ప్రభుత్వాలు

20:37 - April 19, 2017

హైదరాబాద్: ఎండలు మండుతున్నాయ్ ఈ మాట ఇప్పటికి ఎన్నిసార్లు అని వుంటారు... ఎన్ని సార్లు విని వుంటారు. అవును మామూలుగా కాదు మధ్యాహ్నాం రోడ్ల పైకి వెళితే నిప్పుల కొలిమిలో మొహం పెట్టినట్లు, అగ్ని వర్షం కురుస్తున్నట్లు గా అనిపించడం లేదు. ఇంతా రొటీన్ సమ్మర్ ఎఫెక్ట్ ఖచ్చితంగా కాదు. నాగరికంగా మారుతున్న మానవరహిత సమాజ స్వయం కృతాపరాధం అంటే సందేహం అనవసరం. మరి ఏప్రిల్ లోనే ఇలా వుంటే! మే పరిస్థితి ఏంటి? ఇదే నేటి వైడాంగిల్ స్టోరి. పూర్తి వివరాల కోసం ఈ వీడియోను క్లిక్ చేయండి..

21:53 - March 16, 2017

హైదరాబాద్ : జర్నలిస్టులకు... ప్రభుత్వాలకు భిన్నాభిప్రాయాలు ఉన్నప్పుడే  దేశానికి మంచిదని జస్టిస్‌ సీకే ప్రసాద్‌ అన్నారు. టీయూడబ్ల్యుజే, హైదరాబాద్ ప్రెస్ క్లబ్, వెటరన్‌ జర్నలిస్ట్‌ అసోసియేషన్‌, మీడియా ఎడ్యుకేషన్‌ ఫాందటిన్‌ ఆఫ్‌ ఇండియా ఆధ్వర్యంలో  సమకాలీన జర్నలిజం-విలువలు అనే అంశంపై  జాతీయ సదస్సు జరిగింది. జర్నలిస్ట్‌ వృత్తి పట్ల తనకు ఎంతో గౌరవం ఉందని జస్టీస్‌ సీకే ప్రసాద్‌ అన్నారు. జర్నలిస్ట్‌ల పేరుతో బ్లాక్‌మెయిలింగ్‌లకు దిగుతున్నవారిని మీడియా నుంచి బయటకు పంపాలని.. వార్తల నియంత్రణ ఎడిటర్‌ల చేతిలో ఉండాలని ఆయన సూచించారు.

 

18:45 - February 20, 2017

గుంటూరు : సత్యం అంటే నిజం.. ఆగ్రహం అంటే కోపం. సత్యాగ్రహం అంటే నిజంతాలూకూ కోపం అని జనసేన అధినేత పవన్ కల్యాన్ తెలిపారు. చేనేత సత్యాగ్రహ దీక్షలో పాల్గొన్న నేతలకు నిమ్మరసం ఇచ్చి వారి దీక్షను విరమింపచేశారు. అనంతరం ఏర్పాటు చేసిన బహిరంగ సభలో ఆయన మాట్లాడుతూ.... చేనేత కార్మికులను గౌరవించడం అంటే బట్టను గౌరవించడం కాదని, దేశ సంస్కృతి, సంప్రదాయమని ఆయన చెప్పారు. నేను చేనేతకు అంబాసిడర్ గా ఉంటానంటే కొందరు నన్ను కించపరిచారు. తాను పలు సంస్ధలు, వస్తువులకు కమర్షియల్ బ్రాండింగ్ చేస్తే కోట్ల రూపాయలు తన అకౌంట్ లోకి వస్తాయని అన్నారు. కానీ తనకు కోట్లు అక్కర్లేదని, అందులో ఆనందం లేదని ఆయన పేర్కొన్నారు. చేతి వృత్తులు ఆధారపడిన మన సంప్రదాయాన్ని ముందుకు తీసుకెళ్లాలంటే చేనేతను ప్రోత్సహించాలని ఆయన చెప్పారు.

హామీలపై మోనటరింగ్ కమిటీ ఏర్పాటు చేయాలి...

