తెలుగు రాష్ట్రాలు

10:02 - October 16, 2018

హైదరాబాద్ : చమురు ధరలు కిందకు దిగి రావడం లేదు. కేంద్ర ప్రభుత్వం ధరలు తగ్గిస్తూ ఇటీవలే నిర్ణయం తీసుకున్నా ఏ మాత్రం ధరల్లో తగ్గుదల లేదు. దీనితో సామాన్య, మధ్యతరగతి ప్రజలు తీవ్ర ఆందోళన పడిపోతున్నారు. పెట్రోల్, డీజిల్ పై ఆధారపడిన వస్తువుల ధరలు కూడా అమాంతం పైకి ఎగబాకుతుండడంతో ప్రజలు నానావస్థలు పడుతున్నారు. గత ఆగస్టు నుండి చమరు ధరలు పెరుగుతుండడంతో కేంద్ర ప్రభుత్వంపై తీవ్ర విమర్శలు పెల్లుబికాయి. ధరల పెరుగుదల నుంచి ప్రజలకు కొంత ఊరట కలిగించేందుకు కేంద్రం ఎక్సైజ్‌ సుంకాన్ని రెండున్నర రూపాయల మేర తగ్గించింది. కానీ వాహనదారులకు, సామాన్య ప్రజలకు ఈ పెట్రో ధరల నుంచి ఇబ్బందులు తప్పడం లేదు.
మంగళవారం కూడా వివిధ నగరాల్లో పెట్రోల్, డీజిల్ ధరలు పెరిగాయి. లీటరు పెట్రోలుపై 11 పైసలు, డీజిల్ పై 23 పైసల మేరకు ధరలను పెంచుతున్నట్టు ప్రభుత్వ రంగ చమురు సంస్థ ఇండియన్ ఆయిల్ కార్పొరేషన్ పేర్కొంది. దీనితో దేశ రాజధాని న్యూఢిల్లీలో పెట్రోలు ధర రూ. 82.83కు, డీజిల్ ధర రూ. 75.69కి చేరుకుంది. ముంబైలో పెట్రోలు ధర లీటరుకు రూ. 88.29, డీజిల్ ధర లీటర్ కు రూ. 79.35..హైదరాబాద్ లో పెట్రోలు ధర రూ. 87.81కు, విజయవాడలో పెట్రోలు రూ. 87.05కు, డీజిల్ రూ. 81.17కి చేరుకుంది. 

09:05 - September 10, 2018

హైదరాబాద్ : నేడు జీహెచ్ఎంసీలో రాజకీయ పార్టీ ప్రతినిధుల సమావేశం జరుగనుంది. ఓటర్ల జాబితా సవరణపై చర్చ జరుగనుంది.

హైదరాబాద్ : గోకుల్ ఛాట్, లుంబినీ పార్కు పేలుళ్ల కేసులో దోషులకు కోర్టు శిక్ష ఖరారు చేయనుంది. అక్బర్ ఇస్మాయిల్ చౌదరి, అనీఖ్ షపీఖ్ సయ్యద్ కు నాంపల్లి అదనపు మెట్రో పాలిటిన్ జడ్జీ శిక్ష ఖరారు చేయనున్నారు. 

13:00 - August 24, 2018

హైదరాబాద్ : తెలుగు రాష్ట్రాల్లో వరలక్ష్మి శోభ సందరించుకుంది. ఇవాళ శ్రావణ శుక్రవారం సందర్భంగా ఆలయాలకు భక్తులు పొటెత్తుతున్నారు. అన్ని ఆలయాలకు ఉదయం నుంచే మహిళలు భారీగా తరలివచ్చి.. అమ్మవారికి ప్రత్యేక పూజలు చేస్తున్నారు. అన్ని అమ్మవారి ఆలయాల్లో శ్రావణ శుక్రవారం శోభ నెలకొంది. నగరంలోని కొత్తపేట అష్టలక్ష్మీ ఆలయంలో ప్రత్యేక పూజలు నిర్వహించారు. 
ఇంద్రకీలాద్రిపై ప్రత్యేక పూజలు
రెండో శ్రావణ శుక్రవారం పురస్కరించుకుని ఇంద్రకీలాద్రిపై వరలక్ష్మీ దేవి అలంకారంలో కనకదుర్గమ్మ భక్తులకు దర్శనమిస్తున్నారు. వరలక్ష్మిదేవి దర్శనార్థం భక్తులు పోటెత్తారు. భక్తుల రద్దీపై మరింత సమాచారాన్ని వీడియోలో చూద్దాం... 

