ప్రజలు

13:21 - December 14, 2018

శ్రీకాకుళం : బంగాళాఖాతంలో ఏర్పడిన వాయుగుండం శ్రీకాకుళం జిల్లా తీవ్ర ప్రభావం చూపనుంది. వాయుగుండం తీవ్ర తుపానుగా మారనుంది. దీంతో జిల్లా రైతులు, ప్రజలు భయం గుప్పిట్లో ఉన్నారు. రైతులు పంటను కోసి అమ్మకానికి సిద్ధంగా ఉంచారు. భారీ వర్షం కురిస్తే నష్ట పోతామని రైతుల భయపడుతున్నారు. జిల్లాలో లక్షలాది ఎకరాల్లో పంటను కోసి కుప్పలు వేశారు. మరికొందరు నూరిళ్లు పూర్తి చేసి ధాన్యం బస్తాలను అమ్మకానికి సిద్ధంగా ఉంచారు. ఇళ్లల్లో నిలువ చేసుకునేందుకు చోటు లేక రహదారులపై ధాన్యం బస్తాలను వరసుగా పేర్చారు. అతి భారీ వర్షాలు కురిస్తే పొలం మీద ఉన్న పంటకే కాక..ఇళ్లకు చేర్చిన ధాన్యానికి కూడా నష్టం తప్పకపోవచ్చనే ఆందోళన రైతులను వెంటాడుతోంది. మిర్చి, ఇతర పంటలు కాపు దశలో ఉన్నందున.. అవి దెబ్బ తింటాయని కర్షకులు కలవరపడుతున్నారు. వచ్చే 24 గంటల్లో తుపాను ప్రభావంతో బలమైన గాలులు వీచే అవకాశం ఉంది. దీంతో జిల్లా కలెక్టర్ ధనుంజయ్ రెడ్డి 32 మండలాల అధికారులను జిల్లా కలెక్టర్ అప్రమత్తం చేశారు. 

 

09:37 - November 5, 2018

రాజన్న సిరిసిల్ల : తెలంగాణలో ఎన్నికలు దగ్గర పడుతుండడంతో అన్ని పార్టీలు ప్రచారాన్ని ముమ్మరం చేశాయి. టీఆర్‌ఎస్‌ ఒకడుగు ముందుకేసి ఇంటింటి ప్రచారాన్ని సైతం నిర్వహిస్తోంది. ప్రచారంతో దూసుకుపోతున్న టీఆర్‌ఎస్‌ అభ్యర్థులకు పలుచోట్ల ప్రజల నుంచి నిరసన సెగలు ఎదురవుతున్నాయి. ప్రచారం నిర్వహిస్తోన్న  టీఆర్‌ఎస్‌ తాజా మాజీ ఎమ్మెల్యేలు గాదరి కిశోర్‌, రసమయి బాలకిషన్‌కు ప్రజల నుంచి నిరసన ఎదురైంది.

రాజన్న సిరిసిల్ల సిల్లా ఇల్లంతకుంట మండలం వంతడుపుల, కందికట్కూర్‌ గ్రామాల్లో తాజీ మాజీ ఎమ్మెల్యే రసమయి బాలకిషన్‌కు చేదు అనుభవం ఎదురైంది.  నాలుగేళ్ల పాలనలో తమకేమి చేశావంటూ రసమయిని వంతడుపుల గ్రామస్తులు అడ్డుకున్నారు. మా గ్రామానికి చేసిన అభివృద్ధి ఏంటో చెప్పాలని నిలదీశారు.  దీంతో రసమయి  అక్కడ ప్రచారాన్ని ముగించుకుని  పక్కనున్న కందికట్కూర్‌ గ్రామానికి వెళ్లారు. అక్కడ ప్రచారం నిర్వహిస్తుండగా గ్రామస్తులు అడ్డుకున్నారు. తమ గ్రామాన్ని  మిడ్‌ మానేరు ముంపు గ్రామంగా ప్రకటించాలని డిమాండ్‌ చేశారు. గతంలో ఇచ్చిన హామీని అమలు చేయాలని కోరారు. దీంతో టీఆర్‌ఎస్‌ కార్యకర్తలు... గ్రామస్తులు, మహిళలతో వాగ్వాదానికి దిగారు.  గ్రామస్తులపైకి దాడికి యత్నించడంతో కాసేపు ఉద్రిక్తత ఏర్పడింది. మహిళలను నెట్టివేయడంతో వారు రసమయిపై తీవ్ర స్థాయిలో ఆగ్రహం వ్యక్తం చేశారు.