పవర్ ల్యూమ్ పేరుతో చట్టాలను ఖూనీ చేస్తుంటే ప్రభుత్వాలు ఎందుకు మౌనం వహిస్తున్నాయని ప్రశ్నించారు. ఏపీ, తెలంగాణ ప్రభుత్వాలు చేనేతకు అండగా ఉంటామని చెప్పారని, అయితే ఇల్లు అలకగానే పండగ కాదని ఆయన గుర్తు చేశారు. హామీ ఇవ్వగానే పని పూర్తికాదని, దానిని పూర్తి చేయాల్సిన బాధ్యత ప్రభుత్వంపై ఉందని ఆయన అన్నారు. రాజకీయనాయకులిచ్చిన హామీలపై మోనటరింగ్ కమిటీ ఏర్పాటు చేయాలని ఆయన సూచించారు. ఈ సంఘాలు నిష్పాక్షికంగా ప్రభుత్వాలు తమకు ఏం చేశాయో చెప్పాలని సూచించారు. చీర నేసే కష్టాన్ని తాను ఇప్పుడే చూశానని, అద్భుతమైన ప్రతిభ దాగి ఉన్న చేనేతను ప్రోత్సహించాలని ఆయన చెప్పారు. ఈ మేరకు నగదు బహుమతులు ప్రకటించాలని ఆయన డిమాండ్ చేశారు.

బలహీనుల, చేనేతల గొంతుకలను అసెంబ్లీలో వినిపించేలా..

రాజకీయాల్లోకి అధికారం ఆసించి రాలేదు.. సోషల్ ట్రాన్స్ఫార్మర్ ఆశించి వచ్చాను. ప్రజల కష్టాలను తీర్చడానికే రాజకీయాల్లోకి వచ్చాను. 2019లో ఖచ్చితంగా పోటీ చేస్తా. బలహీనుల, చేనేతల గొంతుకలను అసెంబ్లీలో వినిపించేలా జనసేన పార్టీ అండగా ఉంటుందని తెలిపారు. ఒక రోజు అందరూ చేనేతను కట్టాలి. అన్నంపెట్టే రైతు, బట్టను ఇచ్చే చేనేతలు కన్నీళ్లు పెడితే దేశం సుభిక్షంగా ఉండదు. అందుకే వారికి అండగా ఉంటా. చేనేత కార్మికులకు ఆధునికనైపుణ్యం అందించాలి.

దమ్మున్న నాయకులకోసం ఎదురుచూస్తున్నా...

జనసేన పార్టీ స్థాపించి 3వ సంవత్సరంలోకి అడుగుపెట్టింది. కార్యకర్తలు ఉన్నారు... కానీ నాయకులు లేరు. చిత్తశుద్ధి కలిగిన నేతలు కావాలి. దమ్మున్న నాయకులు, ప్రజాసమస్యలపై పోరాడే నాయకులు కావాలి. అలాంటి వారి కోసం ఎదురు చూస్తున్నాను. చేనేత కార్మికులనుండి ఓ నేతను జనసేన పార్టీకి పంపండి అని అడుగున్నారు. వారసత్వ నాయకత్వం మీద వ్యతిరేకత లేదు. పోరాట పటిమ, నిస్వార్థంగా ఉన్న నాయకుల కోసం ఎదురు చూస్తున్నా. ప్రతి కూల పరిస్థితుల్లో వాళ్ల నైజం ఏంతో తెలుస్తుందన్నారు. జనసేన పార్టీ వెబ్ సైట్ ప్రారంభించబోతున్నాను. ఆ సైట్ లో అనేక అంశాలు, సమస్యలు తెలియజేయాలని తెలిపారు. రాజకీయనాయకుల తల్లులు తల్లులేనా? చేనేత కార్మికుల తల్లులు తల్లులు కాదా? అని ప్రశ్నించారు.

తప్పు చేస్తే నా సొంతపార్టీ నేతలనైనా ప్రశ్నిస్తా-పవన్‌

కొద్దిపాటి ఉండేలు దెబ్బలకే పారిపోయే వాళ్లు కాదు కావాల్సింది... యుద్ధట్యాంకులు ఎదురైనా.. వెన్నుచూపని వీరులు జనసేనకు కావాలన్నారు పవన్‌ కళ్యాణ్‌. ప్రజాసమస్యలపై అలుపెరుగని పోరాటం చేసేందుకు జనసేనతో కలిసి రావాలని యూత్‌కు పిలుపునిచ్చారు జనసేనాని.

హోదా ఎందుకు ఇవ్వలేకపోతున్నారు- పవన్‌

చేనేతల సత్యాగ్రహ వేదిక నుంచే.. ప్రత్యేక హోదా గురించి పవన్‌ మళ్లీ ప్రశ్నించారు. హోదా ఎందుకు ఇవ్వలేకపోతున్నారో చెప్పాలని కేంద్రాన్ని డిమాండ్ చేశారు.. ఎన్నికలకు ముందు హోదా ఇస్తామని హామీ ఇచ్చారని... అధికారంలోకి వచ్చాక ప్యాకేజీ అన్నారని గుర్తుచేశారు.. ఇచ్చిన ఆ ప్యాకేజీకి చట్టబద్దత కల్పిస్తామన్నారని... మళ్లీ అవసరం లేదని మాట మార్చారని విమర్శించారు.. ఎందుకిలా రోజుకోమాట మాట్లాడుతున్నారని నిలదీశారు..

