పార్టీ

07:27 - February 22, 2018

చెన్నై : తమిళ రాజకీయ యవనికపై సరికొత్తపార్టీ ఆవిష్కృతమైంది. లోకనాయకుడు కమల్‌హాసన్‌ నేతృత్వంలో నూతన పార్టీ పురుడుపోసుకుంది. విలక్షణ నటుడు నటుడు కమల్‌హాసన్‌ రాజకీయ రంగప్రవేశం చేశారు. బుధవారం మదురైలో పార్టీ పేరును, పతాకాన్ని ఆవిష్కరించారు. మక్కళ్‌ నీది మయ్యమ్‌ పేరుతో పార్టీని ఏర్పాటు చేస్తున్నట్టు ప్రకటించారు. త్వరలోనే ప్రజాక్షేత్రంలోకి దిగబోతున్నట్లు అభిమానుల హర్షధ్వానాల మధ్య ప్రకటించారు. ఐకమత్యాన్ని ప్రతిబింబించేలా రూపొందించిన పార్టీ జెండాను ఈ సందర్భంగా ఆయన ఆవిష్కరించారు. పార్టీ జెండాలో ఆరు చేతులు ఒకదాన్కొకటి మణికట్టు దగ్గర పట్టుకున్నట్టుగా, వర్తులాకృతిలో ఉన్న చిత్రం, మధ్యలో నక్షత్రం ఉండేలా పతాక రూపకల్పన చేశారు. ఆ చేతులు ఎరుపు, తెలుపు రంగుల్లో ఒకదాని తర్వాత మరొకటి ఉండేలా చిత్రించారు. ఆ ఆరు చేతులు దక్షిణాది రాష్ట్రాలకు ప్రతీకలని తన ప్రసంగంలో కమల్‌ స్పష్టం చేశారు.

తాను ప్రజల చేతుల్లోని ఆయుధాన్నని
తాను ప్రజల చేతుల్లోని ఆయుధాన్నని కమల్‌ అభిర్ణించుకున్నారు. పార్టీ ఏర్పాటు ప్రజాపాలనకు తొలి అడుగని, ప్రజాసమూహంలోని ప్రతీ ఒక్కరూ నాయకులేనని స్పష్టం చేశారు. రాష్ట్రం ఎదుర్కొంటున్న పలు సమస్యలను, వివాదాలను ఆయన తన ప్రసంగంలో ప్రస్తావించారు. నేను మీకు సలహాలు ఇచ్చే నాయకుడిని కాను. మీ సలహాలు వినే కార్యకర్తను అని వేదికపై కమల్‌ చెప్పడంతో ప్రజలంతా చప్పట్లు, ఈలలు, కేరింతలతో కొత్త పార్టీకి స్వాగతం పలికారు. రాజకీయాల్లో చేరేందుకు వృత్తి ఏమిటనేది ముఖ్యం కాదని, నీతి, నిజాయితీ, సత్యం, ఉద్వేగం వంటి సుగుణాలు కలిగి ఉన్నవారంతా రాజకీయ రంగ ప్రవేశానికి అర్హులేనని కమల్‌ చెప్పారు. తమిళనాడు ప్రజలు ఇంకా ఎన్నాళ్లు అవినీతి పాలనలను భరించాలని ప్రశ్నించారు. ఓటుకు ఆరువేలు ఇచ్చి నష్టపోతున్నామని నేతలంటున్నారు. నేను డబ్బులిచ్చి ఓటు అడగనని తేల్చి చెప్పారు.

ప్రజా సేవకుడిగా
ప్రజా సేవకుడిగా ఇచ్చిన హామీలను నెరవేర్చలేకుంటే మరొకరికి సారథ్యం అప్పగిస్తానే గాని పదవులను పట్టుకుని ఊగిసలాడనని కమల్‌ స్పష్టం చేశారు. అవినీతి నిర్మూలనకు ప్రజలు తనతోపాటు త్యాగం చేయాల్సి ఉంటుందన్నారు. తాను అధికారంలోకి వస్తే ప్రజలకు క్వార్టర్‌ బాటిల్, స్కూటర్‌లు ఉచితంగా ఇవ్వబోనని చెప్పారు. స్కూటర్లు కొనుక్కునే స్తోమతకు ప్రజలను తీసుకుని వస్తానని స్పష్టం చేశారు. రామేశ్వరంలో మాజీ రాష్ట్రపతి అబ్దుల్‌ కలాం ఇంటిని సందర్శించి కమల్‌ తన రాజకీయ ప్రయాణాన్ని ప్రారంభించారు. కలాం దేశభక్తి, ఆశయాలకు తాను ముగ్దుడినయ్యాననీ, ఆయనే తనకు మార్గదర్శకుడు, స్ఫూర్తి ప్రదాత అని కమల్‌ కొనియాడారు. శతాధిక వృద్ధుడైన కలాం అన్న మహమ్మద్‌ ముత్తుమీరన్‌ లెబ్బై మరైక్కయార్‌ను కమల్‌ కలసి ఆయన ఆశీర్వాదం తీసుకున్నారు. మధురైలోని ఒత్తకడై మైదానంలో జరిగిన పార్టీ ఆవిర్భావ సభకు ఢిల్లీ ముఖ్యమంత్రి, ఆప్‌ అధినేత అరవింద్‌ కేజ్రీవాల్‌ హాజరయ్యారు. 

