ఢిల్లీ

15:22 - June 23, 2018

ఢిల్లీ : కాంగ్రెస్‌ వార్‌రూంలో కీలక సమావేశం ప్రారంభమైంది. ఈ సమావేశానికి టీపీసీసీ అధ్యక్షుడు ఉత్తమ్‌కుమార్‌రెడ్డి, ఇన్‌ఛార్జ్‌ కుంతియా, అశోక్‌ గెహ్లాట్‌తో పాటు నూతనంగా నియమితులైన ముగ్గురు ఏఐసీసీ కార్యదర్శులు ఈ సమావేశానికి హాజరయ్యారు. టీపీసీసీలో మార్పులు, నేతల రాజీనామాలు, ఉత్తమ్‌కుమార్‌రెడ్డిపై వచ్చిన ఆరోపణలు తదితర అంశాలపై చర్చించనున్నారు.

 

21:10 - June 19, 2018

జమ్మూకశ్మీర్‌: రాష్ట్రంలో బీజేపీ రాజకీయంగా వైఫల్యం చెందిందని సీపీఎం ఆరోపించింది. ప్రభుత్వం నుంచి బీజేపీ వైదొలగడం వల్ల జమ్మూ కశ్మీర్‌లో రాజకీయ సంక్షోభం ఏర్పడిందని అభిప్రాయపడింది. ఏ అంశంలోనూ ఒకరికొకరు పొసగని రెండు విరుద్ద భావాలున్న పార్టీలు అవకాశవాదం కోసం ఒకటై పరిపాలనను బ్రష్టు పట్టించారని సీపీఎం మండిపడింది. ఇంతకాలం జమ్మూ కశ్మీర్‌లో ప్రభుత్వం తీసుకున్న నిర్ణయాలకు బిజెపి భాగస్వామిగా ఉందని.. భవిష్యత్తులో కశ్మీర్‌లో జరిగే పరిణామాలకు బీజేపీ బాధ్యత వహించాలిని డిమాండ్‌ చేసింది. కాల్పుల విరమణ నిర్ణయాన్ని ప్రారంభించడం ఉపసంహరించుకోవడం రెండూ బీజేపీ ఏకపక్ష నిర్ణయాలేనని సీపీఎం అభిప్రాయపడింది. జమ్మూ కశ్మీర్‌ను మరింత అస్థిరతలోకి నెట్టేసి రాష్ట్రపతి పాలన విధించడం అక్కడి ప్రజలను ఇబ్బంది పెట్టడమేనని సీపీఎం పొలిట్‌బ్యూరో అభిప్రాయపడింది.

12:28 - June 19, 2018

ఢిల్లీ : ఫిఫా ప్రపంచకప్‌ 'గ్రూప్‌ ఎఫ్'‌ మ్యాచ్‌లో  స్వీడన్‌ బోణీకొట్టింది.  దక్షిణ కొరియాపై  1-0 తేడాతో స్వీడిష్‌ జట్టు విజయం సాధించింది. మ్యాచ్‌ 65వ నిమిషంలో స్వీడన్‌కు పెనాల్టీ లభించింది. దీనిని స్వీడన్‌ డిఫెండర్‌ ఆండ్రియాస్‌ గ్రాన్‌క్విస్ట్‌ గోల్‌గా మలిచాడు. దీంతో స్వీడన్‌కు 1-0 ఆధిక్యం లభించింది. మ్యాచ్‌ చివరి వరకు స్వీడన్‌ తన ఆధిక్యాన్ని నిలబెట్టుకొంది. 2002లో నైజీరియాతో జరిగిన మ్యాచ్‌ తర్వాత ప్రపంచ కప్‌లో స్వీడన్‌ గోల్‌ కొట్టిన తొలి పెనాల్టీ ఇదే కావడం గమనార్హం. ఈ మ్యాచ్‌కు మరో విశేషం కూడా ఉంది. 1958లో జరిగిన ప్రపంచకప్‌లో స్వీడన్‌ ఆడిన తొలిమ్యాచ్‌లో మెక్సికోపై 3-0తేడాతో గెలిచింది. ఆ తర్వాత జరిగిన ప్రపంచకప్‌ తొలి మ్యాచ్‌ల్లో స్వీడన్‌ నెగ్గలేదు. తాజాగా తొలిమ్యాచ్‌లోనే స్వీడన్‌ జట్టు విక్టరీ కొట్టడంతో అభిమానుల సంబరాలు మిన్నంటాయి.  