మాకు ఒక్కరు ఓటేసినా, కోట్లమంది ఓటేసినా..

తనకు ఒక్కరు ఓటేసినా... కోట్లమంది ఓటేసినా.. ప్రజల పక్షాన్నే పోరాడతానని... పవన్‌ స్పష్టం చేశారు. రాజకీయాలనే మురికి కాలువలోకి దిగొద్దని సన్నిహితులు, కుటుంబసభ్యులు హెచ్చరించారని చెప్పారు. ప్రజాధనాన్ని సంరక్షించేవాళ్లే నేతలని... భక్షించేవాళ్లు కాదన్నారు. భక్షించే నేతలపై పోరాటం చేస్తామని... వారిపైనే పోటీ చేస్తామని ప్రకటించారు..

చేనేత వృత్తి కళ-పవన్‌ కళ్యాణ్‌....

నేతన్నల్ని బతికించుకునేందుకు వారంలో ఒక్కరోజైనా చేనేత వస్త్రాలు ధరించాలని పవన్‌ తన అభిమానుల్ని కోరారు. చేనేతలకు నగదు ప్రోత్సాహకాలు ఇచ్చి ఆదుకోవాలని ప్రభుత్వాన్ని డిమాండ్ చేశారు.. చేనేతలకు ఆఖరి శ్వాస వరకు అండగా ఉంటామని ప్రకటించారు.. వారితోపాటే, స్వర్ణకారుల సంక్షేమానికీ తాను కట్టుబడి ఉన్నానని పవన్‌కల్యాణ్‌ వెల్లడించారు.

13:37 - February 14, 2017

హైదరాబాద్: 2012లో ఢిల్లీలో దారుణ అత్యాచారానికి గురైన నిర్భయ జ్ఞాపకార్థం దేశంలోని మహిళల భద్రత కోసం స్వచ్ఛంద సంస్థలు చేపట్టే కార్యక్రమాల కోసం నిర్భయ నిధి ప్రభుత్వం ఏర్పాటు చేసింది. ఇది ప్రతి సంవత్సరం లాగానే 2015-16 సంవత్సరానికి గాను నిర్భయ కు కేటాయించిన నిధుల్లో పైసా కూడా ఖర్చు చేయలేదు. దీనికి గల కారణాలు ఏమిటి? ఇదే అంశంపై 'వేదిక'లో ప్రత్యేక చర్చను చేపట్టింది. ఈ చర్చలో సామాజిక కార్యకర్త దేవి, మహిళా కాంగ్రెస్ నేత కీర్తి పాల్గొన్నారు. వారు ఏఏ అంశాలను ప్రస్తావించారో చూడాలనుకుంటే ఈ వీడియోను క్లిక్ చేయండి..

