పూర్తి

19:09 - September 1, 2018

రంగారెడ్డి : రేపు కొంగరకలాన్‌లో ప్రతిష్టాత్మకంగా జరగనున్న ప్రగతి నివేదన సభకు ఏర్పాట్లన్నీ పూర్తయ్యాయి. దాదాపు రెండు వేల ఎకరాల్లో ఏర్పాట్లు పూర్తి చేశారు. ప్రధాన వేదిక సహా ప్రాంగణాన్ని సర్వాంగ సుందరంగా తీర్చిదిద్దారు. లక్ష వాహనాల్లో 25 లక్షల మందిని తరలించేందుకు ఏర్పాట్లు చేశారు. ఇప్పటికే అన్ని జిల్లాల నుంచి వాహనాలు బయల్దేరాయి. 

 

07:11 - August 26, 2018

హైదరాబాద్ : దేశ వ్యాప్తంగా సంచలనం సృష్టించిన గోకుల్‌చాట్‌, లుంబినీపార్క్‌ బ్లాస్ట్‌ కేసులో దర్యాప్తు ముగిసింది. కీలక ఆధారాలు సేకరించిన ఎన్‌ఐఏ... కోర్టులో చార్జిషీట్‌ కూడా దాఖలు చేసింది. 11ఏళ్ల సుదీర్ఘ విచారణ తర్వాత.. రేపు తుదితీర్పు రాబోతోంది. ఎన్‌ఐఏ స్పెషల్‌ కోర్టు ఈ కేసులో తీర్పు ఇవ్వనుండడంతో సర్వత్రా ఆసక్తి నెలకొంది. మరోవైపు నాటి బాంబు బ్లాస్ట్‌ బాధితులు న్యాయం కోసం ఎదురు చూస్తున్నారు.
2007 ఆగస్టు 25న బాంబు బ్లాస్ట్‌
ఉమ్మడి రాష్ట్ర రాజధాని హైదరాబాద్‌లోని గోకుల్‌చాట్, లుంబినీపార్క్‌లో ఉగ్రవాదులు మారణహోమానికి పాల్పడి 11 ఏళ్లు పూర్తయ్యింది. 2007 ఆగస్టు 25వ తేదీ సాయంత్రం 7 గంటలకు బాంబ్‌ బ్లాస్ట్‌లు జరిగాయి. దీంతో భాగ్యనగరం ఒక్కసారిగా ఉలిక్కిపడింది.  42 మంది చనిపోగా... 70మందికిపైగా గాయపడ్డారు. 
లుంబినీపార్క్‌, గోకుల్‌చాట్‌ బండార్‌లలో పేలుళ్లు
మొదట సెక్రటేరియట్‌ ఎదురుగా ఉన్న లుంబినీ పార్క్‌లో బాంబు పేలుడు సంభవించింది. ఆ తర్వాత ఐదు నిమిషాలకే కోఠిలోని అత్యంత రద్దీ ప్రదేశమైన గోకుల్‌చాట్‌ బండార్‌లో మరో శక్తివంతమైన బాంబు పేలింది.  రెండు ఘటనల్లో స్పాట్‌లోనే 33మంది అమాయకులు ప్రాణాలు కోల్పోగా... వందలాది మందికి గాయాలయ్యాయి. ఈ పేలుళ్ల వెనుక ఇండియన్‌ ముజాహిద్దీన్‌ హస్తం ఉన్నట్టు విచారణలో తేలింది. పాకిస్తాన్‌ ప్రేరణతో సాగుతున్న ఈ సంస్థకు చెందిన రియాజ్‌ భత్కల్‌, యాసిన్‌ భత్కల్‌, ఇక్భాల్‌ భత్కల్‌ నాయకత్వం వహించినట్టు ముంబై పోలీసులు తేల్చారు.  దీంతో ఈ ఏడుగురు  ఉగ్రవాదులను 2009లో రాష్ట్రానికి తీసుకొచ్చిన రాష్ట్ర కౌంటర్‌ ఇంటెలిజెన్స్‌, అక్టోపస్‌ విభాగాల అధికారులు  వారిని విచారించారు.  ప్రధాన సూత్రధారి అయిన యాసిన్‌ భత్కల్‌ను నేపాల్‌ ప్రాంతం నుంచి పట్టుకొచ్చారు.  కర్నాటక రాష్ట్రంలోని భత్కల్‌ ప్రాంతానికి చెందిన ఈ ముగ్గురు సోదరులలో యాసిన్‌, ఇక్భాల్‌ పట్టుబడ్డారు. అసలు నిందితుడు రియాజ్‌ తర్వాత అల్‌ఖైదాతో సంబంధాలు పెట్టుకున్నట్టు తాజాగా అంతర్జాతీయ ఉగ్రవాద సంస్థ ఐసిస్‌ వైపు ఆకర్షితుడైనట్టు ఎన్‌ఐఏకు సమాచారం అందింది.
రేపు తుది తీర్పు 
నాంపల్లి రెండవ అదనపు మెట్రోపాలిటన్‌ సెషన్స్‌ జడ్జి కోర్టులో చార్జిషీటు దాఖలు చేసింది. దాని ఆధారంగా  ఈ కోర్టులో వారానికి రెండు రోజుల చొప్పున విచారణ చేపట్టారు. దర్యాప్తు బృందం ఈ కేసులో కీలక ఆధారాలను సేకరించింది.  అనంతరం 1125 పేజీలతో కూడిన చార్జిషీట్‌ను కోర్టుకు దాఖలు చేసింది. 11 మందిపై అభియోగాలు నమోదు అయ్యాయి. 286 మంది సాక్ష్యులను ఎన్‌ఐఏ విచారించింది. మొత్తానికి 11 ఏళ్ల సుదీర్ఘ విచారణ తర్వాత ఈ కేసులో సోమవారం తీర్పు వెలువడనుంది. ఎన్‌ఐఏ ప్రత్యేక కోర్టు ఎలాంటి తీర్పు ఇస్తుందోనన్న ఉత్కంఠ సర్వత్రా నెలకొంది.