యాదాద్రి భువనగిరి జిల్లా మోత్కూరు మండలం సదర్‌శాపురంలో తుంగతుర్తి టీఆర్‌ఎస్‌ అభ్యర్థి గ్యాదరి కిషోర్‌కు నిరసన సెగ తగిలింది.  ఎస్సీ కమ్యూనిటీ హాల్‌ నిర్మిస్తామన్న హామీ ఏమైందంటూ యువకులు గ్యాదరి కిషోర్‌ను నిలదీశారు. కొండగడపలో ఎమ్మార్పీఎస్‌ కార్యకర్తలు.. టీఆర్‌ఎస్‌ నాయకులతో వాగ్వాదానికి దిగారు. అనాజిపురంలో పట్టాపాస్‌ పుస్తకాలు అందలేదంటూ...కిశోర్ ప్రచార రథాన్ని స్థానికులు అడ్డుకున్నారు. టీఆర్ఎస్ ప్రభుత్వం గ్రామాన్ని అభివృద్ధి చేయలేదని.. గాదరి కిశోర్ గో బ్యాక్ అంటూ నినాదాలు చేశారు. దీంతో ఎమ్మార్పీఎస్ నాయకులు, టీఆర్ఎస్ కార్యకర్తల మధ్య ఘర్షణ చోటు చేసుకుంది. ఒకరిపై ఒకరు దాడి చేసుకున్నారు. ఇరువర్గాలను పోలీసులు చెదరగొట్టారు. గత ఎన్నికల్లో నేతలు ఇచ్చిన హామీలను నెరేవర్చకపోవడంతో ప్రజలు వారిని నిలదీస్తున్నారు. దీంతో నాయకులకు నిరసన సెగలు తప్పడం లేదు.

18:53 - October 21, 2018

హైదరాబాద్‌ : టీఆర్ఎస్ అభ్యర్థి ముద్దగోని రామ్మోహన్‌ గౌడ్‌కు చేదు అనుభవం ఎదురైంది. ఎన్నికల ప్రచారం కోసం వెళ్లిన అయన ప్రచార రథాన్ని ప్రజలు అడ్డుకుని, ఫ్లెక్సీని చింపి వేశారు. ఎన్నికల ప్రచారంలో భాగంగా ముద్దగోని రామ్మోహన్‌ గౌడ్‌ ఎల్బీనగర్ నియోజకవర్గంలోని బాలాపూర్‌ మండలం శివాజీచౌక్‌ డీఆర్‌డీఎల్ రోషన్‌ దౌలాకు వెళ్లాడు. తమ కాలనీకి రావద్దంటూ ఎన్నికల ప్రచారం కోసం వెళ్లిన అయన ప్రచార రథాన్ని ప్రజలు అడ్డుకుని, ఫ్లెక్సీని చింపి వేశారు. తమ సమస్యలు పరిష్కరిస్తామని నేతలు చెప్పినా... ఆ హామీలు అమలుకు నోచుకోలేదని స్థానికులు నిరసన వ్యక్తం చేస్తూ ప్రచార రథాన్ని అడ్డుకున్నారు. టీఆర్ఎస్ ప్రభుత్వంలో తమకు ఎలాంటి పథకాలు అందలేదని స్థానికులు తెలిపారు. 

09:43 - October 10, 2018

రంగారెడ్డి : ఎన్నికల్లో మద్యం, మనీ ఓటర్లపై ప్రభావం చూపించటం సర్వసాధారణంగా మారిపోయింది. రాజకీయ పార్టీలు ఒకదానికి మించి మరొకరు ఓటర్లను ప్రభావితం చేసేందుకు ముందుంటాయి. మనీ, మద్యం, కానుకలు వంటివి ఆశ చూపి ఓటర్లను ఆకట్టుకునేందుకు నానా పాట్లు పడుతుంటారు. ఈ నేపథ్యంలో తెలంగాణలో ఎన్నికల వేడి రాజుకోవడంతో ప్రజలు కూడా అప్రమత్తమవుతున్నారు. రాజకీయ నాయకులు వేసే ఎరలకు ఆశపడి, గుడ్డిగా వారిని అనుసరించకుండా ఉండాలని నిర్ణయించుకుంటున్నారు. ఉమ్మడి రంగారెడ్డి జిల్లాలోని మర్పలి మండలంలోని ఖల్కోడ గ్రామ ప్రజలు ఈ వినూత్న నిర్ణయం తీసుకున్నారు. గ్రామంలో సంపూర్ణ మద్య నిషేధం విధిస్తూ ఏకగ్రీవ తీర్మానం చేశారు. ఎన్నికల ప్రచారానికి వస్తున్న నాయకులు మద్యాన్ని ఎరగా వేసి ఓట్లు గుంజేందుకు ప్రయత్నిస్తారని, వారి బారిన పడి మోసపోకుండా ఉండేందుకే ఈ నిర్ణయం తీసుకున్నట్టు చెప్పారు. గ్రామస్తులంతా కలిసి తీసుకున్న ఈ నిర్ణయాన్ని ఉల్లంఘించిన వారికి రూ.2 వేల జరిమానా విధించనున్నట్టు గ్రామ పెద్దలు హెచ్చరించారు. ఇటువంటి గ్రామస్థుల నిర్ణయం అన్ని గ్రామాలకు ఆదర్శం కావాల్సినఅవుసరం ఎంతైనా వుంది. అంతేకాదు..ఎన్నికల్లో నేతలు ఇచ్చిన కానుకలకు ఆశపడి తమ ఓటును అమ్ముకుని ఓటు వేయటం అంటే తమ భవిష్యత్తును..అభివృద్దిని తామే అంతం చేసుకోవటంతో సమానమని..రాజ్యాంగపరంగా ఓటు వేసే పూర్తి హక్కుని ప్రతీ  ఓటరు వినియోగించుకోవాలని..వినియోగించుకుంటారని  ఆశిద్దాం..