18:12 - February 4, 2017

హైదరాబాద్ : నీళ్ల కోసం ఆడవాళ్లే కాదు... ప్రభుత్వాలు కూడా గొడవలు పడుతున్నాయి. మాకే ఇవ్వాలంటూ ఎవరికీ వారు పోటీ పడుతున్నారు. లేఖలు మీద లేఖలు రాసి నీళ్లు దక్కించుకోవాలని చూస్తున్నాయి. అదనపు నీటి కేటాయింపులు కోసం పట్టుబడుతున్నాయి.
కృష్ణా నీళ్లు కోసం పోటీ పడుతున్న ఏపీ, తెలంగాణ
కృష్ణా బేసిన్‌లో ఇప్పటి వరకు కేటాయించిన నీళ్లు పోగా మిగిలినవన్నీ తమవేనంటూ ఏపీ, తెలంగాణ రాష్ట్ర ప్రభుత్వాలు పట్టుబడుతున్నాయి. దీనికోసం రెండు ప్రభుత్వాలు పోటీ పడుతున్నాయి. ఏపీ కేటాయింపునకు మించి వాడుకుందని తెలంగాణ, ఇప్పటికే తెలంగాణ వాటా పూర్తయిందని ఏపీ కృష్ణా బోర్డుకు లేఖలు కూడా పంపించాయి.
నీటిని ఏపీ అదనంగా వాడుకుందన్న తెలంగాణ
రబీ, తాగునీటి అవసరాలకు 25 టీఎంసీలు కేటాయించాలని తెలంగాణ రాష్ట్ర ఇంజనీర్‌ మూడు రోజుల కిందట కృష్ణా నది యాజమాన్య బోర్డుకు లేఖ రాశారు. అలాగే కేటాయించిన దానికంటే ఏపీ 25 టీఎంసీలు నీటిని ఎక్కువగా వాడుకుందని...లేఖలో పేర్కొన్నారు. అలాగే ఇప్పటికే కేటాయించి వినియోగించుకోని నీటిని ఇవ్వడంతోపాటు అదనంగా 16 టీఎంసీలు కేటాయించాలని ఆంధ్రప్రదేశ్‌ ఇంజనీర్‌ కూడా బోర్డుకు లేఖ రాశారు.
అదనంగా నీళ్లు కేటాయించాలని ఏపీ లేఖ
గుంటూరు, ప్రకాశం జిల్లాలో పంటలను కాపాడటానికి మూడో తడి నీటిని ఇవ్వాల్సి ఉందని, దీనికోసం కుడి కాలువకు 12 టీఎంసీలు కేటాయించాలని ఏపీ ఓ లేఖలో... సాగర్ ఎడమ కాలువ కింద ఆంధ్రప్రదేశ్‌లోని రెండు, మూడో జోన్‌ ఆయకట్టు కోసం 1.76 టీఎంసీలు మాత్రమే ఇచ్చారని మిగిలిన నీటితో పాటు అదనంగా నాలుగు టీఎంసీలు విడుదల చేయాలని మరో లేఖలో పేర్కొంది. తెలంగాణ ఇప్పటికే 4.34 టీఎంసీలు అదనంగా వాడుకుందని.. ఆ రాష్ట్రానికి ఇంకేమీ విడుదల చేయాల్సిన అవసరం లేదని లేఖలో పేర్కొన్నారు. ఈ మేరకు సమస్యను పరిష్కరించడానికి 8వ తేదీన కృష్ణా నదీ యాజమాన్య బోర్డు ప్రత్యేక సమావేశాన్ని ఏర్పాటు చేసింది.

 

