ప్రత్యేక హోదా

21:07 - July 16, 2018

ఢిల్లీ : ఏపీకి కేంద్రం ఇచ్చిన హామీలపై పోరాడేందుకు మద్ధతివ్వాలని కోరుతూ.. ఢిల్లీలో ప్రతిపక్షనేతలను టీడీపీ ఎంపీలు కలిశారు. ఎన్సీపీ అధినేత శరద్‌పవార్‌తోపాటు వామపక్షనేతలను కలిశారు. సీపీఎం జాతీయ ప్రధాన కార్యదర్శి సీతారాం ఏచూరి, సీపీఐ ఎంపీ డీ రాజాను టీడీపీ ఎంపీలు తోట నరసింహం, రవీంద్ర బాబు కలిశారు. సీఎం చంద్రబాబు రాసిన లేఖతోపాటు.. విభజన చట్టంలో అమలు కాని హామీల వివరాలను వారికి అందజేశారు. ఏపీకి కేంద్రం అన్యాయం చేసిందని సీతారాం ఏచూరి విమర్శించారు. బీజేపీ వైఫల్యాలను, మోసాలను బట్టబయలు చేస్తామని ఆయన అన్నారు.

18:10 - July 14, 2018

విజయవాడ : టిడిపి గెలుపు చారిత్రక అవసరమని...నాలుగు సంవత్సరాలుగా ఫోకస్ చేయబట్టే మంచి ఫలితాలు వచ్చాయని ఏపీ సీఎం చంద్రబాబు నాయుడు తెలిపారు. మళ్లీ టిడిపి వస్తే భవిష్యత్ బాగుగా ఉంటుందని..రాష్ట్రం అభివృద్ధి చెందుతుందనే చర్చ రాష్ట్రంలో జరగాలని పేర్కొన్నారు. గాడి తప్పిన పాలనను ఫాస్ట్ ట్రాక్ లో పెట్టామన్నారు.

కేంద్రం చేసిన ద్రోహం..విభజన హామీలు...ప్రత్యేక హోదా కల్పించకపోవడంపై నిరసన వ్యక్తం చేస్తూ తము పలు కార్యక్రమాలు చేయడం జరుగుతోందని...అందులో భాగంగా ధర్మదీక్షలు..పోరాటాలు చేయడం జరుగుతోందన్నారు. ఇంకా 9 చేయాలని...నెలకు ఒకటి పెడుతామన్నారు. ప్రజలన చైతన్యవంతులను చేసి భవిష్యత్ కు ప్రజలను సమాయత్తం చేస్తామన్నారు.

ఎన్డీయేలో ఉన్న వారంతా జగన్ ను బీజేపీలో చేరాలని కోరుతున్నారని...సీఎం చేస్తామని అంటున్నారని పేర్కొన్నారు. రాజీనామాలు ఎందుకు చేశారు ? ఎన్నికలు రావనే విషయం తెలుసుకదా ? అని ప్రశ్నించారు. తప్పుడు రాజకీయాలు చేసి ప్రజలను తప్పుదోవ పట్టించే ప్రయత్నిస్తున్నారని..బిజెపి..వైసిపి..జనసేన పార్టీలన్నీ కలిసి టిడిపిపై విమర్శలు గుప్పిస్తున్నారని పేర్కొన్నారు. వ్యక్తిగతంగా విమర్శలు మాత్రమే చేస్తున్నారని..స్థానికంగా ఉన్న సమస్యలను ప్రస్తావిస్తున్నారా ? అని ప్రశ్నించారు. కేంద్రానికి సహకరిస్తూ ఏపీ ప్రభుత్వాన్ని విమర్శిస్తున్నారని బాబు తెలిపారు. 

