టీఆర్ఎస్

19:16 - August 20, 2018

హైదరాబాద్ : కేసీఆర్‌ ప్రగతి నివేదిన బహిరంగ సభ వాయిదా పడ్డట్లేనా..? ఈ ప్రశ్నకు అవునన్న సమాధానమే వస్తోంది. సెప్టెంబర్‌ రెండున సభ జరపాలని భావించారు. అయితే.. ఇప్పటికీ ఏర్పాట్లు ప్రారంభం కాకపోవడంతో.. ప్రస్తుతానికి సభ వాయిదా పడ్డట్లేనన్న భావన వ్యక్తమవుతోంది. మరి దీనికి కారణమేంటి..? వాచ్‌ దిస్‌ స్టోరీ

తెలంగాణాలో పొలిటికల్ హీట్ ను ఓ రేంజ్‌కు తీసుకువెళ్లేందుకు సిద్ధమైన గులాబీ దళపతి కేసిఆర్, వాతావరణ పరిస్థితులతో చల్లబడ్డట్లు కనిపిస్తోంది. సెప్టెంబర్‌ రెండో తేదీన భారీ బహిరంగ సభ ఏర్పాటు చేయాలన్న ఆలోచనను ప్రస్తుతానికి వాయిదా వేసినట్లు ప్రచారం జరుగుతోంది. ముందస్తు ఎన్నికల ఊహాగానాల నేపథ్యంలో.. ఆగస్టు 17న శాసనసభాపక్షం, పార్లమెంటరీ పక్షాలతో పాటు.. రాష్ట్ర కార్యవర్గ సమావేశం నిర్వహించాలని కేసీఆర్‌ భావించారు. అదే ఊపులో.. సెప్టెంబర్‌ రెండున భారీ బహిరంగసభ ఏర్పాటు చేయాలని, ఆ సభలో.. పార్టీ అభ్యర్థుల జాబితాను ప్రకటించాలనీ కేసీఆర్‌ నిర్ణయించారు. అయితే.. భారీ వర్షాల నేపథ్యంలో.. రాష్ట్ర కార్యవర్గ సమావేశాన్ని కేసీఆర్‌ వాయిదా వేశారు. బహిరంగ సభపై మాత్రం ఎలాంటి నిర్ణయాన్నీ ప్రకటించలేదు.

బహిరంగ సభ నిర్వహణకు హైదరాబాద్‌ శివారుల్లోని కొంగరకలాన్‌లోని 1500 ఎకరాల స్థలాన్ని కూడా ఎంపిక చేశారు. అయితే.. జనసమీకరణ, సభ ఏర్పాట్లకు గడువు చాలదని పార్టీ నేతల అభిప్రాయంతో కేసీఆర్‌ ఏకీభవించినట్లు పార్టీ శ్రేణుల్లో సమాచారం జరుగుతోంది. మరోవైపు కేరళను భారీ వర్షాలు ముంచెత్తుతున్న తరుణంలో.. భారీ బహిరంగ సభ నిర్వహిస్తే రాజకీయంగా కూడా విమర్శలు ఎదుర్కోక తప్పదన్న భావనా పార్టీ నేతల్లో వ్యక్తమైనట్లు సమాచారం. వీటన్నింటికీ తోడు.. రాష్ట్రంలో కూడా విస్తారంగా వర్షాలు కురుస్తుండడం కూడా.. బహిరంగ సభ నిర్వహణపై కేసీఆర్‌ పునరాలోచనలో పడడానికి కారణమని పార్టీ వర్గాలు చెబుతున్నాయి.

భారీ బహిరంగ సభకు బదులుగా.. ప్రాంతీయ సభలు నిర్వహించే ప్రతిపాదన కూడా అధికార పార్టీలో ఉన్నట్లు తెలుస్తోంది. ఉమ్మడి జిల్లాల ప్రాతిపాదికన మూడు లేదా నాలుగు బహిరంగ సభలను నిర్వహించే అవకాశాలను పార్టీ పరిశీలిస్తున్నట్లు సమాచారం. జాతీయ రాజకీయాలపై ముఖ్యమంత్రి కేసిఆర్ దృష్టి సారించడంతో తెలంగాణాలో తమకు ఉన్న ప్రజాదరణను తెలియజెప్పేందుకు భారీ సభ నిర్వహించాలని అధికార పార్టీ భావించింది. కాని తాజా పరిణామాలతో.. సభ నిర్వహణను తాత్కాలికంగా వాయిదా వేసినట్లే అన్న అభిప్రాయం టీఆర్ఎస్‌ నేతల్లో వ్యక్తం అవుతోంది. 

