టెన్ టీవీ

20:59 - January 19, 2018
20:39 - January 18, 2018

ఎట్టకేలకు పద్మావత్ సినిమా విడుదలకు అడ్డంకులు తొలగాయి. కొన్ని రాష్ట్రాలు సినిమా విధించిన నిషేధంపై సుప్రీం కోర్టు సీరియస్ గా స్పందించింది. మీ ఇష్టం వచ్చిన్నట్టు చేస్తే కుదరదని సుప్రీం స్పష్టం చేసింది. అయితే కర్ణిసేన మాత్రం టికెట్లు కొని అయిన సినిమా నిలుపుదల చేస్తామని ప్రకటించింది. 

20:17 - January 18, 2018

అత్యంత విశ్వనీస సమాచారం మనకు తెల్సిపోయింది.. కోదండరాం సారు కొత్త పార్టీ వెడ్తున్నడా..? లేదా..? ఏ గాయినెందుకు వెడ్తడు..? ఆయనకు రాజకీయమంటెనే ఇష్టంలేదని కొందరు.. ప్రశ్నించుడు కాడనే ఉంటడు సారు.. పరిపాలనదాక వోడు అని కొందరు.. ఇట్ల ఎవ్వలి మాట వాళ్లు మాట్లాడుకుంటున్నరు.. కని మనం జేఏసీల కీలకమైన నేతతోని మాట్లాడినం.. సారు పార్టీ వెడ్తున్నడా లేదా సూడుండ్రిగ..

అబ్బా ఎన్టీరామారావు సారు స్వర్గానికి వొయ్యి ఇర్వై రెండేండ్లైందిగని.. ఆయన ఆత్మకు శాంతి ఎట్లగల్గుతదని.. అటు నందమూరి ఫ్యామిలీ పరందామయ్యలు కనుక్కోలేకపోయిండ్రు.. ఆయన ప్రియమైన అల్లుడు చంద్రాలు గూడ తెల్సుకోలేకపోయిండ్రు.. కాబోయే కళల గవర్నర్.. గౌరవ శ్రీ మోత్కుపల్లి నర్సింహులు గారు మాత్రమే రామారావు ఆత్మకు శాంతి మార్గం గనిపెట్టిండు..

మనుండంగ మంచినీళ్లు వొయ్యనోళ్లు.. సావుకు మాత్రం ముందుగాళ్ల నిలవడ్డరట.. ఎన్టీరామారావు ముచ్చట్ల నందమూరి ఫ్యామిలీ డ్రామాలు జూస్తుంటె అట్లనే అనిపిస్తున్నది.. ఒకల్ని వట్టక ఒకలు ఎగవడి ఎగవడి పూలు జల్లి సమాధికి సన్మానాలు జేస్తున్నరు.. పాపం ఎన్టీరామారావు సారు ఎంత గోసెళ్ల వోశిండు.. ఆఖరికి గడియలళ్ల.. ఆయనను గోసవెట్టినోళ్లే ఇయ్యాళ ఆనందబాష్పాలు గార్చి.. బైటగూడ నటిస్తున్నరు..

అడుక్క తినెటోనికి హక్కులెందుకు చెప్పుండ్రి..? వానికి హక్కులు ఉంటేంది...? లేకుంటేంది..? వాని బత్కే అడుక్కతినుడాయే.. ఇంత పెద్ద మాట ఎందుకంటె..? చేతులు గాలినంక ఆకులు వట్కున్నట్టు.. సింగరేణి కార్మికులు ఇప్పుడు లొల్లికి దిగుతున్నరు.ఎన్నిలప్పుడు మాకిచ్చిన హామీలు నెరవేర్చుతాన్నముఖ్యమంత్రిగారు ఏమాయే అంటున్నరు.. ఈ సోయి ఎన్నికలప్పుడే ఉంటే ఎంత బాగుండే..?అనేది ముచ్చట..?
సకల జనుల సమగ్ర కుటుంబ సర్వేలెక్క.. సకల నేరస్తుల సర్వే జేపిస్తడట తెలంగాణ డీజీపీ మహేందర్ రెడ్డిగారు.. ఆ దొంగలకు జియో ట్యాగింగు వెట్టి.. వాళ్లు ఏడ తిర్గుతున్నరు..? ఏం జేస్తున్నరు..? అనేది ఎప్పటికప్పుడు తెల్సుకుంటరట.. తెల్సుకోవాల్సిందే నేరాల నివారణ కోసంగని.. మరి డీజీపీ గారు మేము గూడ కొన్ని సూచనలు జేస్తం పనికొస్తె పరిగణలోకి దీస్కోండ్రి..

