టీసర్కార్

07:31 - May 30, 2018

హైదరాబాద్ : మధ్యంతర భృతి, పీఆర్సీ ఫిట్‌మెంట్‌ను సర్కార్‌ ఎంత ప్రకటిస్తుందనే చర్చ ఉద్యోగుల్లో జోరుగా సాగుతోంది. అయితే ఉద్యోగులు మాత్రం మధ్యంతర భృతిని 43శాతం ప్రకటించాలని కోరుతున్నారు. పీఆర్సీ, ఫిట్‌మెంట్‌ను 63శాతం ఇవ్వాలని డిమాండ్‌ చేస్తున్నారు.
ఉద్యోగుల సమస్యలపై ప్రభుత్వం సానుకూలం
సాధారణ ఎన్నికలు దగ్గర పడుతుండడంతో ఉద్యోగుల సమస్యలపై తెలంగాణ సర్కార్‌ సానుకూలంగానే ఉంది. ఇప్పటికే పలు డిమాండ్లను పరిష్కరించిన సర్కార్‌... మిగతా డిమాండ్లపైనా దృష్టి సారించింది.  త్వరలోనే ప్రభుత్వ ఉద్యోగులు, ఉపాధ్యాయులకు త్వరలోనే తీపి కబురు అందించనుంది. కొత్త వేతన సవరణ సంఘం చేసే సిఫారసులతో సంబంధం లేకుండా రానున్న జూన్‌ నెల నుంచే వర్తించే విధంగా 30శాతం  మధ్యంతర భృతిని ఇవ్వడానికి ప్రభుత్వం సిద్ధమైంది. జూన్‌ 2న కేసీఆర్‌ మధ్యంతర భృతిని ప్రకటిస్తామని ఈ మధ్యనే తెలిపారు. ఉమ్మడి రాష్ట్రంలో కిరణ్‌కుమార్‌రెడ్డి సీఎంగా ఉన్నప్పుడు 27శాతం మధ్యంతర భృతిని ప్రకటించారు. అయితే ఈసారి కేసీఆర్‌ 30శాతం వరకు  మధ్యంతర భృతి ప్రకటించే అవకాశముంది. అయితే ఉద్యోగ సంఘాలు మాత్రం 43శాతం మధ్యంతర భృతిని ఇవ్వాలని డిమాండ్‌ చేస్తున్నాయి.
పీఆర్సీపై కమిటీ నియమించిన సర్కార్‌
తెలంగాణ ప్రభుత్వం ఇప్పటికే పీఆర్సీపై కమిటీని నియమించింది. ఆగస్టు 15లోపే నివేదిక ఇవ్వాలని ఆదేశించింది. పంద్రాగస్టును కేసీఆర్‌.... ఫిట్‌మెంట్‌ ప్రకటిస్తానని చెప్పారు. ఉద్యోగస్తులు మాత్రం 63శాతం ఫిట్‌మెంట్‌ ఇవ్వాలని కోరుతున్నారు. నిత్యావసర ధరలు బాగా పెరిగాయని... అన్ని అంశాలను దృష్టిలో ఉంచుకొని ఫిట్‌మెంట్‌ ఇవ్వాలని ప్రభుత్వాన్ని కోరుతున్నారు. ప్రభుత్వం కూడా ఉద్యోగుల డిమాండ్లపై సానుకూలంగానే ఉంది. ఎన్నికల ఏడాది కావడంతో ఉద్యోగులను ఖుషీ చేసే విధంగానే మధ్యంతర భృతి, పీఆర్సీ ఉంటుందని అంతా భావిస్తున్నారు.  మరి తెలంగాణ ప్రభుత్వం ఐఆర్‌ ఎంత ప్రకటిస్తుందో తెలియాలంటే జూన్‌ 2 వరకు వేచి చూడాలి.
 

