పోలీసులు

09:12 - February 22, 2017

హైదరాబాద్ : ఇందిరాపార్కు...తెల్లవారుజామున వాకర్స్..చిరు వ్యాపారులతో రద్దీగా ఉంటుంది. కానీ బుధవారం ఉదయం మాత్రం నిశబ్ద వాతావరణం నెలకొంది. ఆ ప్రాంతం వద్ద ఎక్కడ చూసినా పోలీసులు..పోలీసు వాహనాలే కనిపిస్తున్నాయి. నిరుద్యోగ ర్యాలీ నేపథ్యంలో భారీ సంఖ్యలో పోలీసులు మోహరించారు. గతంలో ఎన్నడూ లేని విధంగా భద్రతను మోహరించడం గమనార్హం. ఇందిరాపార్కులోనికి వాకర్స్..ఇతరులను కూడా అనుమతించకపోవడం పలు విమర్శలు వెల్లువెత్తుతున్నాయి.
తెలంగాణ రాష్ట్రంలో నిరుద్యోగ సమస్యపై జేఏసీ పోరాటబాట పట్టిన సంగతి తెలిసిందే. అందులో భాగంగా 22వ తేదీన ర్యాలీ నిర్వహించతలపెట్టింది. కానీ పోలీసులు అనుమతించకపోవడంతో ప్రొ.కోదండరాం హైకోర్టును ఆశ్రయించారు. ర్యాలీ..సభ నేపథ్యంలో కోర్టు పలు సూచనలు చేసింది. కానీ జేఏసీ దీనికి అంగీకరించలేదు. ర్యాలీ నిర్వహించి తీరుతామని జేఏసీ స్పష్టం చేయడంతో పోలీసులు భారీగా మోహరించారు. ప్రొ.కోదండరాం ఇంటి తలుపులు బద్దలు కొట్టి ముందస్తుగా అదుపులోకి తీసుకున్నారు. అనంతరం ఇతర జేఏసీ నేతలను అదుపులోకి తీసుకుని వివిధ పీఎస్ లకు తరలించారు.

08:46 - February 22, 2017

హైదరాబాద్ : ఎస్వీకే..సుందరయ్య కళా విజ్ఞాన కేంద్రం..నిత్యం రద్దీతో సందడిగా ఉంటుంది. ప్రస్తుతం ఇక్కడ ఖాకీ బూట్ల చప్పుడు వినిపిస్తోంది. భారీ సంఖ్యలో పోలీసులు మోహరించారు. నిరుద్యోగ ర్యాలీ నేపథ్యంలో నగరంలో టెన్షన్ వాతావరణం నెలకొంది. నిరుద్యోగ ర్యాలీ..సభను నాగోల్ మెట్రో గ్రౌండ్ లో నిర్వహించుకోవాలని హైకోర్టు సూచనలు చేయడం..ర్యాలీ నిర్వహించి తీరుతామని జేఏసీ పేర్కొనడంతో టెన్షన్ వాతావరణం నెలకొంది. ఎస్వీకే నుండి ఇందిరాపార్కు వరకు ర్యాలీ నిర్వహిస్తామని పేర్కొనడంతో పోలీసులు గట్టి బందోబస్తు ఏర్పాటు చేశారు ఎవరూ రానీయకుండా బారికేడ్లు ఏర్పాటు చేశారు. ముందస్తు చర్యలో భాగంగా టియర్ గ్యాస్ వాహనాలు మోహరించడం గమనార్హం. తాము శాంతియుతంగా నిర్వహిస్తామని చెప్పినా, 21 రోజుల్లో తమ అనుమతిని ఎందుకు పరిగణలోకి తీసుకోలేదని ప్రొ.కోదండరాం ప్రశ్నిస్తున్నారు. తెలంగాణ ఉద్యమ సమయంలో జరిగిన పరిణామాలను ఇప్పుడు సాకుగా చూపడం దారుణమని అంటున్నారు. తీవ్ర నిర్భందాల నడుమ ఎస్వీకే వద్ద నిరుద్యోగులు ర్యాలీ నిర్వహిస్తారా ? లేదా ? అనేది చూడాలి.