 

11:30 - June 19, 2018

ఢిల్లీ : చాలా దేశాలను సాకర్‌ ఫీవర్‌ కుదిపేస్తోంది. సాకర్‌ ఫీవర్‌ కేవలం మైదానంలోనే కాదు... బయట కూడా కొనసాగుతోంది. విదేశంలో రోడ్డు పక్కన ఓ అభిమాని చేస్తున్న ఫుట్‌బాల్‌ విన్యాసాలు చూపరులను కట్టిపడేస్తున్నాయి. దానికి సంబంధించిన వీడియో ఇప్పుడు వైరల్‌గా మారింది. బంతిని చేతితో తాకకుండా శరీరంపై అవలీలగా ఆడిస్తూనే ఔరా అనిపిస్తున్నాడు. 

 

11:29 - June 19, 2018

ఢిల్లీ : పెరిగిన డీజిల్‌ ధరలకు నిరసనగా దేశవ్యాప్తంగా ట్రక్కు యజమానులు, ఆపరేటర్లు నిరవధిక సమ్మె చేపట్టారు. దీంతో  90లక్షల ట్రక్కుల రాకపోకలు నిలిచిపోయాయి. ధరలు తగ్గించే వరకు సమ్మె కొనసాగిస్తామని ట్రక్కు అసోసియేషన్‌ స్పష్టం చేసింది.
దేశ వ్యాప్తంగా నిలిచిపోయిన 90 లక్షల ట్రక్కుల రాకపోకలు 
కేంద్ర ప్రభుత్వం డీజిల్‌ ధరలను పెంచటాన్ని నిరసిస్తూ ట్రక్కు యజమానులు సమ్మెకు దిగారు. దీంతో దేశవ్యాప్తంగా  90 లక్షల ట్రక్కుల రాకపోకలు నిలిచిపోయాయి. అంతర్జాతీయంగా డీజిల్‌ ధరలు తగ్గుతున్నా... కేంద్రప్రభుత్వం డీజిల్‌పై అదనపు టాక్సులు వేస్తూ.. భారం మోపుతుండంతో సమ్మెకు దిగామని ఆల్‌ ఇండియా కాన్ఫడరేషన్‌ ఆఫ్‌ గూడ్స్‌ వెహికల్‌ ఓనర్స్‌ అసోసియేషన్‌  ప్రకటించింది. పెంచిన డీజిల్‌ ధరలు తగ్గించే వరకు సమ్మెను కొనసాగిస్తామని స్పష్టం చేసింది.
ప్రభుత్వాలు విధిస్తున్న పన్నుల వల్లే డీజిల్‌ ధరలు పెరిగాయి: అసోసియేషన్‌ 
కేంద్రం, రాష్ట్ర ప్రభుత్వాలు విధిస్తున్న అత్యధిక పన్నుల వల్లే చమురు ధరలు పెరుగుతున్నాయని అసోసియేషన్‌ ఆరోపించింది. లీటర్ డీజిల్‌పై 8 రూపాయల సెస్సు.. కిలో మీటర్‌కు 8 రూపాయల టోల్‌ టాక్స్ సహా అదనపు టాక్సులు వసూలు చేస్తున్నాయని అసోసియేషన్‌ సభ్యులు అన్నారు. డీజిల్ ధరలు, టాక్స్‌లతో రోజుకు మూడు కోట్ల నష్టం వాటిల్లుతుందని తెలిపారు. 2013లో 53 రూపాయలు ఉన్న డీజిల్‌ ధర ప్రస్తుతం 74 రూపాయలకు చేరిందని ఆవేదన వ్యక్తం చేశారు. అంతర్జాతీయ మార్కెట్‌లో బ్యారెల్ ధర తగ్గినా కేంద్ర ప్రభుత్వం అదనపు టాక్సులతో భారాలు మోపుతున్నందునే ఆందోళన చేపట్టామని అసోసియేషన్ సభ్యులు అన్నారు. డీజిల్‌, పెట్రోల్‌ ఉత్పత్తులను జీఎస్‌టీ పరిధిలోకి తీసుకురావాలని ట్రక్కు ఆపరేటర్లు డిమాండ్ చేస్తున్నారు. 
థర్డ్‌ పార్టీ బీమా ప్రీమియం సంప్రదాయాన్ని మార్చాలి: అసోసియేషన్‌ 
ఇక థర్డ్‌ పార్టీ బీమా ప్రీమియంను కూడా ఏటా పెంచే సంప్రదాయాన్ని మార్చాలని అసోసియేషన్‌ సభ్యులు డిమాండ్‌ చేశారు. తమ డిమాండ్లను నెరవేర్చేదాకా సమ్మె ఆపబోమని స్పష్టం చేశారు. అత్యవసర వస్తువుల తరలింపునకు ఆటంకం కలగకుండా సమ్మె చేస్తున్నామని అసోసియేషన్ సభ్యులు తెలిపారు.

