టీసర్కార్

12:46 - March 17, 2017

హైదరాబాద్ : తెలంగాణలో రైతులందరికీ కొత్త పట్టాదారు పాసు పుస్తకాలు ఇవ్వాలని ప్రభుత్వం నిర్ణయించింది. ఇందు కోసం రెండు, మూడు నమూనాలు పరిశీలనలో ఉన్నాయని అసెంబ్లీ ప్రశ్నోత్తరాల సమయంలో ఉప ముఖ్యమంత్రి మహమూద్‌ అలీ సభ దృష్టికి తెచ్చారు. ముఖ్యమంత్రి ఆమోదం తర్వాత కొత్త పాసు పుస్తకాలు జారీ చేయడంతోపాటు, వీటిని ఆన్‌లైన్‌లో ఉంచుతామని సభ దృష్టికి తెచ్చారు. ఏపీ పేరు మీద ఉన్న పట్టాదారు పాసు పుస్తకాలను తెలంగాణ పేరు మీద మార్పు చేస్తామని ఉప ముఖ్యమంత్రి వివరించారు. పట్టాదారు పాసు పుస్తకాలు ఆన్‌లైన్‌లో ఉంచాలని కాంగ్రెస్ సభ్యులు చిన్నారెడ్డి అన్నారు. పటిష్టంగా ఉండేలా కొత్త పాసు పుస్తకాలు జారీ చేయాలని కోరారు. కొత్త పాసు పుస్తకాల జారీ నిలిపివేతతో భూముల అమ్మకాలు ఆగిపోయాయని తెలిపారు. 

21:06 - March 16, 2017
11:42 - March 10, 2017

హైదరాబాద్ : టీప్రభుత్వం గవర్నర్ వ్యవస్థను అవమాన పరిచిందని టీడీపీ వర్కింగ్ ప్రెసిడెంట్, ఎమ్మెల్యే రేవంత్ రెడ్డి అన్నారు. ఈమేరకు ఆయన మీడియాతో మాట్లాడారు. మంత్రివర్గ సమావేశం ఏర్పాటు చేయకుండా, గవర్నర్ ప్రసంగం ఆమోదించకుండా డైరెక్ట్ సభలో ప్రభుత్వం ఇచ్చిన ప్రతిని గవర్నర్ ప్రసంగంలో చదివించి గవర్నర్ వ్యవస్థను అవమాన పరిచారని మండిపడ్డారు. ప్రభుత్వానికి పారదర్శకత లేదని విమర్శించారు. గవర్నర్ కు ఇచ్చిన ప్రతి... ప్రభుత్వ పాలసీ డాక్యుమెంట్ లా ఉందని ఎద్దేవా చేశారు. ప్రసంగంలో వేటి గురంచి ప్రస్తావన లేదన్నారు. గవర్నర్ ప్రసంగంలో డబుల్ బెడ్ రూం ఇళ్లు, ఫీజు రియింబర్స్ మెంట్, దళితులు, గిరిజనులకు మూడు ఎకరాలు భూమి పథకంతోపాటు పలు హామీలను ప్రస్తావించలేదని చెప్పారు. గవర్నర్‌ టీఆర్‌ఎస్‌ ఒత్తిడికి తలొగ్గారని ఆరోపించారు. ప్రభుత్వం ఇచ్చిన స్క్రిప్టును గవర్నర్‌ యాంత్రికంగా చదివి వినిపించారని విమర్శించారు. గవర్నర్‌తో అబద్దాలు చెప్పించి... గవర్నర్‌ వ్యవస్థనే టీఆర్‌ఎస్‌ ప్రభుత్వం అవమానపర్చిందని ధ్వజమెత్తారు. అవినీతి రహిత పాలన కోసం కృషి చేస్తున్నామంటూ టీఆర్ఎస్‌ చెప్పుకోవడం హాస్యాస్పదంగా ఉందన్నారు. గతంలో 30 రోజులు సమావేశాలు జరిగాయి... ఇప్పుడు 13 రోజులు జరుగుతాయో..? 14 రోజులు జరుగుతాయో సందిగ్ధంగా ఉందన్నారు. మరిన్ని వివరాలను వీడియోలో చూద్దాం...

 