20:43 - August 25, 2018

నెల్లూరు : ప్రకృతి అందాలకు నెలవైన నెల్లూరు కాలుష్య కోరల్లో చిక్కుకుంది. పట్టణంలో ఎక్కడ చూసినా కాలుష్యమే కనబడుతుంది. కాలుష్యంతో సావాసం చేస్తూ ప్రజలు రోగాల భారీన పడుతున్నారు. దేశంలోని అత్యంత కలుషిత ప్రాంతాల్లో ఒకటిగా ఉన్న నెల్లూరు కాలుష్యంపై స్పెషల్‌ స్టోరీ.  
రైస్‌ మిల్లుల వ్యర్థాలతో జల, వాయు కాలుష్యం
నెల్లూరు.. ప్రకృతి అందాలకు నెలవైన నెల్లూరు ప్రస్తుతం కాలుష్య కోరల్లో కొట్టుమిట్టాడుతుంది. కాలుష్య కోరల్లో చిక్కుకున్న ప్రజలు నిత్యం రోగాల భారీన పడుతున్నారు. సుమారు 8 లక్షల జనాభా ఉన్న నెల్లూరు పట్టణంలో పారిశ్రామిక పురోగతి గణనీయంగా పెరిగింది. కృష్ణపట్నం ఓడరేవు ద్వారా ఎగుమతులు, దిగుమతులు పెరిగాయి. అయితే అభివృద్ధి ఎంత పెరిగిందో అంతే స్థాయిలో కాలుష్యం కూడా పట్టణంలో వ్యాపించింది. ఇదే ఇప్పడు పట్టణ ప్రజలను కలవరపెడుతుంది. నెల్లూరు పట్టణం చుట్టు పక్కల వందకు పైగా రైస్ మిల్లులున్నాయి. ప్రతి ఏడాది 7 నుంచి 8 నెలలు పాటు ఇవి నడుస్తాయి. రైస్‌ మిల్లులు విడుదల చేసే వ్యర్థాలతో జల, వాయు కాలుష్యం ఏర్పడుతోంది. ఈ రైస్ మిల్లుల్లో కూడా కొన్ని ఉప్పుడు బియ్యపు మిల్లులున్నాయి. అసలు ఉప్పుడు బియ్యం తినే కేరళ, తమిళనాడు రాష్ట్రాల్లోనే ఈ మిల్లులను నిషేధిస్తే.. ఇక్కడ మాత్రం వాటికి అనుమతులు ఇచ్చారు. వీటి నుంచి వచ్చే కాలుష్యమే పట్టణాన్ని చుట్టుముడుతోంది. 
5 పవర్ ప్రాజెక్టులు, 7పామాయిల్ ఫ్యాక్టరీలు
ఇక పట్టణంలో భూగర్భ డ్రైనేజీ కోసం అధికారులు ఇష్టారీతిని రోడ్లను తవ్వారు. తవ్విన రోడ్లపై వాహనాలు నడవటంతో దుమ్ము, ధూళి పెరిగి పట్టణంలో వాయు కాలుష్యం పెరిగిపోతోంది. దుమ్ము, ధూళికి తోడు వాహనాల నుంచి వచ్చే పొగతో కూడా కాలుష్యం అధికమవుతోంది. పట్టణంలో సుమారు 30వేలకు పైగా ఆటోలు, 1000కి పైగా బస్సులు, 20 వేల లారీలు, 15 వేల కార్లు , సుమారు లక్షల ద్విచక్రవాహనాలు రాకపోకలు సాగిస్తున్నాయి. వీటిలో కాలం చెల్లిన వాహనాలే అధికంగా ఉన్నాయి. వీటి నుంచి వచ్చే పొగ, దుమ్ము, ధూళి పట్టణాన్ని కాలుష్యం పట్టణంగా మారుస్తున్నాయి. ఇక పెన్నానదిలో ఇసుక అక్రమ తవ్వకాలతో భూగర్భ జలాలు పూర్తిగా కలుషితమైపోయాయి. ఇక నెల్లూరుకి 30 కిలోమీటర్ల దూరంలో 5 పవర్ ప్రాజెక్టులు.. 7పామాయిల్ ఫ్యాక్టరీలున్నాయి. వీటి నుంచి వచ్చే కాలుష్యంతో నెల్లూరు చుట్టుపక్కల ప్రాంతాల్లో కాలుష్యం చిక్కుకుంటున్నాయి.
కాలుష్య ప్రాంతాల్లో 14వ ప్రాంతంగా గుర్తింపు
ఇంతటీ కాలుష్యంతో దేశంలోని అత్యంత కాలుష్యపు ప్రాంతాల్లో నెల్లూరు 14వ ప్రాంతంగా ఉంది. దీన్ని ప్రపంచ ఆరోగ్య సంస్థ కూడా గుర్తించింది. కోటి మంది జనాభా ఉన్న హైదరాబాద్‌ కన్నా.. 8 లక్షల జనాభా ఉన్న నెల్లూరులనే కాలుష్యం ఎక్కువగా ఉందని ఆరోగ్య సంస్థ అభిప్రాయ పడింది. నెల్లూరులో 6శాతం సల్ఫర్ డయాక్సైడ్, 22శాతం నైట్రోజన్ డయాక్సైడ్, 0.001 శాతం మెర్క్యురీ, 0.005 శాతం ఆర్సినిక్ ఉన్నట్లు అధికారులు స్పష్టం చేశారు. అంతకముందు కేంద్ర కాలుష్య నియంత్రణ మండలి కూడా నెల్లూరులో కాలుష్యం తీవ్ర స్థాయిలో ఉందని.. వెంటనే నివారణకు ప్రత్యామ్నాయ చర్యలు చేపట్టాలని ప్రభుత్వాన్ని హెచ్చరించింది. అయినా అధికారులు ఏ మాత్రం నివారణ చర్యలు చేపట్టలేదు. ఇక ఈ కాలుష్యంతో నగరవాసులు శ్వాసకోశ, కంటి జబ్బులు, విష జ్వరాలు, కిడ్నీవ్యాధులతోపాటు రకరకాల రోగాల భారీన పడుతున్నారు. అధికారులు ఇష్టారీతిన వ్యవహరించటం వల్లే ఈ రోజు పట్టణం ఈ దుస్థితికి చేరుకుందని ప్రజలు మండిపడుతున్నారు. మరి ఇప్పుడైనా అధికారులు కాలుష్య నివారణకు చర్యలు చేపడతారో లేదో వేచి చూడాలి.  