 

11:25 - June 19, 2018

ఢిల్లీ : ఢిల్లీ లెఫ్ట్‌నెంట్‌ గవర్నర్‌ కార్యాలయంలో ముఖ్యమంత్రి కేజ్రీవాల్‌ ధర్నా 8వ రోజుకు చేరింది. గత 6 రోజులుగా నిరాహార దీక్ష చేస్తున్న ఇద్దరు మంత్రులు మనీష్‌ సిసోడియా, సత్యేంద్ర జైన్‌ల ఆరోగ్యం క్షీణించడంతో వారిని ఆసుపత్రికి తరలించారు.  ఎల్జీ ఆఫీసులో ధర్నా ఎలా చేస్తారని ఢిల్లీ హైకోర్టు ఆప్‌ సర్కార్‌ను ప్రశ్నించింది. కేజ్రీవాల్‌ ఆందోళనకు శివసేన కూడా మద్దతు తెలిపింది.

ఢిల్లీ లెఫ్ట్‌నెంట్‌ గవర్నర్‌ కార్యాలయంలో ముఖ్యమంత్రి కేజ్రీవాల్‌ బైఠాయింపు కొనసాగుతోంది. గత 6 రోజులుగా నిరాహార దీక్ష చేస్తున్న ఉపముఖ్యమంత్రి మనీష్‌ సిసోడియా ఆరోగ్యం క్షీణించింది. కెటోన్‌ స్థాయి 7.4కి పడిపోవడంతో ఆయనను ఎల్‌ఎన్‌జెపి ఆసుపత్రికి తరలించారు. అంతకు ముందు మంత్రి సత్యేంద్ర జైన్‌ ఆరోగ్యం కూడా క్షీణించడంతో ఆయనను కూడా ఆసుపత్రికి తరలించారు. ప్రస్తుతం కేజ్రీవాల్‌, మరో మంత్రి గోపాల్‌ రాయ్‌ ధర్నా కొనసాగిస్తున్నారు.

ఎల్జీ కార్యాలయంలో  కేజ్రీవాల్‌, మంత్రులు ఆందోళన విరమించాలని కోరుతూ బిజెపి ఎమ్మెల్యే విజేందర్‌ గుప్తా వేసిన పిటిషన్‌పై హైకోర్టు విచారణ జరిపింది. ధర్నా చేయడానికి ముందు ఎల్జీ అనుమతి ఎందుకు తీసుకోలేదని కోర్టు కేజ్రీవాల్‌ను ప్రశ్నించింది. ఒకరి ఇంట్లో లేదా...కార్యాలయంలోకి వెళ్లి  ధర్నా చేయడాన్ని కోర్టు తప్పుపట్టింది.  ధర్నా చేయాలన్న నిర్ణయం వ్యక్తిగతమైనదా...లేక మంత్రిమండలి అనుమతితోనే ఆందోళనకు దిగారా...అంటూ నిలదీసింది. 

ఢిల్లీలో ప్రజాస్వామ్యం హత్యకు గురవుతోందని ఆప్‌ తీవ్ర వ్యాఖ్యలు చేసింది. తమ ఆందోళనను ప్రజల మధ్యకు తీసుకెళ్తామని ఆప్‌ ఎంపి సంజయ్‌సింగ్‌ స్పష్టం చేశారు. తాము ఎందుకు ధర్నా చేయాల్సి వచ్చిందో కోర్టుకు వివరణ ఇస్తామని చెప్పారు.

