తెలుగు రాష్ట్రాలు

19:59 - November 22, 2017

శాసనాలు తయారు చేయడానికి..చట్టాలపై శాసనసభ సమావేశాల్లో చర్చ జరగాలని..బిల్లులపై..లోతైన చర్చ జరిగితేనే దానికొక పరిష్కారం దొరుకుతుందని సీపీఎం శాసనసభాపక్ష మాజీ నేత జూలకంటి రంగారెడ్డి పేర్కొన్నారు. రెండు తెలుగు రాష్ట్రాల్లో అసెంబ్లీ సమావేశాలు సజావుగా సాగుతున్నాయా ? దానిపై ఆయనతో టెన్ టివి ప్రత్యేకంగా ముచ్చటించింది. జూలకంటి 15 ఏళ్ల పాటు శాసనసభ్యుడిగా పనిచేశారు. అంతేగాకుండా ఐదేళ్లు శాసనసభాపక్ష నేతగా సీపీఎం సభ్యుడిగా కొనసాగారు. వివిధ సభా సంఘాల్లో సభ్యుడిగా పనిచేశారు. బడ్జెట్ సమావేశాలు జరిగే సమయంలో బడ్జెట్ పద్దులపై చర్చ జరగాల్సి ఉంటుందని, కానీ అలా జరగదన్నారు. కొంతమంది సభ్యులు పుస్తకాలు చదవడం లేదని..అధ్యయనం చేయడం లేదన్నారు. కొంతమంది సీనియర్లు మాత్రం..కొన్ని భావాలు కలిగిన వారు అధ్యయనం చేసి వస్తున్నారని..కానీ వీరికి అవకాశం ఇవ్వడం లేదన్నారు. ప్రిపేర్ అయి వెళితే అక్కడ అవకాశం దొరకడం లేదని..భావించి కొందరు అధ్యయనం చేయడం లేదన్నారు. గతంలో పుస్తకాలను అధ్యయం చేసి సభకు వెళ్లేవారనన్నారు. నిజాయితీగా..బాధ్యతగా ఉన్న వారు ఎన్నిక కావాలని..చట్టసభలో వ్యవహరించాల్సిన పాత్ర..బిల్లులపై..ప్రజా సమస్యలపై అధ్యయనం చేయడం..సభ ద్వారా ప్రభుత్వ దృష్టికి తీసుకెళ్లే విధంగా చేయాలన్నారు. పూర్తి వివరాలకు వీడియో క్లిక్ చేయండి. 

21:30 - November 14, 2017

ఢిల్లీ : దేశవ్యాప్తంగా 123 విద్యాసంస్థలు యూనివర్సిటీ ట్యాగ్‌లైన్‌ను కోల్పోయాయి. ఇందులో తెలుగు రాష్ట్రాల్లోని పలు ప్రైవేటు విద్యాసంస్థలు ఉన్నాయి. విశాఖకు చెందిన గీతం, గుంటూరుకు చెందిన కోనేరు లక్ష్మయ్య ఎడ్యుకేషన్‌ ఫౌండేషన్‌, తిరుపతికి చెందిన రాష్ట్రీయ సాంస్క్రీట్‌ విద్యాపీఠ్‌, అనంతపురంకు చెందిన శ్రీ సత్యసాయి ఇనిస్టిట్యూట్‌ ఆఫ్‌ హయ్యర్‌ లెర్నింగ్‌, గుంటూరుకు చెందిన విజ్ఞాన్‌ ఫౌండేషన్‌ ఫర్‌ సైన్స్‌ టెక్నాలజీ రీసెర్చ్‌, ఇండియన్‌ ఇనిస్టిట్యూట్‌ ఆఫ్‌ సైన్స్‌ బెంగళూరు. వెల్లూరు ఇనిస్టిట్యూట్‌ ఆఫ్‌ టెక్నాలజీ, ఎస్‌ఆర్‌ఎం ఇనిస్టిట్యూట్‌ ఆఫ్‌ సైన్స్‌ అండ్‌ టెక్నాలజీ ఉన్నాయి. ఈ విద్యాసంస్థలు కొత్త పేరు కోసం కేంద్ర మానవ వనరుల అభివృద్ధి శాఖకు మళ్లీ దరఖాస్తు చేసుకోవాలని యూజీసీ ఆదేశించింది. 

20:29 - November 14, 2017

నిన్నియాళ్ల ఫేస్ బుక్కులళ్ల.. వాట్సప్ గ్రూపులళ్ల.. ఒక పోట్వ గిర్రా గిర్రా తిర్గుతున్నది.. కేరళ ముఖ్యమంత్రి ఎందుకు గొప్పోడు.. మన తెల్గు రాష్ట్రాల ముఖ్యమంత్రులు ఎందుకు సన్నాసులైండ్రు అనేది కుద్దు అచ్చరాలు రాశి అండ్లిండ్ల తింపుతున్నరు.. నిజంగ కేరళ ముఖ్యమంత్రి మన సీఎంలకంటె తోపా..? తోపైతె ఎట్ల తోపు అనేది ఒక్కపారి జూడాలంటే వీడియో క్లిక్ చేయండి...