 

13:56 - August 22, 2018

కృష్ణా  : జిల్లా రైతులకు సర్పభయం పట్టుకుంది. వరుసగా కురుస్తున్న వర్షాలకు తోడు ఎగువ నుంచి వస్తున్న వరద ప్రవాహం తాకిడితో ప్రజలు బిక్కుబిక్కుమంటూ గడపాల్సి వస్తోంది. వరద నీటిలో తేళ్లు, పాముల్లాంటి విషసర్పాలు ఇళ్లలోకి , పంటపొలాల్లోకి చొచ్చుకు వస్తున్నాయి. వీటిని గుర్తించని రైతులు, ప్రజలు విషసర్పాల కాటుకు గురవుతూ ప్రాణాలు కోల్పోతున్నారు.  రెండు రోజుల వ్యవధిలో 46 మంది పాముకాటుకు గురవడంతో అందరిలో భయం పట్టుకుంది.
పాముకాటుకు గురైన 275 మంది
కృష్ణా జిల్లాలోని ప్రజలకు పాము భయం పట్టుకుంది. దివిసీమలో పాములు రెచ్చిపోతున్నాయి. పాముకాట్లకు గురవుతున్న వారి సంఖ్య రోజురోజుకు తీవ్రమవుతోంది. ఏప్రిల్‌ నుంచి ఇప్పటి వరకు 275 మందికిపైగా పాముకాటుకు గురయ్యారు.  ఈ సంఖ్య క్రమంగా పెరుగుతుండడంతో విషసర్పాలు ఏ స్థాయిలో సంచరిస్తున్నాయో అర్థంచేసుకోవచ్చు.
బయట సంచరిస్తున్న పాములు
వ్యవసాయ పనులు ప్రారంభంకావడం, కృష్ణానదికి వరద తాకిడి పెరగడంతో ఇన్నాళ్లూ కలుగుల్లో ఉన్న పాములు, తేళ్లు, ఇతర విషసర్పాలు బయటకు వస్తున్నాయి. అవి రాత్రిపగలూ సంచరిస్తూ కాటేస్తున్నాయి. అవనిగడ్డలో ఏరియాలో ఒక్కరోజే 11మంది పాముకాటుకు గురయ్యారు. ఏరియా వైద్యశాలలో గతంతో వైద్యం తీసుకుంటున్న వారితో కలిపితే ప్రస్తుతం 17 మంది చికిత్స పొందుతున్నారు. పాముకాటుకు గురైన వారిలో ఇద్దరు మహిళలు ఉండగా.. మిగిలిన వారంతా పురుషులే.  సోమవారం ఇద్దరు పాముకాటుకు గురవడంతో వారిని కోడూరు ఆస్పత్రిలో చేర్చి చికిత్స అందిస్తున్నారు.  
పాముకాట్లతో జిల్లాలో కలకలం
వరుస పాముకాట్లతో జిల్లాలో కలకలం మొదలైంది. శాసనసభ ఉపసభాపతి మండలి బుద్దప్రసాద్‌ అవనిగడ్డ ఏరియా వైద్యశాలతోపాటు కోడూరు, నాగాయలంక, మోపిదేవి, చల్లపల్లి మండలాల్లోని పీహెచ్‌సీలను ఆకస్మికంగా తనిఖీ చేశారు. పాముకాటుకుగురై చికిత్స పొందుతున్న వారిని పరామర్శించారు.  అన్ని పీహెచ్‌సీల్లో యాంటిస్నేక్‌ వీనం మందును అందుబాటులో ఉంచాలని, పాములను నివారించేందుకు చర్యలు చేపట్టాలని ప్రజలు కోరుతున్నారు.
బయట తిరగాలంటే హడలిపోతున్న ప్రజలు
కృష్ణా జిల్లా వ్యాప్తంగా చాలా ప్రాంతాల్లో ప్రజలు పాముకాటుకు గురవుతున్నారు. అర్ధరాత్రి బయట తిరగాలంటేనే హడలిపోతున్నారు. పొలానికి వెళ్లాలంటే రైతులకు వణుకుపుడుతోంది.  ఇప్పటికైనా పాముకాటుకు గురికాకుండా అధికారులు నియంత్రణ చర్యలు చేపట్టాలని పలువురు కోరుతున్నారు. 