21:43 - May 9, 2018

హైదరాబాద్ : తెలంగాణలో.. రైతులకు పంట పెట్టుబడి సాయం అందించేందుకు ఉద్దేశించిన రైతు బంధు కార్యక్రమానికి ప్రభుత్వం రేపు శ్రీకారం చుట్టనుంది. దీనికి సంబంధించి రాష్ట్రమంతటా ఏర్పాట్లు పూర్తయ్యాయి. ఈ పథకం కింద ఆర్‌.ఓ.ఎఫ్‌.ఆర్‌. పట్టాలున్న సుమారు లక్షమంది రైతులకూ లబ్ది చేకూరనుంది. సుమారు ఐదువేల కోట్ల రూపాయల మొత్తాన్ని పంపిణీ చేస్తున్న నేపథ్యంలో.. ఎలాంటి అవకతవకలూ జరగకుండా ప్రభుత్వం గట్టి చర్యలు తీసుకుంది.  
ఎకరాకు రూ.4 వేలు పంపిణీ
తెలంగాణ ప్రభుత్వం ప్రతిష్ఠాత్మకంగా భావిస్తోన్న రైతుబంధు కార్యక్రమానికి ముఖ్యమంత్రి కేసీఆర్‌ గురువారం శ్రీకారం చుట్టనున్నారు. కరీంనగర్‌ జిల్లా హుజూరాబాద్‌ మండలం ఇందిరానగర్‌లో పథకాన్ని సీఎం ప్రారంభిస్తారు. రైతుబంధు కింద రాష్ట్రంలోని కోటి 40 లక్షల 98వేల 486 ఎకరాల్లో సేద్యపు పెట్టుబడి కింద ప్రభుత్వం ఎకరాకు నాలుగు వేల రూపాయల చొప్పున అందించనుంది. మరో నాలుగు వేల రూపాయలను యాసంగి పంటకు అందిస్తారు. ప్రస్తుత సీజన్‌లో.. ప్రభుత్వం రైతుబంధు కింద ఐదు వేల ఆరు వందల ఎనిమిది కోట్ల రూపాయలను పంపిణీ చేయనుంది. ముఖ్యమంత్రి కేసీఆర్‌ రైతుబంధు కార్యక్రమాన్ని ప్రారంభించిన అరగంట లోపే, రాష్ట్రంలోని అన్ని జిల్లాల్లోనూ మంత్రులు, ఇతర ప్రజాప్రతినిధులు పథకాన్ని ప్రారంభించి.. రైతులకు పాసు పుస్తకాలు, పంటసాయం చెక్కులు అందిస్తారు. నిస్సహాయ రైతుల ఇళ్లకే వెళ్లి చెక్కులు పంపిణీ చేసేలానూ ఏర్పాట్లు చేశారు. 
ఈనెల 17 వరకూ రైతుబంధు కార్యక్రమం
రైతుబంధు కార్యక్రమం ఈనెల 17వ తేదీ వరకూ జరగనుంది. ప్రతిరోజూ ఉదయం ఏడు గంటల నుంచి పదకొండు గంటల వరకూ చెక్కులు, పాసుపుస్తకాల పంపిణీ కొనసాగుతుంది. ఈ ప్రక్రియ కోసం రాష్ట్రవ్యాప్తంగా 2,761 బృందాలను ఏర్పాటు చేశారు. ఈ బృందాలు రోజుకు 1546 గ్రామాల్లో చెక్కులు, పాస్‌పుస్తకాలు పంపిణీ చేస్తాయి. రైతులు నేరుగా వచ్చి చెక్కులు, పాసు పుస్తకాలు తీసుకోవాలని, కుటుంబ సభ్యులకు వాటిని ఇవ్వబోమని అధికారులు స్పష్టం చేస్తున్నారు. 
ఆర్‌ఓఎఫ్‌ఆర్‌ పట్టాలు ఉన్న రైతులకూ రైతుబంధు పథకం వర్తింపు 
వివిధ జిల్లాల్లో ఆర్‌ఓఎఫ్‌ఆర్‌ పట్టాలు ఉన్న రైతులకూ రైతుబంధు పథకాన్ని వర్తింప చేయనున్నారు. దీని వల్ల సుమారు లక్షకు పైగా గిరిజన, దళిత రైతులకు లబ్ది చేకూరనుంది. అయితే.. వీరికి కొత్తగా ఎలాంటి పాసుపుస్తకాలు అందించబోమని అధికారులు చెబుతున్నారు.  
చెక్కుల పంపిణీ సమాచారం ఆన్‌లైన్‌లో అప్‌డేట్‌
చెక్కుల పంపిణీ సమాచారం మొత్తాన్ని ఎప్పటికప్పుడు ఆన్‌లైన్‌లో అప్‌డేట్‌ చేస్తారు. ఇక, రైతులందరూ ఒకేసారి బ్యాంకులకు వెళితే నగదు పంపిణీ కష్టం కాబట్టి.. బ్యాంకులు ప్రత్యేకంగా గ్రామాల వారీగా రైతుల కోసం ప్రత్యేక షెడ్యూలును రూపొందించాయి. నగదు సమస్య తలెత్తకుండా అధికారులు ఎప్పటికప్పుడు బ్యాంకర్లతో సమన్వయం చేసుకుంటారు. మరోవైపు రైతుబంధు కార్యక్రమాన్ని మండువేసవిలో నిర్వహిస్తున్నందున.. అధికారులు చెక్కుల పంపిణీ కేంద్రాల వద్ద అన్ని జాగ్రత్త చర్యలూ తీసుకోనున్నారు. 
రైతు బంధు కార్యక్రమాన్ని విపక్షాలు ఎద్దేవా 
మరోవైపు ప్రభుత్వం తలపెట్టిన రైతు బంధు కార్యక్రమాన్ని విపక్షాలు ఎద్దేవా చేస్తున్నాయి. దళారులకు దోచిపెట్టే పథకమని ఆక్షేపిస్తున్నాయి.  రైతులకు గిట్టుబాటు ధర కల్పించకుండా ఇలాంటి జిమ్మికులు ఎన్ని చేసినా ప్రయోజనం లేదని విమర్శిస్తున్నాయి. 
రైతుబంధు పథకంపై ప్రభుత్వ సర్వే..!
విపక్షాల ఆరోపణలు ఎలా ఉన్నా.. రైతుబంధు పథకాన్ని ప్రతిష్టాత్మకంగా భావిస్తున్న కేసీఆర్‌ సర్కార్‌.. దీనిపై ప్రజాభిప్రాయ సేకరణ జరపాలనీ నిర్ణయించింది. దీనికోసం అమెరికా సంస్థ జే-పాల్‌తో ఎంఓయూ కూడా కుదుర్చుకుంది. రాష్ట్ర వ్యాప్తంగా మొత్తం 132 మండలాల్లో ఈ సంస్థ ప్రజాభిప్రాయాన్ని సేకరిస్తుంది. ప్రతి మండలంలోనూ 300 మంది రైతుల నుంచి అభిప్రాయాన్ని సేకరిస్తారు. ఈ కార్యక్రమంపై ప్రజల ఫీడ్‌బ్యాక్‌ తీసుకోవడమే ఈ సర్వే ఉద్దేశమని ప్రభుత్వం చెబుతోంది. 

 

21:03 - May 8, 2018

ఆంధ్రా తెల్గుదేశం లీడర్లకు ఈ నడ్మ కాలం గల్చొస్తలేనట్టుందిగదా..? గామొన్న నెల్లూరు ఆనం వివేకనందరెడ్డి సచ్చిపాయే.. మొన్న మాగంటి బాబుకు గుండెపోటొచ్చే.. నిన్న పరిటాల రవి అణుచరుడు చమాన్ గుండెపోటుతోని సచ్చిపాయే.. ఆయనను సూస్తందుకు వొయ్యి మంత్రి పరిటాల సునితమ్మ గూడ ఆడనే చక్కరొచ్చిపడిపోయింది.. లేటెస్టుగ ఒక తెల్గుదేశం ఎమ్మెల్యే సైకిల్ ర్యాలీల అడ్డంబడ్డడు.. 