21:20 - November 4, 2017

హైదరాబాద్ : కార్తీక పౌర్ణమి సందర్భంగా రెండు తెలుగు రాష్ట్రాల్లో కార్తీక శోభ సంతరించుకుంది. తెల్లవారు జామునుంచే శైవక్షేత్రాలన్నీ భక్తులతో పోటెత్తాయి. కార్తీక స్నానాలు, కార్తీక పూజలతో తెలుగు రాష్ట్రాల ప్రజలు భక్తి పారవశ్యంలో మునిగిపోయారు. కార్తీక పౌర్ణమిని పురస్కరించుకొని ఉదయం నుంచే భక్తులు శివాలయాలకు క్యూ కట్టారు. హైదరాబాద్‌- ఎల్‌బీ నగర్‌లోని శ్రీ రాజరాజేశ్వర ఆలయంలో ఉదయం 4 గంటల నుండే భక్తులు శివునికి ప్రత్యేక అర్చనలు, అభిషేకాలు నిర్వహించారు. నాచారంలోని మహంకాళీ సహిత మహా కాళేశ్వర స్వామి దేవస్థానంలో భక్తులు ప్రత్యేక పూజలు నిర్వహించి, కార్తీక దీపాలు వెలిగించారు.

మేడ్చల్‌ జిల్లా కీసరగుట్ట శ్రీ భవాని రామలింగేశ్వర స్వామి ఆలయానికి భక్తులు పెద్ద సంఖ్యలో హాజరయ్యారు. నగర నలుమూలల నుంచి వచ్చే భక్తుల కోసం కీసరగుట్టకు ప్రత్యేక బస్సులు ఏర్పాటు చేశారు. భక్తులకు ఎలాంటి ఇబ్బందులు కలగకుండా ఆలయ అధికారులు అన్ని జాగ్రత్తలు తీసుకున్నారు.

నల్లగొండ జిల్లాలో కార్తీక పౌర్ణమి సందర్భంగా ప్రజలు పెద్ద ఎత్తున కార్తీక పూజలు నిర్వహించారు. జిల్లాలోని వాడపల్లిలో ఉదయం నుండే భక్తుల కృష్ణా నదిలో పుణ్యస్నానాలు ఆచరించి శివునికి ప్రత్యేక అభిషేకాలు నిర్వహించారు. కార్తీక పౌర్ణమి కావడంతో యాదాద్రిలో భక్తుల రద్దీ పెరిగింది. పౌర్ణమికి ఒకరోజు ముందుగానే కొండకు చేరుకున్న భక్తులు ఉదయాన్నే విష్ణుపుష్కరినిలో స్నానాలాచరించి కార్తీక దీపాలు వెలిగించారు. సత్యనారాయణస్వామి వ్రతాలు నిర్వహించారు. భక్తుల రద్దీ పెరగడంతో నారసింహుడి దర్శనానికి నాలుగు గంటల సమయం పట్టింది. ఆలయంలో భక్తులకు కావలసిన అన్ని ఏర్పాట్లు చేసినట్లు ఈవో గీతారెడ్డి తెలిపారు. జగిత్యాల జిల్లా ధర్మపురిలో కార్తీక పౌర్ణమి వేడుకలు ఘనంగా జరిగాయి. ఉమ్మడి కరీంనగర్‌ జిల్లా నుండే కాకుండా ఇతర జిల్లాల నుండి భక్తులు ఉదయం నుండే పెద్ద సంఖ్యలో గోదావరి నదికి చేరుకొని పుణ్య స్నానాలు ఆచరించారు. అనంతరం నరసింహ స్వామిని దర్శనం చేసుకొని మొక్కులు చెల్లించుకున్నారు. కార్తీక మాసంలో నదీ స్నానం ఆచరించి దీపదానాలు చేసి దీపాలు నదిలో వదలడం వలన సకల శుభాలు కలుగుతాయని భక్తులు నమ్ముతారు. కార్తీక పౌర్ణమి పురస్కరించుకొని జగిత్యాల జిల్లా మెట్‌పల్లిలో ఆలయాలన్నీ కిటకిటలాడాయి. పట్టణంలోని ఓంకారేశ్వరస్వామి ఆలయంలో తెల్లవారుజాము నుండే భక్తుల రద్దీ కొనసాగింది. మహిళలు గోదుమ పిండితో తయారు చేసిన ప్రమిదలతో దీపాలను వెలిగించి స్వామివారిని కొలిచారు.

కృష్ణా జిల్లా, మచిలీపట్నం మంగినపూడి బీచ్ కార్తీక శోభ సంతరించుకుంది. కార్తీక పౌర్ణమి సందర్భంగా సముద్రుడికి హారతి ఇచ్చి సముద్ర స్నానాలను న్యాయశాఖా మంత్రి కొల్లు రవీంద్ర ప్రారంభించారు. విజయవాడ పవిత్ర కృష్ణా నదిలో భక్తులు పుణ్యస్నానాలు ఆచరించారు.