 

21:27 - August 19, 2018

కేరళ : ప్రకృతి సృష్టించిన విలయం నుంచి దైవభూమి కేరళ ఇంకా తేరుకోలేదు. జలప్రళయం  సృష్టించిన విధ్వంసంతో జనం విలవిల్లాడుతున్నారు. ప్రకృతి ప్రకోపం కేరళవాసులు వెంటాడుతూనే ఉంది. భారీ వర్షాలు, వరదలు ఆ రాష్ట్రాన్ని పీడిస్తున్నాయి. ప్రకృతి విపత్తుకు ఇంతవరకు 385 మందికిపైగా ప్రాణాలు కోల్పోయారు. వర్షాలు, వరదలతో కేరళకు జరిగిన నష్టాన్ని జాతీయ విపత్తుగా ప్రకటించాలన్న డిమాండ్‌కు ప్రాధాన్యత పెరుగుతోంది. 
కేరళలో వరుణుడి బీభత్సం 
కేరళలో వరుణుడి బీభత్సం కొనసాగుతోంది. వర్షాలు కొద్దిగా తగ్గుముఖం పట్టినా...వరద పరిస్థితి ఇంకా విషమంగానే ఉంది. శతాబ్దకాలంలో కనీవినీ ఎరుగని వరదలను కేరళ చవిచూసింది. గ్రామాలు, పట్టణాలు, నగరాల్లో వరదనీరు నిలిచిపోవడంతో సహాయ కార్యక్రమాలకు తీవ్ర ఆటంకం కలుగుతోంది. 
ఎనిమిది జిల్లాలో రెడ్ అలెర్ట్‌ ఉపసంహరణ 
వర్షాలు కొద్దిగా తగ్గుముఖం పట్టడంతో కేరళలోని 11 జిల్లాల్లో శనివారం ప్రకటించిన రెడ్‌ అలెర్ట్‌ను ఎనిమిది జిల్లాల్లో ఉపసంహరించుకున్నారు. పాతనంతిట్ట, ఇడుక్కి, ఎర్నాకుళం రెడ్‌ అలెర్ట్‌ కొనసాగుతోంది. మరో రెండు జిల్లాల్లో ఎల్లో, గ్రీన్‌ అలెర్ట్‌ ప్రకటించారు. సోమవారం నాటికి వాతావరణంలో మార్పు రావొచ్చని వాతావరణ శాఖ ప్రకటించింది. అయితే బంగాళాఖాతంలో ఏర్పడిన అల్పపీడం కారణంగా మళ్లీ వర్షాలు కురిసే అవకాశంలేకపోలేదన్న వాతావరణ శాఖ హెచ్చరికంలతో అధికారులు అప్రమత్తమయ్యారు. 
వందలాది మంది మృతి
వర్షాలు, వరదలకు కేళరలో భారీగా ప్రాణనష్టం సంభవించింది. వందలాది మంది  ప్రాణాలు కోల్పోయారు. కొండచరియలు విరిగినపడిన ఘటనల్లో ఎక్కువ మంది మృతి చెందారు. వేలాది మంది క్షతగాత్రులయ్యారు. లక్షలాది మంది నిరాశ్రయులయ్యారు. దాదాపు ఆరు లక్షల మంది సహాయ శిబిరాల్లో తలదాచుకుంటున్నారు. విద్యాసంస్థలు, చర్చిలు, మసీదులు, దేవాలయాల్లో పునరావాస కేంద్రాలు ఏర్పాటు చేశారు. వీటిలో మరుగుదొడ్లు, స్నానాల