ఏ ప్రభుత్వ అధికారన్న లంచం అడ్గితె చెప్పుతోని గొట్టుమని తెలంగాణ ముఖ్యమంత్రి జెప్పిండుగదా..? అది అమలైతున్నదో లేదో తెల్వదిగని.. నేను మాత్రం ఒక్క ముచ్చట జెప్తున్న..ఎవ్వడన్న మీడియా పేరు జెప్పి.. డబ్బులు అడ్గిండే అనుకో ఆడనే తోలు చెప్పుదీస్కోని కొట్టుండ్రి.. ఏంగాదు..? మీ అక్రమాలు బైటవెట్టొద్దంటే మాకు పైసలియ్యాలే అంటరా..? ఇదేనా జర్నలిజం అంటే..?

మొన్న మరదలిని ఇద్దరు బావలు గల్చి బొర్లిచ్చి కొట్టిండ్రు.. ఇయ్యాళ తిరుపతి దిక్కు సాటి మహిళ అని సూడకుంట.. పెయ్యిమీది బట్టలన్ని గుంజేశి.. నడి బాజట్ల గొట్టిండ్రంటే.. అయ్యో ఎంతైనా మన అసొంటి మహిళనే గదా... బరివాతల జేశి కొడ్తె ఇజ్జత్ మానం బోతదన్న శిగ్గుండొద్దా..? మన్సుల వాళ్లు పశువులా మీరే జెప్పాలె ఇగ..

యావత్ క్రికెట్ అభిమానులారా..? దక్షిణాఫ్రికాతోని కిర్ కెట్ మ్యాచ్ ఆడుతున్న ఇండియా పోరగాళ్ల ఆట సరిగలేదుగదా..? పొయ్యినోడు పొయ్యినట్టే ఔటైతున్నడు వస్తున్నడు.. ఇండియా ఇజ్జత్ కచ్రా జేశిండ్రు అని బాధపడ్తున్నరా..? ఇద్వర్ సంది ఇగ మీకు అసొంటి బాధలుండయ్.. నల్గురు ఆణిముత్యాలసొంటి క్రికెట్ ఆటగాళ్లు మన హైద్రావాద్ ఎల్బీస్టేడియంల కసరత్తు జేస్తున్నరు పాండ్రి పరిచయం జేస్త..

19:22 - January 18, 2018

గ్రహణం వస్తే వచ్చే అతిపెద్ద డిజస్టర్ ఎంటంటే గ్రహణానికి వారం రోజుల ముందు అయ్యాగార్లు టీవీ స్టూడియోలకు వచ్చి గ్రహణం ఏదో జరుగుతుందని చెప్పడమని ప్రముఖ హేతువాది బాబు గోగినేని అన్నారు. కొంత మంది స్వామిజీలు డబ్బులు సంపదించుకోవాడానికి గ్రహణాన్ని ఉపయోగించుకుంటారని ఆయన అన్నారు. పూర్తి వివరాలకు వీడియో క్లిక్ చేయండి.

16:12 - January 18, 2018

సిద్దిపేట : అతితక్కువ సమయంలో అత్యంత ప్రజాదారణ పొందిన చానల్‌ టెన్‌ టీవీ అన్నారు సీపీఎం సిద్దిపేట జిల్లా కార్యదర్శి ఆముదాల మల్లారెడ్డి. సిద్దిపేట జిల్లా కేంద్రం స్థానిక గాంధీ సెంటర్‌ వద్ద భవన నిర్మాణ కార్మికులు, సీపీఎం నాయకుల ఆధ్వర్యంలో.. ఆయన టెన్‌ టీవీ క్యాలెండర్‌ను ఆవిష్కరించారు. రాబోయే రోజుల్లో టెన్‌ టీవీ మరింత అభివృద్ధి చెంది ప్రజల పక్షాన నిలవాలని మల్లారెడ్డి కోరారు.

