ప్రజలు

07:31 - April 26, 2018

కరీంనగర్‌ : జిల్లాలో భానుడు భగభగ లాడుతూ.. ప్రజలకు ముచ్చెమటలు పట్టిస్తున్నాడు. అత్యధిక ఉష్ణోగ్రతలు నమోదువుతుండడంతో భూగర్భ జలాలు అడుగంటి పోతున్నాయి. ప్రధాన జలవనరులైన ఎల్లంపల్లి, లోయర్‌ మానేర్‌లో నీటి మట్టం గణనీయంగా తగ్గడంతో భవిష్యత్‌పై ఆందోళన కలిగిస్తుంది. ఇక సింగరేణి కోల్‌బెల్ట్‌ ప్రాంతాలలో 45 డిగ్రీల ఉష్ణోగ్రతలు నమోదవుతుండంతో కార్మకులు ఉక్కిరి బిక్కిరి అవుతున్నారు.

ఉమ్మడి కరీంనగర్ జిల్లాలో ఎండలు దంచికొడుతున్నాయి. రోజురోజుకి ఉష్ణోగ్రతలు పెరిగిపోతున్నాయి. దీంతో జనం బయటి రావడానికే భయపడుతున్నారు. గత నాలుగేళ్లలో ఎన్నడూ లేని విధంగా ఎండలు మండుతున్నాయి. ఇప్పటికే 40 డిగ్రీలకుపైగా ఉష్ణోగ్రతలు నమోదవుతుండడంతో వచ్చే మే నెలలో ఉష్ణోగ్రతలు మరింత పెరిగె అవకాశం ఉన్నట్లు వాతావరణ నిపుణులు హెచ్చరిస్తున్నారు.

పెరుగుతున్న ఉష్ణోగ్రతలతో నీళ్లు లేక చెరువులు ఎండిపోయి మైదానాల్లా మారుతున్నాయి. బోర్లు ,బావుల్లో చుక్క నీరు లేకపోవడంతో తాగునీటి కోసం ప్రజలు అల్లాడుతున్నారు. ఇక పంట చేతికొచ్చే సమయానికి నీటి సమస్యలు తలెత్తడంతో రైతాంగం నష్టాలను చవిచూడాల్సి వస్తోంది. వాటర్‌ ట్యాంకర్ల ద్వారా పంటలను కాపాడే ప్రయత్నం చేస్తున్నా రైతులకు ఫలితం లేకుండా పోతుంది. దీంతో ఎండిన పంట పశువులకు మేతగా మారింది.

ఉమ్మడి కరీంనగర్‌కు ప్రధాన జలవనరులుగా ఉన్న ఎల్లంపల్లి, లోయర్‌ మానేర్‌ జలశయాల్లో నీటి మట్టం గణనీయంగా తగ్గి ప్రమాదకర స్థాయికి చేరుకుంది. కరీంనగర్‌లో నీటి అవసరాలకు లోయర్‌ మానేర్‌ ఒక్కటే దిక్కు. దీంతో జలాశయంలో నీరు అడుగంటుతుండటంతో నగరానికి తీవ్రమైన నీటి కష్టాలు మొదలయ్యాయి. 24 టీఎంసీల సామర్థ్యం కలిగిన లోయర్‌ మానేర్‌ డ్యామ్‌లో ప్రస్తుతం 6.35 టీఎంసీల నీరు మాత్రమే ఉంది. 15 రోజులుగా బూస్టర్లకు నీటి ప్రెషర్‌ రాకపోవడంతో.. డ్యామ్‌లో నీటి మోటర్లు పెట్టి ఎత్తిపోసే పరిస్థితి నెలకొందని అధికారుల చెపుతున్నారు. ఇక హైదరాబాద్‌కు నీటిని తరలించే శ్రీపాద ఎల్లంపల్లి ప్రాజెక్ట్‌లో సైతం నీటి నిల్వలు గణనీయంగా తగ్గిపోతున్నాయి. 20.17 టీఎంసీల సామర్థ్యం గల ఎల్లంపల్లి ప్రాజెక్ట్‌లో ప్రస్తుతం 7.52 టీఎంసీల నీరు ఉంది.