06:36 - August 16, 2018

హైదరాబాద్ : తెలంగాణలో ముందస్తు ఎన్నికల వేడి రాజుకుంది. అధికార టీఆర్‌ఎస్‌, ప్రతిపక్ష కాంగ్రెస్‌ ముందస్తు ఎన్నికలకు సిద్ధమయ్యాయి. ఎన్నికల్లో పోటీ చేసే అభ్యర్థులను వచ్చే నెలలోనే ప్రకటించాలని టీఆర్‌ఎస్‌ నిర్ణయించిన తరుణంలో... టీ కాంగ్రెస్‌ కూడా ఇదే విధానాన్ని అవలంభించబోతోంది. ఈసారి అధికారం దక్కించుకోవాలన్న లక్ష్యంతో పనిచేస్తున్న టీ కాంగ్రెస్‌ నేతలు.. అన్ని వర్గాల ప్రజలను ఆకట్టుకునేందుకు జనాకర్షణ పథకకాలతో ఎన్నికల ప్రణాళిక రూపొందిస్తున్నారు. తెలంగాణలో ముందస్తు ఎన్నికల రాజకీయాలు ఊపందుకున్నాయి. అధికార టీఆర్‌ఎస్‌, ప్రతిపక్ష కాంగ్రెస్‌ ఎన్నికలకు సిద్ధమయ్యాయి. ముందస్తు ఎన్నికల కోసం ముఖ్యమంత్రి కేసీఆర్‌ అసెంబ్లీని ఎప్పుడైనా రద్దు చేసే అవకాశం ఉందని భావిస్తున్న టీ కాంగ్రెస్‌ నేతలు.. ఇందుకు అనుగుణంగా తమ ఏర్పాట్లను ముమ్మరం చేశారు. ఈసారి అధికారంలోకి రావాలన్న ఉద్దేశంతో వ్యూహాత్మకంగా అడుగులు వేస్తున్నారు.

అసెంబ్లీ ఎన్నికలకు వచ్చే నెలలోనే అభ్యర్థులను ప్రకటించాలని టీఆర్‌ఎస్‌ నిర్ణయించిన తరుణంలో... టీ కాంగ్రెస్‌ నేతలు కూడా అప్రమత్తమయ్యారు. ఏఐసీసీ అధ్యక్షుడు రాహుల్‌గాంధీ రెండు రోజుల రాష్ట్ర పర్యటన ముగించుకుని మంగళవారం ఢిల్లీ బయలుదేరే ముందు తెలంగాణ కాంగ్రెస్‌ నేతలు... ముఖ్యమంత్రి కేసీఆర్‌ ముందస్తు ఎన్నికలకు సిద్ధమవుతున్న విషయాన్ని ఆయన దృష్టికి తెచ్చారు. అభ్యర్థులను కూడా వచ్చే నెలలోనే ప్రకటిస్తామని కేసీఆర్‌ చేసిన ప్రకటనను రాహుల్‌కు వివరించారు. దీనిపై స్పందించిన రాహుల్‌గాంధీ.. అభ్యర్థుల ఎంపికకు కమిటీ వేయాలని ఆదేశించడంతో ఈ దిశగా తెలంగాణ కాంగ్రెస్‌ నేతలు చర్యలు చేపట్టారు.