08:10 - March 10, 2017

హైదరాబాద్ : తెలంగాణ బడ్జెట్‌ సమావేశాలు నేటి నుంచి ప్రారంభం కానున్నాయి. గత బడ్జెట్‌ కంటే ఈసారి రాష్ట్ర బడ్జెట్‌ మరింత పెరగనుంది. దీంతో ప్రభుత్వం ఎంతమేర బడ్జెట్‌ను పెంచబోతుందనే ఆసక్తి అందరిలో నెలకొంది. దీంతో ఏఏ వర్గాలకు ఎంత నిధులు కేటాయించనుందోననే చర్చ అన్ని వర్గాల్లో మొదలైంది.
13న బడ్జెట్‌ను ప్రవేశపెట్టనున్న మంత్రి ఈటెల
శుక్రవారం నుంచి ప్రారంభం కానున్న అసెంబ్లీ సమావేశాల్లో 13వ తేదీన ఆర్థిక మంత్రి ఈటెల రాజేందర్‌ రాష్ట్ర నాలుగో బడ్జెట్‌ను ప్రవేశపెట్టబోతున్నారు. అయితే గత ఏడాదితో పోలిస్తే ఈ ఏడాది 12 నుంచి 15 శాతం బడ్జెట్‌ పెరిగే అవకాశం ఉన్నట్టు సమాచారం. బడ్జెట్‌ సంఖ్యా పరంగా లక్షా 40 వేల కోట్ల నుంచి 45 వేల కోట్లు ఉండబోతుందని తెలుస్తుంది.
బడ్జెట్‌పై పెరగనున్న వడ్డీల భారాలు
అయితే ఈ బడ్జెట్‌పై రుణ వాయిదాల చెల్లింపులు, వడ్డీల భారాలు కూడా భారీగానే పెరగనున్నట్టు సమాచారం. ఈ సంఖ్య దాదాపు 18 వేల కోట్లకు ఉండవచ్చని అంచనా. వివిధ అవసరాల కోసం కార్పొరేషన్ల ద్వారా సేకరించిన రుణాల చెల్లింపు వాయిదాలు, వాటి వడ్డీ భారాలు విపరీతంగా పెరిగాయని అధికారులు అంటున్నారు. దీంతో మొత్తం అప్పు లక్షా 20 వేల కోట్లు ఉంటుందని ఆర్థిక శాఖ అధికారులు అంటున్నారు.  అయితే ఈ వడ్డీల భారమంతా ప్రభుత్వ ఖజానాపై పడుతుందని చెబుతున్నారు.  మొత్తం ఈ భారం 65 వేల కోట్లకుపైగా ఉంటుందని అధికారులు అంటున్నారు. 
సంక్షేమ రంగాల బలోపేతానికి కేటాయింపులు
ఈసారి భారీ పథకాలకు భారీ కేటాయింపులు కాకుండా సంక్షేమ రంగాలను బలోపేతం చేసే దిశగా బడ్జెట్‌ రూపకల్పన జరిగినట్టు సమాచారం. ఇందులో వృత్తుల ఆధారంగా ప్రధాన కేటాయింపులున్నట్టు తెలుస్తోంది. వీటితో పాటు ఎస్సీ ఎస్టీ సబ్‌ప్లాన్‌కి కూడా అత్యధిక  ప్రాధాన్యం ఇవ్వనున్నట్టు తెలుస్తోంది. అలాగే కేటాయించిన నిధులు సక్రమమమైన పద్ధతుల్లో ఖర్చు చేయడం..వాటిని మానిటిరింగ్‌ కోసం ప్రత్యేక టీమ్‌లు ఏర్పాటు చేయనున్నట్టు సమాచారం.  
రూ.15 వేల కోట్ల కేటాయింపులతో కొత్త ప్రణాళికలు 
ఈసారి మాత్రం సబ్‌ప్లాన్‌లో దారి మళ్లిన 17 వేల కోట్ల రూపాయల విషయం మాత్రం చర్చకు రానీవ్వకుండా...12 నుంచి 15 వేల కోట్ల రూపాయల కేటాయింపులతో కొత్త ప్రణాళికలు అమల్లోకి తెచ్చి విపక్షాలు విమర్శలకు ఛాన్స్‌ లేకుండా చేయాలని ప్రభుత్వం చూస్తుంది.

 

21:07 - March 3, 2017

హైదరాబాద్ : తెలంగాణ రాష్ట్రంలో ఎంబీసీ ఫైనాన్స్ కార్పొరేషన్ ఏర్పాటుకు గ్రీన్ సిగ్నల్ లభించింది. ఎంబీసీ ఫైనాన్స్ కార్పొరేషన్ ఏర్పాటు చేస్తూ.. తెలంగాణ ప్రభుత్వం నిర్ణయం తీసుకుంది. ఇందుకు సంబంధించిన ఫైలుపై ముఖ్యమంత్రి కేసీఆర్ సంతకం చేశారు. మరిన్ని వివరాలను వీడియోలో చూద్దాం...

 