గదులు లేకపోవడంతో బాధితులు నానా ఇబ్బందులు పడుతున్నారు. పునరావాస కేంద్రాల్లో తలదాచుకున్నవారికి  ఆహారం, మంచినీరు అందక అల్లాడుతున్నారు. హెలికాప్టర్ల ద్వారా ఆహార పొట్లాలు, మంచినీటి ప్యాకెట్లు జారవిడుస్తున్నా... అవి అందరికీ అందడంలేదు. దీంతో ఆకలిదప్పులతో వదర బాధితులు అల్లాడుతున్నారు. వరదల్లో చిక్కుకున్న చాలా ప్రాంతాలకు ఇంకా సహాయ సిబ్బంది చేరుకోలేని పరిస్థితి నెలకొంది. వేలాది ఇళ్లు నేలమట్టమయ్యాయి. రోడ్లు కొట్టుకుపోవడంతో రవాణా వ్యవస్థ స్తంభించింది. సమాచార వ్యవస్థ చిన్నాభిన్నమైంది. ఆపదలో ఉన్న ప్రజలను కాపాడేందుకు త్రివిధ దళాలు ముమ్మరంగా సహాయ చర్యలు చేపడుతున్నాయి. చుట్టూనీరు ఉన్నా తాగేందుకు గుక్కెడు నీళ్లు దొరక్క కేరళ వరద బాధితులు అల్లాడుతున్నారు. జలవనరులన్నీ కలుషితమైపోయాయి. రక్షిత మంచినీటి కోసం పరితపిస్తున్న కేరళ ప్రజల అవసరార్థం రైల్వేలు 14 లక్షల లీటర్ల మంచినీటిని సరఫరా చేస్తున్నాయి. పాలు దొరక్క వరద బాధితులు ముఖ్యంగా చిన్నపిల్లలు అల్లాడుతున్నారు. 
నాలుగు రోజులుగా చంగన్నూర్‌తో తెగిపోయిన సంబంధాలు 
కొచ్చి విమానాశ్రయం ఇంకా వరదనీటిలోనే  చిక్కుకుని ఉంది. దీంతో సోమవారం నుంచి కొచ్చి నౌకాదళానికి చెందిన ఎయిర్‌స్ట్రిట్‌ నుంచి ప్రయాణికుల విమాన సర్వీసులు నడిపేందుకు రక్షణ మంత్రిత్వ శాఖ అనుమతి ఇచ్చింది. చాలా డ్యాములు పూర్తిగా నిండిపోవడంతో గేట్లు ఎత్తి దిగువకు నీరు విడుదల చేస్తున్నారు. దీంతో డ్యామ్‌ దిగువ ప్రాంతాల్లోని గ్రామాలు మునిగిపోయాయి. నదులు ఉప్పొంగుతున్నాయి. కాల్వ గట్లు తెగిపోయాయి. కేరళ రాజధాని తిరువనంతపురంకు 120 కి.మీ. దూరంలో ఉన్న చెంగన్నూర్‌కు నాలుగు రోజులుగా సంబంధాలు పూర్తిగా తెగిపోవడంతో అక్కడ ఉన్నవారి సమాచారం తెలియక అధికారులు ఆందోళన వ్యక్తం చేస్తున్నారు. వర్షాలు పడకుండా ఉంటే మరో రెండు రోజుల తర్వాత కేరళ కొద్దిగా తెరిపినపడే అవకాశం ఉందని భావిస్తున్నారు. 

 