టీఆర్‌ఎస్‌ ప్రభుత్వం చేస్తున్న ప్రాజెక్టుల రీడిజైనింగ్, గత ఎన్నికల్లో ఇచ్చిన డబుల్‌ బెడ్‌ రూము ఇళ్ల నిర్మాణం వంటి పథకాలపై ఒంటికాలిపై లేస్తున్న టీ కాంగ్రెస్‌ నేతలు... ఎన్నికల ప్రణాళిక రూపకల్పనకు కూడా సిద్ధమవుతున్నారు. రైతులకు ఏకకాలంలో రెండు లక్షల రూపాయల రుణ మాఫీ, పంటలకు మద్దతు ధరలు, డ్వాక్రా మహిళలకు పది లక్షల రూపాయాల వడ్డీలేని రుణాలు, లక్ష రూపాయల గ్రాంటు వంటి అంశాలను మ్యానిఫెస్టోలో చేర్చనున్నారు. అభయ హస్తం పింఛను పథకాన్ని పునరుద్ధరించడంతోపాటు పెన్షన్‌ మొత్తాన్ని వెయ్యి రూపాయల నుంచి 1500 రూపాయలకు పెంచుతామని హమీ ఇచ్చింది. వృద్ధులు, వితంతువులకు ఇస్తున్న సామాజిక పెన్షన్లను వెయ్యి రూపాయాల నుంచి రెండు వేల రూపాయలకు పెంచే అంశాన్ని ఎన్నికల ప్రణాళికలో చేర్చబోతున్నారు. పెన్షన్‌ పొందేందుకు ప్రస్తుతం ఉన్న 65 ఏళ్ల వయస్సును 58కి తగ్గిస్తామని టీ కాంగ్రెస్‌ హామీ ఇస్తోంది. వికలాంగులకు ప్రస్తుతం ఇస్తున్న పెన్షన్‌ను 1500 నుంచి మూడు వేల రూపాయలకు పెంచుతామని పార్టీ నాయకులు ప్రకటించారు. నిరుద్యోగులకు నెలకు 3 వేల రూపాయల భృతి ఇస్తామని హామీ ఇస్తున్నారు. ఈ అంశాలను విస్తృతంగా ప్రజల్లోకి తీసుకెళ్లాలని నిర్ణయించారు.

మొత్తం మీద ఇటు టీఆర్‌ఎస్‌, అటు కాంగ్రెస్‌ ముందస్తు ఎన్నికలకు సిద్ధంకావడంతో... ఇకపై విస్తృతంగా ప్రజల్లోకి వెళ్లేందుకు రెండు పార్టీల నేతలు ప్రణాళికలు సిద్ధం చేస్తున్నారు. పరస్పర ఆరోపణలు, విమర్శలతో రాజకీయాలను రక్తి కట్టించేందుకు వ్యూహాత్మంగా అడుగులు వేస్తున్నారు. ముందస్తు ఎన్నిక క్రీడలో అధికార టీఆర్‌ఎస్‌, ప్రతిపక్ష కాంగ్రెస్‌లో ఎవరిది పైచేయి అవుతుందో చూడాలి. 

09:19 - August 15, 2018

హైదరాబాద్ : రాహుల్‌ గాంధీ వ్యాఖ్యలపై టీఆర్‌ఎస్‌ ధీటుగా స్పందించింది. తెలంగాణ ప్రభుత్వంపై రాహుల్‌గాంధీ చేసిన ఆరోపణలను తిప్పికొట్టింది. కాంగ్రెస్‌ పార్టీ స్కాంగ్రెస్‌ పార్టీగా మారిందని ఆరోపణలు చేసింది. ప్రజాస్వామ్య గొంతుక, విలువలను కాలరాసిన చరిత్ర కాంగ్రెస్‌దేనని విమర్శించింది.

