జేడీఎస్

11:51 - November 10, 2018

అమరావతి: 2019ఎన్నికల్లో కేంద్రంలో బీజేపీ అధికారంలోకి రాకుండా, దేశంలోని బీజేపీ వ్యతిరేక శక్తులను కూడగట్టే ప్రయత్నంలో ఆంధ్రప్రదేశ్ ముఖ్యమంత్రి చంద్రబాబు నాయుడు ఇటీవల జేడీఎస్,డీఎంకే  అధ్యక్షులతో సమావేశం అయ్యారు. అందులో భాగంగా కాంగ్రెస్ పార్టీ జాతీయ ప్రధాన కార్యదర్శి, రాజస్ధాన్ మాజీ ముఖ్యమంత్రి అశోక్ గెహ్లాట్ శనివారం  ఆంధ్రప్రదేశ్ ముఖ్యమంత్రి చంద్రబాబునాయుడు తో అమరావతిలో భేటీ అవుతున్నారు. కాంగ్రెస్ పార్టీ అధ్యక్షుడు రాహుల్ గాంధీ దూతగా  ఆయన చంద్రబాబుతో  చర్చలు జరపనున్నారు.  ఇప్పటికే చంద్రబాబు నాయుడు ఢిల్లీలో  రాహుల్‌గాంధీ, శరద్‌పవార్‌, ఫరూక్‌ అబ్దుల్లా, కేజ్రీవాల్  తదితర ఉత్తారిది నాయకులతో సమావేశమై ప్రస్తుతం దక్షిణాది పార్టీల నాయకులను సంఘటితం చేసే పనిలో ఉన్నారు. ఈ నేపధ్యంలో శనివారం కాంగ్రెస్‌ సీనియర్‌ నాయకుడు అశోక్‌ గెహ్లాట్ అమరావతిలో చంద్రబాబుతో సమావేశంకావడం మరో ముందడుగుగా పార్టీ వర్గాలు భావిస్తున్నాయి.

