పెంపు

16:12 - September 14, 2018

ఢిల్లీ : పెట్రోల్, డీజిల్ ధరలు మళ్లీ పెరిగాయి. పెట్రోల్, డీజిల్ ధరలు సామాన్య, మధ్య తరగతి ప్రజల నడ్డి విరుస్తున్నాయి. వారం రోజులుగా పెట్రోల్, డీజిల్ ధరలు పెరుగుతూనే ఉన్నాయి. నిన్న స్వల్పంగా పెరిగిన ధరలు ఇవాళ ఇంకాస్త పెరిగాయి. ఢిల్లీలో లీటర్ పెట్రోల్‌పై 28పైసలు, డీజిల్‌ పై 22పైసలు ధర పెరిగింది. దీంతో ఢిల్లీలో లీటర్ పెట్రోల్ ధర 81.28 రూపాయలు, లీటర్ డీజిల్ ధర 77.82 రూపాయలకు చేరింది. ముంబైలో లీటర్ పెట్రోల్ ధర 88.39 రూపాయలు కాగా, లీటర్ డీజిల్ 77.82 రూపాయలు పెరిగింది. చెన్నైలో లీటర్ పెట్రోల్ రూ. 84.49, డీజిల్ రూ.77.49 లకు పెరిగాయి. కోల్‌కత్తాలో పెట్రోల్ రూ. 83.14, డీజిల్ రూ. 75.15లకు పెరిగింది. పెట్రో ధరలపై వాహనదారులు  భగ్గుమంటున్నారు. 

09:48 - September 7, 2018

హైదరాబాద్ : రోడ్లు అభివృద్ధి చెందినా, వాహనాల సంఖ్య పెరిగినా ప్రయాణాలంటే ఇంకా జనం మదిలో కదిలేది రైళ్లే. ఇక దూర ప్రాంతాలంటే రైలు అందుబాటులో ఉంటే మరో ప్రత్యామ్నాయమే చూడరు. అలాంటి రైలు కొత్తగా అందుబాటులోకి వస్తే ప్రయాణికుల ఆనందానికి అవధులుండవు. కాకినాడ, తిరుపతి, విజయవాడకు వెళ్లే రైళ్లు ఇప్పుడు లింగంపల్లి నుంచే మొదలవుతున్నాయి. ఇప్పటికే కాకినాడ, విజయవాడకు వెళ్లే రైళ్లు లింగంపల్లి నుంచి ప్రారంభమవుతుండగా.. తిరుపతి వెళ్లే రాయలసీమ ఎక్స్‌ప్రెస్‌ కూడా ఆగుతోంది. తిరుపతి వెళ్లే మరో ఎక్స్‌ప్రెస్‌ రైలు నారాయణాద్రి గురువారం నుంచి అందుబాటులోకి వచ్చింది. ముంబయ్‌ వెళ్లే ఎక్స్‌ప్రెస్‌ రైళ్లు కూడా ఇక్కడ ఆగుతున్నాయి. ఇలా లింగంపల్లి రైల్వే స్టేషన్‌కు ప్రాధాన్యం పెరిగింది. ప్రయాణికులకు ఇలా ఊరట లభించినా.. హైటెక్‌సిటీ రైల్వేస్టేషన్‌లో వీటిని ఆపితే మరింత మందికి ప్రయోజనం చేకూరే అవకాశం ఉంది.
42 రైళ్లు... 
లింగంపల్లి రైల్వే స్టేషన్‌ నుంచి ఇటీవల ఎక్స్‌ప్రెస్‌ రైళ్లసంఖ్య పెరుగుతోంది. ఇక్కడి నుంచే ప్రారంభమవుతున్న గౌతమి, అమరావతి ఇంటర్‌సిటీ ఎక్స్‌ప్రెస్‌, నారాయణాద్రి ఎక్స్‌ప్రెస్‌ రైళ్లు ప్రతిరోజు బయలుదేరుతుండగా.. ప్రతి సోమవారం, బుధవారం, శుక్రవారం కోకనాడ ఎక్స్‌ప్రెస్‌ ఇక్కడి నుంచి మొదలవుతోంది. ఇండోర్‌ వెళ్లే హమ్‌సఫర్‌ ఎక్స్‌ప్రెస్‌ ప్రతి ఆదివారం బయలుదేరుతుంది. తిరుపతి నాగర్‌సోల్‌ వెళ్లే ప్రత్యేక రైలు. యశ్వంత్‌పూర్‌ టాటానగర్‌ల మధ్య నడిచే టాటా ఎక్స్‌ప్రెస్‌ ప్రతి శుక్రవారం ఇక్కడ ఆగి వెళుతున్నాయి. ప్రతి మంగళవారం, శుక్రవారం, ఆదివారం వెళ్లే పుణె ఎక్స్‌ప్రెస్‌ రైలు కూడా ఇక్కడ ఆగుతున్నాయి. యశ్వంత్‌పూర్‌ వెళ్లే గరీబ్‌రథ్‌ ప్రతి బుధవారం, శుక్రవారం, ఆదివారం యశ్వంత్‌పూర్‌ వెళ్లే గరీబ్‌రథ్‌ ప్రత్యేక రైలు కూడా ఇక్కడ ఆగి వెళుతోంది. మొత్తంగా ప్రతిరోజూ 12 ఎక్స్‌ప్రెస్‌ రైళ్లు ఇక్కడ ఆగి ప్రయాణికులను తీసుకుని వెళుతున్నాయి. ఇలా పాసింజర్‌, ఎక్స్‌ప్రెస్‌ రైళ్లు కలిపి మొత్తం 42 ఇక్కడ అందుబాటులోకి వచ్చాయి.