21:10 - July 12, 2018

నెల్లూరు : ప్రత్యేక హోదా విషయంలో తెలుగు ప్రజలను బీజేపీ, టీడీపీ మోసం చేశాయని కాంగ్రెస్‌ ఏపీ వ్యవహారాల ఇన్ఛార్జ్‌ ఊమెన్‌ చాందీ అన్నారు. రాబోయే ఎన్నికల్లో బీజేపీ, టీడీపీలకు ప్రజలు గుణపాఠం చెప్పాలని ఆయన అన్నారు. నెల్లూరు జిల్లాలో పర్యటించిన ఉమెన్‌ చాందీ.. కాంగ్రెస్‌ బలోపేతానికి కృషిచేయాలని పార్టీ శ్రేణులకు పిలుపునిచ్చారు. కాంగ్రెస్‌ ఏపీ వ్యవహారాల ఇన్ఛార్జ్‌ ఊమెన్‌ చాందీ బీజేపీ, టీడీపీ తీరుపై మండిపడ్డారు. ఆంధ్రప్రదేశ్‌కు ప్రత్యేక హోదా విషయంలో రెండు పార్టీలు మోసం చేశాయని ఆయన ఆగ్రహం వ్యక్తం చేశారు. నెల్లూరులో పర్యటించిన ఊమెన్‌ చాందీ.. రాష్ట్రంలో కాంగ్రెస్‌ పార్టీకి పూర్వ వైభవం తేవడానికి కృషి చేయాలని పార్టీ శ్రేణులను కోరారు.

మోదీ నాలుగేళ్ల పాలనలో లక్షల కోట్లు లూటీ చేయడం తప్ప, ప్రజలకు చేసిందేమీ లేదని ఊమెన్‌ చాందీ అన్నారు. మోదీ కాంగ్రెస్‌ను విమర్శించడం మానుకొని.... ప్రజల అభివృద్ధి కోసం పనిచేయాలని హితవు పలికారు. ప్రత్యేక హోదా విషయంలో ప్రజలను మోసం చేసిన బీజేపీ, టీడీపీలకు రాబోయే ఎన్నికల్లో ప్రజలు గుణపాఠం చెప్పాలన్నారు ఊమెన్‌ చాందీ.

మరో వైపు కాంగ్రెస్ క్యాడర్‌లో జోష్‌ నింపే ప్రయత్నం చేశారు పీసీసీ రాష్ట్ర అధ్యక్షుడు రఘువీరా రెడ్డి. రాష్ట్రం అభివృద్ధి జరగాలంటే కాంగ్రెస్‌ వల్లే సాధ్యమవుతుందన్నారు. పోలవరం ప్రాజెక్టు, రాజధాని నిర్మాణం కేంద్ర ప్రభుత్వ నిధులతో పూర్తి కావాలంటే కేంద్రంలో కాంగ్రెస్‌ గెలుపొందాలన్నారు. మొత్తానికి కేంద్ర వైఫల్యాలను ఎత్తి చూపుతూ పార్టీ బలోపేతానికి కాంగ్రెస్‌ కృషి చేస్తోంది. 

21:07 - July 12, 2018

విజయవాడ : ప్రత్యేక హోదా సహా విభజన చట్టంలోని హామీలన్నీ అమలు చేసేవరకు కేంద్ర ప్రభుత్వంతో రాజీలేని పోరాటం కొనసాగించాలని టీడీపీ నిర్ణయించింది. ఈ విషయంలో ఎవరికీ ఎటువంటి అనుమానం అవసరంలేదని ముఖ్యమంత్రి చంద్రబాబు స్పష్టం చేశారు. హక్కులు సాధించుకునే వరకు విశ్రమించబోమని తేల్చి చెప్పారు. జమిలి ఎన్నికలకు టీడీపీ వ్యతిరేకంకాదని చెప్పిన చంద్రబాబు.. రాజకీయ దురుద్దేశంతో ముందస్తు ఎన్నికలకు వెళ్లాలనుకున్నా... వాయిదా వేసినా సహించబోమని అమరావతిలో జరిగిన టీడీపీ విస్తృత స్థాయి సమావేశంలో హెచ్చరించారు. జమిలి ఎన్నికలకు టీడీపీ వ్యతిరేకంకాదని చెప్పిన చంద్రబాబు.. రాజకీయ దురుద్దేశంతో ముందస్తు ఎన్నికలకు వెళ్లినా... లేక వాయిదా వేసినా.. సహించేందిలేదని హెచ్చరించారు. రాష్ట్ర విశాల ప్రయోజనాలను దృష్టిలో పెట్టుకుని వచ్చే ఎన్నికల్లో టీడీపీ గెలుపు చాత్రిక అవసరమన్న చంద్రబాబు... ఈవిషయంలో ఇప్పటి నుంచే పార్టీ శ్రేణులు అహర్నిశలు కష్టపడి పనిచేయాలని చెప్పారు.