 

17:13 - August 17, 2018

ఢిల్లీ : మాజీ ప్రధాని, భారతరత్న అటల్‌ బిహారీ వాజ్‌పేయి అంత్యక్రియలు ముగిశాయి. యమునా నదీ తీరంలోని రాష్ట్రీయ స్మృతి స్థల్ లో ప్రభుత్వ లాంఛనాలతో అంత్యక్రియలు నిర్వహించారు. అభిమానులు, సన్నిహితుల కన్నీటి వీడ్కోలు పలికారు. అటల్‌ దత్తపుత్రిక నమిత .. వాజ్‌పేయీ చితికి నిప్పంటించగా, హిందూ సంప్రదాయం ప్రకారం దహన సంస్కారాలు పూర్తి చేశారు. అంతకముందు వాజ్ పేయి పార్థీవదేహానికి రాష్ట్రపతి రామ్ నాథ్ కోవింద్, ఉపరాష్ట్రపతి వెంకయ్యనాయుడు, ప్రధాని మోడీ, స్పీకర్ సుమిత్రా మహాజన్, రక్షణమంత్రి నిర్మలాసీతారామన్, కేంద్ర విదేశాంగశాఖ మంత్రి సుష్మస్వరాజ్, బీజేపీ సీనియర్ నేత ఎల్ కే.అద్వానీ, బీజేపీ జాతీయ అధ్యక్షుడు అమిత్‌షా, అమిత్ షా, మాజీ ప్రధాని మన్మోహన్ సింగ్ తోపాటు శ్రీలంక, నేపాల్, పాకిస్తాన్, బంగ్లాదేశ్, భూటాన్ తదితర దేశాల ప్రతినిధులు నివాళులర్పించారు. అంత్యక్రియలకు కేంద్రమంత్రులు, మురళీమనోహర్ జోషీ, ఏఐసీసీ అధ్యక్షులు రాహుల్ గాంధీతోపాటు వివిధ పార్టీలకు చెందిన ప్రముఖులు హాజరయ్యారు. వాజ్ పేయి శవపేటికపై ఉంచిన త్రివర్ణ పతాకాన్ని త్రివిద దళాధిపతులు వాజ్ పేయి దత్తపుత్రిక నమితకు అందజేశారు. త్రివిదదళాలు వాజ్ పేయికి నివాళులర్పించారు. 

