టీఆర్ఎస్

08:47 - August 20, 2017

హైదరాబాద్ : కేంద్రంలో మోదీప్రభుత్వ తీరుతో కేసీఆర్‌ సర్కార్‌ కు కళ్లుబైర్లు కమ్ముతున్నాయి. రాష్ట్రంలో చేపట్టిన వివిధ పథకాలకు కేంద్రం మొండిచెయ్యి చూపుతుండటం ముఖ్యమంత్రి కేసీఆర్‌కు మింగుడు పడని విషయంగా మారింది. కేంద్రం వైఖరిపై కారాలు మిరియాలు నూరుతున్న సీఎం, ఇతర మంత్రులు విమర్శలు గుప్పిస్తున్నారు. జీఎస్టీ విషయంలో మోదీ ప్రభుత్వానికి ఫుల్‌ సపోర్ట్‌ ఇచ్చి టీఆర్‌ఎస్‌ ప్రభుత్వం ఇపుడు ఇరకాటంలో పడింది. కొత్తగా తీసుకొచ్చిన పన్నుల విధానం ఇపుడు టీసర్కార్‌కు గుదిబండగా మారింది. కేంద్ర ప్రభుత్వం నిర్ణయానికి మొదట్లో ఒకే చెప్పిన ముఖ్యమంత్రి కేసీఆర్ అసలు విషయం బోధపడిన తర్వాత అగ్గిమీదగుగ్గిలం అవుతున్నారు. జూలై ఒకటి నుంచి అమ‌లులోకి జీఎస్టీ వ‌చ్చాక‌... నిర్మాణంలో ఉన్న ప్రాజెక్టులపై ఎఫెక్ట్‌ పడనుందని తెలిశాక సీఎం కేసీఆర్‌ నాలిక్కరుచుకున్నారు. ఆన్‌గోయింగ్‌ ప్రాజెక్టులపై రాష్ట్ర ప్రభుత్వానికి ఏకంగా 19వేలకోట్ల మేర నష్టం వస్తుందని గుర్తించారు. దీంతో కేంద్ర ప్రభత్వంపై పోరాటానికి సిద్ధం అవుతామని సీఎం చెబుతున్నారు. ముందుగా నిర్ణయించిన 18శాతం జీఎస్టీని 12 శాతానికి తగ్దించినప్పట్టికీ తాము భారీగా నష్ణపోతామని టీసర్కర్‌ ఆందోళన చెందుతోంది. నిర్మాణంలో ఉన్న ప్రాజెక్టులకు జీఎస్టీ నుంచి మినహాయింపు ఇవ్వాలని ముఖ్యమంత్రి కొత్తగా డిమాండ్‌ చేస్తున్నారు. కేంద్రం దిగిరాకుంటే న్యాయపోరాటానికి కూడా వెనుకాడేది లేదని తేల్చి చెబుతున్నారు.