19:58 - March 3, 2017

మహబూబ్‌ నగర్‌/నిజామాబాద్‌ : మహబూబ్‌ నగర్‌, నిజామాబాద్‌ జిల్లా ఏదైనా పరిస్థితి ఒక్కటే. మహబూబ్‌ నగర్‌ ఒకప్పుడు కెసిఆర్‌ ప్రాతినిథ్యం వహించిన జిల్లా. నిజామాబాద్‌ ఆయన కుమార్తె కవిత ప్రాతినిధ్యం వహిస్తున్న జిల్లా. కానీ ఏం లాభం? మహబూబ్‌ నగర్‌ లో రెండేళ్ల క్రితం ముఖ్యమంత్రి కెసిఆర్‌ శంఖుఃస్థాపన చేసినా, నిజామాబాద్‌  ఏడాది కవిత శంఖుఃస్థాపన చేసినా అవే మాటలు. అవే కథలు. అవే వ్యధలు. డబుల్‌ బెడ్‌ రూం ఇళ్లు కట్టిస్తున్నామంటూ, వున్న ఇళ్లను కూల్చేశారు. వున్న ఇల్లు కూల్చుకుని రేకుల షెడ్డుల్లో తలదాచుకుంటున్నారు లబ్ధిదారులు. మహబూబ్‌ నగర్‌, నిజామాబాద్‌ జిల్లాల్లో డబుల్‌ బెడ్‌ రూంలపై క్షేత్ర స్థాయి వాస్తవాలే ఇవాళ్టి స్పెషల్‌ ఫోకస్‌. 
మహబూబ్ నగర్ లో
ఎక్కడ వేసిన గొంగడి అక్కడే అన్న చందంగా తయారైంది డబుల్ బెడ్ రూం ఇళ్ల నిర్మాణం పరిస్థితి. మహబూబ్ నగర్ పట్టణంలో కొన్ని ఇళ్ల నిర్మాణానికి శ్రీకారం చుట్టిన్నప్పటికీ, పనులు నత్తనడకన సాగుతున్నాయి. అవి ఎప్పటికి పూర్తవుతాయో చెప్పలేని పరిస్థితి.
లక్షల్లో దరఖాస్తులు
మహబూబ్ నగర్ జిల్లాలో డబుల్ బెడ్ రూమ్ ఇళ్ల కోసం ఎదురుచూస్తున్నవారి సంఖ్య లక్షకు పైగా వుంది. ఉమ్మడి మహబూబ్ నగర్ జిల్లాలోని 14 నియోజకవర్గాలకు కలిపి 5600 ఇళ్లు మాత్రమే మంజూరయ్యాయి. స్టేట్ రిజర్వ్ కోటా కింద నాగర్ కర్నూలుకు మరో 400 ఇళ్లు మంజూరయ్యాయి. 
3560 ఇళ్లకు పరిపాలనా అనుమతులు 
జిల్లాల విభజన అనంతరం రంగారెడ్డి జిల్లాలోని పరిగి నియోజకవర్గం ప్రస్తుత మహబూబ్ నగర్ జిల్లాలో కలిసింది. ఈ జిల్లాకు 4440 ఇళ్లు మంజూరవ్వగా, 3560 ఇళ్లకు పరిపాలనా అనుమతులు లభించాయి. అంతే. అంతకుమించి మరేమీ జరగలేదు. మహబూబ్ నగర్ జిల్లా కేంద్రంలో తప్ప మరెక్కడా ఇళ్ల నిర్మాణం మొదలవ్వలేదు. డబుల్ బెడ్ రూం ఇళ్ల మీద ఆశలు పెట్టుకున్నవారిలో అసహనం పెరుగుతోంది. స్థానిక ప్రజాప్రతినిధులు కూడా జవాబు చెప్పుకోలేని పరిస్థితుల్లో చిక్కుకున్నారు. 
ఇసుక సమస్య 
జిల్లాలో ఇసుక సమస్య తీవ్రంగా వుండడంతో కాంట్రాక్టర్లెవ్వరూ ముందుకు రావడం లేదు. మహబూబ్ నగర్ పట్టణంలో కొన్ని ఇళ్ల నిర్మాణం మొదలుపెట్టిన్నప్పటికీ అవి పూర్తికాలేదు. మార్చి నాటికి డబుల్ బెడ్ రూం ఇళ్ల నిర్మాణం పూర్తి చేయాలన్న లక్ష్యం నెరవేరేలా లేదు. దీంతో డబుల్ బెడ్ రూం దరఖాస్తులు ఆందోళన చెందుతున్నారు. ఇటీవల మహబూబ్ నగర్ జిల్లా పాదయాత్రలో పాల్గొన్న సిపిఎం బృందం ముందు తమగోడు వెళ్లబోసుకున్నారు. 
డబుల్‌ బెడ్‌రూం కట్టేదెప్పుడు?
నాలుగు నెలల్లో దావత్ చేసుకుందాం. ఎక్కడికెళ్లినా ఇదే మాట చెప్పే ముఖ్యమంత్రి కెసిఆర్ మహబూబ్ నగర్ మురికివాడలవాసులకూ ఇదే మాట చెప్పారు. నాలుగు నెలలు కాదు 26 నెలలైంది. కానీ దావత్ జరగలేదు. ఆయన శంకుస్థాపన చేసిన  డబుల్ బెడ్ రూం ఇళ్లు ఇన్నాళ్లయినా పూర్తికాలేదు. 