కేజ్రీవాల్ చేపట్టిన బైఠాయింపు దీక్షకు పార్టీల మద్దతు పెరుగుతోంది. ఇప్పటికే నలుగురు ముఖ్యమంత్రులు చంద్రబాబు, మమతా బెనర్జీ, పినరయి విజయన్, కుమారస్వామి మద్దతు ప్రకటించారు. ఆదివారం నాడు జరిగిన మార్చ్‌లో సిపిఎం జాతీయ ప్రధాన కార్యదర్శి సీతారాం ఏచూరి కూడా పాల్గొన్నారు. తాజాగా కేజ్రీవాల్‌ నిర్ణయాన్ని బిజెపి మిత్రపక్షం శివసేన కూడా సమర్థించింది. ప్రజలు ఎన్నుకున్న ప్రభుత్వానికి వారి కోసం పనిచేసే హక్కు ఉంటుందని శివసేన ఎంపి సంజయ్‌రౌత్ స్పష్టం చేశారు.

ఢిల్లీలో జరుగుతున్న ధర్నా రాజకీయాలపై కాంగ్రెస్‌ అధ్యక్షుడు రాహుల్‌ గాంధీ మండిపడ్డారు. ఢిల్లీ సిఎంతో పాటు బిజెపి, ప్రధాని మోదియే ఇందుకు బాధ్యులని పేర్కొన్నారు. ఎల్జీ ఆఫీసులో కేజ్రీవాల్‌ ధర్నా చేస్తారు... సిఎం ఇంటివద్ద బిజెపి ధర్నా చేస్తోంది...ఐఏఎస్ అధికారులు ప్రెస్‌ కాన్ఫరెన్స్‌ పెడతారు.. ఈ డ్రామా ఏంటి? అంటూ రాహుల్‌ ట్వీట్‌ చేశారు. ఈ అరాచకత్వాన్ని ప్రధాని మోది పట్టించుకోవడం లేదని విమర్శించారు. ఎల్జీ అనిల్‌ బైజల్‌ కార్యాలయంలో కేజ్రీవాల్‌ ధర్నా 8వ రోజుకు చేరింది. ఐఏఎస్‌ అధికారులు అప్రకటిత సమ్మెకు ముగింపు చెప్పేలా ఎల్జీ ఆదేశించాలని ఆప్ డిమాండ్‌ చేస్తోంది.  

11:23 - June 19, 2018

ఢిల్లీ : ఐసీఐసీఐ బ్యాంక్‌ సీఈవో చందాకొచ్చర్‌ దీర్ఘ కాలిక సెలవుపై వెళ్ళనున్నారు. ఐసీఐసీఐ బ్యాంక్‌- వీడియోకన్‌ కేసు దర్యాప్తు పూర్తి అయ్యేవరకూ ఆమెను సెలవుమీద పంపించాలని బోర్డ్‌నిర్ణయించింది. ఆమె స్థానంలో నూతన సీఒఒగా సందీప్‌భక్షి బాధ్యతలు స్వీకరించనున్నారు. ఇవాళనుంచే ఆయన నియామకం అమల్లోకి రానుంది. భక్షి ప్రస్తుతం ఐసీఐసీఐ జీవిత బీమా విభాగం హెడ్‌గా పనిచేస్తున్నారు. చందాకొచ్చర్‌ సెలవులో ఉన్నంతవరకూ ఆయన బ్యాంక్‌ బోర్డుకు రిపోర్ట్‌ చేయాల్సి ఉంటుంది. ఐసీఐసీఐ బ్యాంక్‌ కార్పొరేట్‌ కేంద్రంలోని పనులతోపాటు వ్యాపారాలను ఆయన పర్యవేక్షిస్తారు. బ్యాంక్‌ ఎగ్జిక్యూటివ్‌ డైరెక్టర్లు,, ఎగ్జిక్యూటివ్‌ మేనేజర్లు ఆయనకు రిపోర్టు చేయాలని బ్యాంక్‌ విడుదల చేసిన ప్రకటనలో పేర్కొనింది. 