రాహుల్‌ వ్యాఖ్యలకు టీఆర్‌ఎస్‌ కౌంటర్‌
కాంగ్రెస్‌ జాతీయ అధ్యక్షుడు రాహుల్‌గాంధీ తెలంగాణ ప్రభుత్వంపై చేసిన ఆరోపణలు, వ్యాఖ్యలకు ఆ పార్టీ నేతలు కౌంటర్‌ ఇచ్చారు. ఐటీ, పురపాలకశాఖ మంత్రి కేటీఆర్‌ ట్విట్టర్‌లో రాహుల్‌గాంధీపై ఆగ్రహం వ్యక్తం చేశారు. రాహుల్‌గాంధీ అవినీతి గురించి మాట్లాడటం విడ్డూరంగా ఉందన్నారు. రాహుల్‌తోపాటు వేదికపై కూర్చున్న వారిలో సగంమంది బెయిల్‌పై ఉన్నవారేనని , భావ ప్రకటన స్వేచ్ఛ, మీడియా స్వేచ్ఛ గురించి రాహుల్‌గాంధీ మాట్లాడటం హాస్యాస్పదంగా ఉందని కేటీఆర్‌ ఎద్దేవా చేశారు. ప్రజాస్వామ్య గొంతుక, విలువలను కాలరాసిన ఘనత కాంగ్రెస్‌ పార్టీదేనని కేటీఆర్‌ ఆరోపించారు. కాంగ్రెస్‌ పార్టీ స్కాంగ్రెస్‌ పార్టీగా మారిందని.. ఏ అంటే ఆదర్శ్‌, బీ అంటే బోఫోర్స్, సీ అంటే కామన్వెల్త్‌ ... ఇంకా మీ కుంభకోణాల గురించి చెప్పాలా రాహుల్‌ అని నిలదీశారు. 1969 ఉద్యమ సమయంలో 369 మంది యువకులపై కాల్పులు జరిపిన చరిత్ర కాంగ్రెస్‌దని... మలిదశ ఉద్యమంలో కూడా వందలాది మందిని పొట్టనపెట్టుకున్నది కాంగ్రెసేనని ఆరోపించారు. కాంగ్రెస్‌ బలితీసుకున్న అమాయకులకే నివాళులు అర్పించిన సంగతి రాహుల్‌గాంధీకి తెలుసా అని కేటీఆర్‌ ట్విట్టర్‌లో ప్రశ్నించారు.

రాహుల్‌ వ్యాఖ్యలపై టీఆర్‌ఎస్‌ ఎదురుదాడి..
రాహుల్‌గాంధీ పర్యటన అట్టర్‌ ఫ్లాప్‌ అయిందని టీఆర్‌ఎస్‌ నేత దానం నాగేందర్‌ అన్నారు. తెలంగాణ ప్రజలు కాంగ్రెస్‌ పార్టీని నమ్మే స్థితిలో లేరన్నారు. కాంగ్రెస్‌ నేతల ముఖం చూసి ఎవరైనా ఓట్లు వేస్తారా అని దానం ప్రశ్నించారు. కాంగ్రెస్‌ అనవసర ఆరోపణలు చేయడం మానేసి.. రుజువులు చూపించాలని హోంమంత్రి నాయిని నర్సింహ్మారెడ్డి డిమాండ్‌ చేశారు. కాంగ్రెస్‌ పార్టీలో అందరూ ముఖ్యమంత్రులేనని ఎద్దేవా చేశారు. మరో 15 సంవత్సరాలపాటు టీఆర్‌ఎస్‌ ప్రభుత్వమే అధికారంలోఉంటుందని ఆశాభావం వ్యక్తం చేశారు.

17:57 - August 13, 2018

హైదరాబాద్ : తెలంగాణ భవన్‌లో టీఆర్‌ఎస్‌ రాష్ట్రకార్యవర్గ సమావేశం కొనసాగుతోంది. పార్టీ అధినేత, ముఖ్యమంత్రి కేసీఆర్‌ అధ్యక్షతన ఈ సమావేశం జరుగుతోంది. పార్టీ నిర్వహించిన సర్వే ఫలితాల ఆధారంగా ప్రజాప్రతినిధులను అప్రమత్తం చేయడంతో పాటు పార్టీ ప్రతిష్ఠాత్మక కార్యక్రమాల నిర్వహణ, విస్తృత స్థాయి ప్రచారం లక్ష్యంగా ఈ సమావేశాన్ని నిర్వహిస్తున్నారు. ఎన్నికలెప్పుడొచ్చినా సిద్ధంగా ఉండాలని పార్టీ నేతలకు దిశా నిర్దేశం చేయనున్నారు. రెండు రోజుల పర్యటనకు హైదరాబాద్‌ వచ్చిన రాహుల్‌కు ఎన్నికల సవాలు విసిరే అవకాశం ఉన్నట్లు తెలుస్తోంది. రాత్రి ఏడు గంటలకు సమావేశం వివరాలు ముఖ్యమంత్రి కేసీఆర్‌ మీడియాకు వివరించనున్నారు.