10:26 - February 21, 2018

చెన్నై : తమిళనాడులో మరో కొత్త రాజకీయ పార్టీ ఆవిర్భావానికి రంగం సిద్ధమైంది. ప్రముఖ నటుడు కమల్‌ హసన్‌ మధురై వేదికగా కొత్త రాజకీయ పార్టీ పేరును ప్రకటించి జెండాను ఆవిష్కరించనున్నారు. మధురైలోని ఐల్యాండ్‌ గ్రౌండ్స్‌లో బుధవారం సాయంత్రం జరిగే భారీ బహిరంగ సభలో పార్టీ విధి విధానాలను కమల్‌ ప్రకటిస్తారు. ఇప్పటికే మధురైకి చేరుకున్న కమల్‌ హసన్‌- బహిరంగసభ ఏర్పాట్లను సహచరులతో కలిసి పర్యవేక్షించారు. కమల్‌ అక్కడి నుంచి నేరుగా రామేశ్వరం వెళ్లి మాజీ రాష్ట్రపతి డాక్టర్ ఏపీజే అబ్దుల్ కలాం సమాధిని సందర్శించుకోనున్నారు. ప్రజా సమస్యలు తెలుసుకునేందుకు కమల్ రాష్ట్రవ్యాప్తంగా పర్యటించనున్నారు.

తమిళనాట రాజకీయ సందడి
ఈ కార్యక్రమానికి జాతీయ స్థాయి నేతలు రానుండడంతో తమిళనాట రాజకీయ సందడి నెలకొంది. ఢిల్లీ సిఎం కేజ్రీవాల్‌తో పాటు బీహార్ సీఎం నితీశ్ కుమార్, కేరళ సీఎం పినరయి విజయన్, కమ్యూనిస్టు నేతలు సహా పలువురు జాతీయ స్థాయి నేతలను కమల్ ఆహ్వానించారు. తమిళ సూపర్‌స్టార్‌ రజనీకాంత్‌, విజయ్‌కాంత్‌ తదితరులు హాజరు కానున్నారు. డిఎంకె చీఫ్‌ కరుణానిధిని కూడా కమల్‌ కలుసుకున్నారు. అధికారంలో ఉన్న అన్నాడిఎంకెను మాత్రం ఆయన ఆహ్వానించలేదు. అన్నాడిఎంకె విధానాలు నచ్చకనే తాను రాజకీయాల్లోకి వచ్చానని కమల్‌ స్పష్టం చేశారు. అవినీతి, మతతత్వ విధానాలను కమల్‌ తీవ్రంగా వ్యతిరేకిస్తున్నారు.తమిళనాట రాజకీయాలకు సినీరంగానికి విడదీయరాని బంధముంది. తమిళ రాజకీయాలను ప్రభావితం చేసిన ఎంజీఆర్‌, జయలలిత, కరుణానిధి సినీరంగానికి చెందినవారే. విలక్షణ నటుడిగా పేరు తెచ్చుకున్న కమల్‌హసన్‌ సినిమాలకు గుడ్‌బై చెబుతున్నట్లు ఇటీవల ప్రకటించారు. ఫుల్‌ టైం రాజకీయాల్లోనే ఉండాలని భావిస్తున్న లోకనాయకుడికి తమిళ ప్రజలు ఎలా ఆదరిస్తారన్నది వేచి చూడాలి.