శిథిలమవుతున్న శిలాఫలకం
26 నెలల క్రితం 2015 జనవరి 8న ముఖ్యమంత్రి కెసిఆర్ మహబూబ్ నగర్ మురికివాడల్లో పర్యటించారు. మురికివాడల్లో డబుల్ బెడ్ రూం ఇళ్లు కట్టిస్తామంటూ కాలనీలలో కొబ్బరికాయలు కొట్టి, శంఖుస్థాపనలు చేశారు.  ఐదు నెలల్లో ఇళ్ల నిర్మాణ పూర్తి చేసి, దావత్ చేసుకుందామంటూ అందరికీ చెప్పినట్టే మహబూబ్ నగర్ వాసులకు కూడా కెసిఆర్ ఎక్కడలేని ఆశలు పెట్టారు. 
26 నెలలైంది..
నాలుగు నెలలు కాదు 26 నెలలైంది. నాలుగు నెలల్లోనే దావత్ అన్న ముఖ్యమంత్రి కెసిఆర్ మళ్లీ మహబూబ్ నగర్ మురికివాడల వైపు కన్నెత్తి చూడలేదు. ముఖ్యమంత్రి డబుల్ బెడ్ రూం ఇళ్ళు కట్టిస్తున్నామంటూ చెప్పిన మాటలు నమ్మి వున్న ఇళ్లను కూలగొట్టుకున్నవారి పరిస్థితి ఇప్పుడు దయనీయంగా తయారైంది. అప్పులు చేసి రేకుల షెడ్డులు వేసుకోవాల్సి వచ్చింది. కెసిఆర్ చెప్పనట్టు నాలుగు నెలల్లో డబుల్ బెడ్ రూం ఇళ్ల నిర్మాణం పూర్తికాలేదు. వున్న ఇల్లు లేకుండా పోయింది. తలదాచుకోవడానికి అప్పు చేయాల్సి వచ్చింది.
రేకుల షెడ్డుల్లోనే కాలం వెళ్లదీత
తాత్కాలికంగా వేసుకున్న రేకుల షెడ్డుల్లోనే కాలం వెళ్లదీస్తున్నారు. ఈదురు గాలులతో కూడిన వర్షాలకు  రేకులు ఎగిరిపోయాయి. మొన్నటి చలిగాలులకు రేకుల షెడ్డుల్లో గజగజ వణికిపోయారు. మార్చి ప్రారంభంలోనే ఎండలు మండిపోతున్నాయి. రాబోయే కాలంలో ఈ రేకుల షెడ్డులలో ఎలా బతకాలంటూ ఆవేదన చెందుతున్నారు. ముఖ్యమంత్రి కెసిఆర్ మాటలు నమ్మి, ఉన్న ఇళ్లను కూల్చుకున్నవారంతా ఇప్పుడు లబోదిబోమంటున్నారు. అధికారుల చుట్టూ తిరుగుతున్నారు. ఇంకెంతకాలం ఈ కష్టాలంటూ ప్రశ్నిస్తున్నారు. సిపిఎం చేపట్టిన మహాజన పాదయాత్రలో పార్టీ రాష్ట్ర కార్యదర్శి తమ్మినేని వీరభద్రంకు తమగోడు వెళ్లబోసుకుంటూ అనేక మంది దరఖాస్తులు అందజేశారు.
శిలాఫలకానికి ఏడాది పూర్తి
మంత్రి జూపల్లి కృష్ణారావు ఏడాది క్రితం తలకొండకోపల్లి మండలం చెల్లంపల్లి గ్రామంలో డబుల్ బెడ్ రూం ఇళ్లకు శిలాఫలం వేశారు. ఇప్పుడది శిథిలమవుతోంది. ఇళ్ల నిర్మాణం మాత్రం మొదలుకాలేదు. దీంతో విసిగిపోయిన జనం శిలాఫలకానికి ఏడాది పూర్తయిన సందర్భంగా ఒక రోజు నిరసన కార్యక్రమం చేపట్టారు. ముఖ్యమంత్రి, జిల్లాకు చెందిన మంత్రి శంకుస్థాపన చేసిన చోటనే పరిస్థితి ఇలా వుంటే, ఇక మిగిలిన చోట్ల డబుల్ బెడ్ రూమ్ ఇళ్ల నిర్మాణం పూర్తయ్యెదెన్నడు? దావత్ లు చేసుకునేదెప్పుడు? 
నిజామాబాద్ జిల్లాలో...
ఎంపి కవిత ప్రాతినిధ్యం వహిస్తున్న నిజామాబాద్ జిల్లాలోనూ డబుల్ బెడ్ రూం ఇళ్ల నిర్మాణంలో ఏ మాత్రం పురోగతి లేదు. 82 వేల మంది దరఖాస్తు చేసుకుంటే ఇప్పటికి 1300 మంది అర్హులను మాత్రమే గుర్తించినట్టు తెలుస్తోంది. ఇక కవిత శంఖు:స్థాపన చేసిన చోట ఇళ్ల నిర్మాణం పూర్తి కాలేదు.
