పోలింగ్

21:07 - July 17, 2017

హైదరాబాద్ : తెలుగు రాష్ట్రాల్లోనూ రాష్ట్రపతి ఎన్నికల పోలింగ్‌ ప్రశాంతంగా ముగిసింది. ఏపీలో వందశాతం పోలింగ్‌ నమోదు కాగా, తెలంగాణలో ఇద్దరు సభ్యులు గైర్హాజరయ్యారు. ఏపీలో.. రాష్ట్రపతి ఎన్నికల వేళా.. పాలక, ప్రతిపక్షాల నేతల మధ్య వాగ్యుద్ధం నడిచింది. రాష్ట్రపతి ఎన్నికల పోలింగ్‌లో.. ఆంధ్రప్రదేశ్‌కు చెందిన సభ్యులు అందరూ ఓటు హక్కును వినియోగించుకున్నారు. సీఎం చంద్రబాబు తొలిఓటు వేయగా, స్పీకర్‌ కోడెల శివప్రసాదరావు రెండో ఓటు వేశారు. వైసీపీ నుంచి వలస వచ్చిన వారు సహా మొత్తం 124 మంది టీడీపీ ఎమ్మెల్యేలు, వైసీపీకి చెందిన 46 మంది, బీజేపీకి చెందిన నలుగురు సభ్యులూ ఓటు హక్కును వినియోగించుకున్నారు. టీడీపీ సభ్యులందరూ ఓటేశాక, వైసీపీ ఎమ్మెల్యేలు ఓటుహక్కు వినియోగించుకున్నారు. నంద్యాల ఎమ్మెల్యే భూమా నాగిరెడ్డి మరణం కారణంగా ఓ స్థానం ఖాళీ అయిన నేపథ్యంలో.. 174 మంది ఎమ్మెల్యేలు , పార్లమెంటు సభ్యుడు రాయపాటి సాంబశివరావు ఏపీ అసెంబ్లీలో ఓటేశారు.

మాటల యుద్ధం..
ఎన్నిక ప్రక్రియ ప్రశాంతంగా ముగిసినా.. పాలక ప్రతిపక్షాల మధ్య మాటల యుద్ధం.. వాతావరణాన్ని వేడెక్కించింది. పాలక, ప్రతిపక్షాలు రెండూ ఎన్డీయే అభ్యర్థికే మద్దతునిచ్చాయి. అయితే.. దీనికి కారణాలపై ఇరు పక్షాలు పరస్పర ఆరోపణలు గుప్పించుకున్నాయి. తెలంగాణాలోనూ.. ఎమ్మెల్యేలు ప్రశాంత వాతావరణంలో ఓటు హక్కును వినియోగించుకున్నారు. రాష్ట్ర ముఖ్యమంత్రి కేసీఆర్‌ తొలి ఓటేయగా.. బీజేపీ శాసనసభాపక్షం నేత కిషన్‌రెడ్డి చివరగా ఓటేశారు. మొత్తం 119 మంది ఎమ్మెల్యేలకు గాను, 117 మంది ఓటు హక్కును వినియోగించుకున్నారు. ఎమ్మెల్యేలు అక్బరుద్దీన్‌, మనోహర్‌రెడ్డి అనారోగ్యం కారణంగా, ఓటేయలేదు. బీజేపీ ఎమ్మెల్యే రాజాసింగ్‌ క్రాస్‌ ఓట్‌ చేసినట్లు ప్రచారం జరిగినా.. ఆయన దాన్ని ఖండించారు. పార్టీ ఆదేశానుసారమే ఓటేశానన్నారు. మొత్తానికి తెలుగు రాష్ట్రాలు రెండింటిలోనూ.. రాష్ట్రపతి ఎన్నికల పోలింగ్‌ ప్రశాంతంగా ముగిసింది.

15:14 - July 17, 2017

విజయవాడ : వైసీపీ ఎమ్మెల్యే రోజా మరోసారి చిక్కుల్లో పడ్డారు. గతంలో నిండు అసెంబ్లీలో వ్యవహరించిన తీరుపై ప్రభుత్వం నోటీసులు జారీ చేసిన సంగతి తెలిసిందే. మరోసారి ఆమె చేసిన వ్యాఖ్యలపై ఏపీ స్పీకర్ కోడెల ఆగ్రహం వ్యక్తం చేసినట్లు సమాచారం. వ్యాఖ్యలపై రోజాకు నోటీసులు ఇవ్వాలని కోడెల అసెంబ్లీ కార్యదర్శిని ఆదేశించారు.