సింగరేణి ప్రాంతంలో అత్యధిక డిగ్రీల ఉష్ణోగ్రతలు నమోదవుతున్నాయి. బొగ్గు గనులు అధికంగా ఉండడంతో ఈ ప్రాంతంలో ప్రతిఏటా 47 నుండి 50 డిగ్రీల వరకు ఉష్ణోగ్రతలు నమోదవుతున్నాయి. అయితే గడిచిన మూడు రోజుల నుండి 45 డిగ్రీలకు పైగా ఉష్ణోగ్రతలు నమోదవుతుండడంతో కార్మికులు ఆందోళన చెందుతున్నారు. ఓపెన్‌ కాస్ట్‌ గనుల్లో నమోదయ్యే ఉష్ణోగ్రతల కంటే అధికంగా వేడి ఉండడంతో కార్మికులకు పని చేయడం కష్టంగా మారింది. దీంతో ఉపశమన చర్యలు తీసుకోవాలని అధికారులను కోరుతున్నారు.-

14:14 - April 22, 2018

హైదరాబాద్ : ప్రజల కోసం సీపీఎం పోడుతూనే ఉంటుందని ఆ పార్టీ జాతీయ ప్రధాన కార్యదర్శి సీతారం ఏచూరి అన్నారు. ముందు ముందు చాలా యుద్ధాలున్నాయన్నారు. పార్టీలో చీలిక వచ్చినట్లు వచ్చిన వార్తలకు ఏచూరి సమాధానం చెప్పారు. తాము మరింత బలోపేతం అయ్యామని తెలిపారు. తమ చిత్తశుద్ధి మరింత బలోపేతమైందన్నారు. 'మా శత్రువులారా బహు పరాక్...మీ విధానాలకు వ్యతిరేకంగా సీపీఎం పోరాడుతుందన్నారు. తమ లక్ష్యాలను సాధించి తీరతామని ధీమా వ్యక్తం చేశారు.

 

18:44 - April 15, 2018

అమెరికా : సిరియాలో అమెరికా వైమానిక దాడులపై ఆ దేశం ప్రజలు ఆగ్రహం వ్యక్తం చేస్తున్నారు. యుద్ధం వద్దంటూ.. శాంతి ప్రేమికులు వైట్ హౌస్ ముందు నిరసన ప్రదర్శన నిర్వహించారు. అమెరికా, దాని మిత్ర దేశాల దాడులకు అమాయక ప్రజలు బలైపోవడం బాధాకరమన్నారు. అధ్యక్షుడు ట్రంప్ ఇప్పటికైనా.. సిరియాపై దాడులను ఆపేలా ఆదేశాలు జారీచేయాలని వారు డిమాండ్ చేశారు. సిరియా రసాయన ఆయుధాలు ప్రయోగిస్తుందని ఆరోపిస్తూ.. శుక్రవారం రాత్రి నుంచి అమెరికా, బ్రిటన్, ఫ్రాన్స్ వైమానిక దాడులు చేపట్టాయి.

 

20:25 - April 12, 2018

ఇప్పటికే చేశిన పనికి శిగ్గుపడకుంట.. ఇంక నేను అట్ల జేయలేదు ఇట్ల జేయలేదు.. అగో ఫలానోళ్లు డ్యాన్సు జేస్తె తప్పులేదు నేను జేస్తె తప్పా..? అంటున్నడు హయత్ నగర్ కార్పొరేటర్ తిర్మల్ రెడ్డి.. నిన్న ప్రెస్ మీటింగు వెట్టి.. నా అంత ప్రతివత లేదని ముచ్చట్లు జెప్తున్నడు సారు.. అయ్యా తిర్మల్ రెడ్డి ఈ తీట ముచ్చట్లు జెప్పుడు కంటె జర్ర నిన్ను నువ్వు అదుపుల వెట్టుకుంటె సమాజానికి మంచిగుంటది..

ఆ జనంల తిర్గుబాటు సుర్వైనట్టే ఉందిగదా..? టీఆర్ఎస్ పార్టీ మీద.. మొన్న మెదక్ నియోజకవర్గంల పద్మాదేవేందర్ రెడ్డి పనితనం మీద.. నిన్న మునుగోడు ఎమ్మెల్యే కూసుకుంట్ల ప్రభాకర్ రెడ్డి మీద.. గాయాళ్ల పెద్దపల్లి ఎమ్మెల్యేను గెద్మిండ్రు.. ఇప్పుడు తుంగతుర్తి ఎమ్మెల్యే పనిజేశిండ్రు పబ్లీకు.. నడి చౌరస్తాల నిలవెట్టి ఏందయ్యా నువ్వు జేశింది అని తిడ్తున్నరు..