 

07:28 - August 9, 2018

హైదరాబాద్ : మిషన్‌ భగీరథ ద్వారా ఇంటింటికీ నీళ్లిచ్చేందుకు ప్రభుత్వం దీపావళి పండుగను టార్గెట్‌గా పెట్టుకుంది. మిషన్‌ భగీరథ ద్వారా నీళ్లివ్వకుంటే ఓట్లు అడగబోమంటూ పదేపదే చెప్పిన సీఎం కేసీఆర్‌.. ఇచ్చిన మాట ప్రకారం నీళ్లిచ్చేందుకు అధికారులకు డెడ్‌లైన్‌ విధించారు. ఈ నెల 15 వరకల్లా ప్రతి ఊరికీ నీళ్లు ఇవ్వాలని.. దీపావళి వరకల్లా ప్రతి ఇంటికి నీరదించాలని అధికారులను ఆదేశించారు. 
ఆగస్టు 15కు ఊరూరా నీరు అందించాలి : కేసీఆర్‌
మిషన్‌ భగీరథ ద్వారా ఎన్నికల నాటికి నీళ్లు ఇస్తామని పదేపదే చెప్పిన తెలంగాణ సీఎం కేసీఆర్‌.. అందుకనుగుణంగా భగీరథ ప్రయత్నమే చేస్తున్నారు. ఈ పంద్రాగాష్టుకు ఊరురా నీరు అందించాలని.. దీపావళి నాటికి ఇంటింటికీ త్రాగు నీరు అందించాలని అధికారులకు డెడ్‌లైన్‌ విధించారు. అందుకోసం ప్రణాళికలను సిద్ధం చేయాలని ఆదేశించారు. మిషన్ భగీరథ పనులను నిరంతరం పర్యవేక్షించాలని భగీరథ వైస్ చైర్మన్ ప్రశాంత్ రెడ్డి, సిఎంవో అడిషనల్ సెక్రటరీ స్మితా సభర్వాల్‌కు కేసీఆర్‌ ఆదేశాలు జారీ చేశారు. ఎక్కడ పనులు పూర్తయితే అక్కడ నీళ్లందించాలని సూచించారు. ఇక విద్యుత్ సబ్ స్టేషన్లు, పంపు హౌజుల నిర్మాణానికి అవసరమైన సిబ్బందిని నియమించాలని ఇప్పటికే సీఎం కేసీఆర్ అధికారులను ఆదేశించారు.
ట్రయల్ రన్స్‌ను ప్రారంభం
ఇక సీఎం ఆదేశాలతో నిర్ణీత సమయానికి పనులు పూర్తి చేసేందుకు అధికారులు ప్రయత్నాలను ముమ్మరం చేశారు. పనుల పూర్తి కోసం అధికారులు ఉరుకులు పరుగులు పెడుతున్నారు. చాలా చోట్ల ట్రయల్ రన్స్‌ను ప్రారంభించారు. ఈ నెల 14న బల్క్‌గా నీళ్లిచ్చేందుకు అధికారులు కసరత్తు చేస్తున్నారు. పనులు నిర్వహిస్తున్న ఏజెన్సీలకు బిల్లులు పెండింగ్‌ పెట్టకుండా.. వెంటనే నిధులు విడుదల చేస్తున్నారు. ఏ ఒక్క ఆడపడుచు బిందే పట్టుకొని బజారుకు వెళ్లొద్దని.. అందుకోసం ప్రతి ఇంటికీ నల్లా ద్వారా మంచినీళ్లు ఇవ్వాలని టార్గెట్‌ పెట్టుకున్న టీఆర్ఎస్ సర్కార్‌.. మరి డెడ్‌లైన్‌ ప్రకారం ఇంటింటికీ నల్లా నీళ్లు ఇస్తుందో లేదో వేచి చూడాలి. 