ఎందుకు నోటీసులు..
రాష్ట్రపతి ఎన్నిక నేపథ్యంలో ఏపీ ప్రభుత్వం పలు ఏర్పాట్లు చేసింది. అందులో భాగంగా అధికార పక్షానికి చెందిన సభ్యులకు సీఎం చంద్రబాబు నాయుడు మాక్ పోలింగ్ నిర్వహించారు. అనంతరం పలువురు సభ్యులు ఓటింగ్ వేశారు. వైసీపీ ఎమ్మెల్యే రోజా కూడా ఓటు హక్కును వినియోగించుకున్నారు. అనంతరం ఆమె మీడియాతో మాట్లాడారు. స్పీకర్ కోడెల తీరును ఆమె తీవ్రంగా తప్పుబట్టారు. టిడిపి నాయకులకు ఏర్పాటు చేసిన కార్యక్రమంలో స్పీకర్ కోడెల ఎలా పాల్గొంటారని ప్రశ్నించారు. ముఖ్యమంత్రి వచ్చి మాక్ ఓటింగ్‌ లో పాల్గొనడం సరికాదని..స్పీకర్ కూడా అందుకు సహకరించారని ఆరోపణలు గుప్పించారు. స్పీకర్ హుందాగా ప్రవర్తిస్తే బాగుంటుందని కానీ స్పీకర్ పదవికి ఆయన గౌరవం లేకుండా చేశారంటూ వ్యాఖ్యానాలు చేశారు.

కోడెల ఆగ్రహం..
స్పీకర్‌ను కించపరిచే విధంగా రోజా మాట్లాడారంటూ స్పీకర్ కోడెలకు విషయాన్ని తెలియచేశారు. దీనితో ఆయన తీవ్ర ఆగ్రహం వ్యక్తం చేసినట్లు సమాచారం. రోజాకు వెంటనే నోటీసులు జారీ చేయాలని అసెంబ్లీ కార్యదర్శికి ఆదేశాలు జారీ చేసినట్లు సమాచారం. దీంతో వైసీపీలో మరోసారి టెన్షన్ మొదలైంది.

08:05 - March 19, 2017
06:47 - March 18, 2017

అమరావతి : స్థానిక సంస్థల ఎమ్మెల్సీ ఎన్నికల పోలింగ్ నెల్లూరు, కర్నూలు, కడప జిల్లాల్లో ప్రశాంతంగా ముగిసింది.. రికార్డు స్థాయిలో మూడు జిల్లాల్లో 99శాతం పోలింగ్‌ నమోదైంది.. ఈ నెల 20న కౌంటింగ్ జరగనుంది..

నెల్లూరు జిల్లాలో 99.9 శాతం ఓటింగ్‌

నెల్లూరు జిల్లా స్థానిక సంస్థల ఎమ్మెల్సీ ఎన్నికల్లో రికార్డు స్థాయిలో 99.9 శాతం పోలింగ్‌ నమోదైంది.. ఐదు డివిజన్లలో 852 ఓట్లకు గాను 851మంది తమ ఓటు హక్కు వినియోగించుకున్నారు. గూడూరు, కావలి, ఆత్మకూరు, నాయుడుపేటలో నూటికి నూరుశాతం ఓట్లు పోలయ్యాయి.. ఉదయం ఎనిమిది గంటలకు మొదలైన పోలింగ్ సాయంత్రం నాలుగు గంటలవరకూ కొనసాగింది..

టీడీపీనుంచి వాకాటి నారాయణరెడ్డి.....