09:10 - August 13, 2018

ఉమ్మడి కరీంనగర్‌ : మారిన వాతావరణ పరిస్థితులు, కలుషిత నీరు. పారిశుధ్యం లోపించడంతో ఉమ్మడి కరీంనగర్‌ జిల్లాలో పల్లె వాసులు మంచం పడుతున్నారు. జ్వరాల భారిన పడే వారి సంఖ్య రోజురోజుకీ పెరిగి పోతుండటంతో ప్రభుత్వ ప్రైవేట్‌ ఆసుపత్రులు రోగులతో కిక్కిరిసిపోతున్నాయి. ఇంటికిద్దరు ముగ్గురి చొప్పున విషజ్వరాలతో అల్లాడిపోతున్నారు. ఇంత జరుగుతున్నా ఆ పల్లె వాసులను అధికారులుగానీ.. ప్రజాప్రతినిధులుగానీ పట్టించుకోవడం లేదు.
పెద్దపల్లి జిల్లాలో విషజ్వరాలు
పెద్దపల్లి జిల్లా వ్యాప్తంగా జ్వర పీడితుల సంఖ్య పెరిగి పోతుండటం ఆందోళన కలిగిస్తోంది. కలుషితమైన నీటిని తాగడం.. పారిశుధ్యం లోపించడం కారణంగా దోమలు వ్యాప్తి చెంది ప్రజలు అంతుచిక్కని రోగాల భారిన పడుతున్నారు. ఇక మారుమూల పల్లెల పరిస్థితి మరి దారుణంగా ఉంది. 
మంథని నియోజక వర్గంలో జ్వరాల భారిన పడ్డ ప్రజలు  
ముఖ్యంగా మంథని నియోజక వర్గంలో పల్లెలతో పాటు తూర్పు డివిజన్‌లో జ్వరాల భారిన పడే వారి సంఖ్యపెరుగుతున్నప్పటికీ వైద్య శాఖ అధికారులు తగిన ఏర్పాట్లు చేయడంలో విఫలమయ్యారనే ఆరోపణలు ఉన్నాయి. వైద్యుల నిర్లక్ష్యంతో జనం ప్రాణాలు కోల్పోతున్నారు. మంథని, సూరయ్య పల్లి, గోపాల్‌ పూర్‌, ఎగ్లాస్‌ పూర్ తో పాటు తాడిచర్లలో జ్వర పీడితుల సంఖ్య అధికంగా ఉంది. అయినా అధికారులు పట్టించుకోవడం లేదని స్థానికులు ఆరోపిస్తున్నారు. 
పల్లెల్లో ఎక్కడ చూసిన విషాదఛాయలు
మంథని ఎమ్మెల్యే పుట్ట మధు దత్తత గ్రామం అయిన ముత్తారం గ్రామంలో ఏ ఇంట్లో చూసినా ఇంటికి ఒక్కరిద్దరు చొప్పున జ్వరాలతో మంచాన పడి ఉన్నారు. సుమారు 500 మంది దాకా వైరల్‌ ఫీవర్‌ బాధితులు ఉన్నారు. ప్రతి ఇంట్లో విషజ్వరాలతో వచ్చే కాళ్లనొప్పులు ఒళ్లునొప్పులతో.. నడవలేని స్థితిలో తలుపు తీసేవారే కనిపిస్తున్నారు. ఇది కేవలం ఈ మండల కేంద్రానికే పరిమితం కాలేదు చుట్టుపక్కల కేశనపల్లి, ఓడేడు ఇలా పలు పల్లెలూ విషజ్వరాలతో పడకేశాయి. ఇప్పటికే ఐదారుగురి దాకా విషజ్వరాలతో మృత్యువాత పడగా ఇటీవల కూర్మ పూజిత అనే 14 ఏళ్ల బాలిక డెంగ్యూతో చనిపోయింది. దీంతో పల్లెల్లో ఎక్కడ చూసినా విషాదఛాయలే దర్శనమిస్తున్నాయి. 
స్పందించని అధికారులు  
ఇంత జరుగుతున్నా సంబంధిత అధికారులు మాత్రం స్పందించటం లేదు. మంథని ముత్తారం మండల కేంద్రంలో ఉన్న ప్రాథమిక ఆరోగ్య కేంద్రంలో కేవలం ఏడు బెడ్స్‌ మాత్రమే ఉండటం ఇబ్బందికరంగా మారింది. అంటు వ్యాధులు ప్రబలుతున్నా ఈ ప్రాంతాల్లో డాక్టర్లు కూడా కరువయ్యారు. వరంగల్‌ నుంచి డిప్యూటేషన్‌ మీద మెడికల్‌ ఆఫీసర్‌ అప్పుడప్పుడు వచ్చిపోతుంటారు. అలాగే  ఆరేడుగురు నర్సులు ఉండాల్సిన చోట.. స్టాప్‌ నర్సులు కూడా లేరు. ఇక వైద్య పరికరాలు, ల్యాబ్‌ ఫెసిలిటీస్‌ అయితే అడిగే నాథుడే లేడు. దత్తత తీసుకున్న ఎమ్మెల్యే పట్టించుకోవడంలేదనే విమర్శలు వినిపిస్తున్నాయి. 
గ్రామాల్లో విష జ్వరాలు 
వర్షకాలంలో కలుషిత నీటి ప్రభావంతో గ్రామాల్లో విష జ్వరాలు ప్రభలుతున్నాయి. శుద్ద జలలాలు అందించాల్సిన పాలకులు పట్టించుకోవడం లేదనే ఆరోపణలు వినిపిస్తున్నాయి. ఇప్పటికైనా ప్రభుత్వం మంథనిలో మెడికల్‌ క్యాంపులు ఏర్పాటు చేసి మెరుగైన వైద్యం అందిచాలని రోగులు కోరుతున్నారు.