20:41 - January 17, 2018

నీ స్నేహితులెవరో తెలిస్తే నువ్వేంటో చెప్పొచ్చంటారు.. మరి మనదేశానికి స్నేహితులెవరు?మనం ప్రపంచానికి ఏ సంకేతాలిస్తున్నాం..? ఇరుగు పొరుగు దేశాలను దూరం చేసుకుని, ప్రపంచాన్ని గుప్పిట్లో పెట్టుకోవాలని భావించే దేశానికి దగ్గరయ్యే ఆరాటం.. ఆ అగ్రరాజ్యానికి పావులా మారిన ఓ కిరాయి గూండాలాంటి దేశంతో ఇప్పుడు కొత్త స్నేహం.. మరి ఈ స్నేహాలు ఏ లక్ష్యం కోసం? ఈ అడుగులు ఏ గమ్యం వైపు? ఈ కావలింతలకు అర్ధమేంటి?  చెప్పేవి శ్రీరంగ నీతులు చేసేది మరొకటి.. ప్రపంచానికి నీతులు చెప్పటమే తప్ప ఆచరణలో శూన్యం. ఇదీ అమెరికా తీరు. ఇక పెద్దన్న చెప్పినట్టు ఆడే ఇజ్రాయెల్...పాలస్తీనాను అణగదొక్కటంలో, నాశనం చేయటంలో ఆయుధంగా మారింది. కానీ, కొత్త కొత్త వ్యూహాలు తెరపైకి వస్తున్నాయి.. కొత్త కొత్త అడుగులు అర్ధంలేని గమ్యంవైపు కదులుతున్నాయి.. భారత ప్రభుత్వం అడుగులు కొత్త సంకేతాలిస్తున్నాయి.. మన పొరుగు దేశాలతో స్నేహం చేయటం తెలయదు.. కానీ, ఎక్కడో ఉన్న అమెరికా, ఇజ్రాయెల్ మాత్రం కావాలి.. పాక్, బంగ్లాదేశ్, శ్రీలంక, భూటాన్, చైనా ఇలా అన్నింటికి దూరమౌతూ, అమెరికాకు దాని మిత్ర దేశాలకు దగ్గరవటం ఏ లక్ష్యం కోసం..? ఏ భావజాలం దీనికి కారణం అని చెప్పాలి?

నరహంతక దేశం.. అణచివేతే మార్గంగా బతుకుతున్న దేశం.. పరాయి నేలను దోపిడీచేసి బతుకుతున్న దేశం.. అలాంటి దేశానికి భారత్ దగ్గరవటంపై అనేక విమర్శలు వినిపిస్తున్నాయి. మొత్తంగా ఇజ్రాయెల్ తో భారత్ సంబంధాలు పెంచుకునే తీరుపట్ల అనేక విమర్శలు వినిపిస్తున్నాయి. ఇది అంతిమంగా దేశానికి చేటు చేస్తుందనే అభిప్రాయాలు వ్యక్తమౌతున్నాయి. అసలు ఇజ్రాయిల్ చరిత్ర ఏమిటి?అసలు పాలస్తీనా సమస్య ఎందుకొచ్చింది? కారణం ఎవరు? పాలస్తీనియుల బతుకులు ఎందుకిలా మారాయి అన్నిటికీ జియోనిజమే కారణమా? ఆ భావజాలమే పాలస్తీనాను ధ్వంసం చేస్తోందా? జియోనిజం అంటే ఏంటి?
 