ఉభయ గోదావరి జిల్లాలో కార్తీక శోభ సంతరించుకుంది. పశ్చిమ గోదావరి జిల్లా భీమవరం శ్రీరాంపురంలో ఉన్న శ్రీ చక్రసహిత జగన్మాత కనకదుర్గాదేవి ఆలయంలో లక్ష దీపోత్సవం కనుల పండుగగా నిర్వహించారు. భక్తులు కార్తీక దామోదరుడిని స్మరిస్తూ దీపాలను వెలిగించి పూజలు నిర్వహించారు. పాలకొల్లులోని రామలింగేశ్వర క్షేత్రం భక్తులతో కిటకిటలాడింది. తూర్పుగోదావరి జిల్లా గంగవరం మండలం కోటిపల్లిలో శ్రీఛాయ సోమేశ్వర స్వామి ఆధ్వర్యంలో గోదావరి హారతి నిర్వహించారు. గోదావరి తీరాన సంస్కృతి కార్యక్రమాలు ప్రజలను ఆకట్టుకున్నాయి.

గుంటూరు జిల్లా నరసరావు పేటలోని కోటప్పకొండ ఆలయంలో శివనామస్మరణతో మారుమ్రోగింది. త్రికోటేశ్వరుణ్ణి దర్శించుకునేందుకు భక్తులు ఆలయానికి పోటెత్తారు. మహిళలు పెద్ద ఎత్తున హాజరై కోటి దీపోత్సవ వేడుకల కార్యక్రమాన్ని నిర్వహించారు.

ప్రకాశం జిల్లా చీరాల పట్టణంలో సముద్ర స్నానానికి భక్తులు భారీగా తరలివచ్చారు. సముద్రతీరంలో ఇసుకతో శివలింగ ప్రతిమలు చేసి కార్తీక జ్యోతులను వెలిగించి ప్రత్యేక పూజలు నిర్వహించారు. భక్తులు పెద్ద ఎత్తున తరలి రావడంతో ఆయా ప్రాంతాలన్నీ భక్త జనంతో కిక్కిరిసి పోయాయి. కార్తీక పౌర్ణమి కావడంతో తెలుగు రాష్ట్రాల్లోని ఆలయాన్నీ భక్తులతో కిటకిటలాడాయి. శివునికి ప్రత్యేక పూజలు నిర్వహించిన భక్తులు శివనామస్మరణతో భక్తి పారవశ్యన్ని చాటుకున్నారు. 

18:12 - October 20, 2017

హైదరాబాద్ : తెలుగు రాష్ట్రాల గవర్నర్ నరసింహన్ ఇంట్లో విషాదం నెలకొంది. ఆయన మాతృమూర్తి విజయలక్ష్మి (94) తుది శ్వాస విడిచారు. గత కొంతకాలంగా ఆమె అనారోగ్యంతో బాధ పడుతున్నారు. శుక్రవారం విజయలక్ష్మి కన్నుమూశారు. ఈ విషయం తెలుసుకున్న తెలుగు రాష్ట్రాల ముఖ్యమంత్రులు కేసీఆర్, చంద్రబాబు నాయుడులు తమ ప్రగాఢ సంతాపాన్ని తెలియచేశారు. వెంటనే కేసీఆర్ రాజ్ భవన్ కు వెళ్లి విజయలక్ష్మి పార్థీవ దేహానికి నివాళులర్పించారు. అనంతరం పంజగుట్టలో అంత్యక్రియలు జరిగాయి. 

14:52 - October 17, 2017

యువతలో అద్భుతమైన ఆలోచనలున్నాయి. వారు సమసమాజ నిర్మాతలు. భవిష్యత్ కు దిశా..నిర్ధేశం చేసే మేధావులు..వినూత్న ఆలోచనలతో దేశాన్ని ముందుకు నడిపించే సామర్థ్యం యువత సొంతం. స్వయంగా ఐక్య రాజ్య సమితి నివేదిక ప్రకటించింది. ప్రపంచ జనాభాలో అత్యధిక యువత శక్తి గల దేశం కూడా భారతదేశం కావడం విశేషం. కానీ సామాజిక, ఆర్థిక, రాజకీయ భాగస్వామ్యంలో యువత పాత్ర తక్కువగా ఉన్న దేశాల్లో కూడా భారత్ ముందుంది. ఆత్మహత్యలకు పాల్పడుతున్న యువతీ, యువకుల సంఖ్య ఎక్కువగా ఉంటోంది. క్షణికావేశాలకు లోనై ఆత్మహత్యలకు పాల్పడుతున్నారు. అసలు యువతీ, యువకులకు మనోస్థైర్యం విషయంలో ఎందుకు ఇంత జావ కారిపోతున్నారు. నేటి యువతలో ఆత్మవిశ్వాసం లోపిస్తోందా ? ఈ అంశాలపై 'మానవి' వేదికలో ఫోకస్ మల్లవరపు బాలరత్న (మినిస్ట్రీ ఆఫ్ డిప్యూటి డైరెక్టర్) పాల్గొని అభిప్రాయాలు వ్యక్తం చేశారు. పూర్తి వివరాలకు వీడియో క్లిక్ చేయండి. 