సూడుండ్రి సర్కారు తమాష ఎట్లున్నదో.. టీఆర్ఎస్ పార్టీకి వ్యతిరేకంగ ఎవ్వలు మాట్లాడినా వాళ్లను సోషల్ మీడియా తిట్టుడు అడ్డగోలు మాటలనుడు.. ఇట్ల సర్కారోళ్లే కొంతమందికి జీతాలిచ్చి రాపిస్తున్నరన్న సంగతి జనానికి తెల్సిందేగని.. అయితే ఆడోళ్లను గూడ ఇష్టమొచ్చినట్టు తిట్టుడు మంచిదేనా.?? ఇగో గీమె తెలంగాణ జన సమితి పార్టీ నాయకురాలు ఆమెను ఎట్ల తిట్టిండ్రో సూడుండ్రి..

ఇప్పుడు వెయ్యిరూపాలిస్తె.. పదిరోజులళ్ల.. పద్నాలుగు వందల రూపాలిస్తాంటె.. ఎవ్వలికైనా ఆశ ఉంటదిగదా..? పదిరోజులకే నాల్గువందల రూపాల మిత్తిరావట్టే అని.. అయితె ఇట్ల కోట్ల రూపాలు జమజేశిన ఒక బాబాగాడు జనాన్ని నిండముంచి అవుతల వడ్డడు..మొత్తం మీద నెల్లూరు పోలీసోళ్లు వాన్ని దొర్కిచ్చుకున్నరు.. తెచ్చి మీడియాకు జూపెట్టిండ్రు..

19:24 - April 10, 2018

శ్రీకాకుళం : జిల్లాలో గజేంద్రులు జిల్లా వాసులను గజ గజ వణికిస్తున్నాయి. ఏజెన్సీ ప్రాంతంలోని ఏనుగులు.. నీటి అవసరాల కోసం కొత్తూరు, ఆముదాలవలస, టెక్కలి మైదాన ప్రాంతాలవైపు  వస్తుంటంతో స్థానికులు ఆందోళన చెందుతున్నారు. శ్రీకాకుళం జిల్లా లోని ఆముదాలవలస మైదాన ప్రాంతానికి వస్తున్న ఏనుగుల గుంపులు స్థానిక ప్రజలను భయాందోళనకు గురిచేస్తున్నాయి. వాటిని తిరిగి అటవీలోకి పంపేందుకు ప్రారంభించిన ఆపరేషన్ గజేంద్ర అలజడి సృస్టిస్తోంది. తర్ఫీదు పొందిన రెండు ఏనుగులతో బాణాసంచా కాలుస్తూ ఏనుగుల గుంపును ఒరిస్సా అడవుల్లోకి పంపించేందుకు ఆపరేషన్ గజేంద్ర ప్రయత్నాలు చేస్తోంది. 

గత నెల 29న శ్రీకాకుళం జిల్లాకేంద్రానికి ఆనుకొని ఉన్న ఆముదాలవలస మండలం కనుగులవలస పరిసర ప్రాంతాల్లోకి వచ్చిన ఏనుగుల గుంపు భారీ నష్టం చేకూర్చింది చెరుకు, మొక్కజొన్న పంటలను ధ్వంసం చెయ్యడంతో స్థానికులు అవేదన వ్యక్తం చేస్తున్నారు. జనావాసాలకు సమీపంలోకి ఏనుగులు రావడంతో స్థానికులు నిద్రాలేని రాత్రులు గడుపుతున్నారు. 

అటవీ శాఖ అధికారులు తర్ఫీదు  పొందిన రెండు ఏనుగులను  తీసుకొచ్చారు. వీటి ద్వారా ఏనుగుల గుంపును తిరిగి సీతంపేట ఏజెన్సీ మీదుగా ఒరిస్సా  అడవుల్లోకి పంపేందుకు ఆపరేషన్‌ గజేంద్ర ప్రయత్నిస్తోంది. ఇలా ఏనుగుల గుంపును మెళియాపుట్టి మండలం కేరాసింగి పంచాయితీ పరిధి వరకూ తీసుకువచ్చారు. అయితే ఇక్కడి నుంచి అధికారులకు కూడా సరైన మార్గం కనిపించలేదు. దీంతో సీతంపేట ఐటీడీఏ అధికారులు వారికి సాంకేతిక సహాయాన్ని అందించారు. జీపీఎస్‌ పరికరాలు ఏనుగులు వెళ్లాల్సిన మార్గాన్ని చూపిస్తూ ఆపరేషన్‌  గజేంద్రదన సులభతరం చేస్తున్నాయి. 

