టీజేఏసీ

09:20 - May 14, 2018

హైదరాబాద్ : తెలంగాణ జాయింట్‌ యాక్షన్‌ కమిటీకీ కోదండరామ్‌ వీడ్కోలు పలికారు. టీ జేఏసీని వీడుతున్న తరుణంలో చివరిసారిగా ఆయన అధ్యక్షతన విస్తృత స్థాయి సమావేశం జరిగింది. ఈ సమావేశంలో కోదండరామ్ రాజీనామాను ఏకగ్రీవంగా ఆమోదించారు. టీ జాక్‌కు చైర్మన్‌గా కొనసాగే అద్భుత అవకాశం కోల్పోతున్నందుకు బాధగా ఉందన్నారు కోదండరామ్.

విద్యార్థులకు పాఠాలు చెప్పే తనను.. సమాజానికి నాయకుడిగా పరిచయం చేసిన తెలంగాణ యాక్షన్ కమిటీకి ప్రొఫెసర్ కోదండరామ్‌ వీడ్కోలు పలికారు. టీ జాక్‌కు శాశ్వతంగా దూరమవుతున్న సందర్భంలో చివరి సారిగా ఆయన అధ్యక్షతన సమావేశం నిర్వహించారు. ఈ సమావేశంలో టీజాక్‌ ఛైర్మన్‌ పదవికి కోదండరామ్‌ చేసిన రాజీనామాను ఏకగ్రీవంగా ఆమోదించారు. రాష్ర్టంలోని పలు జిల్లాల నుంచి టీ జాక్‌ నాయకులు ఈ సమావేశంలో పాల్గొన్నారు.

తెలంగాణ జనసమితి పార్టీని స్థాపించిన కోదండరామ్‌ ప్రస్తుతం ఆ పార్టీకి అధ్యక్షుడిగా వ్యవహరిస్తున్నారు. టీజేఎస్‌ ఆవిర్భావ సభలోనే తెలంగాణ జాయింట్‌ యాక్షన్‌ కమిటీకి రాజీనామా చేశారు కోదండరామ్‌. ఈ నేపథ్యంలో హైదారాబాద్‌లోని కోదండరామ్ ఇంటి సమీపంలోని ఓ ప్రైవేట్ పంక్షన్ హల్‌లో టీజాక్‌ విస్తృత స్థాయి సమావేశం నిర్వహించారు. టీ జేఏసీ నుంచి టీ జేఎస్‌కు వెళ్తుతున్న వారి రాజీనామాలను ఈ సమావేశంలో ఆమోదించారు.

తెలంగాణ సాధనలో టీ జాక్‌ కీలక పాత్ర పోషించిందన్నారు కోదండరామ్‌. టీ జాక్‌ ఛైర్మన్‌గా పనిచేయడం అద్భుత అవకాశమన్నారు. ఇది తన జీవితంలో మరువలేని అంశమన్నారు. టీజాక్‌ లాంటి సంస్థలు దేశంలో ఎక్కడా లేవన్నారు కోదండరామ్. రాష్ర్టంలో పాలనాపరమైన మార్పు కోసమే తాము జనసమితి పార్టీని స్ధాపించామని చెప్పారు. తనకు ఓ ప్రత్యేక గుర్తింపు నిచ్చిన టీజాక్‌ను వీడుతున్నందుకు బాధగా ఉందన్నారు కోదండరామ్‌. టీజేఎస్‌ స్థాపన వల్లే టీ జాక్‌కు దూరం కావాల్సి వచ్చిందన్నారు కోదండరామ్. ఇంతవరకూ తనకు సహకరించిన వారికి కృతజ్ఞతలు తెలిపిన కోదండరామ్‌.. భవిష్యత్తులో టీ జాక్‌తో కలిసి పనిచేస్తామన్నారు.