 

11:15 - June 19, 2018

ఢిల్లీ : మొన్న రాష్ట్రపతి, నిన్న ఉపరాష్ట్రపతి, నేడు రాజ్యసభ ఉపసభాపతి.. ఎన్నికలు ఏవైనా కేంద్రం మెడలు వంచేందకు విపక్షాలు ఏకమౌతున్నాయి. రాబోయే ఎన్నికలకు అన్నివిధాలుగా సిద్ధమవుతూ..  ఏ అవకాశాన్ని కూడా వదలకుండా తమ తమ వ్యుహాలు రచిస్తున్నాయి. జరగబోయే రాజ్యసభ ఉపసభాపతి ఎన్నికల నేపథ్యంలో హస్తినలో రాజకీయ సమీకరణాలు వేగంగా మారుతున్నాయి.
కర్ణాటక ఎన్నికల ఫలితాలు.. కొత్త రాజకీయ సమీకరణాలు
కర్ణాటక ఎన్నికల ఫలితాల తరువాత కొత్త రాజకీయ సమీకరణాలు తెరలేస్తున్నాయి. ముఖ్యంగా ప్రాంతీయ పార్టీలన్నీ తమ సొంత ఎజెండాలను పక్కనబెట్టి జాతీయస్థాయిలో కేంద్రాన్ని ఢీ కొట్టడానికి సిధ్దమౌతున్నాయి. ఈ నేపథ్యంలో ఢిల్లీలో రాజకీయ సమీకరణాలు చాలా వేగంగా మారుతున్నాయి. ప్రాంతీయ పార్టీలన్నీ బీజేపీ, కాంగ్రెస్‌లకు  దూరంగా ఫెడరల్‌ ఫ్రంట్‌ ఏర్పాటు చేసే దిశగా ఏకమయ్యాయి. ఇందులో భాగంగానే ఆదివారం సాయంత్రం నీతిఆయోగ్‌ సమావేశం తరువాత ఫెడరల్‌ ఫ్రంట్‌ ఏర్పాటుకు మొదటి అడుగుగా డిప్యూటీ ఛైర్మన్‌ ఎన్నిక అంశాన్ని తీసుకున్నాయి.
ఓటింగ్‌లో పాల్గొనున్న రాజ్యసభ సభ్యులు  
రాజ్యసభ ఉపసభాపతి ఎన్నికల క్రమంలో.. రాజ్యసభ సభ్యులంతా ఓటింగ్‌లో పాల్గొంటారు. 245 మంది సభ్యుల్లో డిప్యూటీ ఛైర్మన్‌ పదవి చేజిక్కించుకోవాలంటే.. 122 మంది సభ్యుల బలం ఉండాలి...  ప్రస్తుతం రాజ్యసభలో అన్నాడీఎంకే 14 సభ్యులు, బీజేపీ 69 సభ్యులు కలిపి ఎన్డీయేకు 106 బలం ఉంది, అయితే ఎన్డీయే నుంచి బయటికి వచ్చిన ఆరుగురు టీడీపీ సభ్యులతో కలిసి ప్రతిపక్షాల సంఖ్యాబలం 117గా ఉంది. మరోవైపు ఒడిశా, తెలంగాణ రాష్ట్రాల్లో ఉన్న పత్యేక పరిస్థితుల దృష్ట్యా... కాంగ్రెస్‌తో దూరంగా ఉంటున్న బీజేడీ, టీఆర్‌ఎస్‌ ఎటువైపు మొగ్గుచూపుతారన్న దానిపై సర్వత్రా ఉత్కంఠ నెలకొంది. ఉపసభాపతి ఎన్నికల్లో మ్యాజిక్‌ ఫిగర్‌ 122కి అవసరమైన బలం తమకు లేకపోవడంతో బీజేడీ, టీఆర్‌ఎస్‌లను తమవైపు తిప్పుకోవడానికి అధికార పార్టీ ప్రయత్నిస్తోంది. ప్రస్తుతం రాజ్యసభలో 9 మంది సభ్యులు బీజేడీకి, 6 గురు సభ్యులు టీఆర్‌ఎస్‌కు ఉన్న పరిస్థితుల్లో వీరి నిర్ణయం రాజ్యసభ డిప్యూటీ ఛైర్మన్‌ పదవికి కీలకంగా మారింది.  
బీజేపీకి సవాలుగా మారిన రాజ్యసభ ఉపసభాపతి ఎన్నికలు  
ఇప్పటికే కర్ణాటక ఎన్నికల్లో ఓటమితో డీలాపడ్డ బీజేపీకి.. మూడు రాష్ట్రాల ఎన్నికల ముందు వస్తున్న రాజ్యసభ ఉపసభాపతి ఎన్నికలు సవాలుగా మారాయి. ఇదే సమయంలో అధికార, ప్రతిపక్షాల గొడవల మధ్య తటస్థంగా వ్యవహరిస్తున్న  బీజేడీ, టీఆర్ఎస్‌లు ఇదే అదునుగా భావించి ఉపసభాపతి ఎన్నికల్లో తమ అభ్యర్థులను రంగంలోకి దింపాలన్న యోచనలో ఉన్నట్లు తెలుస్తోంది. ఒక వేళ బీజేపీ...  బీజేడీ, టీఆర్‌ఎస్‌ అభ్యర్థులకు మద్దతు ఇస్తే 2019 ఎన్నికల ముందు మరోసారి ఫెడరల్‌ ఫ్రంట్‌ అంటున్న విపక్షాల ఐక్యతకు బీజేపీ గండికొట్టినట్లే అవుతుంది.  ముఖ్యంగా బీజేపీ, కాంగ్రెస్‌ రెండు పార్టీలను శత్రువులుగా భావిస్తోన్న టీఆరెస్‌, బీజేడీలు ఎవరివైపు మొగ్గుచూపుతాయో త్వరలో తేలనుంది.