 

08:32 - August 22, 2018

తెలుగు రాష్ట్రల్లో కురుస్తున్న భారీవర్షాలకు కొన్ని చోట్ల రైతాంగం లబోదిబోమంటుంది. వేసిన నాట్లు కొట్టుకోపోవటం, మొక్కజోన్న, పత్తి పంటలు మునిగిపోవడం, నిల్వ ఉంచిన ధాన్యం వర్షపు నీరుతో తడవటం, ఇలాంటి సమస్యలను..కొన్ని తీవ్ర వర్షభావం పడిన ప్రాంతా రైతులు ఎదురుకుంటున్నారు. అ రైతులను గుర్తించి వారిని అదుకోవాలని రైతుసంఘాలు డిమాండ్ చేస్తున్నారు. ఇదే అంశంపై ఇవాళ్టి జనపథంలో రైతుసంఘం కేంద్ర కమిటీ సభ్యులు టీ.సాగర్ మాట్లాడారు. మరిన్ని వివరాలను వీడియోలో చూద్దాం.. 

 

21:55 - August 19, 2018

హైదరాబాద్ : తెలుగు రాష్ట్రాల్లో కురుస్తున్న భారీ వర్షాలతో పలు ప్రాంతాల్లో జనజీవనం స్తంభించింది. వాగులు, వంకలు పొంగి పొర్లుతున్నాయి. ప్రాజెక్టులు జలకళను సంతరించుకున్నాయి. మరో రెండు రోజుల పాటు భారీ వర్షాలు కురిసే అవకాశం ఉన్నట్లు వాతావరణ శాఖ తెలిపింది. మరోవైపు ఏపీలో కురుస్తున్న వర్షాలపై సీఎం చంద్రబాబు సమీక్ష నిర్వహించారు. అధికారులు అప్రమత్తంగా ఉండాలని ఆదేశించారు. వాయువ్య బంగాళాఖాతంలో ఏర్పడిన ఉపరితల ఆవర్తనం ప్రభావంతో తెలుగు రాష్ట్రాల్లోని పలు జిల్లాల్లో జోరుగా వర్షాలు కురుస్తున్నాయి. పలు ప్రాంతాల్లో రోడ్లపై వరద నీరు ప్రవహించడంతో రాకపోకలకు అంతరాయం ఏర్పడింది. 
ఉమ్మడి ఆదిలాబాద్‌ జిల్లాలో 
ఉమ్మడి ఆదిలాబాద్‌ జిల్లాలో జోరుగా వర్షాలు కురుస్తున్నాయి. కంటికి రెప్పలా కాపాడుకుంటున్న పంటలను వరదనీరు ముంచెత్తడంతో రైతన్నకు కన్నీరే మిగిలింది. ఇసుక, మట్టి దిబ్బలతో పంటలను వరదనీరు ఆక్రమించేసింది. ఇళ్లల్లోకి, రహదారులపైకి భారీగా వరదనీరు వచ్చి చేరింది. నాలుగు రోజులుగా కురిసిన వర్షానికి జనజీవనం స్తంభించిపోయింది. మంచిర్యాల మండలంలో ఎల్లంపల్లి ప్రాజెక్టులోకి భారీగా వరద నీరు వచ్చి చేరింది. ఎగువన కురుస్తున్న వర్షాలతో నిర్మల్‌ జిల్లా కడెం ప్రాజెక్టులోకి వరద నీరు పోటెత్తుతోంది. దీంతో ఆరు గేట్లను ఎత్తి అధికారులు నీటిని దిగువకు విడుదల చేశారు. 
భారీ వర్షాలతో సింగరేణి ఓపెన్‌ కాస్ట్‌ గనులకు భారీ నష్టాలు 