సైబరాబాద్‌, గచ్చిబౌలి, నానక్‌రామ్‌గూడ, మాదాపూర్‌ ప్రాంతాల్లో కొలువుదీరిన జాతీయ, అంతర్జాతీయ ఐటీ సంస్థల్లో దాదాపు 5లక్షల మంది పనిచేస్తున్నారు. వీరికి తోడు.. నాలుగు నియోజకవర్గాల ప్రజలకు లింగంపల్లి, హైటెక్‌సిటీ, భరత్‌నగర్‌ రైల్వేస్టేషన్లు అందుబాటులో ఉన్నాయి. ఈ మూడు స్టేషన్లలో హైటెక్‌సిటీ స్టేషన్‌పై ఒత్తిడి ఎక్కువగా ఉంది. ఎంఎంటీఎస్‌ ప్రయాణికులు ఇక్కడి నుంచి ఎక్కువ మంది ప్రయాణిస్తున్నారని రైల్వే అధికారులు గుర్తించారు. ఎక్స్‌ప్రెస్‌ రైళ్లను కూడా హైటెక్‌సిటీ రైల్వే స్టేషన్లో ఆపితే ఎక్కువమంది ప్రయాణికులు రాకపోకలు సాగించే అవకాశం ఉంటుంది. ఇక్కడి రైల్వే స్టేషన్‌లో ప్లాట్‌ఫారం 24 బోగీలు ఆగేందుకు అవకాశం లేదు. తర్వాతి స్టేషన్లో బోగీలు మారుతాం.. ఇక్కడ రైలు ఆపితే ఎంతో ప్రయోజనకరంగా ఉంటుందని ప్రయాణికులు చెబుతున్నారు. ముఖ్యంగా అమరావతి వెళ్లే ఇంటర్‌సిటీ, పల్నాడు ఎక్స్‌ప్రెస్‌ రైళ్లు ఇక్కడ ఆగితే ప్రయోజనకరంగా ఉంటుందని చెబుతున్నారు.
నారాయణాద్రి ఎక్స్‌ప్రెస్‌ షురూ 
దక్షిణ మధ్య రైల్వే అధికారులు గురువారం నారాయణాద్రి ఎక్స్‌ప్రెస్‌ను లింగంపల్లి రైల్వేస్టేషన్‌నుంచి ఆరంభించారు. సాయంత్రం 5.15 గంటలకు ఈ రైలు మొదలైంది. మొదటిరోజు కావడంతో ప్రయాణికులు స్వల్పసంఖ్యలోనే ఇక్కడ ఎక్కారు. లింగంపల్లి రైల్వే స్టేషన్‌వద్ద మెయింటెన్స్‌ డిపో నిర్మాణం తరువాత ఇక్కడినుంచి ఆరంభమైన రైళ్లలో నారాయణాద్రి ఎక్స్‌ ప్రెస్‌ నాలుగోది. ఇప్పటికే ఇక్కడినుంచి గౌతమి, కొకనాడ, విజయవాడ ఇంటర్‌ సిటీ ఎక్స్‌ప్రెస్‌లు ఇక్కడినుంచి నడుస్తున్న సంగతి తెలిసిందే. నగరానికి వెళ్లి ప్రయాణించే అవసరం లేకుండా పెద్దసంఖ్యలో ప్రయాణికులు ఇక్కడినుంచే బయలుదేరి వెళుతున్నారు. ఇదే స్థాయిలో నారాయణాద్రి ఎక్స్‌ప్రెస్‌కి విశేష స్థాయిలో అదరణ లభిస్తుందని రైల్వే అధికారులు భావిస్తున్నారు.