దేశంలనే కనీ విని ఎరుగని రాష్ట్రం ఏదన్న ఉన్నదంటే అది మన తెలంగాణ రాష్ట్రమే అంటున్నడు మల్కాజ్ గరి ఎంపీ మల్లారెడ్డి.. అన్ని రాష్ట్రాలళ్ల పథకాలున్నయ్ గని.. మనతాన అమలైనట్టు ఏడ అమలైతలేవు అనుకొచ్చిండు..అమ్మటాళ్ల యాళ్లకు ఇంత తిని ప్రెస్ మీటింగు వెట్టినట్టున్నరు.. తబల మద్దెల లేకుంటనే భజన ఎట్ల జేస్తున్నడో సూడుండ్రి..

తెలంగాణ రాష్ట్రం పరిస్థితి ఎట్లున్నదంటే.. బీడి బిచ్చం కల్లు ఉద్దెర లెక్కనే ఉన్నది.. మీదికి మిగులు రాష్ట్రమంటరు.. నిండ అప్పుల పాలు జేశిండ్రు.. ఆఖరికి అద్దె ఎమ్మార్వో ఆఫీసుకు కిరాయి గట్టె పైకం లేదాయే మన సర్కారు తాన.. కుమురంభీం ఆసీఫాబాద్ జిల్లా సిర్పూరు నియోజకవర్గంలున్న చింతలమానేపల్లి మండలాఫీసు కథ ఇది..

ఏట్లె రాయిదీయనోడు కూట్లె రాయిదీయవోయినట్టు.. ఈన ఇలాక సిరిసిల్ల కాడ జనం దూపకు సస్తుంటే.. నల్లగొండ పట్టనాన్ని వంద కోట్ల తోని అభివృద్ధి జేస్తమని మున్సిపాల్టీ ముర్కి మంత్రిగారు ఉద్దెర ముచ్చట్లు జెప్తున్నడు.. ఈ ముచ్చట ఎట్లున్నదంటే.. అమ్మకు అన్నంబెట్టనోడు చిన్నమ్మకు బంగారు గాజులు జేపిచ్చినట్టుంది సూడుండ్రిగ మీరే..

అయ్యా కల్వకుంట్ల తారాక రామారావుగారు.. మీ బంగారు తెలంగాణ ఉశ్కె దందకు మళ్లొక మన్షి బలైపోయిండు.. సిరిసిల్ల కాడ మళ్లొక మన్షిని గుద్ది సంపింది ఉశ్కెలారి.. ఇంక ఎంతమంది లారీల కిందవడి సచ్చిపోతె తయ్యారైతదో లెక్కనన్న జెప్పుండ్రి సారు  అంతమందం సచ్చిపోతరు లారీల కిందవడి చీచీచీచీ ఏం దందా అది ఏం పని.. తిట్టినా శిగ్గురాదాయే ప్రభుత్వానికి తనంతట తానన్న తెచ్చుకోదాయే.. పాపం సూడుండ్రి..

అయ్యా ముఖ్యమంత్రిగారు ప్రాజెక్టుల కోసం ముందుగాళ్ల నీ ఫామౌజు భూములు ఇచ్చి... తర్వాత మా భూములు తీస్కో అంటున్నరు కానాయపల్లి ముంపు గ్రామాల జనం.. రెండువేల పదమూడు చట్టం ప్రకారం మాకు పరిహారం ఇస్తాంటెనే మేము భూములిస్తం.. మీరు బెదిరిచ్చి గుంజుకోని జూస్తె మా తడాఖ సూపెడ్తమని వనపర్తి దిక్కు పాదయాత్రతోని కలెక్టర్ ఆఫీసుకు వొయ్యిండ్రు..

మా ప్రభుత్వం మేనిఫెస్టోల జెప్పని పనులు గూడ జేస్తున్నదని మెదక్ ఎమ్మెల్యే పద్మమ్మ జెప్తాఉండే గప్పట్ల ఏం జేశిండ్రని జనం ఆలోచనల వడ్డరుగని.. నిజమే మా ప్రభుత్వం అధికారంలకొస్తె పేదల ఇండ్లు గూలగొడ్తమని మేనిఫెస్టోల జెప్పిండ్రా చెప్పలేదు.. కని రామాయంపేట కాడ కూలగొట్టి సూపెడ్తున్నరు.. ఎంత గొప్ప మనసున్న ప్రభుత్వం సూడుండ్రి..

శంకర్ దాదా ఎంబీబీఎస్ సీన్మల హీరో అనుకుంటున్నడో ఏమో ఒంగోలు జిల్లా కణిగిరి సర్కారు దావఖాండ్ల పనిజేస్తున్న డాక్టరు.. వాడు వచ్చినోనికి వైద్యం జేయక.. నాకు తీర్వాట్కం లేదు తర్వాత జేస్తా అని బెదిరిస్తున్నడట.. మన్షి సచ్చిపోతున్నడ్రా అంటే వాడు రాడాయే.. ఇగ మీడియావోళ్లు వోతే మీరెవ్వల్రా వచ్చెతందుకు అని తిడ్తున్నడు వాని బల్పు జూడుండ్రి..

కొండ నాల్కెకు మందేస్తే ఉన్ననాల్కే ఊశిపోయినట్లు.. కడ్పునొస్తున్నదని దావఖానకు వోతె కండ్లు వొడగొట్టిండట ఒక డాక్టరు గాడు.. రాజన్న సిరిసిల్ల జిల్లా వేములవాడకాడున్న మనోహన్ ఆస్పత్రి డాక్టర్ జేశ్న ఉద్దర్కం ఎట్లున్నదో సూడుండ్రి.. 