 

15:59 - August 7, 2018

మహబుబ్ నగర్ : జిల్లాలో దేవరకద్ర రాజకీయం రసకందాయంగా రుతోంది...పాలమూరు జిల్లాలో వయస్సులో చిన్నదైన.. విస్తీర్ణంలో పెద్దదైన దేవరకద్ర నుంచి గెలిచి... అసెంబ్లీలో అడుగుపెట్టాలని పలువురు నేతలు ఉవ్విళ్లూరుతున్నారు.. అధికార పార్టీ నుంచి మళ్లీ సిట్టింగ్ ఎమ్మెల్యేనే బరిలోకి దిగబోతుండగా.. కాంగ్రెస్ టిక్కెట్ ఎవరికనేది చర్చనీయాంశంగా మారింది...

ఒక్కప్పుడు టీడీపీ కంచుకోటగా దేవరకద్ర
2009 ఎన్నికలకు ముందు నియోజకవర్గాల పునర్విభజనలో ఏర్పడింది దేవరకద్ర నియోజకవర్గం. ఒకప్పుడు టీడీపీకి ఈ నియోజకవర్గం కంచుకోట. అయితే నియోజకవర్గ మొదటి ఎమ్మెల్యేగా టీడీపీ నేత సీతా దయాకర్ రెడ్డి ఎన్నికయ్యారు. 2014 ఎన్నికల్లో టీఆర్ఎస్ నుంచి ఆల వెంకటేశ్వర్ రెడ్డి ఎమ్మెల్యేగా గెలిచారు. 2011 కు ముందు భూత్పూర్ జడ్పీటీసీ సభ్యుడిగా టీడీపీ నుంచి ఎన్నికైన ఆల వెంకటేశ్వర్ రెడ్డి... ఆ తర్వాత తెలంగాణ ఉద్యమం సమయంలో జడ్పీటీసీ పదవీకి, టీడీపీకి రాజీనామా చేసి టిఆర్ఎస్ లో చేరారు. పార్టీ బలోపేతంలో కీలకంగా వ్యవహారించిన వెంకటేశ్వర్ రెడ్డికి 2014 ఎన్నికలలో దేవరకద్ర నుంచి అవకాశమిచ్చారు గులాబీబాస్. యువకుడు ,విద్యావంతుడు కావడంతో ఎమ్మెల్యేగా అన్ని వర్గాల ప్రజలకు దగ్గరయ్యే ప్రయత్నాల్లో ఉన్నారు వెంకటేశ్వర్ రెడ్డి. దీనికి తోడు ప్రతిష్టాత్మక పాలమూర్ రంగారెడ్డి ఎత్తిపోతల పథకం రీ -డిజైన్ లో భాగంగా దేవరకద్ర పనులు ప్రారంభం కావడం, ఇది పూర్తయితే నియోజకవర్గమంతా సస్యశ్యమలమయ్యే అవకాశం ఉండటం తనకు ప్లస్ పాయింట్ అనే భావనతో ఉన్నారు.