16:41 - May 3, 2018

హైదరాబాద్ : ఆర్టీసీ కార్మికుల వేతన సవరణపై ప్రభుత్వం, యాజమాన్యాలు నిర్లక్ష్యంగా వ్యవహరిస్తున్నాయని ఆర్టీసీ జేఏసీ నేతలు తీవ్ర ఆగ్రహం వ్యక్తం చేస్తున్నారు. ఈనెల 6వ తేదీన అన్ని డిపోల ఎదుట ఆందోళనలు చేపట్టాని ఆర్టీసీ జాక్ కార్మికులకు పిలుపునిచ్చింది. వేతన సవరణతో పాటు పెండింగ్ సమస్యలు పరిష్కరించాలని డిమాండ్ చేసింది. వేతనాలు కూడా సకాలంలో చెల్లించాలేని దుస్థితి ఆర్టీసీలో నెలకొందని విమర్శించింది. తాము సమస్యల పరిష్కారానికి పోరాటం చేసినా ఫలితం లేకపోవడంతో ఐక్య పోరాటాల కోసం ఆర్టీసీ జేఏసీ ఏర్పాటు చేసుకోవడం జరిగిందని నేతలు తెలిపారు. జేఏసీలోకి టీఎంయూ, ఎన్ఎంయూ, టీజేఎంయూ రావాలని ఆర్టీసీ జాక్ కోరింది. 

21:47 - April 28, 2018

హైదరాబాద్ : టీ-జేఏసీ చైర్మన్‌ పదవికి ప్రొఫెసర్‌ కోదండరామ్‌ రాజీనామా చేశారు. కొత్తగా తెలంగాణ జనసమితి పార్టీని ఏర్పాటు చేసిన నేపథ్యంలో... ఆయన టీ-జేఏసీకి రాజీనామా చేశారు. గన్‌పార్క్‌ దగ్గర నివాళులర్పించిన కోదండరామ్‌.. తాను జేఏసీలో లేకపోయినా.. మా పార్టీ సహకారం ఎప్పుడూ అందిస్తానన్నారు. 

06:34 - April 12, 2018

హైదరాబాద్ : తెలంగాణ జన సమితికి బాలారిష్టాలు తప్పడం లేదు. ఉద్యమంలో కీలకపాత్ర పోషించి... ఆ తర్వాత ఏర్పడిన తెలంగాణ రాష్ట్రంలోనూ అడుగడుగున అవాంతరాలు ఎదుర్కొంటున్న టీ-జేఏసీ... ఇప్పుడు రాజకీయ పార్టీగా అవతరించినా అవే కష్టాలను ఎదుర్కొంటోంది. పార్టీ ఆవిర్భావ సభకు ప్రభుత్వం అనుమతి నిరాకరించడంతో టీజేఎస్‌ వర్గాలు ప్రభుత్వంపై మండిపడుతున్నాయి. మొన్న కొలువుల కొట్లాట సభ... నిన్న మిలియన్‌ మార్చ్‌ స్ఫూర్తి సభ. నేడు టీజేఎస్‌ ఆవిర్భావ సభ.. పేరు ఏదైనా ప్రతి సభకు ప్రభుత్వం నుంచి అనుమతి మాత్రం రావడం లేదు. ప్రజాస్వామ్యంలో సభలు పెట్టుకునే హక్కు ప్రతి పౌరుడికి ఉంది. కానీ... తెలంగాణలో ప్రభుత్వ తీరు మరోలా ఉంది. సినీ నటుల సినిమా ప్రమోషన్లకు, ఆధ్యాత్మిక కార్యక్రమాలకు అనుమతిస్తున్న ప్రభుత్వం... కొత్తగా ఏర్పడిన తెలంగాణ జనసమితి పార్టీ ఆవిర్భావ సభకు మాత్రం అనేక సాకులు చెబుతూ అనుమతి నిరాకరించారు. దీంతో అనుమతి కోసం టీజేఎస్‌ కోర్టు మెట్లు ఎక్కాల్సి వచ్చింది. అయితే... టీ-జేఏసీ నేతలు కోర్టులకు వెళ్లడం.. అనుమతులు తెచ్చుకోవడం కొత్తేమీ కాదు... కానీ... పోరాడి సాధించుకున్న తెలంగాణ రాష్ట్రంలోనూ ఇదే పరిస్థితి కొనసాగుతోంది.