19:21 - November 8, 2018

బెంగుళూరు: ఆంధ్రప్రదేశ్ ముఖ్యమంత్రి, తెలుగుదేశంపార్టీ జాతీయ అధ్యక్షుడు చంద్రబాబునాయుడు గురువారం బెంగుళూరులో జేడీఎస్ అధినేత, కర్ణాటక మాజీ సీఎం దేవెగౌడతో, కర్ణాటక ముఖ్యమంత్రి కుమారస్వామితోనూ సమావేశం అయ్యారు. దేశంలో బీజేపీ వ్యతిరేక కూటమి ఏర్పాటులో భాగంగా చంద్రబాబునాయుడు వీరిని కలిశారు. సుమారు 40 నిమిషాలపాటు సమావేశమైన అనంతరం ముగ్గురు నేతలు విలేకరుల సమావేశంలో మాట్లాడారు. 
రాజ్యాంగ బధ్దంగా ఏర్పాటైన సంస్ధలను మోడీ ప్రభుత్వం నిర్వీర్యం చేస్తోందని దేవెగౌడ అన్నారు. కేంద్రలోని బీజేపీని గద్దె దించాలంటే దేశంలోని లౌకికవాద పార్టీలన్నీ ఏకం కావాలని అందులో భాగంగా చంద్రబాబుతో చర్చలు జరిపామని దేవెగౌడ చెప్పారు. కూటమి బలోపేతం కోసం మిగతా పార్టీలతో కూడా చర్చలు జరపాలని చంద్రబాబుని కోరినట్లు ఆయన తెలిపారు. 
ఏపీ ముఖ్యమంత్రి చంద్రబాబునాయుడు మాట్లాడుతూ.... దేశంలోని రాజ్యంగ బధ్దంగా ఏర్పడ్డ సంస్ధలను అడ్డంపెట్టుకుని మోడీ ప్రభుత్వం దేశంలోని చాలా రాష్ట్రాల్లో ప్రతిపక్ష పార్టీలను వేధింపులకు గురిచేస్తోందని ఆరోపించారు. ప్రజాస్వామ్యాన్ని, వ్యవస్థలను, దేశాన్ని కాపాడాలన్నలక్ష్యంతో బెంగళూరు వచ్చానని చంద్రబాబు అన్నారు. పెట్రోల్,డీజిల్ ధరలు దేశంలో పెరిగిపోతున్నాయని,  ఆర్ధిక వ్యవస్ధ దెబ్బతిందని, రెగ్యులేటరీ బాడీ అయిన రిజర్వుబ్యాంకు ప్రస్తుతం మోడీ ప్రభుత్వ ఒత్తిడిలో ఉందని చంద్రబాబు చెప్పారు. ఈడీ, ఆదాయపుపన్ను శాఖలద్వారా గుజరాత్, కర్ణాటక, ఆంధ్రప్రదేశ్‌లలో వేధింపులకు పాల్పడుతూ సంస్ధలను దుర్వినియోగం చేస్తున్నారని ఆయన ఆరోపించారు. వ్యవసాయం సంక్షోభంలో పడిందని, మైనారిటీలు ఇబ్బందులు ఎదుర్కొంటున్నారని  చంద్రబాబు పేర్కొన్నారు.
టీడీపీ, జేడీఎస్‌ పాతమిత్రులేనని, లౌకికవాద శక్తులను ఏకం చేసే విషయంపై తాము చర్చించినట్లు కర్ణాటక ముఖ్యమంత్రి కుమారస్వామి చెప్పారు. కూటమి ఏర్పాటులో దేవెగౌడ, చంద్రబాబు వ్యూహాలు బాగున్నాయని కుమారస్వామి అంటూ...2019 లోక్‌సభ ఎన్నికల్లో 1996నాటి పరిస్థితులు వస్తాయని ఆశాభావం వ్యక్తం చేశారు. బీజేపీ వ్యతిరేక శక్తులు  ఏకం చేయంటంలో భాగంగా చంద్రబాబు నాయుడు ఈవారంలోనే చెన్నై వెళ్లి డీఎంకే అధ్యక్షుడు స్టాలిన్ తోనూ సమావేశం అవుతారు. 

19:30 - November 7, 2018

అమరావతి: ఆంధ్రప్రదేశ్ ముఖ్యమంత్రి, తెలుగుదేశంపార్టీ జాతీయ అధ్యక్షుడు చంద్రబాబునాయుడు గురువారం బెంగుళూరు వెళుతున్నారు. వచ్చే ఎన్నికల్లో బీజేపీని ఓడించటానికి దేశంలోని   బీజేపీ వ్యతిరేక పార్టీలను ఒకతాటిపైకి తెచ్చే ప్రయత్నంలో చంద్రబాబు రేపు బెంగుళూరులో మాజీప్రధాని,జేడీఎస్ అధ్యక్షుడు దేవెగౌడతో, కర్ణాటక ముఖ్యమంత్రి కుమారస్వామితోనూ బేటీ కానున్నారు. జాతీయ స్థాయిలో బీజేపీయేతర పార్టీలను ఏకం చేసేందుకు చంద్రబాబు చేస్తున్న ప్రయత్నాలకు ఉత్తరప్రదేశ్ మాజీ ముఖ్యమంత్రి అఖిలేష్ యాదవ్ కూడా ఇటీవల మద్దతు ఇచ్చారు. ఇప్పటికే చంద్రబాబు ఢిల్లీ పర్యటనలో కాంగ్రెస్ పార్టీ అధ్యక్షుడు రాహుల్ గాంధీ, ఢిల్లీ సీఎం కేజ్రీవాల్‌తో పాటు, యూపీ మాజీ సీఎం మాయావతి, లోక్ తాంత్రిక్ జనతాదళ్ అధ్యక్షుడు శరద్ యాదవ్‌తో భేటీ అయ్యి జాతీయ రాజకీయాల గురించి చర్చించారు. తమిళనాడులో కీలక నేతగా ఉన్న డీఎంకే  పార్టీ అధ్యక్షుడు స్టాలిన్ కూడా రాహుల్-చంద్రబాబు భేటీని స్వాగతించారు. ఈ వారంలోనే చంద్రబాబు నాయుడు చెన్నై వెళ్లి  డీఎంకే అధినేత స్టాలిన్‌తోనూ భేటీ కానున్నారు.