17:48 - July 6, 2018

హైదరాబాద్ : సరసమైన ధరలకే స్మార్ట్‌ఫోన్‌లు అందిస్తోన్న సంగీతా మొబైల్‌ స్టోర్స్‌ 44 ఏళ్లు పూర్తి చేసుకుంది. ఈ సందర్భంగా కస్టమర్లను ఆకట్టుకునే ప్రయత్నం చేస్తోంది సంగీత స్టోర్స్‌. 5 నుండి 15వేల స్మార్ట్‌ ఫోన్‌ కొన్న కస్టమర్లకు క్యాష్‌బ్యాక్‌ ఆఫర్లు అందిస్తోంది. 30 రోజుల వరకు ఈ ఆఫర్‌ వర్తిస్తుందని సంగీత రీజియన్‌ సిబ్బంది తెలిపారు. 

19:40 - July 4, 2018

సిరిసిల్ల : కాలంతోపాటు.. ఒంటిపై తగిలిన దెబ్బలు మానిపోయినా... గుండెలకైన గాయాలు మాత్రం సలుపుతూనే ఉన్నాయి. విచారణ పేరుతో పోలీసులు 8 మందిపై పోలీసులు ప్రదర్శించిన  పైశాచికత్వానికి యేడాది పూర్తయింది. జాతీయ స్థాయిలో నెరేళ్ల బాధితులకు మద్దతు లభించినా.. రాష్ట్ర స్థాయిలో మాత్రం న్యాయం జరగలేదు. మానని గాయంలా సలుపుతున్న నేరెళ్ల దురాగతంపై టెన్‌టీవీ ప్రత్యేక కథనం.
విచారణ పేరుతో పోలీసుల చిత్ర హింసలు
కాలం గడిచే కొద్దీ పోలీసులు ఒంటిపై కొట్టిన దెబ్బలైతే మానాయి గానీ.. గుండెలకు తగిలిన గాయాలు మాత్రం ఇంకా పచ్చి పుండును తలపిస్తూనే ఉన్నాయి. నేరెళ్ళలో పోలీసులు విచారణ పేరుతో నిందితులను చిత్రహింసలు పెట్టిన ఘటన దేశ వ్యాప్తంగా సంచలనం సృష్టించింది. జాతీయ స్థాయిలో దళిత ఉద్యమానికి దారితీసింది.
లారీలకు నిప్పు పెట్టిన  ఘటనలో..12 మంది పై కేసు
నేరెళ్ళ ఘటన జరగడానికి ఏడాది ముందు.. తరచూ ప్రమాదాలకు కారణమవుతున్నాయన్న కారణంతో.. ఐదు లారీలకు నిప్పు పెట్టారు. ఈ ఘటనలో తంగళ్ళపల్లి పోలీసులు 12 మంది పై కేసు నమోదు చేశారు. నేరెళ్ల, జిల్లెల, రామచంద్రాపురం గ్రామాలకు చెందిన పెంట బాణయ్య, హరీష్, బాలరాజు, పసుల ఈశ్వర్, గోపాల్, మహేష్, గణేష్, చీకోటి శ్రీనివాస్‌ను అరెస్టు చేసి చిత్రహింసలు పెట్టారు. ఇంటరాగేషన్‌ చేసిన  జిల్లా ఎస్పీ విశ్వజిత్ కంపాటి, సీసీఎస్ ఎస్సై రవీందర్‌పైనా సరైన చర్యలు తీసుకోలేదని బాధితులు ఆరోపిస్తున్నారు.  
జాతీయ స్థాయిలో ఉద్యమిస్తామన్న ప్రతిపక్షాలు 
గాయపడ్డ బాధితులను చూసిన ప్రతి ఒక్కరూ చలించిపోయారు. దీంతో దళిత సంఘాలు, రాజకీయ పార్టీలు  ఆందోళనకు దిగాయి. కాంగ్రెస్ పార్టీకి చెందిన మాజీ స్పీకర్ మీరా కుమారి నేరెళ్ల ఘటన పై తీవ్ర స్థాయిలో స్పందించారు.  భాదితుల కుటుంబ సభ్యులను కలుసుకున్న మీరా కుమారి తీవ్ర ఉద్వేగానికి లోనయ్యారు. జాతీయ స్థాయిలో ఉద్యమిస్తామని ప్రతిపక్షాలన్నీ ముక్త కంఠంతో హెచ్చరించాయి. 
జూలై 2న కండీషన్‌ బెయిల్ మంజూరు
ఓవైపు న్యాయ పోరాటం జరగుతుండగానే.. నిందితులకు కరీంనగర్‌ కోర్టు జూలై 2న షరతులతో కూడిన బెయిల్ మంజూరు చేసింది.  జైలు నుంచి విడుదలైన నిందితులు తమ కుటుంబ సభ్యులను చూడగానే.. ఉద్వేగానికి లోనయ్యారు. ఆపుకోలేని దు:ఖంతో వెక్కి వెక్కి ఏడ్చారు. తమకు న్యాయం చేయాలంటూ ధీనంగా వేడు కున్నారు. 
పోలీసు చర్యల వెనుక టీ.ప్రభుత్వం : బాధితులు
నేరెళ్ల ఘటనలో పోలీసుల అత్యుత్సాహం స్పష్టంగా తెలుస్తున్నా.. పోలీసు చర్యల వెనుక ఉన్నది మాత్రం టీఆర్ఎస్‌  ప్రభుత్వమే అన్నది మరింత స్పష్టంగా తెలుస్తోందని బాధిత కుటుంబాలు ఆరోపిస్తున్నాయి. ఇంత జరిగినా .. సిరిసిల్లలో ఇసుక లారీల వేగం ఇప్పటికీ తగ్గనేలేదు.. న్యాయ పోరాటం చేస్తున్న భాదిత కుటుంబాలకు పోలీసు వేదింపులు ఆగనూలేదు. 