వాస్తవాలు కళ్లముందున్నాయి. ఎవరి తీరేమిటో స్పష్టంగా కనిపిస్తోంది.. ఎవరి పీడన ఏమిటో... ఎవరి కన్నీళ్ల వెనుక ఏ క్రౌర్యం దాగుందో క్రిస్టల్ క్లియర్ గా కనిపిస్తోంది. కానీ, ఏ ప్రయోజనాలకోసం ఈ కొత్త స్నేహాలు.. ఏ సైద్దాంతిక భూమికతో దోస్తీకోసం ఈ అడుగులు.. ?మన స్నేహాలే మనమేంటో చెప్తాయి. అది వ్యక్తికైనా, దేశానికైనా సరే. నూటికి నూరుపాళ్లూ నిజం. ఏ వాదాన్ని బలపరుస్తున్నాం... ఏ విధానాలను సమర్ధిస్తున్నాం .. అనే అంశంపైనే ఇదంతా ఆధారపడి ఉంది. ఇప్పుడు అలీనవిధానానికి, ప్రజాస్వామ్యయుత సంబంధాలకు, అణచివేతకు గురవుతున్న దేశాలకు మద్ధతు ఇచ్చే పరిస్థితి దూరంగా భారత్ జరగటం దేశ భవితపై ప్రభావం చేపే అవకాశాలు బలంగా ఉన్నాయి. పూర్తి వివరాలకువ వీడియో క్లిక్ చేయండి.

 

 

20:35 - January 17, 2018

తెలంగాణల పుట్టుడే పాపమైందా ఎట్ల నీ అరెస్టులు పాడుగాను.. మీ చేతులకు జెట్టలు వుట్ట.. అరే అడ్గితె అరెస్టులా..? ప్రజలకు అడ్గే హక్కుగూడ లేదా ఎట్ల..? అద్దంకి దయాకర్ అరెస్టు.. ఓయూ విద్యార్థులు అరెస్టు.. మందక్రిష్ణ మాదిగ అరెస్టు.. వంటేరు ప్రతాపరెడ్డి అరెస్టు.. ఇట్ల ఎంతమందిని అరెస్టు జేస్తరు ముఖ్యమంత్రిగారూ..? ఇది ప్రజాస్వామ్యమా..? రాచరికమా ?

జిగ్నేష్ మేవానీ.. గుజరాత్ రాష్ట్రంల మొన్న అయ్యిన ఎన్నికలళ్ల.. నరేంద్రమోడీనీ.. బీజేపీని చుచ్చువోపిచ్చినంత పనిజేశిన దళిత బహుజన బిడ్డ.. ఇండిపెండెంట్గ పోటీ జేశి అఖండ విజయాన్ని అందుకున్న మేవానీ.. హైద్రావాద్ చంచల్ గూడ జైలుకొచ్చిండు.. ప్రశ్నించినందుకు అరెస్టుకు గురైన మందక్రిష్ణ మాదిగను పరామర్శించిండు..

పంచాయతీ రాజ్ చట్టం సవరణ.. తెలంగాణ మొత్తం కుతకుత ఉడ్కుతున్న ముచ్చట ఇది.. తెలంగాణ ప్రభుత్వం వచ్చెనెలల ఈ చట్టాన్ని సవరించే బిల్లును అసెంబ్లీల వెట్టి.. అదే నెలల సర్పంజి ఎలచ్చన్లకు వోవాలె అనేది ఇగురం.. ఈ చట్టం అమలైతె తెలంగాణల ఏం మార్పురావోతున్నది..? దీనితోని ఏ పార్టీకి లాభం..? నష్టపోయేది ఎవ్వలు..? పాండ్రి సూద్దాం..

మందిని ముంచెతందుకు పోలీసు అవుతారం ఒక్కటే బెటరనుకున్నడో ఏమో.. ఒకడు ఉన్నతాధికారి ఏశంగట్టి.. నిజమైన పోలీసోళ్లతాననే పైకం వసూలు జేశిండు.. అచ్చం నిజమైన పోలీసు బాసులు కింది స్థాయి సిబ్బందిని ఎట్ల ఏడిపిస్తుంటరో.. అట్లనే ఏడిపిచ్చిండు.. కాకపోతె క్యారెక్టర్ల మున్గిపోయి కాకీలు ఎంటవడ్తున్న సంగతి మర్శిపోయిండు..