అయితే టెక్కలి, మెళియాపుట్టి, రామకృష్ణాపురం, బాగబంధ వంటి పలు గ్రామాల్లో ఏనుగుల గుంపు సంచరించడంతో గ్రామాల ప్రజలు భయాందోళన చెందుతున్నారు. వాటి వెనుకే వస్తున్న అటవీ శాఖ అధికారులు స్థానిక ప్రజలెవ్వరూ భయపడవద్దని... ఎలాంటి కవ్వింపు చర్యలకు పాల్పడవద్దని సూచించారు. వాటిని ఒరిస్సా అడవుల్లోకి చేర్చే వరకూ సంయమనం సాటించాలని కోరారు. మొత్తానికి ఆపరేషన్ గజేంద్ర విజయవంతం అయ్యేందుకు అటు అధికారులు, ఇటు గ్రామాల ప్రజలు సహకరిస్తున్నారు. ఏనుగుల గుంపులతో భయాందోళపకు గురవుతున్నా సమస్య పరిష్కారం అవుతుందన్న ఆశతో ఉన్నారు.

19:15 - March 16, 2018

రాజమండ్రి : చంద్రబాబుపై పవన్ కళ్యాణ్ వ్యాఖ్యలను ప్రజలు నమ్ముతున్నారని ఉండవల్లి అరుణ్ కుమార్ అన్నారు. ప్రతి దాడికి సిద్ధమైయ్యాకే...పవన్ ప్రభుత్వానికి వ్యతిరేకంగా వెళ్లారని తెలిపారు. పవన్ కు స్ర్కిప్టు రాసి ఇవ్వాల్సిన అవసరం నాకు లేదని తేల్చి చెప్పారు.

10:50 - March 9, 2018

హైదరాబాద్ : రాబోయే ఎన్నికల్లో అధికారం దక్కించుకోవాలంటే.. గ్రేటర్‌ ప్రజల మనస్సు చూరగొనాలి... గ్రేటర్‌లో ఉన్న నలభై శాతం సెటిలర్స్‌ను ప్రసన్నం చేసుకోకుండా అధికార పీఠం ఎక్కడం ఎలా సాధ్యం.. ఇదే ఇప్పుడు తెలంగాణ కాంగ్రెస్‌లో జరుగుతున్న విశ్లేషణ.అందుకే హైదరాబాద్‌లోని సెటిలర్స్‌పై ప్రత్యేక ఫోకస్‌ పెట్టింది హస్తం పార్టీ.. ఇందులో భాగంగా సెటిలర్స్‌కు చేరువయ్యేందుకు స్పీడ్‌ పెంచారు పీసీసీ చీఫ్‌ ఉత్తమ్.

2019 సార్వత్రిక ఎన్నికల్లో అధికారం తమదేనంటూ ధీమా వ్యక్తం చేస్తున్న కాంగ్రెస్‌ పార్టీ.. అందుకోసం పటిష్టమైన ప్రణాళికతో అడుగులేస్తోంది. ఇప్పటికే బస్సుయాత్రతో సీఎం కేసీఆర్‌ హామీలను ఎండగడుతున్న కాంగ్రెస్‌ నేతలు.. ప్రజల మనసు గెలుచుకునే ప్రయత్నం చేస్తున్నారు. అధికార టీఆర్ఎస్‌ ప్రజలకు చేస్తున్న మోసాన్ని ఎత్తిచూపుతూనే.. తాము అధికారంలోకి వస్తే ఏం చేస్తామన్నది సూటిగా చెబుతున్నారు.ఉత్తర తెలంగాణలో కారు జోరుకు బ్రేకులు వేసేందుకు యాక్షన్ ప్లాన్‌ సిద్ధం చేసుకుని... క్షేత్రస్థాయిలో దూసుకుపోతోంది కాంగ్రెస్‌ పార్టీ. కానీ.. సౌత్‌ తెలంగాణ జిల్లాల్లో కాంగ్రెస్‌ పార్టీ మెజారిటీ సీట్లు సాధించడం ఖాయమని చెబుతున్నారు ఆ పార్టీ నేతలు.. ఉత్తర తెలంగాణలో కూడా ప్రతి జిల్లాకు కనీసం మూడు నుంచి నాలుగు సీట్లు దక్కించుకుంటామనే ధీమాతో వారున్నారు. కానీ... దక్షిణ, ఉత్తర తెలంగాణ జిల్లాలనుంచి వచ్చే సీట్లతోనే అధికార పీఠం ఎక్కగలమా అన్న సందేహంలో ఉన్నారు కాంగ్రెస్‌ పార్టీ సీనియర్ నేతలు. -