08:56 - June 28, 2018

ఢిల్లీ : జూన్‌ 28 నుంచి ప్రారంభమయ్యే అమర్‌నాథ్‌ యాత్రకు అన్ని ఏర్పాట్లు పూర్తయ్యాయి. 3 వేల మంది భక్తులతో కూడిన మొదటి బ్యాచ్‌ భారీ భద్రత నడుమ బయలుదేరి వెళ్లింది. అమర్‌నాథ్‌ యాత్రకు ప్రభుత్వం ఈసారి కనీ వినీ ఎరుగని రీతిలో భద్రతా చర్యలు చేపట్టింది.
నేటి నుంచి అమర్‌నాథ్‌ యాత్ర ప్రారంభం  
జూన్‌ 28 నుంచి ప్రారంభమయ్యే అమర్‌నాథ్‌ యాత్రకు మొదటి బ్యాచ్‌ బయలుదేరి వెళ్లింది. భక్తులకు స్థానికులు అధికారులు స్వాగతం పలికారు. భక్తుల భజనలు, మేళ తాళాలతో అమర్‌నాథ్‌ యాత్ర అంగరంగ వైభవంగా ప్రారంభమైంది. జమ్ములోని బేస్‌క్యాంప్‌ నుంచి అధికారులు పచ్చ జెండా ఊపి అమర్‌నాథ్‌ యాత్రను ప్రారంభించారు.
భారీ ఎత్తున భద్రతా చర్యలు 
బుధవారం ఉదయం 5 గంటలకు భారీ భద్రత నడుమ జమ్ము నుంచి కశ్మీర్‌కు 2,995 మంది భక్తులతో కూడిన వాహనాలు బయలు దేరాయి. ఒకవేళ వాతావరణం అనుకూలిస్తే మొదటి బ్యాచ్‌లో వెళ్తున్న భక్తులు గురువారం హిమలింగాన్ని దర్శించుకునే అవకాశం ఉంది. ఉగ్రముప్పు నేపథ్యంలో అమర్‌నాథ్‌ యాత్రకు అధికారులు భారీ ఎత్తున భద్రతా చర్యలు చేపట్టారు. బుల్లెట్‌ ప్రూఫ్‌ వాహనాలు, ఎలక్ట్రోమెగ్నటిక్‌ చిప్‌, బుల్లెట్‌ ప్రూఫ్‌ బంకర్లను ఏర్పాటు చేశారు. జమ్ము నుంచి కశ్మీర్‌కు వెళ్లే మార్గంలో సిఆర్‌పిఎఫ్‌, స్థానిక పోలీసులతో పాటు 40 వేల మంది సాయుధ బలగాలని భద్రత కోసం నియమించారు. సిసిటీవీ కెమెరాలతో పాటు డ్రోన్‌ ద్వారా యాత్రను పర్యవేక్షించనున్నారు. ఉగ్రదాడులు జరిగే అవకాశం ఉండడంతో వాటిని ఎదుర్కొనేందుకు అదనపు బలగాలను మోహరించేందుకు కూడా సన్నద్ధం చేశారు. భక్తులను తీసుకెళ్లే వాహనాలకు ఆర్‌ఎఫ్‌ఐడి ట్యాగ్‌లను ఏర్పాటు చేశారు. రేడియో ఫ్రీక్వెన్సీ ఐడెంటిపికేషన్‌పై కంట్రోల్‌ రూమ్‌ నిఘా ఉంటుంది. 