మళ్లీ తనదే విజయమనే ధీమాలో టీఆర్‌ఎస్‌ ఎమ్మెల్యే
దేవరకద్రలో తనకు తిరుగులేదని టీఆర్ఎస్ సిట్టింగ్ ఎమ్మెల్యే ధీమాతో వుంటే కాంగ్రెస్ టికెట్ ఎవరికనే ఉత్కంఠ అంతకంతకూ పెరిగిపోతుంది.ఇప్పటికే పలువురు నేతలు టికెట్ తమకేనని ప్రచారం చేసుకుంటుంటే ...టీడిపి నుంచి ముఖ్యనేతల్ని పార్టీలో చేర్చుకుని దేవరకద్ర బరిలో దించాలనే వ్యూహంతో కాంగ్రెస్ పెద్దలున్నారని సమాచారం. దేవరకద్ర నుంచి గత ఎన్నికల్లో కాంగ్రెస్ అభ్యర్ధిగా డోకూర్ పవన్ కుమార్ రెడ్డి పోటీచేశారు.ఎన్నికల తరువాత కూడా ప్రజలతో టచ్ లో వుంటున్నారు.దీంతో వచ్చే ఎన్నికలలో కూడా టికెట్ తనకే వస్తుందని నమ్మకం పెట్టుకున్నారు డోకూర్ పవన్ కుమార్ రెడ్డి. అయితే గతంలో జడ్పీటీసీ సభ్యుడిగా పనిచేసిన కాటం ప్రదీప్ కుమార్ గౌడ్ తాను కూడా రేసులో ఉన్నాననే సంకేతాలిస్తున్నారు.ఈ మధ్యకాలంలో ప్రతి మండలంలో వున్న కార్యకర్తలతో సమావేశం కావడంతో పాటు బీసీవాదంతో బలంగా ముందుకుపోతున్నారు. అదే విధంగా ఇప్పటికే అన్ని నియోజకవర్గాలలో రెడ్డి సామాజికవర్గంకు చెందిన వారు ఎమ్మెల్యేలుగా,నియోజకవర్గం ఇంచార్జీగా ఉన్నారు కనుక బీసీలకే దేవరకద్ర టిక్కెట్ వస్తుందని కాటం ప్రదీప్ కుమార్ గౌడ్ తన అనుచరులతో కలిసి నియోజకవర్గంలో కార్యకర్తలతో సమావేశం ఏర్పాటు చేస్తుకుంటున్నారు.

కాంగ్రెస్‌ నుంచి పోటీలో మధుసూదన్‌ రెడ్డి
మరోవైపు కాంగ్రెస్ టికెట్ ఆశిస్తున్న హైకోర్టు న్యాయవాది మధుసూధన్ రెడ్డి నియోజకవర్గంలో వివిధ సేవా కార్యక్రమాలతో ప్రజల్లోకి వెళ్తున్నారు. టికెట్ పై హామీ ఇస్తే కాంగ్రెస్ లో చేరాలనుకుంటున్నారు. అయితే దేవరకద్ర మాజీ ఎమ్మెల్యే సీతా దయాకర్ రెడ్డి దంపతులు కాంగ్రెస్ లో చేరతారనీ,సీతా దయాకర్ రెడ్డి బరిలో నిలిచే అవకాశం వుందనే ప్రచారం జోరుగా సాగుతోంది. దీంతో కాంగ్రెస్ పెద్దలు ఇప్పటికే దయాకర్ రెడ్డి దంపతులతో మంతనాలు జరిపినట్లు సమాచారం. అయితే టికెట్ విషయంలో మాత్రం ఎటువంటి హామీ రాకపోవడంతో పార్టీలో చేరికలో జాప్యం జరుగుతోందని కాంగ్రెస్ శ్రేణులు భావిస్తున్నాయి.

దయాకర్‌రెడ్డి దంపతుల చేరికపై కొరవడిన స్పష్టత
దయాకర్ రెడ్డి దంపతులు చేరిక పైనే క్లారిటీ రాలేదు. కాంగ్రెస్ లో మరో సీనియర్ నేత టీడీపీని వీడి పార్టీలోకి రానున్నారని ప్రచారం మొదలైంది.రావుల చంద్రశేఖర్ రెడ్డి కాంగ్రెస్ లో చేరి దేవరకద్ర నుంచి పోటీ చేస్తారనే ఊహాగానాలు బలంగా ఉన్నాయి. అయితే కాంగ్రెస్ సీనియర్ నేత చిన్నారెడ్డి ... పార్టీలోకి రావాలని రావులని ఆహ్వానించటం ఈ ప్రచారానికి మరింత బలం చేకూరుస్తోంది. అయితే దయాకర్ రెడ్డి దంపతులు ,రావుల చంద్రశేఖర్ రెడ్డి పార్టీ మారతారో లేదో ఇంత వరకు ఏలాంటి సమాచారం లేదు. మరో వైపు ఆ నేతలు టీడీపీ కార్యక్రమాలతో నియోజకవర్గంలో జోరుగా పర్యటిస్తున్నారు.టీడీపీ నుంచి నేతల చేరికల పై లైన్ క్లియర్ కాలేదు. వస్తేగానీ దేవరకద్ర కాంగ్రెస్ అభ్యర్ది పై కేడర్ కి క్లారీటీ వచ్చేలా లేదు.