భారీ వర్షాలు సింగరేణి ఓపెన్‌ కాస్ట్‌ గనులకు భారీ నష్టాలను మిగిల్చాయి. ఎడతెరపిలేకుండా కురుస్తున్న వర్షాలతో సింగిరేణి ఉత్పత్తి నిలిచిపోయింది. 4 కోట్ల మేర నష్టం వాటిళ్లినట్లు అధికారులు అంచనావేశారు. భారీ వర్షం కారణగా ఇచ్చోడ మండల కేంద్రంలో వరదలు ముంచెత్తాయి. దీంతో బాధితులను పునరావాస కేంద్రాలకు తరలించారు. పునరావాస కేంద్రంలో ఆశ్రయం పొందుతున్న వారిని ఆదిలాబాద్‌ జిల్లా కలెక్టర్‌ దివ్య పరామర్శించారు. వరదల్లో తన పుస్తకాలు, పెన్సిళ్లు, బట్టలు అన్నీ కొట్టుకుపోయాయంటూ చిన్నారి జ్యోతిక రోదిస్తూ కలెక్టర్‌కు విన్నవించుకుంది. దీంతో కావాల్సిన పుస్తకాలు కొనిస్తామని చిన్నారికి కలెక్టర్‌ హామీ ఇచ్చారు. 
ఖమ్మం జిల్లాలో 
ఖమ్మం జిల్లాలో గత రెండు రోజులుగా కురుస్తున్న వర్షాలకు వైరా కొణిజర్ల ఏన్కూరు తల్లాడ మండలాల్లో వాగులు చెరువులు పొంగి ప్రవహిస్తున్నాయి. కొణిజర్ల మండలం తీగల బంజర వద్ద పగిడేరు వాగు ఏన్కూరు మండలం జన్నారం వాగు పొంగి ప్రవహిస్తుండటంతో పది గ్రామాలకు రాకపోకలు నిలిచిపోయాయి.   
భద్రాద్రి కొత్తగూడెం జిల్లాలో
భద్రాద్రి కొత్తగూడెం జిల్లా అశ్వారావుపేట మండలంలో వారం రోజులుగా ఎడతెరపిలేకుండా వర్షాలు కురుస్తున్నాయి. పెదవాగు ప్రాజెక్టులోకి భారీగా వరద నీరు వచ్చి చేరుతుండడంతో వారం రోజుల్లోనే 3 సార్లు గేట్లు ఎత్తి 8500 క్యూసెక్కుల నీటిని దిగువకు విడుదల చేశారు. సింగరేణి ఓపెన్‌ కాస్ట్‌లో భారీగా వరద నీరు వచ్చి చేరడంతో బొగ్గు ఉత్పత్తికి తీవ్ర అంతరాయం ఏర్పడింది. 15 వేల టన్నుల బొగ్గు ఉత్పత్తి నిలిచిపోయింది. 
వరంగల్‌ జిల్లాలో 
వరంగల్‌ జిల్లాలో ఎడతెరపిలేకుండా కురుస్తున్న వర్షాలకు గోదావరి నది ఉధృతంగా ప్రవహిస్తోంది. ఎగువ ప్రాంతాల నుండి నీరు వచ్చి చేరడంతో గోదావరి పరివాహక ప్రాంతాలు జలమయం అయ్యాయి. వరద ధాటికి రహదారులన్నీ జలమయం అయ్యాయి. గోదావరి నది పరివాహక ప్రాంతంలోని రైతుల పరిస్థితి వర్ణనాతీతంగా మారింది. పంట పొలాలు పూర్తిగా మునిగిపోయాయి. పంట నష్టాన్ని అంచనావేయాల్సిన అధికారుల్లో చలనం లేకపోవడంతో రైతులు తీవ్ర ఆగ్రహం వ్యక్తం చేస్తున్నారు. 
భూపాలపల్లిలో 
భూపాలపల్లి ఏరియాలో ఉపరితల గనుల్లో కురుస్తున్న వర్షాల కారణంగా భారీగా బొగ్గు ఉత్పత్తి నిలిచిపోయింది. గత యేడాది తో పోలిస్తే ఈ ఏడాదిలో ఎక్కువ మొత్తంలో వర్షాలు పడడం వల్ల 78 వేల టన్నుల బొగ్గు ఉత్పత్తికి ఆటంకం కలిగింది.
మహబూబాబాద్ జిల్లాలో 
మహబూబాబాద్ జిల్లాలో భారీ వర్షం కురిసింది. జిల్లా కేంద్రంలో మున్నేరు వాగు స్థాయిని మించి ఉధృతంగా ప్రవహిస్తోంది. పలు గ్రామాల్లో ఇళ్లల్లోకి వరద నీరు చేరడంతో ప్రజలు తీవ్ర ఇబ్బందులు పడుతున్నారు. 