అసలైన నేరస్తులను వట్టుకో శాతగాని కొంతమంది ఆడివట్ట పోలీసులు అమాయకులను బలిజేస్తా ఉంటరు.. అనంతపురం జిల్లా కదిరి రూరల్ మండలం చిగురుమాను తండా కాడుండే ఆనంద్ నాయక్ అనే పిలగాడు ఉరేస్కోని సచ్చిపోయిండు.. పోలీసోళ్లు గడ్కోపారి తీస్కపోయి కొడ్తున్నరట ఊకే ఈ దెబ్బలెందుకు వడాలే అని ఆయింత ఒక్కటే పారి జీవి దీస్కున్నడు..

17:45 - April 15, 2018

వరంగల్‌ రూరల్‌ : దేశంలో ఎక్కడా లేని విధంగా తెలంగాణ రాష్ట్ర ప్రభుత్వం రైతులకు అధిక ప్రాధాన్యత ఇస్తుందన్నారు మంత్రి ఈటల రాజేందర్‌. వరంగల్‌ రూరల్‌ జిల్లా వర్ధన్నపేట మండల కేంద్రంలోని ఎమ్మెల్యే క్యాంప్‌ ఆఫీసులో సబ్సిడీ ట్రాక్టర్ల పంపిణీ కార్యక్రమంలో మంత్రి పాల్గొన్నారు. రైతుల రుణమాఫీ, రుణ ముక్తి సర్టిఫికేట్‌ అందించేందుకు కేంద్రం పరిహారం అందించకపోయినా నాలుగు విడతలుగా 17వేల కోట్ల రుణాలు మాఫీ చేశామన్నారు. 

08:46 - April 9, 2018

హైదరాబాద్ : రాష్ట్రంలో ప్రతి ఒక్కరికీ కంటి పరీక్షలు నిర్వహించేందుకు వైద్య ఆరోగ్యశాఖ సిద్ధం కావాలని ఆదేశించారు సీఎం కేసీఆర్‌. ప్రభుత్వం చేపట్టిన ఈ కార్యక్రమాన్ని ఓ యజ్ఞంలా పూర్తి చేసేందుకు ప్రణాళికలు సిద్ధం చేయాలన్నారు. ప్రజలకు పూర్తిస్థాయిలో అవగాహన కల్పించి.. అన్ని ఏర్పాట్లు పూర్తి చేసి రంగంలోకి దిగాలని సూచించారు. 
తెలంగాణవ్యాప్తంగా ప్రజలందరికీ కంటి వైద్య పరీక్షలు నిర్వహించాలని ప్రభుత్వం యోచిస్తోంది. ఇందుకోసం ప్రజాప్రతినిధులు, అధికారులతో సీఎం కేసీఆర్‌ సమీక్షా సమావేశం నిర్వహించారు. ప్రభుత్వం చేపట్టిన ఈ కార్యక్రమాన్ని యజ్ఞంలా నిర్వహించాలని కేసీఆర్‌ అధికారులకు సూచించారు. 

గ్రామాలు, పట్టణాల్లో చాలామంది కంటి జబ్బులతో బాధపడుతున్నారు.. కంటి పరీక్షలు చేయించుకునే వెసులుబాటు లేకపోవడం వల్లనో, నిర్లక్ష్యం వల్లనో, అవగాహన లేకపోవడం వల్లనో చికిత్సకు దూరంగా ఉంటున్నారు. కంటి జబ్బు ఉన్నా గుర్తించకుండా నెట్టుకొస్తున్నవారూ ఉన్నారు. వాళ్లందరికి ముందు అవగాహన కల్పించాలని కేసీఆర్‌ అభిప్రాయపడ్డారు. అన్ని గ్రామాల్లో ఉచితంగా కంటి పరీక్షలు నిర్వహించాలని... దీని కోసం విస్తృతంగా ప్రచారం చేయాలన్నారు సీఎం. ప్రజాప్రతినిధులు, స్వచ్చంధ సంస్థలు, యువజన సంఘాలను ఇందులో భాగస్వామ్యం చేయాలన్నారు. మొదట రాష్ట్రంలో ఎన్ని కంటి పరీక్షా శిబిరాలు నిర్వహించాలో ప్రణాళికలు రూపొందించాలని అధికారులను ఆదేశించారు. ఒక రోజులో ఎంతమందికి కంటి పరీక్షలు చేస్తారు... దానికనుగుణంగా ఎన్ని వైద్య బృందాలు అవసరమవుతాయో చూడాలన్నారు. గ్రామంలోని అందరికీ కంటి పరీక్షలు నిర్వహించాలని... గ్రామాలవారీగా వైద్య పరీక్షలు నిర్వహిస్తూ ముందుకెళ్లాలని సూచించారు. వారంలో ఐదు రోజులపాటు వైద్య పరీక్షలు నిర్వహించి.. శని, ఆది వారాలు వైద్య సిబ్బందికి సెలవు ఇవ్వాలని సూచించారు. గ్రామాల్లో పర్యటించే బృందాలకు రవాణా, భోజన, బస ఏర్పాట్లన్నీ ప్రభుత్వం చేయాలన్నారు. 

కంటి పరీక్షలు నిర్వహించేందుకు వ్యూహాలు రచించాలని అధికారులను కేసీఆర్‌ ఆదేశించారు. కంటి పరీక్షల అనంతరం అవసరమైన వారికి ఉచితంగా కళ్లద్దాలు ఉచితంగా పంపిణీ చేయాలన్నారు. అవసరమైన మందులు కూడా ఉచితంగా ఇవ్వాలన్నారు. శస్త్ర చికిత్సలు అవసరమైన వారిని గుర్తించి కంటి వైద్యశాలలకు రిఫర్‌ చేయాలని... ప్రభుత్వ ఆస్పత్రుల్లోనే కాకుండా ప్రైవేట్‌ వైద్యశాలల్లో కూడా ఆపరేషన్లు నిర్వహించాలని కేసీఆర్‌ సూచించారు. 