కాళ్లరిగేలా తిరుగున్నారు
ఒక్క జీఎస్టీ విషయంలోనే కాదు.. రాష్ట్రంలో చేపట్టిన పలు పథకాలు పెండింగ్‌లో ఉన్నాయి. పథకాల అమలుకు కేంద్రం నుంచి రావాల్సిన నిధులు పలుచబడ్డాయి. ముఖ్యమంత్రి తోపాటు, రాష్ట్ర మంత్రులు కూడా ఇప్పటికే ఢిల్లీ చుట్టూ కాళ్లరిగేలా తిరుగున్నారు. అయినా కేంద్రం నుంచి సానుకూలత లోపించింది. తాజాగా రాష్ట్రంలో ఐటీ పరిశ్రమకు మరింత ఊపును ఇచ్చే ఐటీఐఆర్‌ ప్రాజెక్టు విషయంలోనూ కేంద్రం తాత్సారం చేయడంపై మంత్రి కేటీఆర్‌ మండిపడుతున్నారు. గత నాలుగేళ్లుగా కేంద్రం నుంచి సరియైన సహకారం లేక ప్రతష్టాత్మక ఐటిఐఆర్ ప్రాజెక్టు పరిస్థితి ఎక్కడ వేసిన గొంగళి అక్కడే అన్నగా తయారైంది. 2013 లో ఐటీఐఆర్‌కు అనుతించిన కేంద్రం ఇప్పటి వరకు నామమాత్రపు నిదులే విదిలించింది. వసతుల కల్పన కోసం .4,863 కోట్లరూపాయలు సాయం చేయాలని రాష్ట్ర ఐటీ శాఖ కోరితే కేంద్రం రెండు విడదలుగా 3,275 కోట్లను మాత్రమే మంజూరు చేసింది . ఎన్ని సార్లు విజ్ఞప్తి చేసినా పూర్తి స్థాయి నిధుల విడుదల మాత్రం జరగలేదని కేటీఆర్ ఇటీవల కేంద్ర మంత్రి రవిశంకర్‌ ప్రసాద్‌కు రాసిన లేఖలో స్పష్టం పేర్కొన్నారు. రాష్ట్ర విభ‌జ‌న త‌ర్వాత కేంద్రం నుంచి తెలంగాణ‌కు రావాల్సిన 1250 కోట్ల రూపాయ‌ల ఐటీ నిధుల కోసం కేంద్రం చూట్టు ప్రద‌క్షిణ‌లు చేయాల్సి వ‌చ్చింది. అంతేకాదు... బడ్జెట్‌ కేటాయింపుల పరిమితి ..ఎఫ్ఆర్బీఎంకు సంబంధించి 3 నుంచి 3.5 శాతానికి పెంచాల‌న్న విష‌యంలో కూడా రాష్ట్ర స‌ర్కార్ కు, తిప్పలు త‌ప్పలేదు.

కేంద్ర ప్రభుత్వ తీరుతో ఖంగుతిన్నారు
ఇప్పటికైనా కేంద్ర ప్రభుత్వం రాష్ట్రానికి రావాల్సిన నిధులు విడుదల చేయాలని, అలాగే నిర్మాణంలో ఉన్న ప్రాజెక్టులపై జీఎస్టీ భారం పడకుండా చూడాలని టీసర్కార్‌ డిమాండ్‌ చేస్తోంది. లేదంటే మరిన్ని రాష్ట్రాలను కలుపుకుని న్యాయపోరాటానికి దిగుతామని హెచ్చరికలు చేస్తోంది. మొత్తానికి జీఎస్టీ విషయంలో మొదట తెగ హడావిడి చేసి..దేశంలో అన్ని రాష్ట్రాల కంటే ముందుగానే అసెంబ్లీతో ఆమోద ముద్రవేయించిన సీఎం కేసీఆర్‌ ఇపుడు కేంద్ర ప్రభుత్వ తీరుతో ఖంగుతిన్నారని .. విపక్షాలు విమర్శలు సంధిస్తున్నాయి. 

13:41 - August 18, 2017

నిజామాబాద్ : ధర్మపురి శ్రీనివాస్.. కాంగ్రెస్ నుంచి టీఆర్‌ఎస్‌లో చేరి రాజ్యసభ సభ్యుడిగా కొనసాగుతున్నారు. అయితే ఆయన కొన్ని రోజులుగా పార్టీ మారుతున్నారనే వార్తలు జోరుగా వినిపిస్తున్నాయి. డీఎస్ కాంగ్రెస్‌కు టచ్‌లో ఉన్నారని.. సోనియా గాంధీతో మాట్లాడారని పెద్ద ఎత్తున ప్రచారం జరిగింది. అయితే ఈ వార్తల్ని డీఎస్ ఖండించారు. తనకు టీఆర్‌ఎస్‌లో ఎటువంటి అసంతృప్తి లేదని చెప్పుకొచ్చారు. తన ఇమేజ్‌ డ్యామేజ్ చేస్తున్నారంటూ ప్రెస్ మీట్ పెట్టి మరీ ఆగ్రహం వ్యక్తం చేశారు. అయినా ఆయన పార్టీ మారతారన్న వార్తలకు మాత్రం ఫుల్ స్టాప్ పడలేదు. దీంతో లాభంలేదనుకున్న డీఎస్ ఏకంగా తెలంగాణ భవన్ లో ప్రెస్ మీట్ పెట్టి మళ్లీ ఖండించారు. అయినా డీఎస్ పార్టీ మారతారన్న వార్తలు మాత్రం హైలైట్ అవుతూనే ఉన్నాయి.