ప్రభుత్వ యంత్రాంగం అన్ని ఏర్పాట్లు 
అమర్‌నాథ్‌ యాత్రకు ప్రకృతి విపత్తులు సంభవించినా వాటిని ఎదుర్కొనేందుకు ప్రభుత్వ యంత్రాంగం అన్ని ఏర్పాట్లు చేసింది. ఎన్డీఆర్‌ఎఫ్‌ బృందాలను అలర్ట్‌ చేశారు. దక్షిణ కశ్మీర్‌లోని హిమాలయాల్లో 3 వేల 880 మీటర్ల ఎత్తున అమర్‌నాథ్‌ గుహలో వెలసిన మంచు లింగాన్ని దర్శించుకునేందుకు ఈయేడు 2 లక్షలకు పైగా భక్తులు రిజిస్ట్రేషన్‌ చేసుకున్నారు. పహల్‌గామ్‌, బాల్‌టాల్‌ నుంచి ప్రతిరోజు 15 వేల మంది భక్తులను యాత్రకు వెళ్లేందుకు అధికారులు అనుమతించారు. ఆగస్టు 26న అమర్‌నాథ్‌ యాత్ర ముగుస్తుంది.

 

21:11 - June 10, 2018

కర్నూలు : జిల్లాలో రిజర్వాయర్లను పూర్తి చేయాలని డిమాండ్ చేస్తూ రైతులు పాదయాత్ర పాదయాత్ర చేశారు. ఆంధ్రప్రదేశ్ రైతు సంఘం ఆధ్వర్యంలో రైతులు పాదయాత్ర చేపట్టారు. రైతులతో టెన్ టివి ఫేస్ టు ఫేస్ నిర్వహించింది. ఆ వివరాలను వీడియోలో చూద్దాం.. 

19:44 - June 7, 2018

హైదరాబాద్ : రైతు బాగుండాలంటే రాష్ట్రంలో ఉన్న పెండింగ్‌ ప్రాజెక్టులు పూర్తి కావాలని మంత్రి హరీష్‌రావు అన్నారు. పెండింగ్‌ ప్రాజెక్ట్‌లను పూర్తిచేసి మహబూబ్‌నగర్‌ జిల్లాలో 6లక్షల ఎకరాలకు నీళ్లు అందిస్తున్నామన్నారు. మిషన్‌ కాకతీయ అద్భుతమై విజయం సాధించిందని తెలిపారు. దేశంలో ఎక్కడాలేని కార్యక్రమాలు తెలంగాణ ప్రభుత్వం చేపట్టిందన్నారు. మనల్ని చూసి మహారాష్ట్రలో కూడా మిషన్‌ కాకతీయ కార్యక్రమం ప్రారంభించారన్నారు. ముప్పై ఏళ్ల నుంచి పెండింగ్‌లో ఉన్న అంతరాష్ట్ర ఒప్పందాలు చేసుకొని అదిలాబాద్‌ జిల్లాకు నీళ్లు అందించామన్నారు. 19 ప్రాజెక్టుల సముహం కాళేశ్వరం ప్రాజెక్టు అని.. రెండుమూడేళ్లోనే ప్రాజెక్టులను పూర్తి చేసి రైతులకు నీళ్లు అందిస్తామన్నారు.