కృష్ణా జిల్లాలో 
కృష్ణా జిల్లాలో రెండు రోజులుగా భారీ వర్షం కురుస్తోంది. దీంతో జిల్లాలోని నందిగామ అగ్నిమాపక కార్యాలయం నీట మునిగింది. వర్షం నీరు కార్యాలయంలోకి చేరడంతో సిబ్బంది ఇబ్బంది పడుతున్నారు. ఈ విషయమై ఉన్నతాధికారులకు ఎన్ని సార్లు ఫిర్యాదు చేసినా పట్టించుకోవడంలేదని ఆవేదన చెందుతున్నారు. ఇప్పటికైనా అధికారులు స్పందించాలని కోరుతున్నారు. గత వారం రోజులుగా కురుస్తున్న కుండపోత వర్షాలకు తోడు ఎగువ నుంచి వస్తున్న వరద ప్రవాహంతో ప్రకాశం బ్యారేజీకి భారీగా వరద నీరు వచ్చి చేరుతోంది. ప్రకాశం బ్యారేజీ నిండుకుండలా మారడంతో సందర్శకుల తాకిడి పెరిగింది. ప్రస్తుతం కురుస్తున్న వర్షాలతో రైతులు హర్షం వ్యక్తం చేస్తున్నారు. అరటి, పసుపు, బొప్పాయి తోటలకు వర్షాలు ఊపిరిలూదాయి. 
కొంత శాంతించిన గోదావరి 
నిన్నటి వరకు ఉధృతంగా ప్రవహించిన గోదావరి కొంత శాంతించింది. ధవళేశ్వరం బ్యారేజీ వద్ద 14.6 అడుగులు నీటి మట్టం నమోదు కాగా... ప్రస్తుతం 12.90అడుగులకు చేరుకుంది. దీంతో బ్యారేజీ నుండి 11లక్షల 44 వేల క్యూసెక్కుల నీటిని సముద్రంలోకి విడుదల చేశారు. గోదావరి మొదటి ప్రమాద హెచ్చరిక స్థాయిని మించి ప్రవహిస్తోంది. వరద పరిస్థితిని ఎప్పటికికప్పుడు పరిశీలిస్తున్నామని ఇరిగేషన్ అధికారులు అంటున్నారు. 
కాకినాడలో గోదావరి ఉగ్రరూపం 
కాకినాడలోని పలు ప్రాంతాల్లో గోదావరి ఉగ్రరూపం దాల్చింది. దీంతో లోతట్టు ప్రాంతాలు పూర్తిగా జలమయం అయ్యాయి. మోకాళ్ల వరకు నీరు చేరడంతో ప్రజలు తీవ్ర ఇబ్బందులు పడుతున్నారు. పడవల ద్వారా ఇతర ప్రాంతాలకు చేరుకుంటున్నారు. 
శ్రీశైలం జలాశయం వద్ద కృష్ణమ్మ పరవళ్లు 
శ్రీశైలం జలాశయం వద్ద కృష్ణమ్మ పరవళ్లు తొక్కుతోంది. జలాశయం ఎనిమిది గేట్లను 10 అడుగల ఎత్తు మేర ఎత్తి నీటిని నాగార్జునసాగర్‌కు వదులుతున్నారు. 
భారీ వర్షాలు, వరదలపై చంద్రాబాబు సమీక్ష 
ఏపీలో భారీ వర్షాలు, వరదలపై ముఖ్యమంత్రి చంద్రాబాబు సమీక్ష నిర్వహించారు. లోతట్టు ప్రాంతాల ప్రజలను సురక్షిత ప్రాంతాలకు తరలించి వారికి ఆహారం, నీటి వసతి కల్పించాలని అధికారులకు ఆదేశించారు. విపత్తు నిర్వహణ శాఖ, రియల్‌ టైం గవర్నెన్స్‌ల సూచనలకు అనుగుణంగా సమన్వయంతో పని చేయాలని సూచించారు. సహాయక చర్యల్లో స్వచ్ఛంద సంస్థలు, స్థానికులు భాగస్వామ్యం అవ్వాలని సీఎం అన్నారు.