 

13:29 - November 6, 2018

కర్ణాటక : రాష్ట్రంలో మూడు లోక్ సభ, రెండు శాసనసభ స్థానాలకు జరిగిన ఉపఎన్నిలలో బీజేపీకి బేజారు పుట్టిస్తుంటే కాంగ్రెస్-జేడీఎస్ కూటమి సత్తా చాటుతోంది. ఇప్పటికే  రెండు శాసనసభ స్థానాలను కూటమి తన ఖాతాలో వేసుకుంది మహాకూటమి.  ఈ నేపథ్యంలో  ముఖ్యమంత్రి కుమారస్వామి భార్య, జేడీఎస్ అభ్యర్థి అనితా కుమారస్వామి రామనగరం నియోకవర్గం నుంచి ఏకంగా 1,09,137 ఓట్ల ఆధిక్యంతో ఘన విజయం సాధించారు. జామ్ ఖండీ అసెంబ్లీ స్థానం నుంచి కాంగ్రెస్ అభ్యర్థి న్యామగౌడ 39,480 ఓట్ల మెజార్టీతో జయకేతనం ఎగురవేశారు. బళ్లారి, శివమొగ్గ, మండ్య లోక్ సభ స్థానాలకు సంబంధించి ఓట్లు లెక్కింపు కొనసాగుతోంది. బళ్లారిలో కాంగ్రెస్ అభ్యర్థి ఉగ్రప్ప, మండ్యలో జేడీఎస్ అభ్యర్థి శివరామేగౌడలు పూర్తి ఆధిక్యతలో ఉన్నారు. శివమొగ్గలో బీజేపీ అభ్యర్థి రాఘవేంద్ర స్వల్ప మెజార్టీలో ఉన్నారు.
 

19:02 - September 21, 2018

కర్ణాటక : కన్నడలో రాజకీయాలు మరోసారి వేడెక్కాయి. కుమారస్వామి ప్రభుత్వం కూలిపోయే ప్రమాదం ముంచుకొచ్చినట్లుగా వాతావరణం వేడెక్కింది. ప్రభుత్వం ఏర్పాటుకు నానా కష్టాలు పడి ఎట్టకేలకు ప్రభుత్వాన్ని ఏర్పాటు చేసిన కుమారస్వామి ప్రభుత్వం కూలిపోనుందా? సంకీర్ణప్రభుత్వాన్ని కూల్చివేసే దిశగా బీజేపీ పావులు కదుపుతున్నట్లుగా సమాచారం. బీజేపీ నేతలు గవర్ణర్ ను కలిసేందుకు సన్నద్ధం అవతున్న నేపథ్యంలో వీటికి బలం చేకూర్చేలా వాతావరణ వేడెక్కింది. కాంగ్రెస్, జేడీఎస్ నుండి దాదాపు 20మంది ఎమ్మెల్యేలు అసమ్మతి రాగం ఆలపిస్తున్నారు. తమ డిమాండ్లకు కుమారస్వామి ఒప్పుకోవాలని ముంబై నుండి కాంగ్రెస్, జేడీఎస్ ఎమ్మెలే్యలు కథను నడిపిస్తున్నారు.  దీనికోసము కాచుకుని కూర్చున్న బీజేపీ వారిని తమవైపు లాక్కుని ప్రభుత్వం ఏర్పాటుచేసే దిశగా పావులు కదుపుతోంది. దీనిపై స్పందించి ముఖ్యమంత్రి కుమార స్వామి ఒక్కో ఎమ్మెల్యేకు బీజేపీ రూ.15 కోట్లు ఎరవేసి తమవైపు లాక్కునేందుకు బీజేపీ బేరసారాలు నడుపుతోందని ఆరోపించారు. ఈ హాట్ హాట్ వాతావరణం చూస్తుంటే కుమారస్వామి సీెఎం పదవి ప్రమాదంలో పడినట్లుగా అనిపిస్తోందని రాజకీయ విశ్లేషకులు అభిప్రాయపడుతున్నారు. 