82000 దరఖాస్తులు
అది 2015 అక్టోబర్ 22. అదే రోజు ఎంపి కవిత, రాష్ట్ర మంత్రి పోచారం శ్రీనివాస్ రెడ్డి ఉమ్మడి నిజామాబాద్ జిల్లాలో డబుల్ బెడ్ రూం ఇళ్ల పథకానికి శంఖు:స్థాపన చేశారు. అవి ఇప్పటికీ పూర్తికాలేదు. ఎప్పటికి పూర్తవుతాయో తెలియదు. ఉమ్మడి నిజామాబాద్ జిల్లాలో డబుల్ బెడ్ రూమ్ ఇళ్ల కోసం దాదాపు 82వేల దరఖాస్తులొచ్చాయి. అయితే, మంజూరైనవి ఇందులో పదో వంతు కూడా లేవు. నిజామాబాద్ జిల్లాకు 4990 ఇళ్లు, కామారెడ్డి జిల్లాకు 2675 ఇళ్లు మంజూరైనట్టు అధికారులు చెబుతున్నారు. మొత్తం 120 గ్రామాల్లో 7665 ఇళ్లను మంజూరు చేశారు. కానీ, లబ్ధిదారుల ఎంపిక పూర్తికాలేదు. ఇప్పటి దాకా పరిశీలించిన దరఖాస్తుల్లో కేవలం 1305 మంది అర్హులనే మాత్రమే గుర్తించినట్టు తెలుస్తోంది.
కొలిక్కిరాని టెండర్ల ప్రక్రియ 
మరోవైపు డబుల్ బెడ్ రూం ఇళ్ల నిర్మాణం టెండర్ల ప్రక్రియ కొలిక్కిరావడం లేదు. రోడ్లు భవనాల అధికారులు మూడుసార్లు టెండర్లు పిలిచినా కాంట్రాక్టర్లు దొరకడం లేదు. ఇంతకు ముందు నిర్మాణ పనులు చేసిన అనుభవం లేని ముంబైకి చెందిన ఓ సంస్థ టెండర్లు దాఖలు చేయగా, తొలుత అధికారులు ఆ సంస్థను ఫైనల్ చేద్దామనుకున్నారు. ఒప్పందం కోసం రావాలంటూ ఆ సంస్థకు లేఖ కూడా రాశారు. నిబంధనలు పక్కాగా అమలు చేయాలంటూ ఉన్నతస్థాయి అధికారులు ఆదేశించడంతో ముంబై సంస్థను ఫైనల్ చేయలేదు. జిల్లాలో పరిస్థితిని వివరిస్తూ జిల్లా కలెక్టర్ యోగితారాణా అధికారులకు నివేదిక పంపినట్టు తెలుస్తోంది.  కోటగిరి మండలం దొమలెడ్డి గ్రామంలో 40 డబుల్ బెడ్ రూంలు నిర్మిస్తుండగా, మరెక్కడా పనులు ప్రారంభం కాలేదు. జిల్లాలో క్షేత్రస్థాయి వాస్తవాలు చూస్తుంటే ఇప్పట్లో డబుల్ బెడ్ రూం ఇళ్ల నిర్మాణం ప్రారంభమయ్యే అవకాశాలు కనిపించడం లేదు. నిజామాబాద్ జిల్లాలో డబుల్ బెడ్ రూం ఇళ్ల నిర్మాణంపై ప్రజా ఉద్యమం నిర్వహించేందుకు సిపిఎం వ్యూహరచన చేస్తోంది. 
ఇచ్చిన మాట నిలుపుకోన్నప్పుడు ప్రజాగ్రహం 
ఎమ్మెల్యేలు, ఎంపిలు, మంత్రులు, ముఖ్యమంత్రులు, ప్రభుత్వాలు ఎవరైనా సరే ఇచ్చిన మాట నిలుపుకోన్నప్పుడు ప్రజాగ్రహం వెల్లువెత్తుతుంది. తమకు ఇచ్చిన హామీలు నెరవేర్చాలంటూ ఉద్యమాలు ఉదయిస్తాయి. పోరాటాలు పదునెక్కుతాయి. అధికార పార్టీలు మాట నిలుపుకోకపోతే, ప్రజలు పోరాడే శక్తుల వెంట సమీకృతులవుతారు. ఈ విషయం ముఖ్యమంత్రి కెసిఆర్‌ కి తెలియంది కాదు. ఇప్పుడు డబుల్‌ బెడ్‌ రూంల కోసం  ప్రజలు నినదిస్తున్నారు. . మహాజన పాదయాత్ర నిర్వహిస్తున్న సిపిఎం బృందానికి వెల్లువెత్తిన దరఖాస్తులే ఇందుకు నిదర్శనం.  