ఈ ఎన్నికల్లో టీడీపీ నుంచి వాకాటి నారాయణరెడ్డి, వైసీపీనుంచి ఆనం విజయ కుమార్‌ రెడ్డి పోటీపడ్డారు.. రెండు పార్టీలవారు తమ పార్టీ ఓటర్లను కాపాడుకునేందుకు ప్రాధాన్యతనిచ్చారు.. ఓటర్లను పదిరోజులకుపైగా ఇతర రాష్ట్రాల్లో ఉంచారు.. టీడీపీ తమ ఓటర్లను తమిళనాడుకు తీసుకువెళ్లగా... వైసీపీ తెలంగాణకు తరలించింది... వీరందరినీ బస్సుద్వారా పోలింగ్‌ కేంద్రాలకు తీసుకువచ్చారు.

కర్నూలు జిల్లాలో 99.35శాతం పోలింగ్‌.....

కర్నూలు జిల్లాలోనూ 99.35శాతం ఓటింగ్‌ నమోదైంది.. జిల్లాలో వెయ్యి 84ఓట్లుంటే... వెయ్యి 77 ఓట్లు పోలయ్యాయి. టీడీపీ నుంచి శిల్పా చక్రపాణిరెడ్డి, వైసీపీ నుంచి గౌరు వెంకటరెడ్డి బరిలోఉన్నారు. రెండు పార్టీలకు చెందిన జడ్పీటీసీలు, ఎంపీటీసీలు, మున్సిపల్‌ కౌన్సిలర్లు, కార్పొరేటర్లు క్యాంప్‌ శిబిరాలనుంచి నేరుగా పోలింగ్‌కేంద్రాలకు వచ్చి ఓటు వేశారు.. నంద్యాల ఎంపీ ఎస్‌పీవై రెడ్డి వీల్‌చైర్‌లోవచ్చి కర్నూలు పోలింగ్‌ సెంటర్లో ఓటు వేశారు.. ఆళ్లగడ్డ ఎమ్మెల్యే భూమా అఖిలప్రియతోపాటు.. శ్రీశైలం, ఎమ్మిగనూరు, డోన్‌ ఎమ్మెల్యేలు తమ ఓటుహక్కు వినియోగించుకున్నారు.. అయితే పోలింగ్‌ పూర్తికాగానే ఫలితాలపై జిల్లాలో బెట్టింగ్‌లు జోరందుకున్నాయి..

కడపలో 99శాతం ఓటింగ్‌....

కడపలోకూడా స్థానిక సంస్థల ఎమ్మెల్సీ ఎన్నికలు ప్రశాంతంగా ముగిశాయి.. ఇక్కడకూడా 99శాతం ఓటింగ్‌ నమోదైంది.. జిల్లాలో 841ఓట్లుఉంటే... 839మంది తమ ఓటు హక్కు వినియోగించుకున్నారు.. రాజంపేట మండలం ఊటుకూరు ఎంపీటీసీ సుహ్రులత ఓటు చెల్లదంటూ హైకోర్టు తీర్పుతో ఆమె ఓటు హక్కు వినియోగించుకోలేకపోయారు.. గతంలో వైసీపీనుంచి గెలిచి టీడీపీలోకి రావడంతో కోర్టు ఈ తీర్పు ఇచ్చింది.. మరో ఎంపీటీసీ లక్ష్మీదేవి అనారోగ్యం వల్ల ఓటు వేయలేకపోయింది.. ఇక్కడ వైసీపీనుంచి వైఎస్‌ వివేకానంద రెడ్డి, టీడీపీనుంచి బీటెక్‌ రవి పోటీలో ఉన్నారు.. మూడు జిల్లాల్లో పోలింగ్‌ ప్రశాంతంగా ముగిసింది.. ఈ నెల 20న జరిగే కౌంటింగ్‌లో విజేతలెవ్వరో తేలనుంది..

19:37 - March 17, 2017

నెల్లూరు : జిల్లా స్థానిక సంస్థల ఎమ్మెల్సీ ఎన్నికల పోలింగ్‌ ముగిసింది.. జిల్లాలో రికార్డు స్థాయిలో 99శాతం పోలింగ్‌ నమోదైంది... 852మంది ఓటర్లకుగాను 851మంది తమ ఓటుహక్కు వినియోగించుకున్నారు.. కావలి, ఆత్మకూరు, నాయుడుపేట, గూడూరులో వందశాతం పోలింగ్‌ నమోదైంది. కడప జిల్లాలో కూడా పోలింగ్ ముగిసింది. మధ్యాహ్నం మూడు గంటల వరకు 99 శాతం పోలింగ్ నమోదైంది. కర్నూలులో ఎమ్మెల్సీ ఎన్నికల పోలింగ్ ముగిసింది. ప్రశాంతంగా జరిగిన పోలింగ్ లో మధ్యాహ్నం మూడు గంటల వరకు 48.62 శాతం పోలింగ్ నమోదైంది.