అమిత్‌ షాకి టచ్‌లో
ఓవైపు డీఎస్ పార్టీ మారే అంశంపై తెగ చర్చ జరుగుతుంటే.. తాజాగా ఆయన చిన్నకొడుకు ధర్మపురి అరవింద్ ఇచ్చిన ఓ ప్రకటన ఈ చర్చకు మరింత ఊతమిచ్చింది. దేశభక్తిని నిరూపించుకోవడమంటే..మోదీని బలపరచడమేనంటూ స్వాతంత్ర్య దినోత్సవం రోజు తెలుగు, ఇంగ్లీష్‌ పేపర్లలో అరవింద్ ఇచ్చిన ప్రకటన పెద్ద చర్చకు తెరలేపింది. కేవలం దేశభక్తి అంశంపైనే ఇచ్చామని అరవింద్ చెప్పినా.. దీనిని ఎవరూ తేలికగా కొట్టిపారేయలేదు. కేవలం అరవింద్ మాత్రమే బీజేపీకి దగ్గరవుతున్నారా? లేక డీఎస్ కుటుంబం మొత్తం బీజేపీలో చేరుతున్నారా? అనే గుసగుసలు వినిపిస్తున్నాయి. ధర్మపురి అరవింద్ బీజేపీలో చేరతారని నిజామాబాద్ ఎంపీగా పోటీ చేస్తారని కొందరు ఏకంగా ప్రచారం చేసేస్తున్నారు. అరవింద్ కొన్ని రోజులుగా అమిత్‌ షాకి టచ్‌లో ఉన్నారని.. పార్టీలో చేరికలో భాగంగానే పేపర్లలో భారీ యాడ్స్ ఇచ్చారనే వార్తలు వినిపిస్తున్నాయి. ఇక అరవింద్ యాడ్ చూసి జిల్లా బిజేపి నేతలు పెద్ద ఎత్తున చర్చలు జరుపుతున్నట్లు సమాచారం. అటు జిల్లా టీఆర్‌ఎస్‌ నేతలు సైతం అరవింద్ ఇచ్చిన ప్రకటనకు సంబంధించి వివరాలు అడిగి తెలుసుకునే ప్రయత్నం చేస్తున్నారని తెలుస్తోంది.

యాక్షన్ ప్లాన్ రెడీ
ఇప్పటికే అమిత్‌ షా తెలంగాణలో బిజెపి బలోపేతం దిశగా యాక్షన్ ప్లాన్ రెడీ చేశారన్న వార్తలు వినిపిస్తున్నాయి. అందులో భాగంగా గేమ్ ప్లాన్ మొదలుపెట్టేశారనే వార్తలు వినిపిస్తున్నాయి. త్వరలో అధికార పార్టీ నుంచి, కాంగ్రెస్ నుంచి కొందరు ఎమ్మెల్యేలు, సీనియర్ నేతలు బీజేపీలో చేరే అవకాశం ఉందన్న గుసగుసలు వినిపిస్తున్నాయి. ఈ సమయంలో అరవింద్ ఇచ్చిన ప్రకటన వెనుక సారాంశమేంటో కొద్దిరోజుల్లో తేలిపోనుంది. 