కాంగ్రెస్‌ పార్టీ దక్షిణ తకెలంగాణలో మెజార్టీ సీట్లు దక్కించుకున్నా.. అధికార పీఠం ఎక్కాలంటే గ్రేటర్‌ హైదరాబాద్‌లోని అసెంబ్లీ స్థానాల సంఖ్య కీలకంగా మారనుంది. గ్రేటర్‌లో సీట్లు సాధించకుండా అధికారం సాధ్యం కాదనే భావన కాంగ్రెస్‌లో నేతల్లో అంతర్లీనంగా ఉంది.. అధికారం దక్కాలంటే... గ్రేటర్‌లో దాదాపు నలభైశాతం వరకూ ఉన్న సెటిలర్స్ కీలకంగా మారనున్నారు. సెటిలర్ల్స్ ఎటువైపు మొగ్గు చూపుతారో.. ఆ పార్టీదే అధికారమనే విశ్లేషణలు రాజకీయ వర్గాల్లో బలంగా వినిపిస్తున్నాయి.

ఇప్పుడు కాంగ్రెస్ కూడా సరిగ్గా ఇదే విషయంపై దృష్టి పెట్టింది.. సెటిలర్స్ మనసు చూరగొనేందుకు ప్రయత్నాలు ముమ్మరం చేస్తోంది కాంగ్రెస్ పార్టీ. రాష్ర్ట విభజన తర్వాత కాంగ్రెస్‌ను దూరం పెట్టిన సెటిలర్స్‌కు చేరువయ్యేందుకు ప్రత్యేక ప్రణాళికతో ముందుకెళుతోంది పీసీసీ. అధికార పార్టీకి ధీటుగా తమ వ్యూహాలు ఉండేలా జాగ్రత్త పడుతున్నారు హస్తం నేతలు. ఇతరపార్టీల్లో ముఖ్య నేతలుగా ఉన్న ఆంధ్ర సెటిలర్స్‌లోని కమ్మ, కాపు సామాజిక వర్గాల వారికి కాంగ్రెస్‌ కండువా కప్పేందుకు ముమ్మరంగా లాబీయింగ్ చేస్తోంది కాంగ్రెస్ పార్టీ.

సెటిలర్స్ టీడీపీ వైపు మొగ్గు చూపే అవకాశం ఉందని భావిస్తున్న కాంగ్రెస్‌... ఆ పార్టీలోని కమ్మ సామాజిక వర్గానికి చెందిన ముఖ్యనేతలను పార్టీలో చేర్చుకునేందుకు ప్రయత్నాలు మొదలుపెట్టింది. టీడీపీ ఓటు బ్యాంకు తమ వైపు మళ్ళాలంటే.. ఇదే సరైన మార్గంగా భావిస్తోంది కాంగ్రెస్‌ పార్టీ. అందుకోసం ప్రత్యేకంగా ఆపరేషన్ ఆకర్ష్‌ అస్ర్తాన్ని ప్రయోగిస్తోంది. టీడీపీ ఓటుబ్యాంకును కొల్లగొట్టేందుకు టీఆర్ఎస్‌ దూకుడుగా వెళుతుంటే... కాంగ్రెస్‌ కూడా అదే స్పీడ్‌లో వెళుతోంది.
సెటిలర్స్ ప్రభావం ఎక్కువగా ఉండే నియోజకవర్గాల్లో.. అదే వర్గానికి చెందిన ముఖ్యనేతలను బరిలోకి దింపేందుకు పక్కా ప్రణాళికతో ముందుకెళుతోంది కాంగ్రెస్. మొత్తానికి సెటిలర్స్‌లో ఆకర్షణగల వారిని ముందుపెట్టి... ఆయా వర్గాల ఓట్లు కొల్లగొట్టేందుకు చూస్తున్నారు కాంగ్రెస్‌ నేతలు. గ్రేటర్‌ పరిధిలో కనీసం సగం అసెంబ్లీ సీట్లైనా దక్కించుకోకుంటే.. తమ కలలు కల్లలయ్యే ప్రమాదం ఉందని గుర్తించారు కాంగ్రెస్‌ పెద్దలు. అందుకే ఆదిశలో వేగంగా అడుగులేస్తున్నారు. సెటిలర్స్ మనసు గెలుచుకునేందుకు ఎన్ని ప్రయత్నాలుచేసినా.. గ్రేటర్‌లో పార్టీ కమిటీ సరిగ్గా లేకుంటే లక్ష్యం చేరుకోవడం అసాధ్యం. గ్రేటర్ కమిటీ పూర్తిగా చతికలబడిపోయిన నేపథ్యంలో ముందుగా కమిటీకి జవసత్వాలు నింపేందుకు చర్యలు తీసుకోవాలని పార్టీలోని సీనియర్ నేతలు సూచిస్తున్నారు.  