 

22:02 - May 28, 2018

హైదరాబాద్  : రెడ్‌స్టార్‌ మాదాల రంగారావుకు.. కుటుంబసభ్యులు, అభిమానులు విప్లవాభివందనాలతో.. తుది వీడ్కోలు పలికారు. తుదిశ్వాస వరకూ వామపక్ష భావజాలంతో గడిపిన మాదాల భౌతిక కాయానికి సాంప్రదాయిక పూజాధికాలేవీ లేకుండానే దహనసంస్కారాలు నిర్వహించారు. 

తెలుగు సినీ చరిత్రలో రెడ్‌స్టార్‌గా తనదైన ముద్ర వేసుకున్న.. నటుడు మాదాల రంగారావు భౌతిక కాయానికి అంత్యక్రియలు ముగిశాయి. శ్వాసకోశ సంబంధ వ్యాధికి చికిత్స పొందుతూ మాదాల రంగారావు.. ఆదివారం తెల్లవారుజామున మరణించారు. సోమవారం ఉదయం.. ఆయన ఇంటి నుంచి.. సీపీఐ కార్యాలయం మగ్దుమ్‌ భవన్‌కు  మాదాల రంగారావు భౌతిక కాయాన్ని తరలించారు.

సీపీఐ కార్యాలయంలో.. పార్టీ జాతీయ కార్యదర్శి నారాయణ, తెలంగాణ కార్యదర్శి చాడ వెంకటరెడ్డి, సీపీఎం ఏపీ కార్యదర్శి మధు, డైరెక్టర్‌ పోకూరి బాబూరావు, రమేశ్‌, వందేమాతరం శ్రీనివాస్‌ తదితరులు మాదాల రంగారావు పార్థివ దేహానికి ఘనంగా నివాళులు అర్పించారు. 

సీపీఐ కార్యాలయం నుంచి.. మాదాల రంగారావు పార్థివ దేహాన్ని.. రెడ్‌ షర్ట్‌ కవాతుతో.. ప్రజల సందర్శనార్థం బాగ్‌లింగంపల్లిలోని సుందరయ్య విజ్ఞాన కేంద్రం దగ్గరకు తీసుకు వెళ్లారు. అక్కడ సీపీఎం పొలిట్‌బ్యూరో సభ్యుడు బీవీరాఘవులు, పార్టీ తెలంగాణ రాష్ట్ర కార్యదర్శి తమ్మినేని వీరభద్రం తదితరులు నివాళులు అర్పించారు. 

పెద్ద సంఖ్యలో తరలి వచ్చిన అభిమానులు, మాదాల రంగారావు పార్థివదేహాన్ని కడసారి దర్శించి నివాళులు అర్పించారు. సుందరయ్య విజ్ఞాన కేంద్రం నుంచి.. మాదాల రంగారావు పార్థివదేహాన్ని.. ర్యాలీగా మహాప్రస్థానానికి తీసుకు వెళ్లారు. సీపీఎం పొలిట్‌బ్యూరో సభ్యులు రాఘవులు, సీపీఐ ఏపీ కార్యదర్శి రామకృష్ణ తదితరులు ర్యాలీలో పాల్గొన్నారు. తుదిశ్వాస వరకూ వామపక్ష భావజాలంతో గడిపిన మాదాల రంగారావుకు.. ఎలాంటి పూజలు నిర్వహించకుండానే.. అంత్యక్రియలు జరిపారు. 

Pages

Don't Miss

Subscribe to RSS - పూర్తి