12:30 - August 3, 2018

ఢిల్లీ : మధ్యాహ్న భోజన పథకం కార్మికుల వేతనాలు పెంచాలని టీఆర్ఎస్ ఎంపీలు కోరారు. శుక్రవారం కేంద్ర మంత్రి ప్రకాష్ జవదేకర్ ను ఎంపీ కవిత ఆధ్వర్యంలో పార్టీ ఎంపీలు కలిశారు. ఈ సందర్భంగా వారు ఒక వినతిపత్రం ఇచ్చారు. కార్మికుల వేతనాలు పెంచాలని, 10, 500 పెంచాలని కోరడం జరిగిందని ఎంపీ కవిత తెలిపారు. అంతేగాకుండా ఈపీఎఫ్, ఈఎస్ఐ సౌకర్యాలు కల్పించాలని కోరారు. తెలంగాణ రాష్ట్ర వ్యాప్తంగా ఉన్న 40వేల మంది కార్మికులకు మేలు కలిగే విధంగా కృషి చేయడం జరుగుతుందన్నారు. 

07:14 - July 31, 2018

హైదరాబాద్ : తెలంగాణపై కాంగ్రెస్‌ సీరియస్‌గా ఫోకస్‌ పెట్టింది. వచ్చేనెల నుంచి ప్రతి నెలలో ఒకరోజు రాహుల్‌గాంధీ తెలంగాణలో పర్యటించేందుకు రంగం సిద్ధమవుతోంది. పొత్తులపైనా నిర్ణయం అధిష్టానానికే పీసీసీ వదిలేసినట్టు తెలుస్తోందిన. ప్రత్యేకహోదాపై కాంగ్రెస్‌ను గులాబీపార్టీ టార్గెట్‌ చేయడంపై ఉత్తమ్‌ నిప్పులు చెరిగారు.

తెలంగాణపై కాంగ్రెస్‌ హైకమాండ్‌ స్పెషల్‌ ఐ..
తెలంగాణలో ముందస్తు ఎన్నికలు వస్తాయన్న ప్రచారం జరుగుతుండడంతో కాంగ్రెస్‌ పార్టీ ప్రత్యేకదృష్టి పెట్టింది. వచ్చే ఎన్నికల్లో గెలుపే లక్ష్యంగా వ్యూహాలకు పదునుపెడుతోంది. తమను రాజీయంగా ఇరుకున పెడుతున్న గులాబీపార్టీ బాస్‌పై ఎదురుదాడికి సిద్ధమవుతోంది.

వచ్చే నెలలో రెండు రోజులు రాహుల్ పర్యటన
గాం
ధీభవన్‌లో మీడియాతో టీపీసీసీ చీఫ్‌ ఉత్తమ్‌ జరిపిన చిట్‌చాట్‌లో అనేక విషయాలు ప్రస్తావించారు. వచ్చే నెలలో రాహుల్‌ తెలంగాణలో రెండు రోజులు పర్యటిస్తారని ప్రకటించారు. నాలుగో విడత బస్సుయాత్రను రాహుల్‌ ప్రారంభిస్తారని తెలిపారు. అంతేకాదు.. పార్లమెంట్‌ సమావేశాల తర్వాత ఎన్నికల వరకు ప్రతినెలలో ఒకరోజు రాహుల్‌ తెలంగాణలో పర్యటిస్తారని చెప్పారు. యువత, విద్యార్థులు, మహిళలు, మేధావులతో రాహుల్‌ సమావేశంకానున్నట్టు ఉత్తమ్‌ వివరించారు.