రాష్ట్రంలోని అందరికీ కంటి పరీక్షలు నిర్వహించడం ప్రభుత్వం బాధ్యతగా తీసుకుంటుందన్నారు కేసీఆర్‌. ఇది అత్యంత క్లిష్టమైన పనే అయినప్పటికీ... అధికార యంత్రాంగం చిత్తశుద్ది, అంకితభావంతో ఈ యజ్ఞాన్ని పూర్తి చేసి ఆరోగ్యతెలంగాణ నిర్మాణానికి ముందడుగు వేయాలని కేసీఆర్‌ ఆశాభావం వ్యక్తం చేశారు. 

07:56 - March 21, 2018

రాష్ట్ర అప్పులు చేస్తుంది..కానీ అభివృద్ధి జరగడం లేదని వక్తలు అన్నారు. ఇదే అంశంపై నిర్వహించిన చర్చా కార్యక్రమంలో సీపీఎం రాష్ట్ర కార్యదర్శి వర్గసభ్యులు సారంపల్లి మల్లారెడ్డి, బీజేపీ అధికార ప్రతినిధి కొల్లి మాధవి, టీఆర్ఎస్ నేత మన్నె గోదర్ధన్ రెడ్డి పాల్గొని, మాట్లాడారు. అప్పులు ఘనంగా చేస్తున్నారని..అభివృద్ధి మాత్రం శూన్యమన్నారు. మరిన్ని వివరాలను వీడియోలో చూద్దాం.. 

14:31 - March 12, 2018
13:33 - March 12, 2018

హైదరాబాద్ : తమ పార్టీ సభ్యులను సస్పెండ్ చేసేందుకు టీసర్కార్ కుట్ర పన్నిందని కాంగ్రెస్ ఎమ్మెల్యే చిన్నారెడ్డి అన్నారు. విపక్షాలు సభలో ఆందోళన చేయడం, నిరసన తెలపడం సర్వ సాధారణమన్నారు. గతంలో హరీష్ రావు కూడా మైకును విరిశారని.. గవర్నర్ ప్రంగాన్ని అడ్డుకుని, పేపర్లను చించి పైకి విసిరారని గుర్తు చేశారు. స్వామిగౌడ్ కంటికి గాయం పేరుతో తమను సస్పెండ్ చేయాలని పన్నాంగ పన్నారని మండిపడ్డారు. ఎప్పుడూ ఇంతమంది పోలీసులను వెల్ లో చూడలేదన్నారు. చైనా వాల్ లాగా పోలీసులతో తమను అడ్డుకున్నారని పేర్కొన్నారు. ఇది పోలీసు రాజ్యంగా ఉందని విమర్శించారు.

 

21:55 - March 5, 2018

హైదరాబాద్ : తెలంగాణ రాష్ట్ర శాసనసభ బడ్జెట్ సమావేశాల నోటిఫికేషన్ జారీ అయింది. ఈ నెల 12 నుంచి అసెంబ్లీ బడ్జెట్ సమావేశాలు ప్రారంభం కానున్నాయి. ఉదయం 10 గంటల నుంచి  సమావేశాలు ప్రారంభమవుతాయి. ఉభయ సభలను ఉద్దేశించి రాష్ట్ర గవర్నర్ నరసింహన్ ప్రసంగంతో సమావేశాలు ప్రారంభం మవుతాయి. 

 