 

11:08 - March 1, 2017

హైదరాబాద్ : అభివృద్ధి పేరుతో తెలంగాణ సర్కార్‌ ప్రజల నుంచి వివిధ రూపాల్లో ముక్కు పిండి  పన్నులు వసూలు చేస్తోంది. దీనిపై ప్రజా సంఘాలు మండి పడుతున్నాయి. సిటీలో రియల్‌ ఎస్టేట్‌ అభివృద్ధికి కృషి చేస్తామంటూ ప్రభుత్వం ప్రకటిస్తే.. హెచ్‌ఎండీఏ అధికారులు మాత్రం చట్టంలో లేని నాలా పన్ను భారాన్ని ప్రజలపై మోపుతున్నారు.  మరోవైపు ఎల్‌ఆర్‌ఎస్‌ దరఖాస్తులను క్లియరెన్స్‌ కూడా ఆలస్యమతుండటంతో హెచ్‌ఎండీఏ చర్యలను సిటిజన్లు వ్యతిరేకిస్తున్నారు.
నాలా పన్నుపై నిరసన 
లే అవుట్‌ రెగ్యూలరైజేషన్‌ స్కీమ్‌ అమలు విషయంలో జీహెచ్ఎంసీ, హెచ్‌ఎండీ పరిధిలో ద్వంద విధానంపై నగర వాసులు ఆ్రగహం వ్యక్తం చేస్తున్నారు. నగరంలో ల‌క్షలాది మంది లే అవుట్ రెగ్యులరైజేషన్ స్కీమ్ దరఖాస్తు దారులున్నారు. ఈ ప‌థ‌కం అమ‌లు గ‌తంలో 2008 నుంచి 2013 వరకు జ‌రిగింది. అప్పుడు  జీహెచ్ఎంసీ, హెచ్ఎండీఏ పరిధిలో వివిధ దశల్లో ఎలాంటి నాలా పన్ను లేకుండా  లక్షకు పైగా దరఖాస్తులు పరిష్కరించారు. ఆ తర్వాత కొన్ని దరఖాస్తులు వివిధ కారణాలతో ఆగిపోయాయి. వీటిలో పరిష్కారం కోసం వచ్చిన దరఖాస్తుల‌కు నాన్ అగ్రిక‌ల్చరల్ లాండ్ అసెస్‌మెంట్ టాక్స్  కట్టాలని హెచ్ఎండీఏ అధికారులు మెలిక పెట్టారు. 
నాలా ప‌న్ను వ‌సూలు 
అయితే ప్రభుత్వం ఇచ్చిన జీవో ప్రకారం 3 శాత‌మే నాలా ప‌న్ను వ‌సూలు చేయాలి. కానీ 4.5శాతం ప‌న్నును హెచ్‌ఎండీఏ వ‌సూలు చేస్తోంది. దీంతో ప్రధాన కార్యాల‌యం ముందు ధర్నాకు దిగారు హైద‌రాబాద్ జిందాబాద్ సంస్థతోపాటు, కాల‌నీస్ అండ్ అపార్ట్ మెంట్ అసోసియేషన్‌  నేతలు. రియ‌ల్ ఎస్టేట్ సంస్థలు అక్రమంగా లే అవుట్లు చేసి వాటిని అమ్ముకుని సోమ్ము చేసుకున్నప్పుడు ప‌ట్టించుకోని అధికారులు.. ఇప్పుడు వాటిని కొన్న ప్రజలపై భారం వెయ్యడం దారుణమని ప్రశ్నిస్తున్నారు.
ఎల్‌ఆర్‌ఎస్‌ కోసం లక్ష 66 వేల దరఖాస్తులు
హెచ్‌ఎండీఏ పరిధిలో ఎల్‌ఆర్‌ఎస్‌ కోసం లక్ష 66 వేల దరఖాస్తులు వచ్చాయి. అయితే వీటిని క్లియ‌ర్ చెయ్యడంలో అధికారులు అల‌స‌త్వం వ‌హిస్తున్నారంటున్నాయి ప్రజా సంఘాలు. ఎల్‌ఆర్‌ఎస్‌ దరఖాస్తుల పరిశీలించి, పరిష్కరించే పనిని వేగంగా చేస్తున్నామని అధికారులు చెప్పుకొస్తున్నారు. మూడు దశల్లో చేపడుతోన్న ఈ క్లియరెన్స్‌లో టైటిల్‌ పరిశీలిన,  సాంకేతిక పరిశీలిన, సైట్‌ విజిట్‌ చేసి డబ్బులు చెల్లించాల్సిన వివరాలు దరఖాస్తుదారులకు చెబుతామంటున్నారు. అయితే ఇప్పటి వ‌ర‌కు లక్షా 13వేల 599 ద‌ర‌ఖాస్తులు టైటిల్స్‌ ప‌రిశీల‌న చేశామ‌ని.. వాటిలో 92 వేల దరఖాస్తులు సాంకేతిక పరిశీలన పూర్తి చేశారు. మరో  36 వేల ద‌ర‌ఖాస్తుల‌కు సైట్ విజిట్ పూరైందని అధికారులు చెబుతున్నారు.  32 వేల వ‌ర‌కు పరిష్కరించామని,  అందులో 25వేల దరఖాస్తులు ఫీజులు చెల్లింపుతో పాటు ఇత‌ర విషయాల‌ వ‌ల్ల తిరస్కరణకు గురయ్యాయంటున్నారు హెచ్‌ఎండీఏ  క‌మిష‌నర్ చిరంజీవులు.
అంతా అన్ లైన్‌లో 
ఇక గ‌తంలో జ‌రిగిన స‌మ‌స్యలు ఈ సారి లేకుండా చూస్తామంటున్నారు క‌మిష‌న‌ర్. ఎలాంటి అవినీతికి తావు లేకుండా అంతా అన్ లైన్‌లో చేస్తున్నామంటున్నారు. దరఖాస్తు వివ‌రాలు ఎప్పటిక‌ప్పుడు దరఖాస్తుదారులకు తెలిసేలా ఏర్పాటు చేశామన్నారు. అవినీతికి పాల్పడుతున్న అధికారుల‌పై క‌ఠిన చ‌ర్యలు తీసుకుంటున్నామ‌ని ఇప్పటికే ముగ్గురు అధికారుల‌పై చ‌ర్యలు తీసుకున్నామ‌న్నారు.