12:41 - August 23, 2018

హైదరాబాద్ : తెలంగాణ సెక్రటేరియెట్‌లో మంత్రివర్గ ఉపసంఘం భేటీ అయింది. రేషన్‌ డీలర్ల కమిషన్‌ను 20 పైసల నుండి 70 పైసలకు పెంచుతున్నట్లు భేటీలో పాల్గొన్న మంత్రి ఈటల వెల్లడించారు. ఈ పెంపు సెప్టెంబర్‌ 1 నుండి అమలు చేస్తామన్నారు. అలాగే 2015 అక్టోబర్‌ నుండి ఇప్పటివరకు పెండింగ్‌లో ఉన్న రేషన్‌ డీలర్ల కమిషన్‌ బకాయిలు చెల్లిస్తామని మంత్రి తెలిపారు. 

తెలంగాణ రాష్ట్రంలోని రేషన్ డీలర్లు గత కొన్ని రోజులుగా ఆందోళన చేస్తున్న సంగతి తెలిసిందే. రేషన్ డీలర్ల సమస్యలను అధ్యయనం చేయాలని మంత్రి ఈటెల ఆధ్వర్యంలో సబ్ కమిటీ నియమితులైన సంగతి తెలిసిందే. ఆ కమిటీలో సీనియర్ మంత్రులు హరీష్ రావు, జోగు రామన్న, లక్ష్మారెడ్డి, జూపల్లి కృష్ణారావు, కమిషనర్ అకున్ సబర్వాలున్నారు. గత కొన్ని రోజులుగా ఈ కమిటీ సమావేశాలు కొనసాగుతున్నాయి. రాష్ట్రంలో ఉన్న డీలర్లు ఎదుర్కొంటున్న సమస్యలు తెలుసుకోవాంటే వివిధ రాష్ట్రాల్లో సివిల్ సప్లై విధానాన్ని అధ్యయనం చేయాలని ఇందుకు సివిల్ సప్లై అధికారులు వివిధ రాష్ట్రాల్లో పర్యటించాలని కమిటీ సూచించింది. దీనితో సివిల్ సప్లై అధికారులు వివిధ రాష్ట్రాల్లో పర్యటించి నివేదిక తయారు చేసిందని, ఈ నివేదికను సీఎం కేసీఆర్ అందచేసిందని మంత్రి ఈటెల పేర్కొన్నారు. కమిషన్ పెంచాలని పెండింగ్ లో ఉన్న బకాయిలను విడుదల చేయాలని, విడుదల చేస్తే వారి సమస్యలు తీరే అవకాశం ఉందని కమిటీ నిర్ణయించింది. 