18:08 - March 6, 2018

ఢిల్లీ : ఏపీకి ప్రత్యేక హోదా ఇవ్వాలంటూ ఢిల్లీ వేదికగా విపక్షాలు ఆందోళనను ముమ్మరం చేశాయి. పార్లమెంట్‌ స్ట్రీట్‌లో జరిగిన ఆందోళనలో వామపక్ష నేతలతో పాటు వైసీపీ నాయకులు ధర్నాలో పాల్గొన్నారు. హోదా విషయంలో చంద్రబాబుకు చిత్తశుద్ధి ఉంటే కేంద్రంలో ఉన్న టీడీపీ మంత్రులను రాజీనామా చేయించాలని సీపీఎం పొలిట్‌బ్యూరో సభ్యులు రాఘవులు డిమాండ్‌ చేశారు. టీడీపీ నేతలు బీజేపీతో తెగదెంపులు చేసుకోకపోతే.. ప్రజలు ఏపీలో స్థానం లేకుండా చేస్తారంటున్న రాఘవులుతో టెన్ టివి ఫేస్‌ టూ ఫేస్‌ నిర్వహించింది. ఏపీకి హోదా విషయంలో టీడీపీకి చిత్తశుద్ధి లేదన్నారు. కేంద్రంలోని టీడీపీ మంత్రులు రాజీనామా చేయాలని చెప్పారు. హోదా పోరాటంలో టీడీపీ నేతలు కలిసిరావాలన్నారు. 

19:13 - March 5, 2018

ఢిల్లీ : ఆంధ్రప్రదేశ్‌ ప్రజలను ప్రధాని మోదీ, సీఎం చంద్రబాబు మోసం చేశారని ఢిల్లీ పార్లమెంట్‌ స్ట్రీట్‌ పీఎస్‌లో ఏపీ కాంగ్రెస్‌ నేతలు ఫిర్యాదు చేశారు. ఏపీ న్యాయం చేస్తామని చట్టసభల్లో హామీలిచ్చి తుంగలో తొక్కారన్నారు. ఏపీకి జరుగుతున్న అన్యాయంపై ప్రధాని ఒక్క మాట కూడా మాట్లాడడం లేదని ఆరోపించారు. అసెంబ్లీ నియోజకవర్గాల పెంపు కోసం టీడీపీ రాజీ పడుతోందన్నారు. రేపటి నుంచి మూడు రోజుల ఢిల్లీలో ఆంధ్రుల ఆత్మగౌరవ దీక్ష చేపడుతున్నామని... కేంద్రంతో తాడోపేడో తేల్చుకుంటామన్నారు. 

 

19:45 - March 1, 2018

కర్నూలు : ఏపీలో అధికార, ప్రతిపక్ష పార్టీలు తమ స్వార్ధం కోసం ప్రత్యేక హోదాని అడ్డం పెట్టుకుని పబ్బం గడుపుతున్నాయని కర్నూలు ప్రజలు మండిపడుతున్నారు. వెంటనే ప్రత్యేక హోదా ఇవ్వాలని డిమాండ్ చేస్తున్నారు. ప్రత్యే హోదా ద్వారానే రాయలసీమ అభివృద్ధి సాధ్యమని ముక్తకంఠంతో చెబుతున్నారు. ప్రత్యేక హోదా ఇవ్వకపోతే  ఉద్యమిస్తామని హెచ్చరిస్తున్న కర్నూలు ప్రజలతో టెన్ టివి ఫేస్ టూ ఫేస్ నిర్వహించింది. ప్రజల మనోగతానికి సంబంధించిన   మరింత సమాచారాన్ని వీడియోలో చూద్దాం..

Pages

Don't Miss

Subscribe to RSS - ప్రజలు