11:20 - March 17, 2017

నెల్లూరు : జిల్లాలో స్థానిక సంస్థల కోటా ఎమ్మెల్సీ ఎన్నికల పోలింగ్ మందకొడిగా సాగుతోంది. ఉదయం 8 గంటలకు పోలింగ్ ప్రారంభం అయింది. ఓట్లు వేసేందుకు స్థానిక ప్రజా ప్రతినిధులు బారులు తీరారు. అధికారులు కట్టుదిట్టమైన ఏర్పాట్లు చేశారు. సాయంత్రం 4 గంటల వరకు పోలింగ్ కొనసాగుతోంది.

 

10:28 - March 17, 2017

హైదరాబాద్ : ఏపీలో స్థానిక సంస్థల కోటా ఎమ్మెల్సీ ఎన్నికల పోలింగ్ కొనసాగుతోంది. ఎమ్మెల్సీ ఎన్నికలు ఉత్కంఠ రేపుతున్నాయి. కడప, కర్నూలు, నెల్లూరు జిల్లాల శాసనమండలి స్థానాలకు పోలింగ్ కొనసాగుతోంది. ఉదయం 8 గంటటకు పోలింగ్ ప్రారంభం అయింది. సాయంత్రం 6 గంటల వరకు పోలింగ్ కొనసాగనుంది. కడప జిల్లాలో టీడీపీ, వైసీపీ మధ్య పోటా పోటీ నెలకొంది. బీటెక్ రవి, వైఎస్ వివేకానందరెడ్డి మధ్య హోరాహోరి పోరు కొనసాగుతుంది. ఈనెల 20న ఓట్ల లెక్కింపు జరుగనుంది.

 

08:11 - March 17, 2017

హైదరాబాద్ : ఏపీ రాష్ట్రంలో స్థానిక సంస్థల కోటాలో జరుగుతున్న మూడు శాసనమండలి స్థానాల ఎన్నికలు ఉత్కంఠ రేపుతున్నాయి. కడప, కర్నూలు, నెల్లూరు జిల్లాల శాసనమండలి స్థానాలకు పోలింగ్‌ ప్రారంభమైంది. ఎమ్మెల్సీ ఎన్నికల పోలింగ్‌ ఉదయం 8 నుంచి సాయంత్రం 4 గంటల వరకు జరుగనుంది. పోలింగ్‌ నిర్వహణకు ఎన్నికల సంఘం ఏర్పాట్లు పూర్తి చేసింది. రెవెన్యూ డివిజన్‌కు ఒకటి చొప్పున పోలింగ్‌ కేంద్రాలను ఏర్పాటు చేసింది. నెల్లూరులో 5, కడప, కర్నూలు జిల్లాల్లో మూడేసి చొప్పున ఇవి ఏర్పాటయ్యాయి. ఎన్నికల్ని ప్రతిష్ఠాత్మకంగా భావిస్తున్న టీడీపీ, వైసీపీలు శక్తియుక్తులన్నీ ఒడ్డుతున్నాయి. ముఖ్యంగా కడప జిల్లాలో పోటీ నువ్వానేనా అన్నట్టుగా ఉంది. కడపలో టీడీపీ, వైసీపీ అభ్యర్థుల మధ్య పోటీ హోరాహోరీగా ఉండటం, జిల్లాలో సమస్యాత్మక ప్రాంతాలు ఎక్కువగా ఉండటంతో 4వేల మంది పోలీసులు, భద్రతా సిబ్బందిని మోహరించారు. 