21:49 - October 16, 2017

హైదరాబాద్ : తెలుగు రాష్ట్రాల్లో విద్యార్థుల ఆత్మహత్యలు కొనసాగుతునే ఉన్నాయి. ఈరోజూ ఏపీలో ఓ ఇంటర్‌ విద్యార్థిని ఆత్మహత్య చేసుకుంది. ప్రైవేటు కాలేజీల్లో విద్యార్థుల మరణాలకు యాజమాన్యాలు అనుసరిస్తున్న విధానాలే కారణమని విద్యార్థి సంఘాలు ఆరోపిస్తున్నాయి. వీరిని నియంత్రించకుండా చేష్టలుడిగిన ప్రభుత్వ తీరుకు నిరసనగా.. రాష్ట్రాల్లో ఈరోజు ప్రైవేటు విద్యాసంస్థలను బంద్‌ చేయించాయి. ఒత్తిడి పెరుగుతుండడంతో.. తెలుగు రాష్ట్రాల ప్రభుత్వాలు దిద్దుబాటు చర్యలకు శ్రీకారం చుట్టాయి. 
వరుస ఆత్మహత్యలు తీవ్ర ఆందోళన
తెలుగు రాష్ట్రాల్లో విద్యార్థుల వరుస ఆత్మహత్యలు తీవ్ర ఆందోళనను కలిగిస్తున్నాయి. కన్నవారికి తీరని కడుపుకోతను మిగులుస్తున్నాయి. ప్రైవేట్‌ కాలేజీల్లో.. ఎక్కడో ఓ చోట ప్రతిరోజూ విద్యార్థుల సూసైడ్స్‌ జరుగుతూనే ఉన్నాయి. ర్యాంకుల వేటలో బలవంతపు చదువులు రుద్దడమే దీనికి కారణమన్న భావన వ్యక్తమవుతోంది. ప్రైవేటు యాజమాన్యాల తీరుకు.. వారిని నియంత్రించలేని ప్రభుత్వాల వైఖరిని నిరసిస్తూ.. విద్యార్థి సంఘాలు.. సోమవారం, తెలుగు రాష్ట్రాల్లో ప్రైవేటు విద్యాసంస్థలను బంద్‌ చేయించాయి. స్వేచ్ఛావాతవరణంలో చదువులు సాగేలా.. కార్పొరేట్‌ కాలేజీలను ఆదేశించాలని విద్యార్థి సంఘాల నేతలు డిమాండ్‌ చేశారు. 
విద్యాసంస్థల బంద్ ప్రశాంతం 
విద్యార్థుల ఆత్మహత్యలను నిరసిస్తూ విద్యార్థి సంఘాల నేతలు తలపెట్టిన విద్యాసంస్థల బంద్ విజయవాడలో ప్రశాంతంగా కొనసాగింది. కృష్ణాజిల్లాలో 10 రోజుల్లో 7 మందికి పైగా విద్యార్థులు ఆత్మహత్యలు చేసుకోవడంపై విద్యార్ధి సంఘాలు ఆగ్రహం వ్యక్తం చేశాయి. మంత్రులు  నారాయణ, గంటా శ్రీనివాసరావులను తక్షణమే బర్తరఫ్‌ చేయాలని, ఆత్మహత్యలపై సిట్టింగ్ జడ్జితో విచారణ జరిపించాలని విద్యార్థి సంఘాల నేతలు డిమాండ్ చేశారు. ప్రభుత్వం చర్యలు తీసుకోకపోతే ఉద్యమాన్ని ఉద్ధృతం చేస్తామని హెచ్చరించారు. తెలంగాణలోనూ విద్యార్థి సంఘాలు ప్రైవేటు, కార్పొరేట్‌ కాలేజీల బంద్‌ పాటించాయి. అటు విశాఖలోనూ విద్యార్థి సంఘాలు కదం తొక్కాయి. జనసేన విద్యార్థి విభాగం ఆధ్వర్యంలో ధర్నాకు దిగాయి. విద్యార్థులు పెద్ద సంఖ్యలో చనిపోతున్నా... సర్కార్‌ స్పందించడం లేదని విద్యార్థి సంఘాల నేతలు ఆగ్రహం వ్యక్తం చేశారు. విద్యాశాఖ మంత్రి గంటా తన వియ్యంకుడి కాలేజీలపై చర్యలు తీసుకునేందుకు ఎందుకు భయపడుతున్నారని ప్రశ్నించారు. 
ఇరు రాష్ట్రాల ప్రభుత్వాల్లో కదలిక
విద్యార్థి సంఘాల ఆందోళనతో ఇరు రాష్ట్రాల ప్రభుత్వాల్లో కదలికవచ్చింది. అమరావతిలో విద్యాశాఖ అధికారులతో సీఎం చంద్రబాబు సమావేశమయ్యారు. ప్రైవేటు కాలేజీలు వ్యవహరిస్తున్న తీరుపై తీవ్ర అసహనం వ్యక్తం చేశారు. కాలేజీల్లో విద్యార్థుల ఆత్మహత్యల నివారణకు తీసుకోవాల్సిన చర్యలపై చర్చించారు. ఇందులో భాగంగా, 10వ తరగతి, సీబీఎస్‌ఈలో ఉన్న గ్రేడింగ్‌ విధానాన్ని ఇంటర్‌లోనూ ఈ ఏడాది నుంచే ప్రవేశపెట్టాలని  నిర్ణయించారు. వీటితో పాటు..విద్యార్థుల ఆత్మహత్యల నివారణకు అధికారులు, ప్రైవేటు కాలేజీ అసోసియేషన్‌ సభ్యులు విద్యార్థి సంఘాల నాయకులతో కమిటీని ఏర్పాటు చేయాలని నిర్ణయించారు. 2012 నుంచి ఇప్పటివరకు 35 మంది విద్యార్థులు చనిపోయినట్లు ప్రభుత్వం అధికారికంగా వెల్లడించింది. ఈ ఆత్మహత్యలు కూడా అత్యధికంగా నారాయణ, చైతన్య కాలేజీల్లోనే జరిగాయన్న వాస్తవాన్నీ ప్రభుత్వం అంగీకరించింది. 