 

08:46 - February 25, 2017

మొక్కుల పేరుతో ప్రజా ధనాన్ని దుర్వినియోగం చేయడం టీ.ప్రభుత్వానికి తగదని హితవు పలికారు. ఇదే అంశంపై నిర్వహించిన చర్చా కార్యక్రమంలో రాజకీయ విశ్లేషకులు వినయ్ కుమార్, టీకాంగ్రెస్ నాయకురాల ఇందిరా బీజేపీ అధికార ప్రతినిధి ప్రకాశ్ రెడ్డి, టీఆర్ ఎస్ ఎమ్మెల్సీ సుధాకర్ రెడ్డి పాల్గొని, మాట్లాడారు. ప్రజలకు ఉపయోగపడే పథకాల మీద ప్రభుత్వం ఖర్చు చేస్తే బాగుండేదన్నారు. అమెరికాలో తెలుగువారిపై కాల్పులు ఘటనపై మాట్లాడారు. మరిన్ని వివరాలను వీడియోలో చూద్దాం...

08:39 - February 25, 2017

హైదరాబాద్ : పెరిగిన జీతం, ప్రభుత్వం ఇచ్చే డబుల్‌ బెడ్‌రూం ఇల్లు, పబ్లిక్‌ పిలిచే పిలుపుతో వీఆర్‌ఏల ఆత్మగౌరవం, ఆత్మవిశ్వాసం పెరగడమే ప్రభుత్వ లక్ష్యమన్నారు ముఖ్యమంత్రి కేసీఆర్‌. తెలంగాణ రాష్ర్టంలోని వీఆర్‌ఏలకు ప్రభుత్వం తీపి కబురు అందించింది. వారి వేతనాలను 65 శాతం పెంచుతున్నట్లు ప్రకటించింది. ఏప్రిల్‌ 1నుంచి పెంచిన వేతనాలు అమల్లోకి రానున్నాయి. వీఆర్‌ఏ ప్రతినిధులతో ముఖ్యమంత్రి కేసీఆర్ ప్రగతి భవన్‌లో సమావేశమై చర్చించారు. 
వీఆర్‌ఏల వేతనాలు 64.61 శాతం పెంపు
విలేజ్ రెవెన్యూ అసిస్టెంట్ల వేతనాలను 64.61 శాతం పెంచనున్నట్లు ముఖ్యమంత్రి కేసీఆర్‌ ప్రకటించారు. ప్రస్తుతం నెలకు 6 వేల 500లుగా ఉన్న వీఆర్‌ఏల వేతనాన్ని 10వేల 500కు పెంచాలని, దీంతోపాటు 200 తెలంగాణ రాష్ట్ర సాధన ఇంక్రిమెంటును కూడా ఇవ్వాలని సీఎం నిర్ణయించారు. పెరిగిన వేతనాలు ఏప్రిల్ 1 నుంచి అమలులోకి రానున్నాయి. వారసత్వంగా పనిచేస్తున్న ప్రతీ వీఆర్‌ఏకు స్వగ్రామంలోనే డబుల్ బెడ్‌రూం ఇల్లు కట్టివ్వాలని, దీనికోసం వెంటనే ఉత్తర్వులు జారీ చేయాలని అధికారులను ముఖ్యమంత్రి ఆదేశించారు. పబ్లిక్ సర్వీస్ కమిషన్ పరీక్ష రాసి వీఆర్‌ఏలుగా పనిచేస్తున్న వారందరినీ రెగ్యులరైజ్ చేయాలని, వీఆర్‌ఓ, అటెండర్, డ్రైవర్ తదితర ఉద్యోగ నియామకాల్లో తగిన విద్యార్హతలున్న వీఆర్‌ఏలకు 30 శాతం ఉద్యోగాలు రిజర్వు చేయాలని సీఎం నిర్ణయించారు. ఈ నిర్ణయాల వల్ల్ల, వారసత్వంగా వీఆర్‌ఏలుగా పనిచేస్తున్న రాష్ట్రంలోని 19వేల 345 మందికి, పబ్లిక్ సర్వీస్ కమిషన్ ద్వారా వీఆర్‌ఏలుగా ఎంపికైన 2వేల 900 మందికి మేలు కలుగుతుంది. 
సేవలకు గుర్తింపుగా వేతనాలు పెంపు 
తెలంగాణ ఉద్యమంలో శాయశక్తులా పాల్గొన్న వీఆర్‌ఏలు, ఆ తర్వాత రాష్ట్ర అభివృద్ధిలో శక్తివంచన లేకుండా కృషి చేస్తున్నారని సీఎం కేసీఆర్‌ వీఆర్‌ఏ ప్రతినిధులతో సమావేశం సందర్భంగా అన్నారు. గ్రామంలో 24 గంటలపాటు అందుబాటులో ఉండి ప్రభుత్వం తరఫున ప్రతీ కార్యక్రమంలో పాల్గొంటున్నారని అన్నారు. ప్రభుత్వానికి ఆర్థికంగా భారమైనప్పటికీ, గ్రామస్థాయిలో అందుబాటులో ఉండి వీఆర్‌ఏలు ప్రజలకు అందిస్తున్న సేవలకు గుర్తింపుగా వేతనాలు పెంచామని చెప్పారు. వేతనంతోపాటు వీఆర్‌ఏల గౌరవం కూడా పెరగాల్సి ఉందని, ఇక నుంచి వారిని వీఆర్‌ఏ అని మాత్రమే పిలవాలి అని సీఎం కేసీఆర్ స్పష్టం చేశారు.
వీఆర్ ఏలకు డబుల్ బెడ్ రూం ఇళ్లు..
గ్రామ ప్రజలకు చేసే సేవలకు గుర్తింపుగా వారికి ప్రభుత్వమే డబుల్ బెడ్‌రూం ఇల్లు కట్టిస్తుందని, వారసత్వ వీఆర్‌ఏలందరికీ ఇండ్లు మంజూరు చేస్తూ వెంటనే ఉత్తర్వులు జారీ చేయాలని, ఇండ్ల నిర్మాణాన్ని సత్వరం ప్రారంభించాలని అధికారులను సీఎం ఆదేశించారు. 