 

09:04 - June 7, 2018

హైదరాబాద్ : ఫెడరల్‌ ఫ్రంట్‌... జాతీయ రాజకీయాల్లో గుణాత్మక మార్పులు అంటూ హడావిడి చేసిన గులాబీదళపతి ఇపుడు సైలెంట్‌ అయ్యారు. కర్నాటక ఎన్నికల ఫలితాల అనంతరం ఫ్రంట్ కార్యాచరణ స్పీడప్ అవుతుందని భావిస్తే.. పరిస్థితి కాస్తా చల్లబడింది. కర్నాటక ఎన్నికల సమయంలో రోజుకో స్టేట్‌మెంట్‌ ఇచ్చిన గులాబీ నేతలు ఇపుడు ఆ ఊసే ఎత్తడం లేదు. కాంగ్రెస్, బిజెపిలకు వ్యతిరేకంగా జాతీయ స్థాయిలో ప్రాంతీయ పార్టీల మద్దతు కూడగట్టేందుకు సిద్ధమన్న ముఖ్యమంత్రి కేసిఆర్... ఇప్పుడు ఆ మాటే ఎత్తడం లేదు. సుమారు రెండు నెలల క్రితం వరకు ఎంతో ఉత్సాహంగా జాతీయ రాజకీయాలపై ఆసక్తి చూపిన గులాబీదళపతి ఇప్పుడు సైలెంట్ అయ్యారు. కర్నాటక ఎన్నికలకు ముందు జెడిఎస్‌కు మద్దతు తెలిపిన కేసీఆర్‌.. కాంగ్రెస్, బిజెపిలకు వ్యతిరేకంగా కూటమి కడతామంటూ ప్రకటనలు చేశారు. అనుకున్నట్లుగానే ప్రాంతీయ పార్టీగా జెఎడిఎస్ కర్నాటక ఎన్నికల్లో కీలకంగా మారింది. కాని గులాబీబాస్‌ ఆశించిన దానికి భిన్నంగా పరిస్థితి మారింది. కాంగ్రెస్‌తో కలిసి జేడీఎస్‌ ప్రభుత్వాన్ని ఏర్పాటు చేసింది. ఫెడరల్‌ ఫ్రంట్‌లో కీలకం అవుతుదందనుకున్న జేడీఎస్‌ కాస్తా హస్తంపార్టీ వైపు జారిపోయింది.

కర్నాటక ముఖ్యమంత్రిగా కుమార స్వామి ప్రమాణస్వీకారానికి సీఎంలు చంద్రబాబు, మమత బెనర్జీ, కేజ్రీవాల్ తోపాటు కాంగ్రెస్, వామపక్షాల జాతీయ నేతలు హాజరు కావడంతో కొత్త కూటమికి ఈ పరిస్థితులు దారి తీస్తాయన్న ప్రచారం జోరందుకుంది. సీఎం కుమారస్వామి తాజా వ్యాఖ్యలు కేసీఆర్‌ ప్రయత్నాలకు మరోసారి గండికొట్టాయి. బిజెపికి వ్యతిరేకంగా కాంగ్రెస్‌తో కలిసి పనిచేయాలన్న సూచనలు అన్ని పార్టీల అగ్రనేతల నుంచి అందాయని కర్నాటక సిఎం అనడంతో ఇక ఫెడరల్‌ ఫ్రంట్‌ వైపు జేడీఎస్‌ రానట్టేనన్న అభిప్రాయాలు వస్తున్నాయి. మొత్తానికి 2019 సార్వత్రిక ఎన్నికల అనంతరం అయితే బీజేపీ, లేదా కాంగ్రెస్‌ నేతృత్వంలో ఏర్పడే కూటములదే అధికారం అనేది స్పష్టం అవుతున్న పరిస్థితుల్లో ... జాతీయ రాజకీయాల్లో గుణాత్మక మార్పులు తేవాలన్న కేసీఆర్‌ ఏంచేస్తారనేది ఇపుడు ఆసక్తిగా మారింది. 