విశాఖ రైల్వే జోన్‌ సహా విభజన చట్టంలోని అన్ని హామీలు అమలు చేసేవరకు కేంద్ర ప్రభుత్వంతో రాజీలేని పోరాటం కొనసాగుతుందని చంద్రబాబు మరోసారి స్పష్టం చేశారు. కడప స్టీల్‌ ప్లాంట్‌ విషయంలో కేంద్ర ప్రభుత్వం రెండు నెలల్లోగా తేల్చకపోతే.. రాష్ట్ర ప్రభుత్వమే తుది నిర్ణయం తీసుకుంటుదన్నారు. కేంద్ర ప్రభుత్వ నిధులు ఇవ్వకుండా పోలవరం ప్రాజెక్టును వచ్చే ఏడాది ఫిబ్రవరిలోగా పూర్తి చేయమంటే ఎలా.. అని చంద్రబాబు ప్రశ్నించారు.

ఈనెల 16 తేదీకి టీడీపీ 1500 రోజుల పాలన పూర్తి చేసుకోనున్న నేపథ్యంలో గ్రామ దర్శిని కార్యక్రమాన్ని ప్రారంభించాలని టీడీపీ విస్తృత స్థాయి సమావేశంలో నిర్ణయించారు. ఎన్నికల్లోగా రాష్ట్ర వ్యాప్తంగా వంద సభల్లో చంద్రబాబు పాల్గొనే విధంగా ప్రణాళికలు రూపొందిస్తున్నారు. ఈ నెలలోనే వంచన, కుట్ర రాజకీయాలపై ధర్మపోరాట దీక్ష నిర్వహించే ప్రాంతాన్ని నిర్ణయించే బాధ్యతను చంద్రబాబు పార్టీ నాయకులుకు అప్పగించారు. మైనారిటీలతో సమావేశాలు, విశ్వవిద్యాలయాల్లో విద్యార్థులతో భేటీలు నిర్వహణ తేదీలను ఖరారు చేయాలని టీడీపీ విస్తృత సమావేశంలో పార్టీ నాయకులను చంద్రబాబు ఆదేశించారు. 

21:05 - July 11, 2018

అనంతపురం : ప్రత్యేక హోదా ఇవ్వకుండా మోసం చేసిన మోదీకి రోజులు దగ్గర పడ్డాయని రాష్ట్ర మంత్రులు, టీడీపీ ఎంపీలు, ఎమ్మెల్యేలు హెచ్చరించారు. 2019 ఎన్నికల్లో రాష్ట్రంలోని 25 లోక్‌సభ స్థానాల్లో టీడీపీని గెలిపిస్తే చంద్రబాబు సూచించిన నేత ప్రధాని అవుతారన్న ఆశాభావాన్ని వ్యక్తం చేశారు. కరవు నేలపై కేంద్ర వివక్ష పేరుతో అనంతపురంలో టీడీపీ నిర్వహించిన నిరసన దీక్షలో ప్రసంగించిన ఎంపీలు, మంత్రులు... బీజేపీ, వైసీపీ, జనసేనను టార్గెట్‌ చేశారు. రాయలసీమ జిల్లాలకు కేంద్ర ప్రభుత్వం చేసిన అన్యాయాన్ని నిరసిస్తూ టీడీపీ ప్రజాప్రతినిధులు అనంతపురంలో దీక్ష చేశారు. బుధవారం ఉదయం 9 గంటల నుంచి సాయంత్రం 5 గంటల వరకు ఆందోళన నిర్వహించారు. దీక్షా వేదికపై ఏర్పాటు చేసిన ఎన్టీఆర్‌ విగ్రహానికి పూలమాలలు వేసి నిరసన ప్రారంభించారు.
నిరసన దీక్షలో ప్రసంగించిన సమాచార శాఖ మంత్రి కాల్వ శ్రీనివాసులు... ప్రధాని మోదీని టార్గెట్‌ చేశారు. వచ్చే ఎన్నికల్లో రాష్ట్ర ఓటర్లు 25 మంది టీడీపీ ఎంపీలను గెలిపిస్తే... అన్ని హక్కులు సాధించుకోవచ్చన్నారు. 2019 ఎన్నికల తర్వాత కేంద్రంలో చక్రం తప్పేది చంద్రబాబేనని టీడీపీ ఎంపీలు గల్లా జయదేవ్‌, కేశినేని నాని చెప్పారు.