07:45 - August 18, 2017

హైదరాబాద్ : రాబోయే సాధారణ ఎన్నికలకు ఇప్పటి నుంచి ప్రణాళికలను రచిస్తున్న కమలనాథులు తెలంగాణాలో గులాబి పార్టీని టార్గెట్ చేసినట్లు తెలుస్తోంది. ఆరుగురు టిఆర్ఎస్‌ ఎంపీలను తమ వైపు తిప్పుకునేందుకు బిజెపి రంగం సిద్ధం చేసినట్లు జోరుగా ప్రచారం జరుగుతోంది. పార్టీలో అసంతృప్తితో రగిలిపోతున్న ఎంపీలను కమల దళంలో చేర్చుకుంటే తెలంగాణాలో కూడా పట్టు చిక్కినట్లువుతుందని బిజెపి అగ్రనేతలు భావిస్తున్నారట.

తెలంగాణపై ఫోకస్‌
బీజేపీ జాతీయ అధ్యక్షుడు అమిత్‌ షా తెలంగాణపై ఫోకస్‌ చేశారన్న అంశంపై కమలం పార్టీలో చర్చ జరుగుతోంది. తెలంగాణలో కారుపార్టీ జోరుకు బ్రేకులు వేసే దిశగా పావులు కదుపుతున్నారు. దీనికి అమిత్ షా ఇప్పటికే తెర‌వెన‌క మంత్రాంగం న‌డిపిస్తున్నారన్న టాక్‌ వినిపిస్తోంది. ఆపరేషన్‌ ఆకర్ష్‌తో గులాబీ ఎంపీలను లాగేందుకు స్కెచ్‌ వేసినట్లు తెలుస్తోంది. అర‌డ‌జ‌ను ఎంపీలతో అమిత్ షా ట‌చ్‌లో ఉన్నారట. టిఆర్ఎస్ గూటికి చేరిన వ‌ల‌స ఎంపీలు ముందువరుసలో ఉన్నార‌ని తెలుస్తోంది. అసంతృ ఎంపీలు బీజేపీ అధ్యక్షుడితో మంత‌నాలు జరిపిన‌ట్లు ప్రచారం జ‌ర‌గుతోంది.

ఆరుగురు టిఆర్ఎస్ ఎంపీలు
ఇప్పటివరకు ఆరుగురు టిఆర్ఎస్ ఎంపీలు అమిత్ వ‌ల‌లో ఉన్నట్లు కమలం పార్టీలో చర్చ సాగుతోంది. అంతా అనుకూలంగా జరిగి అమిత్‌ షా మంత్రాగం ఫలిస్తే.. త్వరలోనే ఆరుగురు ఎంపీలు క‌మ‌లం గూటికి చేరడం ఖాయమని తెలుస్తోంది. అమిత్ షా పక్కా ప్లాన్‌తో రాష్ట్రానికి వ‌స్తున్నారని సమాచారం. కమలం గూటికి చేరేది ఎవరా ఆరుగురు ఎంపీలు అన్న అంశం గులాబి పార్టీలో గుబులు పుట్టిస్తోంది. రాజ్యసభ సభ్యుడిగా ఉన్న డిఎస్ కుమారుడు కేంద్ర ప్రభుత్వానికి మద్దతుగా ప్రకటనలు ఇవ్వడం చర్చనీయాంశంగా మారింది. ముఖ్యమంత్రి కెసిఆర్ కూడా ఎంపీల వలసల ప్రచారంపై ఆరా తీస్తున్నట్లు సమాచారం.