18:58 - March 5, 2018

హైదరాబాద్ : డబుల్ బెడ్ రూం తెలంగాణ రాష్ట్రంలో ఇండ్లులేని నిరుపేదలను నాలుగేళ్లుగా ఊరిస్తున్న మాట. కేసిఆర్ ప్రభుత్వం చెప్పిందేంటి? చేస్తున్నదేంటి? క్షేత్రస్థాయిలో జరుగుతున్నదేంటి? కడతామని చెప్పిన ఇండ్లెన్ని? కట్టిన ఇండ్లెన్ని? గృహనిర్మాణంలో సర్కార్ కు ఎదురవుతున్న సవాళ్లేంటి? అధిగమించడానికి తీసుకోవాల్సిన చర్యలేంటి అనే అంశాలపై టెన్ టీవి స్పెషల్ ఫోకస్‌.. కీప్‌ వాచ్ దిస్ స్టోరీ..
ఇండ్ల కోసం ఎదురుచూస్తున్న పేదలు 
గత ఎన్నికలకు ముందు తెలంగాణ రాష్ట్ర సమితి తన ఎన్నికల ప్రణాళికను విడుదల చేసింది. ప్రస్తుతం రాష్ట్రంలో అమలులో ఉన్న గృహనిర్మాణం అవినీతిమయంగానూ, లోపభూయిష్టంగానూ ఉందని అందులో పేర్కొన్నారు. పేదలను అవమాన పరిచే విధంగా సర్కార్ నిర్మించే ఇండ్లు ఉన్నాయన్నారు. ఒకే గదిలో కుటుంబం అంతా నివసించే దుస్థితి నెలకొందని రాశారు. అందుకే దేశ చరిత్రలోనే విన్నూత్నంగా అత్యంత ప్రతిష్టాత్మకమైన గృహనిర్మాణాన్ని చేపడతామని ప్రణాళికలో రాశారు. పేదలకు అత్యంత గౌరవ ప్రదంగా ఉండే విధంగా  125 గజాలలో రెండు పడక గదులు, హాలు, కిచెన్, మరుగు దొడ్డి నిర్మిస్తామని చెప్పారు. పేదలపై ఎటువంటి రుణ భారం పడకుండా ప్రభుత్వమే ఇండ్లు నిర్మించి ఇస్తుందని మ్యానిఫెస్టోలో పేర్కొన్నారు. అధికారంలోకి వచ్చారు. అరవై నెలల పాలనకు గానూ నలభై రెండు నెలల పాలన గడిచింది. ఇండ్ల కోసం లక్షల సంఖ్యలో అర్హులైన వారు ఎదురు చూస్తున్నారు. ప్రభుత్వం నిర్మిస్తున్న ఇండ్లు వందల సంఖ్యలోనే ఉన్నాయి. 
గ్రామీణ ప్రాంతంలో ఇంటి నిర్మాణానికి రూ. 5,04,000
అధికారంలోకి వచ్చిన ఏడాది తర్వాత డబుల్ బెడ్ రూం ఇండ్ల నిర్మాణానికి పూనుకుంది కేసిఆర్ సర్కార్. గ్రామీణ ప్రాంతంలో ఇంటి నిర్మాణానికి ఐదు లక్షల నాలుగు వేల రూపాయలు, మౌళిక సదుపాయాల కల్పనకు ఒక లక్షా ఇరవై ఐదు వేల రూపాయలు మొత్తం ఆరు లక్షల ఇరవై తొమ్మిది వేల రూపాయలను ఒక యూనిట్ ధరగా నిర్ణయించింది. పట్టణ ప్రాంతాల్లో ఐదు లక్షల ముప్పయి వేల రూపాయలు, మౌళిక సదుపాయాల కల్పనకు డెబ్బయిఅయిదు వేల రూపాయలు మెత్తం ఆరు లక్షల ఐదు వేల రూపాయలు, హైదరాబాద్ మహానగర పరిధిలో నిర్మించే ఇళ్లకు ఇంటి కోసం ఏడు లక్షల రూపాయలు, మౌళిక సదుపాయాల కోసం డెబ్బయి ఐదు వేలు కలిపి ఏడు లక్షల డెబ్బయి వేల రూపాయలను యూనిట్ ఖర్చుగా ఫైనల్ చేసింది ప్రభుత్వం. 
ఐడీహెచ్ కాలనీలో 396 ఇళ్లు పూర్తి
అధికారంలోకి వచ్చాక తొలి రెండు సంవత్సరాల్లో గ్రేటర్ హైదరాబాద్ మహా నగర పరిధిలోని ఐడిహెచ్ కాలనీలో 396 ఇండ్లను నిర్మించారు. ముఖ్యమంత్రి దత్తత గ్రామాలైన ఎర్రవల్లిలో 600, నర్సాపూర్ లో 250 ఇండ్లను మోడల్ గా నిర్మించారు. ఇవి తప్ప 2016-17 ఆర్థిక సంవత్సరంలో ఇతర ప్రాంతాల్లో ఒక్క ఇల్లు కూడా నిర్మించలేదు. 2017-18 ఆర్థిక సంవత్సరంలో రెండు లక్షల 37 వేల ఇళ్లను నిర్మించాలని లక్ష్యంగా నిర్ణయించుకుంది రాష్ట్ర ప్రభుత్వం. ఈ ఆర్థిక సంవత్సరంలో ప్రవేశపెట్టిన రాష్ట్ర బడ్జెట్లో డబుల్ బెడ్ రూం ఇండ్ల నిర్మాణం కోసం ఒక్క పైసా కూడా నిధులు కేటాయించలేదు. నిధులు కేటాయించకుండా నిర్మాణాలు ఎలా చేపడతారని శాసన సభలో ప్రతిపక్షాలు ప్రభుత్వాన్ని ప్రశ్నించాయి. బడ్జటేతర నిధులతో ఇండ్ల నిర్మాణాన్ని చేపడతామని ప్రభుత్వం సమాధానమిచ్చింది. 
ఇళ్ల నిర్మాణానికి హడ్కో నుంచి రూ.1200 కోట్ల రుణం