20:53 - August 16, 2018

హైదరాబాద్ : కాళేశ్వరం ప్రాజెక్ట్‌ బడ్జెట్‌ అంచనాలను విపరీతంగా పెంచి టీఆర్‌ఎస్ ప్రభుత్వం దోపిడికి పాల్పడిందని ఆరోపించారు కాంగ్రెస్‌ నేత భట్టివిక్రమార్క. డాక్టర్‌ బీఆర్‌ అంబేద్కర్‌ ప్రాణహిత-చేవెళ్ల ప్రాజెక్ట్‌ పేరు మార్చి.. కాళేశ్వరం పేరుతో కోట్లు దోచుకున్నారన్నారు. ప్రాజెక్ట్‌ పేరు మార్చి పేరు మార్చలేదని మంత్రులు అబద్ధాలు చెబుతున్నారని తెలిపారు.

21:14 - August 2, 2018

ఆర్బీఐ కీలక వడ్డీ రేట్లను పెంచింది. కీలక వడ్డీరేట్లను పెంచుతూ ఆర్బీఐ కీలక నిర్ణయం తీసుకుంది. రెపో రేటు 6.25 శాతం నుంచి 6.50 శాతానికి పెంచింది. రెపో రేటు పెరగడంతో బ్యాంకులు రుణాలపై వడ్డీ శాతాన్ని పెంచే అవకాశం ఉంది. 2019 ఆర్థిక సంవత్సరం జీడీపీ వృద్ధి రేటు 7.4 శాతంగా ఉంటుందని అంచనా. ఇదే అంశంపై నిర్వహించిన చర్చా కార్యక్రమంలో ఆర్థికరంగ విశ్లేషకులు శశికుమార్ పాల్గొని, మాట్లాడారు. రెపో రేటు అంటే బ్యాంకులకు ఆర్ బీఐ అప్పులు ఇవ్వడం.. రివర్స్ రెపో రేటు అంటే బ్యాంకులు ఆర్ బీఐకి అప్పులు ఇవ్వడం అని పేర్కొన్నారు. సాధారణంగా వృద్ధి పెరిగితే ద్రవ్యోల్బణం పెరుగుతుంది. మరిన్ని వివరాలను వీడియోలో చూద్దాం.. 

 

16:41 - August 1, 2018

ఢిల్లీ : ఆర్ బీఐ మరోసారి కీలక వడ్డీరేట్లను పెంచుతూ నిర్ణయం తీసుకుంది. కీలక వడ్డీరేటు రెపోను వరుసగా రెండోసారి 25 బేసిస్‌ పాయింట్లు పెంచుతున్నట్టు ప్రకటించింది. దీంతో రెపో రేటు 6.25 శాతం నుంచి 6.50 శాతం పెరిగింది. ముడి చమురు ధరలు ప్రస్తుతం కాస్త తగ్గినప్పటికీ, మళ్లీ పెరుగుతాయనే భయాందోళనలుండటం, ఖరీఫ్‌ పంటలకు ప్రభుత్వం మద్దతు ధర పెంచుతూ నిర్ణయం తీసుకోవడం, ద్రవ్యోల్బణం పెరగడం వంటి అంశాల కారణంతో రెపోను పెంచేందుకే మానిటరీ పాలసీ కమిటీ నిర్ణయం తీసుకుంది. మూడు రోజుల సమావేశం అనంతరం ఆర్‌బీఐ నేతృత్వంలోని మానిటరీ కమిటీ ఇవాళ పాలసీ నిర్ణయాన్ని ప్రకటించింది. ఆరుగురు సభ్యులున్న ఈ కమిటీలో ఐదుగురు రెపో రేటు పెంపుకు ఆమోదం తెలుపగా.. ఒకరు మాత్రం వ్యతిరేకించినట్టు సమాచారం. గత జూన్‌ పాలసీలో కూడా రెపోను 25 బేసిస్‌ పాయింట్లు పెంచి 6.25 శాతంగా నిర్ణయించింది. ఇంధన ధరలు ఖరీదైనవిగా మారడంతో, జూన్‌ నెల రిటైల్‌ ద్రవ్యోల్బణం ఐదు నెలల గరిష్టం 5 శాతానికి పెరిగింది. రివర్స్‌ రెపో రేటు 6.25 శాతంగా, ఎంఎస్‌ఎఫ్‌ రేటు, బ్యాంక్‌ రేటు 6.75 శాతంగా మానిటరీ పాలసీ కమిటీ నిర్ణయించింది. 2019 ఆర్థిక సంవత్సరం జీడీపీ వృద్ధి రేటు అంచనా 7.4 శాతంగా ఉంచింది. 