రాయలసీమ.. ముఖ్యంగా అనంతపురం ప్రయోజనాలను దృష్టిలో పెట్టుకుని చంద్రబాబును మరోసారి ముఖ్యమంత్రిగా చూడాల్సిన అవసరం ఉందని ఎంపీ జేసీ దివాకర్‌రెడ్డి చెప్పారు. వెనుకబడిన ప్రాంతాల అభివృద్ధికి ఇచ్చిన 350 కోట్ల రూపాయల నిధులను కేంద్ర ప్రభుత్వం వెనక్కి తీసుకోడాన్ని ఎంపీ తోట నరసింహం తప్పుపట్టారు. ముఖ్యమంత్రి చంద్రబాబు, మంత్రి లోకేశ్‌పై ఆరోపణలు చేస్తున్న జనసేన అధినేత పవన్‌ కల్యాణ్‌పై ఎంపీ నిమ్మల కిష్టప్ప మండ్డిపడ్డారు. కరువు సీమపై కేంద్ర వివక్షకు నిరసనగా టీడీపీ నిర్వహించిన నిరసన దీక్షకు పార్టీ శ్రేణులు, ప్రజలు భారీగా తరలివచ్చారు.

16:29 - July 11, 2018

హైదరాబాద్ : ఏపీ సీఎం చంద్రబాబు నాయుడు అభివృద్ధికి కృషి చేస్తుంటే భారత ప్రధాన మంత్రి నరేంద్ర మోడీ సహకరించడం లేదని టిడిపి ఎంపీ కింజారపు రామ్మోహన్‌నాయుడు పేర్కొన్నారు. వెనుకబడిన ప్రాంతాలకు కేంద్రం చేసిన అన్యాయంపై నిరసన వ్యక్తం చేస్తూ టిడిపి మంత్రులు, ఎంపీలు దీక్ష చేపట్టారు. ఈ సందర్భంగా ఆయన మాట్లాడుతూ...కేంద్రం కల్లబొల్లి మాటలు చెబుతోందని, ఈ గడ్డపై ఎంతో మంది వీరులు పుట్టారని..వారి ఉద్యమ స్పూర్తిని తీసుకొని పోరాటాన్ని ముందుకు తీసుకెళ్లాలని పేర్కొన్నారు. అభివృద్ధికి మోడీ సహకరించాలని..కానీ అలా చేయడం లేదన్నారు. కరవు జిల్లా..ఎడారిగా మారుతున్న జిల్లాలో సంకల్పం పూనుకుని కాల్వలు..చెరువులు..నీళ్లతో నింపిన ఘనత సీఎం చంద్రబాబు నాయుడికి దక్కుతుందన్నారు. అనంతపురం జిల్లాలో స్వచ్చమైన నీరు తాండవం చేస్తోందని, ఉద్యోగాలు..ఉపాధి కోసం..కడుపు మంటతో వలసలు వెళ్లిన కుటుంబాలను చూసి ఇక్కడ పరిశ్రమలు ఏర్పాటుకు కృషి చేయడం జరుగుతోందని తెలిపారు. కియో పరిశ్రమ ఏర్పాటు చేసి వలసల నివారణకు ప్రయత్నిస్తున్నామన్నారు. ఏపీ రాష్ట్రం..జాతిపై చిన్న చూపు చూస్తున్నారని తెలిపారు. 

16:48 - July 6, 2018

విశాఖ : ఏపీకి ప్రత్యేక హోదా ఇవ్వలేమని కేంద్రప్రభుత్వం సుప్రీం కోర్టులో అఫిడవిట్ వేయడాన్ని నిరసిస్తూ విశాఖలో వామపక్షాలు ఆందోళన చేశాయి. ఏపికి బీజేపీ తీవ్ర అన్యాయం చేస్తుందని..... కేంద్రం బూటకపు అఫిడవిట్‌తో కోర్టును తప్పు దోవ పట్టించడంతో పాటు ప్రజలను మోసం చేస్తుందని సిపిఎం నేతలు ఆగ్రహం వ్యక్తం చేశారు. ప్రజలు కేంద్ర ప్రభుత్వ మోసాలను గ్రహిస్తున్నారని...  ప్రజా ఆగ్రహానికి బీజేపీ మూల్యం చెల్లించక తప్పదని నేతలు హెచ్చరించారు. 