09:07 - August 13, 2018

కడప : ఎవరైనా మరుగుదొడ్లు, మంచినీళ్ళ కోసం ధర్నాలు చేయడం మామూలే.. కానీ మమ్మల్ని మా గ్రామాలనుంచి తరలించి.. మా ప్రాణాలు కాపడండి మహా ప్రభో అని అంటుంటే.. వారెంత ధీన పరిస్థితిలో ఉన్నారో అర్థం చేసుకోవచ్చు. కడపజిల్లా ఓబులవారిపల్లె మండలం పరిసర గ్రామాల ప్రజలు పదేళ్ళుగా ప్రాధేయపడుతున్నా పట్టించుకున్న నాథుడేలేడు.  అరణ్య రోదనను తలపిస్తున్న వారి ఆవేదనపై 10టీవీ ప్రత్యేక కథనం.
1978నుంచి మైనింగ్‌ పనులు 
కడప జిల్లా ఓబులవారి పల్లె మండలం మంగంపేటలోని ముగ్గురాయి ప్రపంచ ప్రసిద్ధిగాంచింది. 1978నుంచి ఇక్కడ మైనింగ్‌ పనులు నడుస్తున్నాయి. కానీ  కపుపల్లి, అరుంధతీవాడ, హరిజన వాడ, అగ్రహారం ప్రజల జీవితాలు ఏపీఎండీసి స్వార్థానికి బలైపోతున్నాయి. లాభాలను వెనుకేసుకుంటున్న ఏపీ ఎండీసి ప్రజల బాగోగులను గాలికి వదిలేసింది.  మైనింగ్‌లో చేసే పేలుళ్ళకు ఆయా గ్రామాల్లో ఇళ్ళు నెర్రెలు చీలి, కూలడానికి సిద్ధంగా ఉన్నాయి. బాంబులు పేల్చిన ప్రతిసారి వస్తున్నశబ్దాలు, రాళ్ళు, దుమ్ము వల్ల ఆ గ్రామాల  ప్రజలు యాతన అనుభవిస్తున్నారు. రాత్రి వేళ ఇళ్ళలో పడుకోవాలంటేనే హడలిపోతున్నారు.
ప్రాణాంతక జబ్బుల బారిన పడుతున్నామని ప్రజలు ఆవేదన 
ముగ్గురాయి తీసుకెళ్ళే లారీలతో రేగుతున్న దుమ్ము, ధూళి వల్ల శ్వాసకోశ వ్యాధులతోపాటు.. పలు ప్రాణాంతక జబ్బుల బారిన పడుతున్నామని ప్రజలు ఆవేదన వ్యక్తం చేస్తున్నారు. గత పదేళ్ళుగా ప్రభుత్వాలు, అధికారులు, ప్రజాప్రతినిధులను వేడుకుంటున్నా ఏ ఒక్కరూ తమపై కనికరం చూపలేదని తమ గోడు వెళ్ళబోస్తున్నారు..  తమను సురక్షిత ప్రాంతాలకు తరలించి.. తమ ప్రాణాలను కాపాడాలంటూ ఏపీఎండీసీ ఎండీ వెంకయ్యచౌదరిని ధీనంగా వేడుకున్నారు ప్రజలు. దీంతో వారిని ఖచ్చితంగా వేరే ప్రాంతానికి తరలిస్తామని ఏపీఎండీసీ ఎండీ హామీ ఇచ్చారు.  ఆమేరకు ఆయా గ్రామాల్లోని ఇళ్ళకు నెంబర్లు వేసి మార్కింగ్‌ చేశారు. కానీ నెలలు గడుస్తున్నా తరలింపు చర్యలు ఊసులేదు.. దీంతో ప్రజలు బిక్కుబిక్కుమంటూ జీవనం సాగిస్తున్నారు. దుమ్ము, ధూళితోపాటు.. శబ్ధ కాలుష్యంతో వచ్చే ప్రాణాంతక వ్యాధుల వల్ల యాతన అనుభవిస్తున్నామంటూ ఆవేద వ్యక్తం చేస్తున్నారు ప్రజలు. ఇప్పటికైనా ప్రభుత్వం స్పందించి తమని సురక్షిత ప్రాంతాలకు తరలించాలని వేడుకుంటున్నారు. లేదంటు ఉధృతంగా ఉద్యమిస్తామని హెచ్చరిస్తున్నారు.

09:40 - August 8, 2018

చెన్నై : డీఎంకే అధినేత కరుణానిధి పార్థివదేహం సందర్శనకు జనం బారులు తీరారు. సినీ, రాజకీయ ప్రముఖులు తరలివస్తున్నారు. కరుణానిధి అభిమానులు చెన్నైకి బారులు తీరారు. విదేశాల నుంచి ప్రజలు తండోపతండాలుగా చేరుకుంటున్నారు. ఢిల్లీతోపాటు అన్ని రాష్ట్రాల రాజధానుల్లోనూ జాతీయ జెండా అవనతం చేశారు. కరుణ అంత్యక్రియలకు ప్రధాని మోడీ, ఏఐసీసీ అధ్యక్షుడు రాహుల్ గాంధీ, తెలంగాణ సీఎం కేసీఆర్, ఏపీ సీఎం చంద్రబాబు హాజరుకానున్నారు. 

Pages

Don't Miss

Subscribe to RSS - ప్రజలు