17:28 - January 29, 2017

హైదరాబాద్ : స్మార్ట్ సిటీస్ పేరిట కొన్ని ప్రాంతాలను..పట్టణాలను ప్రైవేటు కంపెనీలకు కట్టబెడుతున్నారని తెలంగాణ అర్బన్ డెవలప్ మెంట్ ఫోరం కన్వీనర్ డీజీ నర్సింహరావు విమర్శించారు. పట్టణాల అభివృద్ధిపై ప్రభుత్వాల దగ్గర సమగ్ర ప్రణాళిక లేదన్నారు. ప్రభుత్వం - పట్టణాల అభివృద్ధి - పౌరుల పాత్ర అనే అంశంపై సుందరయ్య విజ్ఞాన కేంద్రంలో సదస్సు జరిగింది. పట్టణ ప్రజలకు మెరుగైన తాగునీటి, రవాణా సౌకర్యాలు కల్పించాలని డిమాండ్ చేశారు. పట్టణాల సమగ్రాభివృద్ధికి సమగ్ర ప్రణాళికలు రూపొందించి వాటి అమలుకు పోరాటం చేస్తామన్నారు. నగర పాలక సంస్థ విధులను విస్మరిస్తోందని, రాష్ట్ర ప్రభుత్వం ప్రజలకు మౌళిక వసతులు కల్పిలంచడం లేదని ప్రొ.రామచంద్రయ్య ఆగ్రహం వ్యక్తం చేశారు.

08:30 - January 28, 2017

ఏపీ, తెలంగాణ రాష్ట్రాల్లో ప్రజాస్వామ్యం పరాకాష్టకు చేరిందని వక్తలు అన్నారు. న్యూస్ మార్నింగ్ చర్చా కార్యక్రమంలో సామాజిక విశ్లేషకులు ఎస్.వినయ్ కుమార్, వైసీపీ అధికార ప్రతినిధి కరణం ధర్మశ్రీ, ఏపీ టీడీపీ అధికార ప్రతినిధి దినకర్, బీజేపీ నేత రఘునాథ్ బాబు పాల్గొని, మాట్లాడారు. ప్రభుత్వాలు ప్రజా ఉద్యమాలపై నిర్బంధాన్ని ప్రయోగిస్తున్నారని విమర్శించారు. విఫక్షాలు ఏమైన కార్యక్రమాలు తలపెడితే ప్రభుత్వం ముందస్తుగానే నేతలను అరెస్టు చేస్తుందని తెలిపారు. ఇదెక్కడి ప్రజాస్వామ్యమని ఆవేదన వ్యక్తం చేశారు. ప్రజాస్వామ్యం పరాకాష్టకు చేరిందన్నారు. ఏపీలో రాబోయే ఎన్నికలపై ప్రత్యేకహోదా అంశం ప్రభావం చూపుతుందని తెలిపారు. మరిన్ని వివరాలను వీడియోలో చూద్దాం...