 

07:31 - June 22, 2018

విజయవాడ : ఆంధ్రప్రదేశ్‌ ప్రజలపై.. కేంద్ర ప్రభుత్వం అనుసరిస్తున్న తీరు అమానుషంగా ఉందని.. వామపక్షాల ఐక్య పోరాట సమితి అభిప్రాయపడింది. బీజేపీ నేతలు.. అవాస్తవాలు ప్రచారం చేస్తూ.. ప్రజలను వంచిస్తున్నారని సమితి నాయకులు మండిపడ్డారు. వారు చెప్పేవన్నీ అబద్ధాలేనని నిరూపిస్తామని.. బహిరంగ చర్చకు రావాలని సవాల్‌ విసిరారు. కడప ఉక్కు ఫ్యాక్టరీ సాధన దిశగా.. విజయవాడలో ప్రత్యేక హోదా సాధన సమితి ఆధ్వర్యంలో రౌండ్‌టేబుల్‌ సమావేశం నిర్వహించారు. సమితి కన్వీనర్‌ చలసాని శ్రీనివాస్‌ అధ్యక్షతన సాగిన ఈ సమావేశానికి, సీపీఎం, సీపీఐ, జనసేన, వైసీపీ, కాంగ్రెస్‌ నాయకులతో పాటు.. వివిధ ప్రజాసంఘాల ప్రతినిధులు హాజరయ్యారు. ఏపీ ప్రజల పట్ల కేంద్ర ప్రభుత్వ వైఖరిని రౌండ్‌ టేబుల్‌ సమావేశం తప్పుబట్టింది. బీజేపీ నాయకులందరూ.. విభజన హామీల గురించి అవాస్తవాలు ప్రచారం చేస్తున్నారని సమావేశంలో పాల్గొన్న నేతలు మండిపడ్డారు. దీనిపై బహిరంగ చర్చకు రావాలని బీజేపీ నాయకులకు సవాల్‌ విసిరారు.

ఉక్కు ఫ్యాక్టరీ సాధన కోసం.. ఈనెల 29న కడప జిల్లా బంద్‌కు సంపూర్ణ మద్దతునివ్వాలని వామపక్షాల ఐక్యపోరాట సమితి నిర్ణయించింది. దీంతోపాటే.. అన్ని జిల్లాల్లోనూ నిరసన ర్యాలీలు, ధర్నాలు చేపట్టాలని నిర్ణయించింది. విశాఖ ఉక్కు ఫ్యాక్టరీ కోసం సాగిన తరహాలోనే ఉద్యమాలు నిర్మించి.. ప్రభుత్వాల మెడలు వంచాలని సమితి తీర్మానించింది. రాజకీయ వైరుధ్యాలను ప్రజలపై రుద్దొద్దని సమావేశంలో వక్తలు కేంద్రానికి హితవు పలికారు. కడప ఉక్కు ఫ్యాక్టరీ అంశంపై.. టీడీపీ నాయకులు రాజకీయంగా అనుకూలంగా మలచుకునేందుకే ఇప్పుడు హడావుడి చేస్తున్నారని, సమావేశానికి హాజరైన నేతలు విమర్శించారు. ఫ్యాక్టరీ సాధన కోసం ఉద్యమాన్ని మరింత ఉదృతం చేసేందుకు విపక్ష పార్టీలన్నీ ఒకే తాటిపైకి రావాలని అభిప్రాయపడ్డారు.