21:24 - February 21, 2017

హైదరాబాద్: ఏది ఏమైనా నిరుద్యోగ ర్యాలీ నిర్వహించడం తథ్యమని టీ-జేఏసీ ప్రకటించింది. ముందుగా అనుకున్న ప్రకారమే తమ కార్యక్రమం ఉంటుందని స్పష్టం చేసింది. నిరుద్యోగులను ర్యాలీకి రానీయకుండా పోలీసులు.. ఎక్కడికక్కడ నిర్బంధాన్ని అమలు చేస్తున్నారని టీ-జేఏసీ చైర్మన్‌ కోదండరామ్ అరోపించారు. స్వరాష్ట్రంలో.. స్వపరిపాలనలో.. ఈ నిర్బంధమేంటని ఆయన సర్కారును నిలదీశారు. మరోవైపు.. నిరుద్యోగ ర్యాలీ నేపథ్యంలో, పోలీసులు రాజధానిలో భద్రతావలయాన్ని ఏర్పాటు చేశారు.

మంగళవారం ఉదయం నుంచి సాయంత్రం వరకు ఎడతెగని ఉత్కంఠ..

నిరుద్యోగుల ర్యాలీపై.. మంగళవారం ఉదయం నుంచి సాయంత్రం వరకు ఎడతెగని ఉత్కంఠ కొనసాగింది. ఓవైపు పోలీసులు.. మరోవైపు టీజేఏసీ నేతలు.. నడుమ న్యాయస్థానం..! ర్యాలీ, బహిరంగ సభావేదికల గురించి ఈ మూడు వర్గాల మధ్యా దఫదఫాలుగా చర్చలు సాగాయి. చివరికి, న్యాయస్థానం, నాగోల్‌ మెట్రో గ్రౌండ్‌లో బహిరంగ సభ నిర్వహించుకోవచ్చని జేఏసీ నేతలకు సూచించింది. అయితే, దీనికి అంగీకరించని జాక్‌ నేతలు, ర్యాలీకి అనుమతి కోరుతూ వేసిన పిటిషన్‌ను ఉపసంహరించుకున్నారు.

ఈనెల ఒకటో తేదీనుంచి ఉత్కంఠ కొనసాగుతూనే ...

నిరుద్యోగుల నిరసన ర్యాలీ కోసం ఈనెల ఒకటో తేదీనుంచి ఉత్కంఠ కొనసాగుతూనే ఉంది. టీ-జేఏసీ నేతల విజ్ఞప్తిపై ప్రభుత్వం ఏమాత్రం స్పందించక పోవడంతో, వారు హైకోర్టును ఆశ్రయించారు. దీనిపై మంగళవారం ఉదయం నుంచి కోర్టులో వాద-ప్రతివాదనలు జరిగాయి. ర్యాలీ నేపథ్యంలో విధ్వంసం జరిగే అవకాశముందని.. పోలీసులు కోర్టు దృష్టికి తీసుకువచ్చారు. అలాగే.. ర్యాలీ నిర్వహించేవారిలో చాలామందిపై అనేక కేసులు ఉన్నాయని.. నగరంలో ర్యాలీ నిర్వహిస్తే ట్రాఫిక్‌ సమస్యలు ఉత్పన్నమవుతాయని నివేదించారు. నగర శివారులో ఎక్కడైన సభ నిర్వహించుకుంటే తమకు అభ్యంతరం లేదని అడ్వకేట్‌ జనరల్‌ కోర్టు దృష్టికి తీసుకువచ్చారు. దీనిపై టీ-జేఏసీ న్యాయవాది అభ్యంతరం వ్యక్తం చేశారు. నగరంలో ఎక్కడైనా అనుమతి ఇవ్వాలని కోరారు.. ఉదయం నుంచి మూడు సార్లు విచారణను వాయిదా వేసి, పోలీసులు, జాక్‌ నేతల అభిప్రాయాలను తీసుకున్న న్యాయస్థానం.. నాగోల్‌ మెట్రో గ్రౌండ్‌లో సభ నిర్వహించుకునేందుకు అనుమతి ఇస్తామంది. దీనిపై అసంతృప్తి చెందిన టీ-జేఏసీ పిటిషన్‌ను ఉపసంహరించుకుంది.