08:09 - February 21, 2018

హైదరాబాద్ : తెలంగాణ ఉద్యమంలో కీలక భూమిక పోషించిన తెలంగా రాజకీయ జాయింట్‌ యాక్షన్‌ కమిటీ.... కనుమరుగు కానుంది. టీజేఏసీ నూతన పార్టీగా ఆవిర్భవించబోతోంది. ఇందుకోసం తెరవెనుక ఏర్పాట్లు శరవేగంగా జరుగుతున్నాయి. ఇప్పటికే పార్టీ రిజిస్ట్రేషన్‌ పనులను టీజేఏసీ ఓ ప్రైవేట్‌ ఏజెన్సీకి అప్పగించింది. సాధారణంగా పార్టీ ఏర్పాట్లను.. ఎవరైతే పార్టీ పెడతారే వారే నేరుగా చేసుకుంటారు. కానీ టీజేఏసీ మాత్రం .. పార్టీ పనులను ఓ ప్రైవేట్‌ ఏజెన్సీకి అప్పగించింది. కోదండరామ్‌ నేరుగా పార్టీ ఏర్పాటు పనుల్లో నిమగ్నం అయితే.. అటు అధికార పార్టీ నుంచి.. జాతీయ స్థాయిలో అనేక ఇబ్బందులు ఎదురవుతాయనే అనుమానంతో.. కోదండరామ్‌ అండ్‌ టీమ్‌ పార్టీ ఏర్పాటు పనులను ఏజెన్సీకి అప్పగించింది. పార్టీ రిజిస్ట్రేషన్‌ డాక్యుమెంటేషన్‌ పనుల కోసం ఏజెన్సీ ఇప్పటికే పలుమార్లు కోదండరామ్‌ సలహాలు , సూచనలతో ఢిల్లీకి వెళ్లివచ్చినట్టు తెలుస్తోంది. ఫిబ్రవరి చివరి నాటికి కోదండరామ్‌తో కలిసి మరోసారి ఢిల్లీ వెళ్లాలని నిర్ణయించినట్టుగా కూడా తెలుస్తోంది. కోదండరాం ఏర్పాటు చేయనున్న పార్టీ గుర్తు, జెండాను ఇప్పటికే ఖరారు చేసినట్టు తెలుస్తోంది.

పార్టీ పనులను ప్రైవేట్‌ ఏజెన్సీకి
పార్టీ పనులను ప్రైవేట్‌ ఏజెన్సీ చూసుకుంటుంటే.. కార్యాలయం కోసం టీజేఏసీ నేతలు అన్వేషిస్తున్నారు. ఆదర్శనగర్‌లోని న్యూ ఎమ్మెల్యే క్వార్టర్స్‌లోని ఒక భాగాన్ని టీజేఏసీ ఇప్పటికే ఉపయోగించుకుంటోంది. ఈ క్వార్టర్స్‌ నిజామాబాద్‌ జిల్లాకు చెందిన ఓ కాంగ్రెస్‌ మాజీ ఎమ్మెల్యేకు చెందినదిగా తెలుస్తోంది. పార్టీ ఏర్పాటు పనులను నేరుగా కోదండరామ్‌ ఇంట్లోనే నిర్వహించడం సాధ్యంకాకపోవడంతో ఈ క్వార్టర్‌ను ఉపయోగించుకుంటున్నారు. గత కొద్ది రోజులుగా పార్టీ ఏర్పాటు, స్టీరింగ్‌ కమిటీ సమావేశాలు ఇతర పనుల ఏర్పాట్లు సైతం ఈ క్వార్టర్స్‌ నుండే జరుగుతున్నాయి. కోదండరామ్‌ పార్టీ ఏర్పాటు పనులు చక్కబెడుతూనే మరోవైపు ఆవిర్భావ సభకు జాతీయ స్థాయిలో నేతలను రప్పించేందుకు ప్రయత్నాలు చేస్తున్నారు. మార్చి మొదటి వారంలో వరంగల్‌లో నిర్వహించే సభకు సంబంధించిన ఏర్పాట్ల బాధ్యతను టీజేఏసీలోని కీలక నేతలు అప్పగించారు. మొత్తానికి కోదండరామ్‌ పార్టీ ఆవిర్భావ సభకు ఏర్పాట్లు చురుకుగా సాగుతున్నాయి.

17:41 - February 9, 2018

హైదరాబాద్ : మరోసారి అధికార పగ్గాలు దక్కించుకునేందుకు పావులు కదుపుతున్న టీఆర్‌ఎస్‌ అధినేత కేసిఆర్ కు వచ్చే ఎన్నికలు కొత్త సమస్యలు సృష్టించేలా కనిపిస్తున్నాయి. పార్టీ పరంగా పూర్తి స్థాయి నిర్మాణం లేకపోవడంతో కింది స్థాయి కార్యకర్తల నుంచి మెజార్టీ నేతలు బహిరంగంగానే అసంతృప్తి వ్యక్తం చేస్తుస్తున్నారు. దీంతో వచ్చే ఎన్నికలు కేసీఆర్‌కు పెద్ద సవాలేనని పార్టీ నేతలు భావిస్తున్నారు.