13:30 - August 16, 2017

మేడ్చల్ : మిషన్‌ భగీరథ ద్వారా ప్రతి ఇంటికీ మంచినీరు అందిస్తామని... మంత్రి కేటీఆర్ తెలిపారు.. ప్రజలపై ఎలాంటి భారం పడకుండానే ఈ పనులు చేపడుతున్నామని ప్రకటించారు.. కొంపల్లిలో మిషన్‌ భగీరథ పనులకు కేటీఆర్‌ శంకుస్థాపన చేశారు.. ఈ ప్రాజెక్టుద్వారా అవుటర్‌ రింగ్‌ రోడ్‌ గ్రామాలకు తాగునీరు అందనుంది.. లక్షా 50వేల కుటుంబాలు లబ్ది పొందనున్నారు.. 628 కోట్ల రూపాయల ఖర్చుతో ఈ ప్రాజెక్టు పనులకు శ్రీకారం చుట్టారు.. ఏడాదిలో పూర్తిచేయాలని లక్ష్యంగా పెట్టుకున్నారు.

12:23 - August 16, 2017
07:39 - August 15, 2017

హైదరాబాద్: 2019 ఎన్నికలు..తమ పాలనకు రెఫరెండంగా భావిస్తున్న గులాబీ పార్టీ..మరోసారి అధికార పీఠం కైవసం చేసుకునేందుకు ఇప్పటినుంచే వ్యూహరచన చేస్తోంది. అందుకోసం అందుబాటులో ఉన్న అన్ని అవకాశాలను సద్వినియోగం చేసుకోవాలనుకుంటోంది. అభివృద్ధి నినాదాన్ని తీసుకోవ‌డంతో పాటు పార్టీకి సినీ గ్లామ‌ర్ తెచ్చేందుకు రంగం సిద్ధం చేస్తున్నట్లు తెలుస్తోంది. విజ‌యశాంతి పార్టీకి దూర‌మైనా గ‌త ఎన్నిక‌ల్లో హాస్యనటుడు బాబూ మోహ‌న్‌ అధికార పార్టీ త‌ర‌పున పోటీ చేసి విజ‌యం సాధించారు.

ఫిదా సినిమా చూసిన సీఎం
తెలంగాణ యాస‌, భాష‌తో విజ‌యం సాధించిన ఫిదా సినిమాను ఇటీవల చూసిన సీఎం కేసీఆర్‌...నటీనటులు చక్కగా నటించారని ప్రశంసలు గుప్పించారు. అంతేకాదు ఆ సిన్మా నిర్మాత దిల్‌రాజును పార్టీలోకి ఆహ్వానించాలని సీఎం నిర్ణయించినట్లు పార్టీ వ‌ర్గాల్లో చ‌ర్చ మొద‌లైంది. నిజామాబాద్ జిల్లాకు చెందిన దిల్ రాజుకు టీఆర్‌ఎస్‌ ప్రముఖుల‌తో స‌న్నిహిత సంబంధాలున్నాయి. దిల్‌రాజ్‌ కారుపార్టీలో చేరితే సినీ గ్లామ‌ర్ లోటును పూడ్చవ‌చ్చన్న అభిప్రాయం నేత‌ల్లో వ్యక్తమవుతోంది. మరోవైపు తమ పార్టీవైపు మొగ్గుచూపే సినీ ప్రముఖులను టీఆర్‌ఎస్‌లో చేర్చుకునే వ్యూహాంలో భాగంగానే.. మంత్రి కెటిఆర్ సినిమా ఫంక్షన్లకు హాజ‌ర‌వుతున్నారన్న ఊహాగానాలు వినిపిస్తున్నాయి.