కొన్ని నెలల క్రితం నిరుద్యోగుల సమస్యపై 'కొలువుల కొట్లాట' పేరుతో సభ నిర్వహించేందుకు ఏర్పాట్లు చేసుకుంది. కానీ.. అనుమతి లేదని పోలీసులు చెప్పడంతో కోర్టుకు వెళ్లి అనుమతి తెచ్చుకున్నారు. అయితే... జిల్లాల నుంచి తరలి వస్తున్న వారిని అడ్డుకుని సభకు నిరుద్యోగులు రాకుండా అడ్డుకునే ప్రయత్నం చేసి విఫలమయ్యారు. ఆ తర్వాత తెలంగాణ ఉద్యమానికి నాందిగా నిలిచిన ట్యాంక్‌బండ్‌ మిలియన్‌ మార్చ్‌ స్ఫూర్తి సభ పేరుతో గత జ్ఞాపకాలను గుర్తు చేసుకునేందుకు సభ ఏర్పాటు చేయగా... ట్రాఫిక్‌ సమస్య పేరుతో సభకు అనుమతి నిరాకరించి.. నాయకులను ముందస్తు అరెస్టులు చేసి ప్రభుత్వం తన పంతం నెగ్గించుకుంది.

తెలంగాణ ఉద్యమం కోసం కీలకపాత్ర పోషించిన టీ-జేఏసీ అనంతరం తెలంగాణ జన సమితి పేరుతో పార్టీ ఏర్పాటు చేసింది. పార్టీని ప్రజల్లోకి తీసుకెళ్లేందుకు హైదరాబాద్‌లో భారీ ఎత్తున సభ నిర్వహించేందుకు ఏర్పాట్లు చేసుకుంటున్నారు. ఇందుకోసం సరూర్‌నగర్‌ గ్రౌండ్‌లో సభ కోసం నేతలు దరఖాస్తు చేసుకోగా... క్రీడామైదానం కాబట్టి అనుమతివ్వడం కుదరదని రంగారెడ్డి జిల్లా కలెక్టర్‌ తేల్చిచెప్పారు. మరోవైపు హైదరాబాద్‌లో సభ నిర్వహిస్తే ట్రాఫిక్‌, వాతావరణ సమస్యలు తలెత్తుతాయని పోలీసులు సాకులు చెబుతున్నారు. దీంతో టీజేఎస్‌ నేతలు కోర్టు మెట్లు ఎక్కారు. ఇటీవల ఎల్బీ స్టేడియంలో ఓ సినిమాకు ప్రమోషన్‌ కోసం అనుమతిస్తే జరగని పొల్యూషన్‌.. తాము సభ నిర్వహిస్తే జరుగుతుందా అని టీజేఎస్‌ నేతలు ప్రశ్నిస్తున్నారు. ప్రభుత్వం తమకు ఇష్టంలేనివారి పట్ల కక్షపూరితంగా వ్యవహరించడం సరికాదన్నారు. సభలు, మీటింగ్‌లు పెట్టుకోవడం రాజ్యాంగం కల్పించిన హక్కని... ఆ హక్కునే కేసీఆర్‌ కాలరాస్తున్నారని మండిపడ్డారు. అయితే.. సభకు అనుమతి వస్తుందా ? లేదా ? అనేది తెలియాలంటే మరో కొన్ని రోజులు ఎదురుచూడాలి. తెలంగాణ ఉద్యమం కోసం ఆంధ్రా పాలకుల హయాంలో కోర్టులకు వెళ్లి సభలకు అనుమతి తెచ్చుకుంటే... తెలంగాణ రాష్ట్రం ఏర్పడిన తర్వాత కూడా అదే తంతు కొనసాగడంపై పలువురు ఉద్యమకారులు మండిపడుతున్నారు. 

