నారాయణ స్వామి

15:56 - December 6, 2018

పుదుచ్చేరి : మన ఇంటిలోకి పాము వచ్చిందంటే కొట్టి చంపేస్తాం. అటవీశాఖ అధికారులకు ఫోన్ చేస్తాం. అంతే తప్ప ఏకంగా ముఖ్యమంత్రిగారికి ఫోన్ చేసి రక్షించండి అని అడగం కదా? ఏం ఎందుకు సీఎంను అడగకూడదు అనుకున్నాడో పాము బాధితుడు. పాము నుండి రక్షించండి సీఎంగారూ అంటు ఏకంగా ఫోన్ కొట్టాడు. 
పుదుచ్చేరి రాష్ట్రం, అరియాంకుప్పవలో రాజా అనే వ్యాపారి ఇంట్లోకి ఓ త్రాచుపాము వచ్చింది. భయపడిన రాజా ఫారెస్ట్ అధికారులకు ఫోన్ చేశాడు. స్పందించకపోవటంతో టెలిఫోన్ డైరెక్టరీ తీసుకుని ఏకంగా పుదుచ్చేరి సీఎం నారాయణ స్వామికి ఫోన్ కొట్టాడు. ‘సార్.. మా ఇంట్లో పాము దూరింది. అధికారులకు ఫోన్ చేస్తే ఎవ్వరూ ఎత్తడం లేదు. దయచేసి సాయం చేయండి’ అని విజ్ఞప్తి చేశాడు. అర్ధరాత్రి ఫోన్ వచ్చినా విసుక్కోకుండా సీఎం నారాయణ స్వామి ఆయన అడ్రస్ తెలుసుకోవటమే కాకుండా రాజాకు ధైర్యం చెప్పారు. 
అంతేకాదు వ్యాపారి రాజా ఇంటికి వెంటనే వెళ్లాల్సిందిగా అధికారులను ఆదేశించి రాజా అడ్రస్ ను అటవీశాఖా అధికారులను తెలిపారు సీఎం నారాయణ స్వామి. కేంద్రపాలిత ప్రాంతమైన పుదుచ్చేరిలో డిసెంబర్ 5వ తేదీన రాత్రి జరిగింది. సీఎంగారి ఆదేశాలతో రాజా ఇంటికి వెళ్లిన వారు పామును పట్టుకోవడంతో రాజా కుటుంబ సభ్యులు ఊపిరి పీల్చుకున్నారు. సీఎం స్పందించిన తీరుపై నెటిజన్లు ప్రశంసలు కురిపిస్తున్నారు. 
 

12:43 - August 28, 2016

తల్లి రొమ్ము తెలువని..నా పెదవుల మీద..తడి ఆరని చనుబాల చారిక..పుండయి సలిపిన పసితనాన్ని ప్రేమగా పునికిన..ఫకీరు నెమలి ఈక....గుండె చెమర్చిపోయేలా చేసే ఈ వాక్యాలు.. నారాయణస్వామి ప్రచురించిన వానొస్తద అనే కొత్త కవితల పుస్తకంలొనివి. కల్లోల కలల మేఘం తో కవిత్వావరణంలోకి అడుగుపెట్టారు. అప్పుడు పెనుగాలులై వీచి.. జడివానలై కురిసి నల్లమబ్బులై విరిసి కవిత్వాక్షరాలుగా తనను తాను ఆవిష్కరించుకున్న నారాయణస్వామి... అమెరికాలో స్థిరపడిన తరువాత తన మూలాలను వెతుక్కుంటూ జ్ఞాపకాలతో మూటగట్టిన సందుకను రెండో పుస్తకంగా ప్రచురించారు. తాజాగా తెలంగాణ ఉద్యమంలోని సామూహిక వ్యక్తీకరణను.. వెలివాడల ఆత్మాభిమానాల దురాక్రమణలను ప్రశ్నిస్తూ.. ఒక్కొక్క పెంకును దగ్గర చేర్చి కొత్తకుండను చేసే చూపుల కోసం... వానొస్తద అంటూ ఒక ఆశగా వ్యక్తమయ్యారు తన మూడో పుస్తకంలో.. విప్లవ విద్యార్థి దశ ఆయన సాగించిన మూడు దశాబ్దాల కవిత్వయానంలోని మలుపులేవో... నడిపించిన అడుగులేవే తెలుసుకోవాలంటే వీడియో క్లిక్ చేయండి. 

21:09 - May 30, 2016

ఢిల్లీ : కాంగ్రెస్ సీనియర్ నేత వి.నారాయణస్వామి పుదుచ్చేరి లెఫ్ట్‌నెంట్‌ గవర్నర్‌ కిరణ్‌బేడిని కలుసుకున్నారు. ప్రభుత్వాన్ని ఏర్పాటు చేసేందుకు అనుమతించాలని ఆయన గవర్నర్‌కు విజ్ఞప్తి చేశారు. గవర్నర్‌ను కలిసిన వారిలో నారాయణస్వామితో పాటు పాండిచ్చేరి కాంగ్రెస్‌ చీఫ్‌ నమశివాయం , డిఎంకె నేతలు కూడా ఉన్నారు. పుదుచ్చేరి కాంగ్రెస్ శాసనసభాపక్ష నేతగా నారాయణ స్వామి ఏకగ్రీవంగా ఎన్నికైన విషయం తెలిసిందే. రాష్ట్ర లెఫ్టినెంట్ గవర్నర్‌గా కిరణ్‌బేడీ ఆదివారం ప్రమాణస్వీకారం చేశారు. పుదుచ్చేరిలో మొత్తం 30 సీట్లకు గాను కాంగ్రెస్-డిఎంకెలు 17 సీట్లు గెలుచుకున్నాయి.

Don't Miss

Subscribe to RSS - నారాయణ స్వామి