 

10:32 - February 11, 2017

హైదరాబాద్ : తమ ప్రభుత్వ హయంలో తెచ్చిన ఎస్సీ, ఎస్టీ సబ్‌ప్లాన్‌ చట్టాన్ని...  కేసీఆర్ సర్కారు నీరుగార్చాలని చూస్తోందని కాంగ్రెస్‌ పార్టీ విమర్శించింది. చట్టంలో మార్పులు చేసే బదులు ఏకంగా కొత్త చట్టం తేస్తేనే బాగుంటుందని అధికార పార్టీ అభిప్రాయపడింది. 
టీ.ప్రభుత్వంపై క్రిమినల్ కేసు 
రెండున్న సంవత్సరాలుగా సబ్ ప్లాన్ కి నిధులు కేటాయించని టిఆర్ఎస్ ప్రభుత్వంపై క్రిమినల్ కేసు నమోదు చేయాల్సిందేనని కాంగ్రెస్‌ డిమాండ్ చేసింది. ఎస్సీ, ఎస్టీ సబ్‌ప్లాన్ పేరు మారిస్తే సహించేది లేదని స్పష్టం చేస్తోంది. ఉప ప్రణాళిక చట్టంలో సవరణల ప్రతిపాదనలపై నియమించిన కమిటీ సమావేశానికి హాజరైన నేతలు పలు సూచనలు, సలహాలు చేశారు. కేంద్ర ప్రభుత్వ మార్గదర్శకాల ప్రకారం పేరు మార్పు గానీ, సవరణ గానీ చేయాల్సి వస్తే... దానికి దళిత, గిరిజన స్పెషల్ డెవలప్‌మెంట్ ఫండ్‌గా పేరు పెట్టాలని ప్రభుత్వానికి సూచించారు. 
ఎస్సీ, ఎస్టీ సబ్‌ప్లాన్ చట్టానికి సవరణలు 
వచ్చే బడ్జెట్ సమావేశాల్లోనే ఎస్సీ, ఎస్టీ సబ్‌ప్లాన్ చట్టానికి సవరణలు చేపట్టాలని నిర్ణయించిన రాష్ర్ట ప్రభుత్వం.... రాష్ట్రంలోని దళిత, గిరిజన ప్రతినిధులతో కమిటీలు నియమించింది. ఎస్సీ, ఎస్టీ సబ్‌ప్లాన్‌లో సవరణలు చేసే బదులు ఏకంగా కొత్త చట్టం తీసుకొస్తే బాగుంటుందని అధికార పార్టీ నేతలు సమావేశంలో అభిప్రాయపడ్డారు. ప్రస్తుతం ఉన్న చట్టాన్ని కాదని... అనవసర మార్పులు తెచ్చినా.. ఎట్టి పరిస్థితుల్లోనూ సహించేలేదని స్పష్టం చేశారు కాంగ్రెస్‌ నేతలు.ప్రభుత్వ పథకాలకు సబ్‌ప్లాన్‌ నిధులను కేటాయించవద్దని సూచించారు. సంక్షేమ పథకాలను పర్యవేక్షించడం కోసం మాజీ సీఎస్‌ ప్రదీప్‌ చంద్ర నేతృత్వంలో ప్రత్యేక పర్యవేక్షణ కమిటీ వేయాలని కాంగ్రెస్‌ నేతలు సూచించారు. వచ్చే బడ్జెట్ సమావేశాలలోపు ఎస్సీ, ఎస్టీ సబ్‌ప్లాన్‌పై అఖిలపక్ష సమావేశాలు ఏర్పాటు చేసి, అన్ని పార్టీల అభిప్రాయాలు తీసుకోవాలని ప్రతిపక్షాలు సూచించాయి. 

 

Pages

Don't Miss

Subscribe to RSS - టీసర్కార్