06:39 - April 5, 2018

హైదరాబాద్ : కోదండరామ్‌ అధ్యక్షతన కొత్తగా ఆవిర్భవించిన తెలంగాణ జనసమితి పార్టీ .. తన పతాకాన్ని ఆవిష్కరించింది. తెలంగాణ ప్రజల ఆంక్షలను నెరవేర్చే లక్ష్యంతో ఏర్పాటైన టీజేఎస్‌... ప్రజల్లోకి విస్తృతంగా తీసుకెళ్లాలని పార్టీ నాయకులు నిర్ణయించారు. టీఆర్‌ఎస్‌ నిరంకుశపాలనకు అంతం పలకడమే ధ్యేయంగా పనిచేయాలని తెలంగాణ జనసమితి నాయకులు ప్రతినపూనారు. ఆకుపచ్చ రంగుపై పాలపిట్ట రంగుతో టీజేఎస్‌ జెండా రూపొందించారు. పాలపిట్ట విజయానికి సంకేతమైతే, ఆకుపచ్చ రంగు అభివృద్ధికి చిహ్నంగా భావిస్తారు. జెండా మధ్యలో నీలిరంగు తెలంగాణ చిత్రపటంలో అమరవీరుల స్థూపంతో జెండా రూపొందించారు. టీజేఎస్‌కు తాడు బొంగరం లేదంటూ వ్యాఖ్యానిస్తున్న వారికి ముకుతాడు వేసే విధంగా శరవేగంగా పార్టీని ప్రజల్లోకి తీసుకెళ్లాలని పార్టీ నాయకత్వం నిర్ణయించింది. దీనిలో భాగంగా రాష్ట్ర వ్యాప్తంగా సభలు, సమావేశాలకు సిద్ధమవుతున్నారు. ఈనెల 29న హైదరాబాద్‌లో భారీ స్థాయిలో టీజేఎస్‌ ఆవిర్భావ సభను నిర్వహించేందుకు సన్నాహాలు చేస్తున్నారు. ఆ తర్వాత పార్టీ కమిటీలు ఏర్పాటు చేయాలని ప్రతిపాదించారు. తెలంగాణ అమరవీరుల త్యాగాలతో అధికారంలోకి వచ్చిన టీఆర్‌ఎస్‌ నిరంకుశపాలనకు అంతం పలకడమే ధ్యేయంగా ఎన్నికలకు సిద్ధంగా కావాలని టీజేఎస్‌ నిర్ణయించింది. 2019 ఎన్నికల్లో అన్ని సీట్లకు పోటీ చేయాలని నిర్ణయించిన టీజేఎస్‌... సొంతంగానే ముందుకు సాగాలని నిర్ణయించింది. అయితే కలిసివచ్చే వారిని కాదనకూడదన్న ప్రతిపాదనను ముందుకు తీసుకొచ్చింది. 

06:40 - April 1, 2018

హైదరాబాద్ : తెలంగాణలో మరో కొత్త రాజకీయ పార్టీ అవతరించనుంది. పోరాడి సాధించుకున్న తెలంగాణలో ప్రజా సమస్యల పరిష్కారం కోసం కొత్త పార్టీ పెడతామన్న తెలంగాణ JAC ఛైర్మన్‌ కోదండరామ్‌ నేతృత్వంలో రాజకీయ పార్టీ ఏర్పాటుకు తొలి అడుగు పడింది. కొత్త పార్టీ కోసం JAC దరఖాస్తు చేసుకున్న తెలంగాణ జనసమితి పేరుకు ఎన్నికల సంఘం ఆమోదం తెలిపింది. ఏప్రిల్‌ 2న కోదండరామ్‌ దీనిపై అధికారిక ప్రకటన చేయనున్నారు. ఏప్రిల్‌ 4న పార్టీ పతాకం ఆవిష్కరించి, పోస్టర్‌ను విడుదల చేయనున్నారు. మరోవైపు ఏప్రిల్‌ 29న భారీ బహిరంగ సభ ఏర్పాటుకు JAC నేతలు సన్నాహాలు చేస్తున్నారు.

10:52 - March 10, 2018
08:15 - March 10, 2018

హైదరాబాద్ : ట్యాంక్ బండ్ పై మిలియన్ మార్చ్ నిర్వహిస్తామని టీజేఏసీ ఛైర్మన్ కోదండరాం పేర్కొన్నారు. శనివారం మిలియన్ మార్చ్ స్పూర్తిని గుర్తుకు తెచ్చుకొనే విధంగా ఆట..పాట.. నిర్వహించాలని టీజేఏసీ నిర్ణయించడం..దీనికి పోలీసులు అనుమతిని నిరాకరించిన సంగతి తెలిసిందే. దీనితో టెన్షన్ వాతావరణం క్రియేట్ అయ్యింది. కోదండరాంను ముందస్తు అరెస్టు చేస్తారంటూ పుకార్లు షికారు చేశాయి. ట్యాంక్ బండ్ వద్ధ ఆంక్షలు విధించారు. ఈ సందర్భంగా టెన్ టివితో కోదండరాం మాట్లాడారు. సభకు అడుగడుగునా అడ్డంకులు సృష్టిస్తున్నారని, ఇది ఒక్క జేఏసీ కార్యక్రమం కాదన్నారు. ..ఎంతో మంది..ప్రజా సంఘాలు..విద్యార్థి సంఘాలు సమిష్టిగా ఇందులో పాల్గొంటున్నాయన్నారు. పూర్తి వివరాలకు వీడియో క్లిక్ చేయండి. 