పునర్విభజన జరగలేదు....
కేసీఆర్‌ చాలాసార్లు చెప్పినట్టు నియోజకవర్గాల పునర్విభజన జరగలేదు. దీంతో వచ్చే ఎన్నికల్లో టికెట్లపై ఆశలు పెట్టుకున్న నేతలు నీరుకారిపోతున్నారు. ఆపరేషన్‌ ఆకర్ష్‌లో భాగంగా ఇతర పార్టీల నుంచి టీఆర్‌ఎస్‌లోకి వలస వచ్చిన ఎమ్మెల్యేలు ప్రాతినిధ్యం వహిస్తున్న నియోజకవర్గాల్లో పార్టీ పరిస్థితి మరీ దారుణంగా ఉంది. ఇలాంటి చోట్ల పార్టీ నేతలు, కార్యకర్తల్తో స్తంబ్దత నెలకొంది. టీజేఏసీ చైర్మన్‌ కోదండరామ్‌ నేతృత్వంలో కొత్త పార్టీ ఆవిర్భవించనుంది. తెలంగాణ వచ్చిన తర్వాత రాష్ట్ర ప్రజల ఆశలు, ఆకాంక్షలు నెరవేరలేదన్న ఉద్దేశంతో రాజకీయ పార్టీ ఏర్పాటు చేస్తానని కోదండరామ్‌ చేసిన ప్రకటనతో టీఆర్‌ఎస్‌లో గుబులు మొదలైంది. ఈ పరిణామం గులాబీ నేతలకు రుచించడం లేదు. ఎన్నికలకు మరో ఏడాది సమయమే ఉంది. అయినా పార్టీ నిర్మాణంపై గులాబీ బాస్‌ ఇంకా పూర్తి స్థాయిలో దృష్టి కేంద్రీకరించలేదు. మరోవైపు వచ్చే ఎన్నికల కోసం ప్రతిపక్షాలు ఇప్పటికే అధికార పార్టీపై విమర్శల దాడిని పెంచాయి. ఇలాంటి పరిణామాలు గులాబీ నేతల్లో కొత్త ఆలోచనల్లోకి నెట్టివేస్తున్నాయి. అటు పార్టీని, ఇటు ప్రభుత్వాన్ని అన్నీ తానై నడిపిస్తున్న ముఖ్యమంత్రి కేసీఆర్ తెలంగాణలో తనదైన మార్క్‌ కోసం పలు పథకాలు ప్రేవేశపెట్టినా... పార్టీ నేతల్లో ఉన్న అసంతృప్తిని మాత్రం చల్లార్చడం లేదన్న గుసగుసలు వినిపిస్తున్నాయి.

టీజాక్ పార్టీ ఏర్పాటు చేయడం
ఉద్యమంలో టీఆర్‌ఎస్‌ కనుసన్నల్లో నడిచిన టీజాక్ పార్టీ ఏర్పాటు చేయడం ఖరారు కావడంతో... గులాబీ దళంలోని అసంతృప్తిగా నేతలు, ఉద్యమకారులు కొత్త రాజకీయ పార్టీ వైపు మొగ్గుచూపే అవకాశాలు ఉంటాయని అధికార పార్టీ నేతలు భావిస్తున్నారు. దీనికి తోడు ఇప్పటికే 10 నుంచి 15 మంది శాసనసభ్యులు తమతో టచ్ ఉన్నారని ప్రకటనలు చేస్తున్న కోదండరాం వ్యాఖ్యలు టీఆర్‌ఎస్‌ నేతల్లో మరింత ఆందోళనకు గురిచేస్తున్నాయి. పార్టీలో ప్రస్తుతం ఉన్న పరిస్థితులను చక్కదిద్దుకోవాలన్న అభిప్రాయం వ్యక్తం అవుతోంది. 

08:12 - February 5, 2018

సంగారెడ్డి : రాజకీయ పార్టీ ఏర్పాటుపై తెలంగాణ జేఏసీ చైర్మన్‌ కోదండరామ్‌ కీలక నిర్ణయం తీసుకున్నారు. రంగారెడ్డి జిల్లా తుర్కయాంజాల్‌లో జరిగిన టీ జేఏసీ విస్తృత సమావేశంలో కొత్త పార్టీ ఏర్పాటును ప్రకటించారు. ప్రత్యేక రాష్ట్రంలో కూడా ప్రజల బతుకులు మారలేదన్న నిర్ణయానికి కోదండరామ్‌ వచ్చిన తర్వాత టీ జేఏసీని రాజకీయ పార్టీగా మార్చాలన్న డిమాండ్‌ వచ్చింది. కానీ ఉద్యమం సంస్థగా కొనసాగించడానికి నిర్ణయించారు. కేసీఆర్‌ ప్రభుత్వ ప్రజా, రైతు వ్యతిరేక విధానాలను ఎండగట్టడం మొదలుపెట్టిన తర్వాత టీ జేఏసీని రాజకీయ పార్టీగా ప్రకటించాలన్న ఒత్తడి వచ్చింది. కొత్త పార్టీ పెట్టాలని ప్రజలు కోరినా ముందు సున్నితంగా తిరస్కరించిన కోదండరామ్‌.. మారిన పరిస్థితులు నేపథ్యంలో ఇప్పుడు కొత్త పార్టీ పెట్టాలన్ని నిర్ణయానికి వచ్చారు. టీ జేఏసీని యథావిధిగా కొనసాగిస్తూ.. కొత్త రాజకీయ పార్టీ ఏర్పాటును కోదండరామ్‌ ప్రకటించారు.