దిల్ రాజు చేర్చుకునేందుకు ప్రయత్నం
దిల్‌రాజు అధికార పార్టీలో చేరినట్లయితే..నిజామాబాద్ లేదా జ‌హీరాబాద్ పార్లమెంట్ స్థానాల్లో పోటీ చేసేందుకు అవ‌కాశం కల్పించాలని సీఎం కేసీఆర్‌ భావిస్తున్నారట. ప్రస్తుతం ఆ రెండు స్థానాల్లో టిఆర్ఎస్ ఎంపీలే ప్రాతినిథ్యం వ‌హిస్తున్నారు. అయితే నిజామాబాద్ ఎంపీగా కొన‌సాగుతున్న క‌విత రాష్ట్ర రాజ‌కీయాల‌పై మొగ్గు చూపిస్తున్నట్లు టాక్‌.. జ‌హీరాబాద్ ఎంపీగా ఉన్న బిబి పాటిస్‌పై సీఎం కేసీఆర్‌ అసంతృప్తితో ఉన్నట్లు పార్టీ వ‌ర్గాల్లో గుసగుసలు వినిపిస్తున్నాయి. దీంతో దిల్‌రాజ్‌ను 2019 ఎన్నికల్లో ఎంపీ స్థానానికి పోటీచేయించేందుకు లైన్‌ క్లీయర్‌ చేస్తున్నారట పార్టీ పెద్దలు. మరి దిల్‌ రాజ్‌ కారు ఎక్కుతారో లేదో చూడాలి. 

21:33 - August 14, 2017

హైదరాబాద్ : టీఆర్ఎస్ వ్యతిరేకంగా విపక్షాలు విమర్శల దాడిని పెంచుతున్నాయి. నేరెళ్ల ఘటనలో అధికార పార్టీని టార్గెట్ చేస్తున్న ప్రతిపక్షాలు మాటల దాడి మరింత పెంచాయి. ప్రభుత్వ తీరు ఎండగడతూ గులాబీ పార్టీకి చుక్కలు చూపిస్తాన్నాయి. గత మూడేళ్లుగా ప్రభుత్వ వైఫల్యాలపై విపక్షాలు ఆందోళన నిర్వహిస్తున్నాయి. ఎంసెట్ లీకేజీ, మియాపూర్ భూకుంభకోణం ప్రతిపక్షాల పోరాటం అధికార పార్టీని పెద్దగా ఇబ్బంది పెట్టలేకపోయింది. కానీ కరీంగనర్ జిల్లా నేరెళ్ల ఘటన విపక్షాలను ఒకేతాటిపై నిలిపింది. ముఖ్యంగా వామపక్షాలు, టీడీపీ, కాంగ్రెస్ దూకుడుతో గులాబీ పార్టీ ఉక్కిరిబికిరౌతుంది. ప్రతిపక్ష పార్టీలన్ని నేరెళ్ల ఘటనలో బాదితులకు అండగా నిలవడంతో అధికార పార్టీ దిగిరాక తప్పలేదు. బాదితులకు అండగా ఉంటమంటూ ఓదార్పు మొదలు పెట్టింది గులాబీ దళం. అయిన ప్రతిపక్ష పార్టీలు మరో అడుగు ముందకెసి ప్రభుత్వ వైఖరి మరింత ఎండట్టేందుకు సిద్ధమౌతుండడం కేసీఆర్ టీం రుచించడం లేదు.మరోవైపు టీఆర్ఎస్ మిత్రపక్షంగా వ్యవరిస్తున్న ఎంఐఎం సైలెంట్ గా ఉన్న నిన్నమొన్నటి వరకు టీఆర్ఎస్ పార్టీతో అవగాహనలో ఉన్నట్లు కనిపించిన బీజేపీ క్రమంగా వ్యతిరేక గళం వినిపిస్తోంది.

దిద్దుబాటు చర్యలు...
ప్రతిపక్ష పార్టీలకు కళ్లేం వేసేందుకు టీఆర్ఎస్ నేతలు సమయాత్తం అవుతున్నారు. నేరెళ్ల వ్యవహరం రాజకీయంగా ఇబ్బందులు సృష్టిస్తుండడంతో క్షేత్రస్థాయిలో కూడా దిద్దుబాటు చర్యలపై అధికార పార్టీ దృష్టిసారిస్తుంది. విక్షాలను ఎదుర్కొనే వ్యూహాలు తోచక పార్టీ దాదాపు డిఫెన్స్ లో పడుతుందని గులాబీ నేతలే చెప్పుకుంటున్నారు.