 

07:50 - June 30, 2018

నల్లధనం అంశంలో మోది సర్కార్‌ ఫెయిల్‌ అయిందా? అంటే ఔననే చెబుతోంది తాజాగా విడుదలైన స్విస్‌ బ్యాంకు నివేదిక. స్విట్జర్లాండ్‌ బ్యాంకుల్లో భారతీయుల డిపాజిట్లు 50 శాతం పెరగడమే ఇందుకు నిదర్శనం. నల్లధనాన్ని నియంత్రించడంలో కేంద్రం విఫలమైందని విపక్షాలు విమర్శిస్తున్నాయి. మరోవైపు 2019 నాటికి నల్ల కుబేరుల జాబితాను బయట పెడతామని కేంద్రం చెబుతోంది. ఇదే అంశంపై నిర్వహించిన చర్చా కార్యక్రమంలో విశ్లేషకులు వినయ్ కుమార్, కాంగ్రెస్ నేత రామ్మోహన్, బీజేపీ నేత ఆచారి పాల్గొని, మాట్లాడారు. ఈ సందర్భంగా వక్తలు మాట్లాడుతూ స్విస్ బ్యాంకులో భారతీయుల నగదు పెరుగుతుందన్నారు. భారతీయుల డిపాజిట్లు 50 శాతం పెరిగాయని తెలిపారు. విదేశాల నుంచి నల్లధనం వెనక్కితేవడంలో మోడీ ప్రభుత్వం విఫలం అయిందని విమర్శించారు. మరిన్ని వివరాలను వీడియోలో చూద్దాం.. 