 

13:18 - January 12, 2017

హైదరాబాద్ : తెలుగు రాష్ట్రాల పాలకులు.. ప్రాజెక్టుల పేరిట భూములను బలవంతంగా లాగేసుకుంటున్నాయి. మల్లన్నసాగర్‌ నుంచి నిమ్జ్‌వరకు,  భోగాపురం నుంచి బందరు పోర్టు వరకు.. రైతుల పొట్టకొడుతూ వారి ఇళ్లూ, ఊళ్లూ ఖాళీ చేయిస్తున్నాయి.  రోడ్డున పడ్డ రైతుల వేదన అరణ్య రోదనే అవుతోంది. ప్రత్యేక ఆర్థికమండళ్లు, ఇరిగేషన్‌ ప్రాజెక్టులు, అభివృద్ధి కార్యక్రమాలు.. ఇలా పేరేదైనా.. అన్నదాతలే నిర్వాసితులవుతున్నారు. 
కేసీఆర్‌ సర్కారు మొండి వైఖరి..
ప్రాజెక్టులకు భూసేకరణ విషయంలో తెలంగాణ ప్రభుత్వం తాను అనుకున్న పంథాలోనే ముందుకు సాగుతోంది. మల్లన్నసాగర్‌ కానీ, నిమ్జ్‌ కానీ ప్రాజెక్టు ఏదైనా రైతుల భూములను బలవంతంగా లాక్కుంటోంది. సిద్ధిపేట జిల్లాలో చేపట్టిన మల్లన్నసాగర్‌ ప్రాజెక్టుకు భూసేకరణ చేస్తున్న తీరుపై సాగునీటి నిపుణులు, ప్రతిపక్షాలు ఆక్షేపణ చెబుతున్నాయి. అయితే ప్రభుత్వం మాత్రం.. ఏదో ఓ రకంగా రైతుల భూములను లాక్కోవాలని చూస్తోంది. మల్లన్నసాగర్‌ ప్రాజెక్టు కోసం 14 గ్రామాలకు చెందిన 16వేల ఎకరాలను సమీకరించాలని నిర్ణయించింది. అయితే 2013 భూసేకరణ చట్టం ప్రకారం కాకుండా, జీవో ద్వారా భూములు లాక్కోవాలని చూసింది కేసీఆర్‌ సర్కారు. నిర్వాసితులు ఏకమై  హైకోర్టు గడప తొక్కారు. కేసు విచారించిన న్యాయస్థానం.. 2013 భూసేకరణ చట్టం ప్రకారమే భూసేకరణ చేపట్టాలని తెలంగాణ సర్కార్‌కు మొట్టికాయలు వేసింది. దీంతో కాస్త వెనక్కి తగ్గినట్లే తగ్గి.. ఇప్పుడు తన ఆలోచనలకు చట్టరూపాన్నిచ్చే ప్రయత్నం చేస్తోంది కేసీఆర్‌ సర్కారు. 
2013 చట్టాన్ని అమలు చేయాలి : భూ నిర్వాసితులు 
భూసేకరణ చట్టానికి చేసిన సవరణలను ఉపసంహరించుకుని... 2013 చట్టాన్ని అమలు చేయాలని భూ నిర్వాసితులు కోరుతున్నారు. వేములఘాట్‌ వంటి గ్రామాల్లో భూసేకరణకు వ్యతిరేకంగా గత  220 రోజులుగా ఇంకా  రైతుల దీక్షలు కొనసాగిస్తూనే ఉన్నారు. ఇక సంగారెడ్డి జిల్లాలో నేషనల్‌ ఇన్వెస్టిమెంట్‌ మాన్యూఫాక్చరింగ్‌ జోన్‌ పేరిట వేల ఎకరాల భూసేకరణ యధేచ్చగా సాగుతోంది. రైతుల భూములను ప్రభుత్వం బలవంతంగా తీసుకునేందుకు ప్రయత్నిస్తోంది. స్థానికులు ప్రభుత్వానికి వ్యతిరేకంగా ఆందోళనబాట పట్టారు.  వారిని పోలీస్‌లతో బెదిరిస్తూ భూములను లాక్కునేందుకే ప్రభుత్వం డిసైడ్‌ అయ్యింది. ఇక్కడ మార్కెట్‌ రేటుకు.. ప్రభుత్వం ఇచ్చిన ధరకు మధ్య సుమారు పదహారు వందల కోట్ల రూపాయల మేర అంతరం ఉంది. అంటే ఆమేరకు రైతులు, స్థానికులు నష్టపోయారని భూనిర్వాసితుల సంఘాలు చెబుతున్నాయి. 
ఏపీలోనూ బలవంతపు భూసేకరణ
అటు ఆంధ్రప్రదేశ్‌ రాష్ట్రంలోనూ ప్రభుత్వం రైతుల నుంచి బలవంతపు భూసేకరణకు పాల్పడుతోంది. విజయనగరం జిల్లా భోగాపురం ప్రాంతంలో విమానాశ్రయం కోసం 5వేల ఎకరాలను సేకరించాలని ప్రభుత్వం నిర్ణయించింది. విమానాశ్రయం పేరుతో పెద్దపెద్ద సంపన్నులకు తమ భూములు అప్పగించేందుకు ప్రభుత్వం పూనుకుంటోందని స్థానికులు ఆరోపిస్తున్నారు.  ప్రభుత్వం నిర్వహించిన ప్రజాభిప్రాయ సేకరణను  సైతం స్థానికులు అడ్డుకున్నారు. తమ భూములు ఎట్టి పరిస్థితుల్లో ఇచ్చేది లేదని తేల్చి చెబుతున్నారు. బందరు పోర్టుకు భూసేకరణ అంశమూ వివాదాస్పందంగానే ఉంది. ఇలా ప్రభుత్వాలు బలవంతపు భూసేకరణకు దిగుతుండడంతో రైతుల్లో ఆందోళన నెలకొంది. 