కోర్టు తీర్పుపై టీ-జేఏసీ చైర్మన్‌ కోదండరాం ...

కోర్టు తీర్పుపై టీ-జేఏసీ చైర్మన్‌ కోదండరాం స్పందించారు. తమ కార్యాచరణలో ఎలాంటి మార్పులేదని.. బుధవారం సుందరయ్య విజ్ఞాన కేంద్రం నుంచి ఇందిరాపార్క్‌ వరకు ర్యాలీ నిర్వహిస్తామన్నారు. ఇప్పటికే చాలాప్రాంతాల్లో అరెస్టులు జరుగుతున్నాయని.. అయినా భయపడేది లేదన్నారు. అరెస్టులకు భయపడితే.. తెలంగాణే వచ్చేది కాదన్నారు కోదండరాం బుధవారం ఎట్టి పరిస్థితిల్లోనూ ర్యాలీ నిర్వహిస్తామని విద్యార్థి సంఘాల నేతలూ స్పష్టం చేస్తున్నారు. ప్రభుత్వం ఇదే వైఖరి కొనసాగిస్తే.. మూల్యం చెల్లించుకోక తప్పదన్నారు. అటు, విపక్షాలు, ప్రజాసంఘాలు కూడా టీ-జేఏసీకి సంఘీభావం ప్రకటించాయి.

ఎవరూ నగరానికి తరలిరావద్దంటూ పోలీసులు హెచ్చరికలు...

మరోవైపు, టీ-జేఏసీ ర్యాలీకి అనుమతి లేదని.. ఎవరూ నగరానికి తరలిరావద్దంటూ పోలీసులు హెచ్చరికలు జారీచేశారు. ర్యాలీలో పాల్గొనేవారిపై క్రిమినల్‌ కేసులు నమోదు చేస్తామంటూ హెచ్చరించారు. నిరుద్యోగుల నిరసన ర్యాలీకి అనుమతి లేకపోవడంతో.. ఇందిరాపార్క్‌ వద్ద పోలీసులు భారీగా మోహరించారు. రాష్ట్రవ్యాప్తంగా.. ముఖ్యమైన ప్రదేశాల్లో భద్రతను కట్టుదిట్టం చేశారు. నిరుద్యోగ ర్యాలీ జరిపితీరాలని జేఏసీ, అడ్డుకుని తీరాలని ప్రభుత్వం పట్టుదలతో ఉండడంతో.. బుధవారం ఏం జరుగుతుందోనన్న టెన్షన్‌ సర్వత్రా నెలకొంది.

19:48 - February 21, 2017

హైదరాబాద్: రేపు నిరుద్యోగ ర్యాలీ నేపథ్యంలో... హైదరాబాద్‌లో పోలీస్ ఉన్నతాధికారులు అప్రమత్తమయ్యారు. ఇందిరాపార్క్‌, ఓయూలో భారీగా పోలీసులను మోహరించారు. యూనివర్సిటీలో... విద్యార్థి నేతలను అరెస్టు చేసిన పోలీసులు... ఇందిరాపార్క్‌ పోలీస్ పికెట్ ఏర్పాటు చేశారు. దీంతో పాటు జిల్లాల నుంచి పెద్ద ఎత్తున పోలీసులను నగరానికి తరలిస్తున్నారు.

17:38 - February 21, 2017

హైదరాబాద్: సికింద్రాబాద్‌ మోండా మార్కెట్‌లో దారుణం జరిగింది. రెండు షాపుల యజమానుల మధ్య ఘర్షణ చోటుచేసుకుంది. ఘర్ణణలో ఓ వ్యక్తి మృతి చెందాడు. మృతుని పేరు హనుమంతరావు.. వయస్సు 65 సంవత్సరాలు ఉంటాయి. శ్రీనివాసరావు అనే వ్యక్తి హనుమంతరావును గుమ్మడికాయతో కొట్టి చంపాడు. నిందింతుడు పరారీలో ఉన్నాడు. పోలీసులు కేసు నమోదు చేసుకుని దర్యాప్తు చేస్తున్నారు.