మొత్తం మీద హైద్రావాదుల పోలీసోళ్లు ఓడిపోయిండ్రు.. దొంగలు గెల్చిండ్రు.. ఒక్కటి గాదు రెండు గాదు.. సంకురాత్రి పర్వదినం పేరుమీద ఇర్వై ఐదిండ్లు లూటి వొయ్యినయ్.. తాళాలేశి ఊర్లకు వొయ్యిన జనం ఇండ్లను.. దొంగలు దత్తతకు దీస్కోని.. ఆలనా పాలన జూస్కున్నరు.. ఇగ మన ఫ్రెండ్లీ పోలీసోళ్లంటరా..? ఎంతెంత వొయ్యింది సొమ్ము అని లెక్కలు రాస్కునెతందుకు దప్పితె దేనికి పన్కొస్తరు..?

ఈ దొంగలళ్ల గూడ తెల్వితక్వ సన్నాసులుంటరు.. అరే చేస్తె ఎట్ల జేయాలే..? రాజకీయ నాయకులు కోట్ల కుంభకోణాలు జేశి జనం సొమ్ము ఎట్ల కొల్లగొడ్తరు.. ఉంటే గట్లుండాలే.. ఈ తులం మాసం ఎత్కపోతె ఏం మిగుల్తదిరా వారీ.. కూలిపైకం బడది.. మీదికెళ్లి దొంగతనం జేశి ప్రజలకు దొర్కితె ఎట్లుంటది..? సూడుండ్రిగో ఇట్లుంటది..

వాళ్ల కాలినిగాదు.. వాళ్లకు సంబంధం లేదు.. ఎక్కడెక్కడి సోడిగాళ్లంతొచ్చి.. ఒక గల్లిల గొట్టుకుంటా ఉన్నరు.. కాలినోళ్లకు ఏమైతున్నదో తెల్వది.. అప్పటికి రెండు గ్యాంగులు దిమ్మడ దమ్మడ గుద్దుకుంటున్నయ్.. రౌడీ షీటర్లు గూడ ఎంటరైపోయిండ్రట.. ఏదే నాయిని నర్సన్నా హైద్రావాదుల శాంతి భద్రతల పావురం ఏడెగురుతున్నట్టు..?

 

20:14 - January 17, 2018

పెట్రో ధరలు భగ్గుమంటున్నాయి. చాపకింద నీరులా వినియోగదారుల జేబుకు చిల్లిపెడుతున్నాయి. పెట్రోల్‌, డీజిల్‌ ధరలపై నియంత్రణ ఎత్తివేసి.. రోజువారిగా మార్చు విధానం అమలు చేసినప్పటి నుండి ధరలు పెరుగుతూనే ఉన్నాయి. పెట్రో ధరలు దేశంలో భగ్గుమంటున్నాయి. బండి బయటికి తీద్దామంటే భయపడే పరిస్థితి నెలకొంది. అంతర్జాతీయ మార్కెట్లో క్రూడ్‌ ఆయిల్‌ ధరలు తగ్గిన సమయంలో కూడా ... దేశీయంగా పెరుగుతూనే ఉన్నాయి. రాష్ట్రాలు ఇష్టం వచ్చినట్లుగా పన్నులు వేస్తూ పోవడంతో ధరలు అమాతం పెరిగిపోతున్నాయి. తెలంగాణ, ఆంధ్రప్రదేశ్‌ రాష్ట్రాల్లో పరిస్థితి మరీ దారుణంగా ఉంది. డీజిల్‌ ధర అయితే దేశంలోనే అత్యధికంగా ఉండడం గమనార్హం.