11:29 - June 19, 2018

ఢిల్లీ : పెరిగిన డీజిల్‌ ధరలకు నిరసనగా దేశవ్యాప్తంగా ట్రక్కు యజమానులు, ఆపరేటర్లు నిరవధిక సమ్మె చేపట్టారు. దీంతో  90లక్షల ట్రక్కుల రాకపోకలు నిలిచిపోయాయి. ధరలు తగ్గించే వరకు సమ్మె కొనసాగిస్తామని ట్రక్కు అసోసియేషన్‌ స్పష్టం చేసింది.
దేశ వ్యాప్తంగా నిలిచిపోయిన 90 లక్షల ట్రక్కుల రాకపోకలు 
కేంద్ర ప్రభుత్వం డీజిల్‌ ధరలను పెంచటాన్ని నిరసిస్తూ ట్రక్కు యజమానులు సమ్మెకు దిగారు. దీంతో దేశవ్యాప్తంగా  90 లక్షల ట్రక్కుల రాకపోకలు నిలిచిపోయాయి. అంతర్జాతీయంగా డీజిల్‌ ధరలు తగ్గుతున్నా... కేంద్రప్రభుత్వం డీజిల్‌పై అదనపు టాక్సులు వేస్తూ.. భారం మోపుతుండంతో సమ్మెకు దిగామని ఆల్‌ ఇండియా కాన్ఫడరేషన్‌ ఆఫ్‌ గూడ్స్‌ వెహికల్‌ ఓనర్స్‌ అసోసియేషన్‌  ప్రకటించింది. పెంచిన డీజిల్‌ ధరలు తగ్గించే వరకు సమ్మెను కొనసాగిస్తామని స్పష్టం చేసింది.
ప్రభుత్వాలు విధిస్తున్న పన్నుల వల్లే డీజిల్‌ ధరలు పెరిగాయి: అసోసియేషన్‌ 
కేంద్రం, రాష్ట్ర ప్రభుత్వాలు విధిస్తున్న అత్యధిక పన్నుల వల్లే చమురు ధరలు పెరుగుతున్నాయని అసోసియేషన్‌ ఆరోపించింది. లీటర్ డీజిల్‌పై 8 రూపాయల సెస్సు.. కిలో మీటర్‌కు 8 రూపాయల టోల్‌ టాక్స్ సహా అదనపు టాక్సులు వసూలు చేస్తున్నాయని అసోసియేషన్‌ సభ్యులు అన్నారు. డీజిల్ ధరలు, టాక్స్‌లతో రోజుకు మూడు కోట్ల నష్టం వాటిల్లుతుందని తెలిపారు. 2013లో 53 రూపాయలు ఉన్న డీజిల్‌ ధర ప్రస్తుతం 74 రూపాయలకు చేరిందని ఆవేదన వ్యక్తం చేశారు. అంతర్జాతీయ మార్కెట్‌లో బ్యారెల్ ధర తగ్గినా కేంద్ర ప్రభుత్వం అదనపు టాక్సులతో భారాలు మోపుతున్నందునే ఆందోళన చేపట్టామని అసోసియేషన్ సభ్యులు అన్నారు. డీజిల్‌, పెట్రోల్‌ ఉత్పత్తులను జీఎస్‌టీ పరిధిలోకి తీసుకురావాలని ట్రక్కు ఆపరేటర్లు డిమాండ్ చేస్తున్నారు. 
థర్డ్‌ పార్టీ బీమా ప్రీమియం సంప్రదాయాన్ని మార్చాలి: అసోసియేషన్‌ 
ఇక థర్డ్‌ పార్టీ బీమా ప్రీమియంను కూడా ఏటా పెంచే సంప్రదాయాన్ని మార్చాలని అసోసియేషన్‌ సభ్యులు డిమాండ్‌ చేశారు. తమ డిమాండ్లను నెరవేర్చేదాకా సమ్మె ఆపబోమని స్పష్టం చేశారు. అత్యవసర వస్తువుల తరలింపునకు ఆటంకం కలగకుండా సమ్మె చేస్తున్నామని అసోసియేషన్ సభ్యులు తెలిపారు.

 