 

17:39 - August 18, 2018

విజయవాడ : పాశ్చాత్య దేశాలలో మొదలైన కికి ఛాలెంజ్‌ తెలుగు రాష్ట్రాలకు పాకింది. కికి డాన్స్‌ చేస్తూ ప్రజలు ప్రమాదాల బారిన పడుతున్నారని తెలంగాణ ప్రభుత్వం దానిని నిషేధించింది. అయితే కికి ఛాలెంజ్‌ను ఆంధ్రప్రదేశ్‌ ప్రభుత్వం కట్టడి చేయడంలేదని ఆరోపిస్తూ కికి డాన్స్‌ చేసి పోలీసులకు సవాల్‌ విసిరారు ట్రాన్స్‌ జెండర్‌ తమన్నా సింహాద్రి. ఏపీ పోలీసులు కికి ఛాలెంజ్‌ను కట్టడి చేయాలని డిమాండ్‌ చేస్తున్న తమన్నా సింహాద్రితో టెన్ టివి ఫేస్‌ టు ఫేస్‌ నిర్వహించింది. 

 

08:18 - August 17, 2018

ఢిల్లీ : భారత మాజీ ప్రధాని వాజ్ పేయి భౌతికకాయాన్ని పలువురు నేతలు సందర్శించి ఘనంగా నివాళులర్పిస్తున్నారు. మాజీ ప్రధానమంత్రి అటల్‌ బిహారీ వాజ్‌పేయి ఇకలేరు. గత కొంతకాలంగా మూత్రనాళ ఇన్‌ఫెక్షన్‌తో ఎయిమ్స్‌లో చికిత్స పొందుతున్న ఆయన గురువారం కన్నుమూశారు. ఈ సందర్భంగా తెలుగు రాష్ట్రాల గవర్నర్, నేతలు నివాళులర్పించారు.

ప్రపంచంలో ఆదర్శవంతమైన దేశంగా భారతదేశాన్ని తీర్చిదిద్ధడంలో ఆయన ఎనలేని కృషి చేశారని అలాంటి వ్యక్తి మన మధ్యలో లేరని పలువురు తెలిపారు. ఆయన ఆశయాలను ముందుకు తీసుకెళ్లాలని తెలిపారు. ఆయన ఆత్మకు శాంతి కలగాలని కోరుకుంటున్నట్లు తెలిపారు. గొప్ప మహామనిషి, భారత రత్న వాజ్ పేయి మృతి తీరని లోటని వైసీపీ ఎంపీ పేర్కొన్నారు. కులాలకు..మతలాకతీతంగా దేశాన్ని నడిపించారని, ప్రజాస్వామ్యాన్ని ఆయన రక్షించారని పేర్కొన్నారు. పాక్ విషయంలో స్నేహ హస్తం అందించారని తెలిపారు.

అందరి హృదయాల్లో వాజ్ పేయి ఉంటారని..గొప్ప మహా పురుషుడని తెలుగు రాష్ట్రాల గవర్నర్ తెలిపారు. అంతటి గొప్ప నేత కోల్పోవడం బాధగా ఉందన్నారు.

గొప్ప మనస్సున్న నాయకుడని, అందరి హృదయాల్లో నిలిచిపోయారని టీఆర్ఎస్ ఎంపీ జితేందర్ రెడ్డి పేర్కొన్నారు. ఆయన మృతి తీరని లేటని..భారతదేశం గొప్ప నేతను కోల్పోయిందని తెలిపారు. ఆయన గొప్ప మహానుభావుడని..అజాతశత్రువని టీఆర్ఎస్ ఎంపీ కేశవరావు తెలిపారు. ఆయన మృతి తీరని లోటని, తనకు ఎంతో బాధగా ఉందన్నారు. ఎవరినీ శత్రువులుగా భావించలేదని..అందర్నీ కలుపుకుని పాలించారని తెలిపారు. 

06:33 - August 16, 2018

హైదరాబాద్ : తెలుగు రాష్ట్రాల్లో స్వాతంత్ర్య దినోత్సవ వేడుకలు ఘనంగా జరుపుకున్నారు. వివిధ రాజకీయ పార్టీల కార్యాలయాల్లో మువ్వన్నెల జెండాలను ఎగురవేసి... ప్రజలకు స్వాతంత్ర్య దినోత్సవ శుభాకాంక్షలు తెలిపారు. హైదరాబాద్‌లోని టీఆర్‌ఎస్ భవన్‌లో స్వాతంత్ర్య దినోత్సవ వేడుకలు ఘనంగా జరిగాయి. జాతీయ పతాకాన్ని ఎగురవేసిన హోంమంత్రి నాయిని నర్సింహారెడ్డి.. ప్రజలందరికీ స్వాతంత్ర్య దినోత్సవ శుభాకాంక్షలు తెలిపారు. తెలంగాణ శరవేగంగా అభివృద్ధి చెందుతుందని... తెలంగాణ ప్రజలు అన్ని రంగాల్లో అభివృద్ధి సాధిస్తున్నారన్నారు.

గాంధీ భవన్‌లో పంద్రాగస్టు వేడుకలు ఘనంగా జరిగాయి. తెలంగాణ పీసీసీ అధ్యక్షుడు ఉత్తమ్‌కుమార్‌రెడ్డి జాతీయ జెండాను ఎగురవేశారు. బీజేపీ కార్యాలయంలో స్వాతంత్ర్య వేడుకలు ఘనంగా జరిగాయి. బీజేపీ నేత లక్ష్మణ్‌ జాతీయ జెండాను ఆవిష్కరించారు. హైదరాబాద్‌లో బిఎల్‌ఎఫ్‌ కార్యాలయంలో స్వాతంత్ర్య దినోత్సవ వేడుకలు ఘనంగా జరిగాయి. బిఎల్‌ఎఫ్‌ కన్వీనర్‌ తమ్మినేని వీరభద్రం జాతీయ జెండాను ఎగరవేశారు. బీజేపీ, టీఆర్‌ఎస్‌ ప్రభుత్వాలకు రానున్న రోజుల్లో ప్రజలే బుద్ది చెబుతారన్నారు. వారి రాజకీయ ప్రయోజనాల కోసం ప్రజాస్వామ్యాన్ని తుంగలో తొక్కడం దారుణమన్నారు.