ప్రత్యేకహోదాపై కాంగ్రెస్‌ను టార్గెట్‌ చేసిన గులాబీపార్టీ..
ఏపికి ప్రత్యేకహోదా తమవల్లేనే సాధ్యమంటున్న కాంగ్రెస్‌ను గులాబీపార్టీ టార్గెట్‌ చేయడంపై ఉత్తమ్‌కుమార్‌రెడ్డి నిప్పులు చెరిగారు. నాలుగేళ్లైనా విభజన చట్టంలోని ఏ ఒక్క హామీని సాధించలేకపోయినా కేసీఆర్‌.. కాంగ్రెస్‌పై విమర్శలు చేయడమేంటని మండిపడ్డారు. జీఎస్టీ, రాష్ట్రపతి, ఉపరాష్ట్రపతి, నోట్లరద్దు అంశాలపై మోదీకి మద్దతిచ్చిన కేసీఆర్‌.... విభజన హామీలపై ఎందుకు ప్రశ్నించలేదో చెప్పాలని నిలదీశారు. హోదాపై కేసీఆర్‌, కవిత, కేటీఆర్‌ మద్దతిస్తుంటే.. రాష్ట్రమంత్రులు వ్యతిరేకించడం హాస్యాస్పదంగా ఉందని ఎద్దేవా చేశారు.

పొత్తులపైనా స్పష్టత ఇచ్చిన ఉత్తమ్‌
వచ్చే ఎన్నికల్లో కాంగ్రెస్‌ - టీడీపీ పొత్తుపెట్టుకుంటాయని జరుగుతున్న ప్రచారంపైనా ఉత్తమ్‌ స్పందించారు. ఇప్పటి వరకు తాము ఎవరితోనూ పొత్తులపై చర్చించలేదన్నారు. పొత్తులపై రాహుల్‌గాంధీ నిర్ణయమే ఫైనల్‌ అన్నారు. తెలంగాణలో ఎవరితోనూ పొత్తులేకున్నా... అధికారంలోకి వస్తామని ధీమా వ్యక్తం చేశారు. మొత్తానికి ఎన్నికలు దగ్గరపడుతుండడంతో కాంగ్రెస్‌పార్టీ.. టీఆర్‌ఎస్‌ సర్కార్‌పై దూకుడు పెంచుతోంది. గులాబీబాస్‌పై ఎదురుదాడికి దిగుతోంది.

17:55 - July 27, 2018

హైదరాబాద్ : ఏపీకి ప్రత్యేక హోదాపై టీఆర్‌ఎస్‌ నాయకులు ద్వంద్వ ప్రమాణాలు పాటిస్తున్నారని ఏఐసీసీ కార్యదర్శి వి. హనుమంతరావు విమర్శించారు. ఏపీకి ప్రత్యేక హోదా ఇవ్వాలని లోక్‌సభలో నిజామాబాద్‌ ఎంపీ కవిత డిమాండ్‌ చేసిన విషయాన్ని వీహెచ్‌ గుర్తు చేశారు. ఏపీ పునర్విభజన చట్టంలో లేని హోదా అంశంపై మాట్లాడమని కరీంనగర్‌ ఎంపీ వినోద్‌ చెప్పిన విషయాన్ని ప్రస్తావించారు. ఇప్పుడేమో ఏపీకి హోదా ఇస్తే తెలంగాణకు కూడా ఇవ్వాలని టీఆర్‌ఎస్‌ నేతలు మెలిక పెట్టడాన్ని వీహెచ్‌ తప్పుపట్టారు. రాజకీయ లబ్ధి కోసం టీఆర్‌ఎస్‌ నాయకులు హోదా అంశాన్ని వాడుకుంటున్నారని మండిపడ్డారు.

17:47 - July 27, 2018

హైదరాబాద్ : ఎన్నికలు వచ్చినప్పుడే టీఆర్‌ఎస్‌కు జంటనగరాల అభివృద్ధి గుర్తుకు వస్తుందని బీజేపీ విమర్శించింది. ప్రగతి నివేదికల పేరుతో ముఖ్యమంత్రి కేసీఆర్‌, మంత్రి కేటీఆర్‌ ప్రజలను మభ్యపెడుతున్నారని బీజేపీ ప్రజాప్రతినిధులు మండిపడ్డారు. జీహెచ్‌ఎంసీ ఎన్నికల సమయంలో ఇచ్చిన హామీలను అమలుచేయని టీఆర్‌ఎస్ పాలకులు.. అసెంబ్లీ, పార్లమెంటు ఎన్నికల నేపథ్యంలో మరోసారి ప్రజలను మోసగించేందుకు ముందుకువచ్చారని విమర్శించారు. 

12:25 - July 26, 2018

Pages

Don't Miss

Subscribe to RSS - టీఆర్ఎస్