21:30 - June 9, 2018

హైదరాబాద్ : పెరిగిన పెట్రోల్‌, డీజిల్‌ ధరలపై ప్రజా సంఘాలు నిరసనతో హోరెత్తించాయి. పెరిగిన ధరలకు నిరసనగా తెలుగు రాష్ట్రాల్లో ధర్నాలు, రాస్తారోకోలు చేపట్టాయి. కేంద్రం ఇష్టారీతిన ధరలు పెంచుతూ సామాన్యుల నడ్డి విరుస్తుందని ఆగ్రహం వ్యక్తం చేశాయి. ధరలను వెంటనే తగ్గించాలని...లేదంటే పెద్ద ఎత్తున ఆందోళనకు దిగుతామని ప్రభుత్వాన్ని హెచ్చరించాయి. పెట్రోల్‌, డీజిల్‌ ధరలను పెంచడంపై ప్రజా, కార్మిక సంఘాలు ఆగ్రహం వ్యక్తం చేశాయి. ధరలను తగ్గించాలని డిమాండ్‌ చేస్తూ తెలుగు రాష్ట్రాల్లో పలు చోట్ల రాస్తారోకోలు, ధర్నాలు నిర్వహించాయి. 
అనంతపురంలో 
అనంతపురంలో వామపక్షాలు రోడ్డెక్కాయి. పెట్రో మంటను తగ్గించాలంటూ నగరంలోని టవర్‌ క్లాక్‌ సమీపంలోని ఓవర్‌ బ్రిడ్జి వద్ద బైఠాయించి నిరసన తెలిపారు. వామపక్షాల నిరసనకు జనసేన, ప్రజా సంఘాలు మద్దతు ప్రకటించాయి. వామపక్షాలు పరిపాలిస్తున్న కేరళ రాష్ట్రంలో పెట్రోల్‌ ధరలపై పన్నులు మినహాయించి ప్రజలకు ఊరట కలిగించారని గుర్తు చేశారు నేతలు. ఇప్పటికైనా ప్రభుత్వం స్పందించి ధరలను తగ్గించేలా చర్యలు తీసుకోవాలని డిమాండ్‌ చేశాయి. లేని పక్షంలో పెద్ద ఎత్తున ఆందోళన చేస్తామని హెచ్చరించాయి. 
విజయవాడలో
విజయవాడలోనూ పెట్రోల్‌, డీజిల్‌ ధరల పెంపునకు నిరసనగా వామపక్షాలు ఆందోళనకు దిగాయి. పాతబస్టాండ్ వద్ద సీపీఎం, సీపీఐ నేతలు ధర్నాకు దిగారు. పెట్రోల, డీజిల్‌ ధరలు తగ్గించేంతవరకు పోరాటం చేస్తామని సీపీఎం మధు అన్నారు. పెంచిన వంట గ్యాస్‌ ధరలు తగ్గించాలని రామకృష్ణ డిమాండ్‌ చేశారు.
కడపలో 
కేంద్ర ప్రభుత్వం రోజురోజుకు పెట్రోల్ డీజల్ ధరలను పెంచుతూ ప్రజల నడ్డి విరుస్తోందని వామపక్ష నేతలు మండిపడ్డారు. పెట్రోల్ ధరలను పెంచడాన్ని నిరసిస్తూ కడప నగరంలోని పాతబస్టాండ్ నుండి ఏడురోడ్ల కూడలి వరకు నిరసన ర్యాలీ చేపట్టారు.
విజయనగరంలో    
విజయనగరం జిల్లాలోనూ పెట్రో ధరలపై వామపక్షాలు నిరసన కార్యక్రమాలు చేపట్టాయి. జనసేన, ప్రజా సంఘాల ఆధ్వర్యంలో రాస్తారోకో చేపట్టారు వామపక్ష నేతలు. ఆందోళన నేపథ్యంలో భారీ ఎత్తున పోలీసు బందోబస్తు ఏర్పాటు చేశారు. 
రాజమహేంద్రవరంలో 
పెంచిన పెట్రోల్‌, డీజిల్ ధరలను తగ్గించాలని డిమాండ్‌ చేస్తూ.. రాజమహేంద్రవరంలో మోటర్‌ కార్మిక సంఘాలు రోడ్డెక్కాయి. కోటిపల్లి బస్టాండ్ సెంటర్లో వామపక్ష నేతలతో కలిసి కార్మిక సంఘాలు రాస్తారోకో చేశాయి. 
అమలాపురంలో 
కేంద్రప్రభుత్వం అడ్డగోలుగా పెట్రోల్‌, డీజిల్‌, గ్యాస్‌ ధరలను పెంచుతోందని తూర్పుగోదావరి జిల్లా సీపీఎం నాయకులు మండిపడ్డారు. పెంచిన ధరలకు వ్యతిరేకంగా.. అమలాపురంలో వామపక్ష నేతలు, ప్రజాసంఘాలు కలిసి నిరసన కార్యక్రమాలు చేపట్టారు. 
నెల్లూరులో
పెరిగిన పెట్రోల్ డీజిల్ ధరలను వెంటనే తగ్గించాలని డిమాండ్ చేస్తూ నెల్లూరులోని ఆత్మకూరు బస్టాండ్ వద్ద వామపక్షాలు రాస్తారోకో నిర్వహించాయి. ధరలు పెరగడం వల్ల సామాన్య మధ్య తరగతి ప్రజలు, కార్మికులు తీవ్రంగా నష్టపోతున్నారని ఆగ్రహం వ్యక్తం చేశాయి. 
జగిత్యాలలో
తెలంగాణలోనూ పెట్రో ధరలపై ప్రతిపక్షాలు భగ్గుమన్నాయి. ధరలను తగ్గించి వాటిని జీఎస్టీ పరిధిలోకి తీసుకురావాలని డిమాండ్‌చేశారు తెలుగుదేశం పార్టీ నేతలు. ఈ మేరకు జగిత్యాల ఆర్డీవో కార్యాలయం ఎదుట ధర్నా నిర్వహించాయి. ధరలు తగ్గించాలంటూ అంబేద్కర్‌కు వినతిపత్రం అందించారు నేతలు. 
విశాఖలో 
దేశవ్యాప్తంగా పెట్రోల్‌, డీజిల్‌, గ్యాస్‌ ధరల పెంపును నిరసిస్తూ విశాఖ జిల్లా మద్దిలిపాలెం కూడలి వద్ద వామపక్షాలు రాస్తారోకో నిర్వహించాయి. సామాన్యులపై ఎనలేని భారం మోపుతున్న ధరలను ప్రభుత్వం వెంటనే తగ్గించాలని డిమాండ్‌ చేశారు వామపక్ష నేతలు. 
శ్రీకాకుళంలో
శ్రీకాకుళం జిల్లాలో లెఫ్ట్ పార్టీ నేతలు నిరసన కార్యక్రమాలు చేపట్టాయి. నగరంలోని రామలక్ష్మణ కూడలి వద్ద రాస్తారోకో నిర్వహించి ధరల పెంపుకు వ్యతిరేకంగా పెద్ద ఎత్తున నినాదాలు చేశారు నేతలు. అడ్డగోలుగా పెరుగుతోన్న పెట్రోల్‌ ధరలపై తెలుగు రాష్ట్రాల్లో నిరసనలు వెల్లువెత్తాయి. ధరలను తగ్గించకపోతే ఆందోళనలు ఉధృతం చేస్తామని కేంద్ర, రాష్ట్ర ప్రభుత్వాలను ప్రజా సంఘాలు హెచ్చరించాయి. 

