యారు. అన్నాడీఎంకే చీలిక వర్గాలు విలీనం దిశగా సాగుతున్నాయి. శశికళకు చెక్ పెట్టేందుకు స్కెచ్ వేశారు. పళనిస్వామి, పన్నీరుసెల్వం వర్గాలు ఒక్కటయ్యే దిశగా కొనసాగుతున్నాయి. పళనిస్వామికి సీఎం బాధ్యతలు, పన్నీరు సెల్వం పార్టీ పగ్గాలు అప్పగించే యోచనలో ఉన్నారు. నేడు మంత్రులతో పన్నీరు సెల్వం భేటీ అయ్యే అవకాశాలున్నాయి. మంత్రులంతా చెన్నైలో అందుబాటులో ఉండాలని ఆదేశాలు జారీ చేశారు. ఇరు వర్గాల కలయికకు ఎంపీ తంబిదురై మధ్యవర్తిగా వ్యవహరిస్తున్నారు. మరిన్ని వివరాలను వీడియోలో చూద్దాం...

 

07:53 - April 18, 2017

చెన్నై : తమిళనాడులో శశికళ వర్గానికి మరో షాక్‌ తగిలింది. ఆమె మేనల్లుడు దినకరన్‌పై అవినీతి కేసు నమోదైంది. పార్టీ గుర్తు కోసం ఎన్నికల కమిషన్‌కే లంచం ఇవ్వజూపాడని దినకరన్‌పై ఆరోపణ. తనపై వచ్చిన ఆరోపణలను దినకరన్‌ ఖండించారు. ఈ వ్యవహారం తమిళనాడు రాజకీయాల్లో ప్రకంపనలు సృష్టిస్తోంది.
దినకరన్‌కు గట్టి ఎదురుదెబ్బ 
శశికళ వర్గం తరపున ఆర్‌కె నగర్‌ ఉప ఎన్నికల బరిలో ఉన్న ఆమె మేనల్లుడు దినకరన్‌కు గట్టి ఎదురుదెబ్బ తగిలింది. పార్టీ గుర్తు కోసం ఎన్నికల కమిషన్‌ అధికారులకు లంచం ఇవ్వ జూపాడన్న ఆరోపణలతో దినకరన్‌పై అవినీతి కేసు నమోదైంది. ఢిల్లీలోని ఓ ఫైవ్‌ స్టార్‌ హోటల్‌లో మధ్యవర్థి సుకేశ్‌ చంద్రశేఖర్‌ను ఢిల్లీ క్రైం బ్రాంచ్‌ పోలీసులు అరెస్ట్‌ చేయడంతో ఈ విషయం వెలుగు చూసింది. తనకు ఎన్నికల కమిషన్‌తో మంచి సంబంధాలున్నాయని, అన్నాడిఎంకే శశికళ వర్గానికి రెండు ఆకుల గుర్తు ఇప్పిస్తానని సుకేశ్‌ దినకరన్‌ను నమ్మించాడు. ఈ పని కోసం ఈసీ అధికారులకు లంచం ఇవ్వడానికి 50 కోట్లు బేరం కుదుర్చున్నాడు. ఇందులో భాగంగా కోటి 30 లక్షలు అడ్వాన్స్‌గా తీసుకున్నాడు. సుకేశ్‌పై ఎఫ్‌ఐర్‌ నమోదు చేసిన పోలీసులు ఆయన వద్ద కోటి 30 లక్షలు స్వాధీనం చేసుకున్నారు. దినకరన్‌తో తనకు ప్రత్యక్ష సంబంధాలున్నాయని.... ఈ డబ్బులు దినకరన్‌వేనని పోలీసుల విచారణలో సుకేశ్‌ చెప్పడం గమనార్హం. తనపై వచ్చిన ఆరోపణలను దినకరన్‌ ఖండించారు. సుకేశ్ చంద్రశేఖర్‌ ఎవరో తనకు తెలియదని స్పష్టం చేశారు. నాకు సమన్లు జారీ అయ్యాకే దీనిపై స్పందిస్తానని దినకరన్‌ చెప్పారు. దీన్ని తాను లీగల్‌గానే ఎదుర్కొంటానన్నారు.
అవినీతికి పాల్పడిన శశికళ వర్గం : పన్నీర్‌సెల్వం వర్గం 
ఆర్‌కె నగర్‌ ఉప ఎన్నికల్లో శశికళ వర్గం అవినీతికి పాల్పడిందని పన్నీర్‌సెల్వం వర్గం ఆరోపిస్తోంది. ప్రజలపై నమ్మకం లేనందునే దినకరన్ డబ్బులతో గెలవాలని చూస్తున్నారని, ఇదే పాలసీని ఈసీతోనూ కొనసాగించే యత్నం చేశారని విమర్శించింది.
పార్టీ గుర్తు ఫ్రీజ్‌ 
అన్నాడీఎంకే గుర్తు రెండాకుల కోసం శ‌శిక‌ళ‌, ప‌న్నీరుసెల్వం వ‌ర్గాలు ప్రయత్నించినా... పార్టీ గుర్తును ఈసీ ఎవ‌రికీ కేటాయించ‌కుండా ఫ్రీజ్‌ చేసింది. దీని స్థానంలో రెండు వ‌ర్గాల వారికి రెండు కొత్త గుర్తుల‌ను కేటాయించిన విషయం తెలిసిందే. ఆర్‌కె నగర్‌ ఉపఎన్నికలో డబ్బులు పంచడం ద్వారా పెద్దమొత్తంలో ఓటర్లను ప్రభావితం చేశారని దినకరన్‌పై ఆరోపణలు వచ్చాయి. దీంతో ఎన్నికను వాయిదా వేశారు. తాజాగా ఈసీకీ లంచం ఇవ్వజూపారన్న ఆరోప‌ణ‌ల‌తో శశికళ వర్గం మ‌రింత చిక్కుల్లో ప‌డింది. పోలీసులు త్వరలో దినకరన్‌కు నోటీసులు జారీ చేసి విచారించే అవకాశం ఉంది.

 

Pages

Don't Miss

Subscribe to RSS - చెన్నై