07:44 - March 17, 2017

హైదరాబాద్ : ఏపీ రాష్ట్రంలో స్థానిక సంస్థల కోటాలో జరుగుతున్న మూడు శాసనమండలి స్థానాల ఎన్నికలు ఉత్కంఠ రేపుతున్నాయి. కడప, కర్నూలు, నెల్లూరు జిల్లాల శాసనమండలి స్థానాలకు ఇవాళ పోలింగ్‌ జరగనుంది. ఎన్నికల్ని ప్రతిష్ఠాత్మకంగా భావిస్తున్న టీడీపీ, వైసీపీలు శక్తియుక్తులన్నీ ఒడ్డుతున్నాయి. ముఖ్యంగా కడప జిల్లాలో పోటీ నువ్వానేనా అన్నట్టుగా ఉంది. ఎమ్మెల్సీ ఎన్నికల పోలింగ్‌ ఉదయం 8 నుంచి సాయంత్రం 4 గంటల వరకు జరుగుతుంది. పోలింగ్‌ నిర్వహణకు ఎన్నికల సంఘం ఏర్పాట్లు పూర్తిచేసింది. రెవెన్యూ డివిజన్‌కు ఒకటి చొప్పున పోలింగ్‌ కేంద్రాలు ఏర్పాటుచేసింది. నెల్లూరులో 5, కడప, కర్నూలు జిల్లాల్లో మూడేసి చొప్పున ఇవి ఏర్పాటయ్యాయి. కడపలో టీడీపీ, వైసీపీ అభ్యర్థుల మధ్య పోటీ హోరాహోరీగా ఉండటం, జిల్లాలో సమస్యాత్మక ప్రాంతాలు ఎక్కువగా ఉండటంతో 4వేల మంది పోలీసులు, భద్రతా సిబ్బందిని మోహరించారు. 
పోలింగ్‌ను ప్రతిష్ఠాత్మకంగా తీసుకున్న అధికార, ప్రతిపక్షాలు 
నెల్లూరు, కడప, కర్నూలు స్థానాలకు జరిగే ఈ పోలింగ్‌ను అధికార, ప్రతిపక్ష పార్టీలు రెండూ ఎంతో ప్రతిష్ఠాత్మకంగా తీసుకున్నాయి. నెల్లూరు స్థానానికి టీడీపీ అభ్యర్థిగా వాకాటి నారాయణరెడ్డి బరిలో నిలివగా... వైసీపీ నుంచి ఆనం విజయ్ కుమార్ రెడ్డి ఉన్నారు. ఈయన ఆనం సోదరులకు స్వయాన తమ్ముడు. నెల్లూరు జిల్లాలో టీడీపీ గెలవటానికి కావాల్సిన సంఖ్యా బలమే ఉన్నప్పటికీ గూడూరు, సూళ్లూరుపేట వంటి నియోజకవర్గాల్లోని స్థానిక సంస్థల ప్రతినిధులు వాకాటి నారాయణరెడ్డిపై వ్యతిరేకంగా ఉన్నారు. ఈ పరిణామాన్ని గమనించిన టీడీపీ అధిష్టానం ముందు జాగ్రత్తలు తీసుకోవటంతో జిల్లాలో పరిస్థితి అధికారపక్షానికి అనుకూలంగా మారిందన్న భావన వ్యక్తమవుతోంది. 
కడప జిల్లాలో ఎమ్మెల్సీ ఎన్నికల రాజకీయం రసకందాయం 
అధికార, ప్రతిపక్షాలు ప్రతిష్టాత్మకంగా తీసుకున్న కడప జిల్లాలో ఎమ్మెల్సీ ఎన్నికల రాజకీయం రసకందాయంలో పడింది. అధికార పార్టీ బీటెక్ రవిని తమ అభ్యర్థిగా ప్రకటించింది. ఈ స్థానంలో వైసీపీ నుంచి జగన్‌ బాబాయి వైఎస్ వివేకానంద రెడ్డిని బరిలో నిలిపారు. జగన్‌కు కంచుకోటగా ఉన్న కడపలో పాగా వేసేందుకు ఈ అవకాశాన్ని సద్వినియోగం చేసుకోవాలని టీడీపీ భావిస్తోంది. ఓటర్లుగా ఉన్న ప్రజాప్రతినిధులు ఎవరు ఏ క్యాంపులో ఉన్నా... ఓటింగ్ మాత్రం తమకు అనుకూలంగానే ఉంటుందనే భరోసా వైసీపీ పార్టీ నేతల్లో వ్యక్తమవుతోంది. వైఎస్ సానుభూతితో పాటు సొంత ఇలాక తమకు కలసి వచ్చే అంశమని వైసీపీ నేతలు చెబుతున్నారు. 
శిల్పా చక్రపాణిరెడ్డికి మరో అవకాశం 
ఇక రాయలసీమలోని మరో జిల్లా కర్నూలు విషయానికొస్తే.... టీడీపీ నుంచి సిట్టింగ్ ఎమ్మెల్సీ శిల్పా చక్రపాణిరెడ్డికి మరో అవకాశం లభించింది. అయితే... వైసీపీ అంచనాలు వేరే విధంగా ఉన్నాయి. ఈ జిల్లాలో తమ అభ్యర్థిగా గౌరు వెంకటరెడ్డిని ఎన్నికల బరిలో వైసీపీ దింపింది. భూమా మరణానికి పరోక్షంగా చంద్రబాబే కారణమనే ప్రచారం చేయడంతో పాటు... ప్రభుత్వ వ్యతిరేక విధానాలు తమకు కలిసి వస్తాయనే ఆశాభావంతో వైసీపీ నేతలు ఉన్నారు. స్థానిక సంస్థల ఎన్నికల కారణంగా ఇవాళ అసెంబ్లీకి కూడా సెలవు ప్రకటించారు.