 

21:10 - October 20, 2016

భూములు కొల్లగొట్టడమే లక్ష్యం.. ఎకరాల్లెక్కన కబళించటమే టార్గెట్. సామాన్యుల బతుకులను చిదిమి బడాబాబుల బొక్కసాలు నింపటమే తమ ధ్యేయమంటోంది. ఓ పద్ధతి లేదు.. ఓ పరిహారం లేదు. అధికారం ఉంది కదా అని.. పోలీసులు చేతిలో ఉన్నారు కదా అని.. బల ప్రయోగంతో.. ప్రజలను చెదరగొట్టి, బెదరగొట్టి భూములనుండి వెళ్లగొట్టి.. గ్రామాలను ఖాళీచేసే కుట్రలు అడుగడుగునా సాగుతున్నాయి. ఏపీలో అనేక జిల్లాల్లో ఇదే తంతు స్పష్టంగా కనిపిస్తోంది. దీనిపై ప్రజలు భగ్గుమంటున్నారు. పోరాటమార్గం తప్పదంటున్నారు.. ఏ పాపం చేశారు వాళ్లు.. ఏ నేరం చేశారు వాళ్లు.. భూములు ఎందుకు పోగొట్టుకోవాలి? జీవితాల్ని ఎందుకు పణంగా పెట్టాలి? తమ బతుకుల్ని ఎందుకు కోల్పోవాలి.. సరైన జీవనోపాధిని చూపకుండా, పరిహారాన్ని ఇవ్వకుండా సర్కారు భూముల్ని గుంజుకోవాలని చూసే ప్రయత్నాలు అడుగడుగునా వివాదాస్పదమౌతున్నాయి. భూమితో బతుకుల్ని అల్లుకున్న దేశంలో సర్కారు కర్కశంగా వ్యవహరిస్తోందనే విమర్శలు వినిపిస్తున్నాయి. ఎక్కడ పరిశ్రమ నెలకొల్పాలన్నా సామాన్యుల భూములే కావాలా? ప్రజల జీవితాలనే పణంగా పెట్టాలా? మరో మార్గం లేదా? ఇంతా చేసి సర్కారు సాధిస్తున్నదేంటి? ఓ పక్క అనంతపురం జిల్లా ఎన్పీకుంట లో, మరో పక్క కాకినాడ దివీస్ గ్రామాల్లో ఈ రోజు అరెస్టుల పర్వం.. నిరసనల అణచివేత యధేచ్చగా సాగింది. ప్రజలకు అన్యాయం చేయటంలో సర్కారు యమాజోరుగా ముందుకు సాగుతోందనే విమర్శలు వినిపిస్తున్నాయి. ఆ గ్రామాల్లో అడుగడుగునా పోలీసు బూట్ల చప్పుళ్లే.. ఎక్కడ చూసినా తనిఖీలే.. నిర్భందపు ఆనవాళ్లే.. వణిపోతున్న ప్రజల ఎక్కడ చూసినా కనిపిస్తారు.. బాధితులనే నేరస్తులుగా చిత్రిస్తున్న క్రూరత్వం అక్కడ కనిపిస్తుంది. ఏ పాపం చేశారు వాళ్లు? ఏ నేరం చేశారు వాళ్లు? ఓ పరిశ్రమ వస్తుంటే గుండె ఝల్లుమనే పరిస్థితి. ఓ ఎయిర్ పోర్ట్ వస్తుందంటే గ్రామాలు వణికిపోయే సమయం. ఒకటా రెండా.. ఏపీలో ఎక్కడ చూసినా భూముల వివాదాలే.. వేలకు వేల ఎకరాలు సామాన్యుల నుండి గుంజుకునే ప్రయత్నాలే. అభివృద్ధి పేరు చెప్పి.. సామాన్యుల బతుకులను చిదిమేసే యత్నాలే. పోనీ భూములకు తగిన పరిహారం ఇస్తారా అంటే.. కారుచవకగా కొట్టేసి రోడ్డున పడేసే ప్రయత్నాలు తప్ప మరొకటి కనిపించదు. ఎన్ని వెతలు.. ఎన్ని కన్నీళ్లు.. ఎన్ని పోరాటాలు... ఓ పరిశ్రమ వస్తుంటే గుండె ఝల్లుమనే పరిస్థితి. ఓ ఎయిర్ పోర్ట్ వస్తుందంటే గ్రామాలు వణికిపోయే సమయం. లక్షలాది ప్రజల బతుకులను ప్రశ్నార్ధకం చేస్తూ సర్కారు చేస్తున్న భూముల పందేరంలో సామాన్యులు బలవుతున్నారు. జీవనాధారాన్ని కోల్పోయి రోడ్డున పడుతున్నారు..అభివృద్ధి అంటే ప్రజా సంక్షేమం.. అంతే కానీ, నున్నటి రోడ్ల మెరుపులు.. ఆకాశ హర్మ్యాలు.. పారిశ్రామిక కారిడార్లు, వేలకు వేల ఎకరాల సెజ్ లు కాదు. భూమంటే బతుకైన దేశంలో ప్రభుత్వాలు ఎంలత బాధ్యతగా వ్యవహరించాలి. కానీ ఇక్కడ అడుగడుగునా నిర్లక్ష్యం... కర్కశత్వం కనిపిస్తోంది. ప్రజల బతుకులేమైనా తమ పబ్బం గడుపుకునే విధంగా సర్కారు తీరు కనిపిస్తోంది. 