ఇండ్ల నిర్మాణం చేపట్టేందుకు హడ్కో నుండి పన్నెండు వందల కోట్ల రూపాయలను రుణంగా తీసుకుంది రాష్ట్ర ప్రభుత్వం. ఇండ్ల నిర్మాణాలను కాంట్రాక్టర్లకు ఇచ్చేందుకు టెండర్లు పిలిచారు. అయితే ప్రభుత్వం టెండర్లు పిలిచినప్పటికీ కాంట్రాక్టర్ల నుండి ఆశించిన స్పందన రావడం లేదు. టెండర్లు దక్కించుకున్న వారు సైతం కొన్ని చోట్ల నిర్మాణాలను ప్రారంభించ లేదు. నిర్మాణాలు ప్రారంభించిన చోట మధ్యలోనే ఆపేస్తున్నారు. రాష్ట్ర వ్యాప్తంగా ప్రభుత్వం రెండు లక్షల పదిహేను వేల ఇండ్లకు టెండర్లు పిలిస్తే లక్షా డెబ్బయి ఒక్క వేయి ఇండ్లకు మాత్రమే టెండర్లు ఖరారయ్యాయి. టెండర్లు ఖరారయిన వాటిలో లక్షా ముప్పయి ఆరు వేల ఇండ్ల నిర్మాణం ప్రారంభమయిందని ప్రభుత్వం చెబుతోంది. అన్ని జిల్లాల్లో కలిపి కేవలం ఐదు వేల మూడు వందల ఇండ్లు మాత్రమే పూర్తయ్యాయి. ఇందులో అత్యధికంగా సిద్దిపేట జిల్లాలో ఒక వెయ్యి తొమ్మిది వందల నలభై ఏడు ఇండ్లు పూర్తి కాగా, భద్రాద్రి కొత్తగూడెం జిల్లాలో తొమ్మిది వందల నలభై మూడు ఇండ్లు పూర్తయ్యాయి. 
గ్రేటర్‌లో ప్రారంభమైన 92,000 ఇళ్లు
ఇండ్ల నిర్మాణాల ప్రారంభ విషయాన్ని పరిశీలిస్తే రాష్ట్ర వ్యాప్తంగా పదిహేను జిల్లాల్లో డబుల్ బెడ్ రూం ఇండ్ల నిర్మాణం ప్రారంభమే కాలేదు. ప్రారంభమైన లక్షా ముప్పయి ఆరువేల గృహ నిర్మాణాల్లో గ్రేటర్ పరిధిలోనే తొంబయి రెండు వేల ఇండ్లు ఉన్నాయని ప్రభుత్వం యంత్రాంగం విడుదల చేసిన నివేదికలో పేర్కొన్నారు. హైదరాబాద్ మహా నగరాన్ని మినహాయిస్తే రాష్ట్రంలోని ముప్పయి జిల్లాల్లో కలిపి ప్రారంభమైన ఇండ్లు 44వేలు మాత్రమే. ముఖ్యమంత్రి అధికారంలోకి వచ్చిన తొలినాళ్లలో జిల్లాల పర్యటన చేపట్టారు. వరంగల్ పర్యటన సందర్భంగా, మహబూబ్ నగర్ జిల్లా పర్యటనల సందర్భంగా ఇచ్చిన హామీల మేరకు అక్కడ కూడా ఇండ్ల నిర్మాణం చేపట్టారు. మహాబూబ్ నగర్ పట్టణంలో సిఎం శంఖు స్థాపన చేసిన ఇండ్లను మాత్రమే పూర్తి చేశారు.  సిఎం ప్రకటించిన 330 ఇండ్లు మినహా ఉమ్మడి పాలమూరు జిల్లాలో ఒక్క ఇల్లు కూడా పూర్తి కాలేదు. ఇక సిఎం సొంత జిల్లా సిద్దిపేటలో పూర్తయిన 19 వందల ఇండ్లలో ఎర్రవల్లి, నర్సాపూర్ గ్రామాల్లో పూర్తయిన ఇండ్లే సగం వరకు ఉన్నాయి. 
పడకేసిన ఇళ్ల నిర్మాణం
గృహనిర్మాణ మంత్రి ఇంద్రకరణ్ రెడ్డి సొంత జిల్లాలోనూ డబుల్ బెడ్ రూం ఇండ్ల నిర్మాణం పడకేసింది. ఒక వెయ్యి ఏడు వందల నలబై ఇండ్లకు టెండర్లు పిలిస్తే ఐదు వందల ఇండ్లకు మాత్రమే టెండర్లు ఖరారయ్యాయి. టెండర్లు పూర్తయినా కాంట్రాక్టర్లు పనులు ప్రారంభించక పోవడంతో స్వయంగా మంత్రిగారు రంగంలోకి దిగాల్సి వచ్చింది. అయినా కాంట్రాక్టర్లు దిగిరాలేదు. ప్రతిష్టాత్మకంగా తీసుకున్న మంత్రి తన సొంత గ్రామమైన ఆళ్లపల్లిలో నలభై ఇండ్లను నిర్మించుకోగలిగారు. మంత్రి సొంత గ్రామంలో తప్ప నిర్మల్ జిల్లాలో ఇండ్ల నిర్మాణమే ప్రారంభం కాలేదు. నిర్మల్ జిల్లాతో పాటు ఉమ్మడి ఆదిలాబాద్ నుండి ఏర్పాటయిన మంచిర్యాల, ఆదిలాబాద్, కొమరం భీం ఆసిఫాబాద్ జిల్లాల్లోనూ డబుల్ బెడ్ రూం నిర్మాణం ప్రారంభదశను దాటలేదు. ఎక్కువ మంది పేదలూ, గిరిజనులు ఉన్న ఉమ్మడి ఆదిలాబాద్ జిల్లాలో ఇండ్ల నిర్మాణం నత్తనడకన సాగడం ఇండ్లు లేని పేదలకు నిరాశే ఎదురవుతోంది.
హడ్కో నుంచి రూ.1200 కోట్ల రూపాయల అప్పు
కేసిఆర్ మానస పుత్రికగా అభివర్ణించిన ఈ గృహనిర్మాణ పథకాన్ని నిధుల కొరత వేధిస్తోంది. బడ్జెటేతర నిధులతో నిర్మాణం చేపట్టడం పథకం ఆశించిన రీతిలో ముందుకు సాగకపోవడానికి ప్రధాన అడ్డంకిగా మారింది. ఒప్పందం మేరకు హడ్కో నుండి పన్నెండు వందల కోట్ల రూపాయలను అప్పుగా తీసుకున్నారు. ఈ నిధుల్లోనూ రాష్ట్రంలోని అన్ని జిల్లాలకు సమానంగా పంచలేదు. ముఖ్యమంత్రి సొంత జిల్లా సిద్దిపేటకు రెండు వందల యాభై కోట్ల రూపాయలు మంజూరు చేశారు. అత్యంత నిరుపేదలు ఉండీ, వలసలకు మారుపేరయిన నాగర్ కర్నూల్, గద్వాల జిల్లాలకు ఒక్క పైసా కూడా నిధులు ఇవ్వలేదు. రాష్ట్రంలోనే గిరిజన జనాభా అధికంగా ఉండీ అభివృద్దిలో బాగా  వెనకబడిన జిల్లా కొమరం భీం ఆసిఫాబాద్ జిల్లాకు కేవలం ఐదు లక్షలు మంజూరు చేశారు. 