14:37 - February 21, 2017

హైదరాబాద్: మహరాష్ట్రలో దొంగ ఓట్లు వేసేందుకు మాయగాళ్లు కొత్త పద్ధతులను ఎంచుకుంటున్నారు. నకిలీ వేళ్లను తయారు చేసి వాటితో ఒకటికి రెండు సార్లు ఓటు వేసేందుకు ప్లాన్‌ వేశారు. నిజమైన వేళ్లను పోలి ఉన్న ప్లాస్టిక్‌ వేళ్లతో దొంగ ఓట్లు వేసేందుకు స్కెచ్‌ వేశారు. నాసిక్‌లో పోలీసులు తనిఖీల్లో నకిలీ వేళ్లు బయటపడ్డాయి. నకిలీ వేళ్ల తయారీ ముఠాను పట్టుకునేందుకు పోలీసుల ప్రయత్నాలు ముమ్మరం చేశారు.

20:39 - February 20, 2017

హైదరాబాద్: ఖమ్మం టూటౌన్ ఎస్సై విజయ్ అరెస్టు అయ్యాడు. వివాహేతర సంబంధం కారణంతో విజయ్‌ను పోలీసులు అదుపులోకి తీసుకున్నారు. ఫేస్‌బుక్‌లో విజయ్‌కు హైదరాబాద్‌కు చెందిన వివాహిత పరిచయమైంది. వివాహిత ఇంట్లో ఉన్న విజయ్‌ను రెండ్ హ్యాండెడ్‌గా పట్టుకున్న ఆమె భర్త పట్టుకుని హైదరబాద్ ఎస్ఆర్‌నగర్ పోలీసులకు ఫిర్యాదుచేశాడు. దీంతో పోలీసులు పలు సెక్షన్ల కింద ఎస్ఐ విజయ్‌ను అరెస్టు చేశారు.

15:37 - February 20, 2017

గుంటూరు : న్యాయం చేయాల్సిన పోలీసులే అన్యాయాలకు తెగబడుతున్నారు.. గుంటూరు జిల్లా కోసూరు ఎస్ఐ సందీప్‌ తనను నమ్మించి మోసం చేశాడంటూ ఓ మహిళ పోలీసులకు ఫిర్యాదుచేసింది.. ఏడేళ్లపాటు తనతో సహజీవనం చేశాక ఎస్‌ఐ మొహం చాటేశాడని ఆరోపించింది.. మహిళా పోలీస్‌ స్టేషన్‌లో ఫిర్యాదుచేసినా ఇంతవరకూ ఎలాంటి చర్యలు తీసుకోలేదని మండిపడింది.. తనకు బెదిరింపు ఫోన్‌ కాల్స్ వస్తున్నాయని విజయవాడలో వాపోయింది.. గుంటూరు పోలీసులు సందీప్‌ను కాపాడుతున్నారని బాధితురాలు ఆరోపించింది..

14:44 - February 20, 2017

.గో :ఈ ఫోటోలో కనిపిస్తున్న వ్యక్తి పేరు చిల్లబోయిన ఆంజనేయులు. పశ్చిమగోదావరి జిల్లా యలమంచిలి మండల మట్టావానిచెరువు గ్రామస్థుడు. వృత్తి రీత్యా వ్యవసాయదారుడు. ప్రవృత్తి మాత్రం నిత్య పెళ్లి కొడుకు. వయస్సు తక్కువేమీలేదు. యాభైఐదేళ్లు. ఇతను ఇప్పటికే ఎనిమిది పెళ్లిళ్లు చేసుకున్నాడు. ఈ లేటు వయసులో తొమ్మిదో పెళ్లికి సిద్ధమై అడ్డంగా దొరికిపోయాడు.

7గురిని పెళ్లిళ్లు చేసుకుని, విభేదాలతో అందర్నీ...