16:20 - June 9, 2018

తూర్పుగోదావరి : కేంద్రప్రభుత్వం అడ్డగోలుగా పెట్రోల్‌, డీజిల్‌, గ్యాస్‌ ధరలను పెంచుతుందని తూర్పుగోదావరి జిల్లా సీపీఎం నాయకులు మండిపడ్డారు. పెంచిన ధరలకు వ్యతిరేకంగా.. అమలాపురంలో వామపక్ష నేతలు, ప్రజాసంఘాలు కలిసి నిరసన కార్యక్రమాలు చేపట్టాయి. కాంగ్రెస్‌ ప్రభుత్వ హాయాంలో పెట్రోల్‌ ధరలు పెరిగితే అన్యాయమంటూ నిరసనలు చేసిన బీజేపీ నేతలు ఇప్పుడేలా ధరలు పెంచుతున్నారని ప్రశ్నించారు. పెట్రోల్‌, డీజిల్‌ ధరలను జీఎస్టీ పరిధిలోకి తీసుకురావాలని నాయకులు డిమాండ్‌ చేశారు. పెంచిన ధరలు తగ్గించకుంటే బీజేపీ ప్రభుత్వానికి ప్రజలు చరమగీతం పాడతారని నాయకులు అన్నారు.

 

Pages

Don't Miss

Subscribe to RSS - పెంపు