06:54 - June 22, 2018

శ్రీకాకుళం : చంద్రబాబు చెప్పేవన్నీ అవాస్తవాలని బీజేపీ రాష్ట్ర అధ్యక్షుడు కన్నా లక్ష్మీనారాయణ అన్నారు. బాబుకు చిత్తశుద్ది ఉంటే అగ్రిగోల్డ్ బాధితులకు న్యాయం చేయాలని డిమాండ్ చేశారు. సీఎం చంద్రబాబు నీచమైన రాజకీయాలు చేస్తున్నారని కన్నా మండిపడ్డారు. టీడీపీ పాలనలో అవినీతి ఎక్కువగా జరుగుతుందని మండిపడ్డారు. కడప స్టీల్‌ ప్లాంట్‌ విషయంలో ప్రాణత్యాగం అవసరం లేదని కేంద్రం ఇచ్చిన హామీలపై చిత్తశుద్ది ఉందని కన్నా తెలిపారు.--

11:21 - June 17, 2018

ఢిల్లీ : రాష్ట్రపతి భవన్ లో ప్రధాన మంత్రి నరేంద్ర మోడీ అధ్యక్షతన నీతి ఆయోగ్ సమావేశం ప్రారంభమైంది. ఏజెండా ప్రకారం సమావేశంలో చర్చ జరుగుతోంది. తెలుగు రాష్ట్రాల ముఖ్యమంత్రులు కేసీఆర్..చంద్రబాబు నాయుడులు ఈ సమావేశానికి హాజరయ్యారు. రాష్ట్రాలకు సంబంధించిన సమస్యలను ప్రస్తావించే అవకాశం ఉంది. ఈ సందర్భంగా ఏపీ నేతలు మీడియాతో మాట్లాడారు.

యనమల అసంతృప్తి...
నీతి ఆయోగ్ సమావేశంపై ఏపీ ఆర్థిక మంత్రి యనమల అసంతృప్తి వ్యక్తం చేశారు. సొంత ఇష్యూలతో కూడిన ఏజెండాను కేంద్రం ఫిక్స్ చేసిందని కలుగుతోందన్నారు. దేశానికి..రాష్ట్రాలకు సంబంధించిన సమస్యలు..కేంద్ర ప్రభుత్వ పథకాలు ఎలా అమలవుతున్నాయి...తదితర వాటిపై చర్చించాలన్నారు. కానీ తాము పెట్టిన ఏజెండాపైనే చర్చించాలని చెప్పడం అప్రజాస్వామికమని తెలిపారు. ప్రాంతీయ పార్టీలను నిర్లక్ష్యం చేస్తున్నారని అనుమానం కలుగుతోందన్నారు.

పరిష్కార మార్గాలను అన్వేషించాలి - ఎంపీ జేసీ...
పరిష్కార మార్గాలను అన్వేషించించడం ప్రధాన కర్తవ్యమని ఎంపీ జేసీ దివాకర్ రెడ్డి తెలిపారు. నీతి..నిజాయితి..రాజ్యాంగాన్ని ప్రధాన మంత్రి నరేంద్ర మోడీ మరిచిపోయారని..ఇలా చేయడం దురదృష్టకరమన్నారు. సీఎం కేజ్రీవాల్ ను కలుసుకొనేందుకు అపాయింట్ కావాలని లెఫ్టినెంట్ గవర్నర్ ను నలుగురు ముఖ్యమంత్రులు కోరినా..కలవాలని ప్రయత్నించి విఫలం చెందారని...ఇక్కడ ప్రజాస్వామ్యం ఉందా ? అని ప్రశ్నించారు.

దీక్ష చేస్తా - సీఎం రమేష్...
కడప స్టీల్ ప్లాంట్ కోసం తాను ఆమరన నిరహార దీక్షకు పూనుకుంటున్నట్లు ఎంపీ సీఎం రమేష్ వెల్లడించారు. 16-17వ తేదీల్లో ప్రధాని అపాయింట్ ఇస్తామని చెప్పారని..కానీ ఇంతవరకు ఇవ్వలేదన్నారు. కడప స్టీల్ ప్లాంట్ కోసం తాను లేఖ రాయడం జరిగిందని..మెయిల్ కూడా పంపించడం జరిగిందన్నారు. ఆయన సమయం ఇవ్వడం లేకపోవడాన్ని నిరసిస్తూ బుధవారం నుండి ఆమరణ నిరహార దీక్షకు కూర్చొంటానని ప్రకటించారు. కేంద్రంపై వత్తిడి తెచ్చేందుకు దీక్ష చేయనున్నట్లు వెల్లడించారు. 

Pages

Don't Miss

Subscribe to RSS - ప్రత్యేక హోదా