గతంలో ప్రతి 15 రోజులకోసారి
చమురు సంస్థలు గతంలో ప్రతి 15 రోజులకోసారి పెట్రోల్, డీజిల్‌ల ధరలను సవరించేవి. అలా చేసినప్పుడు ఒక్కోసారి రెండు మూడు రూపాయల వరకు పెంపు ఉండేది. దాంతో ప్రజల్లో వ్యతిరేకత వ్యక్తమయ్యేది. దీంతో ప్రభుత్వం గతేడాది జూన్‌ 16 నుంచి రోజువారీ ధరల సవరణ విధానాన్ని తెరపైకి తెచ్చింది. నామమాత్రంగా తొలి 15 రోజుల పాటు ధరలు తగ్గించగా... ఆ తర్వాతి నుంచి మెల్లమెల్లగా మోత మొదలైంది. హైదరాబాద్‌లో గతేడాది జూలై 16న రూ.67.11గా ఉన్న లీటర్‌ పెట్రోల్‌ ధర ప్రస్తుతం రూ.75.47కు.. డీజిల్‌ ధర రూ.60.67 నుంచి రూ.67.23కు చేరింది. ప్రస్తుతం ఆంధ్రప్రదేశ్‌లోని విజయవాడలో లీటర్‌ పెట్రోల్‌ ధర రూ.76.92కు, డీజిల్‌ ధర రూ.68.79కు చేరాయి. రెండేళ్ల క్రితం క్రూడ్‌ ఆయిల్‌ ధరలు భారీగా తగ్గినప్పడు.. ధరలను తగ్గించకుండా ప్రభుత్వాలు సొమ్ముచేసుకున్నాయి. గతేడాది నుండి రోజువారీ ధరల సవరణ విధానాన్ని తీసుకొచ్చారు. అప్పటి నుండి పది పన్నెండు పైసలు పెంచడం, నాలుగైదు పైసలు తగ్గించడం చేస్తూ.. మొత్తంగా పెట్రోల్, డీజిల్‌ల ధరలు బాగా పెంచేశారు.

లీటర్‌ పెట్రోల్‌పై ఇరవై ఒక్క రూపాయల నలభై ఎనిమిదిపైసలు.
ప్రస్తుతం కేంద్ర ప్రభుత్వం ఎక్సైజ్‌ డ్యూటీ కింద ఒక్కో లీటర్‌ పెట్రోల్‌పై ఇరవై ఒక్క రూపాయల నలభై ఎనిమిదిపైసలు.. డీజిల్‌పై పదిహేడు రూపాయల ముప్పైమూడు పైసలు వసూలు చేస్తోంది. ఈ పన్ను తర్వాతి మొత్తం ధరపై రాష్ట్ర ప్రభుత్వాలు వ్యాట్‌ పన్ను మోత మోగిస్తున్నాయి. మొత్తంగా కేంద్ర, రాష్ట్ర ప్రభుత్వాల పన్నులు కలిపి పెట్రోల్‌పై 57 శాతం, డీజిల్‌పై 44 శాతం భారం పడుతున్నట్లు తెలుస్తోంది. పెట్రోల్‌ ఉత్పత్తుల అమ్మకాలపై వ్యాట్, అదనపు సుంకాల విధింపులో తెలుగు రాష్ట్రాలు దేశంలోనే రెండో స్థానంలో ఉన్నాయి. మహారాష్ట్ర పెట్రోల్‌పై 26 శాతం వ్యాట్‌తో పాటు ప్రతి లీటర్‌పై రూ.9 చొప్పున అదనపు సుంకం వసూలు చేస్తోంది. ఇక ఆంధ్రప్రదేశ్‌లో పెట్రోల్‌పై 31 శాతం వ్యాట్‌కు తోడు ప్రతి లీటర్‌పై రూ.4 అదనపు సుంకం వసూలు చేస్తున్నారు. దీంతో పన్ను 38.82 శాతానికి చేరింది. డీజిల్‌పై 22.25 శాతం పన్ను, ప్రతి లీటర్‌పై రూ.4 సుంకంతో పన్నుశాతం 30.71కి చేరింది. తెలంగాణలో పెట్రోల్‌పై 35.20 శాతం, డీజిల్‌పై 27 శాతం పన్ను వసూలు చేస్తున్నారు. ఢిల్లీలో పెట్రోల్‌పై పన్ను 27 శాతం ఉండగా.. గోవాలో అతి తక్కువగా 17 శాతం మాత్రమే ఉన్నాయి.