18:29 - June 18, 2018

ఢిల్లీ : దేశవ్యాప్తంగా 15 లక్షల ప్రభుత్వ పాఠశాలల్లో గ్రంథాలయాలు ఏర్పాటు చేస్తామని కేంద్ర మానవ వనరుల అభివృద్ధి శాఖ మంత్రి ప్రకాశ్ జవదేకర్ తెలిపారు. మోది ప్రభుత్వం నాలుగేళ్లు పూర్తి చేసుకున్న సందర్భంగా ఆయన మీడియాతో మాట్లాడారు. దేశంలో విద్యాభివృద్ధి కోసం 33 కొత్త కార్యక్రమాలు తీసుకువచ్చామని... అందరికి విద్య - నాణ్యమైన విద్య నినాదంతో ముందుకు సాగుతున్నామని మంత్రి చెప్పారు. మధ్యాహ్న భోజనానికి ఏటా 17 వేల కోట్లు ఖర్చు చేస్తున్నామని, ఏడాదిలో బాలికల కోసం 2 లక్షల మరుగుదొడ్లు నిర్మించామన్నారు. వచ్చే ఏడాది నుంచి 5, 8 తరగతులకు బోర్డు పరీక్షలు నిర్వహించాలని రాష్ట్రాలకు సూచించినట్లు జవదేకర్‌ వెల్లడించారు. అన్ని రాష్ట్రాల కంటే ఏపికే ఎక్కువ స్థాయిలో విద్యాలయాలు మంజూరు చేసినట్లు కేంద్రమంత్రి స్పష్టం చేశారు.

18:16 - June 18, 2018

ఢిల్లీ : లెఫ్ట్‌నెంట్‌ గవర్నర్‌ కార్యాలయంలో గత 6 రోజులుగా నిరాహార దీక్ష చేస్తున్న ఉపముఖ్యమంత్రి మనీష్‌ సిసోడియా ఆరోగ్యం క్షీణించింది. కెటోన్‌ స్థాయి 7.4కి పడిపోవడంతో ఆయనను ఎల్‌ఎన్‌జెపి ఆసుపత్రికి తరలించారు. అంతకు ముందు మంత్రి సత్యేంద్ర జైన్‌ ఆరోగ్యం కూడా క్షీణించడంతో ఆయనను ఆసుపత్రికి తరలించారు. ఎల్జీ అనిల్‌ బైజల్‌ కార్యాలయంలో కేజ్రీవాల్‌, మంత్రుల ధర్నా 8 రోజుకు చేరింది. ఐఏఎస్‌ అధికారులు అప్రకటిత సమ్మెకు ముగింపు చెప్పేలే ఎల్జీ ఆదేశించాలన్న డిమాండ్‌పై కేజ్రీవాల్‌, నలుగురు మంత్రులు ఈ నెల 11 నుంచి ఎల్జీ కార్యాలయంలో బైఠాయించారు. ఢిల్లీ అధికారులెవ్వరూ సమ్మెలో లేరని ఐఏఎస్‌ అసోసియేషన్ చెబుతోంది.

Pages

Don't Miss

Subscribe to RSS - ఢిల్లీ