సీపీఐ రాష్ట్ర కార్యాలయంలో స్వాతంత్ర్య దినోత్సవ వేడుకలు ఘనంగా జరిగాయి. మగ్దూమ్ భవన్‌లో జాతీయ జెండాను సీపీఐ రాష్ట్ర కార్యదర్శి చాడా వెంకట్‌రెడ్డి ఆవిష్కరించారు. స్వాతంత్ర్యం వచ్చి 72 ఏళ్లు గడుస్తున్నా.. దేశంలో మతతత్వ శక్తులు రాజ్యమేలుతున్నాయని, మహిళలపై ఆత్యాచారాలు అధికమైయ్యాయని ఆయన అవేదన వ్యక్తం చేశారు. తెలంగాణ జన సమితి కార్యాలయంలో స్వాతంత్ర్య దినోత్సవ వేడుకలు నిర్వహించారు. కోదండరాం జాతీయ జెండాను ఆవిష్కరించి ప్రజలకు స్వాతంత్ర్య దినోత్సవ శుభాకాంక్షలు తెలిపారు.

వైసీపీ అధినేత జగన్మోహన్‌రెడ్డి.. పాదయాత్ర శిబిరం వద్దే స్వాతంత్ర్య దినోత్సవాలు జరుపుకున్నారు. విశాఖ జిల్లా నాతవరం మండలం డి.ఎర్రవరంలో.. జెండా పండుగలో జగన్‌ పాల్గొన్నారు. జాతీయ పతాకాన్ని ఆవిష్కరించి.. ప్రజలకు శుభాకాంక్షలు తెలిపారు. 72వ స్వాతంత్ర్య దినోత్సవాలను బీజేపీ ఏపీ రాష్ట్ర శాఖ ఘనంగా నిర్వహించింది. విజయవాడ కార్యాలయంలో రాష్ట్ర అధ్యక్షుడు కన్నా లక్ష్మీనారాయణ జాతీయ పతాకాన్ని ఆవిష్కరించారు.

19:12 - August 13, 2018

హైదరాబాద్ : జిల్లా బైంసా మండలంలోని కుంభి గ్రామం గత రెండు రోజులుగా కురుస్తున్న వర్షం నీటితో బురదమయమయ్యింది. దాదాపు పది సంవత్సరాలు అయినా వసతులు మాత్రం కల్పించలేదు. స్వాతంత్ర్యం వచ్చి ఇన్ని ఏళ్లు అయిన గ్రామంలో అభివృద్ధి మాత్రం జరగడం లేదని గ్రామంలో యువకులు వాపోతున్నారు.

పశ్చిమగోదావరి జిల్లాలో మూడు రోజులుగా ఎడతెరపి లేకుండా వర్షాలు కురువడంతో.. ఏజెన్సీలో వాగులు పొంగుతున్నాయి. జంగారెడ్డిగూడెం, వేలేరుపాడు, కుక్కునూరు, టీ. నరసాపురం ప్రాంతాల్లో కొండవాగులు పొంగిప్రవహిస్తున్నాయి. దీంతో ప్రజలు తీవ్ర ఇబ్బందులు ఎదుర్కొంటున్నారు. గోదావరి వరద నీరు కొత్తూరు కాజ్‌వే పైకి చేరటంతో 19 గ్రామాలకు రాకపోకలు నిలిచిపోయాయి.

పశ్చిమగోదావరిలో....
నాలుగు రోజులుగా కురుస్తున్న భారీ వర్షాలకు పశ్చిమగోదావరి జిల్లా చింతలపూడిలో ఎర్రకాలువ పొంగిపొర్లుతుంది. దీంతో జంగారెడ్డిగూడెం చుట్టుపక్కల గ్రామాలకు వాహనాల రాకపోకలు నిలిచిపోయాయి. దీంతో గ్రామస్తులు ఆందోళన వ్యక్తం చేస్తున్నారు. గత ప్రభుత్వం వంతెన నిర్మాణానికి నిధులు కేటాయించింది. కానీ ఈ ప్రభుత్వం పట్టించుకోకపోవడంతో శిలాఫలకానికే పరిమితమైంది. దీంతో రోజువారి కూలీలు పనులకు వెళ్లడం లేదు. ప్రభుత్వం వెంటనే స్పందించి వంతెన నిర్మాణం చేపట్టాలని గ్రామస్తులు డిమాండ్ చేస్తున్నారు.