క్రూడాయిల్‌ ఉత్పత్తిని తగ్గించాలని నిర్ణయం
అంతర్జాతీయంగా నెలకొన్న పరిస్థితులు.. చమురు ఉత్పత్తి దేశాలు క్రూడాయిల్‌ ఉత్పత్తిని తగ్గించాలని నిర్ణయం తీసుకోవడం నేపథ్యంలో.. ధరలు ఎగసిపడుతున్నాయి. ప్రస్తుతం మార్కెట్‌లో ఇండియన్‌ క్రూడ్‌ బ్యారెల్‌ ధర రూ.4,085గా ఉంది. ప్రస్తుతమున్న ధరల్లో దాదాపు సగం మాత్రమే అసలు ధరలుగా ఉండగా.. మిగతాదంతా పన్నుల భారమే. దేశవ్యాప్తంగా జీఎస్టీ అమల్లోకి వచ్చినా.. పెట్రోలియం ఉత్పత్తులను మాత్రం అందులో చేర్చలేదు. పెట్రోల్‌ ఉత్పత్తులతో భారీగా ఆదాయం వస్తుండడంతో జీఎస్టీ పరిధిలోకి తీసుకురావడంపై రాష్ట్రాలు వ్యతిరేకత వ్యక్తం చేస్తున్నాయి. అదే జీఎస్టీ పరిధిలోకి పెట్రో ఉత్పత్తులను తీసుకువస్తే ద్వంద్వ పన్నుల భారం తగ్గి ధరలు తగ్గే అవకాశాలు ఉన్నాయని విశ్లేషకులు చెబుతున్నారు.

 

19:18 - January 17, 2018

అంతర్జాతీయంగా పెట్రో ధరలు తగ్గుతున్నప్పుడు రోజువారి ధరల పాలసీ తీసుకురాకుండా ఇప్పుడు పెట్రో ధరలు పెరుగుతున్నప్పుడు ఈ పాలసీని తీసుకొచ్చారని, కేంద్ర రాష్ట్రాల ప్రభుత్వాలు పెట్రోలుపై విపరీతంగా పన్నులు విధిస్తున్నారని ఆర్థిక నిపుణులు శశికుమార్ అన్నారు. పెట్రోలు వ్యాట్ తెలుగురాష్ట్రాల్లో ఎక్కువగా ఉందని, అందరు మానసికంగా ధరలపై నిర్ణయానికి వచ్చారని బీజేపీ నేత శ్రీధర్ రెడ్డి అన్నారు. కేంద్రంలోని బీజేపీ ప్రభుత్వ నినాదం అచ్చే దిన్ కానీ వాస్తవానికి ప్రజలు సచ్చే దిన్ అనుకుంటున్నారని, యూపీఏ ప్రభుత్వం ఉన్నప్పుడు బ్యారల్ ధర 142 డాలర్లు ఉంటే అప్పుడు ఇండియాలో లీటర్ పెట్రోలు రూ.60 నుంచి రూ.70 ఉందని కాంగ్రెస్ నేత తులసి రెడ్డి అన్నారు. పూర్తి వివరాలకు వీడియో క్లిక్ చేయండి.

15:59 - January 17, 2018

మెదక్ : జిల్లా నర్సాపూర్‌లో బీవీఆర్‌ఐటీ కళాశాల ప్రిన్సిపల్‌ కృష్ణారెడ్డి టెన్‌టీవీ క్యాలెండర్‌ను ఆవిష్కరించారు. ప్రతినిత్యం ప్రజల పక్షం వహిస్తూ... టెన్‌టీవీ ఎనలేని సేవలందిస్తోందని ఆయన అన్నారు. ప్రజలను చైతన్యవంతం చేసే వార్తలు అందించడంలోనూ ముందుంటోందని కొనియాడారు. ఈ కార్యక్రమంలో డీజీఎం కాంతారావు, డీన్‌ లక్ష్మీనరసయ్య, అశోక్‌రెడ్డి తదితరులు పాల్గొన్నారు. 

Pages

Don't Miss

Subscribe to RSS - టెన్ టీవీ