08:22 - August 13, 2017

సిరిసిల్ల : రాష్ట్ర వ్యాప్తంగా నేరెళ్ల ఘటన సంచలనంగా మారింది. నెల రోజులకు పైగా రాష్ట్ర రాజకీయమంతా నేరెళ్ల చుట్టే తిరుగుతుంది. లారీ దహనం కేసులో ఎనిమిది మందిపై పోలీసులు థర్డ్‌ డిగ్రి ప్రయోగించి చిత్రహింసలు గురిచేసిన ఘటన...ప్రభుత్వాన్ని ముప్పతిప్పలు పెడుతోంది. ప్రజాసంఘాలు మొదలుకొని.. ప్రధాన ప్రతిపక్షాల వరకు ఈ ఘటనపై తీవ్రంగా స్పందించి... ఆందోళనలు చేస్తూనే ఉన్నాయి. అదే స్థాయిలో ప్రతిపక్షాలు చేస్తున్న విమర్శలను తిప్పి కొట్టడానికి అధికార టీఆర్‌ఎస్‌ విఫల ప్రయత్నాలు చేస్తూనే ఉంది.నేరెళ్ల ఘటనను మొదట అంతగా పట్టించుకోని ప్రభుత్వం.. ప్రతిపక్షాల రగడతో...ఇరకాటంలో పడింది. దీంతో బాధితులను తమ వైపుకు తిప్పుకునేందుకు టీఆర్‌ఎస్ ప్రయత్నాలు చేసింది. కానీ ప్రభుత్వ వ్యూహాలు మొదటి నుంచి బెడిసికొడుతూనే ఉన్నాయి. బాధితులతో రాజీ కుదుర్చుకునేందుకు పలుమార్లు చర్చలు జరిపినా... పోలీసులు కూడా ఆర్థిక సాయం చేస్తామంటూ రాయబారాలు చేసినా...అవేమి ఫలించలేదు. ఇక మంత్రి కేటీఆర్‌ బాధితులను కలిసి ఈ సమస్యకు చెక్‌ పెట్టేందుకు ప్రయత్నించారు. కానీ కేటీఆర్‌ పర్యటన వల్ల సమస్య సద్దుమణగకపోగా... ఆయన కూడా... బాధితుల ఆగ్రహానికి గురయ్యారు. ఈ ఘటనపై రాష్ట్ర మంతా చర్చ జరుగుతున్నా... తనకు తెలియదంటూ కేటీఆర్‌ చెప్పడంతో బాధితులు మండిపడ్డారు.అలాగే... ఈ ఘటనకు సంబంధించి ఓ ఎస్‌ఐను ప్రభుత్వం సస్పెండ్‌ చేసింది. కానీ ఇది కూడా బాధితులకు ఏ మాత్రం ఓదార్పునివ్వలేదు. న్యాయం కోసం బాధితులు, ప్రతిపక్షాలు ఆందోళనలు... నిరసనలు వ్యక్తం చేస్తూనే ఉన్నారు.