కోదండరామ్‌ను పక్కన పెట్టారు
రాజకీయాల్లో మార్పు కోసం పార్టీ పెట్టాలని టీ జేఏసీ నిర్ణయించింది. ప్రజల సహకారంతో పార్టీని నడుపుతూ ఎన్నికల్లో పోటీ చేయాలన్న నిర్ణయానికి వచ్చారు. తెలంగాణ ఉద్యమంలో టీ జేఏసీ కీలక పాత్ర నిర్వహించింది. ప్రజాభిప్రాయాన్ని ప్రత్యేక రాష్ట్రానికి అనుకూలంగా మలచడంతో ముఖ్య భూమిక పోషించింది. ప్రత్యేక రాష్ట్ర సాధన కోసం కేసీఆర్‌ నేతృత్వంలోని టీఆర్‌ఎస్‌ నిర్వహించిన మిలియన్‌ మార్చ్‌ వంటి పోరాటాల్లో జేఏసీ ముందుంది. తెలంగాణ సాధనోద్యమంలో పలుసార్లు అరెస్టయ్యారు. తెలంగాణ ఆవిర్భావం 2014లో జరిగిన ఎన్నికల్లో టీఆర్‌ఎస్‌కు బహిరంగ మద్దతు ప్రకటించారు. అయితే ప్రభుత్వం ఏర్పాటైన తర్వాత ముఖ్యమంత్రి కేసీఆర్‌ టీ జేఏసీతోపాటు కోదండరామ్‌ను పక్కన పెట్టారు. ఏడాదిన్నరపాటు టీఆర్‌ఎస్‌ ప్రభుత్వ విధానాలను నిశితంగా పరిశీలించిన కేసీఆర్‌... ప్రత్యేక రాష్ట్రంలో కూడా పరిస్థితులు మారలేదన్న నిర్ణయానికి వచ్చారు.

బలవంతపు భూసేకరణలు
ప్రజల ఆశలు, ఆకాంక్షలకు అనుగుణంగా ప్రభుత్వ విధానాలు లేవంటూ ప్రాజెక్టుల కోసం బలవంతపు భూసేకరణలకు వ్యతిరేకంగా పోరాడారు. పండించిన పంటలకు గిట్టుబాటు ధరలు లభించక ఆత్మహత్య బాట పట్టిన అన్నదాత కుటుంబాల ఆవేదనను చూసి చలించిపోయారు. ఊరూరు తిరుగుతూ కేసీఆర్‌ సర్కారు విధానాలను ఎండగట్టారు. ఉద్యమ సమయంలో లక్ష ఉద్యోగాలు భర్తీ చేస్తామని ప్రకటించిన టీఆర్‌ఎస్‌ అధినేత కేసీఆర్‌.. అధికారంలోకి వచ్చిన తర్వాత మాట తప్పడంపై ప్రభుత్వ నిర్ణయానికి వ్యతిరేకంగా నిరుద్యోగులను కూడగట్టి కొలువుల కోసం కోట్లాట నిర్వహించారు. కొలువు కొట్లాట నిరసనకు ప్రభుత్వం అనుమతి ఇవ్వకుండా నిర్బంధకాండ విధించడంతో హైకోర్టును ఆశ్రయించి అనుమతి తెచ్చుకుని సభ నిర్వహించారు. టీఆర్‌ఎస్‌ విధానాలపై పోరాడే క్రమంలో అధికార పార్టీ నేతలు కోదండరామ్‌ను కాంగ్రెస్‌ ఏజెంటుగా విమర్శించినా ప్రజా సమస్యలపై ఉద్యమించే విషయంలో ఎక్కడా వెనుకంజ వేయలేదు. కేసీఆర్‌ ప్రభుత్వం అవనుసరిస్తున్న ఇలాంటి విధానాలతో విసిపోయిన టీ జేఏసీ ఇప్పుడు కొత్త రాజకీయని ప్రకటించి, ఎన్నికల క్షేత్రంలో దిగాలని నిర్ణయించడం టీఆర్‌ఎస్‌కు కొంత ఇబ్బందేనని భావిస్తున్నారు. 