చిల్లబోయిన ఆంజనేయులు మొదటి భార్యను, కుటుంబ కలహాల కారణంగా వదిలేశాడు. పెద్దమనుషుల సమక్షంలో ఈ వ్యవహారాన్ని సెటిల్‌ చేసుకున్నాడు. ఆ తర్వాత పోడూరు, రాయపాడు, పుల్లేటికూరు, కాజ గ్రామాలను చెందిన మహిళలను మనువాడాడు. ఇలా ఒకరికి తెలియకుండా మరొకర్ని.. ఏడుగురిని పెళ్లాడాడు. పెళ్లిళ్లు చేసుకుని, విభేదాలతో అందర్నీ విడిచిపెట్టాడు. ఎవరితో కూడా చట్టబద్ధంగా విడాకులు తీసుకోలేదు. గ్రామ పెద్దల పంచాయితీల్లో రాజీ చేసుకున్నాడు. ఇటు గ్రామ పెద్దలతోపాటు, అటు సెటిల్‌ చేసుకున్న భార్యలకు అంతో ఇంతో ముట్టచెప్పి తన జోలికి రాకుండా చేసుకున్నాడు.

పురుడు పోసుకునేందుకు పుట్టింటికి వెళ్లిన లక్ష్మి .....

చివరిగా 2015లో లక్ష్మిని పెళ్లి చేసుకున్నాడు. ఈమెకు రెండోపెళ్లని చెప్పాడు. మొదటి భార్య చనిపోయిందని నమ్మబలికాడు. ఆర్థిక ఇబ్బందుల్లో ఉన్న లక్ష్మి చిల్లబోయిన ఆంజనేయులు చెప్పిన కల్లబొల్లి కబుర్లు నమ్మి పెళ్లి చేసుకుంది. పురుడు పోసుకోడానికి పుట్టింటికి వెళ్లింది. బాబు పుట్టిన తర్వాత ఏడాదిన్నర తర్వాత కూడా పుట్టింటి నుంచి తనను తీసుకెళ్లకపోవడంతో అనుమానం వచ్చిన లక్ష్మి ఆంజనేయులు వ్యవహారంపై ఆరా తీసింది.

ఏడుగురు మహిళ జీవితాలతో ఆటలాడుకుని.....

ఏడుగురు మహిళ జీవితాలతో ఆటలాడుకుని, ఏడుగురు మహిళ జీవితాలతో ఆటలాడుకుని, ప్రయత్నించిన ఆంజనేయులు, తన గుట్టు బట్టబయలైందని తెలిసి పరారయ్యాడు. మొదటి భార్య సంతానం ద్వారా, మనుమలు, మనవరాళ్లు కూడా ఉన్న ఆంజనేయులు.. మహిళలను మోసం చేస్తున్న తీరు తెలిసిన వారు ముక్కున వేలేసుకుంటున్నారు. ఆంజనేయులుతో పాటు, ఈ నిత్య పెళ్లి కొడుకుకు సహకరించిన పెద్దలను కటకటాల వెనక్కి నెట్టాలని మహిళా సంఘాలు డిమాండ్‌ చేస్తున్నాయి. ఇతగాడి చేతిలో మరో మహిళ మోసం పోకుండా చూడాలని కోరుతున్నారు. ఆంజనేయులు చేతిలో మోసపోయానని గ్రహించిన లక్ష్మి పోలీసులను ఆశ్రయించింది. పోలీసులు కేసు నమోదు చేశారు. అంజనేయులు కోసం గాలిస్తున్నారు. ఇతనికి ఏడు పెళ్లిళ్లు చేసుకునేందుకు సహకరించిన గ్రామ పెద్దల కోసం ఆరా తీస్తున్నారు. పంచాయితీల్లో రాజీచేసిన పెద్ద మనుషులపై దష్టి పెట్టారు. మొత్తానికి, ఈ నిత్య పెళ్లి కొడుకు చిల్లబోయిన ఆంజనేయులు కథను పోలీసులు ఏ మజిలీకి చేరుస్తారో, గ్రామ పెద్దలకు ఎలాంటి శిక్షలు పడేలా చేస్తారో వేచి చూడాలి.