06:54 - June 7, 2018

కర్ణాటక : ఎట్టకేలకు రెండు వారాల అనంతరం కర్ణాటకలో కుమారస్వామి మంత్రివర్గం కొలువుదీరింది. కాంగ్రెస్‌, జెడిఎస్‌కు చెందిన 24 మంది ఎమ్మెల్యేలు, ఓ ఎమ్మెల్సీ మంత్రులుగా ప్రమాణ స్వీకారం చేశారు. ఆర్థిక శాఖ జెడిఎస్‌కు, హోంశాఖ కాంగ్రెస్‌కు దక్కాయి. గత కొన్ని రోజులుగా కర్ణాటకలో మంత్రివర్గ విస్తరణపై నెలకొన్న ప్రతిష్టంభనకు తెరపడింది. జేడీఎస్‌ నేత కుమారస్వామి ముఖ్యమంత్రిగా ప్రమాణ స్వీకారం చేసి రెండు వారాలు గడిచిన అనంతరం మంత్రి పదవుల కేటాయింపుపై స్పష్టత రావడంతో మంత్రివర్గ విస్తరణ జరిగింది. రాజ్‌భవన్‌లో జరిగిన ఓ కార్యక్రమంలో గవర్నర్‌ వజుభాయి వాలా కొత్త మంత్రులతో ప్రమాణం చేయించారు. కాంగ్రెస్‌ పార్టీ నుంచి 15 మంది ఎమ్మెల్యేలు, జెడిఎస్‌ నుంచి 9 మంది ఎమ్మెల్యేలు మంత్రులుగా ప్రమాణం చేశారు. ఒక ఎమ్మెల్సీకి కూడా మంత్రి పదవి దక్కింది.

అందరికంటే ముందుగా సిఎం కుమారస్వామి సోదరుడు, జెడిఎస్‌ నేత హెచ్‌డి రేవణ్ణ ప్రమాణస్వీకారం చేశారు. ఆ తర్వాత సంకీర్ణ ప్రభుత్వ ఏర్పాటులో కీలక పాత్ర పోషించిన కాంగ్రెస్ నేత డి.కె.శివకుమార్‌ ప్రమాణస్వీకారం చేశారు. రేవణ్ణకు రోడ్లు భవనాలు శాఖ కేటాయించగా...శివకుమార్‌కు నీటిపారుదల‌, వైద్యవిద్య మంత్రిత్వ శాఖలు అప్పగించారు.

కాంగ్రెస్‌ పార్టీ నుంచి మంత్రి పదవులు దక్కిన వారిలో శివకుమార్‌తో పాటు ఆర్‌ వీ దేశ్‌పాండే, హెచ్‌కే పాటిల్‌, శమనూరు శివశంకరప్ప, కేజే జార్జ్‌, కృష్ణ బైర్‌ గౌడ, రాజశేఖర్‌ పాటిల్‌, ప్రియాంక ఖర్గే, శివానంద్‌ పాటిల్‌, యూటీ ఖడార్‌, జమైర్‌ అహ్మద్‌ ఖాన్‌, పుట్టరంగ శెట్టి, శివశంకర రెడ్డి, జయమాల ఉన్నారు.

జేడీఎస్‌ పార్టీ నుంచి మంత్రి పదవులు దక్కిన వారిలో రేవణ్ణతో పాటు జీటీ దేవెగౌడ, బండప్ప కశంపుర్‌, సీఎస్‌ పుట్టరాజు, వెంకటరావ్‌ నాదగౌడ, హెచ్‌కే కుమారస్వామి, బిఎస్పీ ఎమ్మెల్యే ఎస్‌ఏ ఆర్ఏ మహేశ్‌ ఉన్నారు.