 

21:46 - October 15, 2017

హైదరాబాద్ : తెలుగు రాష్ట్రాల్లో విస్తారంగా వర్షాలు పడుతున్నాయి. రెండు రాష్ట్రాల్లోని చిన్నా, పెద్ద ప్రాజెక్టుల్లో జలకళ వచ్చింది. పలు జిల్లాల్లో  కుండపోత వానలతో పంటలు నీటిపాలయ్యాయి. ఇటు హైదరాబాద్‌ను మరోసారి భారీవర్షం ముంచెత్తింది. దీంతో రోడ్లన్నీ జలమయం అయ్యాయి. ట్రాఫిక్‌ జామ్‌లతో సిటీజనం నానా అవస్థలు పడుతున్నారు. మరోవైపు బంగాళాఖాతంతో అల్పపీడనం ఏర్పడటంతో మరో 3 రోజులు ఏపీ, తెలంగాణలకు భారీవర్షాలు తప్పవని విశాఖ వాతావరణశాఖ తెలిపింది.
హైదరాబాద్‌ను వదలని వరుణుడు  
హైదరాబాద్‌ను వరుణుడు వదలడంలేదు. భారీవర్షాలు ముంచెత్తడంతో సిటీ జనం అవస్థలు పడుతున్నారు. ఎల్బీనగర్, వనస్థలిపురం, బీఎన్‌రెడ్డి నగర్‌, హయత్‌నగర్‌లో కుండపోతగా వర్షం కురిసింది. గత పది రోజులుగా వర్షాలు కురుస్తుండడంతో జనజీవనం అతలాకుతలమైంది. ప్రతిరోజూ ఏదో ఒక సమయంలో నగరంలోని ఆయా ప్రాంతాల్లో వర్షం కురుస్తూనే ఉంది. అటు శివారు ప్రాంతాల్లో కూడా భారీగానే వర్షాలు కురుస్తున్నాయి. ఇప్పటికే డ్రైనేజీలన్నీ వర్షపు నీటితో నిండిపోయాయి. నాలాలు పొంగిపొర్లుతున్నాయి. భారీవర్షాలతో  అటు  నిజమాబాద్‌, కామారెడ్డి జిల్లాల్లో వేల ఎకరాల్లో పంటలు నాశనం అయ్యాయి. నిజామాబాద్‌జిల్లాలో వరిపంటను వర్షాలు దారుణంగా దెబ్బతీయగా.. కామారెడ్డి జిల్లాలో చేతికవచ్చిన పత్తిపంట నేలపాలయిందని అన్నదాతలు ఆవేదన చెందుతున్నారు.  
ఏపీలోనూ 
ఏపీలోనూ భారీవర్షాలకు పంటలు నేలరాలాయి. అనంతపురం, కర్నూలు జిల్లాల్లో  ఇటీవల కురిసిన  వర్షాలకు  మొత్తం 31.161 హెక్టార్లలో వివిధ పంటలకు తీవ్ర నష్టం వాటిల్లిందని జిల్లా అధికారులు తెలిపారు. కర్నూలు జిల్లావ్యాప్తంగా దాదాపు 834  కిలోమీటర్ల మేర రహదారులు దెబ్బతిన్నాయని, అలాగే 365  కిలోమీటర్ల మేర పంచాయతీ రాజ్ రోడ్లు దెబ్బతిన్నాయని జిల్లా అధికారులు లెక్కలు వేశారు.  
నిండుకుండలా ఆల్మట్టీ, శ్రీరాం సాగర్, శ్రీశైలం
మరోవైపు తెలుగు రాష్ట్రాల్లోని ముఖ్యమైన ప్రాజెక్టులన్నీ జలకళతో తొణికిసలాడుతున్నాయి. ఎగువన కురుస్తున్న వర్షాలతో పాటు రెండు రాష్ట్రాల్లో విస్తారంగా వర్షాలు కురుస్తుండడంతో ప్రాజెక్టుల్లోకి భారీగా వరదనీరు వచ్చి చేరుతోంది. దీంతో ఆల్మట్టీ, శ్రీరాం సాగర్, శ్రీశైలం, సింగూరు , నిజాంసాగర్, తదితర ముఖ్యమైన ప్రాజెక్టులన్నీ నీటితో నిండుకుండలా మారాయి. శ్రీశైలం ప్రాజెక్టులోకి ఇన్‌ఫ్లో ఎక్కువగా ఉండడంతో అధికారులు గేట్లు ఎత్తి నీటిని దిగువకు వదులుతున్నారు. దీంతో నాగార్జున సాగర్‌ నీటి మట్టం అమాంతం పెరిగుతోంది.  అయితే నాగార్జున సాగర్ నిండడానికి మరికొన్ని రోజులు పట్టే అవకాశం ఉందని అధికారులు అంటున్నారు. అటు  నిజామాబాద్ జిల్లాలోని  శ్రీరాంసాగర్ ప్రాజెక్టుకు కూడా భారీగా వరద నీరు వచ్చి చేరడంతో ప్రాజెక్టు నిండుకుండలా మారింది. దీంతో అధికారులు ప్రాజెక్టు గేట్లు ఎత్తి నీటిని కిందికి వదిలారు. 
బంగాళాఖాతంలో అల్పపీడనం
ఇదిలావుంటే బంగాళాఖాతంలో అల్పపీడనం ఏర్పడింది.. దీని ప్రభావంతో ఏపీలో పలుచోట్ల  భారీవర్షాలు పడే అవకాశం ఉందని విశాఖ వాతావరణ కేంద్రం తెలిపింది. మరోవైపు తెలంగాణలో  ఉపరితల ఆవర్తనం కొనసాగుతూనే ఉంది. భారీగా క్యూములోనింబస్‌ మేఘాలు ఏర్పడి.. హైదరాబాద్‌తోపాటు, పలు జిల్లాల్లో మరో 3రోజులు భారీ వర్షాలు పడతాయని వాతావరణ శాఖ అధికారులు తెలిపారు. 