18:07 - January 18, 2018

హైదరాబాద్ : తెలంగాణ ఉద్యమంలో చురుగ్గా పాల్గొన్న టీజాక్ త్వరలో పూర్తి స్థాయి రాజకీయ పార్టీగా మారేందుకు సిద్ధమవుతోంది. పార్టీగా అవతరించేందుకు కసరత్తు టీ జేఏసీ నేతలు కసరత్తు చేస్తున్నారు. టీజాక్‌ను రాజకీయ పార్టీగా అవతరించే అవకాశం ఉందన్న ప్రచారం ఊపందుకుంది. అయితే....ఇటీవల దీనిపై టీజేసీలో భిన్న వాదనలు వినిపిస్తున్నా.....రాజకీయ పార్టీగా మార్చాలన్న డిమాండ్ మాత్రం రోజురోజుకు పెరుగుతోంది. సాధారణ ఎన్నికలకు సమయం ముంచుకొస్తుండడంతో పొలిటికల్ పార్టీగా ప్రజల్లోకి వెళ్లేందుకు సిద్ధం కావాలన్న అభిప్రాయం టీజాక్ నేతల్లో బలంగా వినిపిస్తోంది. దీంతో ఈ అంశంపై స్పష్టత ఇచ్చేందుకు టీజాక్ రెడీ అవుతున్నట్లు సమాచారం.

రాబోయే ఎన్నికలకు ప్రణాళికలు
తెలంగాణ రాజకీయాల్లో చురుగ్గా వ్యవహరించాలన్న నిర్ణయానికి వచ్చిన టీజాక్.. రాబోయే ఎన్నికలకు ప్రణాళికలను కూడా ఇప్పటి నుంచే సిద్ధం చేసుకొంటోందని సమాచారం. టీ జేఏసీని రాజకీయ పార్టీగా మార్చే అంశంపై చర్చించి, తుది నిర్ణయం తీసుకునేందుకు వచ్చే నెల మొదటి వారంలో కీలక సమావేశాన్ని ఏర్పాటు చేయాలని నిర్ణయించింది. రాజకీయ పార్టీగా ఒంటరిగా ప్రజల్లోకి వెళ్లాలా ? భావ సారూప్యత ఉన్న పార్టీలతో కలిసి పనిచేయాలా ? అన్న అంశం పై వెంటనే నిర్ణయానికి వచ్చే అవకాశంలేదని భావిస్తున్నారు. గత మూడేళ్లుగా కేసీఆర్‌ ప్రభుత్వం విధానాలను తూర్పారపడుతున్న టీజాక్ కు కాంగ్రెస్ పార్టీ అండదండలున్నాయన్న వాదన తెరపైకి వచ్చింది. అయితే రాజకీయ పార్టీగా టీజాక్ అవతరిస్తే వర్తమాన రాజకీయాలపై ఎలా వ్యవహరిస్తోందో అన్న అంశంపై ఉత్కంఠ రేగుతోంది.

10:13 - December 26, 2017

చెన్నై : తమిళ సూపర్ స్టార్ రజనీకాంత్ అభిమానులతో సమావేశం నిర్వహిస్తున్నారు. దేవుడు ఆదేశిస్తే రాజకీయాల్లోకి వస్తానని ఆయన అన్నారు. పార్టీ ప్రకటన, రాజకీయ ప్రవేశంపై ఈ నెల 31న ప్రకటన చేస్తానని రజనీకాంత్ తెలిపారు. తను సినిమాల్లోకి వస్తానని అనుకోలేదని, దేవుడు దయ వల్లే వచ్చానని అన్నారు. రజనీకాంత్ చేసిన ప్రకటన పై తమిళ రాజకీయాల్లో చర్చ మొదలైంది. ఒకవేళ తమిళనాడు లో రజనీ పార్టీ ప్రారంభిస్తే తమిళ రాజకీయాలో పెనుసంచలనం సృష్టిండమనేది ఖాయమని విశ్లేషకులు అంటున్నారు. ప్రస్తుతం ఉన్న ద్రవిడ పార్టీలు సినీ ప్రముఖు స్థాపించిన పార్టీలే కాబట్టి రజనీ పార్టీ కూడా తమిళ ప్రజలు ఆధరిస్తారని రజనీ అభిమానులు అంటున్నారు. మరోవైపు రజనీ రాజకీయ ప్రవేశంపై గతంలో తమిళ నటుడు శరత్ కుమార్ పలు వ్యాఖ్యలు చేశారు. రజనీ స్థానికుడు కాదని వ్యాఖ్యనించాడు. రజనీ పార్టీ స్థాపిస్తారో లేక ఎప్పటిలాగే దేవుడు ఎప్పుడు ఆదివిస్తే అప్పుడు వస్తానని చెబుతాడో చూడాలి....