గోదావరిలో...
రెండు రోజులుగా కురుస్తున్న వర్షాలతో గోదావరిలో వరద ఉధృతి పెరిగింది. దీంతో ఎల్లంపల్లి ప్రాజెక్టుకు భారీగా నీరు చేరుకుంది. వరద తాకిడి పెరగడంతో 28 గేట్ల ద్వారా దిగువకు రెండు లక్షల క్యూసెక్కుల నీటిని విడుదల చేస్తున్నారు. ప్రజలను అప్రమత్తంగా ఉంచాలని పెద్దపల్లి, మంచిర్యాల జిల్లాల కలెక్టర్లు అధికారులను ఆదేశించారు. దీనికి సంబంధించిన మరింత సమాచారం కోసం వీడియో క్లిక్ చేయండి.

21:21 - August 12, 2018

హైదరాబాద్ : తెలుగు రాష్ట్రాల్లో భారీ వర్షపాతం నమోదవుతోంది. రెండు రోజులుగా కురుస్తున్న వర్షాలతో నదులు, చెరువుల్లోకి భారీగా వరద నీరు వచ్చి చేరుతోంది. బంగాళాఖాతంలో ఏర్పడిన ఉపరితల ఆవర్తనం ప్రభావంతో మరో 24 గంటల పాటు వర్షాలు కురుస్తాయని వాతావరణ శాఖ తెలిపింది. ఎడతెరపిలేకుండా కురుస్తున్న వర్షాలతో హైదరాబాద్‌ తడిసి ముద్దైంది. వర్షం నీరు రోడ్డుపై నిలిచిపోవడంతో పలు ప్రాంతాల్లో రాకపోకలకు అంతరాయం ఏర్పడింది. భారీ వర్షాల కారణంగా ఆదిలాబాద్‌ జిల్లాలోని లోతట్టు ప్రాంతాలు జలమయమయ్యాయి. ప్రజలను సురక్షిత ప్రాంతాలకు తరలించాలని జిల్లా కలెక్టర్‌ దివ్య సంబంధిత అధికారులను ఆదేశించారు. జిల్లా కేంద్రంలోని ఖానాపూర్‌‌ చెరువు సమీప నివాస ప్రాంతాలను కలెక్టర్ సందర్శించారు.

ఉమ్మడి ఆదిలాబాద్ జిల్లాలో రెండు రోజులుగా కురుస్తున్న భారీ వర్షాలకు జన జీవనం స్తంభించింది. పలు గ్రామాల్లో ఇళ్లలోకి నీరు వచ్చి చేరింది. వాగులు, వంకలు ఉప్పొంగి ప్రవహిస్తుండటంతో.. రాకపోకలు నిలిచిపోయాయి. మంచిర్యాల జిల్లా జన్నారం మండలం ఇందనపల్లి, జన్నారం సమీపంలో నిర్మిస్తున్న నూతన వంతెనల వద్ద రాకపోకల కొరకు నిర్మించిన అప్రోచ్ రోడ్లు వరద ఉధృతికి తెగిపోయి రవాణా వ్యవస్థ స్తంభించింది. వర్షం ధాటికి నిర్మల్ జిల్లా కడెం ప్రాజెక్ట్‌లోకి భారీగా వరదనీరు చేరుతోంది. ఇప్పటికే 13 గేట్లు ఎత్తి వరద నీటిని గోదావరిలోకి వదిలారు అధికారులు.

మంచిర్యాల జిల్లా చెన్నూరు మండలంలోని లింగంపల్లి గ్రామంలో వర్షం ధాటికి 104 గొర్రెలు మృతి చెందాయి. ఇవి తెలంగాణ ప్రభుత్వం సబ్సీడీ కింద అంజేసిన గొర్రెలు కావడంతో గొర్రెల కాపరులు ఆందోళన చెందుతున్నారు. సుమారు 5 లక్షల నష్టం వాటిళ్లిందని ఆవేదన చెందుతున్నారు.

కొత్తగూడెం జిల్లాలో కురుస్తున్న వర్షాలకు సింగరేణి ఓపెన్‌ కాస్ట్‌లో బొగ్గు ఉత్పత్తి పనులకు ఆటంకం ఏర్పడింది. గనుల్లో భారీగా వర్షం నీరు వచ్చి చేరడంతో మోటార్ల సాయంతో నీటిని తోడేస్తున్నారు. భారీ వర్షాల కారణంగా భద్రాద్రిలో క్రమంగా గోదావరి నీటిమట్టం పెరుగుతోంది. చత్తీస్‌గఢ్‌లో కురుస్తున్న భారీ వర్షాలకు తాలిపెరు ప్రాజెక్టుకు భారీగా వరద ఉధృతి పెరిగింది. దీంతో 15 గేట్లు ఎత్తి 51వేల క్యూసెక్కుల నీటిని దిగువకు విడుదల చేశారు.