11:34 - February 19, 2017

విజయవాడ : రయ్ రయ్‌మని బైక్‌పై దూసుకెళ్తారు.. స్టంట్స్ చేస్తారు.. నగర వీధుల్లో హల్ చల్ చేస్తారు.. వారి దూకుడుకు అడ్డే ఉండదు.. ప్రస్తుతం ఇది విజయవాడ యువత తీరు.. ఆంధ్రప్రదేశ్ రాజధాని ప్రాంతంలో మితిమీరిపోతున్న బైక్ రేసింగ్‌లపై టెన్ టీవీ ప్రత్యేక కథనం. ఆంధ్రప్రదేశ్ రాజధాని ప్రాంతం విజయవాడలో యువత తీరు ఇది. మెట్రో సంస్కృతితో నగరంలో విచ్చలవిడిగా బైక్ రేసింగ్‌లు జరుగుతున్నాయి. కొందరు యువత గ్యాంగ్‌లుగా ఏర్పడి బైక్ రేసింగ్‌లు నిర్వహిస్తున్నారు. వివిధ రకాల స్టంట్స్ చేస్తూ తమ ప్రాణాలకే కాకుండా.. ఇతరుల ప్రాణాలకు ముప్పు కలిగిస్తున్నారు.

రయి..రయి..
విజయవాడ రాజధాని ప్రాంతం కావడంతో నగరంలో స్పోర్ట్స్‌, లగ్జరీ బైక్స్ విపరీతంగా పెరిగిపోయాయి. దీంతో బెట్టింగ్‌లు కడుతూ రేసింగ్‌లకు పాల్పడుతున్నారు. కొందరైతే అమ్మాయిలు, మహిళలే టార్గెట్‌గా బైక్ విన్యాసాలు చేస్తూ హల్‌చల్ చేస్తున్నారు. ప్రధానంగా బెజవాడలో అత్యంత రద్దీగా ఉండే పండిట్ నెహ్రూ బస్టేషన్, బెంజ్ సర్కిల్, బందరు రోడ్, ఏలూరు రోడ్, బీసెంట్ రోడ్, సింగ్ నగర్ ఫ్లై ఓవర్, బీఆర్టీఎస్ రోడ్, కృష్ణలంక, మొగల్రాజపురం వంటి ముఖ్యమైన ప్రాంతాల్లో డేంజర్ డ్రైవింగ్స్ జరుగుతున్నాయి. 20 కాదు 40 కాదు ఏకంగా 120 కిలోమీటర్ల స్పీడ్‌తో దూసుకెళ్తు తోటి వాహనదారులకు దడపుట్టిస్తున్నారు. తక్షణమే యూత్ దూకుడుకు పోలీసులు కళ్లెం వేయాలని స్థానికులు కోరుతున్నారు.

పోలీసులే షాక్..
యువత బైక్ విన్యాసాలు చూసి పోలీసులే షాక్‌ అవుతున్నారు. బైక్ రేసింగ్‌లను అడ్డుకున్న హోంగార్డ్‌ను యువత కొట్టారని విజయవాడ డీసీపీ పాల్ రాజ్ తెలిపారు. విజయవాడలో గత నాలుగేళ్లలో జరిగిన ప్రమాదాలను పరిశీలిస్తే 2013లో 1523 ప్రమాదాలు జరగ్గా 350 మంది మృతిచెందగా.. 2014లో 1670 ప్రమాదాలు జరిగితే 334 మంది చనిపోగా.. 2016 ఆగస్టు వరకు 1083 రోడ్డు ప్రమాదాలు జరగ్గా 254 మంది మృత్యువాతపడ్డారని డీసీపీ తెలిపారు. తల్లిదండ్రుల పర్యవేక్షణ లోపం వల్లే యువత రెచ్చిపోతున్నారన్నారు. విజయవాడలో ఎవరైనా బైక్ రేసింగ్‌లకు పాల్పడితే కఠినంగా శిక్షిస్తామని పోలీసులు చెబుతున్నారు.

Pages

Don't Miss

Subscribe to RSS - పోలీసులు