17:48 - December 12, 2017

హైదరాబాద్ : తెలంగాణలో కాంగ్రెస్‌పార్టీ జోరు పెంచింది. మొన్నటి దాకా టీఆర్‌ఎస్‌ ఆక‌ర్ష్‌తో విల‌విల లాడిన కాంగ్రెస్‌ ఇప్పుడు అదే అస్త్రాన్ని ప‌క్కా గా అమ‌లు చేస్తూ.. గులాబి బాస్‌కు చుక్కలు చూపిస్తుంది. రేవంత్‌ను పార్టీలో చేర్చుకోవ‌డంతో.. రాష్ట్ర వ్యాప్తంగా కాంగ్రెస్‌లో కొత్త ఉత్సాహం వచ్చింది. దీంతో మరింత దూకుడు పెంచిన కాంగ్రెస్‌.. ఇదే టెంపోను కొన‌సాగిస్తూ.. రాష్ట్ర వ్యాప్తంగా ఆపరేషన్‌ ఆక‌ర్ష్‌కు తెర‌లేపింది. రేవంత్ హ‌స్తం గూటికి చేర‌డంతో టీ టీడీపీ డీలా పడింది. ఇదే అదనుబా భావించిన కాంగ్రెస్‌... ఇతర నేతలను టార్గెట్‌ చేసింది. జిల్లాల్లోని నేతల నుంచి రాష్ట్రస్థాయి నేతల వరకు అందరినీ పార్టీలో చేర్చుకుంటోంది. ఇప్పటికే రేవంత్‌తోపాటు.. 20 నియోజ‌క‌వ‌ర్గాల‌కు చెందిన ముఖ్య నేత‌లు కాంగ్రెస్‌ తీర్థం పుచ్చుకున్నారు. టీఆర్‌ఎస్‌తో పొస‌గ‌ని టీడీపీ నేతలు కాంగ్రెస్‌ గూటికి చేరుతున్నారు.

ప్రతి రోజు ఎక్కడో ఓ చోట
ఉత్తమ్‌, భ‌ట్టి విక్రమార్క, రేవంత్‌ రెడ్డి ,ష‌బ్బీర్‌ ఆలీ, డీకే అరుణ‌, జైపాల్‌ రెడ్డిల స‌మ‌క్షంలో ప్రతి రోజు ఎక్కడో ఓ చోట ఇతర పార్టీల నేతలు కాంగ్రెస్‌ తీర్థం పుచ్చుకుంటున్నారు. టీడీపీ, టీఆర్‌ఎస్‌సహా ఇతర ఆపార్టీల్లోని సెకండరీ క్యాడర్‌ కాంగ్రెస్‌ కండువా కప్పుకుంటున్నారు. అంతేకాదు...ఎంపిటీసీలు, జెడ్పీటీసీలు, సర్పంచ్‌లతోపాటు మాజీ ప్రజాప్రతినిధులు సైతం కాంగ్రెస్‌లో చేరుతుండడంతో ఆ పార్టీలో కొత్త ఉత్సాహం కనిపిస్తోంది. మొత్తానికి మొన్నటి దాకా వ‌ర‌స ఓట‌మిలు, వ‌ల‌స‌ల‌తో ఉక్కిరి బిక్కరి అయిన కాంగ్రెస్ పార్టీలోకి.. నేతల చేరిక‌లు ఉత్సాహాన్ని ఇస్తున్నాయి. ఇదే తీరును కొనసాగించి 2019లో అధికారమే ధ్యేయంగా ముందుకు సాగుతోంది హస్తం పార్టీ.

06:35 - December 5, 2017

ఢిల్లీ : రాహుల్‌గాంధీ... కాంగ్రెస్‌ పార్టీ ఆలిండియా అధ్యక్షుడిగా బాధ్యతలు చేపట్టేందుకు ముహూర్తం ఖరారైంది. అధ్యక్షుడిగా ప్రకటించడమే తరువాయి.. పార్టీని భుజాన ఎత్తుకోనున్న రాహుల్‌... పార్టీని సరికొత్త రీతిలో పరుగులు పెట్టించేందుకు తహతహలాడుతున్నారు. ఇప్పటికే అండర్‌గ్రౌండ్‌ వర్క్‌ను పూర్తి చేసిన రాహుల్‌... దాన్ని పక్కా ప్రణాళికతో అమలు చేసేందుకు సిద్దమయ్యారు. తన టీమ్‌ ఎలా ఉండాలనే దానిపై ఇప్పటికే కసరత్తు చేసిన రాహుల్‌.. పార్టీలో కొత్త సంస్కరణలకు తెరలేపబోతున్నారు.