08:11 - March 10, 2018

హైదరాబాద్ : మార్చి 10...2011 మిలియన్ మార్చ్...మిలియన్ మార్చ్ విజయం తెలంగాణ ఆశకు, ఆశయానికి స్ఫూర్తినిచ్చింది. జేఏసీ మీద తెలంగాణ సమాజంలో విశ్వాసాన్ని పెంచింది. మార్చ్… ఎందరి గుండెల్లోనో.. మరుపురాని జ్ఞాపకంగా.. నిత్య స్ఫూర్తిగా నిలిచింది. అలాంటి మార్చ్ స్పూర్తి మరొక్కసారి గుర్తుకు తెచ్చుకొనేందుకు టీజేఏసీ ప్రయత్నాలు చేసింది. ట్యాంక్ బండ్ పై ఉన్న కవి మొఖ్దుం మొహియుద్దీన్ విగ్రహం వద్ద ఆట..పాట నిర్వహిస్తామని టీజేఏసీ ఛైర్మన్ కోదండరాం ప్రకటించారు. దీనితో పోలీసులు అప్రమత్తమయ్యారు. మిలియన్ మార్చ్ కు అనుమతి లేదని స్పష్టం చేశారు. కానీ మార్చ్ నిర్వహించి తీరుతామని, నిర్భందం ప్రయోగించడం సబబు కాదని నేతలు పేర్కొంటున్నారు. శనివారం ఉదయం ట్యాంక్ బండ్ పై పోలీసులు భారీగా మోహరించారు. సుమారు 12వేల మంది పోలీసులు మోహరించారు. కేసీఆర్ ద్వంద్వ వైఖరితో కనబరుస్తున్నారని కోదండరాం పేర్కొన్నారు. ఇదిలా ఉంటే ట్యాంక్ బండ్ పై ఉదయం 11 నుండి సాయంత్రం 5గంటల వరకు ట్రాఫిక్ ఆంక్షలు విధించారు. ప్రత్యామ్నాయ ఏర్పాట్లు చేసుకోవాలని పోలీసులు సూచించారు. మరోవైపు ట్యాంక్ బండ్ కు సమీపంలో ఉన్న లుంబునీ పార్క్, ఎన్టీఆర్ పార్కు, సంజీవయ్య పార్కులను మూసివేశారు. ట్యాంక్ బండ్ పై ఎలాంటి సభలు..సమావేశాలు నిర్వహించడానికి అనుమతి లేదని, ఏర్పాట్లు చేస్తే అరెస్టు చేస్తామని పోలీసులు హెచ్చరించారు. 

08:33 - March 4, 2018

హైదరాబాద్ : మార్చి పదో తేదీకి మిలియన్ మార్చ్ జరిగిన ఆరేళ్లు పూర్తవుతుంది. ఈ సందర్భంగా టీజేఏసీ పలు కార్యక్రమాలు నిర్వహించడానికి సిద్ధమౌతోంది. మిలియన్ మార్చ్ స్పూర్తితో ట్యాంక్ బండ్ పై కార్యక్రమాలు నిర్వహిస్తామని టీజేఏసీ ఛైర్మన్ కోదండరాం పేర్కొన్నారు. సీపీఐ కార్యాలయంలో మిలియన్ మార్చ్ స్పూర్తి కమిటీ సమావేశం జరిగింది. ట్యాంక్ బండ్ పై జరిగే కార్యక్రమానికి అనుమతి కోసం పోలీసులకు లేఖ రాయడం జరిగిందని సీపీఐ నేత చాడ వెంకట్ రెడ్డి పేర్కొన్నారు. ఈ కార్యక్రమంలో ఉద్యమకారులు భారీగా పాల్గొనాలని టీజేఏసీ నేతలు కోరారు. 

Pages

Don't Miss

Subscribe to RSS - టీజేఏసీ