గ్రేటర్‌లో మొదలైన 92 వేల ఇళ్ల నిర్మాణం
గ్రేటర్ లో మురికి వాడల వాసులకు డబుల్ బెడ్ రూం ఇండ్లను నిర్మిస్తాం. హైదరాబాద్ లో మురికి వాడలు లేకుండా చేస్తామని మున్సిపల్ మంత్రి కేటిఆర్ ప్రకటించారు. నగరంలో తొంబయి రెండు వేలకు పైగ ఇండ్ల నిర్మాణం ప్రారంభమైందని రాష్ట్ర ప్రభుత్వం విడుదల చేసిన లెక్కల్లో పేర్కొన్నారు. ఈ ఇండ్ల నిర్మాణం పూర్తి కావాలంటే ఏడు వేల 130 కోట్ల రూపాయలు అవసరం కానీ కేటాయించింది. కేవలం మూడు వందల డెబ్బయి అయిదు కోట్ల రూపాయలు మాత్రమే. ఇలా కేటాయింపులు చేస్తే ఇప్పుడు నిర్మాణ దశలో ఉన్న తొంబయి రెండు వేల ఇండ్లు పూర్తి కావాలంటే కనీసం ఇరవై సంవత్సరాలు పట్టే అవకాశం ఉంది. ప్రస్తుత ఆర్థిక సంవత్సరం పూర్తయ్యే నాటికి గ్రేటర్ లో లక్ష ఇండ్లు పూర్తి చేస్తామని మంత్రి కేటిఆర్ చెప్పిన మాటకి క్షేత్ర స్థాయిలో పరిస్థితులకు ఏ మాత్రం పొంతన లేదు. 
4400 ఇండ్ల నిర్మాణం 
గ్రేటర్ కాకుండా రాష్ట్రంలో మిగిలిన 30 జిల్లాల్లో నలభై నాలుగు వేల ఏడు వందల ఇండ్ల నిర్మాణం ప్రారంభమైంది. ప్రారంభమైన ఇండ్లు పూర్తి కావాలంటే రెండు వేల ఎనిమిది వందల కోట్ల రూపాయలు అవసరం. వీటి నిర్మాణానికి ఎనమిది వందల యాభై రెండు కోట్ల రూపాయలు మాత్రమే ఖర్చు చేశారు. కావాల్సిన నిధులు వేల కోట్లలో ఉన్నాయి. కేటాయిస్తున్న నిధులేమో ఏ మూలకూ చాలకుండా వందల కోట్లు కేటాయిస్తున్నారు. ఓ వైపు టెండర్లు పిలిచినా కాంట్రాక్టర్లు ఆసక్తి చూపడం లేదు. టెండర్లు ఖరారయిన వాటిలోనూ సగం కూడా ప్రారంభం కావడం లేదు. ప్రారంభమయిన వాటికీ సరిపడా నిధులు కేటాయించడం లేదు. కేటాయిస్తున్న నిధుల్లోనూ అసమానతలు ఉంటున్నాయి. వెరసి డబుల్ బెడ్ రూం ఇండ్ల నిర్మాణం కర్ణుడి చావుకు వెయ్యి కారణాలన్నట్టు తయారయ్యింది. 
ప్రభుత్వంపై ప్రజలు తీవ్ర ఆగ్రహం 
డబుల్ బెడ్ రూం ఇండ్ల హామీ అమలు చేయాలని రాష్ట్ర వ్యాప్తంగా కొన్ని జిల్లాల్లో ఉద్యమాలు, నిరసనలు ప్రారంభమయ్యాయి. తమ వద్దకు వచ్చిన ఎమ్మెల్యేలను నిలదీసిన ఘటనలూ వెలుగు చూసాయి. కొన్ని జిల్లాల్లో నిరసన ప్రదర్శనలు, నిరహార దీక్షలు చేస్తున్నారు. ఒక్క అడుగు ముందు వేసి జనగామ జిల్లాలో ఓ గ్రామంలో అధికార పార్టీకి చెందిన వారితో సహా పార్టీల కతీతంగా రిలే దీక్షలు చేపట్టారు. దాదాపు పది రోజుల నుండి ఈ దీక్షలు  కొనసాగుతున్నాయి. మరో వైపు గత ప్రభుత్వ హయాంలో మంజూరయి నిర్మాణ దశలో ఉన్న,  నిర్మించుకున్న ఇండ్లకు బిల్లులు చెల్లించాలని ప్రజలు కోరుతున్నారు. ప్రభుత్వం బిల్లులు ఇస్తుందన్న నమ్మకంతో అప్పులు తెచ్చి ఇళ్లు కట్టుకున్న వారు అప్పుల భారంతో ఆత్మహత్యలు చేసుకున్న ఘటనలూ ఇటీవల జరిగాయి. ప్రభుత్వం కట్టిస్తామని చెప్పిన కొత్త ఇండ్లు ఇవ్వక, కట్టుకున్న ఇందిరమ్మ ఇండ్లకు బిల్లులూ ఇవ్వక పోవడంతో ప్రజలు ఒకింత ఆగ్రహాన్ని వ్యక్తం చేస్తున్నారు. 
ఈ బడ్జెట్లోనైనా నిధులు కేటాయిస్తుందా? 
డబుల్ బెడ్ రూం ఇండ్ల నిర్మాణం పట్ల ప్రజలే కాదు, కేంద్రం కూడా ఆసక్తిగా చూస్తోంది. పథకం అమలు తీరు ప్రజలకంటే ముందు కేంద్రానికి ఆర్థమయింది. ఇటీవల హైదరాబాద్ పర్యటనకు వచ్చిన కేంద్ర మంత్రి రాంకృపాల్ యాదవ్‌ డబుల్ బెడ్ రూం పరిశీస్తానని చెప్పారు. ఆ నిర్మాణాలు ఇంకా పూర్తి కాలేదని రాష్ట్ర మంత్రి చెప్పడంతో అవాక్కవడం కేంద్ర మంత్రి వంతయింది. ఎన్నికలకు సమయం దగ్గర పడుతున్న నేపథ్యంలో డబుల్ బెడ్ రూం నిర్మాణాలపై రాష్ట్ర ప్రభుత్వం ఎటువంటి చర్యలు తీసుకుంటుంది, ఈ బడ్జెట్లోనైనా నిధులు కేటాయిస్తుందా అనేది వేచి చూడాలి. 

 

Pages

Don't Miss

Subscribe to RSS - టీసర్కార్