కరీంనగర్ జిల్లాలో కురుస్తున్న భారీ వర్షాలకు లోతట్టు ప్రాంతాలు జలమయం అయ్యాయి. రామగుండంలో అత్యధికంగా 13.8 సెంటీమీటర్ల వర్షాపాతం నమోదైంది. రామగుండంలోని సింగరేణి ఓపెన్‌ కాస్ట్‌ గనులపై వర్షం ప్రభావం పడింది. దీంతో నాలుగు ఓపెన్‌ కాస్ట్‌లలో లక్ష టన్నుల బొగ్గు ఉత్పత్తికి విఘాతం ఏర్పడింది. ఎల్లంపల్లి ప్రాజెక్టుకు భారీగా వరద నీరు వచ్చి చేరుతుండడంతో 10 గేట్లను ఎత్తి 519 క్యూసెక్కుల నీటిని దిగువకు విడుదల చేశారు.
ఉమ్మడి వరంగల్‌ జిల్లా వ్యాప్తంగా భారీ వర్షాలు కురుస్తున్నాయి. రహదారులు, లోతట్టు ప్రాంతాలు జలమయమయ్యయి. వాగులు పొంగి పొర్లుతున్నాయి. కొన్ని ప్రాంతాల్లో ఇళ్లల్లోకి వర్షం నీరు వచ్చి చేరడంతో ప్రజలు తీవ్ర ఇబ్బందులు పడుతున్నారు. భూపాలపల్లిలో నిన్నటి నుండి కురుస్తున్న వర్షం కారణంగా కాకతీయ ఓపెన్ కాస్ట్ బొగ్గు గనుల్లోకి భారీగా వరద నీరు వచ్చి చేరింది. దీంతో బొగ్గు ఉత్పత్తికి ఆటంకం ఏర్పడింది. జయశంకర్‌ భూపాలపల్లి జిల్లా మహదేవపూర్‌ మండలం చండ్రుపల్లి వాగు టూరిస్టుల బస్సు చిక్కుకుంది. అన్నారం బ్యారేజీ చూసేందుకు వెళ్తున్న టూరిస్టుల బస్సు వరద నీటిలో చిక్కుకుపోయింది. స్థానికులు స్పందించి బస్సును వరద నీటి నుండి బయటకు తీసుకువచ్చారు. భారీ వర్షాలకు నిజామాబాద్‌ జిల్లా ఆర్మూర్‌ నియోజకవర్గంలోని వాగులు, కుంటలు, చెరువులు వర్షపు నీటితో నిండిపోయాయి. దీంతో ఆయకట్టు రైతులు హర్షం వ్యక్తం చేస్తున్నారు.

భారీ వర్షాలతో విజయవాడలోని ప్రకాశం బ్యారేజ్ జలకళ సంతరించుకుంది. ఎగువ నుంచి వస్తున్న వరద నీటితోపాటు మూడు రోజులుగా కురుస్తున్న వర్షం ధాటికి కృష్ణానది నిండుకుండలా మారింది. వరద నీరు ప్రవాహంతో బ్యారేజీ పోటెత్తడంతో అధికారులు 40 గేట్లు ఎత్తి దిగువకు నీటిని విడుదల చేశారు. తూర్పుగోదావరి జిల్లా విలీన మండలాల్లో భారీ వర్షం కురుస్తుంది. దీంతో విలీన మండలాల్లోని వాగులు, వంకలు పొంగి రహదారులపై ఉధృతంగా ప్రవహిస్తున్నాయి. గిరిజన ప్రాంతాల్లో రాకపోకలకు తీవ్ర అంతరాయం ఏర్పడింది. దక్షిణ ఒరిస్సా ఉత్తర కోస్తాను ఆనుకొని కొనసాగుతోన్న ఉపరితలం ఆవర్తనం ప్రభావంతో కోస్తాంధ్రలో మోస్తరు నుండి భారీ వర్షాలు కురిసే అవకాశం ఉన్నట్లు వాతావరణ అధికారులు తెలిపారు. రానున్న 24 గంటల్లో వాయువ్య బంగాళాఖాతంలో అల్పపీడనం ఏర్పడే అవకాశం ఉంది. 

Pages

Don't Miss

Subscribe to RSS - తెలుగు రాష్ట్రాలు