మే 23న కర్ణాటకలో కాంగ్రెస్‌-జెడిఎస్‌ల సంకీర్ణ ప్రభుత్వం ఏర్పడింది. ముఖ్యమంత్రిగా జెడిఎస్‌ నేత కుమారస్వామి, ఉప ముఖ్యమంత్రిగా కాంగ్రెస్‌ నేత జి.పరమేశ్వర ప్రమాణస్వీకారం చేశారు. మంత్రి పదవులను 2:1 నిష్పత్తిలో కాంగ్రెస్‌, జెడిఎస్‌లు పంచుకున్నాయి. కర్ణాటకలో మొత్తం 34 మంత్రి పదవులకు గాను కాంగ్రెస్‌కు 22, జెడిఎస్‌కు 12 కేటాయించారు. సిఎం, డిప్యూటి సిఎంతో కలిపి మంత్రివర్గం సంఖ్య 27కి చేరింది.

10:15 - May 25, 2018

బెంగళూరు : కొద్ది రోజుల క్రితం రాష్ట్ర ముఖ్యమంత్రి ప్రమాణ స్వీకారం చేసిన కుమార స్వామి నేడు పరీక్షను ఎదుర్కోబోతున్నారు. అసెంబ్లీలో ఆయన బలపరీక్షకు సిద్ధమౌతున్నారు. బలపరీక్ష ముగిసేంత వరకు ఎమ్మెల్యేలను కాపాడుకొనేందుకు కాంగ్రెస్ - జేడీఎస్ ప్రయత్నాలు..వారిని ఆకర్షించేందుకు ఇంకా బీజేపీ ప్రయత్నాలు చేస్తున్నట్లు టాక్. 224 స్థానాల్లో రెండు స్థానాలకు ఎన్నికలు జరగలేదనే సంగతి తెలిసిందే. 222 మంది సభ్యులున్న శాసనసభలో విశ్వాస పరీక్షలో గట్టెక్కాలంటే స్పీకర్ మినహా 111 మంది మద్దతుండాలి. బీజేపీకి 104 మంది సభ్యుల బలం ఉంది. మెజార్టీకి కేవలం ఏడుగురు సభ్యుల దూరం మాత్రమే ఉండడంతో జేడీఎస్ - కాంగ్రెస్ వర్గాల్లో ఆందోళన నెలకొంది.

అసెంబ్లీ సమావేశం కాగానే స్పీకర్ ఎన్నిక జరుగనుంది. ఈ పదవి దక్కించుకోవడం బీజేపీ, కాంగ్రెస్ పోటీ పడుతోంది. కాంగ్రెస్ తరపున శ్రీనివాసపురం విధానసభ సభ్యుడు కె.ఆర్.రమేశ్ కుమార్, బీజేపీ తరపున రాజాజీనగర సభ్యుడు ఎస్.సురేశ్ కుమార్ గురువారం నామినేషన్లు దాఖలు చేశారు. సభాపతి ఎన్నికల్లో రమేశ్ కుమార్, విశ్వాస పరీక్షలో ముఖ్యమంత్రి కుమార స్వామికి ఓట్లు వేయాలని జేడీఎస్, కాంగ్రెస్ పక్షాలు ఆయా సభ్యులకు విప్ జారీ చేసిన సంగతి తెలిసిందే.

సభలో బలబలాలు...