ప్రశ్నార్థకంగా  కేటీఆర్‌ రాజకీయ భవిష్యత్తు
ఈ ఘటనతో సిరిసిల్లలో కేటీఆర్‌ రాజకీయ భవిష్యత్తు ప్రశ్నార్థకంగా మారింది. ఈ నియోజకవర్గంలో కేటీఆర్‌ పట్టు కోల్పోయే పరిస్థితి ఏర్పడింది. సిరిసిల్ల అభివృద్ధికి నిధులు కేటాయిస్తున్నప్పటికీ... ప్రజా సమస్యలను పరిష్కరించడంలో విఫలమయ్యారనే ఆరోపణలున్నాయి. ఇసుక మాఫియా చేస్తున్న ఆగడాలు... నేరెళ్ల ఘటన... కేటీఆర్‌పై ఎన్నడూ లేని వ్యతిరేకతను తీసుకువచ్చాయి. 2014 ఎన్నికల్లో కేటీఆర్‌ గెలుపుకు కారణమైనటువంటి నేరెళ్ల, తంగళ్ల పల్లి, రామచంద్రపురం గ్రామాల ప్రజలు కేటీఆర్‌ అంటేనే మండిపడుతున్నారు.అలాగే... ఈ ఘటనకు సంబంధించి ఓ ఎస్‌ఐను ప్రభుత్వం సస్పెండ్‌ చేసింది. కానీ ఇది కూడా బాధితులకు ఏ మాత్రం ఓదార్పునివ్వలేదు. న్యాయం కోసం బాధితులు, ప్రతిపక్షాలు ఆందోళనలు... నిరసనలు వ్యక్తం చేస్తూనే ఉన్నారు. మొత్తానికి నేరెళ్ల ఘటనతో కేటీఆర్‌ ఓటు బ్యాంకుకు గండి పడిందని.. రాజకీయ నిపుణులు విశ్లేషిస్తున్నారు.

 

 

08:20 - August 13, 2017

హైదరాబాద్ : టిఆర్‌ఎస్‌ ప్రభుత్వం రాజకీయ అస్థిరత్వాన్ని సృష్టిస్తుందన్నారు సిపిఐ తెలంగాణ రాష్ట్ర కార్యదర్శి చాడ వెంకట రెడ్డి. కేసీఆర్‌ ఇచ్చిన హమీలను అమలు చేయకపోవడంపై సమీక్ష జరిపించాలన్నారు. నేరేళ్ల ఘటనపై మంత్రి కేటీఆర్‌ ఆలస్యంగా స్పందించడాన్ని ఆయన తప్పుబట్టారు. ప్రొఫెసర్‌ కోదండరామ్‌ సభకు రక్షణ కల్పించలేక... పోలీసులు అడ్డుకోవడంపై చాడ తీవ్రంగా మండిపడ్డారు. 

15:53 - August 12, 2017

నిర్మల్ : జిల్లా భైంసా ఏరియా ఆస్పత్రిలో పసికందు మృతి కాంగ్రెస్‌, TRS నేతలమధ్య వాగ్వాదానికి దారితీసింది.. డెలివరీకోసం లలిత అనే గర్భిణీ గురువారం రాత్రి ఆస్పత్రిలో చేరింది.. ఉదయం సిజేరియన్‌చేసిన వైద్యులు శిశువు మృతిచెందిందని తెలిపారు.. దీంతో ఆగ్రహించిన రోగి బంధువులు ఆస్పత్రిముందు ఆందోళనకు దిగారు.. రోగి బంధువుల తీరుతో ఆగ్రహించిన డాక్టర్లు సామూహికంగా సెలవుపెట్టారు.. ఈ విషయం తెలుసుకున్న కాంగ్రెస్‌ నేతలు బాధితుల్ని పరామర్శించేందుకు ఆస్పత్రికి వచ్చారు.. అదేసమయంలో శిశువు మృతిపై విచారణకోసం వచ్చిన DCHS డాక్టర్‌ సురేశ్‌ను అడ్డుకున్నారు.. శిశువు మృతికి కారణమైన డాక్టర్‌ను సస్పెండ్‌ చేయాలని డిమాండ్ చేశారు.. ఈ విషయాన్ని రాజకీయం చేయొద్దంటూ గులాబీ నేతలు కాంగ్రెస్‌ నేతలకు అడ్డుతగిలారు.. రెండు వర్గాలమధ్య వాగ్వాదంతో పరిస్థితి ఉద్రిక్తంగా మారడం రెండువర్గాలకు నచ్చజెప్పిన పోలీసులు నేతల్ని ఇంటికి పంపేశారు.

Pages

Don't Miss

Subscribe to RSS - టీఆర్ఎస్