 

21:50 - October 14, 2017

హైదరాబాద్ : తెలుగు రాష్ట్రాల్లో వరుణ ప్రతాపం కొనసాగుతూనే ఉంది. ప్రవాహం పెరగడంతో.. శ్రీశైలం ఏడుగేట్లు ఎత్తి సాగర్‌కు నీటిని వదులుతున్నారు. వరుసగా కురుస్తున్న వర్షాలతో రాయలసీమలో వాగులు, వంకలు పొంగిపొర్లుతున్నాయి. ఓవైపు ప్రజలు ఇబ్బందులు ఎదుర్కొంటుండగా... మరోవైపు ప్రాజెక్టుల్లోకి భారీగా నీరు చేరి... జలకళను సంతరించుకుంటున్నాయి. మరోవైపు భాగ్యనగరంలో విషాదం చోటు చేసుకుంది. నాలాలో పడి ఓ వ్యక్తి మృత్యువాతపడ్డాడు. 

తెలుగు రాష్ట్రాల్లో వర్షాలు ఇంకా కురుస్తునే ఉన్నాయి. దీంతో శ్రీశైలం జలాశయానికి వరద ఉధృతి పెరుగుతోంది. ఎగువ పరివాహక ప్రాంతం నుంచి వరద ప్రవాహం అధికమవడంతో శ్రీశైలంలో ఏడు గేట్లు పది అడుగుల మేర ఎత్తి .. నాగార్జున సాగర్‌కు నీటిని విడుదల చేశారు. శ్రీశైలం జలాశయానికి 2లక్షల 33వేల 989 క్యూసెక్కుల ప్రవాహం వస్తోంది. శ్రీశైలం ఆనకట్ట స్పిల్‌వే ద్వారా లక్షా 67వేల క్యూసెక్కుల నీరు విడుదల అవుతోంది. దీంతో శ్రీశైలం కుడి, ఎడమ జలవిద్యుత్తు కేంద్రాల్లో ముమ్మరంగా విద్యుత్తు ఉత్పత్తి చేస్తున్నారు. మరోవైపు పోతిరెడ్డిపాడు హెడ్‌ రెగ్యులేటర్‌కు 11వేల క్యూసెక్కులు, కల్వకుర్తి ఎత్తిపోతల పథకానికి 24వేల క్యూసెక్కులు, హంద్రీనీవా ప్రాజెక్టుకు 1688 క్యూసెక్కుల నీరు విడుదల అవుతోంది. ప్రస్తుతం శ్రీశైలం జలాశయం నీటిమట్టం 884.40 అడుగులు, నీటి నిల్వ సామర్థ్యం 211.95 టీఎంసీలుగా నమోదైంది.

భారీ వర్షాలతో రాయలసీమలో వాగులు, వంకలు పొంగిపొర్లుతున్నాయి. పలు ప్రాంతాల్లో కట్టలకు గండ్లు పడి... ఇళ్లలోకి నీళ్లు చేరుతున్నాయి. దీంతో ప్రజలు అనేక ఇబ్బందులు పడుతున్నారు. 

కడప జిల్లా బద్వేల్‌లో ఉరుములు, మెరుపులతో కూడిన భారీ వర్షం కురిసింది. దీంతో రోడ్లన్నీ జలమయమయ్యాయి. బద్వేల్ డిపోలోకి నీరు చేరడంతో.. డిపోలో పనులకు ఆటంకం ఏర్పడింది. బస్టాండ్‌కు బయట రోడ్డుకు ఇరువైపులా ఆక్రమణలు జరగడంతో డిపో నుంచి నీరు బయటకు రాని పరిస్థితి ఏర్పడింది. రోడ్డుపై నీళ్లు నిలవడంతో వాహనదారులు, ప్రజలు ఇబ్బందులు పడ్డారు. అలాగే పోరుమామిళ్లలో కూడా ఇదే స్థాయిలో వర్షం కురిసింది. పోరుమామిళ్ల బస్టాండులోకి కూడా నీరు చేరడంతో ప్రయాణికులు ఇబ్బందులు ఎదురుకున్నారు.