 

09:14 - March 10, 2017

విజయవాడ : ఆంధ్రప్రదేశ్‌లో ఎమ్మెల్సీ ఎన్నికలు ప్రశాంతంగా ముగిశాయి. 3 పట్టభద్రుల, 2 ఉపాధ్యాయ నియోజకవర్గాలకు ఎన్నికలు జరిగాయి. మొత్తం 9 జిల్లాల పరిధిలో ఓటర్లు ఓటు హక్కు వినియోగించుకున్నారు. ఉత్తరాంధ్ర పట్టభద్రుల ఎమ్మెల్సీ ఎన్నికల్లో 69.70 శాతం పోలింగ్‌ నమోదైంది. విశాఖ నగరంలో 71.1 శాతం, ఏజెన్సీలో 70 శాతం పోలింగ్‌ నమోదైంది. శ్రీకాకుళంలో 68 శాతం, విజయనగరంలో 70 శాతం పోలింగ్‌ రికార్డైంది. చెదురుమదురు ఘటనలు మినహా ఆంధ్రప్రదేశ్‌లో ఎమ్మెల్సీ ఎన్నికలు ప్రశాంతంగా ముగిశాయి. ఉదయం 8 గంటల నుంచి సాయంత్రం 6 గంటల వరకు పోలింగ్‌ జరిగింది. ఓటు హక్కు వినియోగించుకునేందుకు ఆయా ప్రాంతాల్లో గ్రాడ్యుయేట్లు, టీచర్లు పోటిపడ్డారు.

విశాఖలో..
విశాఖ జిల్లాలో ఎమ్మెల్సీ ఎన్నికలు ప్రశాంతంగా జరిగాయి. నగరంలో తన ఓటు హక్కును పీడీఎఫ్ అభ్యర్థి అజశర్మ వినియోగించుకున్నారు. నర్సీపట్నం మున్సిపాల్టీ ఛైర్మన్‌ చింతకాయల అనిత, వైఎస్‌ ఛైర్మన్‌ చింతకాయల సన్యుజపాత్రుడు ఓటు హక్కు వినియోగించుకున్నారు.

విజయనగరం..
విజయనగరం జిల్లా పార్వతిపురంలో టీడీపీ ఎమ్మెల్సీ ద్వారపురెడ్డి జగదీష్‌ తన ఓటు హక్కు వినియోగించుకున్నారు. అయితే పోలింగ్‌ బూత్‌లోకి ఎమ్మెల్సీ జగదీష్‌ సెల్‌ఫోన్‌ తీసుకెళ్లడంపై ఓటర్ల నుంచి అభ్యంతరాలు వ్యక్తమయ్యాయి.

శ్రీకాకుళం..
శ్రీకాకుళం జిల్లాలో ఉత్తరాంధ్ర పట్టభద్రుల ఎమ్మెల్సీ ఎన్నికలు ప్రశాంతంగా ముగిశాయి. ఉదయం నుంచి పోలింగ్‌ మందకొడిగా సాగింది. మధ్యాహ్నం నుంచి ఓటర్లు అధిక సంఖ్యలో వచ్చి వారి ఓటు హక్కును వినియోగించుకున్నారు.