సంస్థాగతంగా బలోపేతం...
అధ్యక్ష బాధ్యతలు చేపట్టనున్న రాహుల్‌.. పార్టీని సంస్థాగతంగా బలోపేతం చేయాలని భావిస్తున్నట్లు తెలుస్తోంది. ఇప్పటికే గ్రౌండ్‌ రిపోర్ట్‌ను సేకరించిన యువనేత టీమ్‌... వాటికి పదును పెడుతున్నట్లు సమాచారం. బూత్‌ స్థాయి నుండి రాష్ట్రస్థాయి వరకు ప్రతి ఒక్కరిని పార్టీతో అనుసంధానం చేయడం... పార్టీ పిలుపునిస్తే.. కదనరంగంలోకి దిగేలా రెడీ చేస్తున్నారు. దీనికోసం శక్తి యాప్‌లాంటి వాటిని ఉపయోగిస్తూ.. దీనిని అదనంగా సోషల్‌ మీడియాను విరివిరిగా వాడుకోవాలని రాహుల్‌ భావిస్తున్నారు. ఇక పార్టీలో సరికొత్త ప్రయోగానికి రాహుల్‌ శ్రీకారం చుట్టబోతున్నట్లు తెలుస్తోంది. ఎన్నికల్లో అభ్యర్థుల ఎంపికలో నెలకొనే గందరగోళానికి చెక్‌ పెట్టేందుకు వ్యూహం రచిస్తున్నారు. ఢిల్లీలో ముఖ్య నేతల లాబీయింగ్‌తో అభ్యర్థులను ఎంపిక చేస్తారనే అపవాదును తొలగించేందుకు కసరత్తు చేస్తున్నారు.

గెలుపు గుర్రాలను వెతికి....
అమెరికా ఎన్నికల్లో అభ్యర్థుల ఎంపికలో అనుసరించే విధానాన్ని.. అమలు చేయాలనే యోచనలో రాహుల్‌ ఉన్నట్లు తెలుస్తోంది. ఇందుకుగాను క్షేత్రస్థాయిలో బలంగా ఉన్న నేతను ఎంపిక చేయబోతున్నారు. పార్టీలో గెలుపు గుర్రాలను వెతికి పట్టుకునే విధంగా జాగ్రత్తలు తీసుకుంటున్నారట. టికెట్‌ కోసం పోటీపడుతున్న ఆశావాహులలో మంచి అభ్యర్థిని ఎంపిక చేయాలని.. అవసరమైతే వారి మధ్య ఓటింగ్‌ నిర్వహించాలని భావిస్తున్నారట. ఇలా చేస్తే... పార్టీ కోసం పని చేసే వారికి అవకాశం దక్కుతుందంటున్నారు. అంతేకాకుండా... ఆయారాం... గయారాంలకు చెక్‌ పెట్టడంతో పాటు... సీల్డ్‌ కవర్‌ పాలిటిక్స్‌ అపవాదు నుండి పార్టీని బయటకు తీసుకురావాలని భావిస్తున్నారు రాహుల్‌. రాజస్థాన్‌, కర్నాటక, మధ్యప్రదేశ్‌, తెలంగాణ ఎన్నికల్లో కొన్ని నియోజకవర్గాలను పైలట్‌ ప్రాజెక్ట్‌ కింద ఎంపిక చేసి.. అమలు చేయాలని యువ నేత భావిస్తున్నట్లు సమాచారం. మొత్తానికి రాహుల్‌గాంధీ.. కాంగ్రెస్‌లో నూతన శకాన్ని మొదలుపెట్టేందుకు సిద్దమవుతున్నారు. పార్టీ కట్టుబాట్లను కాపాడుకుంటూ... పార్టీ విధేయతకు పెద్ద పీట వేస్తూ.. పార్టీ కేడర్‌ టూ లీడర్‌ను ఒక్కటి చేయడమే లక్ష్యంగా ముందుకెళ్లబోతున్నారు యువరాజు. మరి రాహుల్‌ వ్యూహాలు ఏ మేరకు ఫలితాలను ఇస్తాయో చూడాలి.

 

21:51 - November 29, 2017

హైదరాబాద్ : తను పార్టీ మారుతున్నాననే వార్తల్లో వాస్తవం లేదని కాంగ్రెస్‌ ఎమ్మెల్యే సంపత్‌ కుమార్‌ అన్నారు. తన నియోజకవర్గ అవసరాల కోసమే మంత్రి హరీశ్‌రావుని కలిశానని.. కానీ కుట్ర పూరితంగానే తనపై అవాస్తవాలు ప్రచారం చేస్తున్నారని అన్నారు. తన ప్రాణం ఉన్నంత వరకు కాంగ్రెస్‌లోనే ఉంటానని.. నీతిమాలిన రాజకీయాలు చేయనని అన్నారు.

 

Pages

Don't Miss

Subscribe to RSS - పార్టీ