08:52 - September 22, 2016

మనకు ఎవరైనా ఏదైనా శుభవార్త చెబితే వెంటనే నోరు తీపి చేసుకుంటాం. పంచదార, బెల్లం మనకు నిత్యావసరం. కానీ, వీటిని మనకు అందించే చెరకు రైతులకు తీపి వార్తలు లేకుండా పోతున్నాయి. 
చక్కెర ఉత్పత్తిలో భారత్ రెండో స్థానం 
ప్రపంచవ్యాప్తంగా చక్కెర ఉత్పత్తిలో మన దేశానిది రెండో స్థానం. బ్రెజిల్ 22శాతం చక్కెర ఉత్పత్తి చేస్తుంటే, 14 శాతం మన దేశంలో ఉత్పత్తి అవుతోంది. మన దేశంలో 500కి పైగా ఉన్న షుగర్ ఫ్యాక్టరీలలో దాదాపు మూడు లక్షల మంది పనిచేస్తున్నారు.  సుమారు 50 లక్షల ఎకరాల్లో చెరకు సాగవుతుండగా దాదాపు రెండున్నర కోట్ల మంది జీవనోపాధి పొందుతున్నారు. మన దేశంలో పత్తి తర్వాత ఎక్కువ మందికి ఉపాధి చూపిస్తున్న రంగమిది.  గ్రామీణ ఆర్థిక వ్యవస్థలో కీలకపాత్ర పోషిస్తున్న చెరకు సాగును, చక్కెర పరిశ్రమను  ఏమాత్రం అలక్ష్యం చేయడానికి వీలులేదు.  
గ్రామీణ ప్రాంతాలకు చేరువలో చక్కెర పరిశ్రమ 
మన దేశంలో పారిశ్రామికాభివృద్ధి ఎక్కువ భాగం  పెద్దపెద్ద నగరాలకే పరిమితమైతే, చక్కెర పరిశ్రమ గ్రామీణ ప్రాంతాలకు చేరువలో వుండడం విశేషం. తెలంగాణ, ఆంధ్రప్రదేశ్ తో పాటు మహారాష్ట్ర, ఉత్తరప్రదేశ్, గుజరాత్, హర్యానా, పంజాబ్, బీహార్, కర్నాటక రాష్ట్రాల్లో చెరకు విస్తారంగా సాగవుతోంది. ఒకప్పుడు చక్కెర ఉత్పత్తిలో ఉత్తరప్రదేశ్ ప్రథమ స్థానంలో వుండగా, ఇప్పుడు మహారాష్ట్ర ఆ స్థానాన్ని ఆక్రమించింది.
క్రమంగా పెరుగుతోన్న చక్కెర వినియోగం 
మన దేశంలో చక్కెర వినియోగం క్రమంగా పెరుగుతోంది. ప్రస్తుతం 24. 8 మిలియన్ టన్నుల చక్కెరను వినియోగిస్తుండగా, మరో రెండేళ్లలో 28.5 మిలియన్ టన్నులకు పెరుగుతుందన్న అంచనాలున్నాయి.  మరో పదిహేనేళ్లలో మన దేశంలో  చక్కెర వినియోగం 52 మిలియన్ టన్నులు దాటుతుందన్న అంచనాలున్నాయి.  ప్రస్తుతం మన దేశ అవసరాలకు బొటాబొటీగా చక్కెర ఉత్పత్తి అవుతోంది. రాబోయే కాలంలో మన దేశీయ అవసరాలు తీరాలంటే అందుకు తగ్గట్టుగా చెరకు దిగుబడులు పెంచుకోవాల్సి వస్తుంది. 
ఆర్థికాభివృద్ధిలో చెరకు రైతుల పాత్ర అనన్యసామాన్యం
బేకరీ, కాండీ, స్వీట్స్, కూల్ డ్రింక్స్ తయారీదారులు 60శాతం చక్కెర కొనుగోలు చేస్తుండగా, బిస్కెట్, ఫుడ్ ప్రొడక్షన్, ఫార్మా స్యూటికల్ కంపెనీలు కూడా ప్రధాన వినియోగదారులుగా వున్నాయి. చెరకు రైతులు మన జిహ్వ చాపల్యానికి తగ్గట్టుగా వంటింటి అవసరాలు తీర్చడంలోనే కాకుండా ఇంకా అనేక పరిశ్రమలకు ఊపిరి పోస్తున్నారు. ఈ లెక్కన చూస్తే మనదేశ ఆర్థికాభివృద్ధిలో చెరకు రైతులు పోషిస్తున్న పాత్ర అనన్యసామాన్యమైనది. 
ప్రభుత్వాల ఉదాసీనత 
దేశాభివృద్ధికి ఇంతగాపాటు పడుతున్న చెరకు రైతుల సంక్షేమం విషయంలో ప్రభుత్వాలు ఉదాసీనంగా వ్యవహరిస్తుండడం బాధాకరం. పొలం నుంచి, షుగర్ ఫ్యాక్టరీకి తాము పండించిన చెరకును రవాణా చేయడం రైతులకు పెద్ద సమస్యగా మారుతోంది. ట్రాన్స్ పోర్టు చార్జీలు భారంగా మారుతున్నాయి. గ్రామీణ రోడ్లు సరిగా లేకపోవడం మరో శాపం. ఇన్ని కష్టాలు పడి ఫ్యాక్టరీ తరలిస్తే, అక్కడ దానిని అప్పగించడానికి రాత్రింబవళ్లు వేచి చూడాల్సిన పరిస్థితి. యాజమాన్యాలు సకాలంలో బిల్లులు చెల్లించవు. దేశవ్యాప్తంగా వివిధ ఫ్యాక్టరీలు రైతులకు 20 వేల కోట్ల రూపాయలు బకాయి పడ్డాయంటే చెల్లింపుల్లో ఎంత తీవ్ర జాప్యం జరుగుతున్నదో అర్ధం చేసుకోవచ్చు. బిల్లుల చెల్లింపుల్లో జరుగుతున్న తీవ్ర జాప్యాల కారణంగా, తాము తెచ్చుకున్న అప్పులకు వడ్డీలు పెరిగి రైతులు ఆర్థికంగా చితికిపోతున్నారు. 

 

Pages

Don't Miss

Subscribe to RSS - ప్రభుత్వాలు