మొత్తం స్థానాలు  224
ఎన్నికలు జరిగిన స్థానాలు  222
కాంగ్రెస్ 78
జేడీఎస్  36
స్వతంత్ర  1
బీఎస్పీ  1
కర్ణాటక ప్రజ్ఞావంత జనతా పార్టీ 1
బీజేపీ  104
ప్రభుత్వ స్థాపనకు కావాల్సిన స్థానాలు 113
కాంగ్రెస్ జేడీఎస్ ఇతరుల  117
16:40 - May 23, 2018

కర్ణాటక : బెంగళూరులోని విధానసౌధలో జేడీఎస్ అధినేత కుమారస్వామి ప్రమాణస్వీకారం కార్యక్రమం అతిరధుల మహారథుల మధ్య అంగరంగ వైభవంగా జరిగింది. కుమారస్వామి అను నేను అంటు గవర్నర్ వాజూభాయి వాలా చెప్పిన ప్రకారంగా కుమారస్వామి కర్ణాటక 24వ సీఎంగా ప్రమాణస్వీకారం చేశారు. డిప్యూటీ సీఎంగా కాంగ్రెస్ నేత పరమేశ్వర్ ప్రమాణస్వీకారం చేశారు. ఈ కార్యక్రమానికి కాంగ్రెస్ అధ్యక్షలు రాహుల్ గాంధీ, ఉపాధ్యక్షులు సోనియా గాంధీ, ఏపీ సీఎం, చంద్రబాబునాయుడు, బీఎస్పీ నేత మాయావతి, పశ్చిమబెంగాల్ సీఎం మమతా బెనర్జీ, కేరళ ముఖ్యమంత్రి పినరాయి విజయన్, ఢిల్లీ సీఎం కేజ్రీవాల్, సీపీఎం జాతీయ ప్రధాన కార్యదర్శి సీతారాం ఏచూరి, స్టాలిన్, శరత్ యాదవ్, యూపీ మాజీ ముఖ్యమంత్రి అఖిలేశ్ యాదవ్ వంటి అతిరథ మహారథులు పాల్గొన్నారు.  

ఒకే వేదికపై విభిన్న పార్టీల నేతలు, సీఎంలు..
కుమారస్వామి ప్రమాణస్వీకారం నేపథ్యంలో దేశ వ్యాప్తంగా బీజేపీ ఏతర సీఎంలు, పార్టీల అధినేతలు, నేతలు, కార్యకర్తలు, అభిమానులు విధానసౌధ ప్రాంతంలో కొలువుదీరారు. కర్ణాటక మాజీ ముఖ్యమంత్రి సిద్ధరామయ్య, జాతీయ పార్టీ అధినేతలు రాహుల్ గాంధీ, సోనియా గాంధీ, మల్లికార్జున ఖర్గే, గులాంనబీ అజాద్ వంటి కాంగ్రెస్ సీనియర్ నేతలు, జేడీఎస్ నేతలు, తమిళనాడుకు చెందిన స్టాలిన్ వంటి అతిరథ మహారధులు వేదికపై కొలువుదీరి ఆహుతులను అలరించారు. బహుశా ఇటువంటి సందర్భాలకు కుమారస్వామి ప్రమాణస్వీకారం వేదికగా నిలిచింది.  

07:31 - May 23, 2018

తమిళనాడులోని తూత్తుకుడిలో నిరసననకారుల ఆందోళన ఉద్రిక్తతకు దారి తీసింది. ఆందోళన కారులపై పోలీసులు కాల్పులు జరిపారు. ఈ ఘటనలో 9మంది ఆందోళనకారులు మృతి చెందారు. స్టెరిలైట్ కర్మాగారం మూసివేయాలంటూ గ్రామస్తులు ఆందోళన చేపడుతున్న సంగతి తెలిసిందే. మరోవైపు కర్ణాటక రాష్ట్రంలో జేడీఎస్ - కాంగ్రెస్ సంకీర్ణ ప్రభుత్వం ఏర్పాటు కానుంది. సీఎంగా కుమార స్వామి ప్రమాణ స్వీకారం చేయనున్నారు. ఈ అంశాలపై టెన్ టివిలో జరిగిన చర్చా వేదికలో క్రిషాంక్ (టి.కాంగ్రెస్), మాధవి (బిజెపి), బండారు రవి కుమార్ (సీపీఎం) పాల్గొని అభిప్రాయాలు వ్యక్తం చేశారు. పూర్తి వివరాలకు వీడియో క్లిక్ చేయండి. 

Pages

Don't Miss

Subscribe to RSS - జేడీఎస్