తూర్పు రాయలసీమ..
తూర్పు రాయలసీమ నియోజకవర్గ పట్టభద్రులు, ఉపాధ్యాయ ఎమ్మెల్సీ ఎన్నికలు నెల్లూరు జిల్లాలో చెదురుమదురు ఘటనలు మినహా ప్రశాంతంగా సాగాయి. డీకే డబ్ల్యూ కాలేజీలో ఏర్పాటు చేసిన పోలింగ్ బూత్‌లో కలెక్టర్‌ ముత్యాలరాజు ఓటు హక్కు వినియోగించుకున్నారు. రామ్మూర్తి నగర్‌లో టీడీపీ ఎమ్మెల్సీ అభ్యర్థి పట్టాభిరామిరెడ్డి ఓటు హక్కు వినియోగించుకున్నారు.

ప్రకాశం..
ప్రకాశం జిల్లాలో మందకొడిగా ప్రారంభమైన ఎమ్మెల్సీ ఎన్నికలు.. మధ్యాహ్నానికి పుంజుకున్నాయి. గిద్దలూరులో ఓ టీడీపీ ఎమ్మెల్యే అసిస్టెంట్‌ ఓటర్లకు డబ్బు పంపిణి చేస్తూ కెమెరాకు చిక్కారు. కందుకూరులో మాజీ ఎమ్మెల్యీ దివి శివరాం ఎలక్షన్‌ కోడ్‌ ఉల్లఘించారని పీడీఎఫ్‌ నాయకులు ఆరోపించారు. తమ గ్రామ సమస్యలు పరిష్కరించనందుకు నిరసనగా వెంకటాద్రిపాలెంలో 65 మంది ఓటర్లు ఎన్నికలను బాయ్‌కాట్‌ చేశారు.

తిరుపతి..
తిరుపతిలో టీడీపీ నేతలు అవకతవకలకు పాల్పడుతున్నారని తూర్పు రాయలసీమ పీడీఎఫ్ పట్టభద్రుల అభ్యర్థి యడవల్లి శ్రీనివాసరెడ్డి ఆరోపించారు. 258వ బూత్‌లో అధికార పార్టీ దొంగఓట్లు వేయిస్తుందని ఓటర్ల నుంచి ఆరోపణలు వెల్లువెత్తాయి. పీడీఎఫ్‌, టీడీపీ వర్గాల మధ్య తీవ్ర వాగ్వాదం చోటుచేసుకుంది.

అనంతపురం..
అనంతపురంలో తాడిపత్రి టీడీపీ ఎమ్మెల్యే జేసీ ప్రభాకర్ రెడ్డి తన ఓటు హక్కును వినియోగించుకున్నారు. పుట్టపర్తి నియోజకవర్గంలో పోలింగ్‌ కేంద్రాలను మంత్రి పల్లె రఘునాథరెడ్డి పరిశీలించారు.

కడప..
కడప జిల్లా పులివెందులలో ఎంపీ వైఎస్‌ అవినాష్‌ రెడ్డి తన ఓటు హక్కు వినియోగించుకున్నారు. ప్రొద్దుటూరులో పశ్చిమ రాయలసీమ ఉపాధ్యాయ ఎమ్మెల్సీ అభ్యర్థి ఒంటేరు శ్రీనివాసులు రెడ్డి తన ఓటు హక్కు వినియోగించుకున్నారు. మైదుకూరు, జమ్మలమడుగు, రైల్వే కోడూరులో ఎన్నికలు ప్రశాంతంగా జరిగాయి.

కర్నూలు..
కర్నూలు ప్రకాష్‌ నగర్‌లో టీడీపీ రాజ్యసభ సభ్యుడు టీజీ వెంకటేష్‌ కుటుంబ సమేతంగా వచ్చి తన ఓటు హక్కు వినియోగించుకున్నారు. నంద్యాల, ఆదోని డివిజన్‌ కేంద్రాల్లో ఎన్నికలు ప్రశాంతంగా జరిగాయి. 

Pages

Don't Miss

Subscribe to RSS - పోలింగ్