గత కొన్ని రోజులుగా కురుస్తున్న వర్షాలకు కడపకు సమీపంలో ఉన్న బుగ్గవంక ప్రాజెక్ట్‌ నిండుకుండను తలపిస్తోంది. ఎగువ ప్రాంతాల నుంచి వస్తున్న వర్షం నీటితో ప్రాజెక్ట్‌ నిండిపోయింది. దీంతో అధికారులు దిగువకు నీటిని విడుదల చేస్తున్నారు. ప్రాజెక్ట్‌లోకి ఇన్‌ఫ్లో 200 క్యూసెక్కుల నీరు చేరుతుండగా... ఒక గేటు ఓపెన్‌ చేసి 150 క్యూసెక్కుల నీటి దిగువకు వదులుతున్నారు. 

భారీ వర్షాలతో కర్నూలు జిల్లాలో హంద్రీనీవా ప్రధాన కాలువకు పత్తికొండ మండలం దూదూకొండ దగ్గర గండిపడింది. రెండు రోజుల నుంచి కురుస్తున్న వర్షాలతో ప్రధాన కాలువకట్ట.. బలహీనపడింది. కాలువలో ప్రవాహం ఎక్కువగా ఉంటంతో గండిపడినట్టు తెలుస్తోంది. మరో మూడు చోట్ల కూడా భారీగా గండిపడే అవకాశం ఉందని స్థానికులు భయపడుతున్నారు.

ఇక తెలంగాణలోనూ వర్షాలు కురుస్తూనే ఉన్నాయి. హైదరాబాద్‌లో కురుస్తున్న వర్షాలకు నగరవాసులు ఇబ్బందులు ఎదుర్కొంటున్నారు. మరోవైపు జీడిమెట్ల పరిధిలోని మధుసూదన్‌నగర్‌లో విషాదం చోటు చేసుకుంది. ఉధృతంగా ప్రవహిస్తున్న నాలాలో పడి ఓ వ్యక్తి మృతి చెందాడు. కాపాడేందుకు స్థానికులు చేసిన ప్రయత్నాలు ఫలించలేదు. కిలోమీటర్‌ దూరంలో గణేష్‌ మృతదేహం లభించింది. 

21:54 - October 10, 2017

హైదరాబాద్ : గత కొన్ని రోజులుగా కురుస్తున్న వర్షాలకు తెలుగు రాష్ట్రాల ప్రజలు భయపడే పరిస్థితి వచ్చింది. భారీ వర్షాలతో వాగులు, వంకలు పొంగిపొర్లుతున్నాయి. ప్రాజెక్టుల్లోకి భారీగా వరద నీరు వచ్చి చేరుతుండడంతో జలకళ సంతరించుకుంటుంది. మరోవైపు అకాల వర్షాలతో పంట నష్టపోయి రైతన్నలు ఆవేదన వ్యక్తం చేస్తున్నారు. లోతట్టు ప్రాంతాలు నీటి మునగడంతో జనాలు ఆందోళన చెందుతున్నారు. 
ఉపరితల ద్రోణి..
ఉపరితల ద్రోణి ప్రభావంతో... తెలుగు రాష్ట్రాలను వర్షాలు ముంచెత్తుతున్నాయి. గత కొన్ని రోజులుగా కురుస్తున్న భారీ వర్షాలకు వాగులు, వంకలు పొంగిపొర్లుతున్నాయి. చాలా ప్రాంతాల్లో ఇళ్లలోకి నీళ్లు చేరడంతో జనాలు ఆందోళన చెందుతున్నారు. 
కర్నూలులో
కర్నూలు జిల్లా ఎమ్మిగనూరులో భారీ వర్షం కురిసింది. సోమప్పనగర్‌, శివన్ననగర్‌, ఎన్టీఆర్‌ కాలనీలోని లోతట్టు ప్రాంతాలలో నీళ్లు ఇళ్లలోకి చేరాయి. మరమగ్గాలు నీటిలో తడవడంతో చేనేతలు ఆందోళన వ్యక్తం చేస్తున్నారు. ఇళ్లలో ఉన్న నిత్యావసరాలు తడిసిపోవడంతో ప్రజలంతా దిక్కుదోచని స్థితిలో పడ్డారు. ఇక మంత్రాలయం నియోజకవర్గంలోనూ భారీ వర్షాలకు వాగులు పొంగి పొర్లుతున్నాయి. దీంతో ప్రజలు భయాందోళనలకు గురవుతున్నారు. 
అనంతపురంలో 
అనంతపురం జిల్లా వ్యాప్తంగా భారీ వర్షాలు కురుస్తున్నాయి. కుండపోతగా కురుస్తున్న వర్షాలకు  గుత్తి గుంతకల్‌, పామిడి, తాడిపత్రి, పుట్టపర్తి, హిందూపురం, గోరంట్ల, కదిరి, శింగనమల ప్రాంతాలు జలమయం అయ్యాయి. గ్రామాలు చెరువులను తలపిస్తున్నాయి. పలు చోట్ల ప్రభుత్వ కార్యాలయాలు నీట మునిగాయి. వర్షపు నీటితో పాటు పాములు, పురుగులు ఇళ్లల్లోకి వస్తుండటంతో గ్రామస్తులు భయాందోళనకు గురవుతున్నారు.  సహాయక చర్యలు కూడా అంతంతమాత్రంగానే కనిపిస్తున్నాయి. మరోవైపు గుత్తి మండలం పాతకొత్త చెరువులో రైల్వే ట్రాక్‌పైకి వర్షపు నీరు  చేరింది. దీంతో రైళ్ల రాకపోకలకు అంతరాయం ఏర్పడింది.
కడపలో 
కడప జిల్లా జమ్మలమడుగు నియోజకవర్గంలో కురిసిన వర్షానికి.. చిత్రవాతి, పెన్నానదులు ఉధృతంగా ప్రవహిస్తున్నాయి. గండికోట ప్రాజెక్ట్‌లోకి భారీగా వరద నీరు చేరుతుంది. దీంతో తిమ్మాపూర్‌ సమీపంలోని గ్రామాలకు రాకపోకలు నిలిచిపోయాయి. కోసినేపల్లి గ్రామం వద్ద ఓ వ్యక్తి వాగు దాటుతూ గల్లంతయ్యాడు. 
నిజామాబాద్‌ లో 
భారీ వర్షాలకు చేతికి వచ్చిన పంట చేతికి అందకుండా పోతుందని నిజామాబాద్‌ జిల్లా రైతులు ఆందోళన వ్యక్తం చేస్తున్నారు. నవీపేట, రెంజల్‌, ఎడపల్లిలో భారీ వర్షంతో వందల ఎకరాల్లో పంట నేలరాలింది. పంట నష్టపోయినా అధికారులు పట్టించుకోవడం లేదని రైతులు ఆవేదన వ్యక్తం చేస్తున్నారు. అప్పులు చేసి పంటలు పండిస్తే... వర్షాలు తమ కొంపలు ముంచాయని రైతులు వాపోతున్నారు. 
కామారెడ్డిలో
ఇక కామారెడ్డి జిల్లాలో కురుస్తున్న వర్షాలకు... ఎండిన సోయా తడిసిపోవడంతో రైతులు ఆందోళన చెందుతున్నారు. అలాగే కోతకు సిద్దంగా ఉన్న వరి పంట నేలకొరిగి రైతన్నకు తీవ్ర నష్టం వాటిల్లింది. అకాల వర్షాలతో నష్టపోయిన తమను ఆదుకోవాలని రైతులు కోరుతున్నారు. 
వికారాబాద్‌ లో 
భారీ వర్షాలతో వికారాబాద్‌ జిల్లా తడిసిముద్దయ్యింది. విస్తారంగా కురుస్తున్న వర్షాలతో పత్తి పంటకు తీవ్ర నష్టం ఏర్పడింది. తమను ప్రభుత్వం ఆదుకోవాలని రైతన్నలు కోరుతున్నారు. 
నిండుకుండలా ప్రాజెక్టులు  
ఇదిలావుంటే తెలుగు రాష్ట్రాల్లో కురుస్తున్న భారీ వర్షాలకు ప్రాజెక్టులు నిండుకుండలా మారాయి. జూరాల ప్రాజెక్టుకు భారీగా వరద కొనసాగుతోంది. జూరాల ప్రాజెక్టు 14 గేట్లు ఎత్తి... నీటిని కిందకు వదులుతున్నారు. ఇక కోయిల్‌సాగర్‌ ప్రాజెక్ట్‌ పూర్తిస్థాయిలో నిండడంతో అధికారులు 8 గేట్లు ఎత్తి నీటిని విడుదల చేశారు. 2009 తర్వాత కోయిల్‌ సాగర్ జలాశయం గేట్లు ఎత్తడం ఇదే తొలిసారి. 
శ్రీశైలం జలాశయానికి వరదనీటి ప్రవాహం 
ఇక భారీగా కురుస్తున్న వర్షాలతో శ్రీశైలం జలాశయానికి వరదనీటి ప్రవాహం పోటెత్తింది. జూరాల, హంద్రీ నుంచి భారీగా వరదనీరు వచ్చి చేరుతోంది. వరద ప్రవాహం కొనసాగుతుండటంతో శ్రీశైలం జలవిద్యుత్తు కేంద్రంలో విద్యుదుత్పత్తి ముమ్మరంగా జరుగుతోంది. మొత్తానికి భారీ వర్షాలతో ఓ వైపు ప్రాజెక్టులు జలకళను సంతరించుకుంటుండగా... మరోవైపు అకాల వర్షాలతో పంటలు నష్టపోయి రైతన్నలు ఇబ్బందులు ఎదుర్కొంటున్నారు. 

 

Pages

Don't Miss

Subscribe to